August 2023

ರಾಜ್ಯದ ಸುರುತ್ತ ಪೊಂಜೋವ್ ಕಮಿಷನರ್ ರೇಣುಕಾ ಐಪಿಎಸ್!

ಹುಬ್ಬಳ್ಳಿ- ಧಾರವಾಡ ಕಮಿಷನರೇಟ್ ಗ್ ಪೊಲೀಸ್ ಆಯುಕ್ತೆರಾದ್ ರೇಣುಕಾ ಸುಕುಮಾರ್ ಮೇರ್ ಅಧಿಕಾರ ಸ್ವೀಕಾರ ಮಲ್ತೆರ್.

ಮೇರ್ ಈ ಮುಖೇನ ರಾಜ್ಯದ ಸುರುತ್ತ ಪೊಂಜೋವ್ ಕಮಿಷನರ್ ಪನ್ಪುನ ಗೌರವಗ್ ಪಾತ್ರರಾತೆರ್. ನೆರ್ದ್ ದುಂಬು ಐಪಿಎಸ್ ಅಧಿಕಾರಿ ರೇಣುಕಾ ಸುಕುಮಾರ್ ಮೇರ್ ಧಾರವಾಡ ಕಮಿಷನರೇಟ್ ಡ್ ಡಿಸಿಪಿಯಾದ್ ಸೇವೆ ಸಂದಾದೆರ್.

ಇತ್ತೆ ಅವ್ವೆ ಜಾಗೆಡ್ ಪೊಲೀಸ್ ಕಮಿಷನರಾದ್ ನೇಮಕ ಆಯಿನವು ಅಚ್ಚರಿದ ಇಸಯ ಆತ್ಂಡ್. ಈ ಪೊರ್ತುಡು ಮೇರ್ ಪಾತೆರ್ದ್, ಪೊಂಜೋವ್ ಲೆನ ಸುರಕ್ಷತೆಗ್ ಗೇನ ಕೊರ್ಪೆ. ಬೊಕ್ಕ ರೌಡಿಲೆಗ್ ಸರಿಯಾಯಿನ ಬುದ್ದಿ ಕಲ್ಪಾವೆ ಪಂದ್ ಪಂತೆರ್.

ಅಂಡಮಾನ್ ನಿಕೋಬಾರ್ ಡ್ 4.3 ಬಿರ್ಸ್ ದ ಭೂಕಂಪ

ಅಂಡಮಾನ್ ನಿಕೋಬಾರ್ ಡ್ ಇನಿ ಬೊಲ್ಪುಗು 4.3 ಬಿರ್ಸ್ ದ ಭೂಕಂಪ ಆತ್ಂಡ್.

ಆಂಡ ಈ ಭೂಕಂಪರ್ದ್ ಒವ್ವೇ ಪ್ರಾಣಹಾನಿ ಅತ್ತಂಡ ಆಸ್ತಿಪಾಸ್ತಿ ನಷ್ಟ ಆಯಿನ ಬಗೆಟ್ಟ್ ಒವ್ವೇ ಪೊಲಬು ತಿಕ್ ದಿಜಿ ಪಂದ್ ವರದಿ ಆತ್ಂಡ್.

ಆ.15: ತೋಕೂರು ಸ್ಪೋರ್ಟ್ಸ್ ಕ್ಲಬ್ ಡ್ ಸ್ವಾತಂತ್ರ್ಯ ದಿನಾಚರಣೆ, ನಿವೃತ್ತ ಯೋಧೆರೆಗ್ ಮಾನಾದಿಗೆ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ.) ದ ಮುತಾಲಿಕೆಡ್ ಸ್ವಾತಂತ್ರ್ಯ ದಿನಾಚರಣೆ ಬೊಕ್ಕ ನಿವೃತ್ತ ಯೋಧೆರೆಗ್ ಮಾನಾದಿಗೆ ಲೇಸ್ ಆ.15 ಅಂಗಾರೆ ಬೊಲ್ಪುಗು ತೋಕೂರ್ ಸ್ಪೋರ್ಟ್ಸ್ ಕ್ಲಬ್ ಡ್ ನಡಪರೆ ಉಂಡು.

ಈ ಲೇಸ್ ದೊಟ್ಟಿಗೆ ಸರಕಾರಿ ಹಿರಿಯ ಪ್ರಾಥಮಿಕ ಹಿಂದುಸ್ಥಾನಿ ಶಾಲೆ ತೋಕೂರು ಮುಲ್ಪದ ಕಲ್ಪಾರ್ಥಿಲೆಗ್ ಸ್ಕೂಲ್ ಬ್ಯಾಗ್, ಐಡಿ ಕಾರ್ಡ್ ಬೊಕ್ಕ ಕಂಪಾಸ್ ಬಾಕ್ಸ್ ಪಟ್ಟುನ ಲೇಸ್, ಗೊಬ್ಬುಲೆನ ಪಂತೊದ ಇನಾಮು ಕೊರ್ಪುನ ಲೇಸ್ ನಡಪರೆ ಉಂಡು.

ಈ ಮಾತ ಲೇಸ್ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ, ಗ್ರಾಮ ಪಂಚಾಯತ್ ಪಡುಪಣಂಬೂರು, ತಾಲೂಕ್ ಬೊಕ್ಕ ಜಿಲ್ಲಾ ಯುವ ಜನ ಒಕ್ಕೂಟ ನೆತ್ತ ಮಾರ್ಗದರ್ಶನಡ್ ನಡಪುಂಡು.

ಅಂಚೆನೆ ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಆರ್ ಕೆ ಟೈಲರ್, ತುಳು ರಂಗಭೂಮಿ ನಿರ್ದೇಶಕೆರ್ ನರೇಂದ್ರ ಕಿರೋಡಿಯನ್ ಒಯಿಸೊನ್ವೆರ್. ನಿವೃತ್ತ ಯೋಧೆರ್ ಹವಾಲ್ದಾರ್ ಚಂದ್ರಶೇಖರ್ ರಾಷ್ಟ್ರದ ಕೊಡಿ ಅರಲ್ಪಾವೆರ್. ಬೊಕ್ಕ ಮೆರೆಗ್ ಸನ್ಮಾನ ನಡಪರೆ ಉಂಡು. ಈ ಲೇಸ್ ಡ್ ಸೂರ್ಯಕಾಂತಿ ಚಾರಿಟೇಬಲ್ ಫೌಂಡೇಶನ್ ದ ಅಧ್ಯಕ್ಷೆರ್, ನವನಿಧಿ ವಿವಿಧೋದ್ದೇಶ ಸಹಕಾರ ಸಂಘದ ನಿರ್ದೇಶಕೆರ್ ವಿದ್ಯಾ ರಾಕೇಶ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕ್ಲಬ್ ದ ಅಧ್ಯಕ್ಷೆರ್ ಜಗದೀಶ್ ಕುಲಾಲ್, ಗೌರವಾಧ್ಯಕ್ಷೆರ್ ಪ್ರಶಾಂತ್ ಕುಮಾರ್ ಬೇಕಲ್, ಗೌರವ ಪ್ರಧಾನ ಕಾರ್ಯದರ್ಶಿ ದೀಪಕ್ ಸುವರ್ಣ, ಕೋಶಾಧಿಕಾರಿ ಪದ್ಮನಾಭ ಶೆಟ್ಟಿ, ಕಾರ್ಯಾಧ್ಯಕ್ಷೆರ್ ಸಂತೋಷ್ ದೇವಾಡಿಗ, ಮಹಿಳಾ ಕಾರ್ಯಾಧ್ಯಕ್ಷೆರ್ ಯಶೋಧ ದೇವಾಡಿಗ ಬೊಕ್ಕ ಗೌರವ ಮಾರ್ಗದರ್ಶಕೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ನನ ಸರ್ಕಾರಿ ಆಸ್ಪತ್ರೆಡ್ ಧರ್ಮಾರ್ಥ ಎಂಅರ್ ಐ, ಸಿಟಿ ಸ್ಕ್ಯಾನಿಂಗ್

ಸರ್ಕಾರಿ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಬೊಕ್ಕ ಎಂಆರ್ ಐ ಸ್ಕ್ಯಾನ್ ಸೇವೆನ್ ಮಾತೆರೆಗ್ಲಾ ಧರ್ಮೊಗು ಕೊರಿಯೆರೆ ಸರ್ಕಾರ ದುಂಬಾತ್ಂಡ್.

15 ಜಿಲ್ಲಾಸ್ಪತ್ರೆಡ್ ಎಂಆರ್‌ಐ ಸ್ಕ್ಯಾನ್ ಬೊಕ್ಕ 5 ಜಿಲ್ಲಾ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಸೇವೆನ್ ಕೊರಿಯೆರೆ ಆಪುಂಡು ಪಂದ್ ಸಚಿವೆರ್ ಎಚ್.ಕೆ ಪಾಟೀಲ್ ತೆರಿಪಾದೆರ್.

ಮೈಸೂರ್, ಚಿತ್ರದುರ್ಗ, ಕುಡ್ಲ, ಬೆಂಗ್ಲೂರ್ ದ ಸಿ.ವಿ ರಾಮನ್, ಕೆ.ಸಿ ಜನರಲ್ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಯಂತ್ರನ್ ಪಾಡಿಯೆರೆ ಉಂಡು.

ಕೆ ವಿ ಜಿ ಬ್ಯಾಂಕ್: ರಿಟೇಲ್ ಸಾಲದ ಬೇಗ ವಿಲೇವಾರಿಗ್ ಇಸೇಸ ಘಟಕ

ಕುಡ್ಲ: ಇಲ್ಲ್ ದ ಸಾಲ ಬೊಕ್ಕ ಗಾಡಿದ ಸಾಲ ಇಪ್ಪುನ ರಿಟೇಲ್‌ ಬ್ಯಾಂಕಿಂಗ್ ವ್ಯವಹಾರಗ್ ಎಚ್ಚದ ಒತ್ತು ಕೊರ್ಪುನ ದೃಷ್ಟಿರ್ದ್ ಬೊಕ್ಕ ಶಾಖೆಡ್ ಸಾಲದ ಪ್ರಸ್ತಾವನೆದ ಬೇಗ ವಿಲೇವಾರಿಗ್ ಸಂಬಂಧ ಪಟ್ಟಿನಂಚೆನೆ ಕೆನರಾ ಬ್ಯಾಂಕ್ ಪ್ರವರ್ತಿತ ಸರ್ಕಾರಿ ಸ್ವಾಮಿತ್ವದ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ರಿಟೇಲ್ ಸಾಲದ ಸಂಸ್ಕರಣಾ ಕೇಂದ್ರನ್ ಕುಡ್ಲ ಡ್ ಸುರು ಮಲ್ದ್ಂಡ್.

ಈ ಸಾಲ ಬೇಗ ವಿಲೇವಾರಿ ಘಟಕನ್ ಗುರುವಾರ ಬ್ಯಾಂಕ್ ದ ಮಹಾ ಪ್ರಬಂಧಕೆರ್ ಆರ್ ಟಿ ಕಾಂಬ್ಳೆ ಕುಡ್ಲಡ್ ಇಪ್ಪುನ ತನ್ನ ಬ್ಯಾಂಕ್ ದ ಪ್ರಾದೇಶಿಕ ಕಾರ್ಯಾಲಯದ ಪ್ರಾಂಗಣಡ್ ಉದಿಪನ ಮಲ್ತೆರ್.

ಈ ಪೊರ್ತುಡು ಪಾತೆರಿನ ಬ್ಯಾಂಕ್ ದ ಮೇರ್, ಇಲ್ಲದ ಸಾಲ, ಗಾಡಿದ ಸಾಲ, ಶೈಕ್ಷಣಿಕ ಸಾಲ, ಆಸ್ತಿ ಅಡಮಾನ ಸಾಲ ಇಂಚ ರಿಟೇಲ್ ಸಾಲದ ಪ್ರಸ್ತಾವನೆನ್ ತ್ವರಿತವಾದ್ ವಿಲೇವಾರಿ ಮಲ್ತ್ ದ್ ಗ್ರಾಹಕೆರೆಗ್ ಎಚ್ಚದ ಅನುಕೂಲ ಮಲ್ತ್ ದ್ ಕೊರಿಯೆರೆ ಈ ಕೇಂದ್ರನ್ ಸುರು ಮಲ್ದ್ಂಡ್. ಶಾಖೆಲು, ಸುರುತ್ತ ಅವಶ್ಯಕ ಅಗತ್ಯ ದಾಖಲೆನ್ ಗ್ರಾಹಕೆರ್ದ್ ಸಂಗ್ರಹ ಮಲ್ಪುಂಡು. ಬೊಕ್ಕ ಈ ಕೇಂದ್ರಗ್ ರವಾನೆ ಮಲ್ಪುಂಡು.

ಈ ಕೇಂದ್ರಲು ಸಾಲ ಮಂಜೂರಾತಿ ಕಾರ್ಯನ್ ಜಾಸ್ತಿ ಮಲ್ತ್ ದ್ ಗರಿಷ್ಠ 3 ರ್ದ್ 4 ದಿನತ್ತ ಉಲಯಿ ಸಾಲ ಮಂಜೂರು ಕೊರ್ತುಂಡು ಪಂದ್ ಆರ್ ಟಿ ಕಾಂಬ್ಳೆ ತೆರಿಪಾಯೆರ್.

ನೆರ್ದ್ ಗ್ರಾಹಕೆರ್ ಕಾಪುನ ಪೊರ್ತು ಒರಿಪುಂಡು ಅತ್ತಂದೆ ಗ್ರಾಹಕೆರೆಗೆ ಕೂಡ್ಲೆ ಸಾಲ ಪಡೆಯೆರೆ ಅನುಕೂಲ ಆಪುಂಡು ಪಂದ್ ಪಂಡೆರ್. ಬ್ಯಾಂಕ್ ದ ರಿಟೇಲ್ ಸಾಲದ ಬಡ್ಡಿದರ ಮಸ್ತ್ ಸ್ಪರ್ಧಾತ್ಮಕ ಆತ್ಂಡ್. ಸದ್ಯಗ್ ಇಲ್ಲ್ ಸಾಲದ ಮಿತ್ತ್ ದ ಬಡ್ಡಿದರ 8.5 % ಉಂಡು ಪಂದ್ ಪಂಡೆರ್. ಇತ್ತೆ ಈ ಘಟಕದ ಕಾರ್ಯನ್ ತೂದು ನನದ ದಿನಟ್ಟ್ ಮಾತ ಜಿಲ್ಲೆಲು ಆಯ ಕೇಂದ್ರಡ್ ಇಂಚಿನ ಘಟಕ ಸ್ಥಾಪನೆ ಮಲ್ಪುವ ಪಂದ್ ಪಂಡೆರ್.

ಬ್ಯಾಂಕ್ ಈ ಕೇಂದ್ರದ ಮುಖೇನ ಉದಿಪನದ ದಿನನೇ 2.49 ಕೋಟಿ ರೂ. ಸಾಲ ಮಂಜೂರಾತಿ ಮಲ್ತಿನವು ಇಸೇಸ ಆತ್ಂಡ್ ಪಂದ್ ಬ್ಯಾಂಕ್ ದ ಕುಡ್ಲ ಪ್ರಾದೇಶಿಕ ವ್ಯವಸ್ಥಾಪಕೆರ್ ವಿಜಯ ಧೋತಿಹಾಳ ಪ್ರಾಸ್ತಾವಿಕವಾದ್ ಪಾತೆರಿಯೆರ್.

ಈ ಪೊರ್ತುಡು ಬ್ಯಾಂಕ್ ದ ನಿಕಟಪೂರ್ವ ಸಹಾಯಕೆರ್ ಮಹಾ ಪ್ರಬಂಧಕೆರ್ ಬಿ ಶೇಖರ ಶೆಟ್ಟಿ, ತ್ವರಿತ ಸಾಲ ಘಟಕದ ವ್ಯವಸ್ಥಾಪಕೆರ್ ರೋಶನ್‌ ಕುಮಾರ್ ಬೊಕ್ಕ ಅಧಿಕಾರಿಲು ಇತ್ತೆರ್.

ಫೋಟೋ ಶೀರ್ಷಿಕೆ:

ರಿಟೇಲ್ ಸಾಲದ ಪ್ರಸ್ತಾವನೆದ ಬೇಗ ವಿಲೇವಾರಿಗಾದ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಕುಡ್ಲಡ್ ಸುರು ಮಲ್ತಿನ ರಿಟೇಲ್ ಸಾಲದ ಸಂಸ್ಕರಣಾ ಕೇಂದ್ರನ್ ಬ್ಯಾಂಕ್ ದ ಮಹಾ ಪ್ರಬಂಧಕೆರ್ ಆರ್ ಟಿ ಕಾಂಬ್ಳೆ ಉದಿಪನ ಮಲ್ತೆರ್.