ಆ.26: ಮದುರೈ ರೈಲ್ವೆ ನಿಲ್ದಾಣಡಿತ್ತಿನ ರೈಲ್ ಡ್ ತೂ ಪೊತ್ತಿನ ಪರಿಣಾಮ 8 ಜನ ತೀರ್ ಪೋಯೆರ್. 20 ಜನಕ್ ಗಾಯ ಆತ್ಂಡ್.
ರೈಲ್ ಡ್ ಪ್ರವಾಸಿಗೆರ್ ಗ್ಯಾಸ್ ಡ್ ಅಟಿಲ್ ಮಲ್ಪುನಗ ಗ್ಯಾಸ್ ಸೋರಿಕೆ ಆದ್ ಸ್ಫೋಟ ಆತ್ಂಡ್. ಅಗ್ನಿಶಾಮಕ ದಳ ತಕುಲ್ ತೂ ತೆಕ್ಕಾದ್, ರೈಲ್ ದ ಲಾಸ್ಟ್ ದ ರಡ್ಡ್ ಡಬ್ಬಿ ಪೂರ ಪೊತುದು ಪೋತುಂಡು.
ಹಳೆಯಂಗಡಿ: ಶ್ರೀ ವರ ಮಹಾಲಕ್ಷ್ಮಿ ವೃತ ಪೂಜಾ ಕಾರ್ಯಕ್ರಮ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ(ರಿ) ಡ್ ಆ.25 ಸುಕ್ರಾರ ಶ್ರದ್ಧಾಭಕ್ತಿಡ್ ನಡತ್ಂಡ್.
ಎಚ್ಚಿನ ಸಂಖ್ಯೆಡ್ ಪೊಂಜೊವುಲು ಪೂಜೆಡ್ ಪಾಲ್ ಪಡೆದ್ ಲಕ್ಷ್ಮೀ ದೇವಿನ ಅನುಗ್ರಹಕ್ಕ್ ಪಾತ್ರರಾಯೆರ್.
ಅಂಚೆನೆ ಆ.31 ಗುರುವಾರ ನಡಪುನ ಬ್ರಹ್ಮ ಶ್ರೀ ನಾರಾಯಣ ಗುರುಕ್ಲೆನ 169ನೇ ಜನ್ಮದಿನಾಚರಣೆ ಭಾರಿ ಗೌಜಿಡ್ ಗುರು ಮಂದಿರ ಡ್ ನಡಪರೆ ಉಂಡು. ಈತ್ ನೆಟ ಸಹಕಾರನ್ ಕೊರ್ನ ಮಾತಾ ಭಕ್ತಾದಿಲು ಗುರು ಜಯಂತಿದಾನಿಲ ತನುಮನಧನ ಸಹಕಾರ ಕೊರ್ಪಿನ ಮುಕೇನ ಸೇವಾ ರೂಪಡ್ ಪೂತ್ತ ಅಲಂಕಾರ , ಪ್ರಸಾದ ಪಂಚಕಜ್ಜಾಯ , ಫಲವಸ್ತು, ಪ್ರಸಾದ , ಅನ್ನ ಸಂತರ್ಪಣೆ,ಲೈಟಿಂಗ್ ಇಂಚ ಸೇವೆದ ಪ್ರಾಯೋಜಕತ್ವ ವಹಿಸಾವುನ ಒಟ್ಟಿಗೆ ಶತಭಿಷಾ ಅಭಿಷೇಕ ಪೂಜೆ , ಗುರು ಪೂಜೆ ಸೇವೆನ್ ಕೊರ್ದು ಶ್ರೀ ಗುರು ದೇವೆರ್ನ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ಹಳೆಯಂಗಡಿ ಬಿಲ್ಲವ ಸಂಘದ ಗುರ್ಕಾರೆರ್ ಚಂದ್ರಶೇಖರ್ ನಾನಿಲ್ ಬಿನ್ನಾಪು ಮಲ್ದೆರ್.
ಉಚ್ಚಿಲದ ಶ್ರೀ ಮಹಾಲಕ್ಷ್ಮಿ ದೇವಲ್ಯಡ್ ವರಮಹಾಲಕ್ಷ್ಮಿ ಪೂಜೆ ಇನಿ ನಡತ್ಂಡ್.
ಕೆ ವಿ ರಾಘವೇಂದ್ರ ಉಪಾಧ್ಯಾಯ, ಕೆ ವಿ ವಿಷ್ಣುಮೂರ್ತಿ ಉಪಾಧ್ಯಾಯ ಮೊಕ್ಲೆನ ಮುತಾಲಿಕೆಡ್, ಶ್ರೀಶ ಭಟ್ ಮೇರ್ ಪೂಜೆದ ವಿಧಿ ವಿಧಾನನ್ ಮಲ್ತೆರ್.
ಈ ಪೊರ್ತುಡು ಮೊಗವೀರ ಮುಂದಾಳು ಡಾ. ಜಿ ಶಂಕರ್, ಮೊಗವೀರ ಮಹಾಜನ ಸಂಘದ ಗುರ್ಕಾರ್ರೆ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ರೆ ಗುಂಡು ಬಿ ಅಮೀನ್, ಕ್ಷೇತ್ರಡಳಿತ ಮಂಡಳಿದ ಗುರ್ಕಾರ್ರೆ ವಾಸುದೇವ ಸಾಲ್ಯಾನ್, ಮಹಾಜನ ಸಂಘದ ಮಹಿಳಾ ಘಟಕದ ಗುರ್ಕಾರ್ದಿ ಉಷಾರಾಣಿ ಬೋಳೂರು, ದೇವಲ್ಯದ ಪ್ರಧಾನ ಪ್ರಬಂಧಕೆರ್ ಸತೀಶ್ ಅಮೀನ್ ಬೊಕ್ಕ ಸಾರರ್ದ್ ಎಚ್ಚ ಸಂಖ್ಯೆಡ್ ಪೊಂಜೋವ್ ನಕುಲು ಪಾಲ್ ಪಡೆದಿತ್ತೆರ್.
ಒಡಿಪು: ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಬಂಗಾರ್ ಕಂಡಿನ ಆರೋಪಿನ್ ಕಾಪು ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಕಾಪು ಏಣಗುಡ್ಡೆ ಗ್ರಾಮದ ಜೋನ್ ಪ್ರಜ್ವಲ್ ಫೆರ್ನಾಂಡಿಸ್ (32) ಆರೋಪಿ ಮೇರ್ ಕಾಪು ಉದ್ಯಾವರ ಅನಿತಾ ಡಿಸಿಲ್ವಾ ಮೆರೆನ ಇಲ್ಲಡ್ ಇತ್ತಿನ 5,50,000/- ರೂ ಬಿಲೆತ್ತ ಬಂಗಾರ್ ಬೊಕ್ಕ ಬೊಳ್ಳಿನ್ ಕಂಡ್ ದಿನ ಬಗೆಟ್ಟ್ ಕಾಪು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಬೊಲ್ತೆರ್: ಶ್ರೀ ಗುರುನಾರಾಯಣ ಸ್ವಾಮಿ ಸೇವಾ ಸಂಘ ಬೊಲ್ತೆರ್ ನೆತ್ತ ಒಟ್ಟು ಸೇರಿಗೆ ಡ್ ಯುವ ಬಿಲ್ಲವ ವೇದಿಕೆದ ಸಹಕಾರ ಡ್ ಬಿಲ್ಲವ ಮಹಿಳಾ ಮುತಾಲಿಕೆ ಶ್ರೀ ವರಮಹಾಲಕ್ಷ್ಮೀ ಪೂಜೆ ಸಂಘದ ಸಭಾ ಭವನ ಡ್ ನಡತ್ಂಡ್.
ಲಲಿತ ಸಹಸ್ರನಾಮ ಬೊಕ್ಕ ಶ್ರೀ ದೇವಿ ಅಷ್ಟೋತ್ತರ ಪಾರಾಯಣ, ಭಜನಾ ಕಾರ್ಯಕ್ರಮ ನಡತ್ಂಡ್. ವೃತದಾರಿಲು ಈ ಪೂಜೆಡ್ ಪಾಲ್ ಪಡೆದ್ ಇತ್ತೆರ್. ಅರ್ಚಕೆರಾಯಿನ ರಘುನಾಥ ಶಾಂತಿ ಪೂಜೆ ನಡಪಾದ್ ಕೊರಿಯೆರ್.
ಈ ಪೊರ್ತುಡ್ ಬೊಲ್ತೆರ್ ಶ್ರೀ ಗುರುನಾರಾಯಣ ಸ್ವಾಮಿ ಸೀವಾ ಸಂಘದ ಗುರ್ಕಾರೆ ಚಿದಾನಂದ ಪೂಜಾರಿ ಎಲ್ದಕ್ಕ, ಬಿಲ್ಲವ ಮಹಿಳಾ ವೇದಿಕೆದ ಗುರ್ಕಾರ್ದಿ ಸುಜಿತಾ ವಿ ಬಂಗೇರ, ಕಾರ್ಯದರ್ಶಿ ಶಾಂಭವಿ ಪಿ ಬಂಗೇರ, ಮಹಿಳಾ ಬಿಲ್ಲವ ವೇದಿಕೆದ ಮಾಜಿ ಗುರ್ಕಾರ್ದಿಲು, ಸಂಘದ ಪದಾಧಿಕಾರಿಲು, ನಿರ್ದೇಶೆಕೆರ್ ಈ ಪೊರ್ತುಡ್ ಇತ್ತೆರ್.
ಕಾಣಿಯೂರು: ಕಾಣಿಯೂರು ಕಣ್ವರ್ಷಿ ಮಹಿಳಾ ಮಂಡಲದ ಮುತಾಲಿಕೆಡ್ 7ನೇ ವರ್ಷೊದ ಸಾಮೂಹಿಕ ಶ್ರೀ ವರಮಹಾಲಕ್ಷ್ಮೀ ಪೂಜೆ ಕಾಣಿಯೂರು ಶ್ರೀ ಲಕ್ಷ್ಮೀ ನರಸಿಂಹ ಭಜನಾ ಮಂದಿರಡ್ (ಆ.25) ಇನಿ ನಡತ್ಂಡ್.
ಅರ್ಚಕೆರ್ ಚಿದಾನಂದ ಉಪಾಧ್ಯಾಯ ಕಲ್ಪಡ ಪೂಜೆದ ವಿಧಿ, ವಿಧಾನನ್ ಮಲ್ತೆರ್. ಬೊಲ್ಪುಗು ಪೂಜೆದ ವಿಧಿ ವಿಧಾನಲು ಸುರು ಆದ್, ಮಧ್ಯಾಹ್ನ ಮಹಾಪೂಜೆ, ಅಂಚೆನೆ ನುಪ್ಪು ಪ್ರಸಾದ ಸೇವೆ ನಡತ್ಂಡ್.
ಈ ಪೊರ್ತುಡು ಕಾಣಿಯೂರು ಕಣ್ವರ್ಷಿ ಮಹಿಳಾ ಮಂಡಲದ ಗುರ್ಕಾರ್ದಿ ಮಮತಾ ಲೋಕೇಶ್ ಅಗಳಿ, ಮಾನಾದಿಗೆದ ಗುರ್ಕಾರ್ದಿ ರೋಹಿಣಿ ಅಬೀರ, ಕಾರ್ಯಂತೆರ್ ನಾಗವೇಣಿ ಬೆದ್ರಾಜೆ ಬೊಕ್ಕ ಪದಾಧಿಕಾರಿಲು ಪಾಲ್ ಪಡೆದಿತ್ತೆರ್.
ಕಾಣಿಯೂರು: ಕಾಯಿಮಣ ಅಗಳಿ ಶ್ರೀ ವರಮಹಾಲಕ್ಷ್ಮೀ ಪೂಜಾ ಸಮಿತಿದ ಆಶ್ರಯಡ್ 6ನೇ ವರ್ಷೊದ ಸಾಮೂಹಿಕ ಶ್ರೀ ವರಮಹಾಲಕ್ಷ್ಮೀ ಪೂಜೆ ಅಗಳಿ ಶ್ರೀ ಸದಾಶಿವ ದೇವಲ್ಯದ ಸಮುದಾಯ ಭವನಡ್ (ಆ.25) ಇನಿ ನಡತ್ಂಡ್.
ಕಾಂಡೆ ಪೂಜೆದ ಪೂಜೆ ವಿಧಿ ವಿಧಾನಲು ಸುರು ಆದ್, ಮಧ್ಯಾಹ್ನ ಮಹಾಪೂಜೆ, ಅವೆರ್ದ್ ಬೊಕ್ಕ ನುಪ್ಪು ಪ್ರಸಾದದ ಸೇವೆ ಭಾರೀ ಪೊರ್ಲುಡು ನಡತ್ಂಡ್.
ಬೆದ್ರ: ಸಂದೇಶ್ ಪಿ.ಜಿ. ಮೇರ್ ಬೆದ್ರದ ಪೊಸ ಇನ್ಸ್ಪೆಕ್ಟರಾದ್ ನೇಮಕ ಆತೆರ್.
ಮೇರ್ ನೆರ್ದ್ ದುಂಬು ಕಾರ್ಲ, ಬೊಲ್ತೇರ್, ಬಜ್ಪೆಡ್ ಕೆಲಸ ಮಲ್ದೆರ್. ಇತ್ತ್ ನೆಟ್ಟ ಬೆದ್ರಡ್ ಇನ್ಸ್ಪೆಕ್ಟರಾದ್ ಇತ್ತಿನ ನಿರಂಜನ್ ಮೇರ್ ಸಕಲೇಶಪುರ ಗ್ರಾಮಾಂತರಗ್ ವರ್ಗಾವಣೆ ಆತೆರ್. ಆರೆನ ಜಾಗೆಗ್ ಸಂದೇಶ್ ನೇಮಕ ಆತೆರ್.
ಮಲ್ಪೆ: ಒಡಿಪುದ ಶಾಸಕೆ ಯಶ್ಪಾಲ್ ಸುವರ್ಣ ಮೆರೆನ ಪುಟ್ಟುಪರ್ಬಗು ಎಡ್ಡೆಪ್ಪು ಬಯಕ್ ದ್ ಒಡಿಪು ಜಿಲ್ಲೆದ ಹಿಂದೂ ಯುವಸೇನೆ ಸನ್ಮಾನ ಬಲ್ಮನ ಮಲ್ಪುನ ಮುಖೇನ ಪುಟ್ಟುಪರ್ಬದ ಗೌಜಿನ್ ಆಚರಣೆ ಮಲ್ತ್ಂಡ್.
ಈ ಪೊರ್ತುಡು ಯುವಸೇನೆದ ಮಾನಾದಿಗೆದ ಗುರ್ಕಾರ್ಲು ಆಯಿನ ಶೇಖರ್ ಶೆಟ್ರ್ ಪಾತೆರ್ದ್, ಯಶ್ಪಾಲ್ ಸಿದ್ದಾಂತದೊಟ್ಟಿಗೆ ಇಪ್ಪುನಾರ್, ಒವ್ವೇ ಬೋರ್ಚಂದಿನ ಕೆಲಸಗ್ ರಾಜಿ ಅವಂದೆ ಎಲ್ಯ ಪ್ರಾಯಡೇ ಸಹಕಾರಿ ನಾಯಕೆಯಾದ್, ಕುಡ್ಲ ಮೀನುಗಾರಿಕೆ ಫೆಡರೇಶನ್ ದ ಗುರ್ಕಾರ್ರೆಯಾದ್, ಶಿಕ್ಷಣ ಧಾರ್ಮಿಕ ಕ್ಷೇತ್ರಡ್ ಬೇತೆ ಬೇತೆ ಕಾರ್ಯ ವೈಖರಿರ್ದ್ ದಕ್ಷ ಆಡಳಿತಗಾರೆಯಾದ್ ಕೆಲಸ ಮಲ್ತಿನಾರ್. ಇತ್ತೆ ಶಾಸಕೆಯಾದ್ ಒಡಿಪುದ ಕ್ಷೇತ್ರದ ಜನಕ್ಲೆನ ಕಷ್ಟಗ್ ಸಕಾಯ ಅವೊಂದಿಪ್ಪುನವು ನಮಕ್ ಪೆರ್ಮೆ ಪಂದ್ ಪಂಡೆರ್.
ಯಶ್ ಪಾಲ್ ಸುವರ್ಣ ಮೇರ್ ಪಾತೆರ್ದ್, ಒಡಿಪು ಕ್ಷೇತ್ರದ ಸಮಗ್ರ ಅಭಿವೃದ್ಧಿದೊಟ್ಟಿಗೆ ಮುಲ್ಪದ ಜೀವಂತ ಸಮಸ್ಯೆಲೆನ್ ನಿವಾರಣೆ ಮಲ್ಪುನ ದಿಟ್ಟಿಡ್ ಮಾತ ಪ್ರಯತ್ನ ಮಲ್ಪುವ ಪಂದ್ ಪಂಡೆರ್.
ಈ ಪೊರ್ತುಡು ಹಿಂದೂ ಯುವ ಸೇನೆದ ಜಿಲ್ಲಾಧ್ಯಕ್ಷೆರ್ ಅಜಿತ್ ಕೊಡವೂರು, ಉಪಾಧ್ಯಕ್ಷೆರ್ ಪ್ರಶಾಂತ್ ಸುವರ್ಣ, ಸಲಹೆಗಾರೆ ಸನತ್ ಸಾಲ್ಯಾನ್ ಮಲ್ಪೆ, ನಗರಾಧ್ಯಕ್ಷೆರ್ ಸುನಿಲ್ ನೇಜಾ, ಉಮೇಶ್ ಸುವರ್ಣ, ಸುರೇಶ್ ಸಾಲ್ಯಾನ್, ಪ್ರಭಾತ್ ಕೊಡವೂರು, ಗಣೇಶ್ ಬಂಗೇರ, ಆಶಿತ್ ಕೋಟ್ಯಾನ್, ತ್ರಿಶೂಲ್ ಪುತ್ರನ್, ದಾಸ ಕುಂದರ್, ದಿನೇಶ್ ಶೆಟ್ಟಿಗಾರ್ ಪಾಲ್ ಪಡೆದಿತ್ತೆರ್.
ಯುಎಸ್ಎ ಮಾಜಿ ಗುರ್ಕಾರ್ರೆ ಡೊನಾಲ್ಡ್ ಟ್ರಂಪ್ ಮೆರೆನ್ ಜಾರ್ಜಿಯಾ ಪೊಲೀಸ್ ದಕುಲು ಅರೆಸ್ಟ್ ಮಲ್ದೆರ್.
2020 ನೇ ಇಸವಿಡ್ ಅಧ್ಯಕ್ಷೆರೆನ ವೋಟುದ ಪೊರ್ತುಡು ಅಧಿಕಾರನ್ ದುರುಪಯೋಗ ಮಲ್ದೆರ್ ಪನ್ಪುನ ಆರೋಪ ಬತ್ತಿತ್ತ್ಂಡ್. ಇಂಚಾದ್ ಅಟ್ಲಾಂಟಾದ ಪುಲ್ಟನ್ ಕೌಂಟಿ ಜೈಲ್ ಗ್ ಟ್ರಂಪ್ ಬತ್ತ್ ದ್ ಇತ್ತೆರ್ ಪಂದ್ ವರದಿ ಆತ್ಂಡ್. ಅತ್ತಂದೆ ಮೆರೆನ ಮಿತ್ತ್ ಏಪ್ರಿಲ್ ರ್ದ್ ಇಡೇ ಮುಟ್ಟ 4 ಸರ್ತಿ ಕ್ರಿಮಿನಲ್ ಆರೋಪ ಕೇಂಡ್ ದ್ ಬೈದ್ಂಡ್. ಈ ನಿಲೆಟ್ಟ್ ಮೆರೆನ್ ಜಾರ್ಜಿಯಾ ಪೊಲೀಸ್ ದಕುಲು ಅರೆಸ್ಟ್ ಮಲ್ದೆರ್
