ಬೊಲ್ತೆರ್ ಸುದ್ದಿ | Belthangady News

ಕಳಿಯ ಗ್ರಾ.ಪಂ ಮುತಾಲಿಕೆಡ್ ಸರಕಾರದ ಗೃಹಲಕ್ಷ್ಮೀ ಯೋಜನೆಗ್ ಚಾಲನೆ

ಗೇರುಕಟ್ಟೆ: ಕಳಿಯ ಗ್ರಾ.ಪಂ ಮುತಾಲಿಕೆಡ್ ಕರ್ನಾಟಕ ಸರಕಾರದ ಯೋಜನೆಡ್ ಒಂಜಿ ಆಯಿನ ಗೃಹಲಕ್ಷ್ಮೀ ಯೋಜನೆ ಆ.30 ಬುಧವಾರ ದಾನಿ ಉದಿಪನ ಆಂಡ್.

ಮೈಸೂರುದ ಸಂಸದೆರ್ ರಾಹುಲ್ ಗಾಂಧಿ, ಎ.ಐ.ಸಿ.ಸಿ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ, ಎ.ಐ.ಸಿ.ಸಿ ಪ್ರಧಾನ ಕಾರ್ಯದರ್ಶಿ ಸುರ್ಜಿವಾಲಾ ಮೊಕ್ಲೆನ ಮಲ್ಲ ಉಪಸ್ಥಿತಿಟ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್, ಉಪಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್, ಮಹಿಳಾ ಬೊಕ್ಕ ಕಲ್ಯಾಣ ಇಲಾಖೆ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್, ಆಹಾರ ಬೊಕ್ಕ ನಾಗರೀಕ ಪೂರೈಕೆ ಸಚಿವೆರ್ ಕೆ.ಎಚ್ ಮುನಿಯಪ್ಪ ಬೊಕ್ಕ ಬೇತೆ ಬೇತೆ ಸಚಿವೆರ್‌ರ್ನ ಎದುರುಡು ಉದಿಪನ ಆಂಡ್. ಈ ಲೇಸ್ ಡ್ ಕಳಿಯ ಗ್ರಾ.ಪಂ ದ ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.

ಅಂಚನೆ ಕಳಿಯ ಗ್ರಾ.ಪಂ ಡ್ ಯೋಜನೆಗ್ ಅರ್ಜಿ ಪಾಡಿನ ಫಲಾನುಭವಿಲೆಗ್ ಮಂಜೂರಾತಿ ಪತ್ರನ್ ವಿತರಣೆ ಮಲ್ತೆರ್. ಕಳಿಯ ಗ್ರಾ.ಪಂ ದ ಗುರ್ಕಾರೆ ಸಭೆತ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ವಾಟ್ಸಾಪ್ ಡ್ ವೀರೇಂದ್ರ ಹೆಗ್ಡೆರ್ನ ವಿರುದ್ಧ ಬರಹ; ಸೌಜನ್ಯನ ಅಪ್ಪೆನ ಬಗ್ಗೆ ಕಾಮೆಂಟ್; 2 ಜನತ ಮಿತ್ತ್ ಕೇಸ್ ದಾಖಲ್

ಬೊಲ್ತೆರ್ ಬೊಕ್ಕ ಬಂಟ್ವಾಳ್ ಡ್ ಸೌಜನ್ಯ ಕೇಸ್ ದ ವಿಚಾರವಾದ್ ಬೊಲ್ತೆರ್ ಬೊಕ್ಕ ಬಂಟ್ವಾಳ ಗ್ರಾಮಾಂತರ ಠಾಣೆಡ್ ಪ್ರಕರಣ ದಾಖಲಾತ್ಂಡ್.

ಸುರೇಶ್ ರಾಜ್ ಪನ್ಪುನ ವ್ಯಕ್ತಿ ವಾಟ್ಸಾಪ್ ಗ್ರೂಪ್ ಡ್ ವೀರೇಂದ್ರ ಹೆಗ್ಡೆ ಬೊಕ್ಕ ಅರೆನ ಕುಟುಂಬದ ಸದಸ್ಯೆರ್ನ ಬಗ್ಗೆ ಅಕ್ಷೇಪಾರ್ಹ ಬರವಣಿಗೆ ಬರೆತಿನೆಕ್ಕ್ ಆ.29 ದಾನಿ ಬೊಲ್ತೆರ್ ಪೊಲೀಸ್ ಠಾಣೆ ಡ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.

ನನೊಂಜಿ ಪ್ರಕರಣ: ರಾಘವೇಂದ್ರ ಭಟ್ ಪನ್ಪುನಾರ್ ಸಾಮಾಜಿಕ ಜಾಲತಾಣ( ಫೇಸ್ಬುಕ್) ಡ್ ಸೌಜನ್ಯ ನ ಅಪ್ಪೆನ ಮಿತ್ತ್ ಅಕ್ಷೇಪಾರ್ಹ ಬರವಣಿಗೆನ್ ಕಾಮೆಂಟ್ ಮಲ್ತಿನೆಕ್ಕ್ ಆ.28 ದಾನಿ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆ ಡ್ ಕೇಸ್ ದಾಖಲ್ ಮಲ್ತ್ ತನಿಖೆ ಮಲ್ತೊಂದು ಉಲ್ಲೆರ್.

ಶ್ರೀ ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಸಂಘ ನಿಡ್ಲೆ ಶಾಖೆ ಉದಿಪನ

ನಿಡ್ಲೆ: ಶ್ರೀ ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಬೊಲ್ತೇರ್ ನೆತ್ತ ನಿಡ್ಲೆ ಶಾಖೆದ ಉದಿಪನದ ಲೇಸ್ ಆ.30 ಬುಧವಾರ ದಾನಿ ನಿಡ್ಲೆ ಸಮೃದ್ದಿ ವಾಣಿಜ್ಯ ಸಂಕೀರ್ಣಡ್ ನಡತ್‌ಂಡ್.

ಉಜಿರೆ ಜನಾರ್ದನ ದೇವಳ್ಯದ ಆನುವಂಶಿಕ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡ್ವೆಟ್ನಾಯ ಪೊಸ ಶಾಖೆನ್ ಉದಿಪನ ಮಲ್ತ್ ಶುಭ ಕೋರಿಯೆರ್. ಬೊಲ್ತೇರ್ ಶ್ರೀ ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಸಂಘದ ಗುರ್ಕಾರೆ, ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್ ಲೇಸ್‌ದ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ನಿಡ್ಲೆ ಕೃಷಿ ಪತ್ತಿನ ಸಹಕಾರಿ ಸಂಘದ ಗುರ್ಕಾರೆರ್ ರಮೇಶ್ ರಾವ್ ನಿರಖು ಠೇವಣಿ ಪತ್ರ ಬಿಡುಗಡೆ ಮಲ್ತೆರ್. ಗಣಕಯಂತ್ರದ ಉದಿಪನನ್ ಕಾರ್ಯತ್ತಡ್ಕ ಸೈಂಟ್ ಸೆಬೆಸ್ಟಿಯನ್ ಚರ್ಚ್ ದ ಧರ್ಮಗುರು ವಂ|ಫಾ.ಜೋಸೆಫ್ ವಾಲುಕಾರನ್ ನಡಪಾದ್ ಕೊರಿಯೆರ್. ಚಾವಡಿಡ್ ಕಾಯರ್ತಡ್ಕ ಎ.ಜೆ.ಎಂ ಧರ್ಮಗುರು ಮಹಮ್ಮದ್ ಹನೀಫ್ ಮದನಿ, ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಸಂಘದ ಉಪಾಧ್ಯಕ್ಷ ಗಂಗಾಧರ ಮಿತ್ತಮಾರು, ಕ.ರಾ.ಸೌ.ಸಂ.ಸ.ನಿ ಜಿಲ್ಲಾ ಸಂಯೋಜಕ ವಿಜಯ್ ಬಿ.ಎಸ್, ನಿಡ್ಲೆ ಗ್ರಾ.ಪಂ ದ ಗುರ್ಕಾರ್ದಿ ಶ್ಯಾಮಲ, ನಿಡ್ಲೆ ಗ್ರಾ.ಪಂ ಮಾಜಿ ಗುರ್ಕಾರೆ ಪ್ರವೀಣ್ ಹೆಬ್ಬಾರ್, ನಿಡ್ಲೆ ಗ್ರಾ.ಪಂ ಮಾಜಿ ಸದಸ್ಯೆರ್ ಕೆ. ಭದ್ರಯ್ಯ ಗೌಡ ಈ ಪೊರ್ತುಡು ಇತ್ತೆರ್.

ಲೇಸ್‌ಡ್ ಶ್ರೀ ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಸಂಘದ ಆಡಳಿತ ಮಂಡಳಿದ ನಿರ್ದೇಶಕೆರಾಯಿನ ಉಮೇಶ್ ಎ.ಬಿ, ಬಿ.ಎಂ ಅಬ್ದುಲ್ ಹಮೀದ್, ಬಿ.ರಾಜಶೇಖರ ಅಜ್ರಿ, ಕೆ.ಎಸ್. ಯೋಗೀಶ್ ಕುಮಾರ್, ಶೈಲೇಶ್ ಕುಮಾರ್, ವಿ.ರಮೇಶ್ ಪೂಜಾರಿ, ಮೋಹನ್ ಶೆಟ್ಟಿಗಾರ್, ರಾಮಚಂದ್ರ ಭಟ್ ಅರೆಕ್ಕಲ್, ಶ್ರೀಮತಿ ಉಷಾ ಶರತ್, ಶ್ರೀಮತಿ ಜೆಸಿಂತಾ ಮೋನಿಸ್, ರಾಗ್ನೀಶ್, ಅಭಿನಂದನ್ ಹರೀಶ್ ಕುಮಾರ್, ಬ್ಯಾಂಕ್‌ದ ಉಪಾಧ್ಯಕ್ಷೆರ್ ಗಂಗಾಧರ ಮಿತ್ತಮಾರು, ಮುಖ್ಯಕಾರ್ಯನಿರ್ವಾಹಣಾಧಿಕಾರಿ ಪ್ರದೀಪ್ ಕುಮಾರ್ ಪಾಲ್ ಪಡೆದಿತ್ತೆರ್.

ಶ್ರೀ ಪ್ರಿಯದರ್ಶಿನಿ ಸೌಹಾರ್ದ ಸಹಕಾರಿ ಸಂಘದ ನಿರ್ದೇಶಕೆರ್ ಕೆ ರಾಮಚಂದ್ರ ಗೌಡ ಲೇಸ್ ಎದ್ಕೊಂಡೆರ್. ರಶ್ಮಿತಾ, ಚೈತ್ರ, ಪವಿತ್ರಾ ಪ್ರಾರ್ಥನೆ ಮಲ್ತೆರ್. ಯುವ ಸಾಹಿತಿ ಚಂದ್ರಹಾಸ ಬಳಂಜ ಲೇಸ್ ದ ಸುದಾರಿಕೆ ಮಲ್ತೆರ್.

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್ ಕೊರ್ಪುನ ಮುಖೇನ ಶೈಕ್ಷಣಿಕ ಸಾಧನೆನ್ ಗುರುವಾಯನಕೆರೆ ಎಕ್ಸೆಲ್ ಕಾಲೇಜ್ ಮಲ್ಪೆರೆ ಪಿದರ್‌ದುಂಡು. ಈ ಕಾಲೇಜ್ ನ್ ಸ್ಥಾಪನೆ ಮಲ್ತಿನಾರ್ ನೀಟ್ ಟ್ರೈನರ್ ಬೊಕ್ಕ ರಾಸಾಯನ ವಿಜ್ಞಾನದ ಪ್ರಾದ್ಯಾಪಕೆರ್, ಸುಮಂತ್ ಕುಮಾರ್ ಜೈನ್.

ಲ್ಯಾಂಗ್ ಟರ್ಮ್ ನೀಟ್ : ಡಾಕ್ಟರ್ ಅವೊಡು ಪಂದ್ ಎನೊಂದು ಇಪ್ಪುನ ಕಲ್ಪಾರ್ಥಿಲೆಗ್ ಪಿಯುಸಿ ಡ್ ವೈದ್ಯಕೀಯ ಕೋರ್ಸ್ ದ ಪ್ರವೇಶಗಾದ್ ನೀಟ್ ಪರೀಕ್ಷೆನ್ ಬರೆದ್, ಎನ್ನಿನಾತ್ ಮಾರ್ಕ್ ಬರಂದೆ ಇಪ್ಪುನಗ ವೈದ್ಯಕೀಯ ಕೋರ್ಸ್ ದ ಪ್ರವೇಶಗ್ ಸಂಪೂರ್ಣ ತಯಾರ್ ಆವರೆ, ಒಂಜಿ ವರ್ಷ ಬುಡಂದೆ ತರಬೇತಿನ್ ಪಡೆಯುನೆಕ್ ನೀಟ್ ಲಾಂಗ್ ಟರ್ಮ್ ಪಂದ್ ಪನ್ಪೆರ್.

ನೀಟ್ ಪರೀಕ್ಷೆಡ್ ರ‍್ಯಾಂಕ್ ದೆಪ್ಪೆರೆ ಏತೋ ಸಲ ಪ್ರತಿಭಾವಂತೆರೆಗ್ ಆಪುಜಿ. ಸರಿಯಾದ್ ಕೋಚಿಂಗ್ ತಿಕ್ಕಂದೆ, ಯೋಗ್ಯ ಸ್ಟಡಿ ಮೆಟಿರಿಯಲ್ ತಿಕ್ಕಂದೆ ಇಪ್ಪುನಗ, ಸರಿಯಾಯಿನ ಮಾರ್ಗದರ್ಶನ ಅಂಚನೆ ಕೆಲವಾತ್ ಕಾರಣದಾತ್ರ ಮಾರ್ಕ್ ಕಮ್ಮಿ ದೆಪ್ಪುವೆರ್. ಉಂದೆನ್ ಮಾತಾ ತೆರಿಯೊಂದು ಐಕ್ ಸಲಾದ್ ಎಕ್ಸೆಲ್ ಲಾಂಗ್ ಟರ್ಮ್ ಕೋಚಿಂಗ್ ಸೆಂಟರ್ ನ್ ಸ್ಥಾಪನೆ ಮಲ್ತೆರ್. ಮನೋ ವಿಜ್ಞಾನ ಅರ್ಥ ಮಲ್ತೊಂದು, ಅಕ್ಲೆಗ್ ಜಾಸ್ತಿ ಮಾರ್ಕ್ ದೆಪ್ಪೆರೆ ಬೋಡಾಪಿನ ಮಾತಾ ವಿಧಾನನ್ ಎಕ್ಸೆಲ್ ಡ್ ಪಂದ್ ಕೊರ್ಪೆರ್.

ಪ್ರತಿಭಾವಂತ ಕಲ್ಪಾರ್ಥಿ ಲೆಗ್ ಎಕ್ಸೆಲ್ ಡ್ ರಿಯಾಯಿತಿ:

ಈ ಸರ್ತಿ ನೀಟ್ ಪರೀಕ್ಷೆಡ್ 450 ರ್ದ್ ಎಚ್ಚ ಮಾರ್ಕ್ ದೆತ್ತಿನ ಕಲ್ಪಾರ್ಥಿಲೆಗ್ ಧಮಾರ್ಥ ಕೋಚಿಂಗ್ ಕೊರ್ಪೆರ್. 400 ರ್ದ್ ಎಚ್ಚ ಮಾರ್ಕ್ ದೆತ್ತಿನಕ್ಲೆಗ್ ಕಾಲೇಜ್ ದ ಪೀಸ್ ಡ್ ಶೇಕಡಾ 50% ರಿಯಾಯಿತಿ ಕೊರ್ಪ ಪಂದ್ ಕಾಲೇಜ್ ಪ್ರಕಟಣೆ ತೆರಿಪಾದೆರ್.

ನಿಡ್ಲೆಡ್ ಅಗ್ರಿಲೀಫ್ ಎಕ್ಸ್ ಪೋರ್ಟ್ಸ್ ಪೈ.ಲಿ ಉದಿಪನದ ಲೇಸ್

ನಿಡ್ಲೆ: ಭಾರತದ ನಂ 1 ಪಾಲೆದ ತಟ್ಟೆ ರಫ್ತು ಸಂಸ್ಥೆಯಾಯಿನ ಅಗ್ರಿಲೀಫ್ ಎಕ್ಸ್ ಪೋರ್ಟ್ಸ್ ಪ್ರೈವೆಟ್ ಲಿಮಿಟೆಡ್ ನೆತ್ತ ಪೊಸ ಕಾರ್ಖಾನೆದ ಉದಿಪನ ಆ.28 ಅಂಗಾರೆ ದಾನಿ ನಿಡ್ಲೆದ ಬರಂಗಾಯದ ಅಗ್ರಿಲೀಫ್ ಸಂಸ್ಥೆಡ್ ನಡತ್‌ಂಡ್.

ಸಣ್ಣ ಕೈಗಾರಿಕೆ ಬೊಕ್ಕ ಸಾರ್ವಜನಿಕ ಉದ್ದಿಮೆ ಸಚಿವೆರ್ ಶರಣಬಸಪ್ಪ ದರ್ಶನಾಪುರ ಲೇಸ್‌ದ ಉದಿಪನ ಮಲ್ತೆರ್. ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜೆರ್ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಡಿ. ಹಷೇಂದ್ರ ಕುಮಾರ್ ಪಾಲ್ ಪಡೆದ್ ಇತ್ತೆರ್. ಗೌರವ ಬಿನ್ನೆರಾದ್ ಮಾಜಿ ಶಾಸಕೆರ್, ವಿಧಾನ ಪರಿಷತ್ ಬೊಕ್ಕ ಎಸ್.ಯು.ಸಿ.ಒ ಬ್ಯಾಂಕ್ ಲಿ, ಗುರ್ಕಾರೆ ಮನೋಹರ್ ಮಸ್ಕಿ, ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಯು.ಎಸ್.ಎ ರ್ದ್ ಬತ್ತಿನ ಗ್ರಾಹಕೆರ್ ಮೈಕಲ್, ಉಜಿರೆ ಜನಾರ್ಧನ ದೇವಳ್ಯದ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡ್ವೆಟ್ನಾಯ, ಶಶಿ ಕ್ಯಾಟರಿಂಗ್ ಸರ್ವೀಸ್‌ದ ನಿರ್ದೇಶಕೆರ್, ಸ್ಥಾಪಕೆರ್ ಬೊಕ್ಕ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಶಶಿಧರ ಶೆಟ್ಟಿ, ಎಸ್.ಬಿ.ಐ ಡೆಪ್ಯೂಟಿ ಮ್ಯಾನೇಜರ್ ಜೋಬಿ ಜೋಸ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಅಗ್ರಿಲೀಫ್ ಎಕ್ಸ್ಪೋರ್ಟ್ಸ್ ಪ್ರೈವೆಟ್ ಲಿಮಿಟೆಡ್ ನೆತ್ತ ಸಂಸ್ಥಾಪಕೆರ್ ಅವಿನಾಶ್ ರಾವ್, ಸಹ ಸಂಸ್ಥಾಪಕೆರ್ ಅತಿಶಯ ಜೈನ್, ಅಗ್ರಿಲೀಫ್ ನಿರ್ದೇಶೆಕೆರ್ ರಾಗ್ನಿಶ್ ಈ ಪೊರ್ತುಡು ಇತ್ತೆರ್.

ಸೆ.7 : ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿದ ಮುತಾಲಿಕೆಡ್ ಮೊಸರು ಕುಡಿಕೆ ಉಚ್ಚಯ

ಮಡಂತ್ಯಾರು: ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿ ಸಮಿತಿದ ಮುತಾಲಿಕೆಡ್ 34 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಸೆ.7 ಗುರುವಾರ ಮಡಂತ್ಯಾರು ಗಣಪತಿ ಮಂಟಪದ ಚಾವಡಿಡ್ ನಡಪೆರೆ ಉಂಡು.

ಲೇಸ್‌ದ ಉದಿಪನನ್ ಮಡಂತ್ಯಾರು ವರ್ತಕರ ಸಂಘದ ಗುರ್ಕಾರೆರ್ ಬಿ.ಜಯಂತ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮಡಂತ್ಯಾರು ಗ್ರಾ.ಪಂದ ಗುರ್ಕಾರ್ದಿ ರೂಪ ಎ.ಸ್, ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಕೆದ ನಿವೃತ್ತ ವಿಸ್ತಾರಣಾಧಿಕಾರಿ ಸುರೇಂದ್ರ ಎಸ್, ಪಾಲ್‌ಪಡೆಯೆರೆ ಉಲ್ಲೆರ್.

ಸಮಾರೋಪ ಸಮಾರಂಭದ ಗುರ್ಕಾಮೆನ್ ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜೆರ್ ವಹಿಸಾಯೆರೆ ಉಲ್ಲೆರ್. ಕುದ್ರೋಳಿ ನಾರಾಯಣ ಗುರು ಕಾಲೇಜುದ ಉಪನ್ಯಾಸಕೆರ್ ಕೇಶವ ಬಂಗೇರ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಪಾರೆಂಕಿದ ಪ್ರಧಾನ ಅರ್ಚಕೆರ್ ಟಿ.ವಿ ಶ್ರೀಧರ ರಾವ್, ಬೆಸ್ಟ್ ಪೌಂಡೇಶನ್‌ದ ಗುರ್ಕಾರೆ ರಕ್ಷಿತ್ ಶಿವರಾಂ, ಬಂಟ್ವಾಳ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಪ್ರಶಾಂತ್ ಎಂ ಪುಂಜಾಲಕಟ್ಟೆ, ತಣ್ಣೀರುಪಂತ ರುದ್ರಗಿರಿ ಶ್ರೀ ಮೃತ್ಯುಂಜಯ ದೇವಸ್ಥಾನದ ಗುರ್ಕಾರೆ ಭರತ್ ಕುಮಾರ್ ಕೇರಿ ಈ ಲೇಸ್‌ಡ್ ಪಾಲ್ ಪಡಯೆರೆ ಉಲ್ಲೆರ್.

ನಿವೃತ್ತ ಯೋಧೆರ್ ಮಂಜುನಾಥ ಗೌಡ, ಬೊಲ್ತೇರ್ ಉಪತಹಶೀಲ್ದಾರ್ ಜಯ ಪ್ರವೀಣ್, ನಾಟಿ ವೈದ್ಯರ್ ರಾಧಾಕೃಷ್ಣ, ಉಜಿರೆ ಉರಗ ಪ್ರೇಮಿ ಸ್ನೇಕ್ ಜೋಯಿ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.

ರಾತ್ರೆ 8.30 ಗಂಟೆರ್ದ್ ಜಿ.ವಿ ರಾರ‍್ಸ್ ಡ್ಯಾನ್ಸ್ ಅಕಾಡೆಮಿ ಮೊಕ್ಲೆನ ಲೆಕ್ಕಡ್ ನೃತ್ಯ-ಗಾನ-ವೈವಿದ್ಯ ಲೇಸ್ ನಡಪೆರೆ ಉಂಡು.

ಬೇತೆ ಬೇತೆ ಪಂತೋಲಾಯಿನ ಕಂಗ್‌ದ ಮರ ಬರ್ತುನ, ಗೋವಿಂದ ಪಂತೋ, ಕ್ರಾಸ್ ಕಂಟ್ರಿರೇಸ್, ಕರ ದರ್ಪುನ, ಸ್ಲೋ ಸೈಕಲ್ ಬ್ಯಾಲೆನ್ಸ್, ಗೋಣಿ ಚೀಲ ಪಂತೋ, ಶ್ರೀ ಕೃಷ್ಣ ವೇಷ ಸ್ಪರ್ಧೆ, ಪೊಂಜೊವ್ ನಕ್ಲೆಗ್ ರಂಗೋಲಿ ಬುಡ್ ಪಾವುನ ಸ್ಪರ್ಧೆ ನಡಪೆರೆ ಉಂಡು.

ಸೆ.6 : ವಿಶ್ವ ಹಿಂದೂ ಪರಿಷತ್ ಶಿರ್ಲಾಲು ಮುತಾಲಿಕೆಡ್ ಮೊಸರುಕುಡಿಕೆ ಉಚ್ಚಯ

ಶಿರ್ಲಾಲು: ವಿಶ್ವ ಹಿಂದೂ ಪರಿಷತ್ ನೆತ್ತ ಮುತಾಲಿಕೆಡ್ 21 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಶಿರ್ಲಾಲು ಗ್ರಾ.ಪಂ ವಠಾರಡ್ ಸೆ.6 ಬುಧವಾರ ನಡಪೆರೆ ಉಂಡು.

ಸಭಾ ಕಾರ್ಯಕ್ರಮದ ಉದಿಪನನ್ ವಿಶ್ವ ಹಿಂದೂ ಪರಿಷತ್ ವೇಣೂರು ಘಟಕದ ಗುರ್ಕಾರೆ ಭಾಸ್ಕರ್ ಎಸ್ ನಡಪಾದ್ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಗ್ರಾ.ಪಂ ಮಾಜಿ ಗುರ್ಕಾರೆ ಸಂಜೀವ ದೇವಾಡಿಗ, ಶಿರ್ಲಾಲು ಪ್ರಗತಿಪರ ಕೃಷಿಕೆರ್ ಯುವರಾಜ್ ಮುಡ್ಡಾಲು, ಶಿರ್ಲಾಲು ಗ್ರಾ.ಪಂ ಸದಸ್ಯೆ ಪ್ರಕಾಶ್ ಹೆಗ್ಡೆ, ಪ್ರಗತಿಪರ ಕೃಷಿಕೆ ಗಂಗಾಧರ ಮನಿಲ ಪಾಲ್ ಪಡೆಯೆರೆ ಉಲ್ಲೆರ್.

ಧಾರ್ಮಿಕ ಸಭೆತ ಗುರ್ಕಾರ್ಮೆನ್ ಶಿರ್ಲಾಲು ವಿಶ್ವಹಿಂದೂ ಪರಿಷತ್‌ದ ಗುರ್ಕಾರೆ ಸೋಮನಾಥ ಬಳ್ಳಿದಡ್ಡ ವಹಿಸಾಯೆರೆ ಉಲ್ಲೆರ್. ಧಾರ್ಮಿಕ ಭಾಷಣನ್ ರಾ.ಸ್ವ.ಸೇ.ಸಂಘ ಪುತ್ತೂರು ಕಾರ್ಯಕಾರಿಣಿ ಸದಸ್ಯೆರ್ ಪ್ರಕಾಶ್ ಪುರೋಹಿತ್ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್‌ದ ವಕೀಲೆರ್ ಮುರಳಿ ನೋಟರಿ, ಬೊಂಬೈ ಬೊಕ್ಕ ಊರುದ ಉದ್ಯಮಿ ಸುರೇಶ್ ಪೂಜಾರಿ, ಪಾಲ್ ಪಡೆಯೆರೆ ಉಲ್ಲೆರ್. ಗೌರವ ಉಪಸ್ಥಿತಿಟ್ ಶಿರ್ಲಾಲು ಗ್ರಾ.ಪಂ ದ ಗುರ್ಕಾರ್ದಿ ಉಷಾ ಎಂ ಶೆಟ್ಟಿ, ಸಿ.ಎ ಬ್ಯಾಂಕ್ ಗುರ್ಕಾರೆರ್ ನವೀನ್ ಸಾಮಾನಿ, ಶಿರ್ಲಾಲು ಹಾಲು ಉತ್ಪಾದಕರ ಸಂಘದ ಗುರ್ಕಾರೆರ್ ಮಾಧವ, ಶಿರ್ಲಾಲು ಗ್ರಾ.ಪಂ ಅಭಿವೃದ್ಧಿ ಅಧಿಕಾರಿ ರಾಜು, ಶಿರ್ಲಾಲು ಶ್ರೀ ರಾಮ್ ಫ್ರೆಂಡ್ಸ್ ದ ಗುರ್ಕಾರೆರ್ ಹರೀಶ್ ಮಿತ್ತಬೆಟ್ಟು ಪಾಲ್ ಪಡೆಯೆರೆ ಉಲ್ಲೆರ್.

ಸಾಮಾಜಿಕ ಕಾರ್ಯಕರ್ತೆರಾಯಿನ ಗಿರೀಶ್ ಕಟ್ಟ ಬೊಕ್ಕ ಜಗನ್ನಾಥ್ ಅತ್ಯಾಜೆ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪರೆ ಉಂಡು.

ಮುಗಿತಲದ ಲೇಸ್ ದ ಗುರ್ಕಾರ್ಮೆನ್ ಕರಂಬಾರು ಹಳೆಬೀಡುದ ಪ್ರಶಾಂತ್ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಭಜರಂಗದಳತ ಗುರ್ಕಾರೆರ್ ಸುಂದರ ಊರ, ಕುಶಾಲಪ್ಪ ಗೌಡ ಕಲ್ಲಂದಡ್ಡ, ಶಿರ್ಲಾಲು ಆಟೋ ಚಾಲಕ&ಮಾಲಕ ಸಂಘದ ಗುರ್ಕಾರೆರ್ ಜಗನ್ನಾಥ್ ಆಂತ್ರOಗೆ, ಶಿರ್ಲಾಲು ಶಾಲಾಭಿವೃದ್ಧಿ ಸಮಿತಿ ಗುರ್ಕಾರೆರ್ ಅಶೋಕ್ ಕುಲಾಲ್, ಆರುಷ್ ಚಿಕನ್ ಸೆಂಟರ್‌ದ ಲೋಕೇಶ್ ಪಾಲ್ ಪಡಯೆರೆ ಉಲ್ಲೆರ್.

ಪೊಂಜೊವ್ ನಕ್ಲೆಗ್, ಜೊಕ್ಲೆಗ್ ಬೊಕ್ಕ ಆಂಜೋವ್ ನಕ್ಲೆಗ್ ವಿವಿಧ ಪಂತೊಲು ನಡಪೆರೆ ಉಂಡು. ಶಿರ್ಲಾಲು, ಕರಂಬಾರು ಶಾಲೆದ ಜೋಕ್ಲೆಗ್ ಭಗವದ್ಗೀತೆ ಬಾಯಿಪಾಠ ಪಂತೊ, ಮಧ್ಯಾಹ್ನ 1 ಗಂಟೆರ್ದ್ “ಸತ್ವಪರೀಕ್ಷೆ” ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.

ಮದ್ದಡ್ಕ: ಅಷ್ಟೆಮಿದ ಲೆಕ್ಕಡ್ ಮೊಸರು ಕುಡಿಕೆ ಉತ್ಸವ

ಬೊಲ್ತೇರ್: ಶ್ರೀ ರಾಮ ಸೇವಾ ಸಮಿತಿ ಮದ್ದಡ್ಕ ಬೊಕ್ಕ ವಿಶ್ವ ಹಿಂದೂ ಪರಿಷತ್, ಭಜರಂಗ ದಳ ನೆತ್ತ ಒಟ್ಟು ಸೇರಿಗೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕಡ್ ಮೊಸರು ಕುಡಿಕೆ ಉತ್ಸವ ಸೆ.6 ದಾನಿ ಶ್ರೀ ರಾಮ ಭಜನಾ ಮಂದಿರದ ವಠಾರ ಮದ್ದಡ್ಕ ಮೂಲು ನಡಪೆರೆ ಉಂಡು.

ಲೇಸ್‌ದ ಉದಿಪನನ್ ಶ್ರೀ ಕ್ಷೇತ್ರ ಓಡೀಲುದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಯಂ ರಘುರಾಮ ಭಟ್ ಮಠ ಮೇರ್ ನಡಪಾದ್ ಕೊರಿಯೆರೆ ಉಲ್ಲೆರ್. ಮಾಜಿ ಶಾಸಕೆರ್ ಪ್ರಭಾಕರ ಬಂಗೇರ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ದ ಶಾಸಕೆರ್ ಹರೀಶ್ ಪೂಂಜ, ಯೂನಿಯನ್ ಬ್ಯಾಂಕ್ ಮದ್ದಡ್ಕ ಶಾಖೆದ ಮುಖ್ಯ ಪ್ರಬಂಧಕೆರ್ ಸುಧೀರ್ ನಾಯ್ಕ್ ಪಾಲ್ ಪಡಯೆರೆ ಉಲ್ಲೆರ್. ಗುರುವಾಯನಕೆರೆ ಪ್ರೌಢಶಾಲೆದ ಸಹ ಶಿಕ್ಷಕೆರ್ ಯೋಗೀಶ್ ನಾಯಕ್ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್.

ನಿವೃತ್ತ ಕೇಂದ್ರ ಸರಕಾರಿ ನೌಕರೆರ್ ವಿಠಲ್ ಶೆಟ್ಟಿ ಉಪ್ಪಡ್ಕ ಮೇರೆಗ್ ಈ ಲೇಸ್‌ಡ್ ಮಾನಾದಿಗೆ ನಡಪೆರೆ ಉಂಡು.

ಬೊಲ್ಪುಗು 8 ಗಂಟೆಗ್ ಶ್ರೀ ರಾಮ ಭಜನಾ ಮಂದಿರಡ್ ಪೂಜೆ, 9 ಗಂಟೆಗ್ ಜೊಕ್ಲೆಗ್ ಬೊಕ್ಕ ಸಾರ್ವಜನಿಕೆರೆಗ್ ಗೊಬ್ಬುಲೆದ ಪಂತೋ, ಜೊಕ್ಲೆಗ್ ಮುದ್ದು ಕೃಷ್ಣ ಸ್ಪರ್ಧೆ, ಬಯ್ಯಗ್ 4 ಗಂಟೆಗ್ ಧಾರ್ಮಿಕ ಸಭೆ, 6 ಗಂಟೆಗ್ ಓಡೀಲು ಮಹಾಲಿಂಗೇಶ್ವರ ಭಜನಾ ಮಂಡಳಿದ ಲೆಕ್ಕಡ್ ವಿಶೇಷ ಭಜನಾ ಕಾರ್ಯಕ್ರಮ ನಡಪೆರೆ ಉಂಡು.

ಆ.30: ಸೌತಡ್ಕ ಶ್ರೀ ಮಹಾಗಣಪತಿ ದೇವಳ್ಯಡ್ 12 ತಾರಾಯಿದ ಗಣಹೋಮ ಬೊಕ್ಕ ಚಂಡಿಕಾ ಹೋಮ

ಕೊಕ್ಕಡ; ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನಡ್ 12 ತಾರಾಯಿದ ಗಣಹೋಮ ಬೊಕ್ಕ ಚಂಡಿಕಾ ಹೋಮ ಆ.30 ದಾನಿ ಬೊಲ್ಪುಗು 10.30ಕ್ಕ್ ಬ್ರಹ್ಮಶ್ರೀ ವೇದಮೂರ್ತಿ ಕೆಮ್ಮಿಂಜೆ ನಾಗೇಶ್ ತಂತ್ರಿಲೆನ ನೇತೃತ್ವಡ್ ನಡಪೆರೆ ಉಂಡು ಪಂದ್ ತೆರಿಪಾದೆರ್.

ಈ ಪುಣ್ಯ ಕಾರ್ಯಡ್ ಭಗವದ್ ಭಕ್ತೆರ್ ಪಾಲ್ ಪಡೆದ್, ಪ್ರಸಾದ ಸ್ವೀಕಾರ ಮಲ್ತ್, ದೇವೆರ್ನ ಅನುಗ್ರಹ ಪಡೆಯೊನೊಡು ಪಂದ್ ದೇವಳ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ, ಸರ್ವ ಸದಸ್ಯೆರ್ ಬೊಕ್ಕ ಕಾರ್ಯನಿರ್ವಾಹಣಾಧಿಕಾರಿ ಪ್ರಕಟನೆಡ್ ತೆರಿಪಾದೆರ್.