September 2023

ರೇಡಿಯೊ ಮಣಿಪಾಲ್ ಡ್ ಇನಿ ಸೌಜನ್ಯ ಕಟಪಾಡಿ ಮೆರೆನ ಕತೆ ಕೇನ್ಲೆ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಡ್ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 74ನೇ ಸಂಚಿಕೆ ಸೆ.30 ಸನಿಯಾರ ಬಯ್ಯಗ್ 4.30ಕ್ಕ್ ಪ್ರಸಾರ ಆಪುಂಡು.

ಈ ಸಂಚಿಕೆಡ್ ಸ್ವರಚಿತ ಕಥೆನ್ ಸೌಜನ್ಯ ಆರ್ ಕಟಪಾಡಿ (ವಿದ್ಯಾರ್ಥಿನಿ) ಓದಿಯೆರೆ ಉಲ್ಲೆರ್. ಅ.1 ಕ್ಕ್ ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಅ.27: ನರಸಿಂಹರಾಜಪುರದ ಶ್ರೀ ದುರ್ಗಾಪರಮೇಶ್ವರಿ, ಶ್ರೀ ರಕ್ತೇಶ್ವರಿ, ವೀರಕಲ್ಕುಡ ಬೊಕ್ಕ ಧರ್ಮದೇವತೆಲೆನ ಸನ್ನಿಧಿಡ್ ಸಿರಿಸಿಂಗಾರ ನೇಮೋಚ್ಚಯ

ಮೇಕನಹಡ್ಲು, ಸೀತೂರು ಗ್ರಾಮದ ನರಸಿಂಹರಾಜಪುರದ ಶ್ರೀ ದುರ್ಗಾಪರಮೇಶ್ವರಿ, ಶ್ರೀ ರಕ್ತೇಶ್ವರಿ, ವೀರಕಲ್ಕುಡ ಬೊಕ್ಕ ಧರ್ಮದೇವತೆಲೆನ ಸನ್ನಿಧಿಡ್ ಅ.27 ಸುಕ್ರಾರ ಸಿರಿಸಿಂಗಾರ ನೇಮೋಚ್ಚಯ ನಡಪರೆ ಉಂಡು.

ಅಂಚೆನೆ ಮಾರ್ನೆಮಿದ ಲೆಕ್ಕೊಡು ಮಧ್ಯಾಹ್ನ ಚಂಡಿಕಾಹೋಮ, ದೈವೊದ ಪಾತ್ರಿಲಾಯಿನ ಸತೀಶ್ ಮೆರೆನ ಧರ್ಮಪತ್ನಿ ಪುಷ್ಪ ಮೆರೆರ್ದ್ ಮುತ್ತೈದೆರೆಗ್ ಬಾಗಿನ ಸೇವೆ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಗ್ ದೇಣಿಗೆ ಕೊರ್ಪಿನ ಭಕ್ತಾದಿಲು ಪಿಂಗಾರ, ಬೊಂಡ, ಅರಿ, ತಾರಾಯಿ ಬೊಕ್ಕ ಫಲಸೊತ್ತುಲೆನ್ ಕೊರೊಲಿ. ಅಂಚೆನೆ ಮಾತೆರ್ಲಾ ಈ ಲೇಸ್ ಗ್ ಸಹಕಾರ ಕೊರ್ದು, ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಇನಿ ಹೊಸನಗರ ವೀರ ಸಾವರ್ಕರ್ ಮಂಟಪಡ್ ಶಿವದೂತ ಪಂಜುರ್ಲಿ ಆಟ

ನಡೂರು: ಮಂದರ್ತಿ ಶ್ರೀ ಮಹಾಗಣಪತಿ ಯಕ್ಷಗಾನ ಮಂಡಳಿ (ರಿ.) ದ ಮುತಾಲಿಕೆಡ್ ಹೊಸನಗರದ ವೀರ ಸಾವರ್ಕರ್ ಮಂಟಪಡ್ ಇನಿ ರಾತ್ರೆ ಶಿವದೂತ ಪಂಜುರ್ಲಿ ಆಟ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಸಾರ್ವಜನಿಕ ಗಣೇಶೋತ್ಸವ ಸಮಿತಿ, ಅಖಿಲ ಭಾರತ ಹಿಂದೂ ಮಹಾಸಭಾ ಹೊಸನಗರ ಘಟಕ ಬೊಕ್ಕ ಈ ಆಟದ ರಚನೆ ಬೊಕ್ಕ ನಿರ್ದೇಶನ ಮಲ್ತಿನ ಸದಾಶಿವ ಅಮೀನ್ ಕೊಕ್ಕರ್ಣೆ ಲೆಪ್ಪೋಲೆಡ್ ತೆರಿಪಾದೆರ್.

ಕಾಪು: ಪೊಸ ಮಾರಿಗುಡಿ ದೇವಲ್ಯ ಜೀರ್ಣೋದ್ಧಾರಗ್ 99 ಶಿಲೆ ಸಮರ್ಪಣೆ

ಕಾಪು: ಸುರುತ್ತ ಹಂತಡ್ ಸಂಪೂರ್ಣ ಇಳಕಲ್ ಕೆಂಪು ಶಿಲೆ ಗಲಸುನೆರ್ದ್ ಸುಮಾರ್ 30 ಕೋಟಿ ರೂಪಾಯಿ ಖರ್ಚಿಡ್ ಜೀರ್ಣೋದ್ಧಾರ ಆವೊಂದು ಇಪ್ಪುನ ಕಾಪು ಶ್ರೀ ಹೊಸ ಮಾರಿಗುಡಿ ದೇವಲ್ಯಗ್ ಕಾಪು ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ 99,999 ರೂ. ಬಿಲೆತ್ತ 99 ಶಿಲೆನ್ ಸಮರ್ಪಣೆ ಮಲ್ತೆರ್.

ಕಾಪು ಶ್ರೀ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಮಾಧವ ಆರ್. ಪಾಲನ್, ಗೌರವಾಧ್ಯಕ್ಷೆರ್ ಶಶಿಧರ ಶೆಟ್ಟಿ ಮಲ್ಲಾರು ಬೊಕ್ಕ ಸದಸ್ಯೆರ್ ಒಟ್ಟುಸೇರ್ದ್ ಶ್ರೀ ಪೊಸ ಮಾರಿಗುಡಿ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಕೆ. ವಾಸುದೇವ ಶೆಟ್ಟಿ ಬೊಕ್ಕ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ರಮೇಶ ಹೆಗ್ಡೆ ಕಲ್ಯ ಮೊಕ್ಲೆಗ್ ದೇಣಿಗೆನ್ ಕೊರಿಯೆರ್. ಸಾಧ್ಯ ಆಯಿನಾತ್ ಸದಸ್ಯೆರ್ ತಲಾ 9 ಶಿಲೆನ್ ಸಮರ್ಪಣೆ ಮಲ್ತ್ ದ್, ಕಾಪುದ ಅಮ್ಮನ ಜೋಕುಲು ಕೂಟಗ್ ಸೇರ್ಪಡೆ ಆಪುನ ಬಗೆಟ್ಟ್ ಸಂಕಲ್ಪ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಗಣೇಶೋತ್ಸವ ಸಮಿತಿದ ಉಪಾಧ್ಯಕ್ಷೆರ್ ಅಶೋಕ್‌ ಶೆಟ್ಟಿ, ವೆಂಕಟೇಶ್‌ ಕುಮಾರ್, ಪ್ರಧಾನ ಕಾರ್ಯದರ್ಶಿ ರಾಜೇಶ್ ಕಾಂಚನ್, ಕಾರ್ಯದರ್ಶಿ ಭವಿಷ್ ಕುಮಾರ್, ಪ್ರಧಾನ ಕೋಶಾಧಿಕಾರಿ ಗಣೇಶ್ ಕೆ., ಕೋಶಾಧಿಕಾರಿ ರಿತೇಶ್‌, ಪದಾಧಿಕಾರಿ ಜಗದೀಶ್ ಮೆಂಡನ್, ರಾಘವೇಂದ್ರ ಶೆಟ್ಟಿ, ಮೋಹನ್ ಕಲ್ಯ, ರವೀಂದ್ರ ಎಂ., ಉದಯ್‌ ಶಂಕರ್, ಅನಿಲ್ ಕುಮಾರ್, ಸಖೇಂದ್ರ ಸುವರ್ಣ, ಲೀಲಾಧರ ಶೆಟ್ಟಿ, ಮೋಹನ್ ದಾಸ್ ಕಾಮತ್, ನವೀನ್‌ ಚಂದ್ರ ಜೋಗಿ ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯೆರ್, ಸಾರ್ವಜನಿಕೆರ್ ಪಾಲ್ ಪಡೆದಿತ್ತೆರ್.