ಚೆನ್ನೈ: ಶ್ರೀಹರಿಕೋಟಾಡ್ ರಾಕೆಟ್ ಉಡಾವಣೆರ್ದ್ ದುಂಬು ಸಮಯನ್ ಕೌಂಟ್ಡೌನ್ ಮಲ್ಪೆರೆ ಸ್ವರ ಕೊರೊಂದು ಇತ್ತಿನ ವಿಜ್ಞಾನಿ ವಲರ್ಮತಿ (Scientist Valarmathi) ಮೇರ್ ತಿಗಲೆ ಬೇನೆಡ್ ದೇವೆರೆ ಪಾದೊ ಸೇರಿಯೆರ್.
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಡ್ (ಇಸ್ರೋ) ವಿಜ್ಞಾನಿಯಾದ್ ಸೇವೆ ಸಂದಾವೊಂದು ಇತ್ತಿನ ವಲರ್ಮತಿ ಮೇರ್ ತಿಗಲೆ ಬೇನೆ ಬತ್ತ್ಂಡ್ ಪಂದ್ ಕೋಡೆ ಚೆನ್ನೈದ ಖಾಸಗಿ ಆಸ್ಪತ್ರೆಗ್ ಚಿಕಿತ್ಸೆಗ್ ಪಂದ್ ದಾಖಲ್ ಆದಿತ್ತೆರ್. ಆಂಡ ಚಿಕಿತ್ಸೆ ಫಲಿಸಂದೆ ತೀರ್ ಪೋಯೆರ್ ಪಂದ್ ವೈದ್ಯೆರ್ ತೆರಿಪಾದೆರ್.
ಕುಡ್ಲ ಕಮೀಷನರೇಟ್ ವ್ಯಾಪ್ತಿದ ಬಜ್ಪೆ ಕೈತಲ್ ದ ಕರ್ ವಾರ್ ಡ್ ದೋಸ್ತಿಲೆನೊಟ್ಟಿಗೆ ಗೊಬ್ಬುದು ಇಲ್ಲಡೆ ಪೋನಗ ಜವನೆಯೊರಿಗ್ ಬಿಸತ್ತಿ ಪಾಡ್ದ್ ಪೆಟ್ಟ್ ಮಲ್ತಿನ ಘಟನೆಗ್ ಸಂಬಂಧಪಟ್ಟಿನಂಚೆನೆ ಮೂಜಿ ಜನ ಆರೋಪಿಲೆನ್ ಸುರತ್ಕಲ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಅರೆಸ್ಟ್ ಆಯಿನಕುಲು ಪ್ರಶಾಂತ್ ಅಲಿಯಾಸ್ ಪಚ್ಚು (28), ಧನರಾಜ್ (23), ಯಜ್ಞೇಶ್ (22) ಪಂದ್ ತೆರಿದ್ ಬೈದ್ಂಡ್.
ಪೆಟ್ಟಾಯಿನ ಜವನೆ ಬಜ್ಪೆ ಕರ್ ವಾರ್ ಶಾಂತಿಗುಡ್ಡೆ ನಿವಾಸಿ ಅಬ್ದುಲ್ ಸಫ್ವಾನ್ (23) ಪಂದ್ ಗೊತ್ತಾತ್ತ್ಂಡ್. ಮೆರೆನ್ ಚಿಕಿತ್ಸೆಗ್ ಬಜ್ಪೆದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಬೊಕ್ಕ ಕುಡ್ಲಗ್ ಲೆತೊಂದು ಪೋತೆರ್.
ಈ ಘಟನೆಗ್ ಸಂಬಂಧಪಟ್ಟಿನಂಚೆನೆ ಸುರತ್ಕಲ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಶ್ರೀರಂಗಪಟ್ಟಣ: ತಮಿಳುನಾಡ್ ಗ್ ಕೆಆರ್ಎಸ್ ಜಲಾಶಯರ್ದ್ ನೀರ್ ಬುಡ್ಪುನ ಹಿನ್ನಲೆಡ್ ಮಂಡ್ಯದ ರಕ್ಷಣಾ ವೇದಿಕೆ ಕಾರ್ಯಕರ್ತೆರೆರ್ದ್ ವಿಶೇಷ ಪ್ರತಿಭಟನೆ ನಡತ್ಂಡ್.
ಮoಡ್ಯ ರಕ್ಷಣಾ ವೇದಿಕೆದ ಗುರ್ಕಾರೆ ಶಂಕರ್ ಬಾಬು ನೇತೃತ್ವಡ್ ಬಿಸ್ಲೆರಿ ನೀರ್ ಡ್ ನಟ್ಟಿ ನಡ್ಪುನ ಮುಖೇನ ಆಕ್ರೋಶ ವ್ಯಕ್ತ ಪಡಿಸಾಯೆರ್. ರೈತೆರ್ನ ಬೆಳೆಕ್ಲೆಗ್ ನೀರ್ ಕೊರೊಂದಿಜ್ಜೆರ್ ತಮಿಳು ನಾಡುಗು ನೀರ್ ಬುಡೊಂದುಲ್ಲೆರ್ ಪಂದ್ ರೈತೆರ್, ಕಾರ್ಯಕರ್ತೆರ್ ಹನುಮಂತಪುರದ ಕಂಡಡ್ ಬಿಸ್ಲೆರಿ ನೀರ್ ಡ್ ನಾಟಿ ಮಲ್ತ್ ಆಕ್ರೋಶ ತೊಜಿಪಾಯೆರ್.
ತುಳುಕೂಟ ಪೌಂಡೇಶನ್ (ರಿ.) ನಾಲಾಸೋಪಾರದ ಮುತಾಲಿಕೆಡ್ ಧರ್ಮಾರ್ಥ ಕಣ್ಣ್ ಪರೀಕ್ಷೆ ಬೊಕ್ಕ ನೆತ್ತೆರ್ ಉಂಬೊಲಿ (ರಕ್ತ ದಾನ) ಲೇಸ್ ಸೆ.10 ಐತಾರ ನಾಲಾಸೋಪಾರದ ಗ್ಯಾಲಕ್ಸಿ ಸಭಾಂಗಣಡ್ ನಡಪರೆ ಉಂಡು.
ವಸಾಯಿ ವಿರಾರ್ ದ ಮಾಜಿ ಉಪ ಮೇಯರ್ ಉಮೇಶ್ ನಾಯ್ಕ್ ಲೇಸ್ ದ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ವಸಾಯಿ ತಾಲೂಕ್ ದ ತಹಶಿಲ್ದಾರ್ ಅವಿನಾಶ್ ಕೋಸ್ವಿ, ವಿವಿ ಎಮ್ ಸಿ ಉಪ ಆಯುಕ್ತೆರ್ ವಿಜಯಕುಮಾರ್ ದ್ವಾಸೆ ಬರಿಯೆರೆ ಉಲ್ಲೆರ್. ಮಾನಾದಿಗೆದ ಬಿನ್ನೆರಾದ್ ಡಾ.ಸತ್ಯಪ್ರಕಾಶ್ ಶೆಟ್ಟಿ ಪಾಲ್ ಪಡೆಪೆರ್.
ಅಂಚೆನೆ ಮಹಾರಾಷ್ಟ್ರ ಸರ್ಕಾರರ್ದ್ ತಿಕ್ಕುನ ಆರೋಗ್ಯದ ಯೋಜನೆ ಜ್ಯೋತಿಬಾ ಮಹಾತ್ಮಾ ಪುಲೆ ಯೋಜನೆ ಬೊಕ್ಕ ಕೇಂದ್ರ ಸರ್ಕಾರರ್ದ್ ಪ್ರದಾನಮಂತ್ರಿ ಆಯುಷ್ಮಾನ್ ಆರೋಗ್ಯ ಯೋಜನೆದ ಪ್ರಯೋಜನನ್ ಪಡೆಯೆರೆ ತಜ್ಞೆರ್ ಪೊಲಬು ಕೊರ್ಪೆರ್.
ಈ ಮಾತ ಲಾಭನ್ ಸಮಾಜ ಬಾಂಧವೆರ್ ಪಡೆವೊಡು, ಅಂಚೆನೆ ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ತುಳುಕೂಟ ಪೌಂಡೇಶನ್ (ರಿ.) ನಾಲಾಸೋಪಾರದ ಗುರ್ಕಾರ್ಲು ಶಶಿಧರ್ ಕೆ ಶೆಟ್ಟಿ ಇನ್ನಂಜೆ, ಮಾನಾದಿಗೆದ ಕಾರ್ಯದರ್ಶಿ ಜೆ.ಡಿ ಶೆಟ್ಟಿ ಪಳ್ಳಿ, ಮಾನಾದಿಗೆದ ಕೋಶಾಧಿಕಾರಿ ರಾಜೇಶ್ ವೈ ಕರ್ಕೇರ, ವೈದ್ಯಕೀಯ ಸಮಿತಿದ ಕಾರ್ಯಾಧ್ಯಕ್ಷೆರ್ ದಯಾನಂದ ಬೋಂಟ್ರ ಬಿನ್ನಾಪು ಮಲ್ದೆರ್.
ಪೊಣ್ಣನ್ ಮದಿಮೆ ಆವಂದೆ ದೀಪಾವೊಂದಿನ ಸಂಬಂಧ ಅತ್ತ್ಂಡ ಅಕ್ರಮ ಸಂಬಂಧದ ಮುಖೇನ ಪುಟ್ಟಿನ ಬಾಲೆದ ಪೋಷಕೆರೆಗ್ ಸೇರಿನ ಮಾತ ಆಸ್ತಿಡ್ ಹಕ್ಕ್ ಉಂಡು ಪಂದ್ ಸುಪ್ರೀಂ ಕೋರ್ಟ್ ತೀರ್ಪು ಕೊರ್ತುಂಡು.
ಮುಖ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ಮುತಾಲಿಕೆಡ್ ಮೂಜಿ ಸದಸ್ಯೆರ್ನ ನ್ಯಾಯಪೀಠ ಈ ಮಹತ್ವದ ತೀರ್ಪುನ್ ಕೊರ್ತುಂಡು.
ಹಿಂದೂ ಉತ್ತರಾಧಿಕಾರ ಕಾಯ್ದೆ ಬೊಕ್ಕ ಹಿಂದೂ ವಿವಾಹ ಕಾಯ್ದೆ ಅನ್ವಯದ ಜೋಕುಲೆಗ್ ಆಸ್ತಿಡ್ ಅಧಿಕಾರ ಇಪ್ಪುಂಡು ಪಂದ್ ನ್ಯಾಯಪೀಠ ತೆರಿಪಾದ್ಂಡ್.
2011ಕ್ಕ್ ಮದ್ರಾಸ್ ಹೈಕೋರ್ಟ್ ಕೊರ್ನ ತೀರ್ಪುನ್ ಈ ಮುಖೇನ ಸುಪ್ರೀಂ ಕೋರ್ಟ್ ಕ್ಯಾನ್ಸಲ್ ಮಲ್ದ್ಂಡ್. ಅಕ್ರಮ ಸಂಬಂಧದ ಬಾಲೆಗ್ ಪೋಷಕೆರ್ ಸಂಪಾದನೆ ಮಲ್ತಿನ ಆಸ್ತಿಡ್ ಮಾತ್ರ ಹಕ್ಕ್ ಉಂಡು. ಆಂಡ, ಪಿತ್ರಾರ್ಜಿತ ಆಸ್ತಿಡ್ ಹಕ್ಕ್ ಇಜ್ಜಿ ಪಂದ್ ಮದ್ರಾಸ್ ಹೈಕೋರ್ಟ್ ತೀರ್ಪು ಕೊರ್ದಿತ್ತ್ಂಡ್. ಸುಪ್ರೀಂ ಕೋರ್ಟ್ ದ ಈ ತೀರ್ಪುರ್ದ್ ಹೈಕೋರ್ಟ್ ತೀರ್ಪು ಕ್ಯಾನ್ಸಲ್ ಆತ್ಂಡ್.
ಬೋಲ್ತೆರ್: ಬೆಳಾಲು ಹಾ.ಉ.ಸ. ಸಂಘದ ಆಡಳಿತ ಮಂಡಳಿಗ್ ಸೆ.3 ದಾನಿ ನಡತ್ತಿನ ವೋಟ್ ಡ್ ಮಾತಾ 13 ಸೀಟ್ ಲ ಬಿಜೆಪಿ ಬೆಂಬಲಿತ ಸದಸ್ಯೆರ್ ಗೆಂದ್ ದೆರ್.
ಬಿಜೆಪಿ ಬೆಂಬಲಿತ ಸದಸ್ಯೆರಾಯಿನ ಜಾರಪ್ಪ ಗೌಡ, ನಾರಾಯಣ, ಪ್ರಭಾಕರ ಗೌಡ, ಬೊಮ್ಮನ ಗೌಡ, ಮಾದವ, ಯಶವಂತ ಬಣಂದೂರು, ಸೀನಪ್ಪ ಗೌಡ, ಶೀಲಾ ಬಿ.ಎಸ್, ವೇದಾವತಿ, ರೋಹಿತಾಕ್ಷ, ಜಯ ನಾಯ್ಕ, ಸುಂದರ ಮೊಕುಲು ಆಯ್ಕೆಯಾತೆರ್.
ಬೋಲ್ತೆರ್: ಬೋಲ್ತೆರ್ ತಾಲೂಕುದ ಕಾಪಿನಡ್ಕಡ್ ಇನೋವಾ ಕಾರ್ ಬೊಕ್ಕ ಬೈಕ್ ಆಕ್ಸಿಡೆಂಟ್ ಡ್ ಬೈಕ್ ಸವಾರೆ ತೀರ್ಪೋಯಿನ ಘಟನೆ ಇನಿ ನಡತ್ಂಡ್.
ತೀರ್ಪೋಯಿನ ವ್ಯಕ್ತಿ ಕಾರ್ಲ ತಾಲೂಕುದ ಈದು ಗ್ರಾಮದ ಸುಧೀರ್ ಪಂದ್ ತೆರಿದ್ ಬೈದುಂಡು.
ಬೋಲ್ತೆರ್ರ್ದ್ ಒಡಿಪು ಸೈಡ್ಗ್ ಪೋವೊಂದು ಇತ್ತಿನ ಇನೋವಾ ಕಾರ್ ಬೊಕ್ಕ ಅರ್ವರ್ದ್ ಬೋಲ್ತೆರ್ ಗ್ ಬರೋಂದಿತ್ತಿನ ಬೈಕ್ ದ ನಡುಟು ಅಪಘಾತ ಆದ್ ಡಿಕ್ಕಿ ಆಯಿನ ರಭಸಗ್ ಬೈಕ್ ಸವಾರೆ ರೋಡುಗ್ ಬೂರ್ದು ಗಂಭೀರ ಗಾಯ ಆದಿತ್ಂಡ್.
ಕುಡ್ಲ: ಕರ್ನಾಟಕ ರಾಜ್ಯ ಉನ್ನತ ಶಿಕ್ಷಣ ಅಕಾಡೆಮಿ ನಿರ್ದೇಶಕೆರಾದ್ ನಿವೃತ್ತ ಪ್ರಾಧ್ಯಾಪಕೆ, ಲೇಖಕೆ, ಚಿಂತಕೆ ಡಾ.ಚಂದ್ರ ಪೂಜಾರಿ ಮೆರೆನ್ ರಾಜ್ಯ ಸರಕಾರ ನೇಮಕ ಮಲ್ದ್ಂಡ್.
ಧಾರವಾಡಡ್ ಕೇಂದ್ರ ತಾನ ಇಪ್ಪುನ ಉನ್ನತ ಶಿಕ್ಷಣ ಅಕಾಡೆಮಿ ರಾಜ್ಯದ ಉನ್ನತ ಶಿಕ್ಷಣದ ನೀತಿ ನಿರೂಪಣೆನ್ ತಯಾರ್ ಮಲ್ಪರೆ ಸರಕಾರಗ್ ಸಲಹೆ, ಮಾರ್ಗಸೂಚಿನ್ ಕೊರ್ಪುನ ಅತ್ಯುನ್ನತ ಸಂಸ್ಥೆ ಆತ್ಂಡ್.
ಡಾ.ಚಂದ್ರ ಪೂಜಾರಿ ಮೇರ್ ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಅಭಿವೃದ್ಧಿ ಅಧ್ಯಯನ ವಿಭಾಗದ ಪ್ರಾಧ್ಯಾಪಕೆರಾದ್ ಬೊಕ್ಕ ಹಾವೇರಿ ಜಾನಪದ ವಿಶ್ವವಿದ್ಯಾಲಯದ ಅನ್ವಯಿಕ ಜಾನಪದ ವಿಭಾಗದ ಡೀನ್ ಆದ್ ಸೇವೆ ಸಂದಾದೆರ್. ಸಮಾಜ ಸಂಶೋಧನೆಡ್ ಇಪ್ಪುನ ಮೇರ್ ಸುರುತ್ತ ಸರ್ತಿ ರಾಜ್ಯಡ್ ದಲಿತ್ ಡೆವೆಲಪ್ಮೆಂಟ್ ಇಂಡೆಕ್ಸ್ ತಯಾರ್ ಮಲ್ತಿನ ತಜ್ಞೆರಾತೆರ್.
ಪಂಚಾಯತ್ ರಾಜ್ ಕಾಯಿದೆ ತಿದ್ದುಪಡಿ ಕೋರ್ ಕಮಿಟಿ ಸದಸ್ಯೆರಾದ್, ಸ್ಟೇಟ್ ಹ್ಯೂಮನ್ ಡೆವಲಪ್ಮೆಂಟ್ ಇಂಡೆಕ್ಸ್ ಕೋರ್ ಕಮಿಟಿ ಸದಸ್ಯೆರಾದ್, ರಾಜ್ಯ ಆಡಳಿತ ತರಬೇತಿ ಸಂಸ್ಥೆದ ಸಂಪನ್ಮೂಲ ವ್ಯಕ್ತಿಯಾದ್, ಮೈಸೂರ್ ದ ಅಬ್ದುಲ್ ನಝೀರ್ ಸಾಬ್ ಗ್ರಾಮೀಣಾಭಿವೃದ್ಧಿ ಸಂಸ್ಥೆದ ಸಂಪನ್ಮೂಲ ವ್ಯಕ್ತಿಯಾದ್ ಸೇವೆ ಸಂದಾದೆರ್.
ಒಟ್ಟು 22 ಬೂಕುಲೆನ್ ಬರೆಯಿನ ಡಾ.ಚಂದ್ರ ಪೂಜಾರಿ ಮೇರ್ ವಿಜಯ ಕರ್ನಾಟಕ, ಕನ್ನಡ ಪ್ರಭ ಪ್ರಜಾವಾಣಿ ಪತ್ರಿಕೆದ ಪತ್ರಿಕೆದ ಅಂಕಣ ಬರವುಗಾರೆರಾದ್ ಇತ್ತೆರ್. ರಾಜ್ಯದ ಬೇತೆ ಬೇತೆ ಟಿ.ವಿ. ಮಾಧ್ಯಮಲೆಡ್ ವಿಚಾರ ಮಂಡನೆ ಮಲ್ತೊಂದು ಇತ್ತೆರ್.
ಮೂಲತಃ ಪುತ್ತೂರ್ ತಾಲೂಕ್ ದಾರ್ ಆಯಿನ ಮೇರ್ ಸೈಂಟ್ ಫಿಲೋಮಿನಾ ಹೈಸ್ಕೂಲ್ ಬೊಕ್ಕ ಸೈಂಟ್ ಫಿಲೋಮಿನಾ ಕಾಲೇಜ್ ಡ್ ವ್ಯಾಸಂಗ ಮಲ್ದೆರ್. ಎಂ.ಕಾಂ ಅಧ್ಯಯನನ್ ಕುಡ್ಲ ವಿಶ್ವವಿದ್ಯಾನಿಲಯಡ್ ಮಲ್ದೆರ್. ಬೊಕ್ಕ ಉಂದುವೇ ವಿಶ್ವವಿದ್ಯಾಲಯಡ್ ಬಿಸಿನೆಸ್ ಅಡ್ಮಿನಿಸ್ಟ್ರೇಷನ್ ವಿಷಯಡ್ ಪಿ.ಎಚ್.ಡಿ ಪದವಿ ಪಡೆತೆರ್.
ಪುತ್ತೂರು: ರೋಟರಿ ಕ್ಲಬ್ ದ ಮುತಾಲಿಕೆಡ್ ಅಕ್ಷಯ ಪ್ಯಾಷನ್ ಡಿಸೈನಿಂಗ್ ಕಾಲೇಜ್ ಸಂಪ್ಯಡ್ “ರೋಟರ್ಯಾಕ್ಟ್ ಕ್ಲಬ್’ ಓರಿಯಂಟೇಷನ್ ಲೇಸ್ ಸೆ.2 ಸನಿವಾರದಾನಿ ನಡತ್ಂಡ್.
ಸoಪನ್ಮೂಲ ವ್ಯಕ್ತಿಯಾದ್ ರೋಟರ್ಯಾಕ್ಟ್ ರಾಹುಲ್ ಆಚಾರ್ಯ, ಡಿ. ಆರ್.ಆರ್. ಬೊಕ್ಕ ರೊ. ರತ್ನಾಕರ ರೈ, ಮಾಜಿ ಡಿ.ಆರ್.ಸಿ.ಸಿ.ರೋಟರ್ಯಾಕ್ಟ್ ಬಗೆಟ್ ಮಾಹಿತಿ ಕೊರಿಯೆರ್.
ಅಕ್ಷಯ ಕಾಲೇಜಿದ ಛೇರ್ಮೆನ್ ಜಯಂತ್ ನಡುಬೈಲ್ ರೋಟರಿ ಸಂಸ್ಥೆದ ಅಂಗವಾಯಿನ ರೋಟರ್ಯಾಕ್ಟ್ ಕಲ್ಪಾರ್ಥಿಲೆಗ್ ಆತ್ಮವಿಶ್ವಾಸ, ಸಾರ್ವಜನಿಕ ಸಂಪರ್ಕ, ಬೊಕ್ಕ ವ್ಯಕ್ತಿತ್ವ ವಿಕಸನದೊಟ್ಟಿಗೆ ಸಮಾಜ ಸೇವೆ ಮಲ್ಪುನ ಅವಕಾಶ ತಿಕ್ಕುಂಡು ಪಂದ್ ಪಂಡೆರ್. ಪ್ರಾಂಶುಪಾಲೆರಾಯಿನ ಸಂಪತ್ ಪಕ್ಕಳ, ರೋಟರಿ ಜಿಲ್ಲೆ 3181 ವಲಯ 5 ದ ಅಸಿಸ್ಟೆಂಟ್ ಗವರ್ನರ್ ನರಸಿಂಹ ಪೈ, ರೋಟರಿ ಯುವದ ಗುರ್ಕಾರೆ ಪಶುಪತಿ ಶರ್ಮ, ಕಾಲೇಜ್ ದ ಉಪನ್ಯಾಸಕರಾಯಿನ ರಾಕೇಶ್.ಕೆ, ರೋಟರ್ಯಾಕ್ಟ್ ನಿಯೋಜಿತ ಗುರ್ಕಾರೆ ಜೀವನ್,ಕಾರ್ಯದರ್ಶಿ ಸವಿ ದೇಚಮ್ಮ ಈ ಪೊರ್ತುಡು ಇತ್ತೆರ್.
ಶೋಷಿತ ಜನಕೋಟಿ ಜ್ಞಾನವಂತೆರಾವೊಡು, ಶೋಷಕೆರ್ ಮನೋಧರ್ಮ ಬದಲಾಯಿಸಾವುನ ಜ್ಞಾನಿಲಾವೊಡು ಪನ್ಪುನೆನ್ ನಾರಾಯಣ ಗುರು ಚಳವಳಿದ ಮೂಲ ಉದ್ದೇಶ ಆತ್ಂಡ್. ಮೇರ್ ಧಾರ್ಮಿಕತೆದ ತಳಹದಿಡ್ ಸಾಮಾಜಿಕ, ಶೈಕ್ಷಣಿಕ, ಆರ್ಥಿಕ ಪರಿವರ್ತನೆನ್ ಕೇರಳಡ್ ಅನುಯಾಯಿಲೆನ ಬೆಂಬಲರ್ದ್ ತನ್ನ ಜೀವಿತಾವಧಿಡೇ ಯಲ್ಲೇ ಸಾಧಿಸಾದೆರ್ ಪಂದ್ ಶ್ರೀ ನಾರಾಯಣ ಗುರು ಅಧ್ಯಯನ ಪೀಠದ ಪೂರ್ವ ನಿರ್ದೇಶಕೆರ್, ಸಾಹಿತಿ ಮುದ್ದು ಮೂಡುಬೆಳ್ಳೆ ಪಂಡೆರ್.
ಮೇರ್ ಬೆಂಗ್ಲೂರ್ ದ ರವೀಂದ್ರ ಕಲಾಕ್ಷೇತ್ರಡ್ ಕರ್ನಾಟಕ ಸರಕಾರ, ಆರ್ಯ ಈಡಿಗ ಮಹಾಸಂಸ್ಥಾನದ ಒಟ್ಟುಸೇರಿಗೆಡ್ ಆಯೋಜನೆ ಮಲ್ತಿನ ಶ್ರೀ ನಾರಾಯಣ ಗುರು ಜಯಂತಿ ಲೇಸ್ ದ ವಿಶೇಷ ಉಪನ್ಯಾಸಕೆರ್ನ ನಿಲೆಟ್ಟ್ ಪಾತೆರಿಯೆರ್.
ಈ ಲೇಸ್ ದ ಉದಿಪನನ್ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಮಲ್ತೆರ್.
ಈ ಪೊರ್ತುಡು ಸೋಲೂರು ಆರ್ಯ ಈಡಿಗ ಮಹಾಸಂಸ್ಥಾನದ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪ, ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಶಿವರಾಜ ತಂಗಡಗಿ, ಆರ್ಯ ಈಡಿಗ ಸಂಸ್ಥಾನದ ಅಧ್ಯಕ್ಷೆರ್ ಡಾ ತಿಮ್ಮೆ ಗೌಡ, ಶಾಸಕೆರ್ ಬೇಳೂರು ಗೋಪಾಲಕೃಷ್ಣ, ಹೆಚ್ ಆರ್ ಗವಿಯಪ್ಪ, ಎಂ ಎಲ್ ಸಿ ಹರೀಶ್ ಕುಮಾರ್, ಬೆಂಗ್ಲೂರ್ ಬಿಲ್ಲವ ಅಸೋಶಿಯೇಶನ್ ದ ಗುರ್ಕಾರ್ಲು ಎಂ.ವೇದ ಕುಮಾರ್ ಪಾಲ್ ಪಡೆದಿತ್ತೆರ್.
