ಬೊಲ್ತೆರ್ ಸುದ್ದಿ | Belthangady News

ಬೆಂಗ್ಳೂರುರ್ದು ಧರ್ಮಸ್ಥಳಗ್ ಸೈಕಲ್‌ಡ್‌ ಬತ್ತಿನ ಶಾಸಕೆರ್ ಸುರೇಶ ಕುಮಾರ್‌

ಉಜಿರೆ: ಮಾಜಿ ಸಚಿವೆರ್‌ ಬೊಕ್ಕ ರಾಜಾಜಿನಗರದ ಶಾಸಕೆರ್ ಸುರೇಶ ಕುಮಾರ್ ಬೆಂಗಳೂರ್ದ್ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಸೈಕಲ್ ಯಾತ್ರೆಡ್ ಬತ್ತ್ ದ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆಯೆರ್.‌ ನ.8 ದಾನಿ ಕಾಂಡೆ ಬೆಂಗಳೂರುರ್ದ್‌ ಪಿದಡ್ದ್ ನ.10 ದಾನಿ ಶ್ರೀ ಕ್ಷೇತ್ರ ಧರ್ಮಸ್ಥಳಗ್‌ ಬತ್ತ್‌ದ್ ತನ್ನ ಸೈಕಲ್ ಯಾತ್ರೆನ್ ಸಮಾಪ್ತಿ ಮಲ್ತೆರ್.

ಪತ್ರಕರ್ತೆರ್ನ ಸಂಘದ ಜಿಲ್ಲಾ ಸಮ್ಮೇಳನದ ಲಾಂಛನ ಬುಡುಗಡೆ ಮಲ್ತಿನ ಡಾ.ಹೆಗ್ಗಡೆ

ಬೋಲ್ತೆರ್ : ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯ ನಿರತ ಪತ್ರ ಕರ್ತರ ಸಂಘದ‌ ವತಿರ್ದ್ ಡಿ.21ದಾನಿ ಕುಡ್ಲದ ಕುದ್ಮುಲ್ ರಂಗ ರಾವ್ ಪುರಭವನಡ್ ನಡಪುನ 4 ನೇ ಜಿಲ್ಲಾ ಸಮ್ಮೇಳನದ ಲಾಂಛನನ್ ನ.11ದಾನಿ ಶನಿವಾರ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಬೊಕ್ಕ ರಾಜ್ಯ ಸಭಾ ಸದಸ್ಯೆರಾಯಿನ ಡಾ. ಡಿ.ವೀರೇಂದ್ರ ಹೆಗ್ಗಡೆ ಬುಡುಗಡೆ ಮಲ್ತ್‌ದ್ ಎಡ್ಡೆಪ್ಪು ಬಯಕಿಯೆರ್.

ದ.ಕ ಜಿಲ್ಲಾ ಕಾರ್ಯ ನಿರತ ಪತ್ರಕರ್ತರ ಸಂಘದ ಗುರ್ಕಾರ್ಲು ಶ್ರೀನಿವಾಸ ನಾಯಕ್ ಇಂದಾಜೆ, ಕುಡ್ಲ ಪ್ರೆಸ್‌ ಕ್ಲಬ್ ಗುರ್ಕಾರ್ಲು ಪಿ.ಬಿ.ಹರೀಶ್ ರೈ, ರಾಜ್ಯ ಕಾರ್ಯ ನಿರತ ಪತ್ರ ಕರ್ತರ ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಜಗನ್ನಾಥ ಶೆಟ್ಟಿ ಬಾಳ,‌ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಉಪಾಧ್ಯಕ್ಷೆರ್ ಭಾಸ್ಕರ್ ರೈ ಕಟ್ಟ,‌ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ, ಕೋಶಾಧಿಕಾರಿ ಪುಷ್ಪರಾಜ್ ಬಿ.ಎನ್, ಕಾರ್ಯದರ್ಶಿ ಭುವನೇಶ್ ಗೇರುಕಟ್ಟೆ, ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ರಾಜೇಶ್ ದಡ್ಡಂಗಡಿ, ಬೋಲ್ತೆರ್ ತಾಲೂಕು ಕಾರ್ಯ ನಿರತ ಪತ್ರಕರ್ತರ ಸಂಘದ ಗುರ್ಕಾರ್ಲು ಹೃಷಿಕೇಶ್ ಧರ್ಮಸ್ಥಳ, ಹಿರಿಯ ಪತ್ರಕರ್ತೆರ್ ಆರ್.ಎನ್. ಪೂವಣಿ,‌ ಅರವಿಂದ ಹೆಬ್ಬಾರ್ ಇತ್ತೆರ್.

ಬೋಲ್ತೆರ್‌ಗ್‌ ಬತ್ತಿನ ಒಂಟೆ…!

ಬೋಲ್ತೆರ್: ಮುಲ್ತ ಪೇಂಟೆಡ್ ಒಂಟೆ ಸಂಚಾರ ಮಲ್ತೊಂದು ಇತ್ತ್‌ದ್ ಈ ಒಂಟೆ ಒಲ್ಪರ್ದ್‌ ಬತ್ತ್‌ಂಡ್‌ ಪನ್ಪುನ ಕುತೂಹಲ ಮಾತೆರೆಗ್. ಆತೆಕ್ಲ ಈ ಒಂಟೆ ಕುಡ್ಲರ್ದ್ ಚಿಕ್ಕಮಗಳೂರುಗ್‌ ಪೋವೊಂದು ಇತ್ತ್‌ಂಡ್.‌

ಅಲ್ಪದ ಒಂಜಿ ಮದಿಮೆಡ್‌ ಪಾಲ್‌ ಪಡೆಯೆರೆ ಉಂಡು. ತೂಪುನಕುಲ್‌ ಮಾತ ಒಂಟೆದ ಫೋಟೋ ಕ್ಲಿಕ್ ಮಲ್ತ್‌ದ್‌ ಖುಷಿನ್‌ ಪಟ್ಟೊಂದೆರ್.

ಬಿಜೆಪಿದ ಪೊಸ ರಾಜ್ಯಾಧ್ಯಕ್ಷೆರೆಗ್ ಹರೀಶ್ ಪೂಂಜ ಅಭಿನಂದನೆ‌

ಬೋಲ್ತೆರ್: ಬಿಜೆಪಿದ ಪೊಸ ರಾಜ್ಯಾಧ್ಯಕ್ಷೆರಾದ್ ಆಯ್ಕೆಯಾಯಿನ ಮಾಜಿ ಮುಖ್ಯಮಂತ್ರಿ ಬಿ ಎಸ್ ಯಡಿಯೂರಪ್ಪ ಮೇರೆನ ಮಗೆ ಬಿ.ವೈ ವಿಜಯೇಂದ್ರರೆಗ್ ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ ಭೇಟಿಯಾದ್ ಶುಭ ಹಾರೈಸಾದೆರ್.

ಈ ಬಗ್ಗೆ ತನ್ನ ಸಾಮಾಜಿಕ ಜಾಲತಾಣಡ್ “ವಿಜಯಪರ್ವದ ಆರಂಭ ಅಭಿನಂದನೆಗಳು ವಿಜಯೇಂದ್ರಣ್ಣ” ಪಂದ್ ಶಾಸಕ ಪೂಂಜ ಬರೆಯೊಂದೆರ್.

ನ.13: ಬೋಲ್ತೆರ್‌ ಬಿಜೆಪಿ ಯುವ ಮೋರ್ಚಾದ ವತಿರ್ದ್ ತುಡರ್‌ ಪರ್ಬದ ಲೆಕ್ಕೊಡ್ ದೋಸೆ ಪರ್ಬ ಲೇಸ್

ಬೋಲ್ತೆರ್: ತುಡರ್‌ ಪರ್ಬದ ಲೆಕ್ಕೊಡು ಪ್ರತಿವರ್ಷ ಬಿಜೆಪಿ ಯುವಮೋರ್ಚಾದ ವತಿರ್ದ್ ನಡಪುನ ದೀಪಾವಳಿ ದೋಸೆ ಪರ್ಬ ಈ ಸರ್ತಿ ನ.13 ದಾನಿ ಕಾಂಡೆರ್ದ್‌ ಬಯ್ಯ ಮುಟ್ಟ ನಡಪೆರೆ ಉಂಡು. ನೆತ್ತ ಪೂರ್ವ ಭಾವಿ ಸಭೆ ಇನಿ ನಡತ್‌ಂಡ್. ಕಾಂಡೆ ತಾಲೂಕುದ ಬೇತೆ ಬೇತೆ ಭಜನಾ ಮಂಡಳಿರ್ದ್ ಕುಣಿತ ಭಜನೆ ನಡಪೆರೆ ಉಂಡು.

ಬೋಲ್ತೆರ್‌ ಪೇಂಟೆಡ್ ದೀಪಾಲಂಕಾರ, ಬಯ್ಯಗ್ ಗೋಪೂಜೆ, ತಿಬಿಲೆದ ಸಾಲ್‌, ಸಾಂಸ್ಕೃತಿಕ ಕಾರ್ಯಕ್ರಮ, ಧಾರ್ಮಿಕ ಕಾರ್ಯಕ್ರಮ ನಡಪೆರೆ ಉಂಡು. ಬಯ್ಯಗ್ ಆರ್ಯಭಟ ಪ್ರಶಸ್ತಿ ವಿಜೇತ ಜಗದೀಶ್ ಆಚಾರ್ಯ ಪುತ್ತೂರು ಮೊಕ್ಲೆರ್ದ್ ಭಕ್ತಿ ಸಂಗೀತ ಕಾರ್ಯಕ್ರಮ ನಡಪೆರೆ ಉಂಡು.

ರಾತ್ರೆ ಸಮಾರೋಪ ಕಾರ್ಯಕ್ರಮದ ಆಯಿ ಬೊಕ್ಕ ಕುಡ್ಲದ ವಿಜಯ ಕುಮಾರ್ ಕೊಡಿಯಾಲ್ ಬೈಲ್ ಅಕ್ಲೆನ ತಂಡರ್ದ್ ಮೈತಿದಿ ತುಳು ಹಾಸ್ಯಮಯ ನಾಟಕ ನಡಪೆರೆ ಉಂಡು.

ಈ ಪೊರ್ತುಡು ಶಾಸಕೆರ್ ಹರೀಶ್ ಪೂಂಜ, ಬಿಜೆಪಿ ಬೋಲ್ತೆರ್‌ ಮಂಡಲದ ಗುರ್ಕಾರ್ಲು ಜಯಂತ್ ಕೋಟ್ಯಾನ್, ಪ್ರಧಾನ ಕಾರ್ಯದರ್ಶಿ ಶ್ರೀನಿವಾಸ್ ರಾವ್, ಗಣೇಶ್ ಗೌಡ, ಯುವ ಮೋರ್ಚಾ ಗುರ್ಕಾರ್ಲು ಯಶವಂತ್ ಗೌಡ ಬೆಳಾಲು, ಪ್ರಧಾನ ಕಾರ್ಯದರ್ಶಿ ಉಮೇಶ್ ಕುಲಾಲ್, ವಿನೀತ್ ಕೋಟ್ಯಾನ್ ಇತ್ತೆರ್.