ಸ್ಯಾಂಡಲ್ ವುಡ್ ನಟಿ ಆಶಿಕಾ ರಂಗನಾಥ್ ಮೆರೆಗ್ ಪುಗರ್ತೆದ ಕರ್ನಾಟಕ ಮಹಿಳಾ ಸಾಧಕಿ ಪ್ರಶಸ್ತಿ ತಿಕ್ ದ್ಂಡ್.
ಬೇತೆ ಬೇತೆ ಕ್ಷೇತ್ರಲೆಡ್ ಸಾಧನೆ ಮಲ್ತಿನ ಪೊಂಜೋವ್ ನಕ್ಲೆಗ್ ಪ್ರತಿ ವರ್ಷ ಈ ಪ್ರಶಸ್ತಿನ್ ಕೊರ್ಪೆರ್. ಈ ವರ್ಷ ಆಶಿಕಾಗ್ ಪ್ರಶಸ್ತಿ ತಿಕ್ ದ್ಂಡ್. ಬೆಂಗ್ಲೂರ್ ಡ್ ನಡತಿನ ಲೇಸ್ ಡ್ ಅಶ್ವಿನಿ ಪುನೀತ್ ಪ್ರಶಸ್ತಿ ಪ್ರದಾನ ಮಲ್ತಿನ ಪೋಟೋನ್ ಆಶಿಕಾ ಶೇರ್ ಮಲ್ದೆರ್.
ಬೆದ್ರ: ಗ್ರಾಮೀಣ ಸಂಸ್ಕೃತಿನ್ ತೂಪಾವುನ ಕಂಬುಲ ಕ್ರೀಡೆ ಮಾತ್ರ ಅತ್ತ್ ಅವು ಗ್ರಾಮೀಣ ಬದ್ ಕ್ ಗ್ ಸಗ್ತಿ ಕೊರ್ಪಿನ ಕಲೆ. ಬಿರ್ಸ್, ತಂಕ ಬೊಕ್ಕ ಗೇನ ಇಪ್ಪುನ ಕಂಬುಲ ತನ್ನನೇ ಆಯಿನ ಶೈಲಿಡ್ ಉಂಡು. ನನ ಒಂಜಿ ದಿನ ಭಾರತದ ಮಾತ ರಾಜ್ಯಲೆಡ್ ಕಂಬುಲ ನಡಪರೆ ಉಂಡು. ವಿದೇಶಡ್ ಲ ಕಂಬುಲ ನಡಪುನ ದಿನ ಬರ್ಪುಂಡು ಪಂದ್ ರಾಜ್ಯದ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಪಂಡೆರ್.
ಮೇರ್ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮೆರೆನ ಮುತಾಲಿಕೆಡ್ ಒಂಟಿಕಟ್ಟೆದ ಕಡಲಕೆರೆ ನಿಸರ್ಗಧಾಮ, ವೀರರಾಣಿ ಅಬ್ಬಕ್ಕರಾಣಿ ಸಂಸ್ಕೃತಿ ಗ್ರಾಮಡ್ ನಡತೊಂದು ಇಪ್ಪುನ 20ನೇ ವರ್ಷದ ಬೆದ್ರದ ಪುಗರ್ತೆದ ಫ್ಲಡ್ ಲೈಟ್ ಕೋಟಿ-ಚೆನ್ನಯ ಕಂಬುಲಡ್ ಐತಾರ ಪಾಲ್ ಪಡೆದ್ ಪಾತೆರಿಯೆರ್.
ಈ ಪೊರ್ತುಡು ಕಂಬುಲ ಸಮಿತಿರ್ದ್ ಮುಖ್ಯಮಂತ್ರಿನ್ ತಮ್ಮನ ಮಲ್ತೆರ್.
ಉಸ್ತುವಾರಿ ಸಚಿವೆರ್ ವಿ. ಸುನಿಲ್ ಕುಮಾರ್, ಸಚಿವೆರಾಯಿನ ಸಿ. ಟಿ ರವಿ, ನಾರಾಯಣ ಗೌಡ, ಶಿಕ್ಷಣ ಸಚಿವೆರ್ ನಾಗೇಶ್, ಜಿಲ್ಲಾಧಿಕಾರಿ ರವಿ ಕುಮಾರ್, ಪುರಸಭಾ ಅಧ್ಯಕ್ಷೆರ್ ಪ್ರಸಾದ್ ಕುಮಾರ್ ಸ್ಥಾಯಿ ಸಮಿತಿ ಅಧ್ಯಕ್ಷೆರ್ ನಾಗರಾಜ್ ಪೂಜಾರಿ, ಸಹಾಯಕೆರ್ ಅರಣ್ಯ ಸಂರಕ್ಷಣಾಧಿಕಾರಿ ಸತೀಶ್ ಕೆ., ವಲಯಾರಣ್ಯಧಿಕಾರಿ ಹೇಮಗಿರಿ ಅಂಗಡಿ, ಪೊಲೀಸ್ ವರಿಷ್ಠಾಧಿಕಾರಿ, ಕಂಬುಲ ಸಮಿತಿದ ಪ್ರಧಾನ ಕಾರ್ಯದರ್ಶಿ ಗುಣಪಾಲ್ ಕಡಂಬ, ಭಾಸ್ಕರ್ ಎಸ್. ಕೋಟ್ಯಾನ್ ಇತ್ತೆರ್. ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಎದ್ಕೊನಿಯೆರ್.
✍️ಜಗದೀಶ್ ಪೂಜಾರಿ
ಬೆದ್ರ
ಕುಡ್ಲ ಸಾಹಿತ್ಯಾ ಪ್ರಕಾಶನದ ನಿಲೆಟ್ ರಾಜೇಶ್ ಶೆಟ್ಟಿ ದೋಟ ಮೆರೆನ ಮುಗದಾರಗೆ ಕಬಿತೆ ಗೊಂಚಿಲ್ ಬುಡುಗಡೆ ಲೇಸ್ ಡಿ. 28 ಬುಧಾರದಾನಿ ಕಾಂಡೆ 10:30 ಕ್ ಕುಡ್ಲ ಪ್ರೆಸ್ ಕ್ಲಬ್ ದ ಪ್ರತಿಕಾ ಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಕುಡ್ಲ ಆಕಾಶವಾಣಿ, ಸಾಹಿತಿ, ಕಬಿ ಡಾ. ವಸಂತಕುಮಾರ ಪೆರ್ಲ ಬೂಕು ಬುಡುಗಡೆ ಮಲ್ಪೆರೆ ಉಲ್ಲೆರ್. ಎಂಆರ್ ಪಿಎಲ್ ಒಎನ್ ಜಿಸಿ ಜನರಲ್ ಮ್ಯಾನೇಜರ್, ಸಿಎಸ್ ಆರ್ ವೀಣಾ ಟಿ.ಶೆಟ್ಟಿ ಗುರ್ಕಾರ್ಮೆ ಒಯಿಸೊನ್ವೆರ್. ಕೃತಿ ಪೊಲಬುನ್ ಸಾಹಿತಿ, ಕಬಿ, ಪ್ರಾಧ್ಯಾಪಕೆರ್ ರಘ ಇಡ್ಕಿದು ಮಲ್ಪುವೆರ್. ಹಿರಿಯ ಪತ್ರಕರ್ತೆರ್ ಪಿ.ಬಿ ಹರೀಶ್ ರೈ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.
ಪೆಜಮಾಡಿ : ಬಿಲ್ಲವ ಬ್ರಿಗೇಡ್ ಕೇಂದ್ರೀಯ ಮಂಡಳಿ ಕುಡ್ಲ ನೆತ್ತ ಮುತಾಲಿಕೆಡ್ ನಡತಿನ ವರ್ಲ್ಡ್ ಬಿಲ್ಲವ ಪ್ರೀಮಿಯರ್ ಲೀಗ್- 2022 ನೆತ್ತ ನಂದಾದೀಪ ಟ್ರೋಫಿ ಬೊಕ್ಕ 2 ಲಕ್ಷ ರೂ. ಸುರೂತ್ತ ಇನಾಮುನು ಬೆಂಗಳೂರು ಬಿಲ್ಲವಾಸ್ ಕೂಟದಕುಲು ಗೆಂದ್ ದೆರ್.
ಪೆಜಮಾಡಿ ಬಸ್ತಿ ಪಡ್ಪು ರಾಜೀವ್ ಗಾಂಧಿ ಕ್ರೀಡಾಂಗಣಡ್ ಐತಾರ ನಡತಿನ ಈ ಲೀಗ್ ಮ್ಯಾಚ್ ಡ್ ಯುವ ನಾಯಕೆರ್ ಮೋಹನ್ ಕೋಟ್ಯಾನ್ ಮಾಲಿಕೆರಾದಿತ್ತಿನ , ಪ್ರಮೋದ್ ಪೂಜಾರಿ ಸಸಿಹಿತ್ಲು ಕ್ಯಾಪ್ಟನ್ ಆದಿತ್ತಿನ ಬೆಂಗಳೂರು ಬಿಲ್ಲವಾಸ್ ಟೀಮ್, ಕತಾರ್ ಬಿಲ್ಲವಾಸ್ ಟೀಮ್ ಎದುರು ಟ್ರೋಫಿ ಗೆಂದ್ಂಡ್. ಬೆಂಗ್ಲೂರು ಬಿಲ್ಲವಾಸ್ ದ ತರುಣ್ ಪಡುಬಿದ್ರಿ ಮ್ಯಾನ್ ಆಫ್ ದ ಸಿರೀಸ್ ಪ್ರಶಸ್ತಿ ಪಡೆಯೆರ್. ಕಾಂಡೆ ಗುರುಬೆಳದಿಂಗಳು ಫೌಂಡೇಶನ್ ಅಧ್ಯಕ್ಷೆರ್, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ಮೇರ್ ವರ್ಲ್ಡ್ ಬಿಲ್ಲವಾಸ್ ಪ್ರೀಮಿಯರ್ ಲೀಗ್ 2022 ಪಂತೊನು ಉದಿಪನ ಮಲ್ತೆರ್. ಈ ಪೊರ್ತುಡು ಪಾತೆರಿನ ಆರ್, ಬಿಲ್ಲವ ಬ್ರಿಗೇಡ್ ಆಯೋಜನೆ ಮಲ್ತಿನ ನಂದಾದೀಪ ವಸತಿ ಯೋಜನೆದಡಿಟ್ ಹಿಂದುಳಿದ ವರ್ಗದ ಕುಟುಂಬಲೆಗ್ ಸುರುತ ಪಂತೆಡ್ 14 ಇಲ್ಲ್ ಲೆನ್ ನಿರ್ಮಾಣ ಮಲ್ತ್ ದ್ ಕೊರ್ಪುನ ಬೇಲೆ ಮೆಚ್ಚೊಡಾಯಿನವು ಪಂದ್ ಪಂಡೆರ್. ಯುವ ನಾಯಕೆರ್ ಮಿಥುನ್ ರೈ ಪಾತೆರ್ದ್, ಬಿಲ್ಲವ ಬ್ರಿಗೇಡ್ ಕರಿನ ಕೆಲವು ವರ್ಷೊರ್ದಿಂಚ ಶೈಕ್ಷಣಿಕ , ಧಾರ್ಮಿಕ ಬೊಕ್ಕ ಸಾಮಾಜಿಕ ಕ್ಷೇತ್ರಲೆಡ್ ಸೇವಾ ಕಾರ್ಯಲೆನ್ ಮಲ್ತೊಂದು ಉಂಡು ಪಂದ್ ಪಂಡೆರ್. ಈ ಪೊರ್ತುಡು ಸಮಾಜ ಸೇವೆಗಾದ್ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಕೆ ಸೇಸಪ್ಪ ಕೋಟ್ಯಾನ್ ಪಚ್ಚಿನಡ್ಕ, ಉದ್ಯಮಿಲಾಯಿನ ಎನ್.ಟಿ ಪೂಜಾರಿ, ರಿಚರ್ಡ್ ಲೋಬೋ ಮೊಕ್ಲೆಗ್ ತಮ್ಮನ ನಡತ್ಂಡ್.
ಅವ್ವತ್ತಾಂದೆ ಬಿಲ್ಲವ ಬ್ರಿಗೇಡ್ ಸಂಘಟನೆದ ನಂದಾದೀಪ ವಸತಿ ಯೋಜನೆಡ್ ನಿರ್ಮಾಣ ಮಲ್ತಿನ ಪೊಸ ಇಲ್ಲ್ ದ ಚಾಬಿನ್ ವೀಣಾ ಬೆಳ್ಚಡ ಅಡ್ಯಾರ್ ಪದವು ಮೆರೆಗ್ ಕೊರಿಯೆರ್. ಕುಡ್ಲ, ಬೆಂಗ್ಲೂರ್, ಒಡಿಪು, ಬೊಂಬೈ, ಪುಣೆ, ಲಂಡನ್, ದುಬೈ ಬೊಕ್ಕ ಕತಾರ್ ಬಿಲ್ಲವ ಕೂಟದಕುಲು ಡಬ್ಲ್ಯೂಬಿಪಿಎಲ್ ಡ್ ಪಾಲ್ ಪಡೆದಿತ್ತ್ಂಡ್. ಸಂದೇಶ ರಾಜ್ ಬಂಗೇರ ತಂಡದ ಸಂಯೋಜಕೆರಾದಿತ್ತೆರ್. ಈ ಪೊರ್ತುಡು ನಾರಾಯಣಗುರು ಇಚಾರ ವೇದಿಕೆ ರಾಜ್ಯಾಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್, ಗೀತಾಂಜಲಿ ಸುವರ್ಣ, ಉದ್ಯಮಿ ಸೂರಜ್ ಕಲ್ಯಾ, ಸದಾನಂದ ಪೂಜಾರಿ, ನಟೆ ರಾಹುಲ್ ಅಮೀನ್, ವಿನೀತ್ ಕುಮಾರ್, ಹಿರಿಯೆರ್ ಆರ್.ಕೆ ಬಂಗೇರ, ಬಿಲ್ಲವ ಸಮಾಜದ ಪ್ರಮುಖೆರ್ ವಿಶ್ವನಾಥ್ ಕಟ್ತಲಾ ಪುಣೆ, ಸಂದೇಶ್ ಪೂಜಾರಿ ಪುಣೆ, ವಾಸುದೇವ್ ಕೋಟ್ಯಾನ್, ಪ್ರಬೋದ್ ಚಂದ್ರ ಪೆಜಮಾಡಿ, ಹರೀಶ್ ಶಾಂತಿ ಬೊಂಬೈ, ದಯಾಕರ್ ಪೂಜಾರಿ ಕುಳಾಯಿ, ಉಮಾನಾಥ್ ಅಮೀನ್ ಕಾಟಿಪಳ್ಳ, ಶರಣ್ ಪಂಪ್ವೆಲ್, ಗುರ್ಮೆ ಸುರೇಶ್ ಶೆಟ್ಟಿ, ಸತೀಶ್ ಮುಂಚೂರು ಬೊಕ್ಕ ಬಿಲ್ಲವ ಸಮಾಜ ಬೊಕ್ಕ ಬಿಲ್ಲವ ಬ್ರಿಗೇಡ್ ದ ಮಾತ ಪ್ರಮುಖೆರ್ ಇತ್ತೆರ್. ಆರ್ಜೆ ಅನುರಾಗ್ ಬಂಗೇರ ಲೇಸ್ ಸುಧಾರಿಕೆ ಮಲ್ತೆರ್. ಅವಿನಾಶ್ ಸುವರ್ಣ ಎದ್ಕೊನಿಯೆರ್. ಕಿಶನ್ ಅಮೀನ್ ಸೊಲ್ಮೆ ಸಂದಾಯೆರ್.
ಮೂಲ್ಕಿ : ಬಿಲ್ಲವ ಸಮುದಾಯ ಕಾಲಿ ರಾಜಕೀಯ ನಾಯಕೆರಾಯರೆ ಪೋವಂದೆ ಸಾಮಾಜಿಕ, ಶೈಕ್ಷಣಿಕ ಬೊಕ್ಕ ಧಾರ್ಮಿಕ ಕ್ಷೇತ್ರಡ್ ಎಡ್ಡೆ ನಾಯಕೆರಾವೊಡು, ಅಕ್ಲೆನ್ ಬುಳೆವರೆ ಯುವವಾಹಿನಿ ಸಂಘಟನೆ ಮಾರ್ಗದರ್ಶನ ಕೊರೊಡು ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ. ಸುನಿಲ್ಕುಮಾರ್ ಪಂಡೆರ್.
ಆರ್ ಮುಲ್ಕಿ ವಿಜಯಾ ಕಾಲೇಜಿಡ್ ಐತಾರ ನಡತಿನ ಯುವವಾಹಿನಿ ವಾರ್ಷಿಕ ಸಮ್ಮೇಳನ ಡ್ ಮಲ್ಲ ಬಿನ್ನೆರಾದ್ ಬತ್ತ್ ದ್ ಪಾತೆರಿಯೆರ್. ಕೋವಿಡ್ ಪೊರ್ತುಡು ಭಾರತ ದೆತೊಂದಿನ ಸುರಕ್ಷತೆದ ಕ್ರಮ ಇಡೀ ಭಾರತೊಗು ಮಾದರಿ ಆತ್ಂಡ್. ಉಂಸು ಕಾಲಿ ಸರಕಾರರ್ದ್ ಮಾತ್ರ ಸಾಧ್ಯ ಆತಿಜಿ. ಸೇವಾ ಸಂಘ ಸಂಸ್ಥೆಲು ಜನಕ್ಲೆನ್ ಪ್ರಜ್ಞಾವಂತ ನಾಗರಿಕೆರಾದ್ ಕೆಲಸ ಮಲ್ದಿನೆರ್ದಾವರ ಭಾರತ ಸುರಕ್ಷಿತವಾದಿತ್ತ್ಂಡ್ . ಪೊಸ ಜವನೆರೆಗ್ ನಾಯಕತ್ವದ ಗುಣಕ್ಲೆನ್ ಕೊರ್ನಗ ಇನಿತ್ತ ಕಾಲಘಟ್ಟಡ್ ಇಪ್ಪುಲೆಕ ಸಮಾಜೊನು ನಡಪಾವೊಡು ಪಂದ್ ಆರ್ ಪಂಡೆರ್. ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಾತೆರ್ದ್, ಸಮಾಜಡ್ ಏಪಲ ಏರೆಗ್ಲ ದಿನ್ನ ಆವರೆ ಬಲ್ಲಿ. ಏರೆಗ್ಲ ಆಸರೆಯಾದ್ ಉಪ್ಪುನ ವಾತಾವರಣ ನಿರ್ಮಾಣ ಆವೊಡು.ನಮಡ ಇತ್ತಿನಾತ್ ಸಂಘಟನಾತ್ಮಕ ಗುಣೊನು ಸಮಾಜದ ಉದ್ದಾರಗಾದ್ ಗಲಸ್ ಗ. ಸಮಾಜೊಡು ತಾದಿ ತಪ್ಪುನಕ್ಲೆನ್ ಸಮಾವೇಶದ ಮುಕೇನ ಜಾಗೃತಿ ಪುಟ್ಟಾವರೆ ಪ್ರೇರಣೆ ಆವೊಡು ಪಂಡೆರ್.
ಕುಡ್ಲ : ಬೆಂಗಳೂರುಡು ಡಿಸೆಂಬರ್ 11- 22 ಮುಟ್ಟ ನಡೆದ 60ನೇ ರಾಷ್ಟ್ರ ಮಟ್ಟದ ರೋಲರ್ ಸ್ಕೇಟಿಂಗ್ ಚಾಂಪಿಯನ್ಶಿಪ್ 2022 ಪಂತೊಡು ಮಂಗಳೂರು ರೋಲರ್ ಸ್ಕೇಟಿಂಗ್ ಕ್ಲಬ್ ದ ತಸ್ಮಯಿ ಮಂಜುನಾಥ್ ಶೆಟ್ಟಿ ಮೇರ್ ರಡ್ಡನೇ ತಾನ ಗೆಂದ್ ದೆರ್.
ಮೇರ್ ಕಟೀಲ್ ಮಿತ್ತಬೈಲು ಗುತ್ತು ಚಿತ್ರಾ ಶೆಟ್ಟಿ ಬೊಕ್ಕ ಐಕಳ ಬಾವ ಮಂಜುನಾಥ್ ಶೆಟ್ಟಿ ಮೆರೆನ ಸುಪುತ್ರಿ. ಮೆರೆಗ್ ಮಹೇಶ್ ಕುಮಾರ್ ತರಬೇತಿ ಕೊರ್ತೆರ್.
ಮುಲ್ಕಿ : ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಸಮಾಜ ಸೇವಾ ಸಂಘಟನೆ “ಯುವವಾಹಿನಿ (ರಿ)”ದ 35 ನೇ ವಾರ್ಷಿಕ ಸಮಾವೇಶ ಬೊಕ್ಕ ಪೊಸ ಪದುಕೆರ್ನ ಪದಗ್ರಹಣ ಲೇಸ್ ಡಿ.25 ಐತಾರ ಮುಲ್ಕಿ ವಿಜಯಾ ಕಾಲೇಜಿದ ಅರ್ಪಣಾ ಸಭಾಂಗಣದ ಚಾವಡಿಡ್ ಯುವವಾಹಿನಿ ಮುಲ್ಕಿ ಘಟಕದ ಮುತಾಲಿಕೆಡ್ ಭಾರಿ ಗೌಜಿಡ್ ನಡತ್ಂಡ್.
ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಯುವವಾಹಿನಿ ಸಮಾವೇಶೊನು ಭಾರತ್ ಬ್ಯಾಂಕ್ದ ನಿರ್ದೇಶಕೆರ್ ಸೂರ್ಯಕಾಂತ್ ಜೆ. ಸುವರ್ಣ ಉದಿಪನ ಮಲ್ತೆರ್. ಯುವವಾಹಿನಿದ ಮುಖವಾಣಿ ” ಸಿಂಚನ” ವಿಶೇಷ ಸಂಚಿನ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ. ಸುನಿಲ್ಕುಮಾರ್ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರಾಯಿನ ರಾಜ್ಕುಮಾರ್ ಬೆಹರಿನ್, ಭಾರತೀಯ ವೈದ್ಯಕೀಯ ಸಂಘದ ಅತ್ಯುತ್ತಮ ಕಾರ್ಯದರ್ಶಿ ಪ್ರಶಸ್ತಿ ಪಡೆದಿನ ಡಾ. ಸದಾನಂದ ಪೂಜಾರಿ ಮೊಕ್ಲೆಗ್ ಸಾಧನಾಶ್ರೀ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು. ಅಂಚೆನೆ ಏಕಲವ್ಯ ಪ್ರಶಸ್ತಿ ಪಡೆದಿನ ಅಂತಾರಾಷ್ಟ್ರೀಯ ಕ್ರೀಡಾಪಟು ನಿತಿನ್ ಪೂಜಾರಿ ವಿಟ್ಲ, ರಾಷ್ಟ್ರೀಯ ಸೇವಾ ಯೋಜನೆಡ್ ರಾಷ್ಟ್ರೀಯ ಪದಕ ಗೆಂದಿನ ರಶ್ಮಿ ಜಿ. ಅಂಚನ್ ಕುಳಾಯಿ, ವೈದ್ಯಕೀಯ ವಿಭಾಗದ ಸ್ನಾತಕೋತ್ತರ ಪದವಿಡ್ ಬಂಗಾರ್ದ ಪದಕ ಪಡೆದಿನ ಡಾ. ವಿನಾಯಕ ಎನ್. ಅಂಚನ್ ಮೊಕ್ಲೆನ್ ಯುವ ಸಾಧನಾ ಪ್ರಶಸ್ತಿ ಕೊರ್ದು ಮಾನಾದಿಗೆ ನಡತ್ಂಡ್.
ಅವ್ವತ್ತಾಂದೆ ಪ್ರಸ್ತುತ ವರ್ಷಡ್ ಗೌರವ ಡಾಕ್ಟರೇಟ್ ಪಡೆದಿನ ಬಿಲ್ಲವ ಸಮುದಾಯದ ಆಜಿ ಜನ ಸಾಧಕೆರೆನ್ ವಿಶೇಷವಾದ್ ಮಾನಾದಿಗೆ ಮಲ್ತೆರ್. ಕುದ್ರೋಳಿ ಶ್ರೀ ನಾರಾಯಣಗುರು ಕಾಲೇಜಿದ ಉಪನ್ಯಾಸಕೆರ್ ಕೇಶವ ಬಂಗೇರ ಪ್ರಧಾನ ಭಾಷಣ ಮಲ್ತೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಕುಡ್ಲ ಉತ್ತರ ವಿಭಾಗದ ಸಹಾಯಕ ಪೊಲೀಸ್ ಆಯುಕ್ತೆರ್ ಮಹೇಶ್ಕುಮಾರ್, ರಂಗಭೂಮಿ ಬೊಕ್ಕ ಚಲಚಿತ್ರ ನಟೆ ನವೀನ್ ಡಿ. ಪಡಿಲ್, ಚಲನಚಿತ್ರ ನಟೆ ರಾಹುಲ್ ಅಮೀನ್ ಪಾಲ್ ಪಡೆಯೆರ್.
ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಬೆಂಗಳೂರು ಸೇರ್ದ್ ಯುವವಾಹಿನಿದ ಒಟ್ಟು 33 ಘಟಕರ್ದ್ ಅಂದಾಜಿ 2000 ಸದಸ್ಯೆರ್ ಸಮಾವೇಶಡ್ ಪಾಲ್ ಪಡೆಯೆರ್. ಮಿತ್ತರ್ಮೆಡ್ ಯುವವಾಹಿನಿ (ರಿ) ಕೇಂದ್ರ ಸಮಿತಿ ಪ್ರಧಾನ ಕಾರ್ಯದರ್ಶಿ ಸತೀಶ್ ಕಿಲ್ಪಾಡಿ, ಮುಲ್ಕಿ ಸಮಾವೇಶದ ನಿರ್ದೇಶಕೆರ್
ಹರೀಂದ್ರ ಸುವರ್ಣ, ಯುವವಾಹಿನಿ (ರಿ) ಮೂಲ್ಕಿ ಘಟಕದ ಅಧ್ಯಕ್ಷೆರ್ ಭಾರತಿ ಭಾಸ್ಕರ್, ಮಾಧ್ಯಮ ಸಂಚಾಲಕೆರ್ ನರೇಂದ್ರ ಕೆರೆಕಾಡು, ಬೊಕ್ಕ ಕುಳಾಯಿ, ಸುರತ್ಕಲ್, ಸಸಿಹಿತ್ಲು, ಪುತ್ತೂರು, ಬೊಲ್ತೇರ್, ಬಂಟ್ವಾಳ ಘಟಕದ ಅಧ್ಯಕ್ಷೆರ್ ನಕುಲು ಇತ್ತೆರ್.
ಮೋಹನ್ ಸುವರ್ಣ ಬೊಕ್ಕ ಜಯ ಕುಮಾರ್ ದೇವೆರೆನ್ ಸುಗಿತೆರ್. ಮುಲ್ಕಿ ಸಮಾವೇಶದ ನಿರ್ದೇಶಕೆರ್ ಹರೀಂದ್ರ ಸುವರ್ಣ ಬಿನ್ನೆರೆನ್ ಎದ್ಕೊಂಡೆರ್. ಯುವವಾಹಿನಿ ಕೇಂದ್ರ ಸಮಿತಿದ ಮಾಜಿ ಅಧ್ಯಕ್ಷೆರ್ ವಿಜಯ ಕುಮಾರ್ ಕುಬೆವೂರು ಪ್ರಸ್ತಾವನೆ ಮಲ್ತೆರ್. ಯುವವಾಹಿನಿ (ರಿ) ಕೇಂದ್ರ ಸಮಿತಿ ಪ್ರಧಾನ ಕಾರ್ಯದರ್ಶಿ ಸತೀಶ್ ಕಿಲ್ಪಾಡಿ ವರದಿ ಓದಿಯೆರ್. ಮಾನಾದಿಗೆ ಪತ್ರೊನು ಪ್ರಶಾಂತ್ ಅನಂತಾಡಿ, ನರೇಂದ್ರ ಕೆರೆಕಾಡು ಜಗದೀಶ್ ಚಂದ್ರ ಡಿ.ಕೆ., ವಿದ್ಯಾ ರಾಕೇಶ್, ಬಾಬು ಪೂಜಾರಿ,ಸುಧಾಕರ ಕಾರ್ಕಳ, ರೇಖಾ ಗೋಪಾಲ್,ಜಗದೀಶ್ ಕುಮಾರ್ ಒಡಿಪು,ಸುಮಾ ವಸಂತ್, ಭಾಸ್ಕರ ಕೋಟ್ಯಾನ್ ಕೂಳೂರು, ಅಶೋಕ್ ಪಡ್ಪು, ಧೀರಜ್ ಹೆಜ್ಮಾಡಿ , ರನೇಶ್ ಬಂಗೇರ ಓದಿಯೆರ್.
ಮಾಸ್ಕೋದ ಸೈಬೀರಿಯಾದ ಕೆಮೆರೊವೊ ನಗರದ ನರ್ಸಿಂಗ್ ಹೋಮ್ ಡ್ ತೂ ಪೊತ್ತ್ ದ್ 20 ಜನ ತೀರ್ ಪೋಯೆರ್ ಪಂದ್ ರಷ್ಯಾದ ತುರ್ತು ಸಚಿವಾಲಯ ತೆರಿಪಾದ್ಂಡ್.
ರಡ್ಡ್ ಅಂತಸ್ತ್ ದ ಕಟ್ಟಡಡ್ ಬೊಲ್ಪುಗು ಈ ಘಟನೆ ನಡತ್ಂಡ್. ನೆಕ್ ಕಾರಣ ನನಲ ತೆರಿದ್ ಬೈದಿಜಿ. ಹೆಚ್ಚದ ಮಾಹಿತಿ ನನ ಗೊತ್ತಾವೊಡಾತೆ.
ಡೆಲ್ಲಿ: ಇಟ್ಟಿಗೆ ಕಾರ್ಖಾನೆಡ್ ಪುಡಾದ್ 7 ಜನ ಬೇಲೆದಕುಲು ತೀರ್ ಪೋಯಿನ ಘಟನೆ ಶುಕ್ರಾರ ಬಯ್ಯಗ್ ಬಿಹಾರದ ರಾಮಗಢ್ವಾ ಪೊಲೀಸ್ ಠಾಣೆ ವ್ಯಾಪ್ತಿಡ್ ನಡತ್ಂಡ್.
ಈ ಘಟನೆದ ಪೊರ್ತುಡು ಸುಮಾರ್ 24 ಜನ ಕಾರ್ಮಿಕೆರ್ ಬೇಲೆ ಮಲ್ತೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ನೆಟ್ ಸುಮಾರ್ ಜನಕ್ ಪೆಟ್ಟಾತ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಘಟನೆದ ಬಗೆಟ್ ಪ್ರಧಾನಿ ನರೇಂದ್ರ ಮೋದಿ, ಪ್ರಧಾನಮಂತ್ರಿ ರಾಷ್ಟ್ರೀಯ ಪರಿಹಾರ ನಿಧಿರ್ದ್ ತೀರ್ ಪೋಯಿನಕ್ಲೆನ ಕುಟುಂಬಗ್ 2 ಲಕ್ಷ ರೂ. ಬೊಕ್ಕ ಪೆಟ್ಟಾಯಿನಕ್ಲೆಗ್ 50 ಸಾರ ರೂ. ಪರಿಹಾರ ಘೋಷಣೆ ಮಲ್ದೆರ್.
ರಾಜ್ಯಡ್ ಪೊಸತಾದ್ 4244 ಅಂಗನವಾಡಿ ಕೇಂದ್ರಲೆನ್ ಸುರು ಮಲ್ಪೆರೆ ಮಂಜೂರಾತಿ ಕೊರ್ತುಂಡು ಪಂದ್ ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ ಸಚಿವೆರ್ ಹಾಲಪ್ಪ ಆಚಾರ್ ಪಂಡೆರ್.
ಕಡಿಮೆ ಆದಾಯದ ಜನಸಂಖ್ಯೆ ಹೆಚ್ಚಾದ್ ವಾಸ ಮಲ್ಪುನ ಬೊಕ್ಕ ಭೂರಹಿತ ಕಾರ್ಮಿಕೆರ್ ಇಪ್ಪುನ ಗ್ರಾಮಾಂತರ ಪ್ರದೇಶಡ್ 1655 ಬೊಕ್ಕ ನಗರ ಪ್ರದೇಶಡ್ 2589 ಅಂಗನವಾಡಿ ಕೇಂದ್ರಲೆನ್ ಸುರು ಮಲ್ಪೊಡು. ಬೇತೆ ಬೇತೆ ಜಿಲ್ಲೆರ್ದ್ 3538 ಅಂಗನವಾಡಿಲೆನ್ ಸುರು ಮಲ್ಪರೆ ಬೇಡಿಕೆ ಬೈದ್ಂಡ್ ಪಂದ್ ಪಂಡೆರ್.
