ಮೈಸೂರ್ : ನಾಡ್ ದ ಕಲೆ, ಸಂಸ್ಕೃತಿ, ಪರಂಪರೆನ್ ತೊಜಪಾವುನ ನಾಡಪರ್ಬ ಮೈಸೂರ್ ದಸರಾದ ಜಂಬೂ ಸವಾರಿದ ಕ್ಷಣಗಣನೆ ಸುರು ಆತ್ಂಡ್.
ಕೊರೊನಾ ಸೀಕ್ ಇತ್ತಿನೆರ್ದಾವೆರ ಕರಿನ ರಡ್ಡ್ ವರ್ಷ ಅರಮನೆಡ್ ಮಾತ್ರ ಇತ್ತಿನ ನಾಡಪರ್ಬ ಈ ವರ್ಷ ಭಾರಿ ಗೌಜಿಡ ನಡತೊಂದು ಉಂಡು.
ಚಾಮುಂಡೇಶ್ವರಿನ ಅಗ್ರಪೂಜೆದೊಟ್ಟಿಗೆ ಸುರು ಆಯಿನ ಪತ್ತ್ ದಿನತ ದಸರಾ ಉಚ್ಚಯಗ್ ಜಂಬೂಸವಾರಿ ಬೊಕ್ಕ ದೊಂದಿದ ಕವಾಯತ್ ರ್ದ್ ಈ ಪರ್ಬ ಮುಗಿವುಂಡು.
ಈ ಜಂಬೂ ಸವಾರಿನ್ ತೂಯೆರೆ ದೇಶ-ವಿದೇಶರ್ದ್ ಲಕ್ಷಾಂತರ ಪ್ರವಾಸಿಗೆರ್ ಬರ್ಪುರ್ನೆದಾವೆರ ಅರಮನೆತ ಆವರಣ ಬೊಕ್ಕ ಜಂಬೂ ಸವಾರಿ ಪೋಪುನ ರಾಜಮಾರ್ಗಡ್ ಕುಲ್ಲುನ ವ್ಯವಸ್ಥೆ ಮಲ್ತ್ ದೆರ್.
ಅಂಚನೆ ಇನಿ ಮಧ್ಯಾಹ್ನ 2.36ರ್ದ್ 2.50ಕ್ ಅರಮನೆತ ಬಲರಾಮ ಬಾಕಿಲ್ ಡ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ನಂದಿಧ್ವಜಕ್ ಪೂಜೆ ಮಲ್ಪುವೆರ್. ಬೊಕ್ಕ ಗಜಪಡೆತ ಮಾಜಿ ಕ್ಯಾಪ್ಟನ್‌ ಅರ್ಜುನ (ಆನೆ) ದಸರಾ ಮೆರವಣಿಗೆನ್ ದುಂಬು ಕೊನೊಪುಂಡು. ಬೊಕ್ಕ ಬಯ್ಯಗ್ 5.7ರ್ದ್ 5.18 ಕ್ ವಿಜಯದಶಮಿ (ಜಂಬೂಸವಾರಿ)ಮೆರವಣಿಗೆಗ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಹೈಕೋರ್ಟ್‌ ಮುಖ್ಯನ್ಯಾಯಮೂರ್ತಿ ಬೊಕ್ಕ 8 ಜನ ಗಣ್ಯೆರ್ ಬಂಗಾರ್ ದ ಅಂಬಾರಿಗ್ ಪುಷ್ಪಾರ್ಚನೆ ಮಲ್ತ್ ದ್, ಉದಿಪನ ಮಲ್ಪುವೆರ್. ಈ ಸರ್ತಿದ ಜಂಬೂಸವಾರಿ ಲೇಟಾದ್ ಸುರು ಅಪುನೆರ್ದಾವೆರ ಬನ್ನಿಮಂಟಪ ಎತ್ನಗ ತಡ ಆಪುಂಡು.
ಅಂಚನೆ 2019ರ್ದ್ ಬೊಕ್ಕ ನಡತ್ನ ದಸರಾ ಉಚ್ಚಯಡ್ ಕೊರೊನಾ ಕರಿಛಾಯೆ ಇತ್ತಿನೆರ್ದಾವೆರ ಅರಮನೆತ ಆವರಣಡ್ ದಸರಾ ಕಾರ್ಯಕ್ರಮ ಬೊಕ್ಕ ಜಂಬೂ ಸವಾರಿಗ್ ಮಾತ್ರ ಸೀಮಿತವಾದ್ ಇತ್ಂಡ್. ಅಂಚನೆ ಅರ್ಜುನ 2019ಟ್ ಅಂಬಾರಿ ದೆರ್ಪುನ ಆನೆಗ್ ನಿವೃತ್ತಿ ಅಯಿನೆರ್ದ್ ಅವೆರ ಕೂಬಿಂಗ್‌ ಸ್ಪೆಷಲಿಸ್ಟ್‌ ಪಂದೇ ಖ್ಯಾತಿ ಅಯಿನ ಅಭಿಮನ್ಯು 2020-21ಟ್ ಅರಮನೆ ಆವರಣಡ್ ಮಾತ್ರ ಅಂಬಾರಿ ದೆರ್ತ್ ದ್ ಇತ್ಂಡ್. ಇಸೇಸ ಪಂಡ ಈ ಸರ್ತಿ ಅರಮನೆರ್ದ್ ಬನ್ನಿಮಂಟಪದ ಮೈದಾನ ಮುಟ್ಟ ಮೆರವಣಿಗ್ ಇಪ್ಪುನೆರ್ದಾವೆರ 750 ಕೆ.ಜಿ. ತೂಕದ ಅಂಬಾರಿ ಬೊಕ್ಕ ಗಾದಿ ಬೊಕ್ಕ ನಮಾ 200 ಕೆ.ಜಿ. ಸೇರ್ದ್ ಒಟ್ಟು 950 ಕೆ.ಜಿ. ದಿನ್ನನ್ ದೆರ್ಪುನ್ಂಡ್.
ಅಂಚನೆ ಅಭಿಮನ್ಯುನೊಟ್ಟಿಗೆ 13 ಆನೆ, ಕುದುರೆ ಪಡೆಕ್ಕುಲು, ಆನೆಗಾಡಿಳು ಬೊಕ್ಕ ರಾಜ್ಯದ 31 ಜಿಪಂ, ರಾಜ್ಯಮಟ್ಟದ ಬೇತೆ ಬೇತೆ ಇಲಾಖೆ, ನಿಗಮ ಮಂಡಳಿ, ಸ್ತಬ್ಧಚಿತ್ರ ಉಪಸಮಿತಿ, 43 ಸ್ತಬ್ಧಚಿತ್ರ ಬೊಕ್ಕ 100ರ್ದ್ ಜಾಸ್ತಿ ಜಾನಪದ ತಂಡೊಲು ಮೆರವಣಿಗೆಡ್ ಪಾಲ್ ಪಡೆಯೆರೆ ಉಂಡು.
ಜಂಬೂ ಸವಾರಿಡ್ ಪಾಲ್ ಪಡೆಯೆರೆ ಕಾಡ್ ರ್ದ್ ನಾಡ್ ಗ್ ಬತ್ಂದ್55 ದಿನ ಬೇತೆ ಬೇತೆ ರೀತಿದ ತಾಲೀಮು ನಡಪಯಿನ ಕ್ಯಾಪ್ಟನ್‌ ಅಭಿಮನ್ಯು ಮುತಾಲಿಕೆದ ಗಜಪಡೆ ಸೋಮಾರ ಕಡೆತ ತಾಲೀಮು ನಡಪದ್ಂಡ್.
ಅರಮನೆತ ಜಾಲ್ ಡ್ ಅಂಬಾರಿ ಆನೆದ ಮಿತ್ತ್ ಬಂಗಾರ್ ದ ಅಂಬಾರಿಡ್ ದೇವಿ ಚಾಮುಂಡೇಶ್ವರಿಗ್ ಪುಷ್ಪಾರ್ಚನೆ ಮಲ್ಪುನ ಪೊರ್ತುಡು ಶಿಷ್ಟಾಚಾರದ ಪ್ರಕಾರ ಮುಖ್ಯಮಂತ್ರಿ, ಹೈಕೋರ್ಟ್‌ ಮುಖ್ಯ ನ್ಯಾಯಮೂರ್ತಿ, ಜಿಲ್ಲಾ ಉಸ್ತುವಾರಿ ಸಚಿವೆರ್, ಮೇಯರ್‌, ಜಿಲ್ಲಾಧಿಕಾರಿ, ನಗರ ಪೊಲೀಸ್ ಆಯುಕ್ತೆರ್, ಬೊಕ್ಕ ರಾಜವಂಶಸ್ಥ ಯದುವೀರ್‌ ಕೃಷ್ಣದತ್ತ ಚಾಮರಾಜ ಒಡೆಯರ್‌ ವೇದಿಕೆ ಏರಿಯೆರೆ ಉಲ್ಲೆರ್. ಅಕುಲು ಅಂಬಾರಿಡ್ ಕುಲ್ಲುದ್ ಚಾಮುಂಡೇಶ್ವರಿಗ್ ಪುಷ್ಪಾರ್ಚನೆ ಮಲ್ಪುವೆರ್.
ವಿಜಯ ದಶಮಿದಾನಿ ರಾತ್ರೆ ನಡಪುನ ದೊಂದಿದ ಕವಾಯಿತ್ ಗ್ ಪೂರ ತಯಾರಿ ಆತ್ಂಡ್
