ಬೊಲ್ತೆರ್ ಸುದ್ದಿ | Belthangady News

ಕೋವಿಡ್ ಯೋಧೆರೆಗ್ ಡೆಟ್ಟೋಲ್ ಸಲ್ಯೂಟ್ ಅಭಿಯಾನ

ಬೆಂಗ್ಳೂರು, ಜೂನ್ 11 : ಪ್ರಸಿದ್ದ ಜರ್ಮ್ ಪ್ರೊಟೆಕ್ಷನ್ ಬ್ರ್ಯಾಂಡ್ ಡೆಟಾಲ್ #DettolSalutes ಪನ್ಪಿನ ಅಭಿಯಾನನ್ ಸುರು ಮಲ್ದುಂಡು . ನೆತ್ತ ಇತಿಹಾಸಡ್ ಸುರುತ್ತ ಸಲ ಡೆಟಾಲ್, ಕೋವಿಡ್ -19 ಯೋಧೆರೆಗ್ ಗೌರವ ಸೂಚಕವಾದ್ ಐತ ಸಾಂಪ್ರದಾಯಿಕ ಲೋಗೊನು ಕೋವಿಡ್ ರಕ್ಷಕನ (ಕೋವಿಡ್ ಪ್ರೊಟೆಕ್ಟರ್) ಚಿತ್ರದೊಟ್ಟುಗು ಬದಲಾವಣೆ ಮಲ್ದುಂಡು .

ಡೆಟಾಲ್ ಭಾರತಡ್ ಇಂಚಿನ 100 ಜನ ಕೋವಿಡ್ ಯೋಧೇರ್ನ ಅನುಭವನ್ ಒಟ್ಟು ಮಲ್ದೆರ್ ಬೊಕ್ಕ ಅವ್ವೆತೋ ಜನಕ್ಲೆಗ್ ನಿಸ್ವಾರ್ಥವಾದ್ ಸಹಾಯ ಮಲ್ದಿನ ಕೋವಿಡ್ ರಕ್ಷಕೆರ್ನ ಗೌರವಾರ್ಥವಾದ್ ಅವೆನ್ ಲಿಕ್ವಿಡ್ ಹ್ಯಾಂಡ್‌ವಾಶ್ ಪ್ಯಾಕ್‌ಡ್ ಪಾರ್ದ್ ಜನಕ್ಲೆಗ್ ಮುಟ್ಟವುನ ಬೇಲೆ ಮಲ್ತೊಂದು ಉಲ್ಲೆರ್.

ಆತೆ ಅತ್ತoದೆ , ಈ ಅನುಭವ ಕಥನನ್ ಜಾಸ್ತಿ ಜಾಸ್ತಿ ಜನಕ್ಲೆಗ್ ಮುಟ್ಟಾಯೆರೆ ಡೆಟಾಲ್ www.DettolSalutes.com ಪನ್ಪಿನ ವೆಬ್‌ಸೈಟ್ ನ್ ಲಾ ಸುರು ಮಲ್ದುಂಡು . ಕಸ್ಟಮೈಸ್ ಮಲ್ತಿನ ವರ್ಚುವಲ್ ಪ್ಯಾಕ್‌ಲೆನ್ ಸುರು ಮಲ್ಪುನ ಮುಖೆನ ಬೊಕ್ಕ ಅವೆನ್ ಅಕ್ಲೆನ ಸಾಮಾಜಿಕ ಮಾಧ್ಯಮ ಚಾನಲ್‌ಡ್ ಪಟ್ಟುನ ಮುಖೇನ ಕೋವಿಡ್ ರಕ್ಷಕೆರೆನ್ ಅಕ್ಲೆನ ನಡುಟು ಗುರ್ತಿಸಾವುನ ಬೇಲೆ ಮಲ್ದೆರ್.

ಟ್ಯಾಕ್ಸ್ ಕಟ್ಟರೆ ಪೊಸ ವೆಬ್ ಸೈಟ್ ಬುಡುಗಡೆ

ನವ ದೆಹಲಿ, ಜೂನ್ 11 : ಆದಾಯ ತೆರಿಗೆಗ್ ಸಂಬಂಧ ಪಟ್ಟಿನoಚ ಪೊಸ ವೆಬ್‌ ಸೈಟ್ ಇನಿರ್ದ್ ಸುರು ಆತುಂಡು. ಆದಾಯ ತೆರಿಗೆದ ಹೊಸ ವೆಬ್‌ ಸೈಟ್‌ ಡ್ ದುಂಬುರ್ದು ಜಾಸ್ತಿ ಸೌಲಭ್ಯಲೆನ್ ಕೊರ್ತೆರ್ .

ಈ ಪೊಸ ಪೋರ್ಟಲ್‌ಡ್ , ಆದಾಯ ತೆರಿಗೆ ರಿಟರ್ನ್ಸ್ ಬೊಕ್ಕ ಮರುಪಾವತಿ ಸಮಸ್ಯೆದ ತ್ವರಿತ ಪ್ರಕ್ರಿಯೆದೊಟ್ಟುಗು ನನಾತ್ ವಿಶೇಷತೆ ಉಂಡು.

ಶಾಲಾ ಕಾಲೇಜು ಶುಲ್ಕ ಪಾವತಿಗ್ ಒತ್ತಡ ಪಾಡಂದಿಲಕ ಜಿಲ್ಲಾಧಿಕಾರಿ ಸೂಚನೆ

ಕುಡ್ಲ, ಜೂನ್ 11: ದ.ಕ. ಜೋಕ್ಲೆನ ಶಿಕ್ಷಣ ಶುಲ್ಕ ಪಾವತಿಗ್ ಒತ್ತಡ ಪಾಡಂದಿಲಕ ಶಾಲಾ ಕಾಲೇಜುದ ಆಡಳಿತ ಮಂಡಳಿಗ್ ದ.ಕ.ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಸ್ಪಷ್ಟ ಸೂಚನೆ ಕೊರ್ತೆರ್ .

ಕೆಲವು ಶಾಲಾ, ಕಾಲೇಜ್ದ ಮುಖ್ಯ ಶಿಕ್ಷಕೆರ್ , ಪ್ರಾಂಶುಪಾಲೆರ್ ಬೊಕ್ಕ ಆಡಳಿತ ಮಂಡಳಿದಕುಲು ಜೋಕ್ಲೆನ ಪೋಷಕೇರ್ಡ ಕರಿನ ಶೈಕ್ಷಣಿಕ ವರ್ಷದ ಬಾಕಿ ಕಾಸ್ ನ್ ಒಂಜೆ ಕಂತ್ ಡೆ ಕಟ್ಟೋಡು ಪಂದ್ ದೂರವಾಣಿ ಕರೆ ಮಲ್ತ್ ಒತ್ತಾಯ ಮಲ್ಪುನು ಕಟ್ಟಿಜಿಂಡ , ಆನ್‌ಲೈನ್ ಪಾಠ ಮಲ್ಪರೆ ಬುಡ್ಪುಜ ಪಂದ್ ಎಚ್ಚರಿಕೆ ಕೊರ್ಪಿನಿ , ವರ್ಗಾವಣೆ ಪತ್ರ ಕೊರ್ಪುಜ ಪನ್ಪಿನಿ , ಲೇಖನ ಸಾಮಗ್ರಿಲೆನ್ ನಿರ್ದಿಷ್ಟ ಅಂಗಡಿಡ್ ಮಾತ್ರ ಪಡೆಯೋಡು ಪಂದ್ ಒತ್ತಡ ಹಾಕುವ ಬಗ್ಗೆ ಅವ್ವೆತೋ ದೂರು ಬೈದುಂಡು ಪಂದ್ ಪಂಡೆರ್ .

ಅನ್ಯ ಧರ್ಮದಕ್ಲೆಗ್ ತಸ್ತೀಕ್ ಕಾಸ್ ಬೊರ್ಚಿ : ವಿಎಚ್ ಪಿ ಆಗ್ರಹ

ಕುಡ್ಲ, ಜೂನ್ 11: ರಾಜ್ಯಡ್ ಕೋವಿಡ್ 19 ಸೋಂಕುರ್ದಾವರ ಅರ್ಚಕೆರ್ ಆರ್ಥಿಕ ಸಂಕಷ್ಟಡ್ ಉಪ್ಪುನ ಕಾರಣ ಸರ್ಕಾರರ್ದ್ ತಸ್ತಿಕ್ ಭತ್ಯೆ ಕೊರಿಯರೆ ಆದೇಶ ಮಲ್ತಿನೆನ್ ಎದುಕೊಂಡಿನ ವಿಶ್ವ ಹಿಂದೂ ಪರಿಷತ್, ತಸ್ತಿಕ್ ಕಾಸ್ ನ್ ಹಿಂದೂ ಧಾರ್ಮಿಕ ದತ್ತಿ ಇಲಾಖೆರ್ದ್ ದಕ್ಷಿಣ ಕನ್ನಡ ಜಿಲ್ಲೆದ 41 ಮಸೀದಿ, ಮದರಸದ ಮೌಲ್ವಿಲೆಗ್ ಕೊರಿಯರೆ ನಿರ್ಧಾರ ಮಲ್ತಿನೆನ್ ವಿರೋಧಿಸಾವ ಪಂದ್ ತೆರಿಪಾದುಂಡು .

ದೈವಸ್ಥಾನ, ದೇವಸ್ಥಾನದ ಕಾಸ್ ನ್ ಹಿಂದೂಲೆಗ್ ಬೊಕ್ಕ ದೇವಸ್ಥಾನದ ಕಾರ್ಯಗ್ ಮಾತ್ರ ಉಪಯೋಗ ಮಲ್ಪೋಡು . ಮಸೀದಿ, ಮದರಸಗ್ ಉಪಯೋಗಿಸಾವುನ ನಿರ್ಧಾರನ್ ಪಿರ ದೆತೊನೊಡು ಪಂದ್ ವಿಶ್ವ ಹಿಂದೂ ಪರಿಷತ್‌ ಮುಖಂಡೆರ್ ಧಾರ್ಮಿಕ ದತ್ತಿ ಇಲಾಖೆ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಮೆರೆಗ್ ಮನವಿ ಮಲ್ತೆರ್.ಮನವಿಗ್ ಸ್ಪಂದಿಸಾಯಿನ ಸಚಿವೆರ್ ನಿರ್ಧಾರನ್ ಪಿರ ದೆತೊನುವ ಪಂದ್ ಭರವಸೆ ಕೊರಿಯೆರ್ .