ಪಾವಂಜೆ ಜಂಕ್ಷನ್ ಡ್ ಬ್ಯಾರಿಕೇಡ್ ಗ್ ತಾಂಟಿನ ಮೀನ್ ದ ಲಾರಿ – ತತ್ತಿನ ಮಲ್ಲ ಅನಾಹುತ
ಮುಲ್ಕಿ: ರಾಷ್ಟ್ರೀಯ ಹೆದ್ದಾರಿ 66ತ ಹಳೆಯಂಗಡಿ ಕೈತಲ್ ಪಾವಂಜೆ ಜಂಕ್ಷನ್ ದಲ್ಪ ಕುಡ್ಲರ್ದ್ ಒಡಿಪು ಕಡೆಕ್ ಪೋಪುನ ಕಾರ್ ಗ್ ಆಪುನ ಅಪಘಾತ ತಪ್ಪಾವರೆ ಪೋದು ಮಾರ್ಗ ಬರಿಟ್ ಅಪಘಾತ ತಡೆಕ್ ದೀತಿನ ಬ್ಯಾರಿಕೇಡ್ ಗ್ ಮೀನ್ ದ ಲಾರಿ ತಾಂಟುದ್ಂಡ್ .
ಗುದ್ದಿನ ಪೆಟ್ಟ್ ಗ್ ಬ್ಯಾರಿಕೇಡ್ ಚಿಪ್ಪರ್ ಚೂರು ಅತುಂಡ್ .
ಅಪಘಾತದ ಪೊರ್ತುಡು ಕಾರ್ ಡ್ ಇತ್ತಿನಕುಲು ಜಾಗೆರ್ದ್ ಬಲ್ದೆರ್. ಕುಡ್ಲ ಉತ್ತರ ಟ್ರಾಫಿಕ್ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ದೆರ್.
ಅಪಘಾತ ತಡೆಕ್ ಬ್ಯಾರಿಕೇಡ್ ದೀತಿನ ಒಂತೆ ದೂರಡ್ ಮಾರ್ಗ ಬರಿಟ್ ಶಾಲೆದ ಜೋಕುಲು ಬಸ್ಸ್ ಗ್ ಕಾತೊಂದು ಇಪ್ಪುವ ಆಂಡ ಅ ಪೊರ್ತುಡು ಜೋಕುಲು ಇಪ್ಪಂದೆ ಮಲ್ಲ ಅನಾಹುತ ತತ್ತ್ಂಡ್ ಪಂದ್ ಪಡುಪಣಂಬೂರು ಗ್ರಾಮ ಪಂಚಾಯತ್ ಮಾಜೀ ಅಧ್ಯಕ್ಷೆರ್ ವಿನೋದ್ ಸಾಲ್ಯಾನ್ ಬೆಳ್ಳಾಯರು ತೆರಿಪಾದೆರ್ .
ದಿನರ್ದ್ ದಿನ ರಾಷ್ಟ್ರೀಯ ಹೆದ್ದಾರಿ ಪಾವಂಜೆ ಜಂಕ್ಷನ್ ಅಪಾಯಕಾರಿಯಾದ್ ಪೋತುಂಡು. ಸೂಕ್ತ ಸರ್ವಿಸ್ ಮಾರ್ಗ ಇಪ್ಪಂದೆ ಮಾರ್ಗ ಕಡಪುನ ಜೋಕುಲೆಗ್ ಪರಬೆರೆಗ್ ಬಂಗ ಅತುಂಡ್ .
ಈ ಭಾಗೊಡು ಅಪಘಾತ ತಡೆಕ್ ಪೊಸ ಬ್ಯಾರಿಕೇಡ್ ಪಾಡುನ ಒಟ್ಟುಗು ಗಾಡಿ ಪೋಪುನಕ್ಲೆನ ಎಚ್ಚರಿಕೆಗ್ ಸಿಸಿ ಕ್ಯಾಮೆರಾ ಪಾಡೊಡು ಪಂದ್ ಮೇರ್ ಪೊಲೀಸ್ ಇಲಾಖೆಗ್ ತೆರಿಪಾದೆರ್.
