ಕುಡ್ಲ

ಕುಡ್ಲದ ಅಕ್ರಮ ಇಲ್ಲದ ಮಿತ್ತ್ ಜೆಸಿಬಿ ಘರ್ಜನೆ..!

ಕುಡ್ಲ : ಕೋಟಿ ಪಣವುದ ಜಾಗೆನ್ ಅಧಿಕಾರಿಲು ಭೂ ಮಾಫಿಯಾಗ್ (Land Mafia) ಬುರ್ದು ಕೊರಿನ ವಿಚಾರಕ್ಕೆ ವಿಚಾರಗ್ ಸಂಭಂದಿ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ವರದಿದ ಬೆರಿಟ್ಟೆ ಕೋಡೆ ತನಿಖೆ ಸುರು ಆತುಂಡು. ವರದಿ ಆಯಿನ ಬೆರಿಟ್ಟೆ ಇನಿ ಕಾಂಡೆ ಜೆಸಿಬಿ ಮುಖೇನ ಕಾರ್ಯಾಚರಣೆ ಮಲ್ತ್ ಅಕ್ರಮ ಇಲ್ಲ್ ನ್ ಜರ್ತ್ ಪಾಡ್ದೆರ್ .

ಕುಡ್ಲದ ಕೋಟೆಕಾರು ಪ.ಪಂ ವ್ಯಾಪ್ತಿದ ಮಡ್ಯಾರು ಸಾಯಿ ನಗರಡ್ ಕಂಡ್ ದ್ ಕಟ್ಟಿನ ಇಲ್ಲ್ ನ್ ಅಧಿಕಾರಿಲು ಜರ್ತ್ ದೆರ್ ಪುಲ್ಯ ಕಾಂಡೆನೇ ಅಕ್ರಮ ಇಲ್ಲದ ಮಿತ್ತ್ ಜೆಸಿಬಿ ಕಾರ್ಯಾಚರಣೆ ಮಲ್ದೆರ್.ಉಳ್ಳಾಲ ನಗರಸಭೆ ಮುಖ್ಯಾಧಿಕಾರಿ ರಾಯಪ್ಪ ಮುತಾಲಿಕೆಡ್ ಕಾರ್ಯಾಚರಣೆ ನಡತ್oಡ್ . ಮುಗಿಯೆರೆ ಆಯಿನ ಇಲ್ಲನ್ ಜೆಸಿಬಿ ಮುಖೇನ ಜರ್ಟಿನ ಅಧಿಕಾರಿಲು , ಪುಲ್ಯ ಕಾಂಡೆ 5:30 ಗಂಟೆದ ಪೊರ್ತುಗು ಕಾರ್ಯಾಚರಣೆ ಮಲ್ದೆರ್ . ಉಳ್ಳಾಲದ ಕಡಲ್ಕೊರೆತ ಸಂತ್ರಸ್ತೆರೆಗ್ ಪಂದ್ ಇತ್ತಿನ ಕೋಟ್ಯಾಂತರ ಮೌಲ್ಯದ ಜಾಗೆನ್ ಪ್ರಭಾವಿ ಖಾಸಗಿ ಬಿಲ್ಡರ್ ನಕ್ಲೆಗ್ ಬುರ್ದು ಕೊರಿನ ಸರ್ಕಾರ ಅಧಿಕಾರಿಲೆನ ಬಂಡವಾಳನ್ ನಂಕ್ ತೆರಿಪಾದ್ ಕೊರಿಯೆರ್. ಕುಡ್ಲದ ಕೋಟೆಕಾರು ಪಟ್ಟಣ ಪಂಚಾಯತ್ ವ್ಯಾಪ್ತಿದ ಮಡ್ಯಾರು ಸಾಯಿ ‌ನಗರಡ್ ಉಳ್ಳಾಲದ ಕಡಲ್ಕೊರೆತ ಸಂತ್ರಸ್ತೆರೆಗಾದ್ ಸರ್ಕಾರ 1.42 ಎಕರೆ ಜಾಗೆ ಕೊರ್ದು ಇತ್ತುಂಡು . ಕಂದಾಯ ಇಲಾಖೆ ಈ ಜಾಗೆನ್ ಉಳ್ಳಾಲ ನಗರಸಭೆಕ್ ಹಸ್ತಾಂತರ ಮಲ್ದೆರ್ , ನಗರಸಭೆ ಪುದರ್ ಡ್ ಆರ್ ಟಿಸಿಲಾ ಉಂಡು . ಆಂಡ ಕರಿನ ಕೆಲವು ವರ್ಷರ್ದ್ ಮುಲ್ಪ ಸಂತ್ರಸ್ತೆರೆಗ್ ಒವ್ವೆ ಇಲ್ಲ್ ತಿಕ್ಕoದಿನ ಕಾರಣ ಐತ ಲಾಭ ಪಡೆಯಿನ ಖಾಸಗಿ ಬಿಲ್ಡರ್ ನಕುಲು ಜಾಗೆನ್ ವಶಕ್ ದೆತೊನ್ದೆರ್ . ವರ್ಷದ ಪಿರವು ಜಾಗೆ ದೆತ್ತ್ ದ್ ಆ ಜಾಗಡೇ ಲಕ್ಷಾಂತರ ಮೌಲ್ಯದ ಆಜಿ ಇಲ್ಲ್ ರಾಜಾರೋಷವಾದ್ ಕಟ್ಟ್ ದೆರ್ . ‌ಇಂಚ ಇತ್ತುಂಡಲ ಜಾಗದ ಜವಾಬ್ದಾರಿ ಇತ್ತಿನ ಉಳ್ಳಾಲ ನಗರಸಭೆ ಆವಡ್ ಅತ್ತ್ ಕೈತಲ್ ದ ಕೋಟೆಕಾರು ಪ.ಪಂ ಬಾಯಿ ಮುಚ್ಚಿದ್ ಉಂಡು , ಭ್ರಷ್ಟ ಅಧಿಕಾರಿ ವರ್ಗ ಅಕ್ರಮಗ್ ಸಾಥ್ ಕೊರ್ತೆರ್ . ಇಂಚಾದ್ ಬಿಲ್ಡರ್ ನಕುಲು ಇಲ್ಲ್ ಕಟ್ಟ್ ದ್ ಮಾರೊಂದು ಉಲ್ಲೆರ್.

ನನ ಈ ಅಕ್ರಮಡ್ ಉಳ್ಳಾಲ ನಗರಸಭೆ, ಕೋಟೆಕಾರು ಪ.ಪಂ ಬೊಕ್ಕ ಕಂದಾಯ ಇಲಾಖೆದ ಅಧಿಕಾರಿ ವರ್ಗ ಲಂಚ ಪಪಡೆದ್ ಶಾಮೀಲಾಯಿನ ಅನುಮಾನ ಉಂಡು. ಈ ಬೇಲೆಡ್ ಕಂದಾಯ ಇಲಾಖೆ ಅಧಿಕಾರಿಲಾ ಪಾಲ್ ಪಡೆತೆರ್ ಪನ್ಪಿನ ಅನುಮಾನ ಉಂಡು, ಸದ್ಯ ದ‌‌.ಕ ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಈ ಬಗ್ಗೆ ಸಮಗ್ರ ವರದಿ ಕೊರಿಯೆರೆ ಸೂಚನೆ ಕೊರ್ತೆರ್ .