ಬೊಲ್ತೆರ್ ಸುದ್ದಿ | Belthangady News

ಮ್ಯೂಚುವಲ್ ಫಂಡ್ ಡ್ ಬಂಡವಾಳ ಪಾಡುನವು ಎಚ್ಚ ಸುರಕ್ಷಿತ ಬೊಕ್ಕ ಲಾಭದಾಯಕ

ಧರ್ಮಸ್ಥಳ: ಮ್ಯೂಚುವಲ್ ಫಂಡ್ ಡ್ ಬಂಡವಾಳ ಪಾಡುನೆರ್ದ್ ಬ್ಯಾಂಕ್ ರ್ದ್ ಎಚ್ಚ ಲಾಭ ತಿಕ್ಕುಂಡು. ಬೊಕ್ಕ ಅವು ಎಚ್ಚ ಸುರಕ್ಷಿತ ಆದ್ ಇಪ್ಪುಂಡು ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್. ಆರ್ ಐತಾರ ಧರ್ಮಸ್ಥಳಡ್ ಬೆಂಗಳೂರುದ ಆರಾ ಆರ್ಥಿಕ ಸೇವಾ ಸಂಸ್ಥೆದ ವಿಡಿಯೋ ಬೊಕ್ಕ ಮಾಹಿತಿ ಪತ್ರ ಅನಾವರಣ ಮಲ್ತ್ ಪಾತೆರಿಯೆರ್.

ಆರಾ ಸೇವಾ ಸಂಸ್ಥೆ ಕರಿನ ರಡ್ಡ್ ವರ್ಷರ್ದ್ ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಕಾರ್ಯಕರ್ತೆರೆಗ್ ಬಂಡವಾಳ ಹೂಡಿಕೆ ಮಲ್ಪುನ ಬಗೆಟ್ ಮಾಹಿತಿ, ಮಾರ್ಗದರ್ಶನ ಕೊರೊಂದು ಸಹಕಾರ ಕೊರೊಂದು ಉಲ್ಲೆರ್. ದೀರ್ಘಾವಧಿ ಹೂಡಿಕೆರ್ದ್ ಎಚ್ಚ ಲಾಭ ಪಡೆಯೊನೊಲಿ ಪಂದ್ ಪಂಡೆರ್. ಸಾರ್ವಜನಿಕರೆಗ್ ಬೋಡಾಯಿನ ಉಪಯುಕ್ತ ಮಾಹಿತಿ ಬೊಕ್ಕ ಸಲಹೆ, ವಿಡಿಯೋ ಬೊಕ್ಕ ಮಾಹಿತಿ ಪತ್ರಡ್ ಉಂಡು. ಧರ್ಮಸ್ಥಳ ಗ್ರಾ.ಯೋ. ಕಾರ್ಯನಿರ್ವಾಹಕ ನಿರ್ದೇಶಕೆರ್ ಡಾ.ಎಲ್.ಎಚ್ ಮಂಜುನಾಥ್, ಆರಾ ಸಂಸ್ಥೆದ ನಿರ್ದೇಶಕೆರ್ ಶ್ರೀಧರ ಭಟ್, ಹಿರಿಯ ಅಧಿಕಾರಿ ಪ್ರತೀಕ್ ಓರಾ ಬೊಕ್ಕ ಉಜಿರೆ ಶಾಖೆದ ಪ್ರಬಂಧಕೆರ್ ಜನಾರ್ದನ ಪಡ್ಡಿಲ್ಲಾಯ ಈ ಪೊರ್ತುಡು ಇತ್ತೆರ್.

ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನದ ಆಡಳಿತಾಧಿಕಾರಿಯಾದ್ ಬೋಲ್ತೆರ್ ತಹಶೀಲ್ದಾರ್ ಪೃಥ್ವಿ ಸಾನಿಕಂ ನೇಮಕ‌

ಬೋಲ್ತೆರ್ : ರಾಜ್ಯದ ಧಾರ್ಮಿಕ ದತ್ತಿ ಇಲಾಖಾ ವ್ಯಾಪ್ತಿಗ್‌ ಸಂಬಂಧಪಟ್ಟಿನ ಪ್ರವರ್ಗ ‘ಎ’ ಗ್ ಸೇರಿನ ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನದ ರಾಜ್ಯ ಧಾರ್ಮಿಕ ಪರಿಷತ್ ನಿರ್ಣಯದ ಅನುಸಾರ ದೇವಸ್ಥಾನದ ಆಡಳಿತಾಧಿಕಾರಿಯಾದ್ ಬೋಲ್ತೆರ್ ತಹಶೀಲ್ದಾರ್ ಪೃಥ್ವಿ ಸಾನಿಕಂ‌ ಮೇರೆನ್ ಧಾರ್ಮಿಕ ದತ್ತಿ ಇಲಾಖೆಯ ಆಯುಕ್ತೆರ್ ಯತಿರಾಜ ನೇಮಿಸಾದೆರ್‌.

ಧರ್ಮಸ್ಥಳಡ್ ಭಗವಾನ್ ಬಾಹುಬಲಿ ಸ್ವಾಮಿಗ್ ಪಾದಾಭಿಷೇಕ

ಧರ್ಮಸ್ಥಳ: ದೇವೆರ್ನ ಪೂಜೆ, ಆರಾಧನೆ, ಅಭಿಷೇಕರ್ದ್ ಪಾಪದ ಕ್ಷಯವಾದ್ ಪುಣ್ಯ ಸಂಚಯ ಆಪುಂಡು ಪಂದ್ ಪೂಜ್ಯ ದಿವ್ಯಸಾಗರ ಮುನಿಮಹಾರಾಜೆರ್ ಪಂಡೆರ್.

ಆರ್ ಶುಕ್ರವಾರ ಧರ್ಮಸ್ಥಳದ ರತ್ನಗಿರಿಟ್ಟ್ ಭಗವಾನ್ ಬಾಹುಬಲಿ ಸ್ವಾಮಿ ಮೂರ್ತಿಗ್ ಪಾದಾಭಿಷೇಕದ ಪೊರ್ತುಡು ಮಂಗಲ ಪ್ರವಚನ ಕೊರಿಯೆರ್.

ಶ್ರದ್ಧಾ-ಭಕ್ತಿರ್ದ್ ದೇವೆರ್ನ ಪೂಜೆ,ಅಭಿಷೇಕ ಮಲ್ಪುನೆರ್ದ್ ಮಾತ ಸಂಕಟ ನಿವಾರಣೆಯಾದ್ ಜೀವನ ಪಾವನ ಆಪುಂಡು. ಆತ್ಮಕಲ್ಯಾಣ ಆಪುಂಡು ಸುಖ-ಶಾಂತಿ ತಿಕ್ಕುಂಡು ಪಂದ್ ಪಂಡೆರ್.

ದಿನಾಲ ವೃತ-ನಿಯಮದ ಪಾಲನೆದೊಟ್ಟಿಗೆ ದೇವೆರ್ನ ಪೂಜೆ, ಜೈನ ಮುನಿಕ್ಲೆಗ್ ಆಹಾರದಾನ ಮಲ್ತ್ಂಡ ಆತ್ಮಕಲ್ಯಾಣ ಆಪುಂಡು ಪಂದ್ ಪೂಜ್ಯ ಆದಿಸಾಗರ ಮುನಿಮಹಾರಾಜೆರ್ ಪಂಡೆರ್.

ಕಾರ್ಲದ ಜೈನಮಠದ ಪೂಜ್ಯ ಲಲಿತಕೀರ್ತಿ ಭಟ್ಟಾರಕ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್.
ಪೂಜ್ಯ ನಿರ್ದೋಷ ಸಾಗರ ಮುನಿಮಹಾರಾಜೆರ್ ಮತ್ತುಕ್ಷುಲ್ಲಕ ನಿರ್ವಾಣಸಾಗರ ಮಹಾರಾಜೆರ್ ಈ ಪೊರ್ತುಡು ಇತ್ತೆರ್.

ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ವೀ. ಹೆಗ್ಗಡೆ, ಡಿ. ಸುರೇಂದ್ರಕುಮಾರ್, ಡಿ. ಹರ್ಷೇಂದ್ರಕುಮಾರ್ ಬೊಕ್ಕ ಸುಪ್ರಿಯಾ ಹರ್ಷೇಂದ್ರಕುಮಾರ್ ಪಾದಾಭಿಷೇಕಡ್ ಪಾಲ್ ಪಡೆದಿತ್ತೆರ್.

ಭವ್ಯಅಗ್ರೋದಕ ಮೆರವಣಿಗೆದ ಬೊಕ್ಕ ರತ್ನಗಿರಿಟ್ಟ್ 216 ಕಲಶರ್ದ್ ಜಲಾಭಿಷೇಕ ಬೊಕ್ಕ ಬೊಂಡದ ನೀರ್, ಗಂಧ, ಚಂದನ, ಅಷ್ಟಗಂಧ ಮಂಗಳದ್ರವ್ಯರ್ದ್ ಪಾದಾಭಿಷೇಕ ನಡತ್ಂಡ್.

ದೇವರೆಪಾದೋ ಸೇರ್ನ ಮಹೇಶ್ ಶೆಟ್ಟಿ ತಿಮರೋಡಿ ಮೆರೆನ ಅಪ್ಪೆ ಅಮ್ಮಣ್ಣಿ ಶೆಟ್ಟಿ

ಉಜಿರೆ: ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆ ಸ್ಥಾಪಕಾಧ್ಯಕ್ಷೆರ್ ಮಹೇಶ್ ಶೆಟ್ಟಿ ತಿಮರೋಡಿ ಮೆರೆನ ಅಪ್ಪೆ ದಿ. ವಿಠಲ್ ಶೆಟ್ಟಿನ ಬುಡೆದಿ ಅಮ್ಮಣ್ಣಿ ಶೆಟ್ಟಿ (85 ಪ್ರಾಯ) ಜ.28 ತಾನಿ ದೇವರಪಾದೋ ಸೇರಿಯೆರ್.

ಮೇರೆಗ್ ಮಗೆ ಮೋಹನ್ ಶೆಟ್ಟಿ, ಮಹೇಶ್ ಶೆಟ್ಟಿ, ಮುಕೇಶ್ ಶೆಟ್ಟಿ, ಮನೋಜ್ ಶೆಟ್ಟಿ, ಮಗಲ್ ವಿಶಾಲಾಕ್ಷ ಶೆಟ್ಟಿ, ಸುಮಂಗಲಾ ಶೆಟ್ಟಿ, ಪ್ರೀತಾ ಶೆಟ್ಟಿ ಉಲ್ಲೆರ್.