ರಪಕ್ಕ ಸುದ್ದಿ Flash News

ಉಳ್ಳಾಲ: ತಿಗಲೆ ಬೇನೆಡ್ ತೀರ್ ಪೋಯೆರ್ ವೈದ್ಯೆರ್ ಡಾ. ಜಯರಾಮ ಶೆಟ್ಟಿ

ಉಳ್ಳಾಲ: ದೇರಳಕಟ್ಟೆದ ಜಸ್ಟೀಸ್ ಕೆ.ಎಸ್ ಹೆಗ್ಡೆ ಚಾರಿಟೇಬಲ್ ಆಸ್ಪತ್ರೆದ ರೇಡಿಯೇಷನ್ ಆಂಕಾಲಜಿ ಕ್ಯಾನ್ಸರ್ ವಿಭಾಗದ ತಜ್ಞೆರ್ ವೈದ್ಯೆರ್ ಡಾ. ಜಯರಾಮ ಶೆಟ್ಟಿ(53) ತಿಗಲೆ ಬೇನೆಡ್ ಜ.11 ಕ್ಕ್ ತೀರ್ ಪೋಯೆರ್.

ಕರಿನ 11 ವರ್ಷರ್ದ್ ಕೆ.ಎಸ್.ಹೆಗ್ಡೆ ಆಸ್ಪತ್ರೆಡ್ ಸೇವೆ ಮಲ್ತೊಂದಿತ್ತೆರ್. ಬುಧಾರ ಬಯ್ಯಗ್ ಬೇಲೆ ಮುಗಿತ್ತ್‌ದ್ ಇಲ್ಲಗ್ ಪೋದು ಅಲ್ಪರ್ದ್ ಕಾರ್ಯಕ್ರಮ ಒಂಜೆಕ್ಕ್ ಪೋನಗ ಸಾದಿದ ನಡುಟ್ಟ್ ತಿಗಲೆ ಬೇನೆ ಆತ್ಂಡ್. ಆಸ್ಪತ್ರೆಗ್ ಕೊನನಗ ಜೀವ ಪೋತ್ಂಡ್. ಮೇರ್ ಮಸ್ತ್ ಬಡವೆರೆಗ್ ಚಿಕಿತ್ಸೆಗ್ ಪಂದ್ ಪಣವುದ ಸಕಾಯ ಮಲ್ತಿತ್ತೆರ್.

ನನ ಪಿಯುಸಿದ ಪ್ರಶ್ನೆಪತ್ರಿಕೆಡ್ ಒಂಜಿ ಮಾರ್ಕ್ ದ ಜಾಸ್ತಿ ಪ್ರಶ್ನೆ

ರಾಜ್ಯ ಸರ್ಕಾರ ಸುರೂತ್ತ ಬೊಕ್ಕ ರಡ್ಡನೇ ವರ್ಷದ ಪಿಯುಸಿ ಪ್ರಶ್ನೆಪತ್ರಿಕೆದ ಮಾದರಿಡ್ ಮಹತ್ವವಾಯಿನ ಬದಲಾವಣೆ ಮಲ್ತ್‌ದ್ಂಡ್.

ಮಾತ ವಿಷಯಡ್ ಲ ಒಂಜಿ ಮಾರ್ಕ್ ದ ಪ್ರಶ್ನೆಗ್ ಎಚ್ಚದ ಆದ್ಯತೆ ಕೊರ್ತೆರ್. ಈ ಮಾದರಿದ ಪ್ರಶ್ನೆಪತ್ರಿಕೆನ್ ಪರೀಕ್ಷಾ ಮಂಡಳಿದ ವೆಬ್‌ಸೈಟ್‌ಡ್ ಪ್ರಕಟಣೆ ಮಲ್ತ್‌ದೆರ್. ಎಡ್ಡೆ ರೀತಿದ ರಿಸಲ್ಟ್ ಬರಡ್ ಪಂದ್ ಇಂಚಿನ ನಿರ್ಧಾರನ್ ಮಂಡಳಿ ಮಲ್ತ್‌ದ್ಂಡ್.

ಅಶೋಕನಗರ ಅಯ್ಯಪ್ಪ ಸ್ವಾಮಿ ಪೂಜೆ: ಬೊಳ್ಳಿ ಪರ್ಬ, ಪ್ರತಿಭಾ ಪುರಸ್ಕಾರ

ಅಶೋಕನಗರದ ಶ್ರೀನಿಕೇತನಡ್ ಅಯ್ಯಪ್ಪ ಸ್ವಾಮಿ ರಜತ ಮಹೋಚ್ಚಯ ಲೇಸ್ ಜ.7 ಕ್ಕ್ ಶನಿವಾರ ನಡತ್ಂಡ್.

ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಸ್ಥಾಪಕಾಧ್ಯಕ್ಷೆರ್, ಭಾಗವತೆರ್ ಪಟ್ಲ ಸತೀಶ್ ಶೆಟ್ಟಿ ಪಾತೆರ್ದ್, ಪರಿಸರದ ಅಶಕ್ತರೆಗ್ ಸಕಾಯ ಮಲ್ಪುನ ರವಿ ಶೆಟ್ಟಿ ಅಶೋಕನಗರ ಮುತಾಲಿಕೆದ ಸೇವಾ ಕಾರ್ಯ ಮಾತೆರೆಗ್ಲಾ ಮಾದರಿ ಪಂದ್ ಪಂಡೆರ್.

ಈ ಪೊರ್ತುಡು ಬೊಂಬಾಯಿದ ಗುರುಸ್ವಾಮಿ ಜಯಶೀಲ ತಿಂಗಳಾಯ ಮೆರೆಗ್ ಮಾನಾದಿಗೆ ಮಲ್ತೆರ್. ಮನಪಾ ಸದಸ್ಯೆರ್ ಜಯಲಕ್ಷ್ಮೀ ಶೆಟ್ಟಿ, ಗಣೇಶ್ ಕುಲಾಲ್, ರಾಧಾಕೃಷ್ಣ ಅಶೋಕನಗರ, ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ಭಜನಾ ಮಂಡಳಿದ ಮುಖ್ಯಸ್ಥೆರ್ ನರಸಿಂಹ ಭಾಗವತ್, ವಾಮನ ಶೆಟ್ಟಿ, ವಿಶ್ವಹಿಂದೂ ಪರಿಷತ್‌ದ ದಾಮೋದರ ಚೆಟ್ಟಿಯಾರ್ ಮೊಕಲೆನ್ ಲೇಸ್‌ಡ್ ಮಾನಾದಿಗೆ ಮಲ್ತೆರ್.

ಕರಿನ 25 ವರ್ಷಡ್ ಸಕಾಯ ಮಲ್ತಿನಕ್ಲೆನ್ ಅಂಚೆನೆ ಕೈತಲ್‌ದ ಪ್ರತಿಭಾನ್ವಿತ ಜೋಕುಲೆಗ್ ಪ್ರತಿಭಾ ಪುರಸ್ಕಾರ ಮಲ್ತೆರ್. ಪರಿಸರದ 10 ಜನ ಆರ್ಥಿಕವಾದ್ ಪಿರ ಇತ್ತಿನಕ್ಲೆಗ್ ಸುಮಾರ್ 1 ಲಕ್ಷ ರೂ. ಪನವುದ ಸಕಾಯ ಪಟ್ಟಿಯೆರ್.

ಬೊಂಬಾಯಿದ ಥಾಣೆ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಜಯಂತ ಶೆಟ್ಟಿ, ದೊಂಬಿವಿಲಿ ಯುವ ಬಂಟರ ಸಂಘದ ಅಧ್ಯಕ್ಷೆರ್ ಸಚಿನ್ ಶೆಟ್ಟಿ, ದಯಾನಂದ ಶೆಟ್ಟಿ, ಮೋಹನದಾಸ್ ಶೆಟ್ಟಿ, ಜಯಂತ್ ಶೆಟ್ಟಿ, ಉಮೇಶ್ ಅತಿಕಾರಿ ಅಂಚನೆ ಸುರೇಶ್ ಶೆಟ್ಟಿ ಅಡ್ಕ ಲೇಸ್‌ಡ್ ಇತ್ತೆರ್.
ರವಿ ಶೆಟ್ಟಿ ಅಶೋಕನಗರ ಎದ್ಕೊನಿಯೆರ್. ದೇವಿಪ್ರಸಾದ್ ಶೆಟ್ಟಿ ಸೊಲ್ಮೆ ಸಂದೈತ ಮಲ್ತೆರ್. ಸತೀಶ್ ಶೆಟ್ಟಿ ಕೊಡಿಯಾಲಬೈಲ್ ಲೇಸ್ ಸುಧಾರಿಕೆ ಮಲ್ತೆರ್.