2022

ಮಾರ್ಗದ ಗುಂಡಿಗ್ ಬೂರ್ದು ದೇವೆರೆ ಪಾದ ಸೇರ್ಯೆರ್ ನಿವೃತ್ತ ಯೋಧೆ

ಮಂಡ್ಯ: ನಿವೃತ್ತ ಯೋಧೆ ಒರಿ ಮಾರ್ಗದ ಗುಂಡಿನ್ ತಪ್ಪಾವರೆ ಪೋದು ಗಾಡಿರ್ದ್ ತಿರ್ತ್ ಬೂರ್ದು ತೀರ್ ಪೋತಿನ ಘಟನೆ ಮಂಡ್ಯದ ಕಾರೆಮನೆ ಗೇಟ್ ದ ಕೈತಲ್ ನಡತ್ಂಡ್.

ಎಸ್.ಎನ್. ಕುಮಾರ್ (39) ತೀರ್ ಪೋಯಿನಾರ್. ಅರೆನ ಪೊಪ್ಪನ ಒಟ್ಟಿಗೆ ಬೈಕ್‍ಡ್ ಪೋವೊಂದು ಇಪ್ಪುನಗ ಕುಮಾರ್ ಗುಂಡಿನ್ ತಪ್ಪಾಯೆರೆ ಪೋದು ಎದುರುರ್ದ್ ಬತ್ತಿನ ಬೈಕ್‍ಗ್ ಗುದ್ದುದು ತಿರ್ತ್ ಬೂರ್ದೆರ್. ಈ ಪೊರ್ತುಡು ಪಿರವುರ್ದ್ ಬತ್ತಿನ ಲಾರಿ ಮೆರೆಗ್ ಗುದ್ದುಂಡು. ಮೇರ್ ಆ ಜಾಗೆಡೇ ತೀರ್ ಪೋತೆರ್. ಮೆರೆನ ಪೊಪ್ಪ ಪ್ರಾಣಾಪಾಯರ್ದ್ ಪಾರಾತೆರ್. ಸೇನೆಡ್ ಸೇವೆ ಸಂದಾದ್ ಇಂಚಿಪ್ಪ ನಿವೃತ್ತಿ ಆಯಿನ ಮೇರ್ ಪೊಲೀಸ್ ಟ್ರೈನಿಂಗ್ ಗ್ ಪೋವೊಂದು ಇತ್ತೆರ್. ಕೋಡೆ ಸ್ವಂತ ಊರು ಸಾತನೂರು ಗ್ರಾಮಗ್ ಮೇರ್ ಬತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್. ಈ ಬಗೆಟ್ ಮಂಡ್ಯ ಸಂಚಾರಿ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಮುಲ್ಕಿ ರಾಜ್ಯ ಹೆದ್ದಾರಿದ ಗುಂಡಿ ಮುಚ್ಚಿಯೆರ್ ಸಮಾಜಸೇವಕಿ ಸುಪ್ರೀತ ಬೊಕ್ಕ ಕೂಟದಕುಲು

ಮುಲ್ಕಿ: ಸಮಾಜ ಸೇವಕಿ ಸುಪ್ರೀತ ಬೊಕ್ಕ ಮೆರೆನ ಕೂಟದಕುಲು ಮುಲ್ಕಿ ವಿಜಯ ಸನ್ನಿಧಿ ಕೈತಲ್ ದ ರಾಜ್ಯ ಮಾರ್ಗಡ್ ಇತ್ತಿನ ಮಲ್ಲ ಗುಂಡಿಲೆನ್ ಐತಾರ (ನ.13) ರಾತ್ರೆ ಶ್ರಮದಾನ ಮಲ್ತ್‌ದ್ ಮುಚ್ಚಿದ್ ಜನಕ್ಲೆನ ಮೆಚ್ಚಿಗೆ ಪಡೆದೆರ್.

ಸುರಭಿ ಎಲೆಕ್ಟ್ರಾನಿಕ್ಸ್ ಸಿಬಂದಿ ಸುಪ್ರೀತ ಬೊಕ್ಕ ಮೆರೆನ ಟೀಮ್ ದ ಸದಸ್ಯೆರಾಯಿನ ಸಚಿನ್, ನರೇಶ್, ರಮೇಶ್, ಸಂಪತ್ ಬೊಕ್ಕ ಐಸನ್ ಡಿಸೋಜಾ ಮೆರೆನೊಟ್ಟಿಗೆ ವಿಜಯ ಸನ್ನಿಧಿ ದ ಎದುರುದ ಮಾರ್ಗದ ಗುಂಡಿಗ್ ಕಾಂಕ್ರೀಟ್ ಪಾಡ್ದ್ ಶಾಶ್ವತವಾದ್ ಮುಚ್ಚಿದೆರ್.

ಮೊಕ್ಲೆಗ್ ಶ್ರೀನಿಧಿ ಸ್ಪನ್ ಪೈಪ್ ಫ್ಯಾಕ್ಟರಿ ಮೂಲ್ಕಿ, ನೆತ್ತ ಮಾಲಿಕೆರಾಯಿನ ನಾಗರಾಜ್ ಬೊಕ್ಕ ಸುರಭಿ ಎಲೆಕ್ಟ್ರಾನಿಕ್ಸ್ ದ ಜಾನ್ ಕ್ವಾಡ್ರಸ್ ಸಿಮೆಂಟ್, ಜಲ್ಲಿ, ಪೊಯ್ಯೆ ಕೊರ್ದು ಸಕಾಯ ಮಲ್ತೆರ್.

ಅವ್ವತ್ತಂದೆ ಈ ಗುಂಡಿ ಮುಚ್ಚೆರೆ ಮೂಲ್ಕಿ ಪೊಲೀಸ್ ಸಿಬಂದಿ ವೀರೇಶ್ ಮೇರ್ ರಾತ್ರೆ 8 ಗಂಟೆರ್ದ್ 12ಗಂಟೆ ಮುಟ್ಟ ಅಕ್ಲೆನ ಒಟ್ಟಿಗೆ ಕಜ್ಜ ಮಲ್ತ್ ದ್ ಸಕಾಯ ಮಲ್ತೆರ್. ಕಾಂಕ್ರೀಟ್ ಪಾಡಿಯೆರ್ ಬೊಡಾಯಿನ ನೀರನ್ ಮುಲ್ಕಿ ಬಿಲ್ಲವ ಸಮಾಜಸೇವಾ ಸಂಘದಕುಲು ಕೊರ್ತೆರ್.

ಮೂಜಿ ಜನ ನಾಯಿಗ್ ಬಲ್ಲ್ ಪಾಡ್ದ್ ಕೆರ್ತಿನ ವಿಡಿಯೋ ವೈರಲ್

ಗಾಜಿಯಾಬಾದ್ ಡ್ ಮೂಜಿ ಜನ ನಾಯಿಗ್ ಬಲ್ಲ್ ಪಾಡ್ದ್ ಕೆರ್ತಿನ ವಿಡಿಯೋ ಅಂತರ್ಜಾಲಡ್ ವೈರಲ್ ಆತ್ಂಡ್.

ಈ ವೀಡಿಯೊಡ್, ಕಟ್ವಾನ ಕಟ್ಟುನ ಆಂಜೋವುಲು ನಾಯಿದ ನಾಲಿಗ್ ಸಂಕಲೆ ಕಟ್ಟ್ ದ್, ಗೋಡೆಗ್ ನೇಲ್ಪಾವುನನ್ ತೋಜಿದ್ ಬೈದ್ಂಡ್. ಅಕ್ಲೆನೆಟ್ ಒರಿ ಸಂಕಲೆನ್ ಒಯಿಪುವೆ.. ನೇರ್ದ್ ನಾಯಿ ಬೇನೆಡ್ ಬುಲಿಪುಂಡು. ಬೊಕ್ಕದಕುಲು ಆಯಗ್ ಪ್ರೋತ್ಸಾಹ ಮಲ್ಪುವೆರ್. ನಾಯಿ ಅಕೆರಿಗ್ ಸೈತ್ಂಡ್. ಈ ಬಗೆಟ್ ಅಕ್ಲೆಗ್ ಪೊಲೀಸೆರ್ ನೋಟಿಸ್ ಕಡಪಾದ್ ಕೇಸ್ ದಾಖಲ್ ಮಲ್ದೆರ್.

ಕ್ರೀಡೆ ವ್ಯಕ್ತಿನ್ ಮಲ್ಲ ಮಟ್ಟಗ್ ಕೊನೊಯೆರೆ ಸಾಧ್ಯ: ಶ್ರೀನಿವಾಸ ಸಾಪಲ್ಯ

ಬೊಂಬೈ: ಜೀವನದ ಪಥಸಂಚಲನಡ್ ಗೊಬ್ಬುದ ಪಂತೊ ಜೀವನಗ್ ಸ್ಪೂರ್ತಿದಾಯಕ ಆತ್ಂಡ್. ಕೇವಲ ಸ್ಫೂರ್ತಿದಾಯಕ ಮಾತ್ರ ಅತ್ತಂದೆ ಅವು ಆ ವ್ಯಕ್ತಿನ್ ಮಲ್ಲ ಮಟ್ಟಗ್ ಕೊನೊಯೆರೆ ಸಾಧ್ಯ, ಆಯಿರ್ದ್ ಗಲಸಿನ ಮಾನ್ಯತೆ, ಆಯಿರ್ದ್ ಪಡೆಯಿನ ಪುರಸ್ಕಾರ ಅವು ಜೀವನಪರ್ಯಂತ ನೆಂಪು ದೀಯೆರೆ ಸಾಧ್ಯ ಪಂದ್ ಸಾಫಲ್ಯ ಸೇವಾ ಸಂಘ, ಬೊಂಬೈ ನೆತ್ತ ಅಧ್ಯಕ್ಷೆರ್ ಶ್ರೀನಿವಾಸ ಸಾಪಲ್ಯ ತೆರಿಪಾಯೆರ್.

ನ. 12 ದಾನಿ ಬೊಲ್ಪುಗು ಕಾಂದಿವಿಲಿ ಪಶ್ಚಿಮದ ಪೊಯ್ಸರ್ ಜಿಮ್ಕಾನಡ್ ನಡತಿನ ಸಾಫಲ್ಯ ಸೇವಾ ಸಂಘ, ಬೊಂಬೈ- ಕ್ರೀಡಾ ಪಂತೊ-2022 ಕ್ ಉದಿಪನ ಕೊರ್ದು ಲೇಸ್ ದ ಅಧ್ಯಕ್ಷತೆನ್ ಒಯಿಸೊಂದು ಪಾತೆರ್ಯೆರ್. ಒಂಜಿ ವ್ಯಕ್ತಿ ಗೊಬ್ಬುದ ಪಂತೊಡ್ ಯಶಸ್ಸಿ ಆತೆರ್ ಪಂಡ ಆಯಿತ ಪಿರವು ಮಲ್ಲ ಪರಿಶ್ರಮ ಉಂಡು. ಜೋಕುಲೆನ ಗೊಬ್ಬುದ ಪಂತೊಲೆಡ್ ದಿನೇಶ್ ಪಾಪು ಗುಣ್ಕೂರು ಟೀಮ್ ದ ಸಂಗೀತ ಕಲಾವಿದೆ ಲೇಸ್ ದ ಇಸೇಸ ಕಾರ್ಯಕ್ರಮಡ್ ಅಂತರಾಷ್ಟ್ರೀಯ ಮಟ್ಟಡ್ ಮಿನ್ಕುದು ಬಂಗಾರ್ ದ ಪದಕ ಕನತ್ ದ್, ಕೇವಲ ಪೊಪ್ಪ, ಅಮ್ಮ ಮಾತ್ರ ಅತ್ತಂದೆ, ನೇರ್ದ್ ಅಕ್ಲೆನ ಜಾತಿದ ಸಂಘಟನೆಗ್ಲಾ ಸಂತೋಷನ್ ಕೊರ್ತುಂಡು ಪಂಡೆರ್.

ಜನವರಿ 22 ದಾನಿ ಬಂಟರ ಸಂಘಡ್ ನಡಪರೆ ಇಪ್ಪುನ ಸಾಫಲ್ಯ ಸೇವಾ ಸಂಘದ ಉಚ್ಚಯಗ್ಮಾ ತೆರ್ಲಾ ಬತ್ತ್ ದ್ ಸಕಾಯ ಮಲ್ಪೊಡು ಪಂದ್ ಪಂಡೆರ್. ಸಾಫಲ್ಯ ಸಮಾಜದ ಯುವಪ್ರತಿಭೆ ಅಂತಾರಾಷ್ಟ್ರೀಯ ಅಥ್ಲೆಟಿಕ್, ರಾಷ್ಟ್ರೀಯ ಜಂಪ್ ರೋಪ್ ಚಾಂಪಿಯನ್ ಮಾಸ್ಟರ್ ಇಶಾನ್ ಪುತ್ರನ್ ಮೇರ್ ಕ್ರೀಡೋತ್ಸವನ್ ಉದಿಪನ ಮಲ್ತ್‌ದ್ , ಪಾತೆರ್ದ್ ತನ್ನ ಯಶಸ್ಸಿಗ್ ಆಶೀರ್ವಾದ ಮಲ್ತಿನ, ಸಕಾಯ ಮಲ್ತಿನ ಮಾತೆರೆಗ್ಲಾ ಸೊಲ್ಮೆ ಸಂದಾವೊಂದು ಉಲ್ಲೆ, ಸದ್ಯಡೇ ಥೈಲೇಂಡ್ ಡ್ ನಡಪರೆ ಇಪ್ಪುನ ಅಂತರಾಷ್ಟ್ರೀಯ ಮಟ್ಟಡ್ ಪಾಲ್ ಪಡೆಯೆರೆ ಉಲ್ಲೆ. ನಿಕ್ಲೆನ ಮಾತೆರ್ನಾಲ ಆಶೀರ್ವಾದ ಎಂಕ್ ಇಪ್ಪಡ್ ಪಂದ್ ಪಂಡೆರ್. ಗೌರವ ಬಿನ್ನೆರಾಯಿನ ರೇನ್ಬೋ ಬುಡೋಕನ್ ಕರಾಟೆ ಅಕಾಡೆಮಿದ ಸ್ಥಾಪಕೆರ್ ವಸಂತ್ ಶೆಟ್ಟಿ ಮೇರ್ ಪಾತೆರ್ದ್, ತುಳು ಬಾಷೆ ಪಾತೆರ್ಯೆರೆ ಎಂಕ್ ಮಸ್ತ್ ಇಷ್ಟ. ಪೊಪ್ಪ ಅಮ್ಮನ ಮಾತೃ ಬಾಷೆನ್ ನಮ ಪಾತೆರ್ಯೆರೆ ಕಲ್ಪೊಡು. ಜೋಕುಲು ಎಡ್ಡೆಂತ್ ನಕ್ಲೆನ ಸಹವಾಸನ್ ಮಲ್ಪುನೆರ್ದ್ ಎಡ್ಡೆಂತ್ ನೆನ್ ಕಲ್ಪುವೆರ್. ಗೊಬ್ಬುಡು ಸುರುಕು ಜಿಲ್ಲಾ ಮಟ್ಟಡ್, ರಾಜ್ಯ ಮಟ್ಟಡ್, ರಾಷ್ಟ್ರಡ್ ಬೊಕ್ಕ ಅಂತಾರಾಷ್ಟ್ರೀಯ ಮಟ್ಟಡ್ ಪಾಲ್ ಪಡೆವೊಡು. ಪ್ರತಿಯೊರಿ ಕ್ರೀಡಾ ಪಟುಗ್ ಗೆಂದುನೆರ್ದ್ ಗೊಬ್ಬುಡು ಪಾಲ್ ಪಡೆಪುನೆ ಮುಖ್ಯ. ಓದುನ ಒಟ್ಟಿಗೆ ಗೊಬ್ಬುಲ ಮುಖ್ಯ ಪಂದ್ ಪಂಡೆರ್. ಉದ್ಯಮಿ ಬೊಕ್ಕ ಅಂತಾರಾಷ್ಟ್ರೀಯ ಕರಾಟೆ ಚಾಂಪಿಯನ್ ನಾಗೇಶ್ ಎನ್ ಸಪಲ್ಯ ಪಾತೆರ್ದ್, ನಮ್ಮ ಕುಂಟುಂಬದ ಲೇಸ್ ದಂಚ ಉಂಡು. ಮತೆರೆನ್ಲಾ ಮುಲ್ಪ ತೂಯೆರೆ ಖುಷಿ ಅಪುಂಡು. ಈ ಸಂಘಗ್ ಎನಾರ್ದ್ ಆಯಿನಾತ್ ಸಕಾಯನ್ ಮಲ್ಪುವೆ ಪಂದ್ ಪಂಡೆರ್.

ಈ ಪೊರ್ತುಡು ಬಿನ್ನೆರಾದ್, ಸಾಹಿಲ್ ಕುಮಾರ್ ಕಾರ್ಲ, ಉಪಾಧ್ಯಕ್ಷೆರಾದ್ ಕೃಷ್ಣಕುಮಾರ್ ಬಂಗೇರ, ಪ್ರಧಾನ ಕಾರ್ಯದರ್ಶಿ ಶೋಭಾ ಬಂಗೇರ, ಕೋಶಾಧಿಕಾರಿ ಹೇಮಂತ್ ಸಪಲಿಗ, ಕ್ರೀಡಾ ಸಮಿತಿದ ಅಧ್ಯಕ್ಷೆರ್ ಜೀವನ್ ಸಿರಿಯಾನ್, ಕಾರ್ಯಕಾರಿ ಸಮಿತಿದ ಸದಸ್ಯೆರ್, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ಕಲಾ ಬಂಗೇರ, ಯುವ ವಿಭಾಗದ ಕಾರ್ಯಾಧ್ಯಕ್ಷೆ ಸಂದ್ಯಾ ಪುತ್ರನ್, ಕ್ರೀಡಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಜೀವನ್ ಶ್ರೀಯಾನ್ ಇತ್ತೆರ್. ಮೊಕ್ಲೆನ ಮತೆರ್ನಾಲ ಪಾಲ್ವಿಕೆಡ್ ಪುಗ್ಗೆ ರಾಪಾದ್, ಗೊಬ್ಬುಗ್ ಉದಿಪನ ಮಲ್ತೆರ್. ಯುವ ವಿಭಾಗದ ಕಾರ್ಯಾದರ್ಶಿ ಶ್ವೇತಾ ಬಂಗೇರ ಬೊಕ್ಕ ಉಷ ಸಪಲಿಕ ಲೇಸ್ ನ್ ನಿರ್ವಹಣೆ ಮಲ್ತೆರ್. ಬಿನ್ನೆರೆನ್ ಐಶ್ವರ್ಯ, ಸಂದ್ಯಾ ಪುತ್ರನ್, ದಿಶಾ ಬಂಗೇರ ಪರಿಚಯ ಮಲ್ತೆರ್. ಕೂಟಗ್ ತೀರ್ಪುಗಾರೆರಾದ್ ಸೌರಬ್ ಕಟಾವತೆ, ಅನಿಕೇತ್ ದಲ್ವಿ, ರೋಹನ್ ಪದ್ವಾಲ್, ಅದಿತ್ಯ ಬೊಕ್ಕ ಮಹೇಶ್ ಸಕಾಯ ಮಲ್ತೆರ್.

ಈ ಪೊರ್ತುಡು ಗೊಬ್ಬು ಪಂತೊದ ದಾನಿಲಾದ್ ಸಕಾಯ ಮಲ್ತಿನ ಮಾತೆರೆನ್ಲಾ ಮಾನಾದಿಗೆ ಮಲ್ತೆರ್. ಬೇತೆ ಬೇತೆ ರೀತಿದ ಗೊಬ್ಬುದ ಪಂತೊನ್ ಅಟ್ಟಣೆ ಮಲ್ತಿನ ಈ ಕ್ರೀಡೋತ್ಸವಡ್ ಪೊಂಜೋವ್ ನಕ್ಲೆಗ್, ಆನ್ಜನಕ್ಲೆಗ್, ಇಸೇಸವಾದ್ ಜೋಕುಲೆಗ್ ಕ್ರಿಕೆಟ್ ಟೂರ್ನಮೆಂಟ್ ನಡತ್ಂಡ್. ಕ್ರೀಡಾಕೂಟಡ್ ಹಿರಿಯೆರ್ ಕಿರಿಯೆರ್ ಪಾಲ್ ಪಡೆದ್, ಥ್ರೋಬಾಲ್, ಪೊಂಜೋವ್ ನಕ್ಲೆನ ಬೊಕ್ಕ ಅನ್ಜೋವ್ ನಕ್ಲೆನ ಕ್ರಿಕೆಟ್ ಗೊಬ್ಬು ನಡತ್ಂಡ್. ಅಂಚನೆ ಲಕ್ಕಿಡಿಪ್ ಡ್ರಾ ಬೊಕ್ಕ ಗೆಂದಿನಕ್ಲೆಗ್ ಬಂಗಾರದ ನಾಣ್ಯಲೆನ್ ಕೊರ್ಯೆರ್. ಧರ್ಮಾಗ್ ವೈದ್ಯಕೀಯ ಶಿಬಿರದ ವ್ಯವಸ್ಥೆನ್ ಮಲ್ತೆರ್. ಸಚಿನ್ ಸಲ್ಯಾನ್ ಈ ಬಗೆಟ್ ಮಾಹಿತಿ ಕೊರ್ಯೆರ್. ಕ್ರೀಡಾ ಪಂತೊದ ಯಶಸ್ಸಿಗ್ ಸಂಘದ ಕಾರ್ಯಕಾರಿ ಸಮಿತಿ ಬೊಕ್ಕ ಉಪಸಮಿತಿದ ಮತ ಸದಸ್ಯೆರ್ ಸಕಾಯ ಮಲ್ತೆರ್. ಬೊಕ್ಕ ಬೇತೆ ಬೇತೆ ರೀತಿದ ಕ್ರೀಡಾಕೂಟಲು ನಡತ್ಂಡ್.

ಕಾರ್ ಜಾರ್ದ್ ಕಡಲ್ ಗ್ ಬೂರ್ದು ತೀರ್ ಪೋಯೆರ್ ಮೀನುಗಾರೆ

ಮಲ್ಪೆ: ಬಂದರ್ ದ ಉಲಯಿ ಕಾರ್ ಜಾರ್ದ್ ಮೀನುಗಾರೆ ಒರಿ ನೀರ್ ಡ್ ಮುರ್ಕುದು ತೀರ್ ಪೋಯಿನ ಘಟನೆ ಐತಾರ ಬೊಲ್ಪುಗು ನಡತ್ಂಡ್.

ಕಟಪಾಡಿ ಮಟ್ಟು ನಿವಾಸಿ ಸಂತೋಷ್ ತಿಂಗಳಾಯ(35) ತೀರ್ ಪೋಯಿನಾರ್. ಮೇರ್ ಜೈಬಲರಾಮ್ ಲೈ ಲ್ಯಾಂಡ್ ಬೋಟ್ ಡ್ ಪೋನಗ ಕಾರ್ ಜಾರ್ದ್ ನೀರ್ ಗ್ ಬೂರ್ದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಮಲ್ಪೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಡಿ.13: ಶಿರ್ವಡ್ 27 ನೇ ವರ್ಷದ ಸೂರ್ಯಚಂದ್ರ ಜೋಡು ಕರೆ ಕಂಬುಲ

ತುಳುನಾಡ್ ದ ಧಾರ್ಮಿಕ ಆಚರಣೆದ ಹಿನ್ನೆಲೆ ಇಪ್ಪುನ ಶಿರ್ವ ನಡಿಬೊಟ್ಟು ಸೂರ್ಯ-ಚಂದ್ರ ಸಂಪ್ರದಾಯಬದ್ಧ ಜೋಡು ಕರೆ ಕಂಬುಲ ಈ ಸರ್ತಿ ಡಿಸೆಂಬರ್ ತಿಂಗೊಲ್ದ 13ದಾನಿ ನಡಪರೆ ಉಂಡು.

ಎಲ್ಲೂರು ಶ್ರೀ ವಿಶ್ವೇಶ್ವರ ದೇವಲ್ಯದ ಮಾಜಿ ಆಡಳಿತ ಮೊಕ್ತೇಸರೆರ್ ಪ್ರಫುಲ್ಲ ಶೆಟ್ಟಿ ಮೇರ್ ದೀಪ ಪೊತ್ತಾದ್ ಜೋಡು ಕರೆಕ್ ಕಾಯಿ ಹಾಕುನ ಮುಖೇನ ಕಂಬುಲನ್ ಉದಿಪನ ಮಲ್ಪುವೆರ್. ಶತಮಾನಲೆರ್ದ್ ನಡತೊಂದು ಬತ್ತಿನ ಐತಿಹಾಸಿಕ ಶಿರ್ವ ಮಹತೋಭಾರ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಪೂತ್ತ ಪೂಜೆ ಆದ್, ನಾಗದೇವೆರೆಗ್ ತನು ತಂಬಿಲ ಸಮರ್ಪಣೆ ಆಯಿನ ಬೊಕ್ಕ ನಡುಬೊಟ್ಟು ಚಾವಡಿದ ದೈವ ಜುಮಾದಿನ ಪೂಜೆ ಪುರಸ್ಕಾರ ಲೇಸ್ ಸುರು ಆಪುಂಡು.

ಚಾವಡಿದ ದೈವ ಜುಮಾದಿಗ್ ಪೂಜೆ ಪುರಸ್ಕಾರ ನಡತಿನ ಬೊಕ್ಕ ಬಂಟ ಕೋಲ ಮೆರವಣಿಗೆಡ್ ಕೊಂಬು, ವಾದ್ಯ ಲೆರ್ದ್ ಇಲ್ಲದ ಎರ್ಲೆನ್ ಕಂಬುಲದ ಕಲಕ್ಕ್ ಜಪುಡಾವೆರ್. ಸುಮಾರ್ ಪಿರವುದ ಕಾಲದ ಕ್ರಮದಂಚನೆ ಕಂಬುಲ ಕೂಟ ಶಿರ್ವ ನಡಿಬೊಟ್ಟು ಇಲ್ಲದ ಎರ್ಲೆದ ಬಲಿಪುದೊಟ್ಟುಗು ಕಂಬುಲ ಸುರು ಆದ್, ಶಿರ್ವ ನಂಗೆಟ್ಟು ಇಲ್ಲದ ಎರ್ಲು ಬಲಿಪುದೊಟ್ಟಿಗೆ ಕಂಬುಲ ಮುಗಿವುಂಡು. ಶಿರ್ವ ನಡಿಬೆಟ್ಟು ಕಂಬುಲಗ್ ಇಸೇಸ ಧಾರ್ಮಿಕ ಹಿನ್ನೆಲೆ ಉಂಡು. ಶಿರ್ವದ ದೈವ ದೇವೆರೆನ ಉಚ್ಚಯಡ್ ಒಂಜೆಕ್ಕೊಂಜಿ ಸಂಬಂಧ ಉಂಡು. ಸಂಪ್ರದಾಯ ಬದ್ಧವಾದ್ ಕಂಬುಲ ನಡಪುಂಡು.

ಶಿರ್ವ ನ್ಯಾರ್ಮ ಜಾರಂದಾಯ ದೈವೊಲ್ಯಡ್ ನವೆಂಬರ್ ತಿಂಗೊಲ್ಡ್ ಚೌತಿ ಬೊಕ್ಕ ಪರ್ಬದ ಸೇವೆ ಆಯಿನ ಬೊಕ್ಕ ಕಂಬುಲ ನಡಪುನವು ಮುಲ್ಪದ ರೂಢಿ. ನಡಿಬೊಟ್ಟು ಕಂಬುಲ ನಡಪಂದೆ ಶಿರ್ವ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಉಚ್ಚಯದ ಕೊಡಿ ಏರ್ರೆ ಇಜ್ಜಿ. ಕಂಬುಲದ ಬೊಕ್ಕ ಉಚ್ಚಯದ ಕೊಡಿ ಏರುಂಡು. ದೇವೆರ್ನ ಕೊಡಿ ಜಾವಾಯಿನೆತ್ತ ಬೊಕ್ಕ ಬೊಕ್ಕ ಅಂಗಾರೆ ಶಿರ್ವ ಮಹಮ್ಮಾಯಿ ಮಾರಿಗುಡಿಟ್ ಮಾರಿಪೂಜೆಗ್ ದಿನ ನೆಕ್ಕಿ ಆದ್ 2 ನೇ ಅಂಗಾರೆ ಮಾರಿಪೂಜೆ ನಡಪುಂಡು. ಅಂಚನೆ ಏನಿಕಾಲೊರ್ದು ನಡತೊಂದು ಬರ್ಪುನ ಶಿರ್ವ ನಡಿಬೊಟ್ಟು ಕಂಬುಲ 1996 ಟ್ ಶಿರ್ವ ನಡಿಬೊಟ್ಟು ರಘುರಾಮ ನಾಯ್ಕ್ ಮೆರೆನ ಮುತಾಲಿಕೆಡ್ ಸೂರ್ಯ-ಚಂದ್ರ ಜೋಡು ಕೆರೆ ಕಂಬುಲವಾದ್ ಬದಲಾಂಡ್. ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಕಂಬುಲ ಸಮಿತಿಡ್ ಸೇರ್ಪಡೆ ಆದ್ ದಿ.ಗಂಗೆಜಾರ್ ಕುಟ್ಟಿ ಶೆಟ್ರೆನ ಗುರ್ಕಾರ್ಮೆ ಡ್ 1996ರ್ದ್ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ ಕೂಟದ ಸುರುತ ಜೋಡುಕರೆ ಕಂಬುಲ ಶಿರ್ವಡ್ ನಡತೊಂದು ಇತ್ತ್ಂಡ್.

2014 ಟ್ ಸುಪ್ರೀಂಕೋರ್ಟ್ ದ ಆದೇಶದಂಚೆನೆ ಕಂಬುಲದ ದುಂಬುನಾನಿ ಉಂತುಂಡು. ಬೊಕ್ಕ ಕಟ್ಟ್ ಕಟ್ಟಲೆದ ಪ್ರಕಾರ ಮುಗಿಯೊಂದಿತ್ತ್ಂಡ್. ಅನಾದಿ ಕಾಲರ್ದಿಂಚಿಲ ಸಂಪ್ರದಾಯಬದ್ಧವಾದ್ ನಡತೊಂದು ಇತ್ತಿನ ಶಿರ್ವ ನಡಿಬೆಟ್ಟು ಕಂಬುಲ 1996ರ್ದ್ 2014ಮುಟ್ಟ ಕಂಬುಲ ಸಮಿತಿದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲವಾದ್ ನಡತ್ಂಡ್. 2014 ನೇ ಇಸ್ವಿರ್ದ್ ಬೊಕ್ಕ ಇಡೆ ಮುಟ್ಟ ಜೋಡು ಕರೆ ಕಂಬುಲ ಸುಮಾರ್ 45-50 ಜೋಡಿ ಎರ್ಲೆನ್ ಬೊಲ್ಪುರ್ದು ಬಯ್ಯ ಮುಟ್ಟ ಪಗೆಲ್ ಮಾತ್ರ ನಡತೊಂದು ಬರೊಂದು ಉಂಡು. ಈ ಸರ್ತಿ ಜಿಲ್ಲೆದ ಕಂಬುಲ ಸಮಿತಿ ನ.5 ಕ್ಕ್ ಶಿರ್ವ ನಡಿಬೊಟ್ಟು ಕಂಬುಲಗ್ ದಿನ ನಿಗದಿ ಆದಿತ್ತ್ಂಡ್. ಬೊಕ್ಕ ಬೇತೆ ಕಾರಣಲೆರ್ದ್ ಆ ದಿನ ಕಂಬುಲ ನಡಪಯೆರೆ ಆವಂದೆ ಡಿ.13ಕ್ ದಿನ ನೆಕ್ಕಿ ಆತ್ಂಡ್. ಶಿರ್ವ ನಡಿಬೊಟ್ಟು ಇಲ್ಲದ ಯಜಮಾನೆರ್ ದಾಮೋದರ ಚೌಟ ಮೆರೆನ ಮುತಾಲಿಕೆಡ್ ವ್ಯವಸ್ಥಾಪಕೆರ್ ಶಿರ್ವ ನಡಿಬೊಟ್ಟು ಶಶಿಧರ ಹೆಗ್ಡೆ ಮೆರೆನ ಅಂಚೆನೆ ಸಕಾಯರ್ದ್ ಕಂಬುಲನ್ ಪೊರ್ಲುಡೇ ನಡಪಾವೊಂದು ಬರೊಂದು ಉಂಡು. ಅಂಚೆನೆ ಮಧಾಹ್ನ ಅನ್ನಸಂತರ್ಪಣೆ ನಡಪುಂಡು.