“ಕಲಿಕೆ ಪನ್ಪಿನವು ಉಂತಿನ ನೀರ್ ಅತ್ತ್ ಅವು ಪರಪುನ ಜಲಧಾರೆ.ನಮ ಕಲ್ಪೊಡಾಯಿನವು ಮಸ್ತ್ ಉಂಡು . ಜೀವನದ ಉದ್ದೋಗುಲಾ ಒಂಜತ್ತ್ ಒಂಜಿ ವಿಚಾರಲೆನ್ ನಮ ಕಲ್ತೊಂದು ಬದುಕು ಸಾಗಾವ . ನಮ ಕಲ್ತಿನ ಕಲೆಕ್ ಸೂಕ್ತ ಮತ್ತರ್ಮೆ ತಿಕ್ಕ್oಡ ಬದ್ಕ್ ಸಾರ್ಥಕ.
ಅಂದ್ ನಮ ಇನಿ ನಿಕ್ಲೆಗ್ ಪರಿಚಯ ಮಲ್ತ್ ಕೊರ್ಪಿನ ಸಾಧಕಗ್ಲಾ ಬಾಕ್ಸಿಂಗ್ ಡ್ ಮಾಮಲ್ಲ ಮಟ್ಟದ ಸಾಧನೆ ಮಲ್ಪೊಡು ಪನ್ಪಿನ ಛಲ, ಕಿನ್ಯ ಪ್ರಯೋಡೆ ಬಾಕ್ಸಿಂಗ್ ಕಲ್ತ್ ದ್ ,ಇತ್ತೆ ರಾಷ್ಟ್ರ ಮಟ್ಟಡ್ಲಾ ತನ್ನ ಪುದರ್ ನ್ ಮೆರೆಪಾದ್ ಬೈದಿನ ಕಾರ್ತಿಕ್ ಪುತ್ರನ್ .
ವೇಣುಗೋಪಾಲ್ ಬೊಕ್ಕ ಸವಿತಾ ದಂಪತಿಲೆನ ಕಡಿರ್ದ ಪಿಂಗಾರದ ಪುರ್ಪ ಆಯಿನ ಕಾರ್ತಿಕ್ ಪುತ್ರನ್ ತನ್ನ ಪ್ರಾಥಮಿಕ ಶಿಕ್ಷಣನ್ ಕುಡ್ಲದ ಮಣ್ಣಗುಡ್ಡ ದ ಮಂಗಳಾ ಇಂಗ್ಲಿಷ್ ಮಾಧ್ಯಮ ಶಾಲೆಡ್ ಮಲ್ತ್ ದ್, ಪಿಯುಸಿ ಬೊಕ್ಕ ಪದವಿ ಶಿಕ್ಷಣನ್ ಕೊಡಿಯಲ್ ಬೈಲ್ ದ ಕೆನರಾ ಶಿಕ್ಷಣ ಸಂಸ್ಥೆಡ್ ಮಲ್ತ್ ಪ್ರಸ್ತುತ ಝಬ್ತ್ ಜಿಮ್ ಡ್ ಟ್ರೈನರ್ ಆದ್ ಬೆನ್ನಿ ಬೆನೊಂದು ಉಲ್ಲೆರ್.
ಕಿನ್ಯ ಪ್ರಾಯೋಡೆ ಬಾಕ್ಸಿಂಗ್ ದ ಮಿತ್ತ್ ಬಾರಿ ಉಮೇದ್ ಇತ್ತಿನ ಕಾರ್ತಿಕ್ ಕ್ರೀಡಾ ಕ್ಷೇತ್ರಡ್ ದಾಲ ಸಾಧನೆ ಮಲ್ಪೊಡು ಪನ್ಪಿನ ಛಲಟ್ಟ್ ಬೆರಿ ಬುಡoದೆ ತನ್ನ ಪ್ರಯತ್ನ ಬರೊಂದು ಉಲ್ಲೆರ್.
ಶಿವಪ್ರಸಾದ್ ಆಚಾರ್ಯ ಮೆರೆನ ಬಾಕ್ಸಿಂಗ್ ಗರಡಿಡ್ ಬುಳೆಯಿನ ಕಾರ್ತಿಕ್ ದುಂಬುಗು ಎಂಎಂಎ ಕೋಚ್ ಕೌಶಿಕ್ ಬೋಳೂರು ಮೆರೆಡ ನನಾತ್ ಇಚಾರಲೆನ್ ಕಲ್ತ್ ತನ್ನ, ತನ್ನ ಗುರುಕುಲೆನ ಪುದರ್ ನ್ ದೇಶೋರ್ಮೆ ಪಸರಿನ ಪುಗರ್ತೆ ಮೆರೆಗ್ ಉಂಡು.
2019 ನೇ ಇಸವಿಡ್ ಮೈಸೂರ್ ಡ್ ನಡತಿನ ರಾಜ್ಯ ಮಟ್ಟಡ್ ನಡತಿನ ದಸರಾ ಕ್ರೀಡಾ ಕೂಟ ” ದಸರಾ ಸಿಎಂ ಕಪ್ -2019 ” ಬಾಕ್ಸಿಂಗ್ ಡ್ ಆಣ್ಜೊವ್ಲೆನ (81-92 ಕೆಜಿ ಡ್) ಕಂಚ್ ದ ಪದಕ ಪಡೆದ್ ಅಂಚನೆ ಮೈಸೂರು ವಿಭಾಗೀಯ ಮಟ್ಟದ ದಸರಾ ಕ್ರೀಡಾ ಕೂಟ 2019-20 ಗ್ ನಡತಿನ ಬಾಕ್ಸಿಂಗ್ ಪಂಥಡ್ ಸುರುತ್ತ ಇನಾಮು ,ಬೆಂಗ್ಳೂರುಡು ನಡತಿನ ಇಂಟರ್ ಸ್ಟೇಟ್ ಲೆವೆಲ್ ಬಾಕ್ಸಿಂಗ್ ಚಾಂಪಿಯನ್ ಶಿಪ್ಡ್ ಬಂಗಾರ್ದ ಪದಕ, ಕರ್ನಾಟಕ ಅಮ್ಮೆಚುರ್ ಬಾಕ್ಸಿಂಗ್ ಅಸೋಸಿಯೇಷನ್ ನಡಪಾಯಿನ ಸರ್ಜಾಪುರ್ ಡ್ ನಡತಿನ ಇಂಟರ್ ಕ್ಲಬ್ ಸೀನಿಯರ್ ಯೂಥ್, ಜೂನಿಯರ್ ಬೊಕ್ಕ ಸಬ್ ಜೂನಿಯರ್ ಬಾಕ್ಸಿಂಗ್ ಚಾಂಪಿಯನ್ ಶಿಪ್ ಡ್ ಬಂಗಾರ್ದ ಪದಕ,2017 ನೇ ಇಸವಿಡ್ ರಾಜಸ್ಥಾನ್ ಮ್ಯೂಥೈ ಅಸೋಸಿಯೇಷನ್ (ರಿ.) ಅಟ್ಟನೆ ಮಲ್ತಿನ ಸೀನಿಯರ್ ವಿಭಾಗದ ಬಾಕ್ಸಿಂಗ್ ಪಂಥಡ್ ಕಂಚ್ ದ ಪದಕ ಅಂಚನೆ 2017 ನೇ ಇಸವಿಡ್ ಥೈಲ್ಯಾಂಡ್ ಡ್ ನಡತಿನ 14 ನೇ ಅಮ್ಮೆಚುರ್ &ಪ್ರೋ ಆಮ್ ವರ್ಲ್ಡ್ ಮ್ಯೂಥೈ ಚಾಂಪಿಯನ್ ಶಿಪ್ ಡ್ ಭಾರತ ದೇಶೋನು ಪ್ರತಿನಿಧಿಸಾಯಿನ ಪೆರ್ಮೆ ಕಾರ್ತಿಕ್ ಗ್ ಉಂಡು.
ದೋಸ್ತ್ ಕ್ರಿಕೆಟರ್ಸ್ ಬೋಳೂರು ಅಂಚನೇ ಜಯಲಕ್ಷ್ಮಿ ಬೋಳೂರು ಕೂಟದ ಸಕ್ರಿಯ ಸದಸ್ಯೆಯಾದ್ ಅವ್ವೆತೋ ಕ್ರೀಡಾ ಕೂಟಡ್ ಪಾಲ್ ಪಡೆದ್ ಪುದರ್ ಕನಯ್ದಿನ ಪೆರ್ಮೆ ಮೆರೆನವು.ಇಂಚ ಪುಗಾರ್ತೆ ಪಡೆಯೊಂದು ಉಪ್ಪುನ ಮೇರ್ ಒವ್ವೆ ಕ್ಷೇತ್ರಡ್ ಬುಳೆಯೊಡಾoಡ ಅಲ್ಪ ಎಡ್ಡೆ ಮಾರ್ಗದರ್ಶನ ಕೊರ್ಪುನ ಗುರುಕುಲು , ಗುರುಕ್ಲೆನ ಪ್ರೋತ್ಸಾಹ , ಇಲ್ಲದಕ್ಲೆನ ಪ್ರೋತ್ಸಾಹ ಬೊಕ್ಕ ತಪ್ಪುಲೆನ್ ಸರಿ ಮಲ್ಪುನ ಜನಕ್ಲೆನ ಮಾರ್ಗದರ್ಶನ ಬೋಡು ಪಂದ್ ಪನ್ಪೆರ್ .
ಪ್ರತಿಯೊರಿಲಾ ತನ್ನನೇ ಆಯಿನ ಗುರಿನ್ ದೀಯೊಂದು ಆ ಗುರಿ ಮುಟ್ಟುರೆ ಆತ್ಮಸ್ಥೆರ್ಯ, ಧನಾತ್ಮಕ ಚಿಂತನೆನ್ ಮನಸ್ ಡ್ ಬಿತ್ತುಂಡ ಸಾಧನೆದ ಬಾಕಿಲ್ ಮುಟ್ಟೋಲಿ ಪಂದ್ ಕಾರ್ತಿಕ್ ಪನ್ಪೆರ್.
ತುಳುನಾಡ್ದ ಜನಕ್ಲೆನ ಪ್ರೀತಿದ ಪತಾಕೆನ್ ಪತ್ತೊಂದು ಪ್ರತಿಭೆಗ್ ತಕ್ಕ ಅವಕಾಶ ನಿರಂತರವಾದ್ ತಿಕ್ಕಡ್ ಅಂಚನೆ ಈ ತಿಕ್ಕಿನ ಅವಕಾಶನ್ ಸದುಪಯೋಗ ಮಲ್ತ್ ತುಳುನಾಡ್ ಗ್ ಒಂಜಿ ಮಲ್ಲ ಪುದರ್ ಕನವೊಡು ಪನ್ಪಿನವು ಮೆರೆನ ಆಸೆ .ಇರೆನ ದುಂಬುದ ಕನ ನನ ಆವಡ್ ಪನ್ಪಿನವೇ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಆಶಯ.
