ರಡ್ಡ್ ಬೇಕರಿದ ಧಣಿಯೊರಿ, ಬೊಡೆದಿ, ಮಗಲ್ ಇಲ್ಲಲ್ ಇತ್ತಿನ ಪೊರ್ತುಡೇ ಬಾಡಿಗೆ ಇಲ್ಲಲ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಉಳ್ಳಾಲ ಪೊಲೀಸ್ ಠಾಣೆ ವ್ಯಾಪ್ತಿದ ಕುತ್ತಾರ್ ದ ಶಾಂತಿಬಾಗ್ ಡ್ ನಡತ್ಂಡ್.
ಹಾಸನ ಜಿಲ್ಲೆ ಹಳೇಬೀಡು ಮಾರ್ಗದ ಬಲ್ಲೇನಹಳ್ಳಿ ನಿವಾಸಿ ರುದ್ರೇಶ್ (36) ಆತ್ಮಹತ್ಯೆ ಮಲ್ತೊನ್ನಾರ್. ಮೆರೆಗ್ ಬೊಡೆದಿ, ಬೊಕ್ಕ 2 ಪೊಣ್ಣು ಜೋಕುಲು ಉಲ್ಲೆರ್.
ಮೆರೆನ ಆತ್ಮಹತ್ಯೆಗ್ ಕಾರಣ ನನ ತೆರಿದ್ ಬರೊಡಾತೆ. ಮೆರೆನ ಪುನನ್ ಉಳ್ಳಾಲ ಪೊಲೀಸೆರ್ ಮರಣೋತ್ತರ ಪರೀಕ್ಷೆಗ್ ಕೊನೊತೆರ್. ಈ ಬಗೆಟ್ಟ್ ಕೇಸ್ ದಾಖಲ್ ಆತ್ಂಡ್.
ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ಬೊಂಬೈ ನೆತ್ತ 45 ನೇ ಸಂಸ್ಥಾಪನಾ ದಿನಾಚರಣೆನ್ ಭಾರತ್ ಬ್ಯಾಂಕ್ ಬೆಂಗ್ಲೂರ್ ದ ಮಾಗಡಿ ರೋಡ್ ಶಾಖೆಡ್ ಆಚರಣೆ ಮಲ್ತೆರ್.
ಶಾಖೆದ ಮುಖ್ಯ ಪ್ರಬಂಧಕೆರ್ ಗೋಪಾಲ್ ಪೂಜಾರಿ, ಸಹ ಪ್ರಬಂಧಕೆರ್ ಹರಿಣಾಕ್ಷಿ ಚೇತನ್ ಸನಿಲ್, ಗ್ರಾಹಕೆರೆನೊಟ್ಟಿಗೆ ಸೇರ್ದ್ ತುಡರ್ ಅರ್ಲಾದ್, ಕೇಕ್ ಕಟ್ಟ್ ಮಲ್ಪುನ ಮುಖೇನ ಸಂಸ್ಥಾಪನಾ ದಿನನ್ ಇಸೇಸ ರೀತಿಡ್ ಆಚರಣೆ ಮಲ್ತೆರ್.
ಈ ಪೊರ್ತುಡು ಬ್ಯಾಂಕ್ ದ ಸಿಬ್ಬಂದಿಲು ಲತೀಶ್ ಶೆಟ್ಟಿ, ಪೂಜಾ, ಶಿವರಾಮ್, ಶ್ವೇತಾ, ಜಿ ಪೂಜಾರಿ, ರಾಕೇಶ್. ಕೆ ಪೂಜಾರಿ, ಆಶ್ವಿನ್ ಅಮೀನ್, ಸದಾನಂದ್ ಕಾರ್ಲ ಇತ್ತೆರ್.
ಜೈ ತುಲುನಾಡ್ ಸಂಘಟನೆದ ಮುತಾಲಿಕೆಡ್ ತುಳುಲಿಪಿತ್ತ ಪಲವೆನ್ ಕುಡ್ಲದ ಡಿಸಿ ಮುಲ್ಲೈ ಮುಹಿಲನ್ ಮೆರೆಗ್ ಒಪ್ಪಿಸಾವುನ ಸಂದರ್ಬೊಡು “ಎಂಕ್ಲಾ ತುಳು ಕಲ್ಪರೆ ಆಸೆ ಉಂಡು, ಕಲ್ಪಾಲೆ” ಪಂದ್ ಪಂಡೆರ್.
ತಮಿಳು, ತುಳು, ಮಲಯಾಳಂ ಉಂದು ಒಂಜೆಕ್ಕೊಂಜಿ ಕೂಡುದು ಬರ್ಪುನ ಭಾಷೆ, ತುಳು ಲಿಪಿಟ್ಟ್ ಬರೆತಿನೆನ್ ಓದಿನ ಮುಲೈ ಮುಗಿಲನ್ ಎಂಕ್ಲ ತುಳು ಕಲ್ಪರೆ ಮಸ್ತ್ ಆಸಕ್ತಿ ಉಂಡು, ಎಂಕ್ಲ ತುಳು ಕಲ್ಪಾಲೆ ಪಂಡ್ ದ್ ಈ ಪೊರ್ತುಡು ಪಂಡೆರ್.
ಮುರಾನಿ ನಾಗರಪಂಚಮಿದಪಗ ಈ ವರ್ಷ ಆಜಿಂಡಲ, ಬರ್ಪಿ ವರ್ಷ ಆಂಡಲ, ತುಳುನಾಡ್ ದ ಮೂಲ ಆಚರಣೆ ಆಯಿನ ನಾಗರಪಂಚೆಮಿಗ್ ರಜೆ ಕೊರ್ಲೆ ಪಂದ್ ಜೈ ತುಲುನಾಡ್ ಸಂಘಟನೆದಕುಲು ಕುಡ್ಲ, ಕಾಸ್ರೋಡು ಅಂಚೆನೆ ಒಡಿಪು ಜಿಲ್ಲೆಡ್ ಅಲ್ಪದ ಜಿಲ್ಲಾಧಿಕಾರಿನಕ್ಲೆಗ್ ಕಾಕಜಿದ ಮುಖೇನ ಮನವಿ ಕೊರ್ದು ಇತ್ತೆರ್.
ಬೆಂಗ್ಲೂರು : 77 ನೇ ಸ್ವಾತಂತ್ರ್ಯ ದಿನಾಚರಣೆದ ಲೆಕ್ಕೊಡು ಬೆಂಗ್ಲೂರ್ ದ ಆನೇಕಲ್ ತಾಲೂಕ್ ದ 3 ಶಾಲೆದ ಜೋಕುಲೆಗ್ ಶಾಲೆಗ್ ಬೋಡಾಯಿನ ಸೊತ್ತುಲೆನ್ ಆ.15 ಕ್ಕ್ ಪಟ್ಟುನ ಲೇಸ್ ನಡತ್ಂಡ್.
ಸ.ಹಿ.ಪ್ರಾ.ಶಾಲೆ ಸಮಂದೂರುದ ಜೋಕುಲೆಗ್ ಯುನಿಫಾರ್ಮ್, ಟೈ, ಬೆಲ್ಟ್, ಬ್ಯಾಗ್, ಸ್ಟೀಲ್ ದ ಬಟ್ಟಲ್, ನೀರ್ ದ ಬಾಟಲ್, ನೋಟ್ ಬುಕ್, ಲೇಖನ ಸಾಮಗ್ರಿ, ಜಾಮೆಟ್ರಿ ಬಾಕ್ಸ್ ಬೊಕ್ಕ ಕೆಲವು ಪಂತೊಡು ಗೆಂದಿನಕ್ಲೆಗ್ ಇನಾಮುನ್ ಪಟ್ಟಿಯೆರ್.
ಸ.ಕಿ.ಪ್ರಾ. ಶಾಲೆ ಪಂಪ್ ಹೌಸ್, ಆನೇಕಲ್ ಟೌನ್ ಬೊಕ್ಕ ಸ.ಕಿ.ಪ್ರಾ.ಶಾಲೆ ಗಾಂಧಿನಗರದ ಜೋಕುಲೆಗ್ ಯುನಿಫಾರ್ಮ್, ಟೈ, ಬೆಲ್ಟ್, ಜಾಮಿಟ್ರಿ ಬಾಕ್ಸ್ ನ್ ಕೊರಿಯೆರ್.
ಸವಿತಾ ಸುಧಾಕರ್ ಶೆಟ್ಟಿ ಮೆರೆನ ಮುತಾಲಿಕೆಡ್, ಸುಧಾಕರ್ ಶೆಟ್ಟಿ, ಮುಯೂರ್ ಶೆಟ್ಟಿ, ಜಯದೀಪ್ ಬಂಟ್ವಾಳ, ಪ್ರಶಾಂತ್ ನಾಯ್ಕ್, ಸುನಿಲ್ ಅರಂಘಟ್, ಶ್ರೀರಾಜ್ ಶೆಟ್ಟಿ, ಪ್ರವೀಣ್ ಆರ್, ಪ್ರೀತಿ ಶ್ರೀನಿವಾಸ್ ಜೋಯಿಸ್, ವಿದ್ಯಾ, ಹರೀಶ್ ಶೆಟ್ಟಿ, ಶಂಕರ್ ಮುಲ್ಕಿ, ಶೈಲೇಶ್ ಶೆಟ್ಟಿ ಬೊಕ್ಕ ಸಂಪತ್ ಶೆಟ್ಟಿ ಮೊಕುಲು ಸಕಾಯ ಮಲ್ದೆರ್.
ಕುಡ್ಲ : ಅಮೃತಸಂಜೀವಿನಿ (ರಿ.) ಸಂಸ್ಥೆದ 8ನೇ ವರ್ಷೊದ ವಾರ್ಷಿಕ ಉಚ್ಚಯದ ಲೆಕ್ಕೊಡು 12 ಬಡಪತ್ತ್ ದ ಕುಟುಂಬಗ್ ಬೊಕ್ಕ ಹನುಮ ಬಾಲಸಂರಕ್ಷಣಾ ಕೇಂದ್ರ ಗುರುಪುರದ ಆಶ್ರಮಗ್ ಒಟ್ಟು 3 ಲಕ್ಷದ 75 ಸಾರ ರೂ. ಪನವುದ ಸಹಾಯನ್ ವಜ್ರದೇಹಿ ಮಠಟ್ಟ್ ಮಲ್ತೆರ್.
ಸಂಸ್ಥೆದ ಮಾರ್ಗದರ್ಶಕೆರ್ ಶ್ರೀ ರಾಜಶೇಖರಾನಂದ ಸ್ವಾಮೀಜಿಲು ಆಶೀರ್ವಚನ ಕೊರ್ದು ಎಡ್ಡೆಪ್ಪು ಬಯಕಿಯೆರ್. ಈ ಪೊರ್ತುಡು ಅಮೃತ ಸಂಜೀವಿನಿದ ಸದಸ್ಯೆರ್ ಇತ್ತೆರ್.
ಮಾಜಿ ಭುವಮ ಸುಂದರಿ, ಬಾಲಿವುಡ್ ನಟಿ, ಐಶ್ವರ್ಯ ರೈ ಮೆರೆನ ಪೊರ್ಲುದ ಕಣ್ಣ್ ಲೆನ ಬಗೆಟ್ಟ್ ಮಹಾರಾಷ್ಟ್ರ ಸಚಿವೆರ್ ವಿಜಯ್ ಕುಮಾರ್ ಗವಿತ್ ಕೊರ್ನ ಹೇಳಿಕೆ ಇತ್ತೆ ಸಂಚಲನಗ್ ಕಾರಣ ಆತ್ಂಡ್.
ಮೀನ್ ತಿಂದ್ಂಡ ಐಶ್ವರ್ಯ ರೈ ಲೆಕ್ಕ ಪೊರ್ಲುದ ಕಣ್ಣ್ ಪಡೆವೊಲಿ ಪಂದ್ ಮೇರ್ ಪಂತೆರ್. ಐಶ್ವರ್ಯ ರೈ ಪ್ರತಿದಿನೊಲ ಮೀನ್ ತಿನ್ಪೆರ್. ಅಂಚಾದ್ ಪೊರ್ಲುದ ಕಣ್ಣ್ ಉಂಡು. ಮೇರ್ ದುಂಬು ಕುಡ್ಲಡ್ ಇತ್ತೆರ್. ಮೀನ್ ತಿಂದಿನೆರ್ದೆ ಮೆರೆನ ಕಣ್ಣ್ ಅಂಚ ಉಂಡು ಪಂದ್ ಪಂತೆರ್.
ಮುಲ್ಕಿ: ಬಿಲ್ಲವರ ಮಹಾಮಂಡಲದ 2022 – 23ನೇ ವರ್ಷದ ವಾರ್ಷಿಕ ಮಹಾಸಭೆ ಆ. 20 ಐತಾರ ಬೊಲ್ಪುಗು ಮಹಾಮಂಡಲದ ಚಾವಡಿಡ್ ಅಧ್ಯಕ್ಷೆರ್ ಡಾ. ರಾಜಶೇಖರ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಸುರುಕ್ಕು ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರಗ್ ಬೊಲ್ಪು ಅರ್ಲಾದ್ , ಪ್ರಾರ್ಥನೆ ಮಲ್ತ್ ದ್ ಸಭೆ ಸುರುಮಲ್ತೆರ್.
ಗೌರವ ಪ್ರಧಾನ ಕಾರ್ಯದರ್ಶಿ ವಿಜಯ ಕುಮಾರ್ ಕುಬೆವೂರು ವಾರ್ಷಿಕ ವರದಿನ್ ಓದು ಪಂಡೆರ್. ಕೋಶಾಧಿಕಾರಿ ಕೆ ಪ್ರಭಾಕರ ಬಂಗೇರ ಕಾರ್ಕಳ ವಾರ್ಷಿಕ ಲೆಕ್ಕಪತ್ರ ಬೊಕ್ಕ ಮುಂಗಡ ಪತ್ರ ಓದಿಯೆರ್ .
ಈ ಪೊರ್ತುಡು ಸಮಾಜ ಸೇವಕೆರ್, ಅತ್ಯುತ್ತಮ ಸಂಘಟಕೆರ್ ಚಿಕ್ಕಮಗಳೂರು ಶಿರವಾಸೆ ವಾಸು ಪೂಜಾರಿ ಮೆರೆನ್ ಬಿಲ್ಲವ ಸಂಘಟನಾ ಚತುರ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
ಪದ್ಮರಾಜ್ ಆರ್. ಮಂಗಳೂರು , ಬಿ. ಎನ್. ಶಂಕರ ಪೂಜಾರಿ ಕಟ್ಪಾಡಿ ಅಭಿಪ್ರಾಯ ಪಟ್ಟೊಂಡೆರ್. ದುಂಬುದ 2 ವರ್ಷದ ಅವಧಿಗ್ 30 ಸದಸ್ಯೆರ್ನ ಕಾರ್ಯಕಾರಿ ಸಮಿತಿ ರಚನೆ ಮಲ್ತೆರ್.
ಅಧ್ಯಕ್ಷೆರಾದ್ ಡಾ. ರಾಜಶೇಖರ್ ಕೋಟ್ಯಾನ್ ಪಿರ ಆಯ್ಕೆ ಆಯೆರ್. ಉಪಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ಬೊಕ್ಕ ಹರೀಶ್ ಡಿ ಸಾಲ್ಯಾನ್ ಬಜೆಗೋಳಿ, ಗೌರವ ಪ್ರಧಾನ ಕಾರ್ಯದರ್ಶಿಯಾದ್ ಬಾಳ ಗಂಗಾಧರ ಪೂಜಾರಿ ಚೇಳಾಯಿರು, ಜೊತೆ ಕಾರ್ಯದರ್ಶಿಲಾದ್ ಗಣೇಶ್ ಪೂಜಾರಿ ಗಂಜಿಮಠ ಬೊಕ್ಕ ಶಿವಾಜಿ ಸುವರ್ಣ ಬೆಳ್ಳೆ, ಕೋಶಾಧಿಕಾರಿಯಾದ್ ಕೆ. ಪ್ರಭಾಕರ ಬಂಗೇರ ಕಾರ್ಕಳ, ಜೊತೆ ಕೋಶಾಧಿಕಾರಿ ಗಣೇಶ ಎಲ್. ಪೂಜಾರಿ ಬೈಂದೂರ್ ಆಯ್ಕೆ ಆತೆರ್.
ಆಯ್ಕೆ ಪ್ರಕ್ರಿಯೆನ್ ಚಂದ್ರಶೇಖರ ಸುವರ್ಣ ಮೈಸೂರು ಬೊಕ್ಕ ಹರಿಶ್ಚಂದ್ರ ಅಮೀನ್ ಕಟ್ಪಾಡಿ ನಡಪಾದ್ ಕೊರಿಯೆರ್. ಜೊತೆ ಕಾರ್ಯದರ್ಶಿ ಗಣೇಶ್ ಎಲ್ ಪೂಜಾರಿ ಬೈಂದೂರು ಸೊಲ್ಮೆ ಸಂದಾಯೆರ್.
ಮಂಜೇಶ್ವರ: ಇತ್ತೆದ ಕಾಲಘಟ್ಟಡ್ ಅಜೀರ್ಣಾವಸ್ಥೆಡ್ ಅನೇಕ ದೈವ, ದೇವಸ್ಥಾನಲು ಆದ್ ಊರುಡು ಅಭಿವೃದ್ಧಿನ್ ತೋಜಿದುಂಡು. ಅನೇಕ ಕುಟುಂಬಲು ನೆಮ್ಮದಿದ ಜೀವನ ನಡಪಾವೊಂದುಂಡು. ಈ ಸರ್ತಿ ಕೀರ್ತೇಶ್ವರ ದೇವೆರ್ನ ಆಲಯ ಜೀರ್ಣೋದ್ದಾರ ಆದ್, ಸದಾಶಿವ ದೇವೆರ್ ಪ್ರತಿಷ್ಠಾಪನೆ ಆದ್ ಬ್ರಹ್ಮಕಲಶೋತ್ಸವ ನಡಪರೆ ಉಂಡು ಪಂದ್ ಬ್ರಹ್ಮ ಶ್ರೀ ವೇದಮೂರ್ತಿ ಬಡಾಜೆ ಬೂಡು ಶ್ರೀ ಗೋಪಾಲಕೃಷ್ಣ ತಂತ್ರಿ ಪಂಡೆರ್.
ಮೇರ್ ಮಂಜೇಶ್ವರ ಶ್ರೀ ಕೀರ್ತೇಶ್ವರ ಸದಾಶಿವ ದೇವಸ್ಥಾನದ “ಜೀರ್ಣೋದ್ಧಾರ ಲೇಸ್ದ ವಿಜ್ಞಾಪನಾ ಪತ್ರ ಬಿಡುಗಡೆ ಬೊಕ್ಕ ನಿಧಿ ಸಂಗ್ರಹಣೆಗೆ ಚಾಲನೆ” ಲೇಸ್ನ್ ಆ.19 ಶನಿವಾರದಾನಿ ಬೊಲ್ಪುಗು ದೀಪ ಉದಿಪನ ಮಲ್ತ್ ಪಾತೆರಿಯೆರ್.
ಮಾತೆರ್ಲ ಜೀರ್ಣೋದ್ಧಾರದ ಕಾರ್ಯಗ್ ತನರ್ದ್ ಆಯಿನ ಸೇವೆನ್ ಸಮರ್ಪಣಾ ಮನೋಭಾವರ್ದ್ ದೇವೆರೆಗ್ ಸಮರ್ಪನೆ ಮಲ್ತ್ಂಡ ನಮ್ಮ ಜೀವನಡ್ ದೈವ, ದೇವೆರೆನ ಅಭಯ ಹಸ್ತ ಇಪ್ಪುಂಡು. ದುಂಬುದ ದಿನಟ್ ಮೂಲು ನಡಪುನ ಜೀರ್ಣೋದ್ಧಾರ ಕಾರ್ಯ ಬೊಕ್ಕ ಕ್ಷೇತ್ರದ ಅಭಿವೃದ್ಧಿ ಕಾರ್ಯ ಪ್ರಗತಿದ ಪಜ್ಜೆಡ್ ಸಾಗಡ್ ಪಂದ್ ಎಡ್ಡೆಪ್ಪು ಬಯಕ್ದ್ ಜೀರ್ಣೋದ್ಧಾರ ಕಾರ್ಯಕ್ರಮದ ವಿಜ್ಞಾಪನಾ ಪತ್ರ ಬುಡುಗಡೆ ಮಲ್ತಿನ ಬೊಕ್ಕ ನಿಧಿ ಸಂಗ್ರಹಣೆಗೆ ಚಾಲನೆ ಕೊರಿಯೆರ್.
ಲೇಸ್ದ ಗುರ್ಕಾರ್ಮೆನ್ ಕ್ಷೇತ್ರದ ಅಧ್ಯಕ್ಷೆ ರಾಯಿನ ತುಕಾರಾಮ ಕುಂಬಳೆ ವಹಿಸ್ದಿತ್ತೆರ್.
ಚಾವಡಿಡ್ ಉದ್ಯಾವರ ಮಾಡ ಶ್ರೀ ಅರಸು ಮಂಜೀಷ್ಣಾರ್ ದೈವ ಕ್ಷೇತ್ರದ ಅಣ್ಣ ದೈವದ ಪಾತ್ರಿ ರಾಜ ಬೆಲ್ಚಪ್ಪಾಡ, ತಮ್ಮ ದೈವದ ಪಾತ್ರಿ ತಿಮಿರಿ ಬೆಲ್ಚಪ್ಪಾಡ, ತಮ್ಮ ದೈವದ ಅರ್ಚಕೆರ್ ಬೀರು ಚೌಟ, ಮುಂಡತ್ತಾಯ ದೈವದ ಪಾತ್ರಿ ಮಂಜು ಬೆಲ್ಚಪ್ಪಾಡ, ಸಮಾಜದ ಗುರಿಕಾರೆರಾಯಿನ ಸುನಿಲ್ ಗುರಿಕಾರ, ಕ್ಷೇತ್ರದ ಜೀರ್ಣೋದ್ದಾರ ಸಮಿತಿ ಅಧ್ಯಕ್ಷೆರ್ ದಯಾನಂದ ಬಂಗೇರ, ಕ್ಷೇತ್ರದ ಪುತ್ತೂರು ತಾಲೂಕು ಗಾಣಿಗ ಸಂಘ ಸಮಿತಿ ಅಧ್ಯಕ್ಷೆರ್ ಹರಿ ರಾಮಚಂದ್ರ, ಉಳ್ಳಾಲ ತಾಲೂಕು ಗಾಣಿಗ ಸಂಘದ ಅಧ್ಯಕ್ಷೆರ್ ಎಚ್. ಪ್ರಕಾಶ್, ರಮೇಶ್ ಉಳ್ಳಾಲ, ಕ್ಷೇತ್ರದ ಅರ್ಚಕೆರ್ ರವೀಶ್ ಭಟ್, ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಲಕ್ಷ್ಮಣ ಐಲ, ಉದಯ ಪೂಜಾರಿ ಹೊಸಹಿತ್ಲು, ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ವಿಶ್ವನಾಥ ಪೊಯ್ಯೆಕಂಡ, ಬೊಕ್ಕ ವಲಯ ಸಮಿತಿ ಅಧ್ಯಕ್ಷೆರ್ ಈ ಪೊರ್ತುಡು ಮಿತ್ತರ್ಮೆದ ಚಾವಡಿಡ್ ಇತ್ತೆರ್.
ಜೀರ್ಣೋದ್ದಾರ ಸಮಿತಿ ಕಾರ್ಯಾಧ್ಯಕ್ಷೆರ್ ದಿನೇಶ್ ನಟ್ಟಿಬೈಲ್ ಲೇಸ್ಗ್ ಎದ್ಕೊಂದು, ಧಾರ್ಮಿಕ ಮುಂದಾಳು ಹರೀಶ್ ಶೆಟ್ಟಿ ಮಾಡ ಲೇಸ್ದ ಸುಧಾರಿಕೆ ಮಲ್ತ್, ಜೀರ್ಣೋದ್ದಾರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರದೀಶ್ ಅಂಜರೆ ಸೊಲ್ಮೆ ಸಂದಾಯೆರ್.
ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಆ.20 ದಾನಿ ಐತಾರ ಅಗೇಲ್ ಸೇವೆ ಬೊಕ್ಕ ಕೋಲ ಸೇವೆ ಇಜ್ಜಿ ಪಂದ್ ಆಡಳಿತ ಮಂಡಳಿ ಪ್ರಕಟನೆಡ್ ತೆರಿಪಾದ್ಂಡ್.
ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಆ.21 ದಾನಿ ಸೋಮವಾರ ನಾಗರ ಪಂಚೆಮಿದ ಹಿನ್ನೆಲೆಡ್ ಆ.20 ದಾನಿ ಅಗೇಲ್ ಬೊಕ್ಕ ಕೋಲ ಸೇವೆ ಇಪ್ಪುಜಿ.
ಮುಲ್ಕಿ: ತಾಲ್ಲೂಕು ಸೌಜನ್ಯ ಹೋರಾಟ ಸಮಿತಿದ ಮುಕೇನ ಆಗಸ್ಟ್ 24 ಗುರುವಾರ ಮಧ್ಯಾಹ್ನ 3 ಗಂಟೆಗ್ ಸೌಜನ್ಯ ಪ್ರಕರಣದ ತನಿಖೆಗಾದ್ ಮುಲ್ಕಿಡ್ ಮಲ್ಲ ಮಟ್ಟ್ ದ ಪ್ರತಿಭಟನೆ ನಡಪರೆ ಉಂಡು. ಸೌಜನ್ಯ ಪರ ಹೋರಾಟ ಸಂಘಟನೆ ಮಲ್ತಿನ ಮಹೇಶ್ ಶೆಟ್ಟಿ ತಿಮರೋಡಿ ಬೊಕ್ಕ ಪ್ರಮೋದ್ ಮುತಾಲಿಕ್ ಪಾಲ್ ಪಡೆಯುನ ನಿರೀಕ್ಷೆ ಉಂಡು. ಬಸ್ ಸ್ಟ್ಯಾಂಡ್ ರ್ದ್ ಬೃಹತ್ ಪ್ರತಿಭಟನೆದ ಬೊಕ್ಕ ಪ್ರಕರಣದ ಸೂಕ್ತ ತನಿಖೆಗ್ ಆಗ್ರಹಿಸಾದ್ ತಾಲ್ಲೂಕು ತಹಶೀಲ್ದಾರ್ ಗ್ ಮನವಿ ಸಲ್ಲಿಸಾದ್ ಮುಲ್ಕಿ ಸೀಮೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಪ್ರಕರಣದ ಆರೋಪಿಲೆಗ್ ಸೂಕ್ತ ಶಿಕ್ಷೆ ಕೊರ್ಪುನಂಚ ವಿಶೇಷ ಪ್ರಾರ್ಥನೆ ಸಲ್ಲಿಸಾಯೆರೆ ಉಂಡು ಪಂದ್ ಸಾಮಾಜಿಕ ಕಾರ್ಯಕರ್ತೆರ್ ನವೀನ್ ಪುತ್ರನ್ ತೆರಿಪಾಯೆರ್.
ಮುಲ್ಕಿ ಹೋಟೆಲ್ ಆದಿಧನ್ ಸಭಾಂಗಣಡ್ ಇಂಚೊಗು ನಡತಿನ ತಾಲೂಕು ಹೋರಾಟ ಸಮಿತಿದ ಸಭೆಟ್ಟ್ ಈ ವಿಷಯ ಪಂಡೆರ್.
ಮುಲ್ಕಿ ನ.ಪಂ ಸದಸ್ಯೆರ್ ಶೈಲೇಶ್ ಪಾತೆರ್ದ್ ಸೌಜನ್ಯ ಪ್ರಕರಣದ ಸೂಕ್ತ ತನಿಖೆಗ್ ಆಗ್ರಹಿಸಾದ್ ಹೋರಾಟ ಸಮಿತಿದ ಸಭೆಕ್ ವ್ಯಾಪಕ ಬೆಂಬಲ ವ್ಯಕ್ತವಾತ್ಂಡ್., ರಾಜಕೀಯ ರಹಿತವಾದ ಮಲ್ಲ ಪ್ರತಿಭಟನೆ ನಡಪರೆ ಉಂಡು ಪಂಡೆರ್.
ಸೌಜನ್ಯ ನ ಇಲ್ಲದಕ್ಲೆಗ್ ನ್ಯಾಯ ತಿಕ್ಕೊಡಾಂಡ ಸಂಘಟನಾತ್ಮಕ ಹೋರಾಟ ಅಗತ್ಯ ಪಂದ್ ಪಂಡಿನ
ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ ಶೆಟ್ಟಿ, ಪ್ರತಿಭಟನೆ ಡ್ ಒವ್ವೆ ಸಂಘ-ಸಂಸ್ಥೆ, ದೇವಸ್ಥಾನದ ಬೊಕ್ಕ ವೈಯಕ್ತಿಕ ತೇಜೋವಧೆಗೆ ಅವಕಾಶ ಇಜ್ಜಿ. ಬಾಲೆ ಸೌಜನ್ಯಗ್ ನ್ಯಾಯ ತಿಕ್ಕರೆ ಒಗ್ಗಟ್ಟಾದ್ ಸಮಿತಿ ಮಲ್ಪುಗ ಪಂಡೆರ್.
ಈ ಪೊರ್ತುಡು ಸಾಮಾಜಿಕ ಕಾರ್ಯಕರ್ತೆರಾಯಿನ ಜನಾರ್ದನ ಬಂಗೇರ ಕೆಎಸ್ ರಾವ್ ನಗರ, ಸಂದೀಪ್ ಚಿತ್ರಾಪು, ಪೂರ್ಣಿಮಾ, ರೋಹಿಣಿ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಕುಸುಮಾ ಚಂದ್ರಶೇಖರ್ , ದಿನೇಶ್ ಕೊಲ್ನಾಡು ಪಾತೆರ್ದ್ ವಿವಿಧ ಸಮಿತಿನ್ ರಚನೆ ಮಲ್ತ್ ದುಂಬುದ ಹೋರಾಟದ ಬಗ್ಗೆ ರೂಪುರೇಷೆನ್ ಮಲ್ತ್ ದ್ ಒಗ್ಗಟ್ ದ ಹೋರಾಟಗ್ ತೀರ್ಮಾನ ಮಲ್ತೆರ್.
