ತಿರುಪತಿ ವೆಂಕಟೇಶ್ವರ ದೇವಲ್ಯಗ್ ಕರಿನ 7 ತಿಂಗೊಲ್ಡ್ ಭಾರೀ ಕಾಣಿಕೆ ಬೈದ್ಂಡ್.
ಕಾಣಿಕೆದ ಬಿಲೆ 827 ಕೋಟಿ ರೂ. ಆತ್ಂಡ್. ಜುಲೈ ತಿಂಗೊಲ್ ಒಂಜೇಟ್ ಸುಮಾರ್ 23 ಲಕ್ಷ ಭಕ್ತೆರ್ ಈ ದೇವಲ್ಯಗ್ ಬೈದೆರ್ ಪಂದ್ ವರದಿ ಆತ್ಂಡ್. ಈ ದೇವಲ್ಯನ್ ಪ್ರಪಂಚದ ಮಾಸ್ತ್ ಮಲ್ಲ ಶ್ರೀಮಂತ ದೇವಲ್ಯ ಪಂದ್ ಲೆಪ್ಪೋಲಿ. ಈ ದೇವಲ್ಯಗ್ ಪ್ರತಿ ವರ್ಷ ಕಾಸ್ ದ ಕಾಣಿಕೆ ಬೊಕ್ಕ ಲಡ್ಡು ಮಾರುನೆರ್ದ್ ಆದಾಯ ಬರ್ಪುಂಡು.
ಹಿಂದೂ ಧರ್ಮಗ್ರಂಥವಾಯಿನ ‘ಮಹಾಭಾರತ’ದ ಭಾಗ ಆತಿನ ‘ಭಗವದ್ಗೀತೆ’ನ್ ತುಳು ಲಿಪಿನ್ ಬಳಸಾದ್ ಅನುವಾದ ಮಲ್ತ್ ದೆರ್.. ಈ ಪುಸ್ತಕನ್ ಶ್ರೀ ಕ್ಷೇತ್ರ ನರಸಿಂಹ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮಿಲು, ವಿದ್ವಾಂಸ ಲಕ್ಷ್ಮೀಶ ತೋಳ್ಪಾಡಿ ಬೊಕ್ಕ ಸುಬ್ರಹ್ಮಣ್ಯ ಮಠದ ವೇದವ್ಯಾಸ ಸಂಶೋದನಾ ಕೇಂದ್ರದ ಆನಂದತೀರ್ಥ ಸಗ್ರಿ ಅರೆನ ಸಮ್ಮುಖಡ್ ಪುಸ್ತಕ ಬಿಡುಗಡೆ ಮಲ್ತ್ ದೆರ್.
ಕೋವಿಡ್ ಸಮಯಡ್ ಇಲ್ಲಲೆ ಇತ್ತಿನ ಪೊರ್ತುಡ್ ಅಪರ್ಣಾ ಕೊಡಂಕೇರಿ ತನ್ನ ಅಣ್ಣೆ ಮುಕುಂದ ಕಲ್ಪಾದ್ ಕೊರ್ನ ತುಳು ಲಿಪಿನ್ ಅಭ್ಯಾಸ ಮಲ್ತ್ ಬರೆಯೆರೆ ಶುರು ಮಲ್ತೆರ್.
ಪುಸ್ತಕದ ಪ್ರತೀ ಪುಟಟ್ ಎಡ ಭಾಗಡ್ ಸಂಪೂರ್ಣ ತುಳು ಲಿಪಿನ್ ಬಳಕೆ ಮಲ್ತ್ ಶ್ಲೋಕ ಬೊಕ್ಕ ಸಾರನ್ ಬರೆತೆರ್. ಬಲ ಭಾಗಡ್ ಕನ್ನಡ ಲಿಪಿ ಬಳಕೆ ಮಲ್ತ್ ತುಳುಟ್ ಶ್ಲೋಕದ ಅರ್ಥನ್ ಬರೆತೆರ್. ತುಳು ಲಿಪಿಟ್ ಭಗವದ್ಗೀತೆನ್ ಬರೆತಿನ ಉಂದುವೆ ಫಸ್ಟ್. ತುಳು ಭಾಷೆದ ಬೆಳವಣಿಗೆಗ್ ಅಪರ್ಣಾ ಕೊಡಂಕೇರಿ ಈ ಸಾಧನೆದ ಮೂಲಕ ಕೊಡುಗೆ ಕೊರ್ತೆರ್.
ಲಯನ್ಸ್ ಕ್ಲಬ್ ಪಂಜ ನೆತ್ತ ಮುತಾಲಿಕೆಡ್ ನೇಜಿ ನಾಟಿ ಬೊಕ್ಕ ಮಾಹಿತಿ ಕಾರ್ಯ ಲೇಸ್ ಸುರೇಶ್ ಕುಮಾರ್ ನಡ್ಕ ನೆರೆನ ಕಂಡಡ್ ಆ.2 ತಾರೀಕ್ಗ್ ನಡತ್ಂಡ್.
ಸಂಪನ್ಮೂಲ ವ್ಯಕ್ತಿಯಾದ್ ಜೆ.ಸಿ.ಐ ದ ವಲಯ ತರಬೇತುದಾರರಾಯಿನ ಜೇಸಿ ತೀರ್ಥನಂದ ಕೊಡಂಕಿರಿ ಮಾಹಿತಿ ಕೊರಿಯೆರ್. ಪ್ರಕೃತಿ ಯುವತಿ ಮಂಡಲ ಸದಸ್ಯೆರ್ ಪಾಲ್ ಪಡೆದ್ ಈ ಮಾಹಿತಿದ ಪ್ರಯೋಜನನ್ ಪಡೆಯೊಂಡೆರ್. ಶಾಲೆದ ಸ್ಕೌಟ್ ಬೊಕ್ಕ ಗೈಡ್ ಜೋಕ್ಲೆಗ್ ವಿಶೇಷ ತರಬೇತಿ ಬೊಕ್ಕ ಪ್ರಾತ್ಯಕ್ಷಿಕೆ ಕೊರಿಯೆರ್.
ಲೇಸ್ದ ಗುರ್ಕಾರ್ಮೆನ್ ಲಯನ್ಸ್ ದಿಲೀಪ್ ಬಾಬ್ಲುಬೆಟ್ಟು ವಹಿಸೊಂಡೆರ್. ಬಿನ್ನೆರಾದ್ ವಲಯಧ್ಯಕ್ಷೆರ್ ಸಂತೋಷ್ ಜಾಕೆ, ತರಬೇತುದಾರರಾದ್ ಜೇಸಿ ತೀರ್ಥನಂದ ಕೊಡಂಕಿರಿ, ಪ್ರಕೃತಿ ಯುವತಿ ಮಂಡಲ ಉಪಾಧ್ಯಕ್ಷೆರ್ ರಾಜೀವಿ ರೈ, ಲೇಸ್ದ ಪ್ರಯೋಜಕೆರ್ ಆಯಿನ ಲಯನ್ ಸುರೇಶ್ ಕುಮಾರ್ ನಡ್ಕ ಬೊಕ್ಕ ಖಜಾಂಜಿ ಲ|| ಆನಂದ ಗೌಡ ಜಳಕದಹೊಳೆ, ವಾಸುದೇವ ಮೇಲ್ಪಾಡಿ ಲೇಸ್ಡ್ ಪಾಲ್ ಪಡೆದ್ ಇತ್ತೆರ್.
ಲ|| ಕುಸುಮಾಧರ ಕೆಮ್ಮೂರು ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಲ|| ವಾಸುದೇವ ಮೇಲ್ಪಾಡಿ ಸೊಲ್ಮೆ ಸಂದೈತ ಮಲ್ತೆರ್.
ಏಷ್ಯನ್ ಚಾಂಪಿಯನ್ ಶಿಪ್ ಹಾಕಿ ಪಂತೊ ಇನಿ ಚೆನ್ನೈದ ರಾಧಾಕೃಷ್ಣನ್ ಕ್ರೀಡಾಂಗಣಡ್ ನಡಪರೆ ಉಂಡು.
ಈ ಟೂರ್ನಿ ಆಗಸ್ಟ್ 12 ಮುಟ್ಟ ನಡಪರೆ ಉಂಡು. ಭಾರತ, ಪಾಕಿಸ್ತಾನ, ಕೊರಿಯಾ, ಚೀನಾ, ಮಲೇಷ್ಯಾ ಬೊಕ್ಕ ಜಪಾನ್ ಕೂಟಲು ಪಾಲ್ ಪಡೆಯರೆ ಉಂಡು. ಸುರುತ್ತ ಪಂತೊಡು ಜಪಾನ್ ಕೂಟ, ಹಾಲಿ ಚಾಂಪಿಯನ್ ಕೊರಿಯಾದೊಟ್ಟುಗು ಗೊಬ್ಬೆರೆ ಉಂಡು. ರಾತ್ರೆ 8:30 ಕ್ಕ್ ನಡಪರೆ ಇಪ್ಪುನ ಮೂಜಿನೇ ಲೀಗ್ ಪಂತೊಡು ಭಾರತ, ಚೀನಾ ಕೂಟದಕ್ಲೆನೊಟ್ಟುಗು ಗೊಬ್ಬೆರೆ ಉಂಡು.
ಕಿನ್ನಿಗೋಳಿ: ಭಾರತದ ಸಂಸ್ಕೃತಿದ ಮಾತ ಕಲೆರ್ದ್ ನಮ್ಮ ತುಳುನಾಡ್ ದ ಗಂಡುಕಲೆ ಆಟ ಇಸೇಸಲೆಡ್ ವಿಶಿಷ್ಟ ಕಲೆ ಆತ್ಂಡ್. ಈ ಯಕ್ಷಗಾನ ಕಲೆಟ್ಟ್ ಲಯಬದ್ದವಾದ್ ಪದ ಪನ್ಪುನವು , ವೇಷಗಾರಿಕೆ, ನೃತ್ಯ, ಸ್ಪಷ್ಟ ಉಚ್ಚಾರದ ಮಾತುಗಾರಿಕೆ ಬೊಕ್ಕ ದೈಹಿಕ ವ್ಯಾಯಾಮ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.
ಮೇರ್ ಕಿನ್ನಿಗೋಳಿ ಕೈತಲ್ ದ ಕಮ್ಮಾಜೆದ ಮೊರಾರ್ಜಿ ದೇಸಾಯಿ ವಸತಿ ಶಾಲೆದ ಯಕ್ಷ ಶಿಕ್ಷಣ ಉದಿಪನ ಲೇಸ್ ಡ್ ಪಾತೆರ್ದ್, ಯಕ್ಷಗಾನ ಕಲ್ಪರೆ ಎಕುಲು ಕ್ಲಾಸ್ ನಾಡೊಂದು ಪೋಪುನ ಪೊರ್ತುಡು ಶಾಲೆಗ್ ಬತ್ತ್ ದ್ ಆಟ ಕಲ್ಪಾಯೆರೆ ದುಂಬು ಬತ್ತಿನ ಪಟ್ಲ ಸತೀಶ್ ಶೆಟ್ಟಿ ಮೆರೆನ್ ಬೊಕ್ಕ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಕಾರ್ಯನ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.
ಈ ಪೊರ್ತುಡು ಯಕ್ಷಗಾನ ವಿದ್ವಾಂಸೆರ್ ಡಾ. ಪ್ರಭಾಕರ ಜೋಷಿ, ಎಂ.ಎಲ್ ಸಾಮಗ, ಯಕ್ಷ ಶಿಕ್ಷಣದ ರೂವಾರಿ ಬೊಕ್ಕ ಸಂಚಾಲಕೆರ್ ಪಣಂಬೂರು ವಾಸು ಐತಾಳ್, ಯುಗಪುರುಷದ ಭುವನಾಭಿರಾಮ ಉಡುಪ, ಬಿಸಿಎಂ ಇಲಾಖೆದ ಜಿಲ್ಲಾ ಅಧಿಕಾರಿ ಸಚಿನ್ ಕುಮಾರ್, ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ ಸಿಎ ಸುದೇಶ್ ಕುಮಾರ್ ರೈ, ಶಾಲೆದ ಪ್ರಿನ್ಸಿಪಾಲ್ ಪುಟ್ಟಸ್ವಾಮಿ ಇತ್ತೆರ್.
ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆಗ್ ಮಾನಾದಿಗೆ ನಡತ್ಂಡ್. ಚಿತ್ರಕಲೆ ಶಿಕ್ಷಕೆರ್ ಭವನ್ ಪಿ.ಜಿ ಮೇರ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆನ ಚಿತ್ರ ಬುಡ್ಪಾದ್ ಆಯಿನ್ ಶಾಸಕೆರೆಗ್ ಕೊರಿಯೆರ್. ಮುಂಡಾಜೆ ಮೊರಾರ್ಜಿ ದೇಸಾಯಿ ವಸತಿ ಶಾಲೆದ ಪ್ರಾಂಶುಪಾಲೆರ್ ಮುರಳೀಧರ್ ಜಿ.ಎನ್ ಎದ್ಕೊನಿಯೆರ್. ಶಿಕ್ಷಕೆರ್ ಮಂಜುನಾಥ ಕೆ ಸೊಲ್ಮೆ ಸಂದಾಯೆರ್. ಶಿಕ್ಷಕೆರ್ ಪ್ರವೀಣ್ ಪೂಜಾರಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್.
ಸಿಎಂ ಸಿದ್ದರಾಮಯ್ಯ ಮೆರೆಗ್ ಇನಿ 76 ನೇ ವರ್ಷದ ಪುಟ್ಟುಪರ್ಬದ ಗೌಜಿ.
1947 ನೇ ಇಸವಿ ಆಗಸ್ಟ್ 3 ಕ್ಕ್ ಮೈಸೂರ್ ದ ವರುಣಾದಲ್ಪ ಇಪ್ಪುನ ಸಿದ್ದರಾಮನ ಹುಂಡಿಡ್ ಮೇರ್ ಪುಟ್ಟುದೆರ್. ಹಂತ ಹಂತವಾದ್ ರಾಜಕೀಯ ಕ್ಷೇತ್ತೊಡು ಬುಲೆಯಿನ ಮೇರ್ 2 ಸರ್ತಿ ಕರ್ನಾಟಕದ ಮುಖ್ಯಮಂತ್ರಿ ಆತೆರ್.
ಅತ್ತಂದೆ ಕ್ಷೀರಭಾಗ್ಯ, ಅನ್ನಭಾಗ್ಯ, ಗೃಹಜ್ಯೋತಿ, ಗೃಹಲಕ್ಷ್ಮೀ ದಂಚಿನ ಯೋಜನೆನ್ ಜಾರಿಗ್ ಕನ್ಪುನೆಟ್ಟ್ ಮಲ್ಲ ಪಾತ್ರ ಮೆರೆನ ಉಂಡು. 9 ಸರ್ತಿ ಕರ್ನಾಟಕ (ಉಪಚುನಾವಣೆ ಸೇರ್ದ್) ವಿಧಾನಸಭೆಗ್ ಜನಕ್ಲೆರ್ದ್ ಆಯ್ಕೆಯಾಯಿನ ರಾಜಕಾರಣಿ ಮೇರ್.
ಕುಡ್ಲ: ವೀರರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘದ ಮುತಾಲಿಕೆಡ್ ಡಾ. ಅಕ್ಷತಾ ಆದರ್ಶ್ ಮೆರೆಗ್ ಮಾನಾದಿಗೆ ಲೇಸ್ ಇಂಚೊಗು ನಡತ್ಂಡ್.
ಮಾನಾದಿಗೆ ಸ್ವೀಕಾರ ಮಲ್ತ್ದ್ ಪಾತೆರ್ನ ಡಾ. ಅಕ್ಷತಾ ಆದರ್ಶ್, ಇನಿ ವೀರರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘದ ಮುತಾಲಿಕೆಡ್ ಎಂಕ್ ಭಾರೀ ಪ್ರೀತಿಡ್ ಸನ್ಮಾನ ಮಲ್ದರ್. ಆಂಡ ಎಂಕ್ ಸನ್ಮಾನ ಪಂಡ ಒಂಜಿ ರೀತಿದ ಪೋಡಿಗೆ, ದಾಯೆ ಪಂಡ ಸನ್ಮಾನ ಮಲ್ತ್ಂಡ ಸಮಾಜಡ್ ಜಬದಾರಿ ಎಚ್ಚಾಪುಂಡು ಪನ್ಪುನ ಭಾವನೆ. ಆಂಡಲ ನಿಕುಲು ಪೂರ ಸೇರ್ದ್ ಎಂಕ್ ಸನ್ಮಾನ ಮಲ್ದರ್. ನಿಕ್ಲೆನ ಈ ಪ್ರೀತಿಗ್ ಯಾನ್ ಸೊಲ್ಮೆ ಸಂದಾವೆ ಪಂದ್ ಪಂಡೆರ್. ಅಂಚೆನೆ ಎನ್ನ ಈ ಸಾಧನೆದ ಪಿರವುಡು ಸುಮಾರ್ ಜನತ್ತ ಸಹಕಾರ ಉಂಡು, ಪ್ರೋತ್ಸಾಹ ಉಂಡು. ಮೊಕ್ಲೆನ್ ಯಾನ್ ಈ ಪೊರ್ತುಡು ನೆಂಪು ಮಲ್ತಿಜಿಂಡ ತಪ್ಪಾಪುಂಡು. ದಾಯೇ ಪಂಡ ಎಂಕ್ ಇಡೆ ಮುಟ್ಟ ಮಾತ ಇಸಯಡ್ಲಾ ಸಪೋರ್ಟ್ ಮಲ್ತಿನ ಎನ್ನ ಇಲ್ಲಲ್ದಕುಲು, ಪೊಪ್ಪ ಅಮ್ಮ, ಕಂಡನಿ, ಮಾಮಿ ಮಾಮು, ಸಂಬಂಧಿಕೆರ್, ದೋಸ್ತಿಲು, ಸಮಾಜದಕುಲು ಅತ್ತಂದೆ, ಧರ್ಮಸ್ಥಳ ಮಂಜುನಾಥೇಶ್ವರ ಕಾಲೇಜ್ದ ಮ್ಯಾನೇಜ್ ಮೆಂಟ್ದಕುಲು, ಗುರುಕುಲು, ಲೈಬ್ರೆರಿಯನ್ ಸಂತೋಷ್, ಲೆಕ್ಚರರ್ ಬಾಲಿಕ, ಅಜ್ಜ ಅಜ್ಜಿ, ಅಲೈಯನ್ಸ್ ಯುನಿವರ್ಸಿಟಿ, ಬೊಕ್ಕ ಎನ್ನ ಸಂಶೋಧನೆಗ್ ಸಹಕಾರ ಕೊರ್ನ ದಿಲ್ಲಿ ಯುನಿವರ್ಸಿಟಿ ಲೈಬ್ರೆರಿದಕ್ಲೆನ್ ನೆಂಪು ಮಲ್ತೊಂದು, ನಿಕ್ಲೆನ ಮಾತೆರೆಗ್ಲಾ ಈ ಪೊರ್ತುಡು ಚಿರಋಣಿ ಆದಿಪ್ಪುವೆ. ಎಂಕ್ ನಿಕ್ಲೆನ ಪ್ರೀತಿ ಈ ಡಾಕ್ಟರೇಟ್ ಪದವಿರ್ದ್ಲ ಮಸ್ತ್ ಮಲ್ಲ. ಅಂಚಾದ್ ನಿಕ್ಲೆಗ್ ಮಾತೆರೆಗ್ಲಾ ಸೊಲ್ಮೆ ಸಂದಾವೆ ಪಂದ್ ಪಂಡೆರ್.
ಉತ್ತರ ಕನ್ನಡ: ಕಾರವಾರ ತಾಲೂಕ್ ದ ಸಿದ್ಧರ ಗ್ರಾಮಡ್ ಮೊಬೈಲ್ ಚಾರ್ಜ್ ದ ವಯರ್ ಡ್ ಕರೆಂಟ್ ಶಾಕ್ ಹಾಕ್ ದ್ ಎಡ್ಮ ತಿಂಗೊಲ್ದ ಬಾಲೆ ತೀರ್ ಪೋಯಿನ ಘಟನೆ ನಡತ್ಂಡ್.
ತೀರ್ ಪೋಯಿನ ಬಾಲೆ ಸಂಜನಾ ಪಂದ್ ತೆರಿದ್ ಬೈದ್ಂಡ್.
ಇಲ್ಲದಕುಲ್ ಮೊಬೈಲ್ ಚಾರ್ಜ್ ಗ್ ಪಾರ್ದ್ ಅವೆನ್ ಆಫ್ ಮಲ್ಪಂದೆ ದೀದ್ ಇತ್ತೆರ್. ಈ ಪೊರ್ತುಡು ಚಾರ್ಜರ್ ವಯರ್ ನ್ ಬಾಯಿಗ್ ಪಾಡ್ ನಗ ಐಟ್ ಕರೆಂಟ್ ಬತ್ ದ್ ಶಾಕ್ ಹಾಕ್ ದ್ ಬಾಲೆ ತೀರ್ ಪೋತುಂಡು ಪಂದ್ ತೆರಿದ್ ಬೈದ್ಂಡ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಮುತಾಲಿಕೆಡ್ ‘ಚಿಣ್ಣರ ದನಿ ಲೇಸ್ ಆ.2 ಕ್ಕ್ ಬುಧಾರ ಬಯ್ಯಗ್ 5.30 ಕ್ಕ್ ನಡಪರೆ ಉಂಡು.
ಆ.3 ಗುರುವಾರ ಮಧ್ಯಾಹ್ನ 1.30 ಕುಡೊರ ಪ್ರಸಾರ ಆಪುಂಡು. ಇನಿ ಪ್ರಸಾರ ಆಪುನ ಲೇಸ್ ದ 20ನೇ ಸಂಚಿಕೆಡ್ ಬಾಲ ಪ್ರತಿಭೆ ಶ್ಲೋಕ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ರೇಡಿಯೊ ಮಣಿಪಾಲದ ಪ್ರಕಟಣೆ ತೆರಿಪಾದ್ಂಡ್.
ಒಡಿಪು: ಕಾರ್ ಡ್ ಪೋವೊಂದು ಇತ್ತಿನ ವೈದ್ಯೆರ್ ಬೊಕ್ಕ ಪ್ರಾಧ್ಯಾಪಕೆರೆನ್ ಉಂತಾದ್ ಅನೈತಿಕ ಪೊಲೀಸ್ಗಿರಿ ನಡಪಾಯಿನ ಆರೋಪದ ಮಿತ್ತ್ 5 ಜನ ಹಿಂದೂ ಜಾಗರಣಾ ವೇದಿಕೆದ ಕಾರ್ಯಕರ್ತೆರೆನ್ ಕಾರ್ಲ ಪೇಂಟೆದ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಸಂತೋಷ್ ನಂದಳಿಕೆ, ಕಾರ್ತಿಕ್ ಪೂಜಾರಿ, ಸುನೀಲ್ ಮೂಲ್ಯ ಮಿಯ್ಯಾರು, ಸಂದೀಪ್ ಪೂಜಾರಿ ಮಿಯ್ಯಾರು, ಸುಜಿತ್ ಸಫಲಿಗೆ ತೆಳ್ಳಾರು ಆರೆಸ್ಟ್ ಆಯಿನಕುಲು. ಜು.29 ಕ್ಕ್ ನಡತಿನ ಘಟನೆ 5 ದಿನತ್ತ ಬೊಕ್ಕ ಗೊತ್ತಾತ್ಂಡ್. ಈ ಬಗೆಟ್ಟ್ ಪೊಲಬು ತೆರಿನ ಕೂಡ್ಲೆ ಜಾಗೆಗ್ ಬತ್ತಿನ ಕಾರ್ಲ ಡಿವೈಎಸ್ಪಿ ಅರವಿಂದ ಕಲ್ಲಗುಡ್ಡೆ, ಪೊಲೀಸ್ ವೃತ್ತ ನಿರೀಕ್ಷಕೆರ್ ನಾಗರಾಜ್, ಎಸ್ಕೆ ಸಂದೀಪ್ ಶೆಟ್ಟಿ 5 ಜನಕ್ಕ್ ವಶಕ್ಕ್ ಪಡೆತೆರ್. ಈ ಬಗೆಟ್ಟ್ ಕಾರ್ಲ ಗ್ರಾಮಾಂತರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
