August 2023

ತೆಲಂಗಾಣಡ್ ಭೂಕಂಪ

ತೆಲಂಗಾಣದ ವಾರಂಗಲ್ ಡ್ ಇನಿ ಬೊಲ್ಪುಗು 3.6 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ಭೂಕಂಪಶಾಸ್ತ್ರದ ರಾಷ್ಟ್ರೀಯ ಕೇಂದ್ರ ತೆರಿಪಾದ್ಂಡ್.

ಈ ಭೂಕಂಪರ್ದ್ ಒವ್ವೇ ಆಸ್ತಿ ನಷ್ಟ, ಸಾವು ಆಯಿನ ಬಗೆಟ್ಟ್ ವರದಿ ಆತಿಜಿ.

ಪ್ರಾದೇಶಿಕವಾದ್ ನಮ ಒಂಜಾಂಡ ಮಾತ್ರ ನನದ ಪೀಳಿಗೆಗ್ ಎಡ್ಡೆ ಭವಿಷ್ಯ ಉಂಡು: ಯೋಗೀಶ್ ಶೆಟ್ಟಿ ಜಪ್ಪು

ಒಡಿಪು: ತುಳುನಾಡ ರಕ್ಷಣಾ ವೇದಿಕೆ ಕಾಪು ವಲಯದ ಮಹಿಳಾ ಘಟಕನ್ ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕ ಗುರ್ಕಾರ್ರೆ ಯೋಗೀಶ್ ಶೆಟ್ಟಿ ಜಪ್ಪು ಹಿರಿಯಡ್ಕಡ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್, ಇತ್ತೆ ಜಾತಿ ಧರ್ಮ, ಪಕ್ಷ ಪನ್ಪುನ ಬಗೆಟ್ಟೆ ಪೊರ್ಂಬಾಟ ಎಚ್ಚ ಮಲ್ತೊಂದು ಉಲ್ಲೆರ್.‌ ಆಂಡ ಪ್ರಾದೇಶಿಕವಾದ್ ಮಾತ ಜಾತಿದಕುಲು ಒಟ್ಟಾವೊಂದು ಇಜ್ಜೆರ್. ಅಂಚಾದ್ ನಮ್ಮ ತುಳುನಾಡ್ ರಕ್ಷಣಾ ವೇದಿಕೆ ತುಳುವೆರೆನ್ ಒಟ್ಟು ಮಲ್ಪುನ ಕೆಲಸ, ತುಳುನಾಡ್ ದ ನೆಲ ಜಲ ಬೊಕ್ಕ ಸಂಸ್ಕತಿ ಒರಿಪಾಯೆರೆ ಬೋಡಾದ್ ಕೆಲಸ ಮಲ್ತೊಂದು ಉಂಡು.  ನಮ್ಮೂರುಡು ಇಪ್ಪುನ ಬ್ಯಾಂಕ್ ಲೆಡ್, ಕೈಗಾರಿಕಾ ಕ್ಷೇತ್ರಡ್  ನಮ್ಮಕ್ಲೆಗ್ ಅವಕಾಶ ತಿಕ್ಕೊಡು. ಅಪಗ ಮಾತ್ರ ನಮ್ಮ ಪ್ರಾದೇಶಿಕತೆ ಒರಿಪುಂಡು. ಇಜ್ಜಿಂಡ ನಮ್ಮ  ನನದ ಪೀಳಿಗೆ ಮಸ್ತ್ ತೊಂದರೆನ್ ಅನುಭವಿಸಾವೊಡಾಪುಂಡು. ಅಂಚಾದ್ ಪೊಂಜೋವ್ ನಕುಲು ಮಾತ ಒಂಜಾವೊಡು ಪಂದ್ ಪಂಡೆರ್.

ಚಾವಡಿಡ್ ತುಳುನಾಡ ರಕ್ಷಣಾ ವೇದಿಕೆ ಒಡಿಪು ಜಿಲ್ಲಾ ವೀಕ್ಷಕೆರ್ ಫ್ರ್ಯಾಂಕಿ ಡಿ.ಸೋಜಾ, ಕೇಂದ್ರ ತುಳುನಾಡ ರಕ್ಷಣಾ ವೇದಿಕೆದ ಸಂಘಟನಾ ಕಾರ್ಯದರ್ಶಿ ಪ್ರಶಾಂತ್ ಭಟ್, ಪಂಚಾಯತ್ ಸದಸ್ಯೆರ್ ಲತಾ, ತುಳುನಾಡ ರಕ್ಷಣಾ ವೇದಿಕೆ ಒಡಿಪು ತಾಲೂಕ್ ಗೌರವಾಧ್ಯಕ್ಷೆರ್ ರವಿ ಆಚಾರ್, ಅಧ್ಯಕ್ಷೆರ್ ಕೃಷ್ಣ ಕುಮಾರ್, ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ, ಯುವ ಘಟಕದ ಅಧ್ಯಕ್ಷೆರ್ ರಾಹುಲ್, ಸಾಮಾಜಿಕ ಕಾರ್ಯಕರ್ತೆರ್ ರೋಶನ್ ಬಲ್ಲಾಳ್, ಕಾಪು ಉತ್ತರ ವಲಯ ಕಾಂಗ್ರೆಸ್ ಸಾಮಾಜಿಕ ಜಾಲತಾನದ ಅಧ್ಯಕ್ಷೆರ್ ನಿತಿನ್ ಕುಮಾರ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಕುಮಾರಿ ದೀಪ್ತಿ ಪ್ರಾರ್ತನೆ ಮಲ್ತೆರ್. ತುಳುನಾಡ ರಕ್ಷಣಾ ವೇದಿಕೆ ಮಹಿಳಾ ಘಟಕದ ಪೊಸ ಅಧ್ಯಕ್ಷೆರ್ ಅನಸೂಯಾ ಶೆಟ್ಟಿ ಎದ್ಕೊನಿಯೆರ್. ಪೊಸ ಪ್ರದಾನ ಕಾರ್ಯದರ್ಶಿ ಸರೋಜಿನಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಬೊಕ್ಕ ಪೊಸ ಮಹಿಳಾ ಘಟಕದ ಮುತಾಲಿಕೆಡ್ ಯೋಗೀಶ್ ಶೆಟ್ಟಿ ಜೆಪ್ಪು ಮೆರೆಗ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ಪೊಸ ಪದಾಧಿಕಾರಿಲು ಸವಿತ ನಾಯಕ್, ಮಮತಾ ನಾಯಕ್, ಜಯಲಕ್ಷ್ಮಿ ಹೆಗ್ಡೆ, ಜ್ಯೋತಿ ಶೆಟ್ಟಿ, ನಿಶ್ಮಿತ ಶೆಟ್ಟಿ, ಕೀರ್ತಿ ಶೆಟ್ಟಿ ಸುದೀಷ್ಣ ಇತ್ತೆರ್. ಯೋಗೀಶ್ ಕೊಳಲಗಿರಿ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್.

ರೇಡಿಯೊ ಮಣಿಪಾಲಡ್ ‘ನಮ್ಮ ಮಣ್ಣು ನಮ್ಮದೇಶ ಅಭಿಯಾನ’ ದ ಬಗೆಟ್ಟ್ ಪೊಲಬು

ಮಣಿಪಾಲ: ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ನಮ್ಮ ಮಣ್ಣು ನಮ್ಮ ದೇಶ ಅಭಿಯಾನ ಪನ್ಪಿನ ಬಗೆಟ್ಟ್ ಇಸೇಸ ಸಂದರ್ಶನ ಆ‌.25 ಸುಕ್ರಾರ 5 ಗಂಟೆಗ್ ಪ್ರಸಾರ ಆಪುಂಡು.

ಇನಿ ಪ್ರಸಾರ ಆಪಿನ ಈ ಲೇಸ್ ಡ್ ಔಷಧೀಯವನನ್ ನಿರ್ಮಾಣ ಮಲ್ತಿನ ಆರೂರು ಎ.ಎಂ.ರಾವ್ ಪಾಲ್ ಪಡೆಯೆರೆ ಉಲ್ಲೆರ್. ಆ.26 ಸನಿಯಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.

ಈ ಸಂದರ್ಶನನ್ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೇನ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್
ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಸೌಜನ್ಯಗ್ ನ್ಯಾಯ ತಿಕ್ಕುನ ಮುಟ್ಟ ಹೋರಾಟ ಉಂತಾವುಜ: ಮಹೇಶ್ ಶೆಟ್ಟಿ

ಮೂಲ್ಕಿ: ಸೌಜನ್ಯಗ್ ನ್ಯಾಯ ತಿಕ್ಕುನ ಮುಟ್ಟ ಹೋರಾಟ ಉಂತುಜಿ ಪಂದ್ ಸಾಮಾಜಿಕ ಹೋರಾಟಗಾರೆರ್ ಮಹೇಶ್ ಶೆಟ್ಟಿ ತಿಮರೋಡಿ ಪಂಡೆರ್.

ಆರ್ ಮೂಲ್ಕಿದ ಬಸ್ ನಿಲ್ದಾಣಡ್ ಮುಲ್ಕಿ ಸೌಜನ್ಯ ಹೋರಾಟ ಸಮಿತಿದ‌ ಮುತಾಲಿಕೆಡ್ ಗುರುವಾರ ನಡತಿನ ಬೃಹತ್ ಪ್ರತಿಭಟನಾ ಸಭೆಟ್ಟ್ ಪಾತೆರಿಯೆರ್.

ಕರಿನ 11 ವರ್ಷರ್ದ್ ಹೋರಾಟ ಮಲ್ತೊಂದುಲ್ಲ. ನ್ಯಾಯ-ಸತ್ಯ- ಧರ್ಮೊಗಾದ್ ಎಂಕುಲು ಜಾಗೃತಿ ಪುಟ್ಟಾವ. ಹಳ್ಳಿ ಹಳ್ಳಿಡ್ಲ ಜಾಗೃತಿ ಮೂಡಾವ. ಸೌಜನ್ಯ ಕೇಸ್ ದ ತನಿಖೆನ್ ನಿವೃತ್ತ ನ್ಯಾಯಧೀಶೆರ್ನ ಮುತುವರ್ಜಿಡ್ ನಿಷ್ಠಾವಂತ ಅಧಿಕಾರಿಲೆನ ಎಸ್‌ಐಟಿ ತಂಡ ಮಲ್ಪೊಡು ಪಂದ್ ಆರ್ ಒತ್ತಾಯ ಮಲ್ತೆರ್. ಸೌಜನ್ಯನ ಅಮ್ಮ ಕುಸುಮಾವತಿ ಪಾತೆರ್ದ್, ಎನ್ನ ಮಗಲೆನ್ ಅತ್ಯಾಚಾರ ಮಲ್ತ್ ದ್ ಕೆರ್ತಿನಕ್ಲೆಗ್ ಶಿಕ್ಷೆ ಕೊರ್ದು ನ್ಯಾಯ ಎಂಕ್ಲೆಗ್ ಕೊರ್ಪಾಲೆ ಪಂದ್ ಕಣ್ಣನೀರ್ ಪಾಡ್ದ್ ಬಿನ್ನಾಪು ಮಲ್ತೆರ್.

ಮೂಲ್ಕಿ ಮಸೀದಿದ ಧರ್ಮಗುರುಕ್ಕುಲು ಹಸನ್, ಮೂಲ್ಕಿ ಪಟ್ಟಣ ಪಂಚಾಯಿತಿದ ಅಧ್ಯಕ್ಷೆರ್ ಸುಭಾಶ್ ಶೆಟ್ಟಿ ವೇದಿಕೆಡ್ ಇತ್ತೆರ್.

ಪ್ರತಿಭಟನಾ ಸಭೆರ್ದ್ ದುಂಬು ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನಡ್ ವಿಶೇಷ ಪ್ರಾರ್ಥನೆ ಮಲ್ತ್ ದ್ ಬೊಕ್ಕ ತಹಶೀಲ್ದಾರ್ ಮುಕೇನ ಮನವಿ ಕೊರಿಯೆರ್.

ನೆರ್ದ್ ದುಂಬು ಬಪ್ಪನಾಡ್ ರ್ದ್ ಮುಲ್ಕಿ ಮುಟ್ಟ ಮೆರವಣಿಗೆ ನಡತ್ಂಡ್. ಸೌಜನ್ಯ ಹೋರಾಟ ಸಮಿತಿದ ದಿನೇಶ್ ಕೊಲ್ನಾಡು, ನವೀನ್ ಪುತ್ರನ್, ನಾಗರಾಜ್,ಸಂದೀಪ್, ಲತಾ ಶೇಖರ್, ದರ್ಶನ್, ನಗರ ಪಂಚಾಯತ್ ಸದಸ್ಯೆರಾಯಿನ ಹರ್ಷರಾಜ್ ಶೆಟ್ಟಿ, ದಯಾವತಿ, ರೇವತಿ, ಶೈಲೇಶ್ ಮೊಕುಲು ಮಾತ ಇತ್ತೆರ್.

ಬೆದ್ರಡ್ ಕುದಿ ಕಂಬುಲದ ಉದಿಪನ

ಬೆದ್ರ: 2023-24ನೇ ಸಾಲ್ ದ ಕಂಬುಲ ಸೀಸನ್ ದ ತಯಾರಿಯಾದ್ ಬೆದ್ರದ ಕೋಟಿ-ಚೆನ್ನಯ ಜೋಡುಕರೆಟ್ಟ್ ಗುರುವಾರ ಕುದಿ ಕಂಬುಲ ಸುರು ಆಂಡ್.

ಉದ್ಯಮಿ, ಎರ್ಲುಲೆನ ಧಣಿ ರಂಜಿತ್ ಪೂಜಾರಿ ಕರೆಟ್ಟ್ ತುಡರ್ ಅರ್ಲಾದ್ ಕುದಿ ಕಂಬುಲದ ಉದಿಪನ ಮಲ್ತೆರ್.

ಈ ಪೊರ್ತುಡು ಜಿಲ್ಲಾ ಕಂಬುಲ ಸಮಿತಿದ ಕಾರ್ಯದರ್ಶಿ ಸುರೇಶ್ ಕೆ ಪೂಜಾರಿ, ರೆಂಜಾಳ, ಸ್ಥಾಯಿ ಸಮಿತಿದ ನಾಗರಾಜ ಪೂಜಾರಿ, ಬೆಳುವಾಯಿ ಗ್ರಾ.ಪಂ ಸದಸ್ಯೆರ್ ರಘು, ಕಂಬುಲದ ಎರ್ಲುಲೆನ ಧಣಿ ಇರುವೈಲ್ ಪಾಣಿಲ ಸತೀಶ್ಚಂದ್ರ, ಜಾರ್ಜ್ ರೊಡ್ರಿಗಸ್ ಮುರ್ಕನ್ ಪಲ್ಕೆ, ಎರ್ಲೆ ಗಿಡಪುನಾರ್ ವಿವೇಕ್ ಪೂಜಾರಿ ಬೈಂದೂರು ಬೊಕ್ಕ ರಿತೇಶ್ ಒಂಟಿಕಟ್ಟೆ, ಯಶವಂತ ಭಂಡಾರಿ ಪಾಲ್ ಪಡೆದಿತ್ತೆರ್.

ಡಾ.ರವಿ ಕಕ್ಕೆಪದವು ಸೇವಾ ಟ್ರಸ್ಟ್ ದ ಮುತಾಲಿಕೆಡ್ ಇಲ್ಲ್ ಪಟ್ಟುನ ಲೇಸ್

ಸುಬ್ರಹ್ಮಣ್ಯದ ಡಾ.ರವಿ ಕಕ್ಕೆಪದವು ಸೇವಾ ಟ್ರಸ್ಟ್ ದ ಮುತಾಲಿಕೆಡ್ ಬಿಳಿನೆಲೆ ಗ್ರಾಮದ ಕೈಕಂಬ ಕುಕ್ಕಾಜೆ ನಿವಾಸಿ ಮಸ್ತ್ ಬಡಪತ್ತ್ ಡ್ ಇಪ್ಪುನ ಸುಮಿತ್ರ ಮೆರೆಗ್ ಪೊಸತಾದ್ ಕಟ್ಟಿನ ಇಲ್ಲ್ ದ ಬೀಗದ ಕೈನ್ ಅಧ್ಯಕ್ಷೆರ್ ಪ್ರಶಾಂತ್ ಕೋಡಿಬೈಲ್ ಸರ್ವಸದಸ್ಯೆರೆನ ಎದುರುಡ್ ಕೊರಿಯೆರ್.

ಈ ಪೊರ್ತುಡು ರವಿ ಕಕ್ಕೆಪದವು ಸೇವಾ ಟ್ರಸ್ಟ್ ದ ಉಪಾಧ್ಯಕ್ಷೆರ್ ಚಂದ್ರಕಲಾ, ರಮೇಶ ಹೊಸಳ್ಳಿಕೆ, ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಪೂರ್ವ ಅಧ್ಯಕ್ಷೆರ್ ಗೋಪಾಲ ಎಣ್ಣೆಮಜಲ್, ವಿಶ್ವನಾಥ ನಡುತೋಟ, ಬಾಲಕೃಷ್ಣ ಪೈ, ಮೈಲಪ್ಪ ಸಂಕೇಶ, ಚಂದ್ರಶೇಖರ ನಾಯರ್, ಕಾರ್ಯದರ್ಶಿ ಮೋಹನ್ದಾಸ್ ಎಣ್ಣೆ ಮಜಲ್ ಪಾಲ್ ಪಡೆದಿತ್ತೆರ್.

ಸುಬ್ರಹ್ಮಣ್ಯ ರವಿ ಕಕ್ಕೆಪದವು ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ.ರವಿ ಕಕ್ಕೆಪದವು ಮೆರೆನ್ ಇಲ್ಲದಕ್ಲೆನ ಮುತಾಲಿಕೆಡ್ ಸನ್ಮಾನ ಮಲ್ತೆರ್. ರೋಟರಿ ಕ್ಲಬ್ ಪೂರ್ವ ಅಧ್ಯಕ್ಷೆರ್ ವಿಶ್ವನಾಥ ನಡುತೋಟ ಲೇಸ್ ಸುಧಾರಿಕೆ ಮಲ್ತ್ ದ್ ಎದ್ಕೊನಿಯೆರ್. ಮಾಜಿ ಅಧ್ಯಕ್ಷೆರ್ ಗೋಪಾಲ ಎಣ್ಣೆಮಜಲ್ ಸೊಲ್ಮೆ ಸಂದಾಯೆರ್.

ಆ.27: ಬಿಲ್ಲವರ ಗುತ್ತು ಬರ್ಕೆಗಳು ಬೂಕು ಬುಡುಗಡೆ

ಕುಡ್ಲ : ಬೊಂಬೈದ ಗುರುತು ಪ್ರಕಾಶನ ಸಂಸ್ಥೆ ನಿರೆಲ್ಡ್ ಬಾಬು ಶಿವ ಪೂಜಾರಿ ಮೇರ್ ಪ್ರಧಾನ ಸಂಶೋಧಕೆರಾಯಿನ “ಬಿಲ್ಲವರ ಗುತ್ತು ಬರ್ಕೆಗಳು” ಬೂಕು ಬುಡುಗಡೆ ಲೇಸ್ ಆ.27 ಐತಾರ ಬೊಲ್ಪುಗು ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಕಲ್ಯಾಣ ಮಂಟಪಡ್ ನಡಪರೆ ಉಂಡು ಪಂದ್ ಕುದ್ರೋಳಿ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್‌ ಆರ್. ತೆರಿಪಾಯೆರ್.

ಆರ್ ಕುಡ್ಲದ ಪತ್ರಿಕಾಭವನಡ್ ಗುರುವಾರ ನಡತಿನ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

ಬೊಂಬೈದ ಬಾಬು ಶಿವ ಪೂಜಾರಿ ಮೆರೆನ ಮುತಾಲಿಕೆದ ಕೂಟ 2009 ಟ್ಟ್ ಸಂಶೋಧನೆ ಸುರು ಮಲ್ತಿನ ಈ ಬೂಕುಡು ತುಳುನಾಡ್ ದ ಸಾಂಸ್ಕೃತಿಕ ಚರಿತ್ರೆಡ್ ಪೂಜಾರಿ, ಬೈದ್ಯ, ಬಿಲ್ಲವ, ಬೋಂಟ್ರ, ಬಿರುವ, ಹಳೆಪೈಕ ಪಂದ್ ಲೆಪ್ಪುನ ಪುದರ್ ದ ಈಡಿಗ ಸಮಾಜಡ್ ಒಂಜಾಯಿನ ಬಿಲ್ಲವ ಸಮುದಾಯದ ಇತಿಹಾಸದ ಒಂಜಿ ಭಾಗ ಈ ಬೂಕುಡು ಉಂಡು.

ಈ ಬೂಕುನ್ ಹಿರಿಯ ಮುತ್ಸದ್ಧಿ, ಮಾಜಿ ಕೇಂದ್ರ ಸಚಿವೆರ್, ಬಿ. ಜನಾರ್ಧನ ಪೂಜಾರಿ ಮೇರ್ ಬುಡುಗಡೆ ಮಲ್ಪರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಬಿಲ್ಲವ ಗುತ್ತು ಇಲ್ಲದ ಅಧ್ಯಯನ ಕೂಟದ ಪ್ರಮುಖೆರ್, ಹಿರಿಯ ಸಾಹಿತಿ ಬಿ.ಎಂ. ರೋಹಿಣಿ ಒಯಿಸೊನ್ವೆರ್. ಈ ಲೇಸ್ ಡ್ ಸೋಲೂರು ಆರ್ಯ ಈಡಿಗ ಮಹಾ ಸಂಸ್ಥಾನದ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಶ್ರೀ ಗೋಕರ್ಣನಾಥ ಕ್ಷೇತ್ರದ ಅಧ್ಯಕ್ಷೆರ್ ಹೆಚ್.ಎಸ್, ಸಾಯಿರಾಮ್, ಬಿ.ಕೆ. ಹರಿಪ್ರಸಾದ್, ವಿನಯಕುಮಾರ್ ಸೊರಕೆ, ಉಮಾನಾಥ ಕೋಟ್ಯಾನ್, ಪದ್ಮರಾಜ್ ಆರ್, ಬಿನ್ನೆರ್ ನಕುಲು, ಸಂಘಟನೆದ ಪ್ರಮುಖೆರ್, ರಾಜ್ಯ ಬೊಕ್ಕ ಪಿದಯಿರಾಜ್ಯದ ಸುಮಾರ್ ಬಿನ್ನೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಪತ್ರಿಕಾ ಗೋಷ್ಠಿಡ್ ಬಿ.ಎಂ. ರೋಹಿಣಿ, ಪ್ರೊ. ಎಂ. ಶಶಿಧರ ಕೋಟ್ಯಾನ್, ಸಂಕೇತ್ ಪೂಜಾರಿ ಬೊಕ್ಕ ಮುದ್ದು ಮೂಡುಬೆಳ್ಳೆ ಇತ್ತೆರ್.

ರೇಡಿಯೊ ಮಣಿಪಾಲ್ ಡ್ ‘ಇಸೇಸ ಸಂದರ್ಶನ’

ಮಣಿಪಾಲ: ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ‘ಇಶೇಷ ಸಂದರ್ಶನ’ ಲೇಸ್ ಆ.24 ಗುರುವಾರ 6 ಗಂಟೆಗ್ ಪ್ರಸಾರ ಆಪುಂಡು.

ಇನಿ ಪ್ರಸಾರ ಆಪುನ ಇಸೇಸ ಸಂದರ್ಶನಡ್ ಕಾಡುಬೆಳೆಸಿ ಅಭಿಯಾನದ ಒಡಿಪುದ ಸಂವೇದನಾ ಫೌಂಡೇಷನ್ ದ ಸಂಸ್ಥಾಪಕೆರ್ ಪ್ರಕಾಶ್ ಮಲ್ಪೆ ಪಾಲ್ ಪಡೆಯೆರೆ ಉಲ್ಲೆರ್. ಆ.25 ಗುರುವಾರ ಮಧ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೇನ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್
ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದೆರ್.