ತುಳು ಸುದ್ದಿ

ನಡ ಗ್ರಾಮದ ಗಡಾಯಿಕಲ್ಲ್ ಡ್ ಬಂಡೆಕಲ್ಲ್ ದ ಒಂಜಿ ಪಾಲ್ ತುಂಡು : ಪೋಡಿದ್ ಪೋಯಿನ ಗ್ರಾಮಸ್ಥೆರ್

ಬೆಳ್ತಂಗಡಿ, ಮೇ 03 : ಬೆಳ್ತಂಗಡಿ ಪೇಂಟೆದ ಇತಿಹಾಸ ಪ್ರಸಿದ್ಧ ನಡ ಗ್ರಾಮದ ಗಡಾಯಿಕಲ್ಲ ಡ್ ಕೋಡೆ ಕಾಂಡೆ ಬಾರಿ ಶಬ್ದದೊಟ್ಟುಗು ಬಂಡೆಕಲ್ಲ್ ದ ಒಂಜಿ ಪಾಲ್ ತುಂಡಾದ್ ತಿರ್ತ್ ಬೂರ್ದುಂಡು.

ರಾತ್ರಿ ಭಾರೀ ಬರ್ಸ ಬೈದಿನೇರ್ದಾವರ ತೆಡಿಲ್ ಆಕ್ ದ್ ದು ಬಂಡೆ ತುಂಡಾದ್ ತಿರ್ತ್ ಬೂರ್ದು ಉಪ್ಪು ಪಂದ್ ಕೈತಲ್ ದಕುಲು ಪಂಡೆರ್. . ಕರಿನ ವರ್ಷಲಾ ಇಂಚನೇ ಬಂಡೆದ ತುಂಡೊಂಜಿ ಬೂರ್ದು ಜನಕ್ಲೆಗ್ ಆತಂಕ ಆದಿತ್ತುಂಡು.

ಅರಣ್ಯ ಇಲಾಖೆದ ಅಧಿಕಾರಿಲು ಈ ಬಗ್ಗೆ ಮಾಹಿತಿ ಪಡೆತೆರ್ . ಸ್ಫೋಟದ ಶಬ್ದ ಸುಮಾರು 1 ಕಿ.ಮೀ ರ್ದ್ ಜಾಸ್ತಿ ದೂರ ಕೇಂದುಂಡು ಪಂದ್ ಕೈತಲ್ ದಕುಲು ಪಂತೆರ್.

ಎಸ್ಸೆಸ್ಸೆಲ್ಸಿ ಫಲಿತಾಂಶಡ್ ದಾಖಲೆ ಮಲ್ಪುನ ನೆಲೆಟ್ಟ್ ಪಾಸಿಂಗ್ ಪ್ಯಾಕೇಜ್ ಅಭಿಯಾನ

ಕರ್ನಾಟಕ, ಮೇ 03: ಎಸ್ಸೆಸ್ಸೆಲ್ಸಿ ಫಲಿತಾಂಶಡ್ ದಾಖಲೆ ಮಲ್ಪುನ ನೆಲೆಟ್ಟ್ 5 ವರ್ಷ ಪಿರವು ಮಿಶನ್ 90 ಪ್ಲಸ್ ಜಾರಿ ಕಂತಿನ ರಾಜ್ಯಡೇ ಪೊಸ ಹುಮ್ಮಸ್ ಮೂಡಾಯಿನ ಪುತ್ತೂರು ಪೇಂಟೆಡ್ ಈ ಸಲ ಕುಡೊಂಜಿ ವಿನೂತನ ಅಭಿಯಾನ ನಡತೊಂದು ಉಂಡು . ಉತ್ತೀರ್ಣವೇ ಕಷ್ಟ ಪನ್ಪಿನ ಸ್ಥಿತಿಟುಪ್ಪುನ ಜೋಕುಲು ಒವ್ವೆ ಪೋಡಿಗೆ ಇಜ್ಜಂದೆ ಪಾಸ್ ಆವೊಡು ಪನ್ಪಿ ಕಾರಣಗ್ ಪಾಸಿಂಗ್ ಪ್ಯಾಕೇಜ್ ಮಲ್ದೆರ್ , ನೆತ್ತ ಅಡಿಟ್ ಮಸ್ತ್ ಆಂದೋಲನ ನಡಪಾವೊಂದು ಉಲ್ಲೆರ್.

24 ಸರಕಾರಿ ಪ್ರೌಢಶಾಲೆ, 22 ಅನುದಾನಿತ ಪ್ರೌಢಶಾಲೆ, ಮತ್ತು 34 ಅನುದಾನ ರಹಿತ ಪ್ರೌಢಶಾಲೆ, 80 ಪ್ರೌಢಶಾಲೆರ್ದ್ ತಲಾ 5078 ವಿದ್ಯಾರ್ಥಿಲು ಈ ಸಲ ಪರೀಕ್ಷೆಗೆ ಬರೆಯೊಂದು ಉಲ್ಲೆರ್ .

ಲಾಕ್ ಡೌನ್ ಸಂತ್ರಸ್ತೆರೆಗ್ ಮುಲ್ಕಿ ಯುವ ಕಾಂಗ್ರೆಸ್ ರ್ದ್ ವಣಸ್ ದ ವ್ಯವಸ್ಥೆ

ಮುಲ್ಕಿ : ಲಾಕ್ ಡೌನ್ ದ ಪೊರ್ತುಡು ಮಾರ್ಗದ ಬರಿಟ್ಟ್ ಕುಲ್ದಿನ ನಿರಾಶ್ರಿತೆರ್, ಅಂಗವಿಕಲೆರ್, ದೂರದ ಊರುಗು ನಡತೊಂದು ಪೋಪಿನಕ್ಲೆಗ್ ಬೊಕ್ಕ ಬಡಪತ್ತ್ ದಕ್ಲೆಗ್ ವಣಸ್, ತಿಂಡಿದ ವ್ಯವಸ್ಥೆನ್ ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಕರಿನ ಮೂಜಿ ದಿನೊರ್ದಿಂಚಿ ವ್ಯವಸ್ಥೆ ಮಲ್ದ್ಂಡ್.
ಕೋವಿಡ್ ದ ರಡ್ಡನೇ ಲಾಕ್ ಡೌನ್ ದ ಕಾರಣೊಡು ವಣಸ್ ತೆನಸ್ ದಾಂತಿನ ಬಡವರೆಗ್, ಅಂಗವಿಕಲೆರೆಗ್ ಎಂಕುಲು ಈ ವ್ಯವಸ್ಥೆ ಮಲ್ತ್ ದ.

ಒರಿ ಒರಿಯೆ ಇತ್ತಿನಕ್ಲೆಗ್ಲ ವಣಸ್, ತಿಂಡಿದ ವ್ಯವಸ್ಥೆ ಮಲ್ತೊಂದುಲ್ಲ ಪಂಡ್ ದ್ ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್ ಪಂಡೆರ್.ಮೂಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಕಾಂಗ್ರೆಸ್ ದ ಹಿಂದುಳಿದ ವರ್ಗದ ಕಾರ್ಯದರ್ಶಿ ಪ್ರವೀಣ್ ಬೊಳ್ಳೂರು, ಕ್ಷೇತ್ರದ ಇಂಟಕ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಶಿಮಂತೂರು, ಧರ್ಮಾನಂದ ಶೆಟ್ಟಿಗಾರ್ ತೋಕೂರು, ಲೋಕೇಶ್ ಕೋಟ್ಯಾನ್ ಮೊಕುಲು ಮಾತ ಇತ್ತೆರ್.

ರಾಜ್ಯ ಸರಕಾರರ್ದ್ ಪರಿಷ್ಕೃತ ಮಾರ್ಗಸೂಚಿ ಪ್ರಕಟ

ಕರ್ನಾಟಕ, ಮೇ 02: ಕರ್ನಾಟಕ ಸರ್ಕಾರ ಕುಡೊಂಜಿ ಸಲ ಕೊರೋನಾ ಲಾಕ್ಡೌನ್ ಮಾರ್ಗಸೂಚಿಡ್ ಬದಲಾವಣೆ ಮಲ್ದುಂಡು .ಇತ್ತೆ ಪರಿಷ್ಕೃತ ಮಾರ್ಗಸೂಚಿ ಬೈದುಂಡು ಐಟ್ ಆಯಿನ ಬದಲಾವಣೆ ಇಂಚ ಉಂಡು. ಈ ಪರಿಷ್ಕೃತ ಜಾಹೀರಾತು ಇನಿರ್ದ್ ಜಾರಿಗ್ ಬರ್ರೆ ಉಂಡು.

• ಪೇರ್, ಫಲ ವಸ್ತು, ತರಕಾರಿ ಕಾಂಡೆ 6 ಗಂಟೆರ್ದ್ ಬೈಯ್ಯ 6 ಗಂಟೆ ಮುಟ ಮಾರಾರೆ ಅವಕಾಶ.
• ಸಂತೆಲು,ಮಾರುಕಟ್ಟೆಲು ಕಂಪ್ಲೀಟ್ ಬಂದ್.
• ದಿನಸಿ ಮನಸ್ ಗ್ ಬೋಡಾಯಿನ ತೆನಸ್ ದ ಅಂಗಡಿ 6.00 ಗಂಟೆರ್ದ್ 12.30 ಮುಟ.
• ಎಪಿಎಂಸಿ ನ್ಲಾ ಕಾಂಡೆ 6 ಗಂಟೆರ್ದ್ 12 ಗಂಟೆ ಮುಟ ಅವಕಾಶ.
• ಮಾಸ್ಕ್ ಸಾಮಾಜಿಕ ಅಂತರ ಪಾಲಿಸಾವೊಂದು ಬೇರ ಮಲ್ಪೊಡು.
• ರೂಲ್ಸ್ ಬ್ರೇಕ್ ಮಲ್ಪುನಕ್ಲೆಗ್ ಕಠಿಣ ಕ್ರಮ.
• ನೂಕೊಂದು ಪೋಪಿನ ಗಾಡಿ, ತರಕಾರಿ, ಪೂ, ಫಲ ವಸ್ತು ಮೆಕ್ಲೆನ್ ಕಾಂಡೆ ರ್ದ್ ಬೈಯ್ಯ 6 ಗಂಟೆ  ಮುಟ ಬೇರ ಮಲ್ಪರೆ ಅವಕಾಶ ಉಂಡು.
• ಮಾರುಕಟ್ಟೆ ದ ದರಟೆ ಬೇರ ಮಲ್ಪೊಡು ಜಾಸ್ತಿ ಕಾಸ್ ಗ್ ಬೇರ ಮಲ್ಪರೆ ಇಜ್ಜಿ.
• ಮೀನ್ ಮಾಸದ ಬೇರ ಮಲ್ಪುನಕ್ಲೆಗ್ಏ ಪದಲಕ 6 ಗಂಟೆರ್ದ್ ಪತ್ತ್ ಗಂಟೆ ಮುಟ ಮಾತ್ರ ಅವಕಾಶ.
• ಮದ್ಯ ಮಾರಾಟ ಕಾಂಡೆ 6 ಗಂಟೆರ್ದ್ ಕಾಂಡೆ 10 ಗಂಟೆ ಮುಟ.              ಬಿಬಿಎಂಪಿ, ಜಿಲ್ಲಾಧಿಕಾರಿ, ಪೊಲೀಸ್ ಕಮಿಷನರ್ ಬೊಕ್ಕ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಈ ಆದೇಶನ್ ಕಟ್ಟುನಿಟ್ಟಾದ್ ಜಾರಿಗ್ ಕನಯರೇ ಸೂಚನೆ ಕೊರ್ತೆರ್.