ಬೊಲ್ತೆರ್ ಸುದ್ದಿ | Belthangady News

ಡಾ| ಡಿ. ವೀರೇಂದ್ರ ಹೆಗ್ಗಡೆರೆಗ್‌ ‘ಕರ್ನಾಟಕ ಪರಿವರ್ತನೆದ ರೂವಾರಿ’ ಪ್ರಶಸ್ತಿ ಪ್ರದಾನ

ಧರ್ಮಸ್ಥಳ: ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಸಮಾಜಸೇವಾ ಕ್ಷೇತ್ರಡ್ ಮಲ್ತಿನ ಅನುಪಮ ಸೇವೆನ್ ಮನ್ನಿಸಾದ್ ನ.7 ದಾನಿ ಬೆಂಗ್ಲೂರುಡ್ ರಾಜ್ಯಪಾಲೆರಾಯಿನ ಥಾವರ್‌ಚಂದ್ ಗೆಹ್ಲೋಟ್ ಮೇರೆರ್ದ್ ‘ಕರ್ನಾಟಕ ಪರಿವರ್ತನೆದ ರೂವಾರಿ’ ಪ್ರಶಸ್ತಿ ಪ್ರದಾನ ಮಲ್ತೆರ್.

ಕೇಂದ್ರ ಸರ್ಕಾರರ್ದ್‌ ಪುದರ್‌ ಪಡೆನ ‘Interactive Forum on Indian Economy” ಸಂಸ್ಥೆದ ವತಿರ್ದ್ ಪ್ರಶಸ್ತಿ ಪ್ರದಾನ ಮಲ್ತೆರ್.‌

ಉತ್ತರ ಕನ್ನಡಡ್ ನಡಪುನ ಗಂಗಾಷ್ಟಮಿ ಉಚ್ಚಯಗ್ ಬಳಂಜ ಬ್ರಹ್ಮಶ್ರೀ ಕುಣಿತ ಭಜನಾ ಮಂಡಳಿಗ್‌ ಲೆಪ್ಪು

ಬೋಲ್ತೆರ್: ರಾಷ್ಟ್ರ ಮಟ್ಟದ ಕುಣಿತ ಭಜನಾ ಸ್ಪರ್ಧೆಡ್‌ ಪಾಲ್‌ ಪಡೆದಿನ, ದ.ಕ.ಜಿಲ್ಲೆದ ಪುದರ್‌ ಪಡೆನ ಬಳಂಜದ ಬ್ರಹ್ಮಶ್ರೀ ಕುಣಿತ ಭಜನಾ ಮಂಡಳಿನ್ ಉತ್ತರ ಕನ್ನಡ ಜಿಲ್ಲೆದ ಸಿದ್ದಾಪುರಡ್‌ ಇಪ್ಪುನ ಶ್ರೀ ಗಂಗಾಂಬಿಕ ದೇವಸ್ಥಾನಡ್ ನ. 6 ದಾನಿ ನಡಪುನ 20 ನೇ ವರ್ಷದ ಗಂಗಾಷ್ಟಮಿ ಉತ್ಸವದ ಶೋಭಾಯಾತ್ರೆ ಕಾರ್ಯಕ್ರಮಡ್ ಕುಣಿತ ಭಜನೆನ್‌ ಕೊರಿಯೆರೆ ಅಲ್ಪದ ಆಡಳಿತ ಮಂಡಳಿದಕುಲ್‌ ಲೆಪ್ಪು ಕೊರ್ತೆರ್.

ಬ್ರಹ್ಮಶ್ರೀ ಕುಣಿತ ಭಜನಾ ಮಂಡಳಿದ ಸಂಚಾಲಕೆರ್ ಹರೀಶ್ ವೈ ಚಂದ್ರಮ ಮೇರ್, ಎಂಕ್ಲೆನ ಮಂಡಳಿದ ಎಲ್ಲಾ ಸದಸ್ಯೆರೆನ ಎಡ್ಡೆ ರೀತಿದ ಪಾಲ್‌ಡ್‌ ಮಾತಾ ಕಡೆಟ್‌ ನಡಪುನ ಧಾರ್ಮಿಕ ಕಾರ್ಯಕ್ರಮಲೆಡ್‌ ಲೆತೊಂದು ಇಪ್ಪುವೆರ್.‌ ಇತ್ತೆ ದೂರದ ಉತ್ತರ ಕನ್ನಡ ಜಿಲ್ಲೆದಕುಲ್‌ ನಮ್ಮ ಮಂಡಳಿನ್ ಗುರುತಿಸಾದ್‌ ಅಲ್ಪದ ಪುದರ್‌ ಪಡೆನ ದೇವಸ್ಥಾನಡ್‌ ನಡಪುನ ಉಚ್ಚಯಗ್‌ ಲೆತ್ತಿನ ಭಾರಿ ಖುಷಿ ಆತ್‌ಂಡ್‌ ಪನ್ತೆರ್.

ಶ್ರೀ ಕ್ಷೇತ್ರ ಧ.ಗ್ರಾ. ಯೋಜನೆದ ವತಿರ್ದ್ 404 ಶಾಲೆಗ್‌ ಡೆಸ್ಕ್‌, ಬೆಂಚಿ ಪಟ್ಟುನ ಲೇಸ್

ಧರ್ಮಸ್ಥಳ :ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ವತಿರ್ದ್ ಹಾಸನ, ಮಂಡ್ಯ, ಮೈಸೂರು, ರಾಮನಗರ ಬೊಕ್ಕ ಚಾಮರಾಜನಗರ ಜಿಲ್ಲೆದ 404 ಶಾಲೆಗ್ ಒಟ್ಟು ರೂ. 2.50 ಕೋಟಿ ಬಿಲೆತ್ತ 3472 ಜೊತೆ ಡೆಸ್ಕ್-ಬೆಂಚಿಲೆನ್ ಪಟ್ಟುನ ಲೇಸ್ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರೆಗ್ ಅಭಿನಂದನೆ ಮಲ್ಪುನ ಕಾರ್ಯಕ್ರಮ ನ.4 ದಾನಿ ಶ್ರೀ ಕ್ಷೇತ್ರ ಧರ್ಮಸ್ಥಳ ಪ್ರವಚನ ಮಂಟಪಡ್‌ ನಡತ್‌ಂಡ್.

ಡೆಸ್ಕ್ ಬೆಂಚಿ ಪಟ್ಟುನ ಕಾರ್ಯಕ್ರಮಕ್ಕ್ ಡಾ| ಡಿ. ವೀರೇಂದ್ರ ಹೆಗ್ಗಡೆ ಬೊಕ್ಕ ಡಾ| ಹೇಮಾವತಿ ವೀ. ಹೆಗ್ಗಡೆರ್ ಚಾಲನೆ ಕೊರಿಯೆರ್.‌ ಈ ಪೊರ್ತುಡು ಕಾರ್ಯನಿರ್ವಾಹಕ ನಿರ್ದೇಶಕೆರ್ ಡಾ| ಎಲ್.ಹೆಚ್. ಮಂಜುನಾಥ್, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅನಿಲ್ ಕುಮಾರ್ ಎಸ್.ಎಸ್., ಪ್ರಾದೇಶಿಕ ಹಣಕಾಸು ನಿರ್ದೇಶಕೆರ್ ಶಾಂತರಾಮ್ ಆರ್.ಪೈ., ಸಮುದಾಯ ಅಭಿವೃದ್ಧಿ ವಿಭಾಗದ ಪ್ರಾದೇಶಿಕ ನಿರ್ದೇಶಕೆರ್ ಆನಂದ ಸುವರ್ಣ, ಉಜಿರೆ ಲಕ್ಷ್ಮೀ ಇಂಡಸ್ಟ್ರೀಸ್ ಧಣಿ ಮೋಹನ್ ಕುಮಾರ್, ಚಿನ್ಮಯಿ ಇಂಡಸ್ಟ್ರೀಸ್ ಧನಿ ಸುಂದರ ಗೌಡ ಇಚ್ಚಿಲ, ಸಮುದಾಯ ಅಭಿವೃದ್ಧಿ ವಿಭಾಗದ ತಾಂತ್ರಿಕ ಯೋಜನಾಧಿಕಾರಿ ಪುಷ್ಪರಾಜ್, ಸಮುದಾಯ ಅಭಿವೃದ್ಧಿ ವಿಭಾಗದ ಯೋಜನಾಧಿಕಾರಿ ಬೊಕ್ಕ ಸಮುದಾಯ ಅಭಿವೃದ್ಧಿ ವಿಭಾಗದ ಪ್ರಬಂಧಕೆರ್ ಬೊಕ್ಕ ಮೇಲ್ವಿಚಾರಕೆರ್ ಶೇಖರ್ ವೈ, ಎಸ್‌ಡಿಎಂ ನ್ಯಾಚುರೋಪತಿ ಕಾಲೇಜ್‌ದ ಪ್ರಾಂಶುಪಾಲೆರ್ ಡಾ. ಪ್ರಶಾಂತ್ ಶೆಟ್ಟಿ ಇತ್ತೆರ್. ಯೋಜನಾಧಿಕಾರಿ ಜಯಾನಂದ ಬತ್ತಿ ಬಿನ್ನೆರೆನ್‌ ಎದ್ಕೊಂದು, ಲೇಸ್‌ದ ಸುದಾರಿಕೆ ಮಲ್ತೆರ್.‌

ಶ್ರೀ ಗುರುದೇವ ವಿವಿಧೋದ್ದೇಶ ಸಹಕಾರ ಸಂಘಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪ್ರದಾನ‌

 ಬೆಳ್ತಂಗಡಿ: ಸಹಕಾರ ಕ್ಷೇತ್ರಡ್ ಸಾಧನೆ ಬೊಕ್ಕ ಸಮಾಜಮುಖಿ ಚಟುವಟಿಕೆನ್ ಗುರುತಿಸಾದ್ ಶ್ರೀ ಗುರುದೇವ ವಿವಿಧೋದೇಶ ಸಹಕಾರ ಸಂಘಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿನ್ ದ.ಕ ಜಿಲ್ಲಾ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮಡ್‌ ಸಂಘದ ಅಧ್ಯಕ್ಷೆರ್ನ ಪರವಾದ್ ಉಪಾಧ್ಯಕ್ಷೆರ್ ಭಗೀರಥ ಜಿ ಮೇರೆಗ್ ಜಿಲ್ಲಾ ಉಸ್ತುವಾರಿ ಸಚಿವೆರ್, ಆರೋಗ್ಯ ಸಚಿವೆರ್‌ ಆಯಿನ ದಿನೇಶ್ ಗುಂಡೂರಾವ್ ಪ್ರದಾನ ಮಲ್ತೆರ್.‌

ಈ ಪೊರ್ತುಡು ವಿಧಾನಪರಿಷತ್ ಸದಸ್ಯೆರ್ ಕೆ. ಹರೀಶ್ ಕುಮಾರ್, ಶಾಸಕೆರ್ ವೇದವ್ಯಾಸ್ ಕಾಮತ್, ಮೇಯರ್ ಸುಧೀರ್ ಶೆಟ್ಟಿ, ಜಿಲ್ಲಾಧಿಕಾರಿ ಮುಲೈ ಮುಹಿಲನ್, ಸಂಘದ ನಿರ್ದೇಶಕೆರ್ ಸಂಜೀವ ಪೂಜಾರಿ, ಜಗದೀಶ್ಚಂದ್ರ ಡಿ.ಕೆ, ಧರಣೇಂದ್ರ ಕುಮಾರ್, ವಿಶೇಷಾಧಿಕಾರಿ ಮೋನಪ್ಪ ಪೂಜಾರಿ, ಮುಖ್ಯಕಾರ್ಯನಿರ್ವಹಣಾಧಿಕಾರಿ ಅಶ್ವತ್ಥ್ ಕುಮಾರ್, ಶಾಖಾ ವ್ಯವಸ್ಥಾಪಕೆರ್‌ ಬೊಕ್ಕ ಸಿಬ್ಬಂದಿ ವರ್ಗದಕುಲು ಇತ್ತೆರ್.

ಮಾಮುನು ಕೆರಿಯೆರೆ ಬತ್ತಿನ ಮರ್ಮಯೆ!

ಮಿತ್ತಬಾಗಿಲು: ಮಾಮುಗು ಸ್ಕೂಟರ್‌ ಡ್ ಡಿಕ್ಕಿ ಹಾಕಾದ್‌ ಮರ್ಮಯೆ ಕೆರಿಯೆರೆ ಪ್ರಯತ್ನ ಮಲ್ತ್‌ದೆ ಪನ್ಪುನ ಘಟನೆ ಮಿತ್ತಬಾಗಿಲು ಗ್ರಾಮದ ಕಂಬಳದಡ್ಡದಲ್ಪ ನಡತ್‌ಂಡ್. ಕಂಬಳದಡ್ಡ ನಿವಾಸಿ ಕೆ.ಎಚ್.ಇಬ್ರಾಹಿಂ (60ವ) ಗಾಯ ಆಯಿನಾರ್.‌ ಇಬ್ರಾಹಿಂ ಅರೆನ ಮಗಲ್ ಬೊಕ್ಕ ಮರ್ಮಯನ ನಡುಟು ಕೌಟುಂಬಿಕ ಸಮಸ್ಯೆ ಇತ್ತ್‌ಂಡ್.

ಮರ್ಮಯೆ ಖರ್ಚಿಗ್‌ ಕಾಸ್‌ಲ ಕೊರೊಂದು ಇಜ್ಜಾಂಡ್‌ ಪಂದ್‌ ಆರೋಪ ಬೈದ್‌ಂಡ್. ಈ ಬಗೆಟ್ಟ್ ಅಕ್ಲೆನ ನಡುಟು ಪರಸ್ಪರ ಸರಿ ಮಲ್ಪರೆ ಅಮ್ಮೆರ್‌ ಪ್ರಯತ್ನ ಮಲ್ತೊಂದು ಇತ್ತೆರ್. ಈ ದ್ವೇಷಡ್ ಇಬ್ರಾಹಿಂ ನಡತೊಂದು ಪೋನಗ ಮರ್ಮಯೆ ಮಹಮ್ಮದ್‌ ಶಾಫಿ ಗಾಡಿಡ್‌ ಡಿಕ್ಕಿ ಮಲ್ತ್‌ದ್‌ ಕೆರಿಯೆರೆ ಪ್ರಯತ್ನ ಮಲ್ತ್‌ದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್.‌ ಘಟನೆರ್ದ್ ಇಬ್ರಾಹಿಂ ಗಂಭೀರ ಗಾಯ ಆದ್‌ ಅರೆನ್‌ ವೆನ್ಲಾಕ್ ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ದೆರ್. ಈ ಬಗ್ಗೆ ಅರೆನ ಮಗೆ ಮುಹಮ್ಮದ್ ರಫೀಕ್ ಬೋಲ್ತೆರ್ ಪೊಲೀಸೆರೆಗ್‌ ದೂರು ಕೊರ್ದು, ಆರೋಪಿ ವಿರುದ್ಧ ಕೇಸ್‌ ದಾಖಲಾತ್‌ಂಡ್.

ಶಿಶಿಲದ ಶಿಶಿಲೇಶ್ವರ ದೇವಸ್ಥಾನಗ್ ಎ ಗ್ರೇಡ್

ಶಿಶಿಲ: ಮತ್ಸ್ಯ ತೀರ್ಥ ದೇವಾಲಯ ಪಂದ್ ಪ್ರಸಿದ್ದಿ ಪಡೆನ ಶಿಶಿಲದ ಶಿಶಿಲೇಶ್ವರ ದೇವಸ್ಥಾನನ್ ಎ ದರ್ಜೆಗ್ ಸೇರ್ಪಾದೆರ್. ಈ ಬಗ್ಗೆ ಹಿ.ಧಾ.ಸಂ ಬೊಕ್ಕ ಧಾರ್ಮಿಕ ದತ್ತಿ ಇಲಾಖೆದಕುಲು ಅಧಿಸೂಚನೆ ಕೊರ್ತೆರ್.

ಉಜಿರೆ: ಪೊಂಜೊವ್‌ನ ಪುನ ಗುವೆಲ್‌ಡ್‌ ಸಂಸಯ ರೀತಿಡ್ ಪತ್ತೆ..!‌

ಉಜಿರೆ: ಪೊಂಜೊವ್‌ ಒರ್ತಿನ ಪುನ ಗುವೆಲ್‌ಡ್ ಪತ್ತೆಯಾದ್‌ ಕೆರ್ದ್‌ ಗುವೆಲ್‌ಗ್‌ ಪಾಡ್ದ್ ಇಪ್ಪೊಡು ಪಂದ್‌ ಆರೋಪ ಕೇಂಡ್ ದ್ ಬರೊಂದು ಉಂಡು. ಬೆಳಾಲು ಬೊಕ್ಕ ಉಜಿರೆ ಗ್ರಾಮದ ಗಡಿ ಪ್ರದೇಶ ಮಾಚಾರು ಕೈತಲ್ ಕೆಂಪನೊಟ್ಟುಡ್‌ ಪೊಂಜೊವ್‌ ಒರ್ತಿನ ಪುನ ಗುವೆಲ್‌ಡ್‌ ಸಂಸಯದ ರೀತಿಡ್ ಪತ್ತೆಯಾತ್‌ಂಡ್.‌

ಮಾಚಾರು ನಿವಾಸಿ ಶಶಿಕಲಾ ಅರೆನ ಪುನ ಗುವೆಲ್‌ಡ್‌ ಇತ್ತ್‌ದ್‌, ಉಂದು ಆಕಸ್ಮಿಕ ಘಟನೆನ, ಕೆರ್ನ ಪಂದ್ ಧರ್ಮಸ್ಥಳ ಠಾಣಾ ಪೊಲೀಸೆರ್‌ ಬೊಕ್ಕ ಪೊಲೀಸ್ ಇಲಾಖೆದ ಉನ್ನತಾಧಿಕಾರಿಲು ಜಾಗೆಗ್‌ ಬತ್ತ್‌ದ್‌ ತನಿಖೆ ಮಲ್ತೊಂದು ಉಲ್ಲೆರ್.

ಕಲ್ಮಂಜದ ದೇವರಗುಡ್ಡೆ ಹಾಲು ಉತ್ಪಾದಕರ ಸಹಕಾರ ಸಂಘ ನಿ. ಕಾರ್ಯಾರಂಭ

ಕಲ್ಮಂಜ: ದೇವರಗುಡ್ಡೆ ಹಾಲು ಉತ್ಪಾದಕರ ಸಹಕಾರ ಸಂಘ ನಿಯಮಿತ ನೆತ್ತ ಕಾರ್ಯಾರಂಭ ನ.1 ಬುಧವಾರ ನಡತ್ಂಡ್. ‌

ಈ ಮುಖೇನ ದೇವರಗುಡ್ಡೆ ಭಾಗದ ಜನಕ್ಲೆನ ಬಾರಿ ವರ್ಷದ ಕನ ನಿಜ ಆಂಡ್. ಸಂಘದ ಅಧ್ಯಕ್ಷೆರ್ ರಮೇಶ್ ಗೌಡ ಗುಲ್ಲೋಡಿ ಪೇರ್ ಶೇಖರಣೆ ಮಲ್ಪುನ ಮುಖೆನ ಕಾರ್ಯಾರಂಭ ಮಲ್ತೆರ್.

ಉಪಾಧ್ಯಕ್ಷೆರ್ ಸೂರ್ಯನಾರಾಯಣ ಹೊಳ್ಳ ಬೊಕ್ಕ ದ.ಕ.ಹಾಲು ಒಕ್ಕೂಟದ ಉಪ ವ್ಯವಸ್ಥಾಪಕೆರ್ ಸತೀಶ್ ರಾವ್ ಸದಸ್ಯೆರೆಗ್ ಷೇರು ಪ್ರಮಾಣ ಪತ್ರ ಪಟ್ಟಿಯೆರ್.

ಈ ಪೊರ್ತುಡು ಒಕ್ಕೂಟದ ವಿಸ್ತರಣಾಧಿಕಾರಿ ಯಮುನಾ, ಸಂಘದ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಸಚಿನ್ ಗೌಡ ಕಲ್ಮಂಜ ಬೊಕ್ಕ ನಿರ್ದೇಶಕೆರ್ ಶಿವಪ್ರಸಾದ್, ರಾಧಾಕೃಷ್ಣ ಗೌಡ, ಮಂಜುನಾಥ್ ಗುಡಿಗಾರ್, ಗೀತಾ ನಾಯ್ಕ, ಪುಷ್ಪಾವತಿ, ಶ್ರೀನಿವಾಸ ಗೌಡ, ಗಂಗಾಧರ ಗೌಡ, ದೇಜಪ್ಪ ಪೂಜಾರಿ, ರಾಘವೇಂದ್ರ ವಿಷ್ಣು ನಾಯ್ಕ್ ಬೊಕ್ಕ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ವಿಮಲ, ಗಣ್ಯೆರಾಯಿನ ಪೃಥ್ವಿಶ್ ಧರ್ಮಸ್ಥಳ, ಕೃಷ್ಣಪ್ಪ ಗುಡಿಗಾರ್, ತುಕಾರಾಮ ಸಾಲಿಯಾನ್, ಸುಂದರ ಗೌಡ ಬೊಕ್ಕ ಸಂಘದ ಸದಸ್ಯೆರ್, ಊರುದಕುಲ್ ಇತ್ತೆರ್.

ಕೊಕ್ಕಡ: 67ನೇ ಸಾರ್ವಜನಿಕ ನಗರ ಭಜನಾ ಸಪ್ತಾಹ

ಕೊಕ್ಕಡ: ವಿಶ್ವ ಹಿಂದೂ ಪರಿಷದ್‌ ಕೊಕ್ಕಡ, ಶ್ರೀ ರಾಮ ಸೇವಾ ಟ್ರಸ್ಟ್‌ ಕೊಕ್ಕಡ ನೆತ್ತ ಒಟ್ಟು ಸೇರಿಗೆಡ್‌ 67ನೇ ವರ್ಷದ ಸಾರ್ವಜನಿಕ ನಗರ ಭಜನಾ ಸಪ್ತಾಹ ಕಾರ್ಯಕ್ರಮ ನಡಪೆರೆ ಉಂಡು.

ನ. 18 ದಾನಿ ಬಯ್ಯ 7 ಗಂಟೆಗ್‌ ಸೌತಡ್ಕ ಮಹಾಗಣಪತಿ ದೇವೆರ್ನ ಸನ್ನಿದಿಡ್‌ ರಂಗಪೂಜೆಡ್‌ ಪಾಲ್‌ ಪಡೆದ್‌, ನ.19 ರ್ದ್‌ 23 ಮುಟ್ಟ ಕೊಕ್ಕಡ ಶ್ರೀ ರಾಮ ಭಜನಾ ಮಂದಿರರ್ದ್‌ ಸುರು ಆದ್‌ ನಗರ ಸಂಚಾರ ಆದ್‌ ಮುಕ್ತಾಯ ಆವೆರೆ ಉಂಡು. ನ.23 ದಾನಿ ಬಯ್ಯ 6 ಗಂಟೆಗ್‌ ಸುರು ಆದ್‌ ಮರು ದಿನ ಕಾಂಡೆ 6 ಗಂಟೆಗ್‌ ಮುಕ್ತಾಯ ಆವೆರೆ ಉಂಡು. ಈ ಕಾರ್ಯಕ್ರಮಡ್‌ ಮಾತೆರ್ಲ ಪಾಲ್‌ ಪಡೆದ್‌ ತನು-ಮನ-ಧನದೊಟ್ಟಿಗೆ ಸಹಕಾರ ಮಲ್ಪೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್‌.