ತೊಕ್ಕೊಟ್ಟು ಶ್ರೀ ನಾಗಕನ್ನಿಕಾ ರಕ್ತೇಶ್ವರಿ ದೈವೋಲ್ಯ ಅಂಬಾವನ ಮೂಲು ಪೊಸತಾದ್ ನಿರ್ಮಾಣ ಆಪುನ ಅಂಬಾಶ್ರಯ ವಸತಿ ಸಮುಚ್ಚಯಗ್ ನ.28 ಸೋಮಾರದಾನಿ ಕೆಸರ್ ಕಲ್ಲ್ ಪಾಡಿಯೆರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ತ್ ದ್ ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಆಡಳಿತ ಮಂಡಳಿ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುಡ್ಲದ ಪೆರ್ಮನ್ನೂರು ಪರಪು ಶ್ರೀ ಕ್ಷೇತ್ರ ತರವಾಡ್ ಡ್ ಡಿ.31 ಶನಿಯಾರದಾನಿ ವರ್ಷಾಧಿದ ಉಚ್ಚಯ ನಡಪರೆ ಉಂಡು.
ಆನಿ ಕಾಂಡೆ ಗಣಪತಿ ಹೋಮ, ಶ್ರೀದೇವಿ ಬೊಕ್ಕ ಪರಿವಾರ ದೈವಲೆಗ್ ಪ್ರಾರ್ತನೆ, ನಾಗತಂಬಿಲ, ಶ್ರೀ ಲಕ್ಷ್ಮೀ ವೆಂಕಟರಮಣ ದೇವೆರೆನ ಮುಡಿಪು ಶುದ್ಧ ಬೊಕ್ಕ ಮುಡಿಪು ಕಟ್ಟೆರೆ ಉಂಡು. ಬೊಕ್ಕ ಜುಮಾದಿ ದೈವದ ದರ್ಶನ, ಪ್ರಸಾದ ಪಟ್ಟುನ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾಸ್ರೋಡು ಜಿಲ್ಲೆಡ್ ಶ್ರೀ ಗೆಜ್ಜೆಗಿರಿ ಮೇಳದ ಸುರೂತ್ತ ಪದರ್ಶನ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ ಸಿ. ಟ್ರಸ್ಟ್ (ರಿ.) ಕಾಸ್ರೋಡು ಅಖಿಲ ಕರ್ನಾಟಕ ಜಿಲ್ಲಾ ಜನಜಾಗೃತಿ ವೇದಿಕೆ, ಕಾಸ್ರೋಡು ಜಿಲ್ಲೆ ಪ್ರಗತಿ ಬಂಧು ಸ್ವ-ಸಹಾಯ ಸಂಘಲೆನ ಒಕ್ಕೂಟಲು, ಪೈವಳಿಕೆ ವಲಯ ನೆತ್ತ ಸಹಕಾರೊಡು ಡಿ.31 ಶನಿಯಾರ ಬಯ್ಯಗ್ 6:30 ರ್ದ್ ಲಾಲ್ ಬಾಗ್, ಪೈವಳಿಕೆ ಮಂಜೇಶ್ವರಡ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಪನ್ಪಿನ ತುಳು-ಕನ್ನಡ ಯಕ್ಷಗಾನ ನಡಪರೆ ಉಂಡು.
ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೆರೆನ ಆಶೀರ್ವಾದೊಡು ಶ್ರೀ ಗೆಜ್ಜೆಗಿರಿ ಯಕ್ಷಗಾನ ಬಯಲಾಟ ಸಮಿತಿ, ಲಾಲ್ ಬಾಗ್ ಪೈವಳಿಕೆ ಜ್ಞಾನಜ್ಯೋತಿ ನವಜೀವನ ಸಮಿತಿ, ಲಾಲ್ ಬಾಗ್ ಪೈವಳಿಕೆ ವಲಯ ನೆತ್ತ 5 ನೇ ವರ್ಷದ ವಾರ್ಷಿಕ ಉಚ್ಚಯದ ಲೆಕ್ಕೊಡು ನಡಪುಂಡು ಪಂದ್ ಕಾಸ್ರೋಡು ಜಿಲ್ಲೆದ ಅಖಿಲ ಕರ್ನಾಟಕ ಜಿಲ್ಲಾ ಜನಜಾಗೃತಿ ವೇದಿಕೆದ ಅಧ್ಯಕ್ಷೆರ್ ಶ್ರೀ ಅಶ್ವಥ್ ಪೂಜಾರಿ ಲಾಲ್ ಬಾಗ್ ಲೆಪ್ಪೋಲೆಡ್ ತೆರಿಪಾದೆರ್.
20,000 ಜನ ಸೇರುನ ಅಂದಾಜಿ/
130 ಆಟ ಬುಕ್ಕಿಂಗ್/ 68,000 ₹ ವೀಳ್ಯ/
ಕುಡ್ಲ : ತುಳುನಾಡ ಬಿರ್ಸೆರ್ ಕೋಟಿ ಚೆನ್ನಯೆರ್ನ ಮೂಲಸ್ಥಾನ ಗೆಜ್ಜೆಗಿರಿ ನಂದನ ಬಿತ್ತ್ ಲ್ ಡ್ ನ.27 ನೇ ತಾರೀಕ್ ಗ್ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿ ಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಪನ್ಪಿನ ಪೊಸ ಯಕ್ಷಗಾನ ಮೇಳ ಉದಿಪನದ ಲೇಸ್ ಅಂಚೆನೆ ದೇವೆರ್ನ ಸುರೂತ್ತ ಸೇವೆ ಆಟ ನಡಪರೆ ಉಂಡು ಪಂದ್ ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ ತೆರಿಪಾಯೆರ್.
ಆರ್ ಕುಡ್ಲದ ಪತ್ರಿಕಾಭವನಡ್ ಅಂಗಾರೆ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ತೆರಿಪಾಯೆರ್. ಗೆಜ್ಜೆಗಿರಿ ಕ್ಷೇತ್ರದ ಬ್ರಹ್ಮಕಲಶ ಉಚ್ಚಯೊಗು ದೇಶ ವಿದೇಶೊರ್ದುಲ ಭಾರಿ ಸಂಖ್ಯೆಡ್ ಭಕ್ತೆರ್ ಜಾತಿ ಮತ ಬೇಧ ಎನ್ನಂದೆ ಸೇರ್ದಿನಂಚೆನೆ ಮೇಳ ಉದಿಪನದ ಲೇಸ್ ಡ್ ಲ ಎಚ್ಚಿನ ಸಂಖ್ಯೆಡ್ ಭಕ್ತೆರ್ ಪಾಲ್ ಪಡೆವುನ ಅಂದಾಜಿ ಉಂಡು ಪಂಡೆರ್. ನ.27 ಕ್ಕ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ನಂದನ ಬಿತ್ತ್ ಲ್ ಡ್ ಬೊಲ್ಪುಗು ದ್ವಾದಶ ನಾರಿಕೇಳ ಗಣಯಾಗ, ಮಹಾಪೂಜೆ, ಮಧ್ಯಾಹ್ನ ಅನ್ನಸಂತರ್ಪಣೆ, ಯಕ್ಷಗಾನ ನಾಟ್ಯ ವೈಭವ, ಬಯ್ಯಡ್ ದುರ್ಗಾ ನಮಸ್ಕಾರ, ಸಭಾ ಕಾರ್ಯಕ್ರಮ, ಮೇಳ ಉದಿಪನ, ಸಾಧಕೆರೆಗ್ ಮಾನಾದಿಗೆ, ಗೌರವಾರ್ಪಣೆ ನಡತಿ ಬೊಕ್ಕ ರಾತ್ರೆ 9.30 ಗು ಚೌಕಿ ಪೂಜೆ ಬೊಕ್ಕ ದೇವೆರ್ನ ಸುರೂತ್ತ ಸೇವೆದ ಆಟ ನಡಪರೆ ಉಂಡು ಪಂದ್ ಆರ್ ತೆರಿಪಾಯೆರ್. ಮೇಳ ಉದಿಪನ ಲೇಸ್ ಗ್ ಸುಮಾರ್ 20,000 ಸಾರ ಜನ ಪಾಲ್ ಪಡೆವುನ ಅಂದಾಜಿ ಉಂಡು. ಭಕ್ತೆರೆನ ಅನುಕೂಲೊಗು ಬೋಡಾದ್ ಮಾತಾ ಕಡೆರ್ದ್ ಲ ಸುಮಾರ್ 40-50 ಕೆಎಸ್ಸಾರ್ಟಿಸಿ ಬಸ್ ತ್ತ ವ್ಯವಸ್ಥೆ ಮಲ್ತ್ ದ. ಗಾಡಿಲೆಗ್ ಸರಿಯಾಯಿನ ಪಾರ್ಕಿಂಗ್ ವ್ಯವಸ್ಥೆ ಸೇರ್ದ್ ಮಾತಾ ಸವಲತ್ತ್ ಲೆನ್ ವ್ಯವಸ್ಥೆ ಮಲ್ತ್ ದ ಪಂದ್ ತೆರಿಪಾಯೆರ್. ಮೇಳ ಉದಿಪನದ ಲೇಸ್ ಡ್ ಆರ್ಯ ಈಡಿಗ ಮಹಾ ಸಂಸ್ಥಾನ ದ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಶ್ರೀ ಕ್ಷೇತ್ರ ಧರ್ಮಸ್ಥಳದ ಹರ್ಷೇಂದ್ರ ಕುಮಾರ್, ಶ್ರೀ ಕ್ಷೇತ್ರ ಕಟೀಲ್ ದ ಕಮಲಾ ದೇವಿ ಅಸ್ರಣ್ಣೆರ್ ಆಶೀರ್ವಚನ ಮಲ್ಪರೆ ಉಲ್ಲೆರ್. ಸಚಿವೆರಾಯಿನ ಕೋಟ ಶ್ರೀನಿವಾಸ ಪೂಜಾರಿ, ಸುನಿಲ್ ಕುಮಾರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಬಿಕೆ.ಹರಿಪ್ರಸಾದ್, ಶಾಸಕೆರಾಯಿನ ಸಂಜೀವ ಮಠಂದೂರು, ಉಮಾನಾಥ ಕೋಟ್ಯಾನ್, ಹರೀಶ್ ಕುಮಾರ್, ಮಾಜಿ ಶಾಸಕೆರ್ ವಸಂತ ಬಂಗೇರ, ಕುದ್ರೋಳಿ ಕ್ಷೇತ್ರದ ಪದ್ಮರಾಜ್ ಆರ್, ಕಟಪಾಡಿ ಕ್ಷೇತ್ರದ ಬಿ.ಎನ್.ಶಂಕರ ಪೂಜಾರಿ ಮೊಕುಲು ಮಾತ ಲೇಸ್ ಡ್ ಮಲ್ಲ ಬಿನ್ನೆರಾದ್ ಬರ್ರೆ ಉಲ್ಲೆರ್ ಪಂದ್ ಆರ್ ಪಂಡೆರ್. ಭಾರಿ ಪುಗರ್ತೆದ ಕಲಾವಿದೆರ್ ಮೇಳೊಡು ಉಲ್ಲೆರ್. ಭಾಗವತೆರಾದ್ ಗಿರೀಶ್ ರೈ ಕಕ್ಕೆಪದವು, ನಿರಂಜನ ಬಡಗಬೆಳ್ಳೂರು, ಮಹಿಷಾಸುರ ವೇಷೊಡು ಪುದರ್ ಪಡೆಯಿನ ಸತೀಶ್ ನೈನಾಡು, ಹಾಸ್ಯ ಕಲಾವಿದೆರಾದ್ ದಿನೇಶ್ ರೈ ಕಡಬ, ಚಂದ್ರಹಾಸ ತುಂಬೆ ಇಂಚ ಭಾರಿ ಪುಗರ್ತೆದ ಮಲ್ಲ ಮಲ್ಲ ಕಲಾವಿದೆರ್ ಮೇಳೊಡು ಉಲ್ಲೆರ್ ಪಂದ್ ಆರ್ ತೆರಿಪಾಯೆರ್. ಸುದ್ದಿಗೋಷ್ಠಿಡ್ ಗೆಜ್ಜೆಗಿರಿ ಕ್ಷೇತ್ರದ ಉಪಾಧ್ಯಕ್ಷೆರ್ ರವಿ ಪೂಜಾರಿ ಚಿಲಿಂಬಿ, ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಸಜೀಪ, ಕುಡ್ಲ ವಲಯದ ಸಂಚಾಲಕೆರ್ ಹರೀಶ್ ಕೆ. ಪೂಜಾರಿ, ವಕ್ತಾರೆರ್ ರಾಜೇಂದ್ರ ಚಿಲಿಂಬಿ, ಕಾರ್ಯದರ್ಶಿ ಚಂದ್ರಶೇಖರ ಉಚ್ಚಿಲ ಇತ್ತೆರ್.
130 ಆಟ ಬುಕ್ಕಿಂಗ್ :
ಗೆಜ್ಜೆಗಿರಿ ಮೇಳೊಗು ಈತ್ನ ಮುಟ್ಟ 130 ರ್ದುಲ ಎಚ್ಚದ ಸಂಖ್ಯೆಡ್ ಆಟ ಬುಕ್ಕಿಂಗ್ ಆತ್ಂಡ್. ಅಯಿಟ್ಟ್ 100 ಮುಟ್ಟ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ ಬುಕ್ ಆತ್ಂಡ್. ಬೊಂಬೈಡ್ 30 ಆಟ ಬುಕ್ ಆತ್ಂಡ್. ಅವ್ವತ್ತಾಂದೆ ವಿಶ್ವ ವ್ಯಾಪಕ ನಾಮ ಶ್ರೀ ರಾಮ ಬೊಕ್ಕ ಬ್ರಹ್ಮಕಲಶ ಪನ್ಪಿನ ಪೊಸ ರಡ್ಡ್ ಪ್ರಸಂಗೊಲೆನ್ ಮೇಳದ ಕಲಾವಿದೆರ್ ಗೊಬ್ಬುದು ತೋಜಾವರೆ ಉಲ್ಲೆರ್ ಪಂದ್ ಗೆಜ್ಜೆಗಿರಿ ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಸಜೀಪ ತೆರಿಪಾಯೆರ್.
68,000 ರೂ. ವೀಳ್ಯ:
ಗೆಜ್ಜೆಗಿರಿ ಮೇಳದ ಆಟೊನು ಕಾಲಮಿತಿ ಅಂಚೆನೆ ಇಡೀ ರಾತ್ರೆಲ ಗೊಬ್ಬರೆ ತಯಾರಾದುಂಡು. ಕ್ಷೇತ್ರ ಮಹಾತ್ಮೆ ಅತ್ತಾಂದೆ ಶ್ರೀ ದೇವಿ ಮಹಾತ್ಮೆ ಬೊಕ್ಕ ಬೇತೆ ಮಾತಾ ಪ್ರಸಂಗೊಲೆನ್ ಕನ್ನಡ ಅಂಚೆನೆ ತುಳು ಬಾಸೆಡ್ ಗೊಬ್ಬುದು ತೋಜಾವೆರ್. ಆಟ ಗೊಬ್ಬಾವರೆ 68,000 ರೂ. ವೀಳ್ಯ ಉಂಡು. ಅಯಿಟ್ಟ್ ರಂಗಸ್ಥಳ, ಸೌಂಡ್ ಬೊಕ್ಕ ಲೈಟಿಂಗ್ ಲ ಸೇರುಂಡು ಪಂದ್ ನವೀನ್ ಸುವರ್ಣ ತೆರಿಪಾಯೆರ್.
ಧರ್ಮಸ್ಥಳ: ಧರ್ಮಸ್ಥಳ ಗ್ರಾಮ ಪಂಚಾಯತ್ ದ ಮಾಜಿ ಅಧ್ಯಕ್ಷೆರ್ ಕಾಂಗ್ರೆಸ್ ಪಕ್ಷಡ್ ಸುಮಾರ್ ಎಡ್ಡೆ ಜಬದಾರಿನ್ ನಿರ್ವಹಿಸಿನ ಚಂದನ್ ಪ್ರಸಾದ್ ಕಾಮತ್ ಬಿಜೆಪಿಗ್ ಸೇರಿಯೆರ್.
ನಗರಾಭಿವೃದ್ಧಿ ಸಚಿವೆರ್ ಬೈರತಿ ಬಸವರಾಜ್ ಮೆರೆನ ದೋಸ್ತಿ ಆಯಿನ ಮೇರ್ ಸೋಮಾರ ಅರೆನ ಎದುರುಡು ಬಿಜೆಪಿ ಸೇರಿಯೆರ್. ಈ ಪೊರ್ತುಡು ಶಾಸಕೆರ್ ಹರೀಶ್ ಪೂಂಜ, ಬೆಂಗ್ಲೂರ್ ಬೃಹತ್ ಮಹಾನಗರ ಕಾರ್ಪೋರೇಟರ್ ಶ್ರೀಕಾಂತ್, ಜಯಪ್ರಕಾಶ್, ಬೊಕ್ಕ ಕೈತಲ್ ದ ಗ್ರಾ.ಪಂ ಮುಖಂಡೆರ್ ಇತ್ತೆರ್.
ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಷಷ್ಠಿ ಉಚ್ಚಯದ ಅಟ್ಟಣೆಲು ಮುಗಿಯೊಂದು ಬೈದ್ಂಡ್. ಆಯಿಟ್ ರಥ ಕಟ್ಟುವ ಕೆಲಸ, ಪೈಂಟಿಂಗ್, ಸ್ವಚ್ಛತೆ, ತಾದಿ ಬರಿಟ್ಟ್ ಲೈಟಿಂಗ್ ದ ಬೇಲೆ ಮುಗಿತ್ಂಡ್.
ನ.21ಕ್ ಬೊಲ್ಪುಗು ಕೊಪ್ಪರಿಗೆ ಏರುನ ಮುಖೇನ ಷಷ್ಠಿ ಉಚ್ಚಯ ಸುರು ಆಪುಂಡು. ರಾತ್ರಿ, ಶೇಷವಾಹನ ಉಚ್ಚಯ ನಡಪರೆ ಉಂಡು. ನ.22 ರಾತ್ರೆ ಶೇಷವಾಹನ ಬಂಡಿ ಉಚ್ಚಯ ನಡಪುಂಡು, ನ.23 ಬಯ್ಯಗ್ ಲಕ್ಷದೀಪ ಉಚ್ಚಯ ನಡಪುನ ಪೊರ್ತುಡು ನೂದೆರ್ದ್ ಲ ಎಚ್ಚ ಭಜನೆ ತಂಡಲೆರ್ದ್ ನಲಿಕೆ ಭಜನೆ ನಡಪರೆ ಉಂಡು. ರಾಜಗೋಪುರರ್ದ್ ಸುರು ಆದ್ ಕುಮಾರಧಾರ ಮುಟ್ಟ ನಲಿಕೆ ಭಜನೆ ನಡಪುಂಡು. ನ.24 ಕ್ ಶೇಷ ವಾಹನ ಉಚ್ಚಯ, ನ.25 ಕ್ ಅಶ್ವವಾಹನ ಉಚ್ಚಯ, 26 ಗ್ ಮಯೂರ ವಾಹನ ಉಚ್ಚಯ, ನ.27 ಕ್ ಪೂತ್ತ ತೇರ್ ದ ಉಚ್ಚಯ, ನ.28 ಕ್ ಪಂಚಮಿ ರಥ ಉಚ್ಚಯ, ತೈಲಾಭ್ಯಂಜನ ನಡಪುಂಡು. ಬೊಕ್ಕ ನ.29 ಕ್ ವೈಭವರ್ದ್ ಚಂಪಾಷಷ್ಠಿ ಮಹಾರಥ ಉಚ್ಚಯ, ಬೊಕ್ಕ ನ.30 ಕ್ ಬೊಲ್ಪುಗು ಅವಭೃತೋತ್ಸವ, ನೌಕಾವಿಹಾರ ನಡಪರೆ ಉಂಡು.
(ವರದಿ : ಗೋಪಿಚಂದನ ಕೆ.ಎಸ್.)
ಕುಡ್ಲ: ಪ್ರಮುಖ ಗ್ರಾಮೀಣ ಬ್ಯಾಂಕ್ ಆದಿಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್, ಅಟಲ್ ಪಿಂಚಣಿ ಯೋಜನೆದ (ಏಪಿವೈ) ಅನುಷ್ಠಾನಗ್ ಸಂಬಂಧ ಪಟ್ಟಿನಂಚ 2022-2023ತ ಕಾಲಡ್ ಮಲ್ತಿನ ಎಡ್ಡೆ ಸಾಧನೆಗ್ ಕುಡೊರ ರಾಷ್ಟ್ರಮಟ್ಟದ ಪ್ರಶಸ್ತಿ ತಿಕ್ಕ್ ದ್ಂಡ್.
ಸೋಮಾರ ದಿಲ್ಲಿ ನಡತಿನ ಇಸೇಸ ಲೇಸ್ ಡ್ ಬ್ಯಾಂಕ್ ಅಧ್ಯಕ್ಷೆರ್ ಪಿ. ಗೋಪಿಕೃಷ್ಣ ಮೇರ್ ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರದ (ಪಿ ಎಫ್ ಆರ್ ಡಿ ಎ) ಅಧ್ಯಕ್ಷೆರ್ ಸುಪ್ರತಿಮ್ ಬಂಡೋಪಾಧ್ಯಾಯ ಮೇರೆರ್ದ್ ಪ್ರಶಸ್ತಿ ದೆತೊಂಡೆರ್. ಪ್ರಶಸ್ತಿ ದೆತೊಂದು ಪಾತೆರಿನ ಮೇರ್, ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಆರ್ಥಿಕವಾದ್ ಪಿರವು ಒರಿನ ಬೊಕ್ಕ ಕಡಿಮೆ ಆದಾಯದ ಇಪ್ಪುನ ವರ್ಗಲೆಗ್ ಪನವುದ ಸೇವೆನ್ ಕೊರಿಯೆರ್ ಬ್ಯಾಂಕ್ ಪರಮಾದ್ಯತೆ ಕೊರ್ತುಂಡು. ಅಟಲ್ ಪೆನ್ಶನ್ ಯೋಜನೆ ಅಸಂಘಟಿತ ಕಾರ್ಮಿಕ ವರ್ಗಗ್ ವರದಾನ ಆತ್ಂಡ್. ನಿರ್ದಿಷ್ಟ ಮಲ್ತಿನ ಕಂತ್ ನ್ ಕೊರ್ದು, 61 ನೇ ವರ್ಷರ್ದ್ ರೂ.1000/- ರ್ದ್ ರೂ.5000/- ಮಿತಿಟ್ ಪಿಂಚಣಿನ್ ದೆತೊನೊಲಿ. ಕರ್ನಾಟಕ ವಿಕಾಸ್ ಗ್ರಾಮೀಣ ಬ್ಯಾಂಕ್ ಇಡೆ ಮುಟ್ಟ 3,34,687 ಅಟಲ್ ಪಿಂಚಣಿ ಅಕೌಂಟ್ ಮಲ್ದ್ಂಡ್. ಈ ದಾಖಲೆರ್ದ್ ರೈತೆರ್, ರೈತಕಾರ್ಮಿಕೆರ್, ಕಾರ್ಖಾನೆಲೆಡ್ ಬೆಂದ್ ದೆರ್. ನಿಶ್ಚಿತ ಪಿಂಚಣಿ ಇಜ್ಜಂದೆ ಶ್ರಮಿಕೆರ್ ತನ್ನ 60 ನೇ ವರ್ಷದ ಬೊಕ್ಕ ನಿಶ್ಚಿಂತ ಬದ್ ಕ್ ಸಾಗರೆ ಅನುಕೂಲ ಆಪುಂಡು ಪನ್ಪುನವೇ ಸಮಾಧಾನದ ಇಷಯ ಪಂದ್ ಗೋಪಿಕೃಷ್ಣ ಮೇರ್ ಪಂಡೆರ್. ಬೊಕ್ಕ ಪ್ರಶಸ್ತಿ ಸ್ವೀಕಾರ ಮಲ್ತಿನ ಬಗೆಟ್ ಪಾತೆರಿನ ಮೇರ್, ಪ್ರಶಸ್ತಿ ಬ್ಯಾಂಕ್ ದ ಗೌರವ ಹೆಚ್ಚ ಮಲ್ದ್ಂಡ್ ಪಂದ್ ಪಂಡೆರ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ 2022-23 ನೇ ಹಣಕಾಸು ವರ್ಷಡ್ ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರ (ಪಿ ಎಫ್ ಆರ್ ಡಿ ಎ) ಬ್ಯಾಂಕ್ ಗ್ ಪ್ರತಿ ಶಾಖೆಗ್ 80 ಅಕೌಂಟ್ ದ ಸರಾಸರಿಟ್ 50320 ಅಕೌಂಟ್ ದ ಗುರಿ ದೀದಿತ್ತ್ಂಡ್. ಆಯಿಕ್ ಪ್ರತಿಯಾದ್ ಬ್ಯಾಂಕ್ ನವೆಂಬರ್ ತಿಂಗೊಲ್ಡ್ 110ತ ಸರಾಸರಿಟ್ 69132 ಅಕೌಂಟ್ ಮಲ್ಪುನ ಮುಖೇನ ಗುರಿ ಮೀರಿನ ಸಾಧನೆ ಮಲ್ದ್ಂಡ್. ಉಂದು ದಕ್ಷಿಣ ಭಾರತ ಮಟ್ಟಡ್ ಒರಿನ ಬ್ಯಾಂಕುಲೆನ ಸರಾಸರಿರ್ದ್ ಹೆಚ್ಚತ್ಂಡ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಕರಿನ ಮೇ ತಿಂಗೊಲ್ಡ್ ಒಂಜೇ ದಿನ 44000 ರ್ದ್ ದೆಚ್ಚ ಅಕೌಂಟ್ ಲಾಗಿನ್ ಮಲ್ಪುನ ಮುಖೇನ ರಾಷ್ಟ್ರೀಯ ದಾಖಲೆ ಸ್ಥಾಪನೆ ಮಲ್ತಿನೆನ್ ಮುಲ್ಪ ನೆನೆಪೊಲಿ. ಇತ್ತೆದ ಕರ್ನಾಟಕ ವಿಕಾಸ್ ಗ್ರಾಮೀಣ ಬ್ಯಾಂಕ್ ಕುಡ್ಲರ್ದ್ ವಿಜಯಪುರ ಮುಟ್ಟ 9 ಜಿಲ್ಲೆಲೆನ ಕಾರ್ಯ ಪರಿಧಿಡ್ 629 ಶಾಖೆಲು ಉಲ್ಲ.30700 ಕೋಟಿ ರೂ. ವಹಿವಾಟು ಮಲ್ತೊಂದು ಉಂಡು.
ಕುಂದಾಪುರ: ಫೇಸ್ ಬುಕ್ ಮುಖೇನ ಗುರ್ತ ಆಯಿನ ದೋಸ್ತಿ ಒರಿ ಯಕ್ಷಗಾನ ಕಲಾವಿದನ ಇಲ್ಲದ ಬೀಗ ಪುಡಾತ್ ದ್ ಸಾರ ಸಾರ ರೂ. ಬಿಲೆತ ಬಂಗಾರ್ ಕಂಡಿನ ಘಟನೆ ಬೈಂದೂರ್ ತಾಲೂಕ್ ದ ಶಿರೂರ್ ಗ್ರಾಮಡ್ ನಡತ್ಂಡ್.
ಶಿರೂರ್ ಗ್ರಾಮದ ಮೇಲ್ಪೇಟೆ ನಿವಾಸಿ ಸಂತೋಷ ಮೊಗವೀರ(34) ಮೆರೆನ ಇಲ್ಲಲ್ ಕಂಡ್ದೆರ್. ಮೇರ್ ಯಕ್ಷಗಾನ ಕಲಾವಿದೆರಾದ್, ಚಿಕ್ಕ ಮೇಳ ನಡಪಾವೊಂದು ಇತ್ತೆರ್. ಮೇರ್ ಮೇಳದ ಸೊತ್ತುಲೆನ ಒಟ್ಟಿಗೆ ಶಿರೂರ್ ಗ್ರಾಮದ ಶಿರೂರ್ ಮೇಲ್ಪೆಟೆದ ಸುಭಾಷ್ ಪ್ರಭು ಮೆರೆನ ಒಂಜಿ ರೂಮ್ ಡ್ ವಾಸ ಆದಿತ್ತೆರ್. ಮೆರೆಗ್ ರಡ್ಡ್ ವರ್ಷದ ಪಿರವು ಫೇಸ್ ಬುಕ್ ಡ್ ಗುರುರಾಜ್ ಪನ್ಪಿನರೆನ ಗುರ್ತ ಆದಿತ್ತ್ಂಡ್. ನ.9ಕ್ ಸಂತೋಷ್ ಮೆರೆನ ರೂಮ್ ಗ್ ಬತ್ ದ್ ಒಟ್ಟಿಗೆ ಇತ್ತಿನ ದೋಸ್ತಿ ಬೊಕ್ಕ ಸಂತೋಷ್ ಮೆರೆನ ರೂಮ್ ಡ್ ಬ್ಯಾಗ್ ಡ್ ದೀದಿತ್ತಿನ 12 ಗ್ರಾಂ ತೂಕದ ಬಂಗಾರ್ದ ಚೈನ್, 4 ಗ್ರಾಂ ತೂಕದ ಬಂಗಾರ್ ದ ಉಂಗಿಲ, ಕಾಣಿಕೆ ಡಬ್ಬಿಡ್ ಇತ್ತಿನ 10 ಸಾರ ಕಾಸ್, ಕುಡೊಂಜಿ ಡಬ್ಬಿಡ್ 1 ಸಾರ ರೂ. ಕಾಸ್ ಬೊಕ್ಕ 14 ಸಾರ ಬಿಲೆತ ರಿಯಲ್ಮೀ ಮೊಬೈಲ್ ಫೋನ್ ನ್ ಕಂಡ್ ದ್ ಬಲಿತ್ದೆರ್. ಕಂಡಿನ ಸೊತ್ತುಲೆನ ಒಟ್ಟು ಬಿಲೆ 85 ಸಾರ ರೂ. ಆತ್ಂಡ್ ಪಂದ್ ದೂರುಡ್ ತೆರಿಪಾದೆರ್. ಈ ಬಗೆಟ್ ಬೈಂದೂರ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಬೆದ್ರ: ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಬೆದ್ರ ಪ್ರಖಂಡದ ವತಿರ್ದ್ ನಡತಿನ “ಗೋವಿಗಾಗಿ ಹೊರೆಕಾಣಿಕೆ ಅರ್ಪಣೆ” ಲೇಸ್ ಗ್ ಆಲಂಗಾರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಐತಾರ ಉದಿಪನ ಮಲ್ತೆರ್.
ಈ ಪೊರ್ತುಡು ದಕ್ಷಿಣ ಕನ್ನಡ ಹಾಲು ಉತ್ಪದಕೆರೆ ಒಕ್ಕೂಟದ ಅಧ್ಯಕ್ಷೆರ್ ಕೆ. ಪಿ. ಸುಚರಿತ್ ಶೆಟ್ಟಿ ಪುರಸಭೆ ಅಧ್ಯಕ್ಷೆರ್ ಪ್ರಸಾದ್ ಕುಮಾರ್, ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ನಾಗರಾಜ್ ಪೂಜಾರಿ, ವಿಶ್ವ ಹಿಂದೂ ಪರಿಸತ್ ಬೆದ್ರ ಪ್ರಖಂಡದ ಕಾರ್ಯಾಧ್ಯಕ್ಷೆರ್ ಶ್ಯಾಮ ಹೆಗ್ಡೆ, ಕಾರ್ಯದರ್ಶಿ ಸುಚೇತನ್ ಜೈನ್, ಸಹ ಕಾರ್ಯದರ್ಶಿ ರಕ್ಷಿತ್, ಸತ್ಸಂಗ್ ಪ್ರಮುಖ ಶೇಖರ ಪುತ್ತಿಗೆ, ಬೆದ್ರ ಬಜರಂಗದಳ ಸಂಯೋಜಕೆರ್ ಅಭಿಲಾಶ್ ಅರ್ಜುನಪುರ, ಗೋರಕ್ಷಾ ಪ್ರಮುಖೆರ್ ಅವಿನಾಶ್, ಸಂಪರ್ಕ ಪ್ರಮುಖೆರ್ ಪ್ರವೀಣ್ ಕೆ, ಅಖಾಡ ಪ್ರಮುಖೆರ್ ಸಂಜಯ ಹೆಗ್ಡೆ, ಸುರಕ್ಷಾ ಪ್ರಮುಖೆರ್ ಧನಂಜಯ, ನಗರ ಸಂಯೋಜಕೆರ್ ವಿಜೇಶ್, ಬೊಕ್ಕ ಸಂಘ ಪರಿವಾರದ ಹಿರಿಯೆರ್ ಇತ್ತೆರ್.
ಕುಡ್ಲ: ಕುಡ್ಲ-ಅತ್ರಾಡಿ ರಾಜ್ಯ ಮಾರ್ಗದ ಸಂಖ್ಯೆ 67ತ 16.20 ಕಿ.ಮೀ. ರ್ದ್ 19 ಕಿ.ಮೀ. ಮುಟ್ಟ ಮಾರ್ಗ ಅಭಿವೃದ್ಧಿ ಕಾಮಗಾರಿ ಸುರು ಆಯೆರೆ ಉಂಡು.
ಮಾರ್ಗಡ್ ಗಾಡಿ ಸಂಚಾರಗ್ ನಿಷೇಧ ಆದೇಶ ಬೊಕ್ಕ ಸಾರ್ವಜನಿಕೆರೆನ ಸಂಚಾರೊಗು ಬೊಕ್ಕ ಗಾಡಿಲೆನ ಸುಗಮ ಸಂಚಾರಗ್ ಬದಲಿ ಮಾರ್ಗದ ವ್ಯವಸ್ಥೆ ಮಲ್ಪಿ ಪಂದ್ ಅಪರ ದಂಡಾಧಿಕಾರಿಲು ಆದಿಪ್ಪುನ ಪೊಲೀಸ್ ಆಯುಕ್ತೆರ್ ಎನ್. ಶಶಿಕುಮಾರ್ ಆದೇಶ ಮಲ್ದೆರ್. ಕಟೀಲ್ ಕಡೆರ್ದ್ ಕುಡ್ಲಗ್ ಬರ್ಪಿನ ಗಾಡಿಲು ಬಜಪೆ ಚರ್ಚ್ ಜಂಕ್ಷನ್ ಡ್ ಎಡತ್ತ ಮೆಯಿಕ್ಕ್ ತಿರ್ಗ್ ದ್ ಬಜಪೆ ಠಾಣೆದ ಎದುರುದ ಪರತ್ತ್ ವಿಮಾನ ನಿಲ್ದಾಣ ಮಾರ್ಗವಾದ್ ಮುರ ಜಂಕ್ಷನ್, ಕಿನ್ನಿಪದವು ಮಾರ್ಗದ ಮುಖೇನ ಕುಡ್ಲಗ್ ಬರ್ಪುಂಡು. ಕುಡ್ಲರ್ದ್ ಕಟೀಲ್ ಕಡೆಕ್ ಪೋಪುನ ಗಾಡಿಲು ಕುಡ್ಲರ್ದ್ ಮರವೂರು ಸಂಕ, ಕೆಂಜಾರ್ ಮಾರ್ಗವಾದ್ ಕಿನ್ನಿಪದವು ಜಂಕ್ಷನ್ ಡ್ ಬಲಕ್ ತಿರ್ಗ್ ದ್ ದ್ ಮುರ ಜಂಕ್ಷನ್, ಬಜಪೆ ಪೊಲೀಸ್ ಸ್ಟೇಷನ್ ಎದುರುಡೇ ಬಜಪೆ ಚರ್ಚ್ ಜಂಕ್ಷನ್ ಮಾರ್ಗದ ಮುಖೇನ ಕಟೀಲ್ ಕಡೆಕ್ ಪೋಪೊಂಡು ಪಂದ್ ಆದೇಶಡ್ ತೆರಿಪಾದೆರ್.
