ಬೊಲ್ತೆರ್ ಸುದ್ದಿ | Belthangady News

” ಸಹಾಯ್ ಎಲೈಟ್ ಅಲಯನ್ಸ್ ” ರಚನೆ

ಕುಡ್ಲ , ಮೇ 28: ಕೊರೋನ ರಡ್ಡನೇ ಅಲೆ ದೇಶಾದ್ಯಂತ ಅಟ್ಟಹಾಸ ಮೆರೆಯೊಂದು ಉಪ್ಪುನಗ ಕಷ್ಟಡ್ ಉಪ್ಪುನಕ್ಲೆಗ್ ಸೇವೆ ಮಲ್ಪುನ ಸಲುವಾದ್ ಕರ್ನಾಟಕ ಮುಸ್ಲಿಂ ಜಮಾಅತ್ ಒಟ್ಟು ಸೇರಿಗೇಡ್ ರಚನೆ ಮಲ್ತಿನ ‘ಸಹಾಯ್’ ತುರ್ತು ಸೇವಾ ತಂಡದ ‘ಸಹಾಯ್ ಎಲೈಟ್ ಅಲಯನ್ಸ್’ ರಚನೆ ಮೇ 28 ತಾರೀಖ್ ಗ್ ರಾತ್ರಿ 8 ಗಂಟೆಗ್ ಝೂಮ್ ಮುಖೇನ ನಡಪರೇ ಉಂಡು.

ಕರ್ನಾಟಕ ಮುಸ್ಲಿಂ ಜಮಾಅತ್ ರಾಜ್ಯಾಧ್ಯಕ್ಷ ಮುಫ್ತಿ ಅನ್ವರ್ ಅಲಿ ಗುರ್ಕಾರ್ಮೆ ವಯಿಸೆರೆ ಉಲ್ಲೆರ್, ಇಂಡಿಯನ್ ಗ್ರಾಂಡ್ ಮುಫ್ತಿ ಸುಲ್ತಾನುಲ್ ಉಲಮಾ ಎ.ಪಿ. ಅಬೂಬಕರ್ ಮುಸ್ಲಿಯಾರ್ ಉದಿಪನ ಮಲ್ಪರೆ ಉಲ್ಲೆರ್..

ಲಾಕ್ಡೌನ್ ಡ್ ರೋಗಿಲೆನ ಸೇವೆ ಮಲ್ತೊಂದು ಉಪ್ಪುನ ಭಟ್ಕಳದ ಮೊಬೈಲ್ ಕ್ಲಿನಿಕ್

ಭಟ್ಕಳ ಮೇ 28 : ಲಾಕ್ ಡೌನ್ ಪೊರ್ತುಡು ಪಿದಾಯಿ ಪೋಪಿನ ಬಂಗ ಆಪಿನೆರ್ದಾವರ ಜ್ವರ ಅತ್ತುಂಡ ಬೇತೆ ಲಕ್ಷಣಯುತ ಸೀಕ್ ತೊಜಿದ್ ಬತ್ತುಂಡ ಪಿದಾಯಿದ ಆಸ್ಪತ್ರೆಗ್ ಪೋಯೇರೆ ಪೋಡ್ಯೊಂದು ಉಲ್ಲೆರ್. ಈ ಪೋಡಿಗೆದ ನಡುಟು ಭಟ್ಕಳದ ಜನಕ್ಲೆಗ್ ಆಪತ್ಬಾಂಧವಲಕ ಮೊಬೈಲ್ ಕ್ಲಿನಿಕ್ ಒಂಜಿ ಬೇಲೆ ಮಲ್ತೊಂದು ಉಂಡು .

ಮುಲ್ಪದ ಸಾಮಾಜಿಕ ಬೊಕ್ಕ ರಾಜಕೀಯ ಸಂಸ್ಥೆಯಾಯಿನ ಮಜ್ಲಿಸೆ ಇಸ್ಲಾಹ್-ವ-ತಂಜೀಮ್ ಸಂಸ್ಥೆ, ರಾಬಿತಾ ಸೂಸೈಟಿ, ಇಂಡಿಯನ್ ನವಾಯತ್ ಫೋರಮ್ ಬೊಕ್ಕ ಭಟ್ಕಳ ಮುಸ್ಲೀಮ್ ಯೂತ್ ಫೆಡರೇಶನ್ ಒಟ್ಟು ಸೇರಿಗೆಡ್ ಕರಿನ 15 ದಿನರ್ದ್ ಮೊಬೈಲ್ ಕ್ಲಿನಿಕ್ ಇಲ್ಲ ಇಲ್ಲಗ್ ಪೋದು ಮರ್ದ್ ಕೊರೊಂದು ಉಂಡು.

ತುಳು ವೆಬಿನಾರ್ ಉಪನ್ಯಾಸ ಮಾಲಿಕೆ

ಕುಡ್ಲ ,ಮೇ 28: ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜು ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠದ ಒಟ್ಟು ಸೇರಿಗೆಡ್ ಪ್ರತಿ ಶನಿವಾರ ನಡತೊಂದು ಉಪ್ಪುನ ಉಪನ್ಯಾಸ ಮಾಲಿಕೆ ಒಂಜಿ ವರ್ಷ ಆತುಂಡು . ನಿರಂತರವಾದ್ 51 ವಾರ ನಡತಿನ ವೆಬಿನಾರ್ , 52ನೇ ಸಂಚಿಕೆ ಮೇ 29 ತಾರೀಖ್ ಗ್ ಬೈಯ್ಯಗ್ 5 ಗಂಟೆಗ್ ಝೂಮ್ ಆಯಪ್‌ಡ್ ನಡಪರೇ ಉಂಡು.

ಮಲ್ಲ ಬಿನ್ನೆರ್ ಆದ್ ಕೇಂದ್ರ ಸಚಿವ ಡಿ.ವಿ.ಸದಾನಂದ ಗೌಡ ಪಾಲ್ ಪಡೆಯರೇ ಉಲ್ಲೆರ್ , ಪತ್ರಕರ್ತೆ ವಿಜಯಲಕ್ಷ್ಮಿ ಶಿಬರೂರು ಉಪನ್ಯಾಸ ಕೊರಿಯರೆ ಉಲ್ಲೆರ್ . ಕುಡ್ಲ ವಿ.ವಿ. ಕುಲಪತಿ ಪ್ರೊ.ಪಿ.ಎಸ್. ಯಡಿಪಡಿತ್ತಾಯ ಗುರ್ಕಾರ್ಮೆ ವಯಿಸೆರೆ ಉಲ್ಲೆರ್ ಪಂದ್ ಪ್ರಕಟನೆಡ್ ತೆರಿಪಾದೆರ್ .

ಲಯನ್ಸ್ ಕ್ಲಬ್ 317ಸಿಗ್ ರಾಷ್ಟ್ರ ಮಟ್ಟಡ್ ಸುರುತ್ತ ಸ್ಥಾನ : ನೀಲಕಂಠ ಹೆಗಡೆ

ಹೆಬ್ರಿ, ಮೇ 28: ಲಯನ್ಸ್ ಜಿಲ್ಲೆ 317ಸಿ ಜಿಲ್ಲಾ ಗವರ್ನರ್ ನೀಲಕಂಠ ಎಂ. ಹೆಗಡೆ ಸಾರಥ್ಯಡ್ ಅಭೂತಪೂರ್ವ ಸಾಧನೆದೊಟ್ಟುಗು ಜಾಗತಿಕ ಮಟ್ಟದ ಮನ್ನಣೆ ದೆತೊನ್ದುಂಡು . ನಾಲ್ ಕಂದಾಯ ಜಿಲ್ಲೆ ಆಯಿನ ಒಡಿಪು , ಶಿವಮೊಗ್ಗ, ದಾವಣಗೆರೆ ಬೊಕ್ಕ ಚಿತ್ರದುರ್ಗನ್ ಉಪ್ಪುನ ಲಯನ್ಸ್ ಜಿಲ್ಲೆ ಲಿಯೋ ಕ್ಲಬ್‌ಲೆನ್ ವಿಸ್ತರಣೆ ಮಲ್ಪುನಲ್ಪ ರಾಷ್ಟ್ರಮಟ್ಟಡ್ ಸುರುತ್ತ ಸ್ಥಾನ ಪಡೆದುಂಡು .

ಜಗತ್ತ್ ದ 210 ರಾಷ್ಟ್ರಡ್ 765 ಜಿಲ್ಲೆಡ್ ಪ್ರಸ್ತುತ ವರ್ಷ ಲಯನ್ಸ್ ಜಿಲ್ಲೆ 317ಸಿ ಸುರುತ್ತ ಸ್ಥಾನ ಪಡೆತಿನವು ನಂಕ್ ಪೆರ್ಮೆದ ಇಚಾರ ಪಂದ್ ಗವರ್ನರ್ ನೀಲಕಂಠ ಎಂ.ಹೆಗೆ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ವೆನ್ಲಾಕ್ ಆಸ್ಪತ್ರೆಗ್ ಜಿಲ್ಲಾಧಿಕಾರಿ ಭೇಟಿ

ಕುಡ್ಲ ,ಮೇ 28 : ಪೇಂಟೆದ ವೆನ್ಲಾಕ್ ಆಸ್ಪತ್ರೆಡ್ ಕೋವಿಡ್ ಸೋಂಕಿತೆರ್ನ ಚಿಕಿತ್ಸೆಗಾದ್ ದೆತೊದಿoನ ಮೂಲ ಸೌಕರ್ಯದ ಅಭಿವೃದ್ಧಿ ಕಾಮಗಾರಿನ್ ದ.ಕ. ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಗುರುವಾರ ವೀಕ್ಷಣೆ ಮಲ್ತೆರ್ .

ಐರ್ದ್ ಬೊಕ್ಕ ಪಾತೆರಿನ ಆರ್ ಇತ್ತೆ ಪೇಂಟೆಡ್ ಕೊರೋನ ಸೋಂಕು ತಡೆಗ್ ಮಾತಾ ರೀತಿದ ಕ್ರಮ ದೆತೊoದೆರ್. ಮೂಜನೆ ಅಲೆ ಬತ್ತುಂಡಲ ಸಮಸ್ಯೆಯಾಲವಂದಿಲಕ ಮಾತಾ ಕೋವಿಡ್ ಸೋಂಕಿತೆರ್ನ ಆರೈಕೆಗಾದ್ ಪೇಂಟೆದ ಆರೋಗ್ಯ ಮೂಲ ಸೌಕರ್ಯನ್ ಜಾಸ್ತಿ ಮಲ್ತ್ ದ್ ಉತ್ತಮ ಗುಣ ಮಟ್ಟದ ಚಿಕಿತ್ಸೆನ್ ಒದಗಿಸಾಯೆರೆ ಜಿಲ್ಲಾಡಳಿತ ಮಾತಾ ಅಗತ್ಯ ಕ್ರಮಕ್ಲೆನ್ ದೆತೊoದೆರ್ ಪಂದ್ ಪಂಡೆರ್.

ಕೋವಿಡ್ ಲಾಕ್ ಡೌನ್ ನೆಲೆಟ್ಟ್ : ಸಾಲ ಪಿರ ಕೊರಿಯೆರೆ ಒತ್ತಾಯ ಮಲ್ತುಂಡ ದೂರು ಕೊರ್ಲೆ : ದ.ಕ ಜಿಲ್ಲಾಧಿಕಾರಿ

ಕುಡ್ಲ , ಮೇ 28: ಕೊರೋನ ಸೋಂಕು ತಡೆಗಟ್ಟರೆ ಅಧಿಕ ಸಂಖ್ಯೆಡ್ ಜನಕುಲು ಸೇರ್ಪಡೆಯಾಪಿನೆನ್ ಉಂತಾಯೆರೆ ದ.ಕ.ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ. ಪೊಸ ಆದೇಶ ಒಂಜಿ ಕೊರ್ತೆರ್. ಮೈಕ್ರೋ ಫೈನಾನ್ಸ್‌ಲು , ಸಹಕಾರಿ ಸಂಘಲು , ಬೇತೆ ಹಣಕಾಸು ಸಂಸ್ಥೆಲು ಸಾಲ ಮರುಪಾವತಿಗಾದ್ ಸಾಲಗಾರೆರೆನ್ ಒತ್ತಾಯ ಮಲ್ಪರೆ ಬಲ್ಲಿ ಪಂದ್. ಐತ ಮೇಲ್ವಿಚಾರಣೆಗಾದ್ ರಡ್ಡ್ ಜನ ನೋಡಲ್ ಅಧಿಕಾರಿಲೆನ್ ಲಾ ಜಿಲ್ಲಾಧಿಕಾರಿ ನೇಮಕ ಮಲ್ದೆರ್ .

ಒವ್ವೆ ರೀತಿದ ಒತ್ತಡ ಪಾಡುಂಡ ಲೀಡ್ ಬ್ಯಾಂಕ್ ಮ್ಯಾನೇಜರ್ ಪ್ರವೀಣ್ (9449860916), ಸಹಕಾರಿ ಸಂಘದ ಉಪನಿಬಂಧಕ ಪ್ರವೀಣ್ ಬಿ.ನಾಯಕ್ (9448633338)ಮೆರೆನ್ ಗ್ ಲೆಪ್ಪು ಕೊರೋಲಿ ಪಂದ್ ಪಂಡೆರ್ .

ಲಸಿಕೆ ಕೊರಿಬೊಕ್ಕ ಪರೀಕ್ಷೆ ಮಲ್ಪಾಲೆ : ಎನ್ಎಸ್ ಯುಐ ಆಗ್ರಹ

ಕುಡ್ಲ , ಮೇ 28: ಲಸಿಕೆಇಲ್ಲದೆ ಇಜ್ಜಂದೆ ಪರೀಕ್ಷೆ ಬೊರ್ಚಿ , ಜೋಕ್ಲೆನ ಶುಲ್ಕಡ್ ಶೇ.50 ದಾತ್ ರಿಯಾಯಿತಿ ಕೊರೊಡು . ಕೊರೋನ ಸೋಂಕುರ್ದು ಪೋಷಕೆರೆನ್ ಕಳೆಯೊಂದಿನ ಜೋಕ್ಲೆಗ್ ಉಚಿತ ಶಿಕ್ಷಣ ಕೊರೊಡು ಪಂದ್ ಬೇಡಿಕೆನ್ ಈಡೇರಿಸಾವೊಡು ಎನ್‌ಎಸ್‌ಯುಐ ದ.ಕ. ಜಿಲ್ಲಾಧ್ಯಕ್ಷ ಸವಾದ್ ಸುಳ್ಯ ಪಂಡೆರ್ .

ಪೇಂಟೆದ ಮಲ್ಲಿಕಟ್ಟೆದ ಕಾಂಗ್ರೆಸ್ ಭವನಡ್ ಗುರುವಾರ ಸುದ್ದಿಗೋಷ್ಠಿಡ್ ಪಾತೆರಿನ ಮೆರ್ ಕೊರೋನ ಮೂಜನೆ ಅಲೆತ ಮುನ್ಸೂಚನೆ ಉಂಡು , ಜೋಕುಲು ಬೊಕ್ಕ ಪೋಷಕೆರ್ಡ ಪೋಡಿಗೆ ಪುಟ್ಟಾದುಂಡು.

ಸುದ್ದಿಗೋಷ್ಠಿಡ್ ಎನ್‌ಎಸ್‌ಯುಐ ಜಿಲ್ಲಾ ಉಪಾಧ್ಯಕ್ಷೆರಾಯಿನ ಆಸ್ಟನ್ ಸ್ವಿಕ್ವೇರಾ, ಅಂಕುಶ್ ಶೆಟ್ಟಿ, ನಿಕಿಲ್ ಪೂಜಾರಿ, ಮುಖಂಡೆರಾಯಿನ ಪವನ್ ಸಾಲ್ಯಾನ್, ಶಫೀಕ್, ರಿಲ್ವಾನ್ ಪಾಲ್ ಪಡೆದಿತ್ತೆರ್.

ಅಗತ್ಯ ಸಾಮಗ್ರಿ ಖರೀದಿ ಮಲ್ಪರೆ ಜಾಸ್ತಿ ಪೊರ್ತು ಅವಕಾಶ ಕೊರ್ರೆ ಮನವಿ

ಕುಡ್ಲ , ಮೇ 28: ಕೊರೋನ ನಿಗ್ರಹದ ನೆಲೆಟ್ಟ್ ಲಾಕ್‌ಡೌನ್ ನಡುಟುಲಾ ಅಗತ್ಯ ಸಾಮಗ್ರಿಲೆದ ಖರೀದಿದ ಪೋರ್ತೆ ಕೊರೋನ ಸೋಂಕು ಜಾಸ್ತಿ ಆಯೆರೆ ಕಾರಣ ಆಪಿನ ಸಾಧ್ಯತೆ ಉಂಡು. ಅಂಚಾದ್ ಅಗತ್ಯ ಸಾಮಗ್ರಿ ಖರೀದಿ ಅವಧಿ ಜಾಸ್ತಿ ಮಲ್ಪೋಡು ಪಂದ್ ಕಂಕನಾಡಿ ಮಾರುಕಟ್ಟೆ ವ್ಯಾಪಾರಸ್ಥರ ಸಂಘದ ಗುರ್ಕಾರ್ಲಾಯಿನ ಅಲಿ ಹಸನ್ ಮನವಿ ಮಲ್ದೆರ್ .

ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ವತಿರ್ದ್ ಜವಹರಲಾಲ್ ನೆಹರು ಪುಣ್ಯತಿಥಿ

ಕುಡ್ಲ , ಮೇ 28: ದ.ಕ.ಜಿಲ್ಲಾ ಕಾಂಗ್ರೆಸ್ ಸಮಿತಿದ ವತಿರ್ದ್ ದೇಶದ ಪ್ರಥಮ ಪ್ರಧಾನಿ ಪಂಡಿತ್ ಜವಾಹರ್ ಲಾಲ್ ನೆಹರೂ ಪುಣ್ಯತಿಥಿ ಗುರುವಾರ ಪೇಂಟೆದ ಮಲ್ಲಿಕಟ್ಟೆದ ಕಾಂಗ್ರೆಸ್ ಕಚೇರಿಡ್ ನಡತುಂಡು.

ಈ ಪೊರ್ತುಡು ಪೆರಿಯ ಸ್ವಾತಂತ್ರ್ಯ ಹೋರಾಟಗಾರ, ಶತಾಯುಷಿ ಎಚ್.ಎಸ್. ದೊರೆಸ್ವಾಮಿ, ವಿಧಾನಸಭೆ ಮಾಜಿ ಸ್ಪೀಕರ್ ಕೆ.ಆರ್.ಪೇಟೆ ಕೃಷ್ಣ ಸೇರಿನಂಚ ತೀರ್ ಪೋಯಿನ ಗಣ್ಯೆರೆಗ್ ಶ್ರದ್ಧಾಂಜಲಿ ಮಲ್ತೆರ್ .

ಲೇಸ್ ಡ್ ಜಿಲ್ಲಾ ಮಹಿಳಾ ಕಾಂಗ್ರೆಸ್ ಗುರ್ಕಾರ್ಲಾಯಿನ ಶಾಲೆಟ್ ಪಿಂಟೊ, ಜಿಲ್ಲಾ ಕಾಂಗ್ರೆಸ್ ಒಬಿಸಿ ಗುರ್ಕಾರ್ಲಾಯಿನ ವಿಶ್ವಾಸ್ ಕುಮಾರ್ ದಾಸ್, ಜಿಲ್ಲಾ ಕಾಂಗ್ರೆಸ್ ಕಾರ್ಮಿಕ ಘಟಕಾಧ್ಯಕ್ಷ ಲಾರೆನ್ಸ್ ಡಿಸೋಜ, ರಾಜೀವ್ ಗಾಂಧಿ ಪಂಚಾಯತ್‌ರಾಜ್ ಸಂಘಟನೆದ ಗುರ್ಕಾರ್ಲಾಯಿನ ಶುಭೋದಯ ಆಳ್ವ, ಎನ್‌ಎಸ್‌ಯುಐ ಜಿಲ್ಲಾಧ್ಯಕ್ಷ ಸವಾದ್ ಸುಳ್ಯ, ಕಾರ್ಪೊರೇಟರ್‌ ಆಯಿನ ಜೆಸಿಂತಾ ವಿಜಯ್ ಆಲ್ಫ್ರೆಡ್, ಕೇಶವ ಮರೋಳಿ, ಮುಖಂಡೆರಾಯಿನ ಪದ್ಮನಾಭ ಅಮೀನ್, ಮುಹಮ್ಮದ್ ಕುಂಜತ್ತಬೈಲ್, ಶಬ್ಬೀರ್ ಎಸ್, ಅಬ್ದುಲ್ ಖಾದರ್ ಏರ್‌ಪೋರ್ಟ್, ನಝೀರ್ ಬಜಾಲ್, ಸಿ.ಎಂ.ಮುಸ್ತಫಾ, ನವಾಝ್ ಜೆಪ್ಪು, ಎ.ಆರ್.ಇಮ್ರಾನ್, ಫಯಾಝ್, ಯೂಸುಫ್ ಉಚ್ಚಿಲ್ ಪಾಲ್ ಪಡೆದ್ ಇತ್ತೆರ್.