September 2023

ಪೊಸತ್ತಾದ್ ಪತ್ತೆ ಆಯಿನ ಖಂಡದ ಪುದರ್ ಝೀಲ್ಯಾಂಡಿಯಾ!

ಹೊಸದಿಲ್ಲಿ: ಸುಮಾರ್ 375 ವರ್ಷೊದ ಪಿರವು ಕಡಲ್ ದಡಿಟ್ಟ್ ನಾಪತ್ತೆ ಆದಿತ್ತಿನ ಖಂಡವೊಂಜೆನ್ ಭೂವಿಜ್ಞಾನಿಲು ಪತ್ತೆ ಮಲ್ತ್ ದ್, ನೆಕ್ಕ್ 8ನೇ ಖಂಡದ ತಾನ ಕೊರ್ತೆರ್. ಉಂದು ಜಗತ್ತ್ ದ ಮಸ್ತ್ ಎಲ್ಯ ಖಂಡ ಆತ್ಂಡ್.

ವಿಜ್ಞಾನಿಲು ಬೊಕ್ಕ ಭೂಕಂಪಶಾಸ್ತ್ರಜ್ಞೆರೆನ ಕೂಟವೊಂಜಿ ಈ ಖಂಡನ್ ಪತ್ತೆ ಮಲ್ಪುನಲ್ಪ ಯಶಸ್ವಿ ಆತ್ಂಡ್. ಕಡಲ್ ದ ಅಡಿರ್ದ್ ದೆತ್ತಿನ ಬಂಡೆದ ಮಾದರಿಲೆರ್ದ್ ಪಡೆಯಿನ ದತ್ತಾಂಶನ್ ಗಲಸೊಂದು ಸಂಶೋಧಕೆರ್ ನೆನ್ ನಾಡ್ ಪತ್ತ್ ದೆರ್. ಈ ಪೊಸ ಖಂಡಗ್ ಝೀಲ್ಯಾಂಡಿಯಾ ಪಂದ್ ಪುದರ್ ದೀತೆರ್. ನೆಕ್ಕಾದ್ ಪೊಸ ನಕಾಸೆ ಬುಡುಗಡೆ ಮಲ್ದೆರ್.

ಈ ಖಂಡದ ಶೇ.94 ದಾತ್ ಭಾಗಡ್ ನೀರುಂಡು, ನ್ಯೂಜಿಲೆಂಡ್‌ ದಂಚೆನೇ ಕೆಲವೇ ಕೆಲವು ದ್ವೀಪಲು ಉಂಡು. ಝೀಲ್ಯಾಂಡಿಯಾ 1.89 ದಶಲಕ್ಷ ಚದರ ಮೈಲ್ ಜಾಗೆಡ್ ಉಂಡು.

ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ದ ಪೊಸ ಗುರ್ಕಾರೆಯಾದ್ ಪದ್ಮಪ್ರಸಾದ್ ಜೈನ್ ಆಯ್ಕೆ

ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ದ ಪೊಸ ಗುರ್ಕಾರೆಯಾದ್ ಪದ್ಮಪ್ರಸಾದ್ ಜೈನ್ ಆಯ್ಕೆ ಆತೆರ್.

ಸಂಚಾಲಕೆರಾದ್ ಕರುಣಾಕರ್ ಕಾನಂಗಿ ಕುಡ್ಲ, ಪ್ರಧಾನ ಕಾರ್ಯದರ್ಶಿಯಾದ್ ದಯಾನಂದ ಬಂಟ್ವಾಳ, ಕೋಶಾಧಿಕಾರಿಯಾದ್ ನವೀನ್ ರೈ ಪಂಜಳ, ಉಪಾಧ್ಯಕ್ಷೆರಾದ್ ರಮೇಶ್ ಕಲಾ ಶ್ರೀ ಕುಡ್ಲ, ಜಯಕರ್ ಸುವರ್ಣ ಒಡಿಪು, ಜತೆ ಕಾರ್ಯದರ್ಶಿ ಹರೀಶ್ ಪಿ ಕೋಟ್ಯಾನ್ ಮುಲ್ಕಿ, ಹೆರಿಕ್ ಡಿಸೋಜ ಬ್ರಹ್ಮಾವರ, ಸಂಘಟನಾ ಕಾರ್ಯದರ್ಶಿ ಕೃಷ್ಣರಾವ್ ಕಾಪು, ರಮೇಶ್ ಹೊಸಬೆಟ್ಟು ಸುರತ್ಕಲ್, ಛಾಯಾ ಕಾರ್ಯದರ್ಶಿ ರವಿ ಕೋಟ್ಯಾನ್ ಬೆದ್ರ, ಕ್ರೀಡಾ ಕಾರ್ಯದರ್ಶಿ ರಂಜಿತ್ ಕುಂದಾಪುರ, ಭಾರದ್ವಾಜ್ ಬೊಲ್ತೇರ್, ಸಾಂಸ್ಕೃತಿಕ ಕಾರ್ಯದರ್ಶಿ ಚಿದಾನಂದ್ ಉಳ್ಳಾಲ, ಮಾಧ್ಯಮ ಕಾರ್ಯದರ್ಶಿ ಹರೀಶ್ ರಾವ್ ಆಯ್ಕೆ ಆತೆರ್.

ಕುಡ್ಲ ಸೆಬೆಸ್ಟಿಯನ್ ಹಾಲ್ ಡ್ SKPA ಪದಾಧಿಕಾರಿಲೆನ ವೋಟುದ ಪ್ರಕ್ರಿಯೆನ್ ನಿಕಟ ಪೂರ್ವ ಜಿಲ್ಲಾಧ್ಯಕ್ಷೆರ್ ಆನಂದ್ ಬಂಟ್ವಾಳ್ ನಡಪಾದ್ ಕೊರಿಯೆರ್.

ಪೆರ್ಮೆದ ತುಳುವೆ ಕೆ.ಎನ್.ಅಡಿಗೆರೆಗ್ ಡಾ. ಪಿ.ಬಿ ಶ್ರೀನಿವಾಸ್ ಯಶೋನಿಧಿ ಪ್ರಶಸ್ತಿ ಬಿರ್ದ್ ದ ಮಾನಾದಿಗೆ

ಬೆಂಗಳೂರು: ರಾಜಬೂಡುದ ತುಳು ಬೊಕ್ಕ ಕನ್ನಡ ಸಂಘಟನೆಡ್ ಮಸ್ತ್ ಪುಗರ್ತೆ ಪಡೆಯಿನ ಅಂಚೆನೇ ಸಾಮಾಜಿಕ ಚಟುವಟಿಕೆಡ್ಲಾ ಪಾಲ್ ಪಡೆದಿನ ಕೀರ್ತಿ ಕೆ.ಎನ್. ಅಡಿಗೆರೆಗ್ ಸಂದುಂಡು.

ಏತೋ ಚಾವಡಿ ಬೊಕ್ಕ ಸಾಂಸ್ಕೃತಿಕ ವೇದಿಕೆಡ್ ನಿರೂಪಕೆರಾದ್ ಕಲಾ ಚಾಕಿರಿನ್ ಸಮಾಜೊಗ್ ಸಂದಾದೆರ್.

ಗಾನ ಧಾರೆ ಪ್ರತಿಷ್ಠಾನ (ರಿ) ಮೊಕಲೆನ ವತಿಡ್ದ್ ನಿನದೇ ನೆನಪು 3 ಪುದರ್ಡ್ ಗಾನ ಸಾರ್ವಭೌಮ
ಡಾ. ಪಿ.ಬಿ. ಶ್ರೀನಿವಾಸ್ ಮೇರೆಗ್ ಗಾನ ನಮನ ಪುರ್ಪದ ಒಟ್ಟುಗು ಶ್ರೀನಿವಾಸ್ ಪ್ರಶಸ್ತಿ ಪ್ರದಾನ 2023 ತೇದಿ 22.09.23ನೇ ಶುಕ್ರವಾರ ರವೀಂದ್ರ ಕಲಾಕ್ಷೇತ್ರೊಡು ನಡತ್ತ್ಂಡ್.

ಈ ಸಲ ಸಾರ್ವಭೌಮ ಡಾ.ಪಿ.ಬಿ. ಶ್ರೀನಿವಾಸ್ ಬಿರ್ದ್ ಮಾನಾದಿಗೆ ಡಾ.ಕೆ.ಎನ್.ಅಡಿಗ ಅಡೂರು ಮೆರೆನ ಸಾಮಾಜಿಕ ಸಂಘಟನೆ ಬೊಕ್ಕ ನಿರೂಪಣೆ ಕ್ಷೇತ್ರ ದ ಕಜ್ಜೊದ ಚಾಕಿರಿಗಾದ್ ಡಾ. ಪಿ ಬಿ ಶ್ರೀನಿವಾಸ್ ಯಶೋನಿಧಿ ಪ್ರಶಸ್ತಿ ಬಿರ್ದ್ ಮಾನಾದಿಗೆ ಕೊರ್ದು ಸಂದಾಯ್ತ ಮಂತೆರ್.

ಈ ಲೇಸ್ ಡ್ ಪ್ರಣಯ ರಾಜ ಡಾ. ಶ್ರೀನಾಥ್ ಚಲನಚಿತ್ರ ನಿರ್ದೇಶಕರಾಯಿನ ಎಚ್ ಆರ್ ಭಾರ್ಗವ್, ಲಯನ್ ಡಿ ಫಿಲಿಪ್ಸ್ ರಾಜ್, ಎಂ ವೆಂಕಟೇಶ್ ಶೇಷಾದ್ರಿ ಗಾನ ಧಾರ ಕೃಷ್ಣ ಮೊಕುಲು ಪುರ ಚಾವಡಿ ಲೇಸ್ಡ್ ಪಾಲ್ ಪಡೆದಿತ್ತೆರ್. ಅಂಚೆನೇ ಕನ್ನಡ -ತುಳು ಸಂಘಟನೆದ ಕೆಲವು ಮುಖ್ಯಸ್ಥೆರ್ ಹಾಜರಿತ್ತೆರ್.

ಚಾವಡಿ ಲೇಸ್ಡ್ ಪೊರ್ಲೈಸಿರದ ಗಾಯನ ಸಂಬ್ರಮ ಬಿರ್ದ್ ಮಾನಾದಿಗೆದ ಲೇಸ್ ಗ್ ನನಲಾತ್ ಅರ್ಥ ಕೊರ್ದು ಇತ್ತ್ಂಡ್.

-ಯಾದವ ಎಸ್. ಕಲ್ಲಾಪು

ಚಂದ್ರಯಾನ ಪ್ರಾಜೆಕ್ಟ್ ದ ಅಭಿಷೇಕ್ ಕುಮಾರ್ ಸಿಂಗ್ ಗ್ ಮಾನಾದಿಗೆ

ಚಂದ್ರಯಾನದ ಪ್ರಾಜೆಕ್ಟ್ ಮ್ಯಾನೇಜರ್ ಅಭಿಷೇಕ್ ಕುಮಾರ್ ಸಿಂಗ್ ಮೇರ್ ಗೋರೆಗಾಂವ್ ಪೂರ್ವದ ಜಯಲೀಲಾ ಬ್ಯಾಂಕ್ವೆಟ್ ಹಾಲ್ ಗ್ ಇಂಚೊಗು ಭೇಟಿ ಕೊರಿಯೆರ್.

ಈ ಪೊರ್ತುಡು ಮೆರೆಗ್ ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ನಿರ್ದೇಶಕೆರ್, ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಉಪಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಮಾನಾದಿಗೆ ಮಲ್ತೆರ್.

ಶಿಕ್ಷಕೆರ್ ಕ್ರೀಡೆಗ್ ಎಚ್ಚಿನ ಪ್ರೋತ್ಸಾಹ ಕೊರೊಂದು ಉಲ್ಲೆರ್: ಭಾಗೀರಥಿ ಮುರುಳ್ಯ

ಸುಬ್ರಹ್ಮಣ್ಯ: ಎಚ್ಚಿನ ಸರಕಾರಿ ಶಾಲೆಡ್ ದೈಹಿಕ ಶಿಕ್ಷಣ ಶಿಕ್ಷಕೆರೆನ ಕೊರತೆ ಇತ್ತ್ಂಡಲ ಬೇತೆ ಶಿಕ್ಷಕರೇ ಸ್ವತಃ ಜೋಕುಲೆಗ್ ಕ್ರೀಡೆಡ್ ಪಾಲ್ ಪಡೆಯೆರೆ ಪ್ರೋತ್ಸಾಹ ಕೊರ್ದು, ಜೋಕುಲೆನ್ ಎಡ್ಡೆ ಕ್ರೀಡಾಪಟುವಾದ್ ಬೊಕ್ಕ ಕ್ರೀಡಾ ಕ್ಷೇತ್ರಡ್ ಸಾಧಕರೆನಾದ್ ಮಲ್ಪರೆ ಪ್ರೋತ್ಸಾಹ ಮಲ್ತೊಂದು ಉಲ್ಲೆರ್. ಈ ಮುಖೇನ ಶಿಕ್ಷಕೆರ್ ಕ್ರೀಡೆಗ್ ಎಚ್ಚಿನ ಪ್ರೋತ್ಸಾಹ ಕೊರೊಂದು ಉಲ್ಲೆರ್ ಪಂದ್ ಸುಳ್ಯ ಶಾಸಕಿ ಭಾಗೀರಥಿ ಮುರುಳ್ಯ ಪಂಡೆರ್.

ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್, ಉಪನಿರ್ದೇಶಕೆರೆನ ಕಚೇರಿ, ಶಾಲಾ ಶಿಕ್ಷಣ ಇಲಾಖೆ ಕುಡ್ಲ, ದ.ಕ. ಜಿಲ್ಲೆ ಶಿಕ್ಷಣಾಧಿಕಾರಿಲೆನ ಕಚೇರಿ ಬೊಕ್ಕ ಕ್ಷೇತ್ರ ಸಮನ್ವಯಧಿಕಾರಿಲೆನ ಕಛೇರಿ ಸುಳ್ಯ, ದ.ಕ. ಬೊಕ್ಕ ಸರಕಾರಿ ಪ್ರೌಢಶಾಲೆ ಏನೆಕಲ್ಲು ಸಂಯುಕ್ತದ ಒಟ್ಟುಸೇರಿಗೆಡ್ ಏನೆಕಲ್ಲು ಸರಕಾರಿ ಪ್ರೌಢಶಾಲೆಡ್ ಬುಧಾರ ನಡತಿನ ಪ್ರಾಥಮಿಕ ಬೊಕ್ಕ ಪ್ರೌಢಶಾಲಾ ಆನ್ – ಪೊಣ್ಣುಲೆನ ಜಿಲ್ಲಾ ಮಟ್ಟದ ತ್ರೋ ಬಾಲ್ ಪಂತೊನ್ ಉದಿಪನ ಮಲ್ತೆರ್.

ಈ ಸರ್ತಿ ಸುಳ್ಯ ತಾಲೂಕ್ ಡ್ ಬೇತೆ ಬೇತೆ ಜಿಲ್ಲಾ ಮಟ್ಟದ ಲೇಸ್ ನಡತ್ ದ್ಂಡ್. ಮಾತ ಲೇಸ್ ಲು ಯಶಸ್ವಿಯಾದ್ ನಡತ್ ದ್ಂಡ್ ಪಂದ್ ಪಂಡಿನ ಮೇರ್ ವಿದ್ಯಾಸಂಸ್ಥೆಲು ಕ್ರೀಡೆಗ್ ಕೊರೊಂದು ಇಪ್ಪುನ ಪ್ರೋತ್ಸಾಹರ್ದ್ ಕ್ರೀಡಾಪಟುಲು ರಾಜ್ಯ, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟಡ್ ಸಾಧನೆ ಮಲ್ಪರೆ ಸ್ಪೂರ್ತಿ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಸುಳ್ಯ ಕ್ಷೇತ್ರ ಶಿಕ್ಷಣಾಧಿಕಾರಿ ರಮೇಶ್ , ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿದ ಸಮನ್ವಯಾಧಿಕಾರಿ ಶೀತಲ್, ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ, ನಿವೃತ್ತ ದೈಹಿಕ ಶಿಕ್ಷಣ ಶಿಕ್ಷಕೆರ್ ತುಕಾರಾಮ್ ಏನೆಕಲ್ಲು, ಏನೆಕಲ್ಲು ಸರಕಾರಿ ಪ್ರೌಢಶಾಲಾ ಮುಖ್ಯ ಶಿಕ್ಷಕೆರ್ ರಮೇಶ್, ಮಾಜಿ ತಾ.ಪಂ. ಸದಸ್ಯೆರ್ ಅಶೋಕ್ ನೆಕ್ರಾಜೆ ಚಾವಡಿಡ್ ಇತ್ತೆರ್. ಭುವನೇಶ್ ಎದ್ಕೊನಿಯೆರ್. ದೈಹಿಕ ಶಿಕ್ಷಣ ಶಿಕ್ಷಕೆರ್ ಗಣೇಶ್ ಸೊಲ್ಮೆ ಸಂದಾಯೆರ್. ಶಿಕ್ಷಕೆರಾಯಿನ ವಿಜಯ ಕುಮಾರ್ ಬೊಕ್ಕ ಧನಂಜಯ ಲೇಸ್ ದ ಸುಧಾರಿಕೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ನಮ್ಮ ಸುತ್ತಮುತ್ತದ ಐತಿಹಾಸಿಕ, ಪಾರಂಪರಿಕ ತಾಣಲು ನಾಶ ಆವಂದಿಲೆಕ್ಕ ಕಾಪೊಡು: ವಿ.ಕೆ ಕಡಬ

ಸುಬ್ರಹ್ಮಣ್ಯ: ನಮ್ಮ ಸುತ್ತಮುತ್ತದ ಐತಿಹಾಸಿಕ ಸ್ಮಾರಕ ಬೊಕ್ಕ ಪಾರಂಪರಿಕ ತಾಣಲು ನಾಶ ಆವಂದಿಲೆಕ್ಕ ಎಚ್ಚರ ವಹಿಸೊಡು. ಈ ಮುಖೇನ ಪೊಸ ಪೀಳಿಗೆಗ್ ಪರಿಚಯ ಮಲ್ಪುನ ಕೆಲಸ ಆವೊಡು ಪಂದ್ ಉಜಿರೆ ಎಸ್.ಡಿ.ಎಂ ಕಾಲೇಜ್ ದ ರೇಡಿಯೋ ನಿನಾದ ಸಮುದಾಯ ಬಾನುಲಿ ಕೇಂದ್ರದ ಸಂಯೋಜಕೆರ್ ವಿ.ಕೆ ಕಡಬ ಅಭಿಪ್ರಾಯ ತೆರಿಪಾಯೆರ್.

ಮೇರ್ ಸೆ.26 ಕ್ಕ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಮಹಾವಿದ್ಯಾಲಯದ ಇತಿಹಾಸ ವಿಭಾಗದ ಮುತಾಲಿಕೆಡ್ ಆಯೋಜನೆ ಆಯಿನ ಐತಿಹಾಸಿಕ ಪರಂಪರೆ ಉಳಿಸಿ ಲೇಸ್ ಡ್ ಇಸೇಸ ಉಪನ್ಯಾಸ ಕೊರ್ದು ಪಾತೆರಿಯೆರ್.

ಅಭಿವೃದ್ಧಿದ ನೆಪಟ್ಟ್ ಪಾರಂಪರಿಕ ತಾಣಲು ಬೊಕ್ಕ ಐತಿಹಾಸಿಕ ಸ್ಮಾರಕಲು ಮದೆ ಆತ್ಂಡ್. ಸ್ಥಳೀಯವಾದ್ ತೋಜುನ ಚರಿತ್ರೆದ ಬಗೆಟ್ಟ್ ನಿರ್ಲಕ್ಷ ಮಲ್ಪರೆ ಬಲ್ಲಿ‌. ಸ್ಥಳನಾಮ, ಸ್ಥಳೀಯ ದೇವಲ್ಯ, ಕೆರೆ,ಕಾಡ್ ಗುಡ್ಡೆಲೆನ ಬಗೆಟ್ಟ್ ಯುವ ಸಮೂಹ ಅಧ್ಯಯನಗ್ ದುಂಬಾವೊಡು ಪಂದ್ ಸಲಹೆ ಕೊರಿಯೆರ್.

ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ದಿನೇಶ್ ಪಿ.ಟಿ ಗುರ್ಕಾರ್ಮೆ ಒಯಿಸ್ ದ್, ನಮ್ಮ ಸುತ್ತದ ಚರಿತ್ರೆದ ಬಗೆಟ್ಟ್ ನಮಕ್ ಪೊಲಬು ಇಪ್ಪೊಡು. ಅಪಗ ನಮ ನಮ್ಮ ಚರಿತ್ರೆನ್ ಕಟ್ಟೊಲಿ ಪಂದ್ ಪಂಡೆರ್.

ಈ ಪೊರ್ತುಡು ಕಲ್ಪಾರ್ಥಿಲು ದೀಕ್ಷಾ ಎಚ್.ವಿ, ಲಿಖಿಲ್, ಅನ್ವಿತಾ ಎಂ, ಕೈತಲ್ ದ ದೈವೊಲೆನ ಬಗೆಟ್ಟ್ ಪ್ರಬಂಧ ಮಂಡಿಸಾಯೆರ್. ಇತಿಹಾಸ ವಿಭಾಗದ ಮುಖ್ಯಸ್ಥೆರ್ ಡಾ. ಪ್ರಸಾದ್ ಎನ್ ಎದ್ಕೊನಿಯೆರ್. ಪ್ರಾಧ್ಯಾಪಕಿ ನಮಿತ ಎಂ.ಎ ಸೊಲ್ಮೆ ಸಂದಾಯೆರ್. ತೃತೀಯ ಬಿ.ಎ ವಿದ್ಯಾರ್ಥಿನಿ ಮೌಲ್ಯ ಎ.ವಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್