beautyoftulunaad

ಕುಡ್ಲಡ್ ಉಂಡು ತುಳುನಾಡ್‌ದ ಬಾರೀ ಎತ್ತರದ ಧ್ವಜಸ್ತಂಭ

ಸ್ವಸಂತ್ರದಾನಿ ಬಾವುಟಗುಡ್ಡೆಡ್ ರಾವರೆ ಉಂಡು ಬಾರೀ ಮಲ್ಲ ಕೊಡಿ

ಕುಡ್ಲದ ಐತಿಹಾಸಿಕ ಬಾವುಟಗುಡ್ಡೆದ ಟಾಗೋರ್ ಪಾರ್ಕ್‌ಡ್ 78 ಮೀಟರ್ ಎತ್ತರದ ಧ್ವಜಸ್ತಂಭ ನಿರ್ಮಾಣ ಆತ್ಂಡ್. ಅಗಸ್ಟ್ ೧೫ ತಾನಿ ಅಯಿಟ್ ರಾಷ್ಟ್ರಧ್ವಜ (ಕೊಡಿ) ಏರಾವರೆ ಉಂಡು. ಸ್ಮಾರ್ಟ್ ಸಿಟಿ ಯೋಜನೆದಡಿಟ್ 75 ಲಕ್ಷ ರೂ ಬಿಲೆತ, 14 ಟನ್ ತೂಕದ ಎತ್ತರದ ಕಂಬ ತಾಪನೆ ಆತ್ಂಡ್. ಉಂದು ಕುಡ್ಲದ ಪೊರ್ಲುಗು ಪೊಸ ಪಜ್ಜೆ ಗುರ್ತಾದ್ ನನಾತ್ ಕಳೆ ಬರಿಯೆರುಂಡು. ಮಲ್ಲ ಕ್ರೇನ್‌ದ ಸಹಾಯರ‍್ದ್ ರಾಯಪುರರ‍್ದ್ ಕನಪಾಯಿನ ಗಟ್ಟಿ ಕಂಬೊಲೆನ್ ಒಂಜೆಕ್ಕೊಂಜಿ ಜೋಡಿಸಾದ್ ಉಂತಾದೆರ್. ‘ಸನ್‌ಲೈಟ್ ಲ್ಯುಮಿನರೀಸ್’ ಸಂಸ್ಥೆದ ಈ ಬಾರಿ ಮಲ್ಲ ಧ್ವಜಸ್ತಂಭನ್ ಸ್ಥಾಪನೆ ಮಲ್ಪುನ ಜವಾಬ್ದಾರಿನ್ ಯಶಸ್ವಿಯಾದ್ ಪೂರೈಸ್‌ದ್‌ಂಡ್.

ಸುರಕ್ಷತಾ ವ್ಯವಸ್ಥೆ ಬೊಕ್ಕ ತಂತ್ರಜ್ಞಾನ :
ಕಂಬಗ್ ಮೋಟರೀಕೃತ ಧ್ವಜಾರೋಹಣ ವ್ಯವಸ್ಥೆ ಮಲ್ತ್ ದಿತ್ತ್‌ದ್ , ತ್ರೀಫೇಸ್ ಕರೆಂಟ್ ಸಂಪರ್ಕ ಕೊರ‍್ತುಂಡು. ಧ್ವಜದ ಮಿತ್ತ ಭಾಗದ ಒಂಜಿ ಸೈಡ್‌ಡ್ ತೆಡಿಲ್ ಹಾಕಂದಿಲೆಕ ಪ್ರತಿಬಂಧಕ ಪಾಡ್ದ್ಙಡ್. ಅಂಚೆನೆ ಮಿತ್ತ್‌ಡ್ ವಿಮಾನಲೆಗ್ ಗೊತ್ತಾಪಿಲೆಕ ರಡ್ಡ್ ಸೈಡ್‌ಡ್‌ಲಾ ಕೆಂಪು ಕಲರ್‌ದ ಮಾರ್ಗಸೂಚಿ ಲೈಟ್‌ ದ ವ್ಯವಸ್ಥೆನ್ಲ ಮಲ್ದೆರ್ .
ಕುಡ್ಲದ ಜೋರುದ ಗಾಳಿಗ್ ಪರಿಯಂದಿಲೆಕ 30/45 ಗಾತ್ರದ ವಿಶೇಷ ಪಾಲಿಸ್ಟರ್ ಧ್ವಜನ್ ರೆಡಿ ಮಲ್ತ್ದೆರ್.
ಬಾವುಟಗುಡ್ಡೆದ ಐತಿಹಾಸಿಕ ಹಿನ್ನಲೆ :
ಭಾರತದ ಸ್ವಾತಂತ್ರ ಚಳವಳಿದ ಸಂದರ್ಭಡ್ ಸುರುತ ಸರ್ತಿ ಕುಡ್ಲದ ಇಂದುವೇ ಬಾವುಟಗುಡ್ಡೆಡ್ ಧ್ವಜಾರೋಹಣ ಮಲ್ತ್‌ದಿತ್ತೆರ್ ಪನ್ಪಿನ ರೋಚಕ ಇತಿಹಾಸ ಉಂಡು. ಆನಿ ನಡತಿನ ಕ್ರಾಂತಿದ ನೆಂಪುಗಾದ್, ಆ ಜಾಗೆದ ಪ್ರತೀಕವಾದ್ ಇತ್ತೆ 78 ಮೀಟರ್ ಎತ್ತರದ ಈ ಬೃಹತ್ ಧ್ವಜಸ್ತಂಭನ್ ಸ್ಥಾಪನೆ ಮಲ್ತೆರ್. ಕುಡ್ಲ ಪೇಂಟೆಡ್ ಮಸ್ತ್ ಎತ್ತರದ ಜಾಗೆ ಆದುಪ್ಪುನ ಕಾರಣ ಬಾವುಟಗುಡ್ಡೆಡ್ ರಾಪಿನ ಕೊಡಿ ನಾಲ್ ದಿಕ್ಕ್‌ಲೆಗ್ಲ ಸ್ಪಷ್ಟವಾದ್ ತೋಜುಂಡು ಪನ್ಪಿನವು ವಿಶೇಷ.