ಲೇಸ್

ವಾಮದಪದವುಡು ಬಲೆ ತುಳು ಲಿಪಿ ಕಲ್ಪುಗ ಕಜ್ಜ ಕೋಟ್ಯದ ಉದಿಪನದ ಲೇಸ್

ತುಳುನಾಡ ರಕ್ಷಣಾ ವೇದಿಕೆ (ರಿ.) ವಾಮದಪದವು ಎಗ್ಗೆ ಮುತಾಲಿಕೆಡ್ ಜೈ ತುಲುನಾಡ್ (ರಿ.), ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಒಟ್ಟು ಸೇರಿಗೆಡ್ ಧರ್ಮಾರ್ಥ “ಬಲೆ ತುಲು ಲಿಪಿ ಕಲ್ಪುಗ” ಕಜ್ಜಕೊಟ್ಯದ ಉದಿಪನ ಲೇಸ್ ವಾಮದಪದವು ಸಹನಾ ಕಾಂಪ್ಲೆಕ್ಸ್‌ಡ್ 31-10-2021 ನೇ ಐತಾರ ನಡತ್ಂಡ್.

ತುಲು ಲಿಪಿ ಕಲ್ಪಾದಿಲು ಅಂಚನೆ ಜೈ ತುಲುನಾಡ್ (ರಿ.) ಸಂಘಟನೆದ ಒತ್ತು ಸಂಘಟನಾ ಕಾರ್ಯಂತೆರಾಯಿನ ಜಗದೀಶ ಗೌಡ ಕಲ್ಕಳ ಮೆರೆನ ಗುರ್ಕಾರ್ಮೆಡ್ ನಡತ್‌ನ ಈ ಲೇಸ್‌ನ್ ತುಳುನಾಡ ರಕ್ಷಣಾ ವೇದಿಕೆ ವಾಮದಪದವು ಎಗ್ಗೆದ ಗುರ್ಕಾರ್ಲು ದೇವಿಪ್ರಸಾದ್ ಶೆಟ್ಟಿ ತುಡರ್ ಅರ್ಲಾವುನ ಮುಕೇನ ಉದಿಪನ ಮಲ್ತೆರ್.

ತುಲು ಲಿಪಿ ಕಲ್ಪಾದಿಲಾಯಿನ ಪೂರ್ಣಿಮಾ ಬಂಟ್ವಾಳ ತುಲು ಲಿಪಿಟ್ ಬರೆಪುನ ಮುಕೇನ ಕಜ್ಜಕೊಟ್ಯಗ್ ಚಾಲನೆ ಕೊರ್ಯೆರ್.
ಈ ಪೊರ್ತುಡ್ ಲೇಸ್‌ಡ್ ಜೈ ತುಲುನಾಡ್ ಸಂಘಟನೆದ ಒತ್ತು ಸಂಘಟನಾ ಕಾರ್ಯಂತೆರ್ ಅಶ್ರಫ್ ಬಸ್ತಿಕೋಡಿ, ವಾಮದಪದವು ವ್ಯವಸಾಯ ಸೇವಾ ಸಹಕಾರಿ ಸಂಘ ಉಂದೆತ ಗುರ್ಕಾರ್ಲು ಕಮಲ್ ಶೆಟ್ಟಿ, ತುಲು ಲಿಪಿ ಕಲ್ಪಾದಿ ದಿವ್ಯ ಸಿದ್ದಕಟ್ಟೆ ಒತ್ತುಪಾಲ್‌ಡಿತ್ತೆರ್.

ತುಲು ಲಿಪಿ ಶಿಕ್ಷಕೆರಾಯಿನ ಜಗದೀಶ ಗೌಡ ಕಲ್ಕಳ, ಪೂರ್ಣಿಮಾ ಬಂಟ್ವಾಳ, ದಿವ್ಯ ಸಿದ್ಧಕಟ್ಟೆ ಕಜ್ಜಕೊಟ್ಯ ನಡಪಾದ್ ಕೊರ್ಯೆರ್. ಸೌಕತ್ ಆಲಿ ಲೇಸ್‌ನ್ ಸುದಾರ್ತೆರ್. 25 ರ್ದ್ ಜಾಸ್ತಿ ಕಲ್ಪಾರ್ತಿಲು ಸುರುತ ದಿನನೇ ತುಲು ಲಿಪಿ ಕಜ್ಜಕೊಟ್ಯಡ್ ಪಾಲ್ ಪಡೆತೆರ್. ನನ ದುಂಬುದ 4 ಐತಾರ ಬೊಲ್ಪು 10 ಗಂಟೆಗ್ ಸರಿಯಾತ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯ ನಡಪರೆ ಉಂಡು, ಅವೆರ್ದ್ ಬೊಕ್ಕ ಪರೀಕ್ಷೆ ನಡಪಾದ್ ಆಜೋಲೆನ್ ಕೊರ್ಪಾ, ಅಂಚೆನೇ ಉಂದು ಧರ್ಮಾರ್ಥ ಕಜ್ಜಕೊಟ್ಯವಾತುಂಡ್ ಮಾತೆರ್ಲ ಪಾಲ್ ಪಡೆವೊಲಿಂಡ್ ಸಂಘಟಕರ್ ತೆರಿಪಾದೆರ್.