Kerala Kasaragodu

ಒಡಿಪುದ ಜನಕ್ಲೆನ ಪ್ರೀತಿ, ಆಶೀರ್ವಾದನ್ ಮರಪರೆ ಸಾಧ್ಯ ಇಜ್ಜಿ : ಜಿಲ್ಲಾಧಿಕಾರಿ ಜಿ.ಜಗದೀಶ್

ಒಡಿಪು : ಒಡಿಪು ಜಿಲ್ಲೆದ ಜನತೆ ತೋಜಾಯಿನ ಮೋಕೆ , ಅಭಿಮಾನ ಏಪಲಾ ಮದಪರೆ ಸಾಧ್ಯ ಇಜ್ಜಿ . ಒಡಿಪುದ ಜನಕ್ಲೆನ ಆಶೀರ್ವಾದರ್ದೇ ಮುಖ್ಯಮಂತ್ರಿಲೆನ ಜಂಟಿ ಕಾರ್ಯದರ್ಶಿನ ಉನ್ನತ ಹುದ್ದೆಗ್ ಪೋಯೆರೆ ಸಾಧ್ಯ ಆಂಡ್ ಪಂದ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಪಂಡೆರ್ .

ಅಂಗಾರೆ ರಜತಾದ್ರಿದ ಅಟಲ್ ಬಿಹಾರಿ ವಾಜಪೇಯಿ ಸಭಾಂಗಣಡ್ ಅಟ್ಟನೆ ಮಲ್ದಿನ ಬೀಳ್ಕೊಡುಗೆ ಲೇಸ್ ಡ್ ಆರ್ ಪಾತೆರಿಯೆರ್.

ಲೇಸ್ ಡ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಬೊಡೆದಿ ಸೌಮ್ಯ, ಜೋಕುಲಾಯಿನ ಅನುಷ್ಕಾ ಬೊಕ್ಕ ಅಭಿಘ್ನ, ಒಡಿಪು ನಗರಾಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ಕೆ. ರಾಘವೇಂದ್ರ ಕಿಣಿ, ನಗರಸಭೆ ಗುರ್ಕಾರ್ಲಾಯಿನ ಸುಮಿತ್ರಾ ನಾಯಕ್, ಕರಾವಳಿ ಕಾವಲು ಪಡೆ ಎಸ್ಪಿ ನಿಖಿಲ್, ಕುಂದಾಪುರ ವಲಯದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಆಶೀಶ್ ರೆಡ್ಡಿ, ಕುಂದಾಪುರ ಉಪ ವಿಭಾಗಾಧಿಕಾರಿ ರಾಜು ಪಾಲ್ ಪಡೆದಿತ್ತೆರ್.

ಒಡಿಪು ಶಾಂತರಾಜ ಐತಾಳ್ರೆಗ್ ‘ಮನೆಯಂಗಳದಲ್ಲಿ’ ಮಾನದಿಗೆ

ಒಡಿಪು : ಬೆಂಗ್ಳೂರುದ “ಹಾಸ್ಯ ದರ್ಶನ” ಪತ್ರಿಕೆದ ಸಂಪಾದಕ ಎಸ್.ಎಸ್. ಪಡಶೆಟ್ಟಿ ಒಡಿಪುದ ಎಚ್. ಶಾಂತರಾಜ ಐತಾಳ್ರೆಗ್ ಅಂಗಾರೆ “ಮನೆಯಂಗಳದಲ್ಲಿ’ ಪ್ರಶಸ್ತಿ ಮಾನದಿಗೆ ಮಲ್ತೆರ್.

ಮಲ್ಲ ಬಿನ್ನೆರ್ ಆದ್ ಪ್ರದೀಪ್ ಕುಮಾರ ಕಲ್ಕೂರ, ಬೀಡು ರಮೇಶ ರಾವ್, ಡಾ.ರವೀಂದ್ರನಾಥ, ಪಾಲ್ ಪಡೆದಿತ್ತೆರ್.

ಕುಂಬ್ರಡ್ ಪೊಸತಾದ್ ಸುರು ಆಯಿನ ಶ್ರೀದೇವಿ ಎಂಟರ್ಪ್ರೈಸಸ್ ಗ್ ಭೇಟಿ ಕೊರಿನ ಗುಣರಂಜನ್ ಶೆಟ್ಟಿ

ಪುತ್ತೂರು: ಇಂಚೋಗು ಕುಂಬ್ರ ಮಂದಾರ ಸಂಕಿರ್ಣಡ್ ಉದಿಪನ ಆಯಿನ ಶ್ರೀದೇವಿ ಎಂಟರ್ಪ್ರೈಸಸ್ ಗೆ ಜಯ ಕರ್ನಾಟಕ ಜನಪರ ವೇದಿಕೆದ ಯುವ ಸಂಸ್ಥಾಪಕ ರಾಜ್ಯ ಗುರ್ಕಾರ್ಲಾಯಿನ ಗುಣರಂಜನ್ ಶೆಟ್ಟಿ ಭೇಟಿ ಕೊರ್ದು ಎಡ್ಡೆಪ್ಪುನು ಬಯಕಿಯೆರ್.

ಕೃಷಿಕೆರೇ ಜಾಸ್ತಿ ಉಪ್ಪುನ ಈ ಪ್ರದೇಶಡ್ ಇಂಚಿನ ಒಂಜಿ ರಸಗೊಬ್ಬರ ಮಾರಾಟ ಕೇಂದ್ರ ಸುರು ಮಲ್ದಿನವು ಎಡ್ಡೆ ನಿರ್ಧಾರ ಪಂದ್ ಗುಣರಂಜನ್ ಶೆಟ್ಟಿ ಸಂಸ್ಥೆದ ಗುರ್ಕಾರ್ಲೆಗ್ ಸೊಲ್ಮೆ ಸಂದೈತ ಮಲ್ತೆರ್ .

ಈ ಪೊರ್ತುಡು ಸಂತೋಷ್ ಕುಮಾರ್ ರೈ ಕೈಕಾರ, ರಾಜ್ಯ ಸಂಚಾಲಕೆರಾಯಿನ ರಾಮದಾಸ್ ಶೆಟ್ಟಿ, ಪ್ರವೀಣ್ ಶೆಟ್ಟಿ ತಿಂಗಳಾಡಿ, ಸುಂದರ್ ರೈ ಮಂದಾರ, ಪುರಂದರ ರೈ, ಪ್ರಜ್ವತ್ ರೈ, ಜಯಂತ್ ಕುಂಬ್ರ, ಧಕ್ಷತ್ ರೈ, ನವೀನ್ ಭಂಡಾರಿ ಕುತ್ಯಾಡಿ ಪಾಲ್ ಪಡೆದಿತ್ತೆರ್.

ಪೈಪ್ ಬೂರ್ದು ಸೈತಿನ ಬಾಲೆ

ಮೂಲ್ಕಿ: ಮುಲ್ಪದ ಲಿಂಗಪ್ಪಯ್ಯಕಾಡಿನ ಆಶ್ರಯ ಕಾಲೊನಿದ ಕೈತಲ್ ದಾಸ್ತಾನು ದೀತಿನ ಸಿಮೆಂಟ್ ಪೈಪ್ ಬುಧವಾರ ಬೂರ್ನೆರ್ದಾವರ ಬಾಲೆ ತೀರ್ ಪೋಯಿನ ಘಟನೆ ನಡತುಂಡು. ಲಿಂಗಪ್ಪಯ್ಯ ಕಾಡ್ದ ನಿವಾಸಿ ರಾಮು ಪನ್ಪಿನರ್ನ ಬಾಲೆ ಯುವರಾಜ (4) ತೀರ್ ಪೋಯಿನ ಬಾಲೆ.

ನಾಗರಾಜ್ ಪನ್ಪಿನರೆನ ಕಂಪನಿದ ಸಿಮೆಂಟ್ ಪೈಪ್‌ಲೆನ್ ದಾಸ್ತಾನು ದೀದ್ ಇತ್ತೆರ್ . ಅಲ್ಪನೇ ಗೊಬ್ಬೊoದು ಇತ್ತಿನ ಬಾಲೆದ ತರೆತ ಮಿತ್ತ್ ಪೈಪ್ ಬೂರ್ದುಂಡು. ಮೂಲ್ಕಿ ಠಾಣೆಡ್ ಪ್ರಕರಣ ದಾಖಲಾತುಂಡು .

ಸೆಪ್ಟೆಂಬರ್ 4ಕ್ಕ್ ಕುಕ್ಕುಂದೂರು ಗ್ರಾಮ ಪಂಚಾಯತ್ ಗ್ರಾಮಸಭೆ

ಕಾರ್ಕಳ : ಕುಕ್ಕುಂದೂರು ಗ್ರಾಮ ಪಂಚಾಯತ್‌ದ ಪ್ರಥಮ ಹಂತದ ಗ್ರಾಮ ಸಭೆ ಸೆ. 4ರಂದು ತಾಲೂಕು ಪಂಚಾಯತ್ ಸಭಾಭವನಡ್ ನಡಪರೆ ಉಂಡು ಪಂದ್ ಪಂಚಾಯತ್ ಗುರ್ಕಾರ್ಲಾಯಿನ ಶಶಿಮಣಿ, ಒತ್ತು ಗುರ್ಕಾರ್ಲಾಯಿನ ಅನಿಲ್ ಪೂಜಾರಿ, ಪಿಡಿಒ ಪ್ರಮೀಳಾ ನಾಯಕ್ ಪ್ರಕಟನೆಡ್ ತೆರಿಪಾದೆರ್.

ಅಣ್ಣಿ. ಸಿ. ಶೆಟ್ಟಿ ಗುಂಡ್ಯಡ್ಕ ಮೆರೆಗ್ ಸಮಾಜ ರತ್ನ ಪ್ರಶಸ್ತಿ

ಕುಡ್ಲ : ನವೀ ಮುಂಬಯಿ ಶ್ರೀ ಮೂಕಾಂಬಿಕಾ ದೇವಸ್ಥಾನ ಟ್ರಸ್ಟ್ ಗುರ್ಕಾರ್ಲಾಯಿನ ಧರ್ಮದರ್ಶಿ ಅಣ್ಣಿ ಸಿ. ಶೆಟ್ಟಿ ಗುಂಡ್ಯಡ್ಕ ಮೇರ್ ಕರ್ನಾಟಕ ಜಾನಪದ ಪರಿಷತ್ ಕೇರಳ ಘಟಕ ಕೊರ್ಪಿನ ಸಮಾಜ ರತ್ನ ಮಾನದಿಗೆ ಪಡೆತೆರ್ . ಕುಡ್ಲಡ್ ನಡತಿನ ಲೇಸ್ ಡ್ ವಿಧಾನ ಪರಿಷತ್ ಸದಸ್ಯ ಕೆ. ಹರೀಶ್ ಕುಮಾರ್ ಪ್ರಶಸ್ತಿ ಪ್ರದಾನ ಮಲ್ತೆರ್ .

ಅಧಿಕಾರ ಸ್ವೀಕಾರ ಮಲ್ತಿನ ಪೊಸ ಜಿಲ್ಲಾಧಿಕಾರಿ

ಒಡಿಪು : ಪೊಸ ಜಿಲ್ಲಾಧಿಕಾರಿ ಕೂರ್ಮಾರಾವ್ ಕೋಡೆ ಅಧಿಕಾರ ಸ್ವೀಕಾರ ಮಲ್ತೆರ್ . ಈ ಪೊರ್ತುಡು ಸುದ್ದಿಗಾರೆರ್ನ ಒಟ್ಟುಗು ಪಾತೆರಿನ ಆರ್ ಜನಕ್ಲೆನ ಭಾವನೆ ಅರ್ಥ ಮಲ್ತೊಂದು ಬೇಲೆ ಮಲ್ಪುವೆ ಪಂದ್ ಪಂಡೆರ್ .

ಕೇರಳಡ್ ಕೊರೋನ ಆರ್ಭಟ

ತಿರುವನಂತಪುರಂ: ಕೇರಳಡ್ ಕೊರೊನಾ ಸೋಂಕು ಜಾಸ್ತಿ ಆತುಂಡು . ಕರಿನ 24 ಗಂಟೆಡ್ ರಾಜ್ಯಡ್ 32,803 ಪೊಸ ಪ್ರಕರಣ ದಾಖಲಾತುಂಡು . 173 ಜನ ತೀರ್ ಪೋತೆರ್ . ಒಟ್ಟು ಇತ್ತೆ ಮುಟದ 40,90,036 ಜನಕ್ಲೆಗ್ ಸೋಂಕು ತೊಜಿದ್ ಬೈದುಂಡು 29,961 ಜನ ತೀರ್ ಪೋತೆರ್ .

ಜರ್ನಲಿಸಂಡ್ ಪಿಹೆಚ್.ಡಿ ಪಡೆಯಿನ ಬಾರಿಯಂಡ ದೀಪಕ್ ಜೋಯಪ್ಪ

ಮಡಿಕೇರಿ: ಕೊಡಗುದ ಮದೆನಾಡು ಗ್ರಾಮದ ಬಾರಿಯಂಡ ದೀಪಕ್ ಜೋಯಪ್ಪ ಮೇರ್ ಸಂಶೋಧನೆ ಮಲ್ತಿನ ’ಇಂಗ್ಲಿಷ್ ಬೊಕ್ಕ ಕನ್ನಡ ನ್ಯೂಸ್ ವೆಬ್‌ಸೈಟ್ಸ್: ಸ್ಟಡಿ ಆನ್ ದೇರ್ ಪೊಟೆನ್‌ಷ್ಯಾಲಿಟಿ ಆಂಡ್ ಸಸ್ಟೈನೇಬಿಲಿಟಿ’ ಪನ್ಪಿನ ಮಹಾಪ್ರಬಂಧಗ್ ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜುಕೇಷನ್(ಮಾಹೆ) ಸಂಸ್ಥೆ ಡಾಕ್ಟರೇಟ್ ಕೊರ್ತುಂಡು .

ದೀಪಕ್ ಮೇರ್ ಈ ಸಂಸ್ಥೆ ಕೊರ್ಪಿನ ಪ್ರತಿಷ್ಠಿತ ’ಡಾ. ಟಿಎಂಎ ಪೈ’ ವಿದ್ಯಾರ್ಥಿ ವೇತನಡ್ ಸಂಶೋಧನೆ ನಡಪಾದ್ ಇತ್ತೆರ್ . ಮಣಿಪಾಲ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಸಂಸ್ಥೆದ ಪ್ರೊಫೆಸರ್ ಬೊಕ್ಕ ನಿರ್ದೇಶಕೆರಾಯಿನ ಡಾ. ಪದ್ಮ ರಾಣಿ ಮೆರ್ನ ಮಾರ್ಗದರ್ಶನಡ್ ಈ ಸಂಶೋಧನೆ ಮಲ್ತ್ ಇತ್ತೆರ್ .

ರಾಜ್ಯೋಡು ಇನಿರ್ದ್ ಬಾರಿ ಬರ್ಸ : ಮಸ್ತ್ ಜಿಲ್ಲೆಡ್ ಯೆಲ್ಲೋ ಅಲರ್ಟ್

ಬೆಂಗ್ಳೂರು : ಬಂಗಾಳ ಕೊಲ್ಲಿಡ್ ವಾಯುಭಾರ ಕುಸಿತ ಆಯಿನೆರ್ದಾವರ ರಾಜ್ಯದ ಕೆಲವು ಜಿಲ್ಲೆಡ್ ಇನಿರ್ದ್ ನನ ದುಂಬುದ ನಾಲ್ ದಿನ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ (Meteorological Department) ಮುನ್ಸೂಚನೆ ಕೊರ್ತುಂಡು .

ಇನಿರ್ದ್ ಸೆಪ್ಟೆಂಬರ್ 5ಮುಟ ದಕ್ಷಿಣ ಕನ್ನಡ, ಉಡುಪಿ, ಉತ್ತರ ಕನ್ನಡ, ಶಿವಮೊಗ್ಗ, ಬೆಂಗಳೂರು, ಚಿಕ್ಕಬಳ್ಳಾಪುರ, ಹಾಸನ, ಕೋಲಾರ, ಚಿಕ್ಕಮಗಳೂರು ಜಿಲ್ಲೆಡ್ ಭಾರೀ ಬರ್ಸ ಬರ್ರೆ ಉಂಡು , ಯೆಲ್ಲೋ ಅಲರ್ಟ್ ಘೋಷಣೆ ಆತುಂಡು .