January 2023

ಜಾರಿಗೆಕಟ್ಟೆ ಶ್ರೀ ಕೊರಗಜ್ಜ ಬೊಕ್ಕ ಕೊರಗರ ಪಂಜುರ್ಲಿ ಕ್ಷೇತ್ರಡ್ ಪರಕೆದ ನೇಮೋಚ್ಚಯ

ಜಾರಿಗೆಕಟ್ಟೆ ಶ್ರೀ ಕೊರಗಜ್ಜ ಬೊಕ್ಕ ಕೊರಗರ ಪಂಜುರ್ಲಿ ಕ್ಷೇತ್ರಡ್ ಜ.19 ತಾರೀಕ್ ಗುರುವಾರ ಮಧ್ಯಾಹ್ನ 2.30 ಗಂಟೆರ್ದ್ ಶ್ರೀ ಸತ್ಯದೇವತೆ, ಪಿಲಿಚಾಮುಂಡಿ, ಮಂತ್ರದೇವತೆ, ವರ್ತೆ ಪಂಜುರ್ಲಿ, ಕೊರಗರ ಪಂಜುರ್ಲಿ, ಕೊರತಿ ಅಂಚನೆ ಕೊರಗಜ್ಜ ದೈವದ ಪರಕೆದ ನೇಮೋಚ್ಚಯ ನಡಪರೆ ಉಂಡು.

ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೈವದ ಗಂಧ ಪ್ರಸಾದನ್ ದೆತೊಂದು ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀಧರ ಪೂಜಾರಿ ಬಜಗೋಳಿ ಅಂಚನೆ ಸಮಿತಿದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಆಳ್ವಾಸ್‌ಡ್ 27 ಸಾರರ್ದ್ ಎಚ್ಚದ ಕಲ್ಪಾರ್ಥಿಲೆರ್ದ್ ಯೋಗಥಾನ್

ಬೆದ್ರ: “ಯೋಗದ ಮಹತ್ವನ್ ಅಯಿತ್ತ ಪ್ರಯೋಜನನ್ ಜಗತ್ತ್‌ಗ್ ಸಾರಿನ ದೇಶ ಭಾರತ. ಇಂಚಿನ ಯೋಗದ ಪ್ರಾಮುಖ್ಯತೆನ್ ಸಾರುನ ವಿಶಿಷ್ಟವಾಯಿನ ಉಚ್ಚಯನ್ ಕರ್ನಾಟಕ ಯೋಗಥಾನ್ ಅಟ್ಟನೆ ಮಲ್ತಿನವು ಸಂತೋಷದ ಇಚಾರ” ಪಂದ್ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ತೆರಿಪಾಯೆರ್.

ರಾಜ್ಯ ಸರ್ಕಾರದ ನಿರ್ದೇಶನಡ್ 26ನೇ ರಾಷ್ಟ್ರೀಯ ಯುವಜನೋಚ್ಚಯದ ಅಂಗವಾದ್ ದಕ್ಷಿಣ ಕನ್ನಡ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತಿ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ, ಯುವಜನಸೇವೆ ಬೊಕ್ಕ ಕ್ರೀಡಾ ಇಲಾಖೆ ಅಂಚನೆ ಆಳ್ವಾಸ್ ಪ್ರತಿಷ್ಠಾನದ ಮುತಾಲಿಕೆಡ್ ಗಿನ್ನೆಸ್ ದಾಖಲೆದ ಪ್ರಯತ್ನವಾದ್ “ಯೂತ್ ಫಾರ್ ಯೋಗ” ಪನ್ಪಿನ ಕಲ್ಪನೆದೊಟ್ಟುಗು “ಯೋಗಥಾನ್ 2023” ನ್ ಪುತ್ತಿಗೆದ ವನಜಾಕ್ಷಿ ಕೆ. ಶ್ರೀಪತಿ ಭಟ್ ವೇದಿಕೆಡ್ ಜ. 15 ಐತಾರ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಈ ಪೊರ್ತುಡು ಮುಲ್ಕಿ-ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಜಿಲ್ಲಾ ಪಂಚಾಯತಿ ಸಿಇಒ ಡಾ.ಕುಮಾರ್, ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಡಾ.ಎಂ.ಮೋಹನ ಆಳ್ವ ಸೇರಿನಂಚನೆ ಮಸ್ತ್ ಬಿನ್ನೆರ್ ಇತ್ತೆರ್.