19 ನೇ ಏಷ್ಯನ್ ಗೇಮ್ಸ್ ಚೀನಾದ ಹ್ಯಾಂಗ್ ಝೌಡ್ ನಡತೊಂದು ಉಂಡು.
ಇನಿ ಆನ್ ಲೆನ ಟಿ20 ಕ್ರಿಕೆಟ್ ಪಂತೊ ಸುರು ಆಪುಂಡು. ನೆಟ್ಟ್ 4 ಕೂಟಲಾಯಿನ IND, PAK, SL, BAN ಏಷ್ಯಾನ್ ಕ್ರಿಕೆಟ್ ಕೌನ್ಸಿಲ್ ಶ್ರೇಯಾಂಕದ ಪ್ರಕಾರ ನೇರವಾದ್ ಕ್ವಾರ್ಟರ್ ಫೈನಲ್ ಗ್ ಅರ್ಹತೆ ಪಡೆತ್ಂಡ್.
ಲೀಗ್ ಸುತ್ತುಡು ಕೇವಲ 9 ಕೂಟಲು ಮಾತ್ರ ಗೊಬ್ಬೆರೆ ಉಂಡು. ಋತುರಾಜ್ ಗಾಯಕ್ವಾಡ್ ಮುತಾಲಿಕೆದ ಭಾರತ ಕೂಟ ಅ.3 ಕ್ಕ್ ಸುರುತ್ತ ಪಂತೊ ಗೊಬ್ಬುಂಡು.
ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ಬುಡುಗಡೆಗ್ ದುಂಬು ನಟೆ ಅಭಿಷೇಕ್ ಅಂಬರೀಶ್ ಕುಡ್ಲದ ಕದ್ರಿ ಮಂಜುನಾಥ ದೇವಲ್ಯಗ್ ಭೇಟಿ ಕೊರ್ದು ಇಸೇಸ ಪೂಜೆ ಸಂದಾಯೆರ್.
ಅಭಿಷೇಕ್ ನೊಟ್ಟಿಗೆ ನಿರ್ದೇಶಕೆರ್ ಮಹೇಶ್ ಕುಮಾರ್, ಬಿಗ್ ಬಾಸ್ ವಿನ್ನರ್ ರೂಪೇಶ್ ಶೆಟ್ಟಿ ದೇವೆರೆನ ದರ್ಶನ ಪಡೆಯೆರ್. ಅಭಿಷೇಕ್, ರಚಿತಾರಾಮ್ ನಟನೆದ ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ನ್ ದುನಿಯಾ ಸೂರಿ ನಿರ್ದೇಶನ ಮಲ್ದೆರ್.
ಅಮೃತಸಂಜೀವಿನಿ (ರಿ.) ಕುಡ್ಲದ 94ನೇ ಮಾಸಿಕ ಯೋಜನೆದ ಮುಖೇನ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ನೆತ್ತ ಸೆಪ್ಟೆಂಬರ್ ತಿಂಗೊಲ್ದ ಸೇವಾಯೋಜನೆಡ್ ಸಂಜೀವಿನಿರ್ದ್ ಒಟ್ಟು ಸೇರ್ಸಾಯಿನ 1,43,000.00 ರೂ. ನ್ 4 ಮಾಸಿಕ ಸೇವಾಯೋಜನೆ ಬೊಕ್ಕ 2 ತುರ್ತು ಯೋಜನೆದ ಮುಖೇನ ಒಟ್ಟು 6 ಫಲಾನುಭವಿಲೆಗ್ ಕೊರಿಯೆರ್.
ಇರಾಕ್ ಡ್ ಅಲ್-ಹಮದನಿಯಾಡ್ ನಡತೊಂದು ಇತ್ತಿನ ಮದಿಮೆದ ಲೇಸ್ ಡ್ ತೂ ಪೊತ್ತ್ ದ್ 100 ಜನ ತೀರ್ ಪೋಯೆರ್.
ಈ ಘಟನೆಡ್ 550 ರ್ದ್ ಎಚ್ಚ ಜನಕ್ಕ್ ಪೆಟ್ಟಾತ್ಂಡ್. ತೀರ್ ಪೋಯಿನಕ್ಲೆನೆಟ್ಟ್ ಮದಿಮಾಯೆ ಮದಿಮಲ್ ಸೇರ್ದೆರ್ ಪಂದ್ ಅಧಿಕಾರಿಲು ತೆರಿಪಾದೆರ್. ಅತ್ತಂದೆ ಈ ಪೊರ್ತುಡು ಫಂಕ್ಷನ್ ಹಾಲ್ ಡ್ 1000 ಜನ ಇತ್ತೆರ್. ಬೊಕ್ಕ ರಕ್ಷಣಾ ಕಾರ್ಯಾಚರಣೆ ನಡತ್ ದ್ಂಡ್ ಪಂದ್ ಪಂಡೆರ್.
ಕಾರ್ಲ: ಹಿರ್ಗಾನ ಮೂರ್ತೆದಾರೆರೆನ ಸೇವಾ ಸಹಕಾರ ಸಂಘದ ವಾರ್ಷಿಕ ಮಹಾಸಭೆ ಸೆ.24 ಕ್ಕ್ ಸಂಘದ ಸಭಾಭವನಡ್ ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಸಂಘದ ಗುರ್ಕಾರೆ ಸತೀಶ್ ಪೂಜಾರಿ ಪಾತೆರ್ದ್, ಆಡಳಿತ ಮಂಡಳಿದ ಪಾರದರ್ಶಕ ಆಡಳಿತ, ಸಿಬ್ಬಂದಿಲೆನ ಕಾರ್ಯದಕ್ಷತೆ ಬೊಕ್ಕ ಸಂಘದ ಸದಸ್ಯೆರೆನ ಸಹಕಾರರ್ದ್ ಸಂಘ ಪ್ರಗತಿದ ತಾದಿಡ್ ದುಂಬರಿವೊಂದು ಉಂಡು ಪಂದ್ ಪಂಡೆರ್.
ಸಂಘದ ಸದಸ್ಯೆರ್ ಆನಂದ ಪೂಜಾರಿ ಪಾತೆರ್ದ್, ಸಂಘದ ಸ್ಥಾಪಕೆರ್, ಗುರ್ಕಾರೆ ಆದಿತ್ತಿನ ದಿ. ಸುಂದರ ಪೂಜಾರಿ ಮೆರೆನ ಶ್ರಮತ್ತ ಫಲವಾದ್ ಸಂಘ ಸಧೃಢವಾದ್ ಬುಲೆದ್ ಉಂತುದುಂಡು. ನನಲ ನಮ್ಮ ಸಂಘ ಎಡ್ಡೆ ರೀತಿಡ್ ಕೆಲಸ ಮಲ್ಪಡ್, ಅಂಚೆನೆ ಸಂಘದ ಬುಲೆವಣಿಗೆಗ್ ನಮ ಮತ ಬೆನ್ಕ ಪಂದ್ ಪಂಡೆರ್.
ಮುಖ್ಯಕಾರ್ಯನಿರ್ವಣಾಧಿಕಾರಿ ಸಂತೋಷ್ ಆರ್ಥಿಕ ವರ್ಷೊದ ವರದಿ ಮಂಡಿಸಾದ್ ಪಾತೆರ್ದ್, ಸಂಘ 50.92 ಲಕ್ಷ ರೂ. ವ್ಯವಹಾರ ಮಲ್ತ್ ದ್ಂಡ್, ಬೆನ್ಪುನ ಬಂಡವಾಳ ರೂ. 7.25 ಕೋ.ರೂ. ಬೊಕ್ಕ ರೂ. 10.46 ಲಕ್ಷ ಲಾಭ ಮಲ್ದ್ಂಡ್. ಲಾಭಾಂಶಡ್ ಶೇ.10 ಡಿವಿಡೆಂಡ್ ಗ್ ಕೊರ್ಪ ಪಂದ್ ಪಂಡೆರ್.
ಸಂಘದ ಸದಸ್ಯೆರೆನ 28 ಜೋಕುಲೆಗ್ ವಿದ್ಯಾರ್ಥಿವೇತನನ್ ಲಾಭಾಂಶದ ಚೆಕ್ ಮುಖೇನ ಪಟ್ಟಿಯೆರ್. ಈ ಪೊರ್ತುಡು ಸಂಘದ ಮುತಾಲಿಕೆಡ್ ಬೆನೊಂದು ಇಪ್ಪುನ 3 ಸ್ವ ಸಹಾಯ ಕೂಟಗ್ 2,20,000 ರೂ. ಮೊತ್ತದ ಲಾಭಾಂಶದ ಚೆಕ್ ನ್ ಕೊರಿಯೆರ್.
ಈ ಪೊರ್ತುಡು ಸಂಘದ ಉಪಾಧ್ಯಕ್ಷೆರ್ ಭಾಸ್ಕರ್ ಸಿ. ಕೋಟ್ಯಾನ್, ನಿರ್ದೇಶಕೆರ್ ಆನಂದ ಪೂಜಾರಿ, ಬಾಬು ಪೂಜಾರಿ, ಸೋಮಪ್ಪ ಪೂಜಾರಿ, ನಾರಾಯಣ ಪೂಜಾರಿ, ಉದಯ ಪೂಜಾರಿ, ನಾರಾಯಣ ಪೂಜಾರಿ ಬೊಕ್ಕ ಸುಂದರ ಪೂಜಾರಿ ಪಾಲ್ ಪಡೆದಿತ್ತೆರ್. ಸಿಬ್ಬಂದಿ ಸುರೇಖಾ ಎದ್ಕೊನಿಯೆರ್. ಸಂತೋಷ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ದೀಪಾ ಸೊಲ್ಮೆ ಸಂದಾಯೆರ್.
ಕುಡ್ಲ: ಕುಡ್ಲದ ಪೇಂಟೆದ ಬೆಂದೂರುವೆಲ್‌ ಪರಿಸರಡ್‌ ಅಮಲ್ ದ ಸೊತ್ತುನು ಮಾರೊಂದಿತ್ತಿನ ಕಲ್ಪಾರ್ಥಿನ್‌ ಸಿಸಿಬಿ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್.
ಪೇಂಟೆದ ಕಾಲೇಜ್‌ ಒಂಜೆಟ್ಟ್‌ ಪದವಿ ಕಲ್ಪಾರ್ಥಿ ಸುಳ್ಯ ತಾಲೂಕುದ ಅಜ್ಞಾವರ ಗ್ರಾಮದ ಲುಕ್ಕಾನುಲ್‌ ಹಕೀಂ(22ವ) ಅರೆಸ್ಟ್‌ ಆಯಿನ ಆರೋಪಿ. 1 ಲಕ್ಷ 25 ಸಾವಿರದ 25 ಗ್ರಾಂ ಎಂಡಿಎಂಎ ವಶಕ್ಕ್‌ ಪಡೆಯೊಂದೆರ್. ನೆತ್ತ ಒಟ್ಟಿಗೆ ಮೊಬೈಲ್‌ ಪೋನ್‌, ಡಿಜಿಟಲ್‌ ತೂಕ ಸೇರಿನಂಚ ಒಟ್ಟು 1 ಲಕ್ಷ 60 ಸಾವಿರ ಮೌಲ್ಯದ ವಸ್ತುಲೆನ್‌ ಸಿಸಿಬಿ ಪೊಲೀಸೆರ್‌ ವಶಕ್‌ ಪಡೆಯೊಂದೆರ್.
ಸಾರ್ವಜನಿಕೆರೆಗ್‌ ಬೊಕ್ಕ ಕಲ್ಪಾರ್ಥಿಲೆಗ್‌ ಮಾದಕ ಸೊತ್ತುಲೆನ್ ಮಾರಾಟ ಮಾಲ್ತೊಂದು ಇತ್ತಿನ ಮಾಹಿತಿನ್ ತೆರಿಯೊಂದು ಸಿಸಿಬಿ ಪೊಲೀಸೆರ್‌ ಕಾರ್ಯಾಚರಣೆ ಮಲ್ತ್‌ದ್‌ ಆರೋಪಿನ್‌ ಅರೆಸ್ಟ್‌ ಮಲ್ತ್‌ದೆರ್. ಕುಡ್ಲ ಪೂರ್ವ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್ ದಾಖಲಾತ್‌ಂಡ್‌.
ಪೆರ್ಲ: ಇತಿಹಾಸ ಪ್ರಸಿದ್ಧ ಕಾಟುಕುಕ್ಕೆ ಶ್ರೀಸುಬ್ರಾಯ ಕ್ಷೇತ್ರಗ್ ಪುತ್ತೂರು ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ಭೇಟಿ ಕೊರಿಯೆರ್. ವಿಧಾನ ಸಭಾ ವೋಟ್‌ದ ಪೊರ್ತುಡು ಅಶೋಕ್ ರೈ ಗೆಂದೆರೆ ಅಭಿಮಾನಿಲು ಪ್ರಾರ್ಥನೆ ಮಲ್ತ್ ಇತ್ತಿನ ಪರಕೆನ್‌ ಸಂದಾಯೆರೆ ಕಾಟುಕುಕ್ಕೆ ಕ್ಷೇತ್ರಕ್ಕೆ ಬತ್ತಿತೆರ್. ಈ ಪೊರ್ತುಡು ಕಾಟುಕುಕ್ಕೆದ ಅಭಿಮಾನಿ ಬಳಗದ ಪರವಾದ್ ಪೌರ ಮಾನಾದಿಗೆ ಮಲ್ತೆರ್.
ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಪಡ್ಡಂಬೈಲು, ಮಾಜಿ ಆಡಳಿತ ಮೊಕ್ತೇಸರೆರ್ ನಾರಾಯಣ, ಉತ್ಸವ ಆಚರಣಾ ಸಮಿತಿ ಗುರ್ಕಾರ್ಲು ಪುರುಷೋತ್ತಮ ಭಟ್ ಮಿತ್ತೂರು ಇತ್ತೆರ್. ಎಣ್ಮಕಜೆ ಗ್ರಾಮ ಪಂಚಾಯತಿ ಅಭಿವೃದ್ಧಿ ಸ್ಥಾಯಿ ಸಮಿತಿದ ಗುರ್ಕಾರ್ಲು ಬಿ.ಎಸ್.ಗಾಂಭೀರ್ ಎದ್ಕೊಂದು ದೀಪಕ್ ಭಂಡಾರದ ಮನೆ ಸೊಲ್ಮೆ ಸಂದಾಯ ಮಲ್ತೆರ್. ಈ ಪೊರ್ತುಡು ಕ್ಷೇತ್ರ ಅಭಿವೃದ್ಧಿ ಕಾರ್ಯಗ್‌ ಕರ್ನಾಟಕ ಸರಕಾರರ್ದ್ ಪೂರಕ ಯೋಜನೆಲೆನ್‌ ಕೊರೊಡು ಪಂದ್ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಬಿನ್ನಾಪು ಮಲ್ತೆರ್. ಅಂಚೆನೆ ಪಡ್ಡಂಬೈಲು ಬೊಕ್ಕ ಅಡ್ಕಸ್ಥಳ -ಕಾಟುಕುಕ್ಕೆ ಮುಖೇನ ಆರ್ಲಪದವು ಪುತ್ತೂರುಗ್ ಸರಕಾರಿ ಬಸ್ ಮಂಜೂರು ಮಲ್ಪೊಡು ಪಂದ್ ನಾಗರಿಕೆರ್ನ ಪರವಾದ್ ಬಿ.ಎಸ್.ಗಾಂಭೀರ್ ಶಾಸಕೆರೆಗ್‌ ಮನವಿ ಕೊರಿಯೆರ್.
ಚೀನಾಡ್ ನಡೆತೊಂದು ಇಪ್ಪುನ ಏಷ್ಯನ್ ಗೇಮ್ಸ್‌ಡ್ ಭಾರತ ತನ್ನ ಶಕ್ತಿ ಪ್ರದರ್ಶನ ಮಲ್ತ್‌ದುಂಡ್. 3 ಬಂಗಾರ್ದ ಪದಕನ್‌ ಗೆಂದುದ್‌ ಇಪ್ಪುನ ಭಾರತ, ಇತ್ತೆ ತನ್ನ ಖಾತೆಗ್‌ ನನೊಂಜಿ ಬಂಗಾರ್ದ ಪದಕನ್‌ ಸೇರ್ಪಾವೊದುಂಡ್.
ಪೊಂಜೊಕ್ಲೆನ ಶೂಟಿಂಗ್‌ 25 ಪಿಸ್ತೂಲ್‌ ಪಂತೊಡು ಮನುಬಾಕರ್‌, ಇಶಾ ಸಿಂಗ್ ಬೊಕ್ಕ ರಿಥಮ್‌ ಸಾಂಗ್ವಾನ್‌ ಬಂಗಾರ್ದ ಪದಕನ್‌ ಪಡೆಯೊಂದೆರ್. ಮನು, ಈಶಾ ಬೊಕ್ಕ ರಿದಮ್ ಒಟ್ಟು 1759 ಅಂಕಲೆನ್‌ ಪಡೆಯೊಂದು ಭಾರತಗ್ ನಾಲನೇ ಬಂಗಾರ್ದ ಪದಕನ್‌ ಕನತ್‌ ಕೊರ್ತೆರ್. ಈ ಏಷ್ಯನ್ ಗೇಮ್ಸ್‌ಡ್ ಭಾರತ 4 ಬಂಗಾರ್ದ ಪದಕ ಸೇರಿನಂಚ ಒಟ್ಟು 16 ಪದಕಲೆನ್‌ ಪಡೆಯೊದುಂಡು.
ಕುಂಡಡ್ಕ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ಶಿಬರಿಕಲ್ಲ- ಮಾಡದ ಪಿಲಿಪ್ಪೆ-ವಿಷ್ಣುನಗರ ಶ್ರೀ ಮಲರಾಯ ಮೂವರ್ ದೈವಂಗಳ ದೈವೊಲ್ಯದ ಶ್ರೀ ಮಲರಾಯಿ ಮೂವರ್ ದೈವೊಲೆನ ಪುದ್ವರ್ ಮೆಚ್ಚಿ ನೇಮೋಚ್ಚಯ ಸೆ.27 ಬೊಕ್ಕ 28 ಕ್ಕ್ ಡೆಚ್ಚಾರು ಭಂಡಾರ ಇಲ್ಲಲ್ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತಾದಿಲು ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೈವೊಲೆನ ಗಂಧ ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುಂಡಡ್ಕ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ಆಡಳಿತ ಸಮಿತಿದ ಗುರ್ಕಾರೆ ಬೊಕ್ಕ ಸದಸ್ಯೆರ್, ವಿಟ್ಲ ಅರಮನೆ ಬೊಕ್ಕ ಕರ್ಗಲ್ಲು ನೂಜಿ, ಕುಡ್ವ, ಕುಳ, ಕುಂಡಡ್ಕ ಮನೆತನದ ಅನುವಂಶಿಕ ಆಡಳಿತ ಮೊಕ್ತೇಸೆರೆರ್, ಶಿಬರಿಕಲ್ಲ-ಮಾಡ ಶ್ರೀ ಮಲರಾಯ ಮೂವರ್ ದೈವಂಗಳ ದೈವೊಲ್ಯದ ನೇಮೋಚ್ಚಯ ಸಮಿತಿದ ಗುರ್ಕಾರೆ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಪ್ರತಿ ವರ್ಷ ನಡಪುನಂಚೆನೆ ಈ ವರ್ಷಲ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಪೊಸರಿ (ಹೊಸಕ್ಕಿ) ನಡಾರಿ(ನಡಾವಳಿ) ಉಚ್ಚಯ ಅ.27 ಸುಕ್ರಾರ ನಡಪರೆ ಉಂಡು.
ಆನಿದ ದಿನ ಬೊಲ್ಪುಗು ಕದಿಕೆರ್ದ್ ಭಂಡಾರ ಬರಿಯೆರೆ ಉಂಡು. ಬಯ್ಯಗ್ ಉಚ್ಚಯದ ಧಾರ್ಮಿಕ ಲೇಸ್ ಸುರು ಆಪುಂಡು. ರಾತ್ರೆ ಮಹಾಪೂಜೆ, ಮೂರ್ತಿ ಬಲಿ, ದರ್ಶನ, ಪರಕೆ ಬೊಕ್ಕ ಭಂಡಾರ ನಿರ್ಗಮನ ಆಯೆರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀದೇವಿನ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
