2024

ಮಾನಾಡಿ ಶ್ರೀ ಜುಮಾದಿ ಜಾರಂದಾಯ, ಪರಿವಾರ ದೈವೊಲೆನ ನೇಮೋಚ್ಚಯ

ಮುಲ್ಕಿ: ಮಾನಂಪಾಡಿ ಶ್ರೀ ಜುಮಾದಿ ಜಾರಂದಾಯ ಬೊಕ್ಕ ಪರಿವಾರ ದೈವೊಲೆನ ಸಾನಿಧ್ಯಡ್ ವರ್ಷಾಧಿದ ನೇಮೋಚ್ಚಯ ಭಾರಿ ಗೌಜಿಡ್ ನಡತ್ಂಡ್.

ಈ ಪೊರ್ತುಡು ಮಾನಂಪಾಡಿ ಮೊಗವೀರ ಸಭಾ, ಪೆಜಮಾಡಿ ಕೋಡಿದ ಪತ್ತ್ ಸಮಸ್ತೆರ್, ಮಿತ್ರವೃಂದ ಬೊಕ್ಕ ಮಹಿಳಾ ಮಂಡಳಿ ಮಾನಂಪಾಡಿ ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.

ಜ‌.26 ಬೊಲ್ಪುಗು ಜುಮಾದಿ ಕೋಲದ ಪಿರಿಬಲಿ, ಮಾಯಂದಾಲ ನೇಮೋಚ್ಚಯ, ಅನ್ನ ಪ್ರಸಾದ ಸೇವೆ, ಭಂಡಾರ ಜತ್ತ್ ದ್ ನೇಮ ಸಂಪನ್ನ ಆಂಡ್.

ಕಳೆಂಜ ಗ್ರಾಮದ ಶಿಬರಾಜೆ ಪಾದೆ ಕ್ರೀಡಾಂಗಣಡ್ ಕೊಡಿ ಏರುನ ಲೇಸ್

ಕಳೆಂಜ ಗ್ರಾಮದ ಶಿಬರಾಜೆದ ಪಾದೆ ಕ್ರೀಡಾಂಗಣಡ್ ಬೇತೆ ಬೇತೆ ಸಂಘ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಕೊಡಿ ಏರುನ ಲೇಸ್ ಗೌಜಿಡ್ ನಡತ್ಂಡ್.

ಗ್ರಾ. ಕಾರ್ಯಕ್ರಮ ಅನುಷ್ಠಾನ ಸಮಿತಿ (ರಿ.) ಶಿಬರಾಜೆದ ಗುರ್ಕಾರೆ ಪಿ.ಟಿ ಸಬಾಸ್ಟಿನ್ ಕೊಡಿನ್ ರಾಪಾಯೆರ್. ಮಹಿಳಾ ಜೆಸಿದ ಗುರ್ಕಾರ್ದಿ ಜೆಸಿ ಶೋಭಾ ಪಿ. ಪ್ರಾಸ್ತಾವಿಕ ಪಾತೆರಿಯೆರ್.

ಈ ಪೊರ್ತುಡು ಶಿಬರಾಜೆ ಅಂಗನವಾಡಿದ ಬಾಲವಿಕಾಸ ಸಮಿತಿದ ಗುರ್ಕಾರ್ದಿ ಪ್ರತಿಮಾ ನಾರಾಯಣ, ಜೆಸಿಐದ ಕಾರ್ಯದರ್ಶಿ ಜೆಸಿ ಅಕ್ಷತ್ ರೈ, ಕಳೆಂಜ ಗ್ರಾಮ ಪಂಚಾಯಿತಿ ಮಾಜಿ ಗುರ್ಕಾರೆ ಟಿ.ಎಸ್ ನಿತ್ಯಾನಂದ ರೈ, ಜೆಜೆಸಿ ಗುರ್ಕಾರೆ ಹರ್ಷಿತ್ ಗೌಡ, ನಿಡ್ಲೆ ಗ್ರಾಮ ಪಂಚಾಯತಿ ಸಿಬ್ಬಂದಿ ಮಮತ ಮಂಜುನಾಥ್, ಪ್ರಗತಿಪರ ಕೃಷಿಕೆರ್ ಬಾಬು ಗೌಡ, ನಿಡ್ಲೆ ಗ್ರಾಮ ಪಂಚಾಯತಿ ಮಾಜಿ ಗುರ್ಕಾರೆ ಬಾಲಕೃಷ್ಣ ದೇವಾಡಿಗ, ಕಳೆಂಜ ಗ್ರಾಮ ಪಂಚಾಯತಿ ಸಿಬ್ಬಂದಿ ರಾಜೇಶ್ ಶೆಟ್ಟಿ, ಜೆಸಿಐದ ಖಜಾಂಚಿ ವಿದ್ಯೇಂದ ಪಾಲ್ ಪಡೆದಿತ್ತೆರ್.

ಜೆಸಿಐ ಕೊಕ್ಕಡ ಕಪಿಲದ ಗುರ್ಕಾರೆ ಜೆಸಿ ಎಚ್ ಜಿಎಫ್ ಸಂತೋಷ್ ಜೈನ್ ಮಾತೆರೆನ್ಲಾ ಎದ್ಕೊನಿಯೆರ್. ಶಿಬರಾಜೆದ ಪಾದೆ ಅಂಗನವಾಡಿದ ಕಾರ್ಯಕರ್ತೆ ಪ್ರಿಯಾ ಜೆ ಅಮೀನ್ ಸೊಲ್ಮೆ ಸಂದಾಯೆರ್. ಬೊಕ್ಕ ಶಿಬರಾಜೆ ಅಂಗನವಾಡಿದ ಮಾತ ಜೋಕ್ಲೆಗ್ ಶ್ರೀ ಸದಾಶಿವೇಶ್ವರ ದೇವಲ್ಯದ ಗುರ್ಕಾರೆ ಕೆ.ಶ್ರೀಧರ್ ರಾವ್ ಇನಾಮು ಪಟ್ಟಿಯೆರ್.

ತೀಯಾ ಸಮಾಜದ ಗುರಿಕಾರೆ ಗೋಪಾಲ ಗುರಿಕಾರ ಗರಡಿ ಮಜಲು ನನ ನೆಂಪು ಮಾತ್ರ

ತೀಯಾ ಸಮಾಜದ ಗುರಿಕಾರೆ ಗೋಪಾಲ ಗುರಿಕಾರೆ ಗರಡಿ ಮಜಲು ಮೇರ್ ಜ‌.23 ಅಂಗಾರೆ ದೇವೆರೆ ಪಾದ ಸೇರಿಯೆರ್.

ಮೆರೆಗ್ ಬೊಡೆದಿ, 2 ಮಗಲ್, ಒರಿ ಮಗೆ ಉಲ್ಲೆರ್.

ಒಡಿಪುದ ಸಾನ್ವಿಗ್ ಕೆಳದಿ ಚೆನ್ನಮ್ಮ ಪ್ರಶಸ್ತಿ ಕೊರಿನ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್

ತೀಯಾ ಸಮಾಜ ಒಡಿಪು ಗರಡಿಮಜಲ್ ದ ಪ್ರವೀಣ್ ಕೆ.ಸಾಲಿಯಾನ್ ಬೊಕ್ಕ ಸೌಮ್ಯಶ್ರೀ ಪ್ರವೀಣ್ ಮೊಕ್ಲೆನ ಮಗಲ್ ಸಾನ್ವಿ ಸಾಲಿಯಾನ್ ಮೇರ್ ತನ್ನ ಮಲ್ಲ ಸಾಧನೆಗ್ ಜೋಕ್ಲೆಗ್ ಕೊರ್ಪುನ ಒಡಿಪು ಜಿಲ್ಲಾ ಮಟ್ಟದ ಕೆಳದಿ ಚೆನ್ನಮ್ಮ ಪ್ರಶಸ್ತಿನ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್ ಮೆರೆರ್ದ್ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಶಾಸಕೆರ್ ಯಶಪಾಲ್ ಸುವರ್ಣ ಪಾಲ್ ಪಡೆದಿತ್ತೆರ್.

ಫೆ.15: ಪೆರ್ಲ-ಬಿಯಪಾದೆಡ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ

ಸರಪಾಡಿ ಗ್ರಾಮದ ಪೆರ್ಲ-ಬಿಯಪಾದೆ ಆಶೀರ್ವಾದ ಗೆಳೆಯರ ಬಳಗ (ರಿ.) ಸೇವಾ ಟ್ರಸ್ಟ್ ಬೊಕ್ಕ ಅನ್ನಪೂರ್ಣ ಮಾತೃ ಬಳಗದ ಮುತಾಲಿಕೆಡ್ ಫೆ.15 ಗುರುವಾರ ಬಯ್ಯಗ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು.

ಆನಿ ರಾತ್ರೆ ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಮಾಯದ ದೃಷ್ಠಿ ತುಳು ಆಟ ಬೊಕ್ಕ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಪೆರ್ಲ-ಬಿಯಪಾದೆ ಆಶೀರ್ವಾದ ಗೆಳಯರ ಬಳಗ (ರಿ.) ಸೇವಾ ಟ್ರಸ್ಟ್ ಬೊಕ್ಕ ಅನ್ನಪೂರ್ಣ ಮಾತೃ ಬಳಗದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ರಂಗ ತಪಸ್ವಿ ಸದಾನಂದ ಸುವರ್ಣೆರೆಗ್ ಬಿವಿ ಕಾರಂತ ಪ್ರಶಸ್ತಿ

ಹಿರಿಯ ನಾಟಕಕಾರೆ, ರಂಗ ನಿರ್ದೇಶಕೆ ಸದಾನಂದ ಸುವರ್ಣೆರೆಗ್ (92 ವರ್ಷ) 2023-2024ನೇ ಸಾಲ್ ದ ಪುಗರ್ತೆದ ಬಿವಿ ಕಾರಂತ ಪ್ರಶಸ್ತಿ ಘೋಷಣೆ ಮಲ್ದೆರ್.

ಕನ್ನಡ,ತುಳು ರಂಗಭೂಮಿಗ್ ನೂದೆರ್ದ್ ಎಚ್ಚ ನಾಟಕನ್ ನಿರ್ದೇಶನ ಮಲ್ತಿನ ರಂಗ ತಪಸ್ವಿ ಸದಾನಂದ ಸುವರ್ಣ ಮೇರ್ ಮಸ್ತ್ ಕಾಲ ಬೊಂಬೈ ರಂಗ ಕಾಯಕದ ಬೊಕ್ಕ ಕುಡ್ಲಗ್ ಬತ್ತ್ ದ್ ಅಲ್ಪ ಸೃಜನಶೀಲ ರಂಗ ನಿರ್ದೇಶಕೆರಾದಿತ್ತೆರ್.

ಕುಡ್ಲದ ಹವ್ಯಾಸಿ ನಟ ನಟಿಯೆರೆಗ್ ಉರುಳು, ಕೋರ್ಟ್ ಮಾರ್ಷಲ್, ಬರ್ಸ ಉಂತುನ ಮುಟ್ಟ ನಾಟಕನ್ ನಿರ್ದೇಶನ ಮಲ್ತ್ ದ್ ಸದಭಿರುಚಿದ ರಂಗ ಕಾಯಕೆ ಎಂಚ ಇಪ್ಪೊಡು ಪಂದ್ ತೋಜಾದ್ ಕೊರ್ತೆರ್ . ಘಟಶ್ರಾದ್ದ, ಕುಬಿ ಬೊಕ್ಕ ಇಯಾಲ, ಗುಡ್ಡೆದ ಭೂತ, ಡಾ. ಶಿವರಾಮ ಕಾರಂತೆರೆನ ಬಗೆಟ್ಟ್ ದೂರದರ್ಶನಕ್ಕಾದ್ ನಿರ್ಮಾಣ ಮಲ್ತಿನ 13 ಕಂತುದ ಧಾರವಾಹಿಲು ಸುವರ್ಣೆರೆನ ಸೃಜನಶೀಲತೆಗ್ ಸಾಕ್ಷಿ ಆತ್ಂಡ್.

ಕುಡ್ಲದ ಹವ್ಯಾಸಿರಂಗ ಭೂಮಿಗ್ ಸುವರ್ಣೆರೆನ ಕೊಡುಗೆ ಅನನ್ಯವಾಯಿನವು. ಪುಗರ್ತೆದ ‘ಬಿವಿ ಕಾರಂತ’ ಪ್ರಶಸ್ತಿನ್ ಸುವರ್ಣೆರೆಗ್ ಕೊರ್ನವು ನಿಜಕ್ಲಾ ಅರ್ಹತೆಗ್ ಸಂದಿನ ಮಾನಾದಿಗೆಲ ಅಂದ್.

ಕಾರ್ಲ ತೆಲಿಕೆದ ತೆನಾಲಿ ಕೂಟದಕ್ಲೆರ್ದ್ ತೆಲಿಕೆದ ಬರ್ಸ ಕಾಮಿಡಿ 90 ಲೇಸ್ ದ 500ನೇ ಪ್ರದರ್ಶನ

ಬಲೆ ತೆಲಿಪಾಲೆ, ಮಜಾಭಾರತ, V4 ಕಾಮಿಡಿ ಪ್ರಿಮಿಯರ್ ಲೀಗ್ ಚಾಂಪಿಯನ್ ಖ್ಯಾತಿದ ಒಡಿಪು ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್, ಚಲನಚಿತ್ರ ನಟೆ, ತೆಲಿಕೆದ ತೆನಾಲಿ ಸುನಿಲ್ ನೆಲ್ಲಿಗುಡ್ಡೆ ಮುತಾಲಿಕೆದ ಕಾರ್ಲ ತೆಲಿಕೆದ ತೆನಾಲಿ ಕೂಟದಕ್ಲೆರ್ದ್ ತೆಲಿಕೆದ ಬರ್ಸ ಕಾಮಿಡಿ 90 ಲೇಸ್ ದ 500ನೇ ಪ್ರದರ್ಶನ ಜ.26 ಸುಕ್ರಾರ (ಇನಿ) ಕುಂಪಲದ ವ್ಯಾಸನಗರ ಆದಿಶಕ್ತಿ ಚಾಮುಂಡೇಶ್ವರಿ ದೇವಲ್ಯಡ್ ನಡತ್ಂಡ್.

ಈ ಕೂಟ ಶುದ್ಧ ಹಾಸ್ಯ ಸಂಭಾಷಣೆದೊಟ್ಟಿಗೆ ಕುಟುಂಬ ಸಮೇತರಾದ್ ಕುಲ್ಲುದು ತೂಪಿನ ಹಾಸ್ಯನ್ ಕೊರ್ದು ಅಭಿಮಾನಿಲೆನ ಮನಸ್ಸ್ ಗೆಂದ್ ದ್ಂಡ್. ಅತ್ತಂದೆ ಈ ಕೂಟದ ಲೇಸ್ ಗಾದ್ 9845439720 ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್ ಕಾರ್ಲ ತೆಲಿಕೆದ ತೆನಾಲಿ ಕೂಟ ತೆರಿಪಾದ್ಂಡ್.

ಇನಿ ಕಾಯರ್ತೋಡಿ ಶ್ರೀ ಮಹಾವಿಷ್ಣು ದೇವಲ್ಯದ ಕಾಲಾವಧಿ ಜಾತ್ರೆ ಸುರು

ಕಾಯರ್ತೋಡಿ ಶ್ರೀ ಮಹಾವಿಷ್ಣು ದೇವಲ್ಯದ ಕಾಲಾವಧಿ ಜಾತ್ರೆ ಇನಿರ್ದ್ (ಜ.26) ಜ.28 ಮುಟ್ಟ ನಡಪರೆ ಉಂಡು.

ಜ.26 ಸುಕ್ರಾರ ಬಯ್ಯಗ್ ಜಾತ್ರೋಚ್ಚಯದ ಲೆಕ್ಕೊಡು ಶ್ರೀ ದೇವೆರೆಗ್ ದೀಪೋಚ್ಚಯ, ರಾತ್ರೆ ಕೈತಲ್ದ ಕಲಾವಿದೆರ್ದ್ ಸಾಂಸ್ಕೃತಿಕ ವೈವಿಧ್ಯ ಲೇಸ್ ನಡಪರೆ ಉಂಡು.

ಜ.27 ಸನಿಯಾರ ಬೊಲ್ಪುಗು ಗಣಪತಿ ಹವಾನ, ಉಗ್ರಾಣ ದಿಂಜಾಯೆರೆ, ಪುದೆಕಾಣಿಕೆ ಮೆರವಣಿಗೆ, ತಂತ್ರಿಲು ಬರಿಯೆರೆ, ತುಲಾಭಾರತ, ಶ್ರೀ ದೇವೆರೆನ ಬೂತ ಬಲಿ ಉಚ್ಚಯ ಬೊಕ್ಕ ಕಟ್ಟೆ ಪೂಜೆ ನಡಪರೆ ಉಂಡು.

ಜ.28 ಐತಾರ ಬೊಲ್ಪುಗು ದೇವೆರೆನ ಶ್ರೀ ಬಲಿ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಶ್ರೀಮುಡಿ ಗಂಧ ಪ್ರಸಾದ ಬೊಕ್ಕ ಶ್ರೀ ದೇವೆರೆಗ್ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಶ್ರೀ ದೇವೆರೆಗ್ ರಂಗ ಪೂಜೆ, ರಾತ್ರೆ ರಾಗಂ, ತಾಳಂ, ನಾಟ್ಯಂ, ಕಾಯರ್ತೋಡಿ ವೈಭವ ನಡಪರೆ ಉಂಡು.

ಫೆ.4: ನವಿ ಮುಂಬೈದ ಐರೋಲಿ ಹೆಗ್ಗಡೆ ಭವನಡ್ ಆಯಿನ ಆಂಡ್ ಬುಡ್ದು ಬುಡ್ಲೆ ತುಳು ನಾಟಕ

ಬೊಂಬೈ ಹೆಗ್ಗಡೆ ಸೇವಾ ಸಂಘದ (ರಿ.) ದ ವರ್ಷದ ಲೇಸ್ ದ ಲೆಕ್ಕೊಡು ಫೆ.4 ಐತಾರ ನವಿಬೊಂಬೈದ ಐರೋಲಿ ಹೆಗ್ಗಡೆ ಭವನಡ್ “ಆಯಿನ ಆಂಡ್ ಬುಡ್ದು ಬುಡ್ಲೆ” ತುಳು ನಾಟಕ ನಡಪರೆ ಉಂಡು.

ಈ ನಾಟಕ ರಂಗ ಮಿಲನ ಬೊಂಬೈದ ಮುತಾಲಿಕೆಡ್ ವಿರಾರ್ ನಂದಿಕೂರ್ ರಚನೆಡ್, ಚಿತ್ರನಟೆ ಮನೋಹರ್ ಶೆಟ್ಟಿ ನಂದಳಿಕೆ ನಿರ್ದೇಶನಡ್ ನಡಪರೆ ಉಂಡು.

ಅಂಚೆನೆ ಆನಿ ಬೊಲ್ಪುಗು ಗಣ ಹೋಮ, ಸತ್ಯನಾರಾಯಣ ಮಹಾಪೂಜೆ, ಬೊಕ್ಕ ಅಮರವೀರ ಕೃತಿ ಬುಡುಗಡೆ, ಸಾಧಕರೆಗ್ ಸನ್ಮಾನ, ಪ್ರಶಸ್ತಿ ವಿತರಣೆ, ಸಾಂಸ್ಕೃತಿಕ ಲೇಸ್ ಮಾತಾ ಸಂಘದ ಗುರ್ಕಾರೆ ಮನೋಜ್ ಎಲ್ ಹೆಗ್ಡೆ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಈ ಲೇಸ್ ಡ್ ತುಳು ಕನ್ನಡ ಬಂಧುಲು ಪಾಲ್ ಪಡೆವೂಡು ಪಂದ್ ಪದುಕೆರ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.

ರಾಜಬೂಡುಡ್ ರಾಣಿ ಅಬ್ಬಕ್ಕ ದೇವಿ ಪ್ರತಿಮೆಗ್ ಮಾಲಾರ್ಪಣೆ, ಗಣರಾಜೋತ್ಸವದ ದಿನಾಚರಣೆ

ಬೆಂಗಳೂರು: 75ನೇ ಗಣರಾಜೋತ್ಸವ ದಿನಾಚರಣೆದ ಅಂಗವಾದ್ ಜ. 26 ಕ್ಕ್ ಶುಕ್ರಾರ ಕಾಂಡೆ 8.30 ಗಂಟೆಗ್ ಸರಿಯಾದ್ , ಸೋಪ್ ಫ್ಯಾಕ್ಟರಿ ಎದುರುದ ತುಳುನಾಡ್ ದ ವೀರ ರಾಣಿ ಅಬ್ಬಕ್ಕನ ಪ್ರತಿಮೆಗ್ ಮಾಲಾರ್ಪಣೆ ಮಲ್ತ್ ದ್ ಗೌರವ ಸಂದಾವುನ ಲೇಸ್ ತುಳು ಸಂಘಟನೆಲೆದ ಒಟ್ಟುಸೇರಿಗೆಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಬತ್ತಿನ ಮೈಸೂರು ಸ್ಯಾಂಡಲ್ ಸೋಪ್ ಫ್ಯಾಕ್ಟರಿ ದ ಆಡಳಿತ ನಿರ್ದೇಶಕೆರ್ ಡಾ.ಪಿ.ಕೆ.ಪ್ರಶಾಂತ್ ಮೇರ್ ಗಣರಾಜೋತ್ಸವದ ದಿನಾಚರಣೆದ ಮಹತ್ವ ಬೊಕ್ಕ ಸ್ವಾತಂತ್ರ್ಯ ಪೊರ್ಂಬಾಟಗಾರ್ತಿ ರಾಣಿ ಅಬ್ಬಕ್ಕ ದೇವಿನ್ ಈ ಸಂದರ್ಬೊಡು ಎಂಕ್ಲು ನೆಂಪು ಮಲ್ಪುನ ಅಗತ್ಯ ಉಂಡು ಪಂಡೆರ್.

ಅಂಚೆನೇ ರಾಜಬೂಡುದ ತುಳು ಸಂಘಟನೆದ ಒಗ್ಗಟ್ಟ್ ನ್ ತೂದ್ ಮಸ್ತ್ ಖುಷಿ ಪಡೆದ್ ಸೇರ್ದಿನ ಸಂಘಟನೆದ ಮಾತಾ ಪೆರ್ಮೆದ ತುಳುವ ಬಂದುಲೆಗ್ ಎಡ್ಡೆಪ್ಪು ಬಯಕಿಯೆರ್.

ಬಿ.ಬಿ.ಎಂ.ಪಿ ಮಾಜಿ ಸದಸ್ಯೆರ್ ಕೆ.ವಿ.ರಾಜೇಂದ್ರ ಕುಮಾರ್ ಮೇರ್ ಹಾಜರಿತ್ತೆರ್.ಅಂಚೆನೇ ತುಳು ಸಂಘಟನೆದ ಮುಖ್ಯಸ್ಥೆರ್ ತುಳುನಾಡ ಮಣ್ಣ್ ದ ಕೆಲವು ಮಾಮಲ್ಲ ಸಾಧಕರೆನ್ ನೆಂಪು ಮಲ್ತ್ ಪಾತೆರಿಯೆರ್.

ತುಳುಕೂಟದ ಗುರ್ಕಾರ್ಲು ಸುಂದರ್ ರಾಜ್ ರೈ,ತುಳುವೆರೆ ಚಾವಡಿದ ಗುರ್ಕಾರ್ಲು ಉಮೇಶ್ ಪೂಂಜ,ತುಳುವೆರೆ ಚಾವಡಿದ ಮಾನಾದಿಗೆದ ಗುರ್ಕಾರ್ಲು ಪುರುಷೋತ್ತಮ್ ಚೇಂಡ್ಲಾ, ತುಳುವೆರೆಂಕುಲು ಮಾಜಿ ಗುರ್ಕಾರ್ಲು ವಿಜಯಕುಮಾರ್ ಕುಲಶೇಖರ್, ಡಾ.ಕೆ.ಎನ್. ಅಡಿಗ, ವೈ.ಜಯಂತ್ ರಾವ್, ತುಳು ಸಂಘಟನೆದ ಮುಖ್ಯಸ್ಥೆರಾಯಿನ ಡಾ.ಕೆ.ಸಿ.ಬಲ್ಲಾಳ್, ರಮೇಶ್ ಹೆಗ್ಡೆ , ಜಯರಾಮ ಸೂಡ, ಡಿ.ಪಿ.ಗಣೇಶ್, ರಘುವೀರ್ ನಾಯ್ಕ್, ಆಶಾನಂದ ಕುಲಶೇಖರ್, ವಿಶು ಕುಮಾರ್ ರೈ, ವಿಶು ಶೆಟ್ಟಿ, ಶ್ರೀಧರ್ ಶೆಟ್ಟಿ, ಮಾಳ ಹರ್ಷೇಂದ್ರ ಜೈನ್, ಮಂಜುನಾಥ ಅಡಪ, ಮಟ್ಟಿ ರಾಮಚಂದ್ರ ರಾವ್,ಮಹೇಶ್ ಶೆಟ್ಟಿ ಬೈಲೂರು, ವಿಶ್ವನಾಥ್ ಕುಲಾಲ್, ನರೇಂದ್ರ ಶೆಟ್ಟಿ,
ಎಂ.ಜಗನ್ನಾಥ್ ಮುಣ್ಣೂರು, ಅಜಿತ್ ಹೆಗ್ಡೆ, ಉಮೇಶ್ ನಾಯ್ಕ್, ಪಣಿರಾಜ್ ಜೈನ್,ಪ್ರೇಮದಾಸ್ ಅಡ್ಯಂತಾಯ, ಉಮೇಶ್ ರೈ ,ನವೀನ್ ಕುಮಾರ್, ಬಿ.ಇ.ಎಲ್, ವಿದ್ಯಾನಂದ್ ರೈ, ನಾಗರಾಜ ಆಚಾರ್ಯ,‌ ಸುದೀಪ್ ಶೆಟ್ಟಿ, ಉಮೇಶ್ ಕುಮಾರ್ ರೈ, ಜಗನ್ನಾಥ್ ಶೆಟ್ಟಿ , ಶ್ರೀನಾಥ್ ಕುಲಾಲ್, ಪ್ರಥಮ್ ಚೇಂಡ್ಲಾ ಅಂಚೆನೇ ದಕ್ಷಿಣ ಕನ್ನಡಿಗರ ಸಂಘ, ತುಳುಕೂಟ ಬೆಂಗಳೂರು, ತುಳುವೆರೆಂಕುಲು,ಬೆಂ. ತುಳುವೆರೆ ಚಾವಡಿ, ಬೆಂ.ತುಳುನಾಡ ಜವನೆರ್ ಬೆಂಗಳೂರು,ಬಂಟರ ಸಂಘ ಬೆಂಗಳೂರು,ಜೈನ್ ಅಸೋಸಿಯೇಷನ್ ಸಂಸ್ಥೆ,ಕುಲಾಲ ಸಂಘ ಬೆಂಗಳೂರು,ಬಿಲ್ಲವ ಸಮುದಾಯ, ಪರಿವಾರ ಬಂಟರ ಸಂಘ, ಬೆಂಗಳೂರು, ದ.ಕ.ಮರಾಠಿ ಸಂಘ,ದ.ಕ.ಪದ್ಮಶಾಲಿ ಸಮಾಜ ಸೇವಾ ಕೂಟ, ವಿಶ್ವ ಬ್ರಾಹ್ಮಣರ ಸಂಘ, ಸೃಷ್ಟಿ ಕಲಾಭೂಮಿ‌ ಬೆಂಗಳೂರು, ಇಂಚ ಬೇತೆ ಬೇತೆ ಸಮುದಾಯದ ಸದಸ್ಯೆರ್, ಮುಖ್ಯಸ್ಥೆರ್ ಪೂರ ಈ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಅಂಚೆನೇ ಫಲಾಹಾರದ ವ್ಯವಸ್ಥೆನ್ ಜೈನ್ ಅಸೋಸಿಯೇಷನ್ ದಕುಲು ಅಚ್ಚುಕಟ್ಟಾದ್ ಮಲ್ತ್ ಇತ್ತೆರ್‌. ಅಂಚೆನೇ ತುಳುವೆರೆ ಚಾವಡಿ ಸಂಘಟನೆ ಗಣರಾಜೋತ್ಸವದ ಸಂಭ್ರಮದ ಆಚರಣೆಗ್ ಬೋಡಾದ್ ಸೇರ್ದಿನ ಮಾತಾ ತುಳುವೆರೆಗ್ ಚೀಪೆ ತೆನಸ್ ಪಟ್ಟಿಯೆರ್.

ವರದಿ:ಯಾದವ ಎಸ್ ಕಲ್ಲಾಪು