ಲೋಕಸಭೆ ವೋಟುರ್ದ್ ದುಂಬು ಪಕ್ಷ ಬಲವರ್ಧನೆ ಮಲ್ಪರೆ ಜೆಡಿಎಸ್ ಪಕ್ಷ ಸೆ.10ಕ್ಕ್ ಬೆಂಗ್ಲೂರ್ದ ಅರಮನೆದ ಚಾವಡಿಡ್ ಜೆಡಿಎಸ್ ಸಮಾವೇಶನ್ ಆಯೋಜನೆ ಮಲ್ದ್ಂಡ್.
ಈ ಸಮಾವೇಶಡ್ ಕಾರ್ಯಕರ್ತೆರೆಗ್ ಬೊಕ್ಕ ನಾಯಕೆರೆಗ್ ವಿಶ್ವಾಸ ಅಂಚೆನೆ ಬಲ ಕೊರ್ಪುನಂಚಿತ್ತಿನ ಕೆಲಸ ಮಲ್ಪರೆ ಪ್ಲಾನ್ ಪಾಡ್ದೆರ್. ನೆಟ್ಟ್ ಮಾಜಿ ಪಿಎಂ ಹೆಚ್ಡಿ ದೇವೆಗೌಡ, ಮಾಜಿ ಸಿಎಂ ಹೆಚ್ಡಿ ಕುಮಾರಸ್ವಾಮಿ ಸೇರಿನಂಚೆನೆ ಸುಮಾರ್ ನಾಯಕೆರ್ ಪಾಲ್ ಪಡೆಯೆರೆ ಉಲ್ಲೆರ್.
ಮಂಡ್ಯ ಶ್ರೀರಂಗಪಟ್ಟಣದ ನೆಲಮನೆ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಿಕ್ಷಕೆರ್ ಕಾಡಪ್ಪಗೋಳ ಪನ್ಪುನಾರ್ 9 ವರ್ಷ ಶಾಲೆಡ್ ವಿದ್ಯೆ ಕಲ್ಪಾವಂದೆ ಸಂಬಳ ಪಡೆಪಿನ ಘಟನೆ ನಡತ್ದ್ಂಡ್.
ಮೇರ್ 2014 ಟ್ಟ್ ಕೆಲಸಗ್ ಸೇರ್ದೆರ್. ಕಾಲಿ 2 ವರ್ಷ ಮಾತ್ರ ಶಾಲೆಗ್ ಬೈದೆರ್. ಬೊಕ್ಕ ಶಾಲೆಗ್ ಬರಂದೆನೇ ಸಂಬಳ ದೆತೊನೊಂದು ಉಲ್ಲೆರ್ ಪಂದ್ ಅಲ್ಪದ ಎಸ್ ಡಿಎಮ್ಸಿ ಗುರ್ಕಾರ್ಲು ಬೊಕ್ಕ ಪದುಕೆರ್ ಆರೋಪ ಮಲ್ದೆರ್.
ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಮುತಾಲಿಕೆಡ್ ಅಜೆಕಾರ್ ಕಲಾಭಿಮಾನಿ ಬಳಗ (ರಿ.) ಬೊಂಬೈದ ಆಯೋಜನೆಡ್ ಸೆ.5 ಸನಿಯಾರ ಮೀರಾ ಭಾಯಂದರ್ ರೋಡ್ ದ ಸಾಯಿ ಬಾಬ ನಗರ್ ದ ಸಂತ ಥೋಮಸ್ ಚರ್ಚ್ ಹಾಲ್ಡ್ ಶ್ರೀ ಭಗವತೀ ಕ್ಷೇತ್ರ ಮಹಾತ್ಮೆ ಆಟ ನಡಪರೆ ಉಂಡು.
ಈ ಲೇಸ್ ಸಸಿಹಿತ್ಲು ಶ್ರೀ ಭಗವತಿ ಕ್ಷೇತ್ರದ ಅನುವಂಶಿಕ ಮೊಕ್ತೇಸೆರೆರ್ ಬೊಕ್ಕ ಪ್ರಧಾನ ಅರ್ಚಕೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಮೆರೆನ ಆಶೀರ್ವಾದದೊಟ್ಟಿಗೆ ನಡಪರೆ ಉಂಡು.
ಈ ಲೇಸ್ಗ್ ಮಾತೆರ್ಲಾ ಬತ್ತ್ದ್, ಆಟನ್ ಪೊರ್ಲು ಮಲ್ತ್ದ್ ಕೊರ್ದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರ್ಕಾರ್ರೆ ಚಂದ್ರಹಾಸ ಕೆ.ಪಾಲನ್, ಗೌರವಾಧ್ಯಕ್ಷೆರ್ ಲಾಜರ್ ಟಿ.ಎಮ್ ಕೋಟ್ಯಾನ್, ಕಾರ್ಯಕಾರಿ ಸಮಿತಿದ ಸರ್ವಸದಸ್ಯೆರ್, ಪೂಜಾ ಕಮಿಟಿ, ಅರ್ಚಕೆರ್, ಮಹಿಳಾ ವಿಭಾಗ, ಯುವ ವಿಭಾಗದ ಸದಸ್ಯೆರ್, ಸದಸ್ಯತ್ವ ಸಮಿತಿ, ಶಿಕ್ಷಣ ಸಮಿತಿ ಬೊಕ್ಕ ಕಾರ್ಯಕ್ರಮ ಸಂಘಟಕ ಸಮಿತಿದಕುಲು ಲೆಪ್ಪೋಲೆಡ್ ಮಾತೆರೆನ್ಲಾ ಎದ್ಕೊಂದೆರ್.
ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಲೆಡ್ ಒಂಜಾಯಿನ ಗೃಹಲಕ್ಷ್ಮೀ ಯೋಜನೆ ಎಲ್ಲೆ ಉದಿಪನ ಆಯೆರೆ ಉಂಡು.
ಮೈಸೂರ್ಡ್ ನಡಪುನ ಈ ಲೇಸ್ಗ್ ರಾಜ್ಯದ ಮಾತ ಫಲಾನುಭವಿಲು ಪಾಲ್ ಪಡೆಯೆರೆ ಉಲ್ಲೆರ್. ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಈ ಯೋಜನೆದ ಉದಿಪನ ಮಲ್ಪರೆ ಉಲ್ಲೆರ್. ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆಶಿ ಬೊಕ್ಕ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್ ಮಾತ ತಯಾರಿನ್ ಮಲ್ಪುವೆರ್. ಈ ಲೇಸ್ಗ್ ಜನಕ್ಲೆನ್ ಲೆತೊಂದು ಬರಿಯೆರೆ 2 ಸಾರ ಬಸ್ತ್ತ ವ್ಯವಸ್ಥೆ ಆತ್ಂಡ್ ಪಂದ್ ತೆರಿಪಾದೆರ್.
ಮಡಂತ್ಯಾರು: ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿ ಸಮಿತಿದ ಮುತಾಲಿಕೆಡ್ 34 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಸೆ.7 ಗುರುವಾರ ಮಡಂತ್ಯಾರು ಗಣಪತಿ ಮಂಟಪದ ಚಾವಡಿಡ್ ನಡಪೆರೆ ಉಂಡು.
ಲೇಸ್ದ ಉದಿಪನನ್ ಮಡಂತ್ಯಾರು ವರ್ತಕರ ಸಂಘದ ಗುರ್ಕಾರೆರ್ ಬಿ.ಜಯಂತ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮಡಂತ್ಯಾರು ಗ್ರಾ.ಪಂದ ಗುರ್ಕಾರ್ದಿ ರೂಪ ಎ.ಸ್, ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಕೆದ ನಿವೃತ್ತ ವಿಸ್ತಾರಣಾಧಿಕಾರಿ ಸುರೇಂದ್ರ ಎಸ್, ಪಾಲ್ಪಡೆಯೆರೆ ಉಲ್ಲೆರ್.
ಸಮಾರೋಪ ಸಮಾರಂಭದ ಗುರ್ಕಾಮೆನ್ ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜೆರ್ ವಹಿಸಾಯೆರೆ ಉಲ್ಲೆರ್. ಕುದ್ರೋಳಿ ನಾರಾಯಣ ಗುರು ಕಾಲೇಜುದ ಉಪನ್ಯಾಸಕೆರ್ ಕೇಶವ ಬಂಗೇರ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಪಾರೆಂಕಿದ ಪ್ರಧಾನ ಅರ್ಚಕೆರ್ ಟಿ.ವಿ ಶ್ರೀಧರ ರಾವ್, ಬೆಸ್ಟ್ ಪೌಂಡೇಶನ್ದ ಗುರ್ಕಾರೆ ರಕ್ಷಿತ್ ಶಿವರಾಂ, ಬಂಟ್ವಾಳ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಪ್ರಶಾಂತ್ ಎಂ ಪುಂಜಾಲಕಟ್ಟೆ, ತಣ್ಣೀರುಪಂತ ರುದ್ರಗಿರಿ ಶ್ರೀ ಮೃತ್ಯುಂಜಯ ದೇವಸ್ಥಾನದ ಗುರ್ಕಾರೆ ಭರತ್ ಕುಮಾರ್ ಕೇರಿ ಈ ಲೇಸ್ಡ್ ಪಾಲ್ ಪಡಯೆರೆ ಉಲ್ಲೆರ್.
ನಿವೃತ್ತ ಯೋಧೆರ್ ಮಂಜುನಾಥ ಗೌಡ, ಬೊಲ್ತೇರ್ ಉಪತಹಶೀಲ್ದಾರ್ ಜಯ ಪ್ರವೀಣ್, ನಾಟಿ ವೈದ್ಯರ್ ರಾಧಾಕೃಷ್ಣ, ಉಜಿರೆ ಉರಗ ಪ್ರೇಮಿ ಸ್ನೇಕ್ ಜೋಯಿ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.
ರಾತ್ರೆ 8.30 ಗಂಟೆರ್ದ್ ಜಿ.ವಿ ರಾರ್ಸ್ ಡ್ಯಾನ್ಸ್ ಅಕಾಡೆಮಿ ಮೊಕ್ಲೆನ ಲೆಕ್ಕಡ್ ನೃತ್ಯ-ಗಾನ-ವೈವಿದ್ಯ ಲೇಸ್ ನಡಪೆರೆ ಉಂಡು.
ಬೇತೆ ಬೇತೆ ಪಂತೋಲಾಯಿನ ಕಂಗ್ದ ಮರ ಬರ್ತುನ, ಗೋವಿಂದ ಪಂತೋ, ಕ್ರಾಸ್ ಕಂಟ್ರಿರೇಸ್, ಕರ ದರ್ಪುನ, ಸ್ಲೋ ಸೈಕಲ್ ಬ್ಯಾಲೆನ್ಸ್, ಗೋಣಿ ಚೀಲ ಪಂತೋ, ಶ್ರೀ ಕೃಷ್ಣ ವೇಷ ಸ್ಪರ್ಧೆ, ಪೊಂಜೊವ್ ನಕ್ಲೆಗ್ ರಂಗೋಲಿ ಬುಡ್ ಪಾವುನ ಸ್ಪರ್ಧೆ ನಡಪೆರೆ ಉಂಡು.
ಸಿದ್ದರಾಮಯ್ಯ ಮೆರೆನ ಮುತಾಲಿಕೆದ ಕಾಂಗ್ರೆಸ್ ಸರ್ಕಾರ ಅಧಿಕಾರಗ್ ಬತ್ತ್ದ್ 100 ದಿನ ಕರಿಂಡ್. ಈ 100 ದಿನಟ್ಟ್ ಸಾಧನೆರ್ದ್ ವೇದನೆನೇ ಎಚ್ಚಾ ಪಂದ್ ಜನಕ್ಲೆಗ್ ಮನವರಿಕೆ ಮಲ್ಪರೆ ಸರ್ಕಾರದ ವಿರುದ್ಧ ಬಿಜೆಪಿ ಇನಿ ಚಾರ್ಜ್ಶೀಟ್ ಬುಡುಗಡೆ ಮಲ್ಪುಂಡು.
ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ, ಆರ್ ಅಶೋಕ್ ಸೇರಿನಂಚೆನೆ ಪಕ್ಷದ ಪ್ರಮುಖ ನಾಯಕೆರ್ ಈ ಕಾರ್ಯಕ್ರಮಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಕ್ಷದ ಮೂಲಲು ತೆರಿಪಾದ್ಂಡ್.
ಆಫ್ರಿಕಾದ ಕಾಂಗೋದ ಗೋಬು ಗ್ರಾಮಡ್ ಉಗ್ರೆರ್ ಮಲ್ತಿನ ದಾಳಿಡ್ 14 ಜನ ತೀರ್ ಪೋಯೆರ್.
ಕೊಡ್ಕೊ ಮಿಲಿಷಿಯಾ ಗುಂಪುಗು ಸೇರಿನ ಉಗ್ರೆರ್ ಕೋಡೆ ರಾತ್ರೆ ಗೋಬು ಗ್ರಾಮಗ್ ಪೊಗ್ಗುದು ಬೆಡಿ ಪತ್ತ್ದ್ ಜನಕ್ಲೆನ ಮಿತ್ತ್ ಗುಂಡು ಪಾರಾದೆರ್. ನೆಕ್ಕ್ ಪ್ರತೀಕಾರವಾದ್ ಕಾಂಗೋದ ಮಿಲಿಟರಿ ಸೇನೆಲ ಬೆಡಿತ್ತ ಗುಂಡುನ್ ಪಾರಾದೆರ್. ಈ ಪೊರ್ತುಡು ಒರಿ ಕಾಂಗೋ ಯೋಧೆ, ಅಂಚೆನೆ 4 ಉಗ್ರೆರ್ ಬೊಕ್ಕ 9 ನಾಗರಿಕೆರ್ ತೀರ್ ಪೋತೆರ್. ಅವ್ವತ್ತಂದೆ 2 ಯೋಧೆರ್ ಬೊಕ್ಕ 2 ಜನಕ್ಲೆಗ್ ಪೆಟ್ಟಾತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 22ನೇ ಸಂಚಿಕೆ ಆ.28 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆದಿತ್ತೆರ್. ಆ.29 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಈ ಕಾರ್ಯಕ್ರಮ ಪ್ರಸಾರ ಆಪುಂಡು. ಈ ಲೇಸ್ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ದ https://itunes.apple.com/app/id6447231815 ಲಿಂಕ್ ಮುಖೇನ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಹಾಕಿ ಮಾಂತ್ರಿಕೆ ಮೇಜರ್ ಧ್ಯಾನ್ ಚಂದ್ ಮೆರೆನ ಪುಟ್ಟುದಿನತ್ತ ನೆಂಪುಗಾದ್ ಇನಿ ಭಾರತಡ್ ರಾಷ್ಟ್ರೀಯ ಗೊಬ್ಬುದ ದಿನ ಆದ್ ಆಚರಣೆ ಮಲ್ಪುವೆರ್.
1905 ಆಗಸ್ಟ್ 29 ಕ್ಕ್ ಪುಟ್ಟಿನ ಧ್ಯಾನ್ ಚಂದ್, 1928, 1932 ಬೊಕ್ಕ 1936 ಟ್ಟ್ ಭಾರತಗ್ ಒಲಿಂಪಿಕ್ ಹಾಕಿಡ್ ಬಂಗಾರ್ ಪದಕನ್ ಗೆಂದ್ ದ್ ಕನತ್ ಕೊರ್ತಿನಾರ್. ಮೆರೆನ ಗೊಬ್ಬು ತೂದು ಜರ್ಮನಿದ ಸರ್ವಾಧಿಕಾರಿ ಆದಿತ್ತಿನ ಹಿಟ್ಲರ್ ಕುಸಿ ಆದಿತ್ತೆರ್ ಪಂದ್ ಉಲ್ಲೇಖ ಉಂಡು. 2012 ಟ್ಟ್ ಭಾರತಡ್ ಸುರುತ್ತ ಸರ್ತಿ ರಾಷ್ಟ್ರೀಯ ಕ್ರೀಡಾದಿನನ್ ಆಚರಣೆ ಮಲ್ಪರೆ ಸುರು ಮಲ್ತೆರ್.
ಶಿರ್ಲಾಲು: ವಿಶ್ವ ಹಿಂದೂ ಪರಿಷತ್ ನೆತ್ತ ಮುತಾಲಿಕೆಡ್ 21 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಶಿರ್ಲಾಲು ಗ್ರಾ.ಪಂ ವಠಾರಡ್ ಸೆ.6 ಬುಧವಾರ ನಡಪೆರೆ ಉಂಡು.
ಸಭಾ ಕಾರ್ಯಕ್ರಮದ ಉದಿಪನನ್ ವಿಶ್ವ ಹಿಂದೂ ಪರಿಷತ್ ವೇಣೂರು ಘಟಕದ ಗುರ್ಕಾರೆ ಭಾಸ್ಕರ್ ಎಸ್ ನಡಪಾದ್ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಗ್ರಾ.ಪಂ ಮಾಜಿ ಗುರ್ಕಾರೆ ಸಂಜೀವ ದೇವಾಡಿಗ, ಶಿರ್ಲಾಲು ಪ್ರಗತಿಪರ ಕೃಷಿಕೆರ್ ಯುವರಾಜ್ ಮುಡ್ಡಾಲು, ಶಿರ್ಲಾಲು ಗ್ರಾ.ಪಂ ಸದಸ್ಯೆ ಪ್ರಕಾಶ್ ಹೆಗ್ಡೆ, ಪ್ರಗತಿಪರ ಕೃಷಿಕೆ ಗಂಗಾಧರ ಮನಿಲ ಪಾಲ್ ಪಡೆಯೆರೆ ಉಲ್ಲೆರ್.
ಧಾರ್ಮಿಕ ಸಭೆತ ಗುರ್ಕಾರ್ಮೆನ್ ಶಿರ್ಲಾಲು ವಿಶ್ವಹಿಂದೂ ಪರಿಷತ್ದ ಗುರ್ಕಾರೆ ಸೋಮನಾಥ ಬಳ್ಳಿದಡ್ಡ ವಹಿಸಾಯೆರೆ ಉಲ್ಲೆರ್. ಧಾರ್ಮಿಕ ಭಾಷಣನ್ ರಾ.ಸ್ವ.ಸೇ.ಸಂಘ ಪುತ್ತೂರು ಕಾರ್ಯಕಾರಿಣಿ ಸದಸ್ಯೆರ್ ಪ್ರಕಾಶ್ ಪುರೋಹಿತ್ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ದ ವಕೀಲೆರ್ ಮುರಳಿ ನೋಟರಿ, ಬೊಂಬೈ ಬೊಕ್ಕ ಊರುದ ಉದ್ಯಮಿ ಸುರೇಶ್ ಪೂಜಾರಿ, ಪಾಲ್ ಪಡೆಯೆರೆ ಉಲ್ಲೆರ್. ಗೌರವ ಉಪಸ್ಥಿತಿಟ್ ಶಿರ್ಲಾಲು ಗ್ರಾ.ಪಂ ದ ಗುರ್ಕಾರ್ದಿ ಉಷಾ ಎಂ ಶೆಟ್ಟಿ, ಸಿ.ಎ ಬ್ಯಾಂಕ್ ಗುರ್ಕಾರೆರ್ ನವೀನ್ ಸಾಮಾನಿ, ಶಿರ್ಲಾಲು ಹಾಲು ಉತ್ಪಾದಕರ ಸಂಘದ ಗುರ್ಕಾರೆರ್ ಮಾಧವ, ಶಿರ್ಲಾಲು ಗ್ರಾ.ಪಂ ಅಭಿವೃದ್ಧಿ ಅಧಿಕಾರಿ ರಾಜು, ಶಿರ್ಲಾಲು ಶ್ರೀ ರಾಮ್ ಫ್ರೆಂಡ್ಸ್ ದ ಗುರ್ಕಾರೆರ್ ಹರೀಶ್ ಮಿತ್ತಬೆಟ್ಟು ಪಾಲ್ ಪಡೆಯೆರೆ ಉಲ್ಲೆರ್.
ಸಾಮಾಜಿಕ ಕಾರ್ಯಕರ್ತೆರಾಯಿನ ಗಿರೀಶ್ ಕಟ್ಟ ಬೊಕ್ಕ ಜಗನ್ನಾಥ್ ಅತ್ಯಾಜೆ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪರೆ ಉಂಡು.
ಮುಗಿತಲದ ಲೇಸ್ ದ ಗುರ್ಕಾರ್ಮೆನ್ ಕರಂಬಾರು ಹಳೆಬೀಡುದ ಪ್ರಶಾಂತ್ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಭಜರಂಗದಳತ ಗುರ್ಕಾರೆರ್ ಸುಂದರ ಊರ, ಕುಶಾಲಪ್ಪ ಗೌಡ ಕಲ್ಲಂದಡ್ಡ, ಶಿರ್ಲಾಲು ಆಟೋ ಚಾಲಕ&ಮಾಲಕ ಸಂಘದ ಗುರ್ಕಾರೆರ್ ಜಗನ್ನಾಥ್ ಆಂತ್ರOಗೆ, ಶಿರ್ಲಾಲು ಶಾಲಾಭಿವೃದ್ಧಿ ಸಮಿತಿ ಗುರ್ಕಾರೆರ್ ಅಶೋಕ್ ಕುಲಾಲ್, ಆರುಷ್ ಚಿಕನ್ ಸೆಂಟರ್ದ ಲೋಕೇಶ್ ಪಾಲ್ ಪಡಯೆರೆ ಉಲ್ಲೆರ್.
ಪೊಂಜೊವ್ ನಕ್ಲೆಗ್, ಜೊಕ್ಲೆಗ್ ಬೊಕ್ಕ ಆಂಜೋವ್ ನಕ್ಲೆಗ್ ವಿವಿಧ ಪಂತೊಲು ನಡಪೆರೆ ಉಂಡು. ಶಿರ್ಲಾಲು, ಕರಂಬಾರು ಶಾಲೆದ ಜೋಕ್ಲೆಗ್ ಭಗವದ್ಗೀತೆ ಬಾಯಿಪಾಠ ಪಂತೊ, ಮಧ್ಯಾಹ್ನ 1 ಗಂಟೆರ್ದ್ “ಸತ್ವಪರೀಕ್ಷೆ” ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.
