ಕಾರ್ ಬಸ್ ಕ್ಕ್ ಗುದ್ದುದು 4 ಜನ ಜಾಗಡೇ ತೀರ್ ಪೋಯಿನ ಘಟನೆ ಮಂಡ್ಯ ಜಿಲ್ಲೆದ ನಾಗಮಂಡಲದ ಬೆಳ್ಳೂರು ಕ್ರಾಸ್ ದಲ್ಪ ಇನಿ ಬೊಲ್ಪುಗು ನಡತ್ಂಡ್.
ಹಾಸನರ್ದ್ ಬರೊಂದು ಇತ್ತಿನ ಕಾರ್ ಬಸ್ ತ್ತ ಪಿರವುಗ್ ಗುದ್ದುದುಂಡು. ಈ ಕಾರ್ ಡ್ ಇತ್ತಿನ 3 ಆಂಜೋವ್, 1 ಪೊಂಜೋವ್ ಅಲ್ಪನೇ ತೀರ್ ಪೋತೆರ್.
ಮಾಗಡಿ ತಾಲೂಕುದ ಹೊಸಪಾಳ್ಯ ಕೈತಲ್ ಅಧಿಕಾರಿಗ್‌ ಅಡ್ಡಕಟ್ಟ್‌ದ್ ಬ್ಯಾಲೆಟ್ ಪೇಪರ್, ಲ್ಯಾಪ್‌ಟಾಪ್‌ನ್ ಕಂಡ್ ದೆರ್.
ರಾಮನಗರ ಜಿಲ್ಲೆ ಮಾಗಡಿ ತಾಲ್ಲೂಕು ತಿಪ್ಪಸಂದ್ರ ಹೋಬಳಿದ ಹುಳ್ಳೇನಹಳ್ಳಿ ಹಾಲು ಉತ್ಪಾದಕ ಸಹಕಾರ ಸಂಘದ ಹಾಲು ಉತ್ಪಾದಕ ನಿರ್ದೇಶಕ ಸ್ಥಾನಗ್‌ ಓಟು ಆದ್‌ ಇತ್ತ್‌ಂಡ್. ಓಟ್‌ ಸ ದಾಖಲೆನ್ ಪತೊಂದು ಕಾರ್ಡ್ ಪೋವೊಂದು ಇತ್ತಿನ ಅಧಿಕಾರಿಲಾಯಿನ ಉಮೇಶ್, ಉಷಾ ಮೊಕ್ಲೆಗ್ ಪುಂಡೆರ್ ಮಾರಕಾಸ್ತ್ರ ತೊಜಪಾದ್ ಬ್ಯಾಲೆಟ್ ಪೇಪರ್ ಬೊಕ್ಕ ಲ್ಯಾಪ್ ಟಾಪ್ ಬೊಕ್ಕ ಒರಿನ ದಾಖಲೆನ್ ಪತೊಂದು ಕಾರ್ಡ್ ಪದ್ರಾಡ್ ಪಾರ್ದೆರ್.
ಗ್ರಾಮ ಪಂಚಾಯ್ತಿ ಮಾಜಿ ಗುರ್ಕಾರೆ ಬಲರಾಮ್ ಬೊಕ್ಕ ಅರೆನ ಒಟ್ಟಿಗೆ ಇಪ್ಪುನ ಜನ ಈ ಕೃತ್ಯನ್‌ ಮಲ್ತ್‌ದೆರ್‌ ಪಂದ್ ತೆರಿದ್‌ ಬೈದ್ಂಡ್. ಕುದೂರು ಬೊಕ್ಕ ಮಾಗಡಿ ಸ್ಟೇಷನ್‌ದ ಪೊಲೀಸೆರ್‌ ಜಾಗೆಗ್‌ ಬತ್ತ್ದ್ ತನಿಖೆ ಮಲ್ತೊಂದು ಉಲ್ಲೆರ್ ಪಂದ್ ತೆರಿದ್‌ ಬೈದ್ಂಡ್.
ರಡ್ಡ್ ಸಾವಿರ ರೂ. ದ ನೋಟುಲೆನ್‌ ಪಿರ ಕೊರಿಯೆರೆ ನನ ರಡ್ಡೇ ದಿನ ಬಾಕಿ ಉಪ್ಪುನು! ಸೆ. 30 ಕಡೆ ದಿನ ಆಂಡಲಾಯಿಟ್ಟ್ ರಡ್ಡ್ ದಿನ ಬ್ಯಾಂಕ್ ರಜೆ ಉಂಡು. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಈ ನೋಟುನು ಪಿರ ಕೊರ್ದು, ಬೇತೆ ನೋಟು ದೆತೊನಿಯೆರೆ ಸೆ.30 ಮುಟ ಗಡುವು ಕೊರ್ತುಂಡು.
ಸದ್ಯಗ್ ಈ ಅವಧಿ ಮುಗಿಯೊಂದು ಬತ್ತ್ದ್ ನನ 2 ದಿನ ಮಾತ್ರ ಬಾಕಿ ಇಪ್ಪುನ. ಚಲಾವಣೆಡ್‌ ಇತ್ತಿನ 2000 ನೋಟು 3.32 ಲಕ್ಷ ಕೋಟಿ ರೂ ಬಿಲೆತ್ತ ನೋಟುಲೆದ ಪೈಕಿ, ಶೇ.93% ದಾತ್ ನೋಟುಲು ಬ್ಯಾಂಕ್‌ಲೆಗ್‌ ಪಿರ ಬೈದುಂಡು.
ಸೆ. 30 ರ್ದ್ ಬೊಕ್ಕ 2000 ರೂಪಾಯಿ ನೋಟು ದಾದಾ ಆಪುಂಡು?
ಸೆಪ್ಟೆಂಬರ್ ಅಕೆರಿ ಮುಟ ಕಾನೂನು ಬದ್ದವಾದ್‌ ಇಪ್ಪುಂಡು. ಆಂಡ ಒವ್ವೇ ರೀತಿದ ವಹಿವಾಟ್‌ ಉದ್ದೇಶಡ್‌ ಸ್ವೀಕಾರ ಮಲ್ಪುಜೆರ್. ಕೊರ್ನ ಗಡುಕ್‌ ಮೀರ್ದ್‌ ಆ ನೋಟುಲೆನ್‌ ಬಳಕೆ ಮಲ್ತ್‌ಂಡ ಆ ನೋಟು ನಮಡ ಇತ್ತ್ಂಡ ಸರಿಯಾಯಿನ ಕಾರಣನ್‌ RBI ಗ್‌ ತೆರಿಪಾವೊಡು.
ಕೋಟ: ತಟ್ಟು ಗ್ರಾಮ ಪಂಚಾಯತ್, ಡಾ. ಶಿವರಾಮ ಕಾರಂತ ಹುಟ್ಟೂರ ಪ್ರಶಸ್ತಿ ಪ್ರತಿಷ್ಠಾನ ಕೋಟ, ಡಾ. ಶಿವರಾಮ ಕಾರಂತ ಟ್ರಸ್ಟ್ ಒಡಿಪು ಸಹಯೋಗಡ್ ಡಾ.ಶಿವರಾಮ ಕಾರಂತ ಥೀಮ್ ಪಾರ್ಕ್ ಡ್ ಅ. 3 ರ್ದ್ 10 ಮುಟ್ಟ ನಡಪರೆ ಇಪ್ಪುನ ಡಾ. ಶಿವರಾಮ ಕಾರಂತ ಪುಟ್ಟುದಿನ ದಿನತ ಕಾರ್ಯಕ್ರಮದ ಉದಿಪನನ್ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಅಕ್ಟೋಬರ್ 3 ದಾನಿ ಬೊಲ್ಪುಗು 10.30ಕ್ಕ್ ಉದಿಪನೆ ಮಲ್ಪೆರೆ ಉಲ್ಲೆರ್.
ಈ ಪೊರ್ತುಡು ಲೇಸ್‌ದ ಗುರ್ಕಾರ್ಮೆನ್ ಕುಂದಾಪುರ ಶಾಸಕೆರ್ ಎ ಕಿರಣ್ ಕುಮಾರ್ ಕೊಡ್ಗಿ ವಹಿಸೆರೆ ಉಲ್ಲೆರ್. ಘನ ಉಪಸ್ಥಿತಿಡ್ ಕೇಂದ್ರ ಕೃಷಿ ಬೊಕ್ಕ ರೈತರ ಕಲ್ಯಾಣ ಖಾತೆ ರಾಜ್ಯ ಸಚಿವೆರಾಯಿನ ಶೋಭಾ ಕರಂದ್ಲಾಜೆ, ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ, ವಿಕಲಚೇತನರ, ಹಿರಿಯ ನಾಗರಿಕರ ಸಬಲೀಕರಣ ಬೊಕ್ಕ ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವೆರಾಯಿನ ಲಕ್ಷ್ಮೀ ಆರ್ ಹೆಬ್ಬಾಳ್ಕರ್, ಮಲ್ಲ ಬಿನ್ನೆರಾದ್ ಕಾರ್ಕಳ ಶಾಸಕೆರ್ ವಿ ಸುನೀಲ್ ಕುಮಾರ್, ಬೈಂದೂರು ಶಾಸಕೆರ್ ಗುರುರಾಜ್ ಶೆಟ್ಟಿ ಗಂಟಿಹೊಳೆ, ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಒಡಿಪು ಶಾಸಕೆರ್ ಯಶ್‍ಪಾಲ್ ಎ ಸುವರ್ಣ, ಮಾಜಿ ಸಚಿವೆರ್ ಬೊಕ್ಕ ವಿಧಾನ ಪರಿಷತ್ ಸದಸ್ಯೆರಾಯಿನ ಕೋಟ ಶ್ರೀನಿವಾಸ ಪೂಜಾರಿ, ಮಂಜುನಾಥ ಭಂಡಾರಿ, ಕೋಟತಟ್ಟು ಗ್ರಾಮ ಪಂಚಾಯತ್ ಗುರ್ಕಾರ್ಲು ಕೆ ಸತೀಶ್ ಕುಂದರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಡಾ. ಶಿವರಾಮ ಕಾರಂತ ಪ್ರತಿಷ್ಠಾನ ಕೋಟದ ಕಾರ್ಯಾಧ್ಯಕ್ಷೆರ್ ಆನಂದ್ ಸಿ ಕುಂದರ್ ಪ್ರಕಟಣೆಡ್‌ ತೆರಿಪಾದೆರ್.
ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಮಹಾವಿದ್ಯಾಲಯದ ಎಚ್ಆರ್ ಬೊಕ್ಕ ಪ್ಲೇಸ್ಮೆಂಟ್ ಘಟಕದ ಒಟ್ಟುಸೇರಿಗೆಡ್ ಸಿಡಿಎಸ್ಇ (ಯು ಪಿ ಎಸ್ ಸಿ) ಪರೀಕ್ಷೆದ ಪೊಲಬು ಕಾರ್ಯಾಗಾರ ಲೇಸ್ ಸೆ.26 ಕ್ಕ್ ಕಾಲೇಜ್ ದ ಸಭಾಂಗಣಡ್ ನಡತ್ಂಡ್.
ಭಾರತೀಯ ಸೇನೆದ ಪ್ರಶಿಕ್ಷಣಾರ್ಥಿ ಮಿಸ್ಟರ್ ಅಜಿತೇಶ್ ಪಿ ಎಸ್ ಮೇರ್ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆದ್, ಭಾರತೀಯ ಸೇನೆಡ್ ಸಿಡಿಎಸ್ಇ ಪರೀಕ್ಷೆಡ್ ಪಾಸಾಯಿನಕ್ಲೆಗ್ ಇಪ್ಪುನ ಉದ್ಯೋಗಾವಕಾಶದ ಬಗೆಟ್ಟ್ ಪೊಲಬು ಕೊರಿಯೆರ್.
ಕಾಲೇಜ್ ಪ್ರಾಂಶುಪಾಲೆರ್ ಡಾ.ದಿನೇಶ್ ಪಿಟಿ ಮೇರ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ಎಚ್ ಆರ್ ಪ್ಲೇಸ್ ಮೆಂಟ್ ಘಟಕದ ಸಂಯೋಜಕೆರ್ ರಮಾನಾಥ್ ಎದ್ಕೊನಿಯೆರ್. ಪ್ರಾಂಶುಪಾಲೆರ್ ಸೇನೆದ ಉದ್ಯೋಗಾವಕಾಶದ ಬಗೆಟ್ಟ್ ಪ್ರಸ್ತಾವಿಕ ಪಾತೆರಿಯೆರ್. ಎಚ್ ಆರ್ ಪ್ಲೇಸ್ ಮೆಂಟ್ ವಿದ್ಯಾರ್ಥಿ ಸಂಯೋಜಕಿ ಮೇಘ ವೈಎಸ್ ಸೊಲ್ಮೆ ಸಂದಾಯೆರ್.
ವರದಿ: ಗೋಪಿಚಂದನ್ ಕೆಎಸ್
ರಾಯಚೂರು: ಮಂತ್ರಾಲಯದ ಶ್ರೀ ರಾಘವೇಂದ್ರ ಸ್ವಾಮಿಲೆನ ಮಠಡ್ ಸೆಪ್ಟೆಂಬರ್ ತಿಂಗೊಲ್ಡು ಕಾಣಿಕೆ ಡಬ್ಬಿ ಪನವು ಗೆನ್ಪುನ ಕಾರ್ಯ ಅಂಗಾರೆ ನಡತ್ತ್ಂಡ್. ಒಟ್ಟು 3.82 ಕೋಟಿ ರೂ. ಸಂಗ್ರಹ ಆತ್ಂಡ್.
ಕರಿನ 34 ದಿನಟ್ ಸಂಗ್ರಹ ಆಯಿನ ಕಾಣಿಕೆದ ಕಾಸ್ ನ್ ಲೆಕ್ಕ ಮಲ್ತ್ ದೆರ್. 3,74,85,859 ಬಿಲೆತ್ತ ನೋಟುಲು, 7,73,980 ಬಿಲೆತ್ತ ಕಾಯಿನ್ಸ್ ಸೇರ್ದ್ ಒಟ್ಟು 3,82,59,839 ರೂ. ಸಂಗ್ರಹ ಆತ್ಂಡ್. ಅವೆತ ಒಟ್ಟಿಗೆ 53 ಗ್ರಾಂ ಬಂಗಾರ್, 1200 ಗ್ರಾಂ ತೂಕದ ಬೊಳ್ಳಿನ್ ಭಕ್ತೆರ್ ಹುಂಡಿಗ್ ಪಾಡ್ದೆರ್ ಪಂದ್ ಮಠತ್ತ ವ್ಯವಸ್ಥಾಪಕೆರ್ ತೆರಿಪಾದೆರ್.
ಕುಡ್ಲ: ಚಂದ್ರಯಾನ-3 ರ್ದ್ ಇಡೀ ಜಗತ್ತ್ ಭಾರತದಂಚಿ ತಿರ್ಗುದು ತೂಪುಲೆಕ್ಕ ಆತ್ಂಡ್. ಬಾಹ್ಯಾಕಾಶ ಇತಿಹಾಸಡ್ ಪೊಸ ಮೈಲಿಗಲ್ಲು ಸೃಷ್ಟಿ ಆತ್ಂಡ್ ಪಂದ್ ಶಾಸಕೆರ್ ವೇದವ್ಯಾಸ ಕಾಮತ್ ಪಂಡೆರ್.
ಆರ್ ಕುಡ್ಲ ಮಹಾನಗರ ಪಾಲಿಕೆಡ್ ಪರಿಷತ್ತ್ ದ ಸಾಮಾನ್ಯ ಸಭೆಟ್ಟ್ ಪಾಲ್ ಪಡೆದ್ ಪಾತೆರಿಯೆರ್. ಭಾರತದ ಪ್ರಧಾನಿ ನರೇಂದ್ರ ಮೋದಿಯೆರ್ನ ಸಮರ್ಥ ನಾಯಕತ್ವಡ್ ನಡತಿನ G20 ಶೃಂಗ ಸಭೆಟ್ಟ್ ಅಂತಾರಾಷ್ಟ್ರೀಯ ಮಟ್ಟಡ್ ಭಾರತದ ಸಾಮರ್ಥ್ಯ ಸಾಬೀತಾತ್ಂಡ್. ಉಂದು ದೇಶದ ಸಮರ್ಥ ನಾಯಕತ್ವಗ್ ತಿಕಿನ ಗೌರವ ಆತ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ಕುಡ್ಲ ಮಹಾನಗರ ಪಾಲಿಕೆದ ಮೇಯರ್, ಉಪ ಮೇಯರ್, ಮನಪಾದ ಸದಸ್ಯೆರ್, ಕಮಿಷನರ್ ಸೇರಿನಂಚೆನೆ ಸುಮಾರ್ ಜನ ಪಾಲ್ ಪಡೆದಿತ್ತೆರ್.
ಐನ್ ಪ್ರತ್ಯೇಕ ಪ್ರಕರಣಡ್ ವಿದೇಶರ್ದ್ ಅಕ್ರಮವಾದ್ ಸಾಗಾಟ ಮಲ್ತೊಂದು ಇತ್ತಿನ ಒಟ್ಟು 46.52 ಲಕ್ಷ ರೂ. ಮೌಲ್ಯದ ಬಂಗಾರ್‌ನ್ ಕುಡ್ಲ ಕಸ್ಟಮ್ಸ್ ಅಧಿಕಾರಿಲು ವಶಕ್ಕ್‌ ಪಡೆಯೊಂದೆರ್.
ಕುಡ್ಲ ಅಂತರ್‌ರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಸೆ.23 ಬೊಕ್ಕ 24 ದಾನಿ ಬೇತೆ ಬೇತೆ ಐನ್ ಪ್ರಕರಣಡ್ ದುಬೈರ್ದ್ ಸಾಗಾಟ ಮಲ್ತೊಂದು ಇತ್ತಿನ 24 ಕ್ಯಾರೆಟ್‌ ದ ಒಟ್ಟು 46,52,270 ರೂ ಬಿಲೆತ್ತ 775 ಗ್ರಾಂ ಬಂಗಾರ್‌ನ ಪತ್ತೆ ಮಲ್ತ್‌ದ್‌ ಕಸ್ಟಮ್ಸ್ ಅಧಿಕಾರಿಲು ವಶಕ್ಕೆ ಪಡೆತೆರ್.
ಬಂಗಾರ್‌ನ್ ಪೇಸ್ಟ್‌ಡ್‌, ಇಯರ್ ಪಾಡ್ ಬೊಕ್ಕ ಟ್ರಾಲಿಬ್ಯಾಗ್‌ ದ ರಾಡ್‌ಡ್ ಲೇಪ ಮಲ್ತ್ ದ್ ಸಾಗಾಟ ಮಲ್ತೊಂದು ಇತ್ತೆರ್‌ ಪಂದ್ ಅಧಿಕಾರಿಲು ತೆರಿಪಾದೆರ್.
ಉಜಿರೆ: ಜಿಲ್ಲಾ ಮಟ್ಟದ ಆಣುಲೆನ ಬೊಕ್ಕ ಪೊಣ್ಣುಲೆನ ವಾಲಿಬಾಲ್‌ ಪಂದ್ಯಾಟ ಸೆ.25 ದಾನಿ ಸುಬ್ರಹ್ಮಣ್ಯೇಶ್ವರ ಪದವಿ ಪೂರ್ವ ಕಾಲೇಜ್‌ಡ್‌ ನಡತ್ಂಡ್.
ಎಸ್.ಡಿ.ಎಂ ಕಾಲೇಜ್‌ದ ಆಣುಲೆನ ವಿಭಾಗದ ವಾಲಿಬಾಲ್‌ ಪಂದ್ಯಾಟಡ್‌ ಸುರುತ ಇನಾಮು ಪಡೆದ್ ರಾಜ್ಯ ಮಟ್ಟಗ್‌ ಆಯ್ಕೆ ಆತೆರ್. ಸುಹಾಸ್‌ ಬೆಸ್ಟ್ ಪಾಸರ್‌ ಬೊಕ್ಕ ಪ್ರತೀಕ್‌ ಶೆಟ್ಟಿ ಬೆಸ್ಟ್ ಹೊಡೆತಗಾರ ಪ್ರಶಸ್ತಿನ್ ಪಡೆಯೊಂದೆರ್. ಮೊಕ್ಲೆಗ್ ಸುದೀನ್‌, ರಮೇಶ್‌ ಹೆಚ್‌ ಬೊಕ್ಕ ಸಂದೇಶ್‌ ಪೂಂಜ ತರಬೇತಿ ಕೊರ್ತೆರ್.
ತುಳುಕೂಟ ಬೆಂಗ್ಲೂರ್ (ರಿ.) ನೆತ್ತ ನಿರೆಲ್ಡ್ ತುಳುನಾಡ್ ದ ಸಾಂಪ್ರದಾಯ (ಪೊಸ ಅರಿತ್ತ ವನಸ್) ಪುದ್ದಾರ್ ವನಸ್ ಲೇಸ್ ಅ.1 ಐತಾರ ವಿಜಯನಗರ ಅತ್ತಿಗುಪ್ಪೆದ ಬಂಟರ ಸಂಘಡ್ ನಡಪರೆ ಉಂಡು.
ಬೊಲ್ಪುಗು ಕೂಟದ ಸದಸ್ಯೆರ್ದ್ ಬೊಕ್ಕ ಬೆಂಗ್ಲೂರ್ ದ ಬೇತೆ ಬೇತೆ ಸಂಘ ಸಂಸ್ಥೆದ ಸದಸ್ಯೆರ್ದ್ ವೈವಿಧ್ಯಮಯ ಮನೋರಂಜನೆ ಲೇಸ್, ಕುರಲ್ ದಿಂಜವುನ ಬೊಕ್ಕ ಸಭಾ ಲೇಸ್ ನಡಪರೆ ಉಂಡು. ಮಧ್ಯಾಹ್ನ ಸಾಂಪ್ರದಾಯಿಕ ಪುದ್ದರ್ ವನಸ್ ಬೊಕ್ಕ ಪ್ರಶಂಸ ಕೂಟ ಕಾಪು ಮೊಕ್ಲೆರ್ದ್ ಬಲೆ ತೆಲಿಪುಲೆ ತುಳು ನಾಟಕ, ರೂಪಪ್ರಕಾಶ್ ಕುಡ್ಲ ಕೂಟದಕ್ಲೆರ್ದ್ ಸಂಗೀತ ರಸಮಂಜರಿ ನಡಪರೆ ಉಂಡು. ಬಯ್ಯಗ್ ಸಮಾರೋಪ ಸಮಾರಂಭದ ಸಭಾ ಲೇಸ್ ಬೊಕ್ಕ ಕರಾವಳಿ ಯಕ್ಷಗಾನ ಕಲಾವಿದೆರ್ ಬೆಂಗ್ಲೂರ್ ಮೊಕ್ಲೆರ್ದ್ ಮಾಯಕದ ಬಿನ್ನೆದಿ ತುಳು ಆಟ ನಡಪುಂಡು. ರಾತ್ರೆ ಡ್ಲ ವನಸ್ ದ ವ್ಯವಸ್ಥೆ ಉಂಡು ಪಂದ್ ತುಳುಕೂಟ ಬೆಂಗ್ಲೂರ್ (ರಿ.) ದ ಪದುಕೆರ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
