ನಾರಾಯಣ ಗುರು ಅಧ್ಯಯನ ಪೀಠ ಸಕ್ರಿಯ ಆವೊಡು: ಬಿ.ಕೆ.ಹರಿಪ್ರಸಾದ್
ಮುಲ್ಕಿ: ದೇಶ ವಿದೇಶಡ್ ಸಕ್ರಿಯವಾದುಪ್ಪುನ 275 ಬಿಲ್ಲವ ಸಂಘಟನೆಲೆನ ಸಂಸ್ಥೆ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲ(ರಿ) ಮುಲ್ಕಿ ನೆತ್ತ ಬೊಳ್ಳಿ ಪರ್ಬದ ಲೇಸ್ ಮಾ.10 ಕ್ಕ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಕೈತಲ್ದ ಜಯ ಸಿ.ಸುವರ್ಣ ವೇದಿಕೆಡ್ ನಡತ್ಂಡ್.
ಲೇಸ್ ನ್ ವಿಧಾನಪರಿಷತ್ ಸದಸ್ಯೆರ್ ಬಿ.ಕೆ. ಹರಿಪ್ರಸಾದ್ ಬೊಕ್ಕ ಬಿನ್ನೆರ್ ಒಟ್ಟುಸೇರ್ ದ್ ಉದಿಪನ ಮಲ್ತೆರ್.
ರಾಷ್ಟ್ರೀಯ ಬಿಲ್ಲವ ಮಹಾ ಮಂಡಲದ ಅಧ್ಯಕ್ಷೆರ್ ಡಾ|ರಾಜಶೇಖರ ಕೋಟ್ಯಾನ್ ಸಭೆತ್ತ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಸಭಾಧ್ಯಕ್ಷೆರ್ನ ಪೀಠೊಡು ಪಾತೆರಿನ ಆರ್, ನಮ್ಮ ಸಮಾಜ ಸಂಘಟನೆ ಆಂಡ ಮಾತ್ರ ಅಭಿವೃದ್ಧಿ ಆಪುಂಡು. ನನದ ಲೋಕಸಭೆತ್ತ ವೋಟುಗು ನಮ್ಮ ಸಮಾಜೊಗು ರಡ್ಡ್ ಪಕ್ಷೊಡುಲ ಸೀಟ್ ತಿಕ್ಕೊಡು ಪಂದ್ ಒತ್ತಾಯ ಮಲ್ತೆರ್.
ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ರಾಜ್ಯ ಸಭೆ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್ ಪಾತೆರ್ದ್, ಸಮಾಜದ ಅಭಿವೃದ್ಧಿಗಾದ್ ಪಕ್ಷಾತೀತವಾದ್ ಕೆಲಸ ಮಲ್ಪುನಕ್ಲೆನ್ ವೋಟುಡು ಗೆಂದಾವೊಡು. ಕುಡ್ಲ ವಿಶ್ಔಇದ್ಯಾನಿಲಯೊಡು ಉಪ್ಪುನ ಬ್ರಹ್ಮಶ್ರೀ ನಾರಾಯಣ ಗುರು ಅಧ್ಯಯನ ಪೀಠ ಸಕ್ರಿಯವಾದ್ ಬೇಲೆ ಮಲ್ಪೊಡು ಪಂದ್ ಪಂಡೆರ್.
ಶಿವಗಿರಿ ಮಠ ವರ್ಕಳದ ಶ್ರೀ ಸತ್ಯಾನಂದ ತೀರ್ಥ ಸ್ವಾಮೀಜಿ ಆಶೀರ್ವಾದ ಮಲ್ತ್ ದ್, ಸರಕಾರೊರ್ದು ನಮ್ಮ ಬೇಡಿಕೆ ಈಡೇರೊಡ್ಡ ಸಮಾಜದ ಜನಕುಲು ಸಂಘಟಿತೆರಾದ್, ಒಗ್ಗಟ್ಟಾದ್ ಅವೆನ್ ದೆತೊನೊಡು ಪಂಡೆರ್.
ಸೋಲೂರು ಆರ್ಯ ಈಡಿಗರ ಮಹಾಸಂಸ್ಥಾನ ಮಠತ್ತ ಸ್ವಾಮೀಜಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಪಾತೆರ್ದ್, ನಮ್ಮ ಸಮಾಜಗ್ ಸಂಸ್ಕಾರಯುತವಾಯಿನ ಆಧ್ಯಾತ್ಮಿಕ ಚಿಂತನೆ ಬೋಡು ಪಂಡೆರ್.
ನಿಪ್ಪಾಣಿ ಮಹಾ ಕಾಳಿ ಮಹಾ ಸಂಸ್ಥಾನದ ಶ್ರೀ ಅರುಣಾನಂದ ಸ್ವಾಮೀಜಿ ಪಾತೆರ್ದ್, ನಮ ನಮ್ಮ ಸಮಾಜ ಪನ್ನಗ ನಾತೆರ್ಲ ನಾರಾಯಣ ಗುರು ಪರಂಪರೆದ ಸಮಾಜ ಆವೊಡು. ನಮ್ಮ ವೈದಿಕ ಪರಂಪರೆ ಕಲ್ಪರೆ ವೈದಿಕ ಗುರುಕುಲು ಸ್ಥಾಪನೆ ಆವೊಡು ಪಂಡೆರ್.
ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಕೋಟ ಶ್ರೀನಿವಾಸ ಪೂಜಾರ್ಲು ಪಾತೆರ್ದ್, ಕಾಲ ಬದಲಾವಣೆ ಆಯಿಲೆಕನೆ ಭಾರಿ ಮಲ್ಲ ಮಟ್ಟ್ ಡ್ ಸಮಾಜ ಪರಿವರ್ತನೆ ಆತ್ಂಡ್. ನಮ್ಮ ಸಮಾಜದ ಮುಖಂಡೆರ್ ನಿಷ್ಠುರ ಮಲ್ಪುನೆನ್ ಕಮ್ಮಿ ಮಲ್ತೊಂದು ಸಮಾಜದ ಅಭಿವೃದ್ಧಿ ಮಲ್ಪೊಡು ಪಂದ್ ಪಂಡೆರ್.
ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಾತೆರ್ದ್, ಒಡಿಪು ಬೊಕ್ಕ ಕುಡ್ಲ ಜಿಲ್ಲೆಲೆಡ್ 360,000 ಜನ ಬಿಲ್ಲವೆರ್ ಉಲ್ಲೆರ್. ಒವ್ವೇ ಪಕ್ಷನೇ ಆವಡ್ ಸಮುದಾಯಗ್ ಒವ್ವೇ ಪ್ರಾತಿನಿಧ್ಯ ತಿಕ್ಕುಲೆಕ ಮಾತೆರ್ಲ ಒಂಜೇ ಸೊರಟ್ಟ್ ಕೇನೊಡು. ರಾಜಕೀಯವಾದ್ ಬೆರಿಬಲ ಕೊರೊಡು. ಅಪಗ ಸಮಾಜ ದುಂಬರಿಯರೆ ಸಾಧ್ಯ ಉಂಡು ಪಂಡೆರ್.
ಮಿತ್ತರ್ಮೆಡ್ ಶಾಸಕೆರಾಯಿನ ಸುನಿಲ್ ಕುಮಾರ್, ಹರೀಶ್ ಕುಮಾರ್, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ, ಕಟಪಾಡಿ ಕ್ಷೇತ್ರದ ಬಿ.ಎನ್.ಶಂಕರ ಪೂಜಾರಿ, ಗೆಜ್ಜೆಗಿರಿ ಕ್ಷೇತ್ರದ ಪೀತಾಂಬರ ಹೆರಾಜೆ, ಬಿಲ್ಲವರ ಯೂನಿಯನ್ ದ ನವೀನ್ ಚಂದ್ರ ಡಿ.ಸುವರ್ಣ,ನಾರಾಯಣ ಗುರು ವಿಚಾರ ವೇದಿಕೆದ ಸತ್ಯಜಿತ್ ಸುರತ್ಕಲ್, ಎನ್.ಟಿ.ಪೂಜಾರಿ ಮುಂಬಯಿ, ಸತೀಶ್ ಪೂಜಾರಿ ದುಬೈ, ರಾಜ್ ಕುಮಾರ್ ಬೆಹರಿನ್, ಗಣೇಶ್ ಪೂಜಾರಿ ಮುಂಬೈ, ಭಾರತ್ ಬ್ಯಾಂಕ್ ದ ಅಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ, ಬಿಲ್ಲವ ಪರಿಷತ್ ದ ನವೀನ್ ಅಮೀನ್, ಪ್ರವೀಣ್ ಪೂಜಾರಿ ಇತ್ತೆರ್.
ಈ ಪೊರ್ತುಡು
ಸಮಾಜದ ಪುಗರ್ತೆದ ಕಲಾವಿದೆರಾಯಿನ ಸುಮನ್ ತಲ್ವಾರ್, ಜಯಮಾಲಾ, ನವೀನ್ ಡಿ. ಮೊಕ್ಲೆಗ್ “ಬಿಲ್ಲವ ಕಲಾ ಸಾಮ್ರಾಟ” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
ಈ ಪೊರ್ತುಡು ಬೆದ್ರದ ಸ್ಫೂರ್ತಿ ಬಿನ್ನ ಸಾಮರ್ಥ್ಯ ದ ಶಾಲೆ, ಕಾರ್ಲದ ವಿಜೇತ ಶಾಲೆ, ಸುರತ್ಕಲ್ ಲಯನ್ಸ್ ಟ್ರಸ್ಟ್ ವಿಶೇಷ ಶಾಲೆ, ಒಡಿಪು ಸ್ಪಂದನ ಕೇಂದ್ರಗ್ ಪನವುದ ಸಕಾಯೊನು ಬಿಲ್ಲವ ಮಹಾಮಂಡಲದ ವತಿರ್ದ್ ಪಟ್ಟಿಯೆರ್.
ಅಂಚೆನೆ ದೇಶದ ಬೊಕ್ಕ ಪಿದಯಿ ಊರುದ ಬಿಲ್ಲವ ಸಂಘಟನೆಲೆಗ್ “ಬಿಲ್ಲವ ಸಂಘಟನಾ ರತ್ನ” ಪ್ರಶಸ್ತಿ ಪಟ್ಟಿಯೆರ್.
ಈ ಪೊರ್ತುಡು ಬಿಲ್ಲವ ಸಮಾಜದ ಬೇಡಿಕೆಗ್ ಸರಕಾರೊಗು ಮುಟ್ಟಾವುನ ಹಕ್ಕೊತ್ತಾಯದ ಪ್ರತಿಕ್ಲೆನ್ ಕೊರಿಯೆರ್.
ಅಂಚೆನೆ ರಜತ ವಿಶ್ವವಾಣಿ ಜಯ ಸಿರಿ ಬುಡುಗಡೆ ಮಲ್ತೆರ್.
ಚಿತ್ರಾ ಸುವರ್ಣ ಬೊಕ್ಕ ಸುಗಂಧಿ ಸತೀಶ್ ದೇವೆರೆನ್ ಸುಗಿತೆರ್. ಕೋಶಾಧಿಕಾರಿ ಪ್ರಭಾಕರ ಬಂಗೇರ ಸ್ವಾಗತ ಮಲ್ತೆರ್.
ಗೌ.ಪ್ರ.ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ದಿನೇಶ್ ಸುವರ್ಣ ರಾಯಿ ಬೊಕ್ಕ ಪ್ರಜ್ಞಾ ಪೂಜಾರಿ ಓಡಿಲ್ನಾಳ ಲೇಸ್ ಸುಧಾರಿಕೆ ಮಲ್ತೆರ್.
