August 2023

ಸೆ.3: ಬೆಂಗ್ಲೂರ್ ದ ಕರ್ನಾಟಕ ಚಲನಚಿತ್ರ ಕಲಾವಿದೆರೆನ ಸಂಘ ಡಾ/ ರಾಜ್ ಕುಮಾರ್ ಭವನಡ್ ತುಳು ಸಿನೆಮಾದ ಸುವರ್ಣ ಪಯಣ ಲೇಸ್

ದೃಶ್ಯಾಲಯ ಕುಡ್ಲ, ಸ್ವಯಂಪ್ರಭ ಪ್ರೊಡಕ್ಷನ್ ಟಾಕೀಸ್ ಆ್ಯಪ್ ಬೆಂಗ್ಲೂರ್ ದ ಒಟ್ಟುಸೇರಿಗೆಡ್ ತುಳು ಚಿತ್ರರಂಗದ 50ನೇ ವರ್ಷೊದ ಲೆಕ್ಕೊಡು ತಮ್ಮ ಲಕ್ಷ್ಮಣ ಮೆರೆನ ತುಳು ಬೆಳ್ಳಿತೆರೆಯ ಸುವರ್ಣಯಾನ ಪನ್ಪಿನ ಬೂಕು ಬುಡುಗಡೆ ಬೊಕ್ಕ ಸುವರ್ಣ ತುಳು ಚಿತ್ರಮಾಲಾ ಕಿರುಚಿತ್ರ ಬುಡುಗಡೆ ಸೆ.3 ಐತಾರ ಬೆಂಗ್ಲೂರ್ ದ ಕರ್ನಾಟಕ ಚಲನಚಿತ್ರ ಕಲಾವಿದೆರೆನ ಸಂಘ ಡಾ/ ರಾಜ್ ಕುಮಾರ್ ಭವನಡ್ ನಡಪರೆ ಉಂಡು.

ಬಯ್ಯಗ್ ತುಳು ಸಿನೆಮಾದ ಸುವರ್ಣ ಪಯಣ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಪದ್ಮಶ್ರೀ ಪುರಸ್ಕೃತೆರ್ ಚಲನಚಿತ್ರ ನಿರ್ದೇಶಕೆರ್ ಡಾ/ ಗಿರೀಶ್ ಕಾಸರವಳ್ಳಿ, ರಾಷ್ಟ್ರ ಪ್ರಶಸ್ತಿ ಗೆಂದಿನ ಚಲನಚಿತ್ರ ನಟಿ ಡಾ/ಜಯಮಾಲ, ಬೆಂಗ್ಲೂರ್ ಸಾರ್ವಜನಿಕ ಗ್ರಂಥಾಲಯ ಇಲಾಖೆದ ನಿರ್ದೇಶಕೆರ್ ಡಾ/ಸತೀಶ್ ಕುಮಾರ ಎಸ್ ಹೊಸಮನಿ, ಬೆಂಗ್ಲೂರ್ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿದ ಗುರ್ಕಾರ್ರೆ ಭಾ.ಮ ಹರೀಶ್, ಪುಗರ್ತೆದ ಚಲನಚಿತ್ರ ಸಂಗೀತ ನಿರ್ದೇಶಕೆರ್ ವಿ. ಮನೋಹರ್, ಗುರುಕಿರಣ್, ರಾಷ್ಟ್ರ ಪ್ರಶಸ್ತಿ ಗೆಂದಿನ ಚಲನಚಿತ್ರ ನಿರ್ದೇಶಕೆರ್ ಶಿವಧ್ವಜ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಆ.31: ಬನ್ನಂಜೆ ಶ್ರೀ ನಾರಾಯಣ ಗುರು ಆಡಿಟೋರಿಯಂಡ್ ನಾರಾಯಣ ಗುರು ಜಯಂತಿ

ಒಡಿಪು: ಒಡಿಪುದ ಬನ್ನಂಜೆ ಶ್ರೀ ನಾರಾಯಣ ಗುರು ಆಡಿಟೋರಿಯಂಡ್ ಆ.31ಕ್ಕ್ ನಾರಾಯಣ ಗುರು ಜಯಂತಿ ನಡಪರೆ ಉಂಡು.

ಈ ಲೇಸ್ ನ್ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಉದಿಪನ ಮಲ್ಪುವೆರ್. ಶಾಸಕೆರ್ ಯಶ್ ಪಾಲ್ ಎ ಸುವರ್ಣ ಗುರ್ಕಾರ್ಮೆನ್ ಒಯಿಸೊನ್ವೆರ್.

ಆ.31: ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಾರಾಯಣ ಗುರು ಜಯಂತಿ

ಕುಡ್ಲ: ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಬೊಕ್ಕ ಕುಡ್ಲದ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಒಟ್ಟುಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ ಆಚರಣೆ ಆ.31 ಗುರುವಾರ ಬಯ್ಯಗ್ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಡಪರೆ ಉಂಡು.

ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಉದಿಪನ ಮಲ್ಪುವೆರ್. ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಗುರ್ಕಾರ್ಮೆನ್ ಒಯಿಸೊನ್ವೆರ್.

ಈ ಲೇಸ್ ಡ್ ವಿಧಾನಸಭೆ ಸ್ಪೀಕರ್ ಯುಟಿ ಖಾದರ್, ಜಿಲ್ಲಾ ಕಸಾಪ ಅಧ್ಯಕ್ಷೆರ್ ಡಾ.‌ಎಂ.ಪಿ ಶ್ರೀನಾಥ್, ಕುದ್ರೋಳಿ ಕ್ಷೇತ್ರದ ಗುರ್ಕಾರ್ಲು ಎಚ್ ಎಸ್ ಸಾಯಿರಾಮ್ ಪಾಲ್ ಪಡೆಯೆರೆ ಉಲ್ಲೆರ್.‌

ಸೆ.19-21: ಪುರುಷರಕಟ್ಟೆಡ್ ಚೌತಿದ ಗೌಜಿ

ಪುತ್ತೂರ್: ಪುರುಷರಕಟ್ಟೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ 23 ನೇ ವರ್ಷೊದ ಸಾರ್ವಜನಿಕ ಚೌತಿ ಸೆ.19-21 ಮುಟ್ಟ ಪುರುಷರಕಟ್ಟೆದ ಶ್ರೀ ಮಹಾಲಿಂಗೇಶ್ವರ ದೇವೆರೆನ ಕಟ್ಟೆದ ಎದುರುಡು ನಡಪರೆ ಉಂಡು.

ಸೆ.19 ಅಂಗಾರೆ ಬೊಲ್ಪುಗು ಗಣಪತಿ ವಿಗ್ರಹ ಪ್ರತಿಷ್ಠೆ, ಪ್ರಾರ್ತನೆ, ಗಣಹೋಮ, ಮಧ್ಯಾಹ್ನ ಮಹಾಪೂಜೆ ಆದ್ ನುಪ್ಪು ಪ್ರಸಾದ ಸೇವೆ ಅವೆರ್ದ್ ಬೊಕ್ಕ ಬೇತೆ ಬೇತೆ ಗೊಬ್ಬುಲು ನಡಪರೆ ಉಂಡು. ಬಯ್ಯಗ್ ಭಜನೆ, ರಾತ್ರೆ ಸಾಂಸ್ಕೃತಿಕ ಲೇಸ್, ರಂಗಪೂಜೆ, ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಬೊಕ್ಕ ತುಳು ಅಪ್ಪೆ ಕಲಾವಿದೆರ್ ಕುಡ್ಲ ಮೊಕ್ಲೆರ್ದ್ ಅಮೋಘ ಕುಸಲ್ದ ಎಸಲ್ ಭರತನಾಟ್ಯ ಡ್ಯಾನ್ಸ್, ಯಕ್ಷನೃತ್ಯ, ಮಿಮಿಕ್ರಿ ಕಾರ್ಯಕ್ರಮ ನಡಪರೆ ಉಂಡು.

ಸೆ.20 ಬುಧಾರ ಬೊಲ್ಪುಗು ಗಣಹೋಮ, ಮಧ್ಯಾಹ್ನ ಮಹಾಪೂಜೆ, ನುಪ್ಪುಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಾತ್ರೆ ರಂಗಪೂಜೆ, ಮಹಾಪೂಜೆ, ಬೊಕ್ಕ ಧಾರ್ಮಿಕ ಸಭಾ ಲೇಸ್ ಆದ್ ಮುರಳಿ ಈ ಪಿರ ಬರೊಲಿ ತುಳು ನಾಟಕ ನಡಪರೆ ಉಂಡು.

ಸೆ.21 ಗುರುವಾರ ಬೊಲ್ಪುಗು ಗಣಹೋಮ, ಮಧ್ಯಾಹ್ನ ಮಹಾಪೂಜೆ, ನುಪ್ಪುಪ್ರಸಾದ ಆದ್ ಭಜನೆ ಸೇವೆ ನಡಪರೆ ಉಂಡು. ಬಯ್ಯಗ್ ಶೋಭಾಯಾತ್ರೆ ನಡಪರೆ ಉಂಡು.

ಅಂಚೆನೆ ಈ ಮೂಜಿ ದಿನತ್ತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀ ಮಹಾಗಣಪತಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಪುರುಷರಕಟ್ಟೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಗುರ್ಕಾರ್ಲು ವಿಶ್ವನಾಥ ಪುರುಷ ಎಂ. ಪುರುಷರಕಟ್ಟೆ, ಖಜಾಂಚಿ ಕೃಷ್ಣಪ್ಪ ಶೆಟ್ಟಿಮಜಲ್, ಕಾರ್ಯದರ್ಶಿ ಹರೀಶ್ ದೇವಾಡಿಗ ಮುಕ್ವೆ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಮುಲ್ಕಿ: ಶ್ರೀ ನಾರಾಯಣ ಗುರು ಜಯಂತಿದ ಭಜನಾ ಜ್ಯೋತಿ ಉದಿಪನ

ಮುಲ್ಕಿ : ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿದ ನಿಲೆಟ್ಟ್ ಮುಲ್ಕಿದ ಬಿಲ್ಲವ ಸಮಾಜ ಸೇವಾ ಸಂಘದ ಗುರು ಮಂದಿರಡ್ ಭಜನಾ ಜ್ಯೋತಿದ ಉದಿಪನದ ಲೇಸ್ ಬುಧಾರ ಬೊಲ್ಪುಗು ನಡತ್ಂಡ್.

ಪೆಜಮಾಡಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಲೋಕೇಶ್ ಅಮೀನ್ ಮೆರೆನ ಪರವಾದ್ ಶ್ರೀಮತಿ ನಿರ್ಮಲಾ ಲೋಕೇಶ್ ಅಮೀನ್ ಭಜನಾ ದೀಪೊನು ಅರ್ಲಾದ್ ಕಾಂಡೆರ್ದ್ ರಾತ್ರಿ ಮುಟ್ಟದ ಭಜನೆಗ್ ಚಾಲನೆ ಕೊರಿಯೆರ್.

ಅರ್ಚಕೆರ್ ಕೃಷ್ಣ ಶಾಂತಿ ಪ್ರಾರ್ಥನೆ ಮಲ್ತೆರ್. ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ಹರಿಶ್ಚಂದ್ರ ವಿ.ಕೋಟ್ಯಾನ್, ರಾಘು ಅಮೀನ್, ಯದೀಶ್ ಅಮೀನ್ ಕೊಕ್ಕರಕಲ್, ಕಿಶೋರ್ ಜೆ.ಸಾಲ್ಯಾನ್, ಭಜನಾ ಸಮಿತಿದ ಗಿರಿಧರ ಅಮೀನ್, ಮೋಹನ್ ಸುವರ್ಣ, ಜಯ ಪೂಜಾರಿ, ನರಸಿಂಹ ಪೂಜಾರಿ,ಸತೀಶ್ ಕಿಲ್ಪಾಡಿ, ಅಶ್ವಿನ್, ನಿಖಿಲ್, ಯುವ ವಾಹಿನಿ ಮುಲ್ಕಿದ ಅಧ್ಯಕ್ಷೆರ್ ಮಾಧವ ಪೂಜಾರಿ ಕಿಲ್ಪಾಡಿ, ಮಹಿಳಾ ವಿಭಾಗದ ಹೇಮಲತಾ, ಲತಾ ಸುವರ್ಣ, ಶ್ವೇತಾ ಗಿರಿಧರ ಅಮೀನ್ ಮೊಕುಲು ಮಾತ ಇತ್ತೆರ್. ಭಜನಾ ಸಂಕೀರ್ತನೆಡ್ 14 ಮಂಡಳಿದಕುಲು ಪಾಲ್ ಪಡೆಯೆರ್.

ಸುಬ್ರಹ್ಮಣ್ಯ ಕಾಲೇಜ್ ಡ್ ಓಣಂ ಪರ್ಬದ ಆಚರಣೆ

ಸುಬ್ರಹ್ಮಣ್ಯ: ಸ್ವಂತ ದೇವೆರೆನ ಊರು ಆಯಿನ ಕೇರಳಡ್ ಓಣಂ ಪರ್ಬನ್ ಗೌಜಿಡ್ ಆಚರಣೆ ಮಲ್ಪುವೆರ್. ಅಂಚೆನೆ ಇತ್ತೆ ಬೇತೆ ಕೆಲವು ಕಡೆಟ್ಲಾ ಈ ಪರ್ಬನ್ ಆಚರಣೆ ಮಲ್ತೊಂದು ಉಲ್ಲೆರ್. ಜನಕ್ಲೆನ ಯೋಗಕ್ಷೇಮಗಾದ್ ಆಡಳಿತ ಮಲ್ತಿನ ಬಲಿಚಕ್ರವರ್ತಿಗ್ ಈ ಪರ್ಬನ್ ಸಮರ್ಪಣೆ ಮಲ್ಪುವೆರ್ ಕೇರಳದಕುಲು. ವಿಷ್ಣುನ ವರದಂಚೆನೆ ಪ್ರತಿವರ್ಷ ಬಲಿಚಕ್ರವರ್ತಿ ಭೂಮಿಗ್ ಬತ್ತ್ ದ್ ತನ್ನ ಪ್ರಜೆಕ್ಲೆನ್ ಭೇಟಿ ಆಪುನ ದಿನನ್ ಓಣಂ ಪರ್ಬ ಪಂದ್ ಆಚರಣೆ ಮಲ್ಪುವೆರ್. ಈ ಪರ್ಬ ಸಂಪತ್ತ್ ದ ಸಂಕೇತ ಆತ್ಂಡ್. ಎಡ್ಡೆ ಬುಲೆಯಾದ್ ಸಮೃದ್ಧಿದ ಔನತ್ಯಗಾದ್ ಪ್ರಾರ್ತನೆ ಮಲ್ಪುನ ಪರ್ಬನೇ ಓಣಂ ಆತ್ಂಡ್ ಪಂದ್ ಎಸ್‌ಎಸ್‌ಪಿಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಪಂಡೆರ್.

ಮೇರ್ ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತಗ್ ಸೇರಿನ ಎಸ್‌ಎಸ್‌ಪಿಯು ಕಾಲೇಜ್ ಬೊಕ್ಕ ಕಾಲೇಜ್ ದ ರಾಷ್ಟ್ರೀಯ ಸೇವಾ ಯೋಜನಾ ಘಟಕದ ಒಟ್ಟುಸೇರಿಗೇಡ್ ಅಂಗಾರೆ ಕಾಲೇಜ್ ಡ್ ನಡತಿನ ಓಣಂ ಆಚರಣೆಡ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಅತ್ತಂದೆ ಭೂಮಿ ಅಪ್ಪೆ ಒದಗವುನ ಸಮೃದ್ಧ ಫಸಲ್ ರ್ದ್ ಜನಕುಲು ಸುಖ ಜೀವನ ನಡಪಾವುನ ಕಾರಣ ಈ ದಿನ ಭೂಮಿ ಅಪ್ಪೆಗ್ ಪೂಜೆ ಪುರಸ್ಕಾರ ಮಲ್ತ್ ದ್ ಅಪ್ಪೆನ ಆಶೀರ್ವಾದ ಪಡೆಪೆರ್. ಈ ದಿನ ಬಲಿ ಚಕ್ರವರ್ತಿನ್ ಎದ್ಕೊನಿಯೆರೆ ಇಸೇಸವಾದ್ ಪೂತ್ತ ರಂಗೋಲಿ ಪಾಡ್ದ್ಂಡ್ ಪಂದ್ ಪಂಡೆರ್.

ಓಣಂ ಆಚರಣೆದ ಲೆಕ್ಕೊಡು ಕಾಲೇಜ್ ಡ್ ಎನ್‌ಎಸ್‌ಎಸ್ ಘಟಕದ ಕಲ್ಪಾರ್ಥಿಲು ಮಲ್ಲ ಪೂಕಳಂ ರಚನೆ ಮಲ್ತೆರ್. ಸೇವಂತಿಗೆ, ಮಲ್ಲಿಗೆ, ಕನಕಾಂಬರ, ತುಳಸಿ, ಗುಲಾಬಿ, ದಾಸವಾಳ, ಗೋರಂಟಿ ಪೂವುನ್ ಗಲಸ್ ದ್ ಕಲ್ಪಾರ್ಥಿಲು ಪೂತ್ತ ರಂಗೋಲಿ ಬುಡ್ಪಯೆರ್. ಈ ರಂಗೋಲಿದ ನಡುಟ್ಟ್ ತುಡರ್ ನ್ ದೀಯೆರ್. ತುಡರ್ ಅರ್ಲಾವುನ ಮುಖೇನ ಆಚರಣೆಗ್ ಕಾಲೇಜ್ ದ ಕಲ್ಪಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್ ಆರ್ ಉದಿಪನ ಮಲ್ತೆರ್. ಸಂಸ್ಕೃತ ಉಪನ್ಯಾಸಕೆರ್ ಡಾ.ಪ್ರಜ್ವಲ್.ಜೆ ಮುತಾಲಿಕೆಡ್ ಕಲ್ಪಾರ್ಥಿಲು ಮಂತ್ರಪಠಣ ಮಲ್ತೆರ್.

ಈ ಪೊರ್ತುಡು ಸಾಂಸ್ಕೃತಿಕ ಕೂಟದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್, ಎನ್‌ಎಸ್‌ಎಸ್ ಯೋಜನಾಧಿಕಾರಿ ಭವ್ಯಶ್ರೀ ಹರೀಶ್ ಕುಲ್ಕುಂದ, ರೆಡ್‌ಕ್ರಾಸ್ ಸಂಯೋಜಕಿ ಶ್ರುತಿ ಯಾಲದಾಳು, ರೋರ‍್ಸ್ ಬೊಕ್ಕ ರೇಂರ‍್ಸ್ ನಾಯಕೆ ಪ್ರವೀಣ್ ಎರ್ಮಾಯಿಲ್, ಸ್ಟಾಪ್ ಸೆಕ್ರೇಟರಿ ಗಿರೀಶ್, ಉಪನ್ಯಾಸಕೆರ್ ಜಯಶ್ರೀ.ವಿ.ದಂಬೆಕೋಡಿ, ಮನೋಜ್ ಕುಮಾರ್ ಬಿ.ಎಸ್, ರತ್ನಾಕರ ಎಸ್, ಶ್ರೀಧರ್ ಪುತ್ರನ್, ಸುಧಾ, ಸೌಮ್ಯಾ, ಶ್ಯಾಮಿಲಿ, ಪೂರ್ಣಿಮಾ ಸೇರಿನಂಚೆನೆ ಎನ್‌ಎಸ್‌ಎಸ್ ಸ್ವಯಂಸೇವಕೆರ್, ಕಲ್ಪಾರ್ಥಿಲು, ಸಿಬಂದಿಲು ಇತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಸೆ.7: ಉಬಾರ್ ಶ್ರೀ ಸಹಸ್ರಲಿಂಗೇಶ್ವರ ದೇವಲ್ಯದ ಚಾವಡಿಡ್ ಕೊಜಪ್ಪು ಕರ ಉಚ್ಚಯ

ಉಬಾರ್ ಸಾರ್ವಜನಿಕ ಮೊಸರ್ ಕುಡಿಕೆ ಉಚ್ಚಯ ಸಮಿತಿದ ಮುತಾಲಿಕೆಡ್ ಶ್ರೀ ಕೃಷ್ಣ ಜನ್ಮಾಷ್ಠಮಿದ 44ನೇ ವರ್ಷೊದ ಕೊಜಪ್ಪು ಕರ ಉಚ್ಚಯ ಸೆ.7 ಗುರುವಾರ ಉಬಾರ್ ಶ್ರೀ ಸಹಸ್ರಲಿಂಗೇಶ್ವರ ದೇವಲ್ಯದ ಚಾವಡಿಡ್ ನಡಪರೆ ಉಂಡು.

ಬೊಲ್ಪುಗು ಭಜನೆ ಸೇವೆ, ಕಜ್ಜೊದ ಉದಿಪನ ಲೇಸ್, ಗೊಬ್ಬುದ ಪಂತೊಲು, ಮಧ್ಯಾಹ್ನ ಎಲ್ಯ ಜೋಕುಲೆನ ಕೃಷ್ಣನ ವೇಷ ಪಾಡುನ ಪಂತೊ, ನುಪ್ಪುಪ್ರಸಾದ ಸೇವೆ ಈ ಪೊರ್ತುಡು ನಡಪರೆ ಉಂಡು. ಅವೆರ್ದ್ ಬೊಕ್ಕ ಶ್ರೀ ಕೃಷ್ಣ ಚರಿತಾ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು. ಅಂಚೆನೆ ನಲಿಕ ಶೋಭಾಯಾತ್ರೆ ನಡಪರೆ ಉಂಡು. ಬಯ್ಯಗ್ ಸಮಾರೋಪ ಸಮಾರಂಭ ಲೇಸ್ ಡ್ ಈ ಕಾರ್ಯಕ್ರಮ ಮುಗಿವುಂಡು.

ಸೆ.19: ಕೆದಿಲ ಶ್ರೀರಾಮ ಭಜನಾ ಮಂದಿರಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ

ಕೆದಿಲ ಶ್ರೀರಾಮ ಭಜನಾ ಮಂದಿರಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆ.19 ಅಂಗಾರೆ ನಡಪರೆ ಉಂಡು.

ಈ ಲೇಸ್ಗ್ ಮಾತೆರ್ನಾಲ ಸಹಕಾರ ಬೋಡು ಪಂದ್ ಕೆದಿಲ ಶ್ರೀರಾಮ ಭಜನಾ ಮಂದಿರದ ಅಧ್ಯಕ್ಷೆರ್ ಅಶ್ವತ್ ಕಾಂತುಕೋಡಿ, ಕಾರ್ಯದರ್ಶಿ ರಾಮಕೃಷ್ಣ ಗೌಡ ವಳಂಕುಮೇರಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.