ದಿನಾಚರಣೆ

ಧರ್ಮಸ್ಥಳಡ್ ಎನ್ಮನೆ ವಿಶ್ವಯೋಗ ದಿನಾಚರಣೆ : ಯೋಗರ್ದ್ ಆದರ್ಶ ವ್ಯಕ್ತಿತ್ವ ನಿರ್ಮಾಣ

ಧರ್ಮಸ್ಥಳಡ್ ಎನ್ಮನೆ ವಿಶ್ವಯೋಗ ದಿನಾಚರಣೆ :ಯೋಗರ್ದ್ ಆದರ್ಶ ವ್ಯಕ್ತಿತ್ವ ನಿರ್ಮಾಣ

ಉಜಿರೆ: ಯೋಗ ನಮ್ಮ ಜೀವನ ಶೈಲಿ ಆವೊಡು .ಏಪಲಾ ಯೋಗಾಭ್ಯಾಸ ಮಲ್ಪುನೆರ್ದ್ ನೈತಿಕ ಬೊಕ್ಕ ಮಾನವೀಯ ಮೌಲ್ಯದೊಟ್ಟುಗು ಆದರ್ಶ ವ್ಯಕ್ತಿತ್ವ ನಿರ್ಮಾಣ ಆಪುಂಡು ಪಂದ್ ತುಮಕೂರು ರಾಮಕೃಷ್ಣಆಶ್ರಮದ ಸ್ವಾಮಿ ಪರಮಾನಂದಜೀ ಮಹಾರಾಜ್ ಪಂಡೆರ್ .
ಮೇರ್ ಅಂಗಾರೆ ಧರ್ಮಸ್ಥಳಡ್ ಅಮೃತವರ್ಷಿಣಿ ಚಾವಡಿಡ್ ಎಸ್.ಡಿ.ಎಂ.ಪ್ರಕೃತಿಚಿಕಿತ್ಸಾ ಬೊಕ್ಕ ಯೋಗ ವಿಜ್ಞಾನ ಕಾಲೇಜ್ದ ಒಟ್ಟು ಸೇರಿಗೆಡ್ ಎನ್ಮನೆ ವಿಶ್ವಯೋಗ ದಿನಾಚರಣೆಡ್ ಆಶೀರ್ವಚನ ಕೊರಿಯೆರ್ .
ಯೋಗಾಭ್ಯಾಸರ್ದ್ ಮನಸ್ಸು ಪರಿಶುದ್ಧ ಆಪುಂಡು , ದೇಹ ಸದೃಢ ಆಪುಂಡು ಒವ್ವೆ ವೃತ್ತಿ-ಪ್ರವೃತ್ತಿಡ್ ಉನ್ನತ ಸಾಧನೆ ಮಲ್ಪರೆ ಸಾಧ್ಯ ಆಪುಂಡು.ಸಮಾಜ ಸೇವೆ ಮಾತೆರ್ನಲ ಮಿತ್ತ್ ಉಂಡು .ಮೋಕ್ಷನೇ ಬದ್ಕ್ ದ ಕಡೆತ ಗುರಿ ಆದ್ ಉಂಡು, ಪ್ರತಿಯೊರಿಲಾ ತಂಕ್ ತಿಕ್ಕಿನ ಅವಕಾಶದ ಉಪಯೋಗ ಮಲ್ತ್ ಮಾತೆರ್ನ ಎಡ್ಡೆಪ್ಪುಗು ತೆಲಿಕೆ ದಿಂಜಿ ಮೋನೆಡ್ ನಿಸ್ವಾರ್ಥ ಸೇವೆ ಮಲ್ಪೊಡು ಪಂದ್ ಸ್ವಾಮೀಜಿ ಪಂಡೆರ್ .

ಯುವ ಜನತೆ ದೇಶದ ಅಮೂಲ್ಯ ಮಾನವ ಸಂಪನ್ಮೂಲ ಆದ್ ಉಂಡು , ದೃಢಸಂಕಲ್ಪರ್ದ್ ಸಮಾಜ ಸೇವೆ ಮಲ್ತ್ ಬಲಿಷ್ಠ ರಾಷ್ಟ್ರ ಕಟ್ಟೋಡು.ಸುಖ-ಶಾಂತಿ, ಸಂಪತ್ ಮಾತೆರ್ಲ ಒಟ್ಟಿಗೆ ಪಟ್ಟೊಂದು ಖುಷಿಟ್ ನೆಮ್ಮದಿದ ಸಾರ್ಥಕ ಜೀವನ ಮಲ್ಪೊಡು. ಯೋಗ ಬೊಕ್ಕ ಪ್ರಕೃತಿಚಿಕಿತ್ಸಾ ಪದ್ಧತಿ ಅಂಚನೆ ಆಯುರ್ವೇದರ್ದ್ ಇನಿ ಭಾರತ ವಿಶ್ವಡೊರ್ಮೆ ಬೊಲ್ಪು ತೋಜಾವೊಂದು ಉಂಡು ಪಂದ್ ಪಂಡೆರ್ .

ಗುರ್ಕಾರ್ಮೆ ವಹಿಸಿನ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಡೆರ್ ಪಾತೆರ್ದ್ ಶಾಂತಿವನ ಟ್ರಸ್ಟ್‌ ಆಶ್ರಡ್ ಗ್ರಾಮೀಣ ಪ್ರದೇಶೋಡು ಆರೋಗ್ಯ ಶಿಬಿರನ್ ಅಟ್ಟನೆ ಮಲ್ತ್ ಯೋಗದ ಮಹತ್ವದ ಬಗ್ಗೆ ನಾಲ್ ಲಕ್ಷ ಜನಕ್ಲೆಗ್ ಗೇನ ಮೂಡಾವುನ ಅರಿವು,ಜಾಗೃತಿ ಮೂಡಾದೆರ್ . ದೀರ್ಘಾಯುಷ್ಯ ಬೊಕ್ಕ ಆರೋಗ್ಯ ಭಾಗ್ಯ ರಕ್ಷಣೆಗಾದ್ ಮಾತೆರ್ಲಯೋಗಾಭ್ಯಾಸ ಮಲ್ಪೊಡು .
ಆಧುನಿಕ ತಂತ್ರಜ್ಞಾನದ ಬುಲೆಚ್ಚಿಲ್ ಬೊಕ್ಕ ಮಸ್ತ್ ಸವಲತ್ತುರ್ದಾವರ ಇನಿ ನಮ್ಮ ಜೀವ ಬೊಕ್ಕ ಮನಸ್ ಗ್ ಶ್ರಮ ಕಮ್ಮಿ ಆತುಂಡು. ಪರಾವಲಂಬನೆ ಜಾಸ್ತಿ ಆತುಂಡು .ಯೋಗ ಮಾತಾ ಸಮಸ್ಯೆಲೆನ್ ಪರಿಹರಿಸಾವುಂಡು .ನಮ ಅವ್ವೆತೋ ವಸ್ತುಲೆನ್ ಪರವೂರುರ್ದು ದೆತೊಂದು ಬರ್ಪ. ಆಂಡ ಯೋಗಾಭ್ಯಾಸ, ಆಯುರ್ವೇದ ಬೊಕ್ಕ ಪ್ರಕೃತಿಚಿಕಿತ್ಸಾ ವಿಧಾನೊನು ಪರವೂರುಗು ಕಡಪುರ್ದು ರಫ್ತು ಭಾರತ ವಿಶ್ವಮಾನ್ಯ ಆದ್ ಉಂಡು ಪಂದ್ ಪಂಡೆರ್.

ನೆಲ್ಯಾಡಿ ಜ್ಞಾನೋದಯ ಬೆಥನಿ ಪದವಿ ಪೂರ್ವಕಾಲೇಜ್ದ ಪ್ರಾಂಶುಪಾಲ ಥೋಮಸ್ ಬಿಜಿಲಿ ಶುಭಾಶಂಸನೆ ಮಲ್ತ್ , ಅವ್ವೆತೋ ವರ್ಷರ್ದ್ ಸಾಧು-ಸಂತೆರ್ ಕಲ್ಪಯಿನ ಯೋಗಾಭ್ಯಾಸಜಾತಿ, ಮತ, ದೇಶ-ಭಾಷೆದ ಗಡಿ ಮೀರ್ದ್ ಮಾನವ ಕಲ್ಯಾಣ ಸಾಧ್ಯ ಆಪುಂಡು ಪಂದ್ ಪಂಡೆರ್ . ಮಾನವ ಸೇವೆಯೇ ಮಾಧವನ ಸೇವೆ ಆಪುಂಡು ಪಂದ್ ಪಂಡೆರ್ .
ಶಾಸಕ ಹರೀಶ್ ಪೂಂಜ ಪಾತೆರ್ದ್ ಪ್ರಧಾನಿ ನರೇಂದ್ರ ಮೋದಿ ಬೊಕ್ಕ ಡಿ. ವೀರೇಂದ್ರ ಹೆಗ್ಡೆರ್ ಯೋಗಾಭ್ಯಾಸಗಾದ್ ಕೊರೊಂದು ಉಪ್ಪುನ ಪ್ರೋತ್ಸಾಹರ್ದಾವರ ಭಾರತ ಇನಿ ವಿಶ್ವಗುರುವಾದ್ ಬುಲೆಯೊಂದು ಉಂಡು ಪಂದ್ ಪಂಡೆರ್.
ವಿಧಾನ ಪರಿಷತ್ ಸದಸ್ಯ ಕೆ. ಪ್ರತಾಪಸಿಂಹ ನಾಯಕ್ ಪಾತೆರ್ದ್ ಯೋಗಾಭ್ಯಾಸರ್ದ್ ದೇಹ, ಮನಸ್ಸು ಬೊಕ್ಕ ಆತ್ಮದ ಉನ್ನತಿದೊಟ್ಟುಗು ಸರ್ವತೋಮುಖ ಪ್ರಗತಿ ಸಾಧ್ಯ ಆಪುಂಡು ಪಂದ್ ಪಂಡೆರ್ .
ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸಚಿವಾಲಯದ ಉಪಕಾರ್ಯದರ್ಶಿ ನಸೀಮಾ, ಬಿ.ಐ. ಪಾತೆರ್ದ್ , ಯೋಗ ತೆರಿದಿ ನಕ್ಲೆಗ್ ಸೀಕ್ ಇಜ್ಜಿ .ಅಂಚಾದ್ ಮಾತೆರ್ಲ ಯೋಗ ಮಲ್ಪೊಡು ಪಂದ್ ಪಂಡೆರ್.

ಬೆಂಗ್ಳೂರುದ ಯೋಗಪಟು ಪ್ರಜ್ವಲ್ ನಾಯಕೆರೆಗ್ “ಯೋಗರತ್ನ” ಪ್ರಶಸ್ತಿ ಕೊರ್ದು ಮಾನದಿಗೆ ಮಲ್ತೆರ್ .ಎಸ್.ಡಿ.ಎಂ. ಪ್ರಕೃತಿಚಿಕಿತ್ಸಾ ಬೊಕ್ಕ ಯೋಗ ವಿಜ್ಞಾನ ಕಾಲೇಜ್ದ ಪ್ರಾಂಶುಪಾಲ ಡಾ. ಪ್ರಶಾಂತ್ ಶೆಟ್ಟಿ ಎದುಕೊಂಡೆರ್ .ಯೋಗ ವಿಭಾಗದ ಡೀನ್‌ ಡಾ.ಶಿವಪ್ರಸಾದ್ ಶೆಟ್ಟಿಧ ಸೊಲ್ಮೆ ಸಂದೈತ ಮಲ್ತೆರ್ .ಡಾ. ಜ್ಯೋಸ್ನಾ ಬೊಕ್ಕ ಡಾ.ಅನನ್ಯಾ ಲೇಸ್ ನಡಪಾದ್ ಕೊರಿಯೆರ್.