2024

ಬಿಜೆಪಿ ಹಳೆಯಂಗಡಿ ಮಹಾಶಕ್ತಿ ಕೇಂದ್ರದ ಪೊಸ ಗುರ್ಕಾರೆಯಾದ್ ಲಕ್ಷ್ಮಣ್ ಸಾಲ್ಯಾನ್ ಕೆರೆಕಾಡು, ಕಾರ್ಯದರ್ಶಿಯಾದ್ ಯುವನಾಯಕೆರ್ ಜೀವನ್ ಶೆಟ್ಟಿ ಅಂಗರಗುಡ್ಡೆ ಆಯ್ಕೆ

ಮುಲ್ಕಿ-ಬೆದ್ರ ಕ್ಷೇತ್ರದ ಬಿಜೆಪಿ ಹಳೆಯಂಗಡಿ ಮಹಾಶಕ್ತಿ ಕೇಂದ್ರದ ಗುರ್ಕಾರೆಯಾದ್ ಲಕ್ಷ್ಮಣ್ ಸಾಲ್ಯಾನ್ ಕೆರೆಕಾಡು ಬೊಕ್ಕ ಕಾರ್ಯದರ್ಶಿಯಾದ್ ಯುವ ನಾಯಕೆ ಜೀವನ್ ಶೆಟ್ಟಿ ಅಂಗರಗುಡ್ಡೆ ಆಯ್ಕೆ ಆತೆರ್ ಪಂದ್ ಮಂಡಲದ ಗುರ್ಕಾರೆ ದಿನೇಶ್ ಪುತ್ರನ್ ಪ್ರಕಟ ಮಲ್ದೆರ್.

ಕೆರೆಕಾಡು‌ ಬೆಳ್ಳಾಯರ್ ನಿವಾಸಿ ಲಕ್ಷ್ಮಣ್ ಸಾಲ್ಯಾನ್ ಮೆರೆಗ್ ಬೆಳ್ಳಾಯರು ಶಕ್ತಿ ಕೇಂದ್ರದ ಪ್ರಮುಖರಾದ್ ಅನುಭವ ಉಂಡು. ಕೈತಲ್ದ ಸಾರ್ವಜನಿಕ ಹಿಂದೂ ರುದ್ರಭೂಮಿದ ಗುರ್ಕಾರೆಯಾದ್ ರುದ್ರಭೂಮಿದ ಪ್ರಗತಿಗ್ ಕೆಲಸ ಮಲ್ದೆರ್.

ಎಲ್ ಐಸಿ‌ ಏಜೆಂಟರಾದ್ ಮುಲ್ಕಿ ಯೂನಿಯ‌ನ್ ಗುರ್ಕಾರೆಯಾದ್ ಸಂಘಟನಾತ್ಮಕವಾದ್ ಬೇಲೆ ಮಲ್ದೆರ್. ಕಿನ್ನಿಗೋಳಿ ಪರಿಸರಡ್ ಕೋರಿ ಮಾರುನ ಉದ್ಯಮಿ ಆಯಿನ ಮೆರೆಗ್ ಈ‌ ಪೊಸ ಜಬದಾರಿನ್ ಬಿಜೆಪಿ ಕಾರ್ಯಕರ್ತೆರ್ ಕೊರ್ತೆರ್.

ಅಂಚೆನೆ ಅತಿಕಾರಿಬೆಟ್ಟು ಗ್ರಾಮ‌ ಪಂಚಾಯತ್ ದ ಮಾಜಿ ಸದಸ್ಯೆರ್ ಜೀವನ್ ಶೆಟ್ಟಿ ತನ್ನ ಅವಧಿಡ್ ಗ್ರಾಮದ ಸಮಸ್ಯೆಲೆನ ಪರಿಹಾರಗ್ ಪ್ರಮಾಣಿಕವಾದ್ ಕೆಲಸ ಮಲ್ದೆರ್. ತುಳು ಲಿಪಿಟ್ಟ್ ಪುದರ್ ಪಲವೆನ್ ಪಾಡ್ದ್ ಮಾತೆರ್ನಲ ಗಮನ‌ ಸೆಳೆತೆರ್. ಬಡಪತ್ತ್ ದ ಪೊಂಜೋವುಗ್ ಇಲ್ಲ್ ನಿರ್ಮಾನ ಮಲ್ತ್ ದ್ ಕೊರ್ಪುನಲ್ಪ ಮಲ್ಲ ಪಾತ್ರ ಒಯಿಸೊನ್ನ ಮೇರ್ ಸಾಮಾಜಿಕ ಕ್ಷೇತ್ರಡ್ ಸ್ನೇಹಿತೆರೆನ ಮುಖೇನ ಬಡವೆರೆಗ್ ಸಹಾಯ ಮಲ್ಪುನಲ್ಪ ದುಂಬು ಉಲ್ಲೆರ್. ದಿ ಸುಖಾನಂದ ಶೆಟ್ಟಿ ನೆಂಪುಗಾದ್ ಕ್ರೀಡಾ ಸಂಘಟನೆ, ಸಮಾಜಸೇವೆ ಬೊಕ್ಕ ಸುಸಜ್ಜಿತ ಬಸ್ ನಿಲ್ದಾಣ ನಿರ್ಮಾಣ ಮಲ್ತ್ ದ್ ಸಮಾಜಗ್ ಕೊರ್ತೆರ್. ಮೆರೆನ ಸಂಘಟನಾ ಚತುರತೆಗ್ ಅರ್ಹವಾದ್ ಕಾರ್ಯದರ್ಶಿ ಬೇಲೆ ತಿಕ್ ದ್ಂಡ್ ಪಂದ್ ಬಿಜೆಪಿ ಕಾರ್ಯಕರ್ತೆರ್ ತೆರಿಪಾದೆರ್.

ಬೊರಿವಲಿ ತುಳು ಸಂಘದ ವಾರ್ಷಿಕ ವಿಹಾರ ಕೂಟ

ಬೊಂಬೈ: ಬೊರಿವಲಿ ತುಳು ಸಂಘದ ವಿಹಾರ ಕೂಟನ್ ಮಾ.3 ಕ್ಕ್ ಮಲಾಡ್ ಪಶ್ಚಿಮ ಕೈತಲ್ದ ರಾಹುತ್ ಕೋಟೇಜ್ ಡ್ ಆಯೋಜನೆ ಮಲ್ತ್ ಇತ್ತ್ಂಡ್.

ಈ ಲೇಸ್ ಡ್ ಸಂಘದ ನೂದೆರ್ದ್ ಎಚ್ಚ ಜನ ಸದಸ್ಯೆರ್ ಪರಿವಾರ ಸಮೇತ ಪಾಲ್ ಪಡೆದಿತ್ತೆರ್. ಹಿರಿಯ ಕಿರಿಯೆರೆಗ್ ಬೇತೆ ಬೇತೆ ಗೊಬ್ಬುದ ಪಂತೊಲು, ನೃತ್ಯ, ಗಾಯನನ್ ಆಯೋಜನೆ ಮಲ್ತ್ ಇತ್ತೆರ್. ನೆಟ್ಟ್ ಮಾತೆರ್ಲಾ ಕುಸಿ ಪಡೆಯೆರ್.

ಸಂಘದ ಗುರ್ಕಾರೆ ಕರುಣಾಕರ ಎಂ. ಶೆಟ್ಟಿ ಪಾತೆರ್ದ್, ಸಂಘದ ಕಾರ್ಯಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ಸದಸ್ಯೆರ್ ಏಪಲ ಪಾಲ್ ಪಡೆಪುನೆ ಬೊಕ್ಕ ನಿರಂತರ ಬೆಂಬಲ ಮಲ್ಪುನೆಕ್ಕ್, ಅತ್ತಂದೆ ಸಂಸ್ಥಾಪಕ ಗುರ್ಕಾರೆ ವಾಸು ಪುತ್ರನ್ ಬೊಕ್ಕ ಮಾಜಿ ಗುರ್ಕಾರೆ ಪ್ರಕಾಶ್ ಶೆಟ್ಟಿ ಪೇಟೆಮನೆ ಮೊಕ್ಲೆನ ನಿರಂತರ ಬೆಂಬಲ ಬೊಕ್ಕ ಮಾರ್ಗದರ್ಶನನ್ ಮೆಚ್ಚಿಯೆರ್. ಬೊಕ್ಕ ವಿಹಾರ ಕೂಟಡ್ ಪಾಲ್ ಪಡೆದ್ ಯಶಸ್ವಿಯಾದ್ ನಡಪಾದ್ ಕೊರ್ನ ಮಾತ ಸದಸ್ಯೆರೆಗ್ ಕೃತಜ್ಞತೆನ್ ಸಂದಾಯೆರ್. ಅತ್ತಂದೆ ಮಾತ ಕಾರ್ಯನ್ ಯಶಸ್ವಿಯಾದ್ ಮಲ್ತಿನ ಸಂಘದ ಪದುಕೆರೆಗ್, ಕಾರ್ಯಕಾರಿ ಸಮಿತಿದ ಸದಸ್ಯೆರೆಗ್, ಸಾಂಸ್ಕೃತಿಕ ಸಮಿತಿ ಬೊಕ್ಕ ಮಹಿಳಾ ವಿಭಾಗದ ಸದಸ್ಯೆರೆಗ್ ಅಭಿನಂದನೆ ಸಂದಾಯೆರ್.

ಬೊರಿವಲಿ ತುಳು ಸಂಘ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ನ್ಯಾ.ರಾಘವ ಮೇರ್ ದಿನ ಇಡೀ ನಡತಿನ ಬೇತೆ ಬೇತೆ ಗೊಬ್ಬುದ ಪಂತೊನ್ ನಡಪಾದ್ ಕೊರಿಯೆರ್. ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.

ಸಂಘದ ಸ್ಥಾಪಕ ಗುರ್ಕಾರೆ ವಾಸು ಪುತ್ರನ್ ಪಾತೆರ್ದ್, ಸದಸ್ಯೆರ್ ಪಾಲ್ ಪಡೆಪುನ ಬೊಕ್ಕ ಬೆಂಬಲಗ್ ಸಂತೋಷ ತೆರಿಪಾಯೆರ್.

ಈ ಪೊರ್ತುಡು ಪ್ರಧಾನ ಕಾರ್ಯದರ್ಶಿ ರಜಿತ್ ಸುವರ್ಣ, ಕೋಶಾಧಿಕಾರಿ ಚಂದ್ರಹಾಸ ಬೆಳ್ಚಡ, ಸಾಂಸ್ಕೃತಿಕ ಸಮಿತಿ ಕಾರ್ಯಾಧ್ಯಕ್ಷೆರ್ ಕುಸುಮಾ ಶೆಟ್ಟಿ, ಒತ್ತು ಗುರ್ಕಾರ್ದಿ ಕಸ್ತೂರಿ ಶೆಟ್ಟಿ, ಮಹಿಳಾ ವಿಭಾಗದ ಒತ್ತು ಗುರ್ಕಾರ್ದಿ ಶೋಭ ಶೆಟ್ಟಿ, ಸರಸ್ವತಿ ರಾವ್, ಲಕ್ಷ್ಮೀ ದೇವಾಡಿಗ, ಜಯಂತಿ ಶೆಟ್ಟಿ, ಪದುಕೆರ್ ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಶಾರದಾ ಎ. ಅಂಚನ್ ಕೊಡವೂರು ಮೆರೆನ ವೈದ್ಯಕೀಯ ಬೂಕು “ರಕ್ತಶುದ್ಧಿ-ಆರೋಗ್ಯವೃದ್ಧಿ” ಗ್ ಬಿಸಲೇರಿ ಜಯಣ್ಣ, ಬಿಸಲೇರಿ ಬ್ರದರ್ಸ್ ದತ್ತಿ ಪ್ರಶಸ್ತಿ

ಕನ್ನಡ ಸಾಹಿತ್ಯ ಪರಿಷತ್ ಕೊರ್ಪುನ ದತ್ತಿ ಪ್ರಶಸ್ತಿ ಲೇಸ್ ಮಾ.3 ಕ್ಕ್ ನಡತ್ಂಡ್.

ಈ ಲೇಸ್ ಡ್ ಶಾರದಾ ಎ .ಅಂಚನ್ ಕೊಡವೂರು ಮೆರೆನ ವೈದ್ಯಕೀಯ ಬೂಕು “ರಕ್ತಶುದ್ಧಿ-ಆರೋಗ್ಯವೃದ್ಧಿ” ಗ್ ಬಿಸಲೇರಿ ಜಯಣ್ಣ ಬೊಕ್ಕ ಬಿಸಲೇರಿ ಬ್ರದರ್ಸ್ ದತ್ತಿ ಪ್ರಶಸ್ತಿನ್ ಕೊರಿಯೆರ್.

ಈ ಪ್ರಶಸ್ತಿನ್ ಮೇರ್ ಸಾಹಿತ್ಯ ಪರಿಷತ್ತ್ ದ ಗುರ್ಕಾರೆ ಡಾ.ಮಹೇಶ್ ಜೋಶಿ, ಮಾನ್ಯ ಕರ್ನಾಟಕ ಲೋಕಾಯುಕ್ತೆರ್ ಬಿ.ಎಸ್.ಪಾಟೀಲ್, ಚಲನಚಿತ್ರ ಸಾಹಿತಿ ಕವಿರತ್ನ ಡಾ.ನಾಗೇಂದ್ರ ಪ್ರಸಾದ್, ಸಾಹಿತಿ ಬೊಕ್ಕ ವೈದ್ಯೆರ್ ಡಾ.ಯೋಗಣ್ಣ, ನಿವೃತ್ತ ಉಪಕುಲಪತಿಲು ಡಾ. ಎನ್.ಎಸ್ ರಾಮೇಗೌಡ, ಕುಲಾಧಿಪತಿಲು, ಮಾಲ್ಡೀವ್ಸ್ ದೇಶದ ಕೌನ್ಸಿಲ್ ಜನರಲ್ ಡಾ.ವಿ.ಜಿ .ಜೋಸೆಫ್ ಮೊಕ್ಲೆನ ಸಮ್ಮುಖಡ್ ಸ್ವೀಕಾರ ಮಲ್ತೆರ್.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಸಮುದಾಯ ಬಾನುಲಿ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 48ನೇ ಸಂಚಿಕೆ ಮಾ.5 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ನ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ನಡಪಾದ್ ಕೊರ್ಪೆರ್. ಮಾ.6 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಡ್ಲದ ಈಶಿಕಾ ಶೆಟ್ಟಿಗ್ ಮಿಸ್ ಟೀನ್ ಪ್ರಶಸ್ತಿ

ಡೆಲ್ಲಿಡ್ ನಡತಿನ ಮಿಸ್ ಟೀನ್ ಗ್ಲೋಬಲ್ ಸೌಂದರ್ಯ ಪಂತೊಡು ಕುಡ್ಲದ ಈಶಿಕಾ ಶೆಟ್ಟಿಗ್ ಮಿಸ್ ಟೀನ್ ಗ್ಲೋಬಲ್ ವರ್ಲ್ಡ್ ಇಂಡಿಯಾ ಓಷಿಯಾನಿಯಾ-2024 ಪ್ರಶಸ್ತಿ ತಿಕ್ ದ್ಂಡ್.

ಗ್ಲೋಬಲ್ ಇಂಡಿಯಾ ಎಂಟರ್ ಟೈನ್ ಮೆಂಟ್ ಪ್ರೊಡಕ್ಷನ್ಸ್ ಬೊಕ್ಕ ಅಲಿ ಶರ್ಮಾ ಮುತಾಲಿಕೆಡ್ ಪಂತೊ ಆಯೋಜನೆ ಮಲ್ತ್ ದಿತ್ತೆರ್.‌

ಈ ಪಂತೊಡು ದೇಶದ ಬೇತೆ ಬೇತೆ ರಾಜ್ಯದ 65 ಜನ ಪಾಲ್ ಪಡೆದಿತ್ತೆರ್. ಈಶಿಕಾಗ್ ಎಲ್ಯೆರ್ದೆ ನಾಟಕಡ್ ಅಭಿನಯ, ಮಾಡೆಲಿಂಗ್ ಡ್ ಮಾಸ್ತ್ ಆಸಕ್ತಿ ಇತ್ಂಡ್.

ಕಾವೂರು ನಿವಾಸಿ ಆಯಿನ ಮೇರ್ ಸಂತ ಅಲೋಶಿಯಸ್ ಕಾಲೇಜ್ ಡ್ ಫಸ್ಟ್ ಪಿಯುಸಿ ಕಲ್ಪಾರ್ಥಿ .

ಕೊಲಕಾಡಿ ಶ್ರೀ ಪಿಲಿಚಾಮುಂಡಿ ಸಪರಿವಾರ ದೈವೊಲ್ಯಡ್ ನೇಮ

ಮುಲ್ಕಿ: ಅತಿಕಾರಿಬೆಟ್ಟು ಕೊಲಕಾಡಿ ಶ್ರೀ ಪಿಲಿಚಾಮುಂಡಿ ಸಪರಿವಾರ ದೈವೊಲ್ಯಡ್ ಪ್ರತಿಷ್ಠಾ ವಿಧಿ, ಕುಂಭಾಭಿಷೇಕ ಬೊಕ್ಕ ನೇಮದ ಲೆಕ್ಕೊಡು ಮಾ.4 ಸೋಮಾರ ರಾತ್ರೆ ಪಿಲಿಚಾಮುಂಡಿ ದೈವೊದ ನೇಮ ನಡತ್ಂಡ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಮಾನಾದಿಗೆದ ಗುರ್ಕಾರೆ ಸುಧಾಕರ ಶೆಟ್ಟಿ ಗುತ್ತಿನಾರ್ ದೆಪ್ಪುಣಿಗುತ್ತು, ಗುರ್ಕಾರೆ ಗಣೇಶ್ ಶೆಟ್ಟಿ ಕೊಲಕಾಡಿ ಬೊಂಬೈ, ಸಮಿತಿದ ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.

ಮಾ.5 ಅಂಗಾರೆ (ಇನಿ) ಬಯ್ಯಗ್ ಭಂಡಾರ ಜಪ್ಪೆರೆ, ಕಲ್ಕುಡ, ಕಲ್ಲುರ್ಟಿ, ತೂಕತ್ತೆರಿ, ಗುಳಿಗ ಕೋಲ ನಡಪರೆ ಉಂಡು.

ಮದರ್ ಇಂಡಿಯಾ ರಾತ್ರೆ ಶಾಲೆದ ಮಾಜಿ ವಿದ್ಯಾರ್ಥಿ, ಮಲ್ಲ ಸಾಹಿತಿ ಪ್ರೊ.ಡಾ. ವಿಶ್ವನಾಥ್ ಕಾರ್ನಾಡ್ ರೆಗ್ ಸನ್ಮಾನ

ಕರ್ನಾಟಕ ಸರಕಾರದ ಸಂಸ್ಕೃತಿ ಇಲಾಖೆ, ಮದರ್ ಇಂಡಿಯಾ ರಾತ್ರೆ ಶಾಲೆದ ಮಾಜಿ ವಿದ್ಯಾರ್ಥಿ, ಶ್ರೇಷ್ಠ ಸಾಹಿತಿ, ಕಥೆಗಾರೆ, ಸಂಶೋಧಕೆರಾಯಿನ ಪ್ರೊ. ಡಾ.ವಿಶ್ವನಾಥ್ ಕಾರ್ನಾಡ್ ಮೆರೆಗ್ ಪುಗರ್ತೆದ ಜಿ.ವಿ. ಕುಂದಾಣಗಾರ ಗಡಿನಾಡ ಸಾಹಿತ್ಯ ಪ್ರಶಸ್ತಿನ್ ಕೊರ್ದು ಮಾನಾದಿಗೆ ಮಲ್ದ್ಂಡ್.

ನೆತ್ತ ಅಂಗವಾದ್ ಮೆರೆಗ್ ಅಭಿನಂದನೆ ಸಂದಾಯೆರೆ ಮದರ್ ಇಂಡಿಯಾ ಎಕ್ಸ್ ಸ್ಟೂಡೆಂಟ್ಸ್ ಫೌಂಡೇಶನ್ ದ ಮುತಾಲಿಕೆಡ್ ಮಾ.2 ಕ್ಕ್ ಡಾ ಕಾರ್ನಾಡ್ ಮೆರೆನ ನಿವಾಸಡ್ ಗುರ್ಕಾರೆ ಸುರೇಂದ್ರ ಎ. ಪೂಜಾರಿ, ಪ್ರಧಾನ ಕಾರ್ಯದರ್ಶಿ ಹರೀಶ್ ಜಿ. ಮೈಂದನ್, ಒತ್ತು ಗುರ್ಕಾರೆ ಯಶವಂತ ಎನ್ ಪೂಜಾರಿ, ಕೋಶಾಧಿಕಾರಿ ಟಿ. ವಿ. ಪೂಜಾರಿ, ಜತೆ ಕಾರ್ಯದರ್ಶಿ ಅಶೋಕ್ ಸುವರ್ಣ, ನಿಧಿ ಸಂಗ್ರಹ ಸಮಿತಿದ ಚೇರ್ಮನ್ ಮಂಜುನಾಥ್ ಪೂಜಾರಿ ಮೊಕುಲು ಶಾಲ್ ಪೊದೆಪಾದ್, ಫಲಪುಷ್ಪ, ಪೂ ಗೊಂಚಿಲ್ ಕೊರ್ದು ಮೈಸೂರ್ ಪೇಟ ಪಾಡ್ದ್ ಸನ್ಮಾನ ಮಲ್ತೆರ್.

ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ದ ಮುತಾಲಿಕೆಡ್ 8ನೇ ವರ್ಷದ ಗಣಹೋಮ, ಶ್ರೀ ಭಗವತೀ ಕಲ್ಪೋಕ್ತ ಪೂಜೆ

ಕಲ್ಯಾಣಪುರದ ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ದ ಮುತಾಲಿಕೆಡ್ ಮಾ.3 ಕ್ಕ್ 8ನೇ ವರ್ಷದ ಗಣಹೋಮ ಬೊಕ್ಕ ಶ್ರೀ ಭಗವತೀ ಕಲ್ಪೋಕ್ತ ಪೂಜೆ ಗೌಜಿಡ್ ನಡತ್ಂಡ್.

ನೆತ್ತ ಸಭಾ ಲೇಸ್ ತೀಯಾ ಸಮಾಜದ ಗುರ್ಕಾರೆ ಪ್ರಶಾಂತ್ ಸಾಲ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಈ ಪೊರ್ತುಡು ಮಾನಾದಿಗೆದ ಗುರ್ಕಾರೆ ಲಂಭೋದರ ತೋನ್ಸೆ, ಒತ್ತು ಗುರ್ಕಾರೆ ಪದ್ಮನಾಭ ಕೋಟ್ಯಾನ್, ಹಿರಿಯ ಗೌರವ ಸಲಹೆಗಾರೆ ಟಿ. ಭೋಜಪ್ಪ ಸಾಲ್ಯಾನ್, L. M. ತೋನ್ಸೆ, ರಾಮಪ್ಪ ಮಾಸ್ಟರ್, ಅಣ್ಣಯ್ಯ ಪಾಲನ್, ಸುಂದರ ಸಾಲ್ಯಾನ್, ವಿಶ್ವನಾಥ್ ಪಂದುಬೆಟ್ಟು, ಜಯಪ್ರಕಾಶ್ ಅದಿವುಡುಪಿ, ಮಹಿಳಾ ಘಟಕದ ಮಾನಾದಿಗೆದ ಗುರ್ಕಾರೆ ಕಲ್ಯಾಣಿ ಟೀಚರ್, ಗುರ್ಕಾರೆ ಶಕುಂತಲಾ.ಟಿ ಪಾಲ್ ಪಡೆದಿತ್ತೆರ್.

ಚಾವಡಿಡ್ ತೀಯಾ ಸಮಾಜದ 3 ಜನ ಗುರಿಕಾರೆರಾಯಿನ ರಾಮಪ್ಪ ಮಾಸ್ಟರ್, ಅಣ್ಣಯ್ಯ ಪಾಲನ್, ಸುಂದರ ಸಾಲ್ಯಾನ್ ಬೊಕ್ಕ ತೀಯಾ ಸಮಾಜದ ಪೂಜೆದ ಅರ್ಚಕೆರ್ ಅಶೋಕ್ ಕುಮಾರ್ ಬೊಕ್ಕ ಕಲಾ ಸಾರಥಿ ತೋನ್ಸೆ ಪುಷ್ಕಳ್ ಕುಮಾರ್ ಮೊಕ್ಲೆಗ್ ಸನ್ಮಾನ ನಡತ್ಂಡ್.

S.S.L.C ಬೊಕ್ಕ P. U. C ಡ್ ಶೇಕಡಾ 85 ರ್ದ್ ಎಚ್ಚ ಮಾರ್ಕ್ಸ್ ಪಡೆಯಿನ 8 ಜನ ಕಲ್ಪಾರ್ಥಿಲೆಗ್ ಮಾನಾದಿಗೆ ಮಲ್ತೆರ್. ಕಾರ್ಯದರ್ಶಿ ಮೋಹನ್ ಕಲ್ಯಾಣಪುರ್ ಲೇಸ್ ದ ವಿವರಣೆನ್ ತೆರಿಪಾಯೆರ್. ಕೋಶಾಧಿಕಾರಿ ಕೃಷ್ಣ ಕೋಟ್ಯಾನ್ ಸೊಲ್ಮೆ ಸಂದಾಯೆರ್. ಡಾ.ಲಕ್ಷ್ಮೀ ನಿಧಿ ಸಭಾ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಮಾ.28: ಕಡಂದಲೆ ಸುರೇಶ್ ಭಂಡಾರಿ ಫ್ಯಾಮಿಲಿ ಟ್ರಸ್ಟ್ ಮುತಾಲಿಕೆಡ್ ಕಾಯಕಲ್ಪ ಯಕ್ಷಗಾನ ಪ್ರದರ್ಶನ

ಕಡಂದಲೆ ಸುರೇಶ್ ಭಂಡಾರಿ ಫ್ಯಾಮಿಲಿ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಕಾಯಕಲ್ಪ ಪನ್ಪುನ ಯಕ್ಷಗಾನ ಮಾ.28 ಗುರುವಾರ ತಲಪಾಡಿ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಎದುರುದ ಬಾಕಿಮಾರ್ ಕಂಡಡ್ ಬಯ್ಯಗ್ ಪ್ರದರ್ಶನ ಆಯೆರೆ ಉಂಡು.

ಈ ಲೇಸ್ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ ಪಾವಂಜೆದ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಸಾರಥ್ಯಡ್ ನಡಪರೆ ಉಂಡು.