ರಪಕ್ಕ ಸುದ್ದಿ Flash News

ರಾಹುಲ್ ಗಾಂಧಿನ ಪಿಎ ಪಂಡ್‌ದ್ ಯು.ಟಿ ಖಾದರ್‌ಗ್ ವಂಚನೆ ಮಲ್ಪರೆ ಪ್ರಯತ್ನ

ಕುಡ್ಲ: ಜನ ಒರಿ ರಾಹುಲ್ ಗಾಂಧಿನ ಪಿಎ ಪಂಡ್‌ದ್ ಕಾಂಗ್ರೆಸ್ ಶಾಸಕೆರ್ ಯು.ಟಿ ಖಾದರ್‌ಗ್ ಮೆರೆಗ್ ಕಾಲ್ ಮಲ್ತ್‌ದ್ ವಂಚನೆ ಮಲ್ಪರೆ ಪ್ರಯತ್ನ ಬತ್ತಿನ ಘಟನೆ ನಡತ್ಂಡ್.

8146006626 ಈ ನಂಬರ್‌ರ್ದ್ ಶಾಸಕೆರ್ ಖಾದರ್ ಮೆರೆಗ್ ರಡ್ಡ್ ಸರ್ತಿ ಕಾಲ್ ಬತ್ತ್‌ದ್ಂಡ್. ಕಾಲ್ ದೆಪ್ಪಂದಿನೆಕ್ಕ್ ಜನ ಒರಿ ಯಾನ್ ರಾಹುಲ್ ಗಾಂಧಿನ ಪಿ ಎ ಕಾನಿಷ್ಕ ಸಿಂಗ್ ಪಂದ್ ಮೆಸೇಜ್ ಮಲ್ತ್‌ದೆ. ಈ ನಿಲೆಟ್ ಶಾಸಕೆರ್ ಪೊಲೀಸೆರೆಗ್ ದೂರು ಕೊರ್ತೆರ್.

ಜ.14 ಕ್ಕ್ ಬಪ್ಪನಾಡ್ ರ್ದ್ ತೋಕೂರು ಸುಬ್ರಹ್ಮಣ್ಯ ದೇವಸ್ಥಾನಗ್ ಧ್ವಜಸ್ತಂಭ ಮೆರವಣಿಗೆ : ಹರಿಕೃಷ್ಣ ಪುನರೂರು

ಹಳೆಯಂಗಡಿ : ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಜೀರ್ಣೋದ್ಧಾರದ ನಿಲೆಟ್ಟ್ ಪೊಸ ಧ್ವಜಸ್ತಂಭ ಸಮರ್ಪಣಾ ಮೆರವಣಿಗೆ ಬ್ಯಾಂಡ್, ವಾದ್ಯ, ಕೊಂಬು,ಚೆಂಡೆ ವಾದನ, ವೇಷಭೂಷಣದೊಟ್ಟುಗು ದೊಟ್ಟುಗು ಜನವರಿ 14 ಮಧ್ಯಾಹ್ನ 3 ಗಂಟೆಗ್ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನರ್ದ್ ತೋಕೂರು ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಬರಿಯರೆ ಉಂಡು. ಈ ಮೆರವಣಿಗೆಡ್ ಊರು, ಪರವೂರ್ದ ಮಾತಾ ಭಕ್ತೆರ್, ಗ್ರಾಮಸ್ಥೆರ್, ಸಂಘ-ಸಂಸ್ಥೆಲೆನ ಅಧ್ಯಕ್ಷೆರ್, ಪದಾಧಿಕಾರಿಲು, ಸದಸ್ಯೆರ್ ಮಲ್ಲ ಸಂಖ್ಯೆ ಡ್ ಪಾಲ್ ಪಡೆದ್ ದೇವೆರ್ನ ಅನುಗ್ರಹಪಡೆವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು ಬಿನ್ನಾಪು ಮಲ್ತೆರ್.

ಆರ್ ಜ.1 ಐತಾರ ತೋಕೂರು ಕ್ಷೇತ್ರೊಡು ನಡತಿನ ವ್ಯವಸ್ಥಾಪನಾ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಊರ ಪರವೂರ ಗ್ರಾಮಸ್ಥೆರ್ ಅಂಚೆನೆ ಸಂಘ ಸಂಸ್ಥೆದ ಪದುಕೆರ್ನ ಸಭೆತ್ತ ಗುರ್ಕಾರ್ಮೆ ಒಯಿಸ್ ದ್ ಪಾತೆರಿಯೆರ್.

ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪ್ರಸ್ತಾವಿಕವಾದ್ ಪಾತೆರ್ದ್, ಜೀರ್ಣೋದ್ಧಾರ ದ ಕೆಲಸೊಗು ದಾನಿಲು ನನಾತ್ ಕೈ ತಾಂಗ್ ಕೊರೊಡು ಪಂಡೆರ್.

ಸುಮಾರ್ 37 ವರ್ಷೊರ್ದು ಬೊಕ್ಕ ಪೊಸತ್ತ್ ಧ್ವಜಸ್ತಂಭದ ನಿರ್ಮಾಣ ಆವೊಂದುಂಡು. ಅಯಿತ್ತ ಮರಕ್ಕ್ ಧಾರ್ಮಿಕ ಪೂಜಾ ವಿಧಿ ವಿಧಾನೊಲು ವೇದಮೂರ್ತಿ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು ಪಂದ್ ಪಂಡೆರ್. ಪೊಸ ದ್ವಜಸ್ತಂಭದ ಸಂಪೂರ್ಣ ಕರ್ಚಿನ್ ಬೊಳ್ಳೂರು ಸದಾಶಿವ ಕುಡ್ವ ಮೆರೆನ ಸಹೋದರಿ ಭಾರತಿ ಭಾಸ್ಕರ ಶೆಣೈ ಮೇರ್ನ ಮಗೆ, ಉದ್ಯಮಿ ದೀಪಕ್ ಶೆಣೈ ಮುಂಬೈ ಕೊರ್ಪೆ ಪಂತೆರ್ ಪಂದ್ ಆರ್ ತೆರಿಪಾಯೆರ್.

ಜ.14 ಮಕರ ಸಂಕ್ರಾಂದಿದಾನಿ ಶ್ರೀ ಸುಬ್ರಹ್ಮಣ್ಯ ದೇವರ್ನೆ ಪುನರ್ ಪ್ರತಿಷ್ಠೆ ಸಹಿತ ಅಷ್ಟಬಂಧ ಬ್ರಹ್ಮಕಲಶೋತ್ಸವದ ಮುಹೂರ್ತನ್ ವೇದಮೂರ್ತಿ ಶಿಬರೂರು ಶ್ರೀ ಗೋಪಾಲಕೃಷ್ಣ ತಂತ್ರಿಲು ಮಲ್ಪರೆ ಉಲ್ಲೆರ್ ಪಂದ್ ಪಂಡೆರ್.

ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಹರಿಪ್ರಸಾದ್ ಶೆಟ್ಟಿ ತೋಕೂರುಗುತ್ತು ಹೊಸಮನೆ ಮೇರ್ ಪಾತೆರ್ದ್, ಕರ ಸೇವೆಡ್ ನಡತಿನ ಬೇಲೆದ ಬಗೆಟ್ಟ್ ಮೆಚ್ಚಿಗೆ ಪಂಡೆರ್.
ಈ ಪೊರ್ತುಡು ಜಿಲ್ಲಾ ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ,ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ಪುರುಷೋತ್ತಮ ರಾವ್, ಲೋಕಯ್ಯ ಸಾಲ್ಯಾನ್, ವಿಜಯಕುಮಾರ್ ರೈ, ಯೋಗೀಶ್ ಕೋಟ್ಯಾನ್, ವಿಶ್ವನಾಥ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ.ಬಂಗೇರ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್ ದಾಸ್, ಸದಸ್ಯೆರಾಯಿನ ರತ್ನಾಕರ ಶೆಟ್ಟಿಗಾರ್ ಕಲ್ಲಾಪು, ಗುರುರಾಜ್ ಎಸ್, ಪೂಜಾರಿ, ದೇವಸ್ಥಾನದ ಸಿಬ್ಬಂದಿಲು, ಸಂಘ-ಸಂಸ್ಥೆಲೆನ ಅಧ್ಯಕ್ಷರು, ಪದಾಧಿಕಾರಿಲು, ಸದಸ್ಯರು ಊರ ಪರವೂರ್ದ ಭಕ್ತೆರ್, ಗ್ರಾಮಸ್ಥೆರ್ ಇತ್ತೆರ್.

ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರ್ನ ಸಂಘದ ಸಾಧನಾ ಸಂಭ್ರಮ ಸಮ್ಮೇಳನ ಉದಿಪನ

ಕುಡ್ಲ : ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರ್ನ ಸಂಘದ ಸಾಧನಾ ಸಂಭ್ರಮ ಸಮ್ಮೇಳನ ಜ.3 ಅಂಗಾರೆ ಪೇಂಟೆದ ಕುದ್ಮುಲ್ ರಂಗರಾವ್ ಪುರಭವನಡ್ ಉದಿಪನ ಆಂಡ್.

ಎಂ.ಆರ್ ಜಿ ಗ್ರೂಪ್ ದ ಅಧ್ಯಕ್ಷೆರ್ ಕೆ.ಪ್ರಕಾಶ್ ಶೆಟ್ಟಿ ಲೇಸ್ ಉದಿಪನ ಮಲ್ತೆರ್.

ಕರ್ನಾಟಕ ಮಾಧ್ಯಮ ಅಕಾಡೆಮಿದ ಅಧ್ಯಕ್ಷೆರ್ ಸದಾಶಿವ ಶೆಣೈ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಸಂಸದೆರ್ ನಳಿನ್ ಕುಮಾರ್ ಪತ್ರಕರ್ತೆರ್ನ ಕ್ಷೇಮ ನಿಧಿಕ್ಕ್ ಚಾಲನೆ ಕೊರಿಯೆರ್. ವಿಪಕ್ಷ ನಾಯಕೆರ್ ಯು.ಟಿ.ಖಾದರ್ ಛಾಯಾಚಿತ್ರ ಪ್ರದರ್ಶನ ಉದಿಪನ ಮಲ್ತೆರ್. ಕುಡ್ಲ ಶಾಸಕೆರ್ ವೇದವ್ಯಾಸ ಕಾಮತೆರ್ ಪತ್ರಕರ್ತೆರೆಗ್ ಕಿಟ್ ಪಟ್ಟಿಯೆರ್.

ಬಿನ್ನೆರಾದ್ ಕುಡ್ಲ ವಿಶ್ವವಿದ್ಯಾಲಯದ ಉಪಕುಲಪತಿ ಪಿ.ಎಸ್.ಯಡಪಡಿತ್ತಾಯ, ಪಟ್ಲ ಫೌಂಡೇಶನ್ ಅಧ್ಯಕ್ಷೆರ್ ಪಟ್ಟ ಸತೀಶ್ ಶೆಟ್ಟಿ,ಬ್ಯಾಂಕ್ ಆಫ್ ಬರೋಡ ಮುಖ್ಯಸ್ಥೆರ್ ಗಾಯತ್ರಿ, ಮೇಯರ್ ಜಯಾನಂದ ಅಂಚನ್, ಕಿಯೋನಿಕ್ಸ್ ಅಧ್ಯಕ್ಷೆರ್ ಹರಿಕೃಷ್ಣ ಬಂಟ್ವಾಳ, ಪೆರಿಯ ಪತ್ರಕರ್ತೆರ್ ಮನೋಹರ ಪ್ರಸಾದ್, ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ ಇಂದಾಜೆ, ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ, ಪದಾಧಿಕಾರಿಲು ಬೊಕ್ಕ ಸದಸ್ಯೆರ್ ಇತ್ತೆರ್.

ರಾಜ್ಯೊಡೆ ಸುರುತ್ತ “ಸ್ಮಾರ್ಟ್ & ಡಿಜಿಟಲ್ ಹೈಟೆಕ್ ಬಸ್ ನಿಲ್ದಾಣ ಉದಿಪನ

ಸುರತ್ಕಲ್ : ರಾಜ್ಯದ ಸುರುತ್ತ ಹೈಟೆಕ್ ಬಸ್ ನಿಲ್ದಾಣನ್ ಗೋವಿಂದ ದಾಸ್ ಕಾಲೇಜಿದ ಎದುರು ಕುಡ್ಲ ಉತ್ತರ ಕ್ಷೇತ್ರದ ಶಾಸಕೆರ್ ಡಾ. ವೈ. ಭರತ್ ಶೆಟ್ಟಿ ಜ.2 ಕ್ಕ್ ಉದಿಪನ ಮಲ್ತೆರ್.

ಅಯಿರ್ದ್ ಬೊಕ್ಕ ಪಾತೆರಿನ ಆರ್, “ಸ್ಮಾರ್ಟ್ & ಡಿಜಿಟಲ್ ಸುರತ್ಕಲ್” ಯೋಜನೆದಂಚ ಈ ಬಸ್ ನಿಲ್ದಾಣ ಲೋಕಾರ್ಪಣೆ ಆತ್ಂಡ್. ನೆತ್ತ ಉಲಯಿ ಪರ್ಪಿನ ನೀರ್, ಸಿಸಿ ಕ್ಯಾಮರಾ ವ್ಯವಸ್ಥೆ ಸೇರಿನಂಚನೆ ಬೇತೆ ಬೇತೆ ರೀತಿದ ವ್ಯವಸ್ಥೆನ್ ಮಲ್ತ್‌ದ ಪಂದ್ ಆರ್ ಪಂಡೆರ್.

ಈ ಪೊರ್ತುಡು ಕುಡ್ಲದ ಮೇಯರ್ ಜಯಾನಂದ ಅಂಚನ್, ಮೂಡಾ ಅಧ್ಯಕ್ಷೆರ್ ರವಿಶಂಕರ್ ಮಿಜಾರ್, ಅಗರಿ ಎಂಟರ್ ಪ್ರೈಸಸ್ ದ ಧಣಿ ಅಗರಿ ರಾಘವೇಂದ್ರ ರಾವ್ ಸೇರಿನಂಚನೆ ಮಸ್ತ್ ಜನ ಬಿನ್ನೆರ್ ಇತ್ತೆರ್.