ಬೊಲ್ತೆರ್ ಸುದ್ದಿ | Belthangady News

ಯುವಜನತೆ ಕೋವಿಡ್ ಲಸಿಕೆ ಪಾಡೆರೆ ಸಂಸದೆ ಮಂಗಳ ಅಂಗಡಿ ಸೂಚನೆ

ಬೆಳಗಾವಿ, ಜೂನ್ 12: ‘ಸಧೃಡ ಭಾರತ ನಿರ್ಮಾಣಡ್ ಜವಣ್ಯೇರ್ನ ಪಾತ್ರ ಬಾರಿ ಮುಖ್ಯವಾದುಂಡು ಕೋವಿಡ್ ಎದುರಿಸಾಯೆರೆ ಲಸಿಕೆ (ಚುಚ್ಚುಮದ್ದು) ಪ್ರಬಲ ಅಸ್ತ್ರವಾದುಂಡು ಒವ್ವೆ ಹಿಂಜರಿಕೆ ಇಜ್ಜಂದೆ ಲಸಿಕೆ ಪಡೆಯೋಡು ‘ ಪಂದ್ ಸಂಸದೆ ಮಂಗಲಾ ಅಂಗಡಿ ಪಂಡೆರ್ .

ಕೆಎಲ್‌ಇ ಸಂಸ್ಥೆದ ಪ್ರಭಾಕರ ಕೋರೆ ಆಸ್ಪತ್ರೆ ಬೊಕ್ಕ ವೈದ್ಯಕೀಯ ಸಂಶೋಧನಾ ಕೇಂದ್ರಡ್ 18 ವರ್ಷ ಮಿತ್ತ್ ದಕ್ಲೆಗ್ ಕೋವಿಡ್ ಲಸಿಕೆ ಕೊರ್ಪಿನ ಅಭಿಯಾನಗ್ ಶುಕ್ರವಾರ ಚಾಲನೆ ಕೊರ್ದು ಆರ್ ಪಾತೆರಿಯೆರ್.

ಜೂನ್ 14ರ್ದ್ ಕುಡ್ಲದ ಮಾತಾ ಕೇಂದ್ರಡ್ ಎನ್ಆರ್ ಐಲೆಗ್ ಲಸಿಕೆ ಕೊರಿಯರೆ ಜಿಲ್ಲಾಧಿಕಾರಿ ಆದೇಶ

ಕುಡ್ಲ, ಜೂನ್ 12: ವಿದೇಶಗ್ ಪೋಯಿನ ಅನಿವಾಸಿಲೆಗ್ ದಕ್ಷಿಣ ಕನ್ನಡ ಜಿಲ್ಲೆದ ಮಾತಾ ಆರೋಗ್ಯ ಕೇಂದ್ರ, ಪ್ರಾಥಮಿಕ ಆರೋಗ್ಯ, ನಗರ ಆರೋಗ್ಯ ಕೇಂದ್ರ ಸೇರಿನಂಚ ಮಾತಾ ಲಸಿಕಾ ಕೇಂದ್ರಡ್ ಜೂನ್ 14‌ರ್ದ್ ಲಸಿಕೆ ಪಾಡೆರೆ ದ.ಕ. ಜಿಲ್ಲಾಧಿಕಾರಿ‌ ಆದೇಶ ಕೊರ್ತೆರ್ , ಜಿಲ್ಲಾಧಿಕಾರಿನ ಈ ಆದೇಶನ್ ಅನಿವಾಸಿಲು ಎದುಕೊಂದೆರ್ .

ದ.ಕ ಜಿಲ್ಲಾ ರೆಡ್ ಕ್ರಾಸ್ ಸೊಸೈಟಿ ವತಿರ್ದ್ ಮೇ 30 ತಾರೀಖ್ ಗ್ ಅಟ್ಟನೆ ಮಲ್ತಿನ ದ.ಕ. ಜಿಲ್ಲಾಧಿಕಾರಿನೊಟ್ಟುಗು ನಡತಿನ ಅನಿವಾಸಿ ಕನ್ನಡಿಗರ ವೀಡಿಯೊ ಸಂವಾದ ಲೇಸ್ ಡ್ ವಿಶ್ವದಾದ್ಯಂತ ಹಲವು ಅನಿವಾಸಿಲು ಪಾಲ್ ಪಡೆಯೆರ್.

ತುಮಕೂರು : ಎಸ್ಎಸ್ ಎಲ್ ಸಿ ಪರೀಕ್ಷೆಗ್ ತಯಾರಿ

ತುಮಕೂರು, ಜೂನ್ 12: ಜಿಲ್ಲೆಡ್ ಎಸ್ಸೆಸ್ಸೆಲ್ಸಿ ಪರೀಕ್ಷೆಗ್ ಅವ್ವೆತೋ ಮುನ್ನೆಚ್ಚರಿಕೆ ವಯಿಸೊಂದು ತಯಾರ್ ಮಲ್ತೊಂದು ಉಲ್ಲೆರ್ ಇತ್ತೇ ಮಾತಾ ಚರ್ಚೆಲು ಕಡೆತ ಘಟ್ಟ ಮುಟ್ಟುದುಂಡು .

ಕೋವಿಡ್‌-19ರ್ದ್ ಅಗತ್ಯ ಮುಂಜಾಗ್ರತಾ ಕ್ರಮಕ್ಲೆನ್ ದೆತೊನೊಂದು ಉಲ್ಲೆರ್ . ಕೋವಿಡ್ ಸುರುತ್ತ ಅಲೆಯು ಪ್ರಾಯದಕ್ಲೆನ್ ಜಾಸ್ತಿ ಬತ್ತಿತ್ತುಂಡು. ಎರಡನೇ ಅಲೆ ಮಧ್ಯ ವಯಸ್ಕೆರೆಗ್ ಬೇನೆ ಕೊರ್ತುಂಡು. ನನ ಮೂಜನೆ ಅಲೆ ಬತ್ತುಂಡ ಅವು ಜೋಕ್ಲೆನ ಮಿತ್ತ್ ಪರಿಣಾಮ ಬೂರುಂಡು ಪಂದ್ ತಜ್ನೆರ್ ಪಂಡೆರ್ , ಅಂಚಾದ್ ಪರೀಕ್ಷೆ ನಡಪಾಯೆರೆ ಶಿಕ್ಷಣ ಇಲಾಖೆ ಜಾಸ್ತಿ ಎಚ್ಚರಿಕೆ ವಹಿಸೊಂದು ಉಲ್ಲೆರ್ .

ಕುಡೊಂಜಿ ಪ್ಯಾಕೇಜ್ ಗ್ ಸರಕಾರ ಚಿಂತನೆ :ಸಿ ಎಂ ಯಡಿಯೂರಪ್ಪ

ಕುಡ್ಲ, ಜೂನ್ 12: ಅನಿವಾರ್ಯ ಇತ್ತುಂಡ ನನೊಂಜಿ ಪ್ಯಾಕೇಜ್ ಘೋಷಣೆ ಮಲ್ಪುವ ಪಂದ್ ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ಪಂತೆರ್ .ಶಿ, ವಮೊಗ್ಗ ಜಿಲ್ಲೆದ ಶಿಕಾರಿಪುರಡ್ ಶುಕ್ರವಾರ ಸುದ್ದಿಗಾರೆರ್ನೊಟ್ಟಿಗೆ ಪಾತೆರಿನ ಆರ್ ಕರಿನ 8 ತಿಂಗೊಲುರ್ದು ರಾಜ್ಯಡ್ ತೆರಿಗೆ ಸಂಗ್ರಹ ಕಡಿಮೆ ಆತುಂಡು . ನೆತ್ತ ನಡುಟುಲಾ ಅಭಿವೃದ್ಧಿಗಾದ್ ಶಕ್ತಿ ಮೀರ್ದ್ ಬೇಲೆ ಮಳ್ತೊಂದುಲ್ಲ ಪಂಡೆರ್ .

ಕೇಂದ್ರ ಸರ್ಕಾರರ್ದ್ ಜಾಸ್ತಿ ಅನುದಾನಗ್ ಬೇಡಿಕೆ ದೀತೆ . ಪ್ರಧಾನಿ ಮೋದಿ ಮೇರ್ ಅನುದಾನ ಕೊರ್ಪಿನ ವಿಶ್ವಾಸ ಉಂಡು ಪಂದ್ ಪಂಡೆರ್.

ತುಳು ಬಾಸೆಗ್ ರಾಜ್ಯ ಬಾಸೆದ ಮಾನಾದಿಗೆ ತಿಕ್ಕರೆ ಬೋಡಾದ್ ಟ್ವಿಟ್ಟರ್ ಅಭಿಯಾನೊಡು ಪಾಲ್ ಪಡೆಲೆ

ಮುಲ್ಕಿ ಜೂನ್ 12: ತುಳುನಾಡ್‌ದ ಜನೋಕ್ಲೆಗ್ ಅಪ್ಪೆ ಬಾಸೆದ ಮಿತ್ತ್ ಬಾರಿ ಮೋಕೆ , ತುಳು ಬಾಸೆ, ತುಳು ಬಾವುಟ, ಸಂಸ್ಕೃತಿ, ಆಚಾರ ವಿಚಾರೊಗು ಓಲಾಂಡಲ ಅಪಚಾರ ಆಂಡ ಲಕ್ಕದುಂತುದು ಪ್ರತಿಭಟನೆ ಮಲ್ಪುವೆರ್. ಬಾಸೆದಕುಲು ಕೋಂಗಿ ಕಟ್ಟಿಯೆರ್ಡ ಅಕ್ಲೆಡ ತಪ್ಪು ನಟ್ಟಾವೆರ್, ಉಂದೆಕ್ಕ್ ಇಂಚೋಗು ನಡತಿನ ತುಳುನಾಡ ಬಾವುಟದ ಚಿಹ್ನೆಗ್ ಮಲ್ತಿನ ಅಪಚಾರ ಪ್ರಕರಣನೇ ಸಾಕ್ಷಿ. ಇಂಚಿತ್ತಿ ತುಳುನಾಡ ಜನೊಕುಲು ತುಳು ಬಾಸೆಗ್ ರಾಷ್ಟ್ರ ಮಾನಾದಿಗೆ ತಿಕ್ಕೊಡು ಪನ್ಪಿನ ಪೊರ್oಬಾಟೊಡು ಪಾಲ್ ಪಡೆವರೆ ದಾಯೆ ಬಲ್ಲಿ? ಅಂದ್ ತುಳುಮಣ್ಣ್ ದ ಋಣ ಸಂದಾವೊಡ್ಡ ನಮ್ಮ ಪೊರ್‌ಂಬಾಟ, ಮಲ್ಪೊಡೆ , ಅನ್ಯಾಯೊನು ಎದುರಿಸಾವೊಡೆ. ಆಂಡ ಈ ನಮ್ಮ ತಾಮರೆದ ಎಸಲ್‌ದಂಚಿನ ಪೊರ್ಲ ಬಾಸೆ ತುಲುಕ್ಕು ರಾಜ ಮರ್ಯಾದೆ ತಿಕ್ಕೊಡು , ಇಡೀ ದೇಶನೇ ಬೊಮ್ಮಾನ್ಯೂಡು . ಆಯಿಕ್ಕಾದೇ ಒಂಜೆ ಅವಕಾಶ ಇತ್ತೆ ಒದಗ್ ದ್ ಬೈದ್‌ಂಡ್, ಅವು ದಾದ ಪಂಡ ತುಳು ಬಾಸೆಗ್ ಕರ್ನಾಟಕ ಬೊಕ್ಕ ಕೇರಳೊಡು ರಾಜ್ಯ ಬಾಸೆದ ಮಾನಾದಿಗೆ ತಿಕ್ಕೊಡು ಪಂಡ್‌ದ್ ಜಗತ್ತ್ ದಾದ್ಯಂತ ಟ್ವಿಟ್ಟರ್ ಅಭಿಯಾನ ಸುರುವಾತ್‌ಂಡ್.

ಜೈ ತುಳುನಾಡ್ ಸಂಸ್ಥೆ ಟ್ವಿಟ್ ತುಳುನಾಡ್ ಪನ್ನಿನ ಅಭಿಯಾನೊನು ಸುರು ಐತಾರದಾನಿ (ಜೂನ್ (13) ತಾರೀಖ್ ದಾನಿ ಕಾಂಡೆ 6 ಗಂಟೆರ್‌ದ್ ರಾತ್ರಿ 11.59 ಮುಟ್ಟ ಟ್ವಿಟ್ ಮಲ್ಪೊಲಿ.

ಟ್ವೀಟ್ ಮಲ್ಪುನಗ #TuluOfficialinKA_KL ಹ್ಯಾಶ್ ಟ್ಯಾಗ್ ಪಾಡೊಡು, ನಿಕ್ಲೆನ ತಾಲೂಕುದ ಗ್ರೂಪ್‌ಡ್ ಉದಾರ್ಮೆಗ್ ಬೊಲ್ತೆರ್ , ಕುಡ್ಲ, ಕಾರ್ಲ, ಕಾಸ್ರೋಡ್ , ಗಲ್ಫ್ ಕಂಟ್ರಿಸ್ ಇಂಚ ಆಯಾ ಗ್ರೂಪ್‌ ಮುಖೆನ ಟ್ವಿಟ್ ಮಲ್ವುಲೆ ಪಂಡ್‌ದ ಸಂಘಟನೆದಕುಲು ತೋಜಪಾಯೆರ್.ಅಪ್ಪೇ ಬಾಸೆದ ವಿಚಾರಗು ಬನ್ನಗ ಯಾನೊರಿ ತುಳುವ ಪನ್ಪಿನ ಇರಾದೆಡ್ ಯುವ ಕಲಾವಿದೆರ್ ಮಾತ ಟ್ವಿಟ್ಟರ್ ಅಭಿಯಾನೊಗು ಬೆರಿ ಬಲ ಕೊರ್ರೆ ತಯಾರಾವೊನ್ದುಲ್ಲೆರ್, ಈ ವಿಚಾರೊಡು ಸೋಶಿಯಲ್ ಮೀಡಿಯಾಡ್ ಬಾರಿ ಬೆರಿಬಲ ಬರೊಂದು ಉಂಡು. ಊರು ಪರವೂರುದ ಮಾತಾ ತುಲು ಸಂಘಟನೆಲು ನೆಕ್ಕ್ ಬೆರಿಬಲ ಕೊರೊಡು.

ಕತಾರ್ ದ ಮಣ್ಣ್ ಡ್ ತುಳುಕೂಟದ ಆಶ್ರಯೊಡು ವಿಶ್ವ ಪರಿಸರ ದಿನಾಚರಣೆ

ದೋಹಾ ಕತಾರ್ : ತುಳು ಕೂಟ , ಕತಾರ್ ಉಂದೆತ್ತ ಆಶ್ರಯೊಡು ಇಂಚೊಗು ವಿಶ್ವ ಪರಿಸರ ದಿನಾಚರಣೆ ಕೂಟದ ಗುರ್ಕಾರ್ದಿ ಚೈತಾಲಿ ಉದಯ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಕೋವಿಡ್ ನಿಯಮಾವಳಿ ಪ್ರಕಾರ ನಡತ್ಂಡ್.’ಜಾಯ್ ಆಫ್ ಗಿವಿಂಗ್'(ದಾನ ಕೊರ್ಪಿನೆಟ್ಟುಪ್ಪುನ ಕುಸಿ) ವೀಕ್ ‘ ಪನ್ಪಿನ ಪರಿಕಲ್ಪನೆಡ್ ಏಳ್ ದಿನ ಲೇಸ್ ನಡತ್ಂಡ್.

ಈ ಲೇಸ್ ಪ್ರಕೃತಿ ಬೊಕ್ಕ ಪರಿಸರೊನು ಮೋಕ್ಯೆ ಮಲ್ಪುನಕ್ಲೆನ್ ಒಟ್ಟು ಮಲ್ಪಾವುನತ್ತಾವಂದೆ ಸದ್ಯದ ಸಂಕಷ್ಟದ ಕಾಲೊಡು ದಾನ, ಸಹಾಯ ಮಲ್ಪುನೆತ್ತ ಬಿಲೆತ್ತ ವಿಚಾರೊಡು ಚಿಂತನೆ ಮಲ್ಪುನೆಕ್ಕ್ ಸಾಕ್ಷಿ ಆಂಡ್.ಈ ವಾರೊಡು ಕೂಟದ ಸದಸ್ಯೆರ್ ಅಕ್ಲೆನ ಇಷ್ಟದ ಗಿಡೊಕ್ಲೆನ್ ಪಗತೊಂಡೆರ್. ಅಂಚೆನೆ ಕೂಟದ ಲೆಕ್ಕೊಡು ಸದಸ್ಯೆರೆಗ್ ‘ಭಗೀರ ‘ ಪನ್ಪಿನ ಪುದರ್ ದ ದೈಕ್ಲೆನ್ ಪಟ್ಟಿಯೆರ್. ಸಪ್ತಾಹದ ಮುಗಿತಲದ ಲೇಸ್ ಜೂನ್ 5ನೇ ತಾರೀಕಿ ಗ್ ಕತಾರ್ ದ ಕತಾರ್ ಫಿನ್ ಲ್ಯಾಂಡ್ ಇಂಟರ್ ನ್ಯಾಷನಲ್ ಸ್ಕೂಲ್ ನ ವಠಾರೊಡು ಐಸಿಬಿಎಫ್ ಬೊಕ್ಕ ಕರ್ನಾಟಕ ಮೂಲದ ಬೇತೆ ಬೇತೆ ಸಂಘಟನೆಲೆನ ಗುರ್ಕಾರ್ಲು ಬೊಕ್ಕ ಬಿನ್ನೆರೆನ ಎದುರುಡು ದೈ ನಡ್ಪಿನ ಮೂಲಕ ನಡತ್ಂಡ್. ಕುಡ್ಲದ ಟೆರೆಸ್ ಗಾರ್ಡನ್ ತಜ್ಞೆರ್ ಬ್ಲಾನಿ ಡಿಸೋಜಾ ಮೆರೆನ ಒಟ್ಟುಗು ಝೂಮ್ ಡ್ ಪಾತೆರಕತೆಲ ಇತ್ತ್ಂಡ್.ಕತಾರ್ ದ ಉಷ್ಣ ಹವಾಮಾನೊಡ್ಲ ಮಲ್ಪೊಡಾಯಿನ ತೋಟಗಾರಿಕೆದ ಮಾಹಿತಿ ಪಟ್ಟೊಂಡೆರ್.ಕತಾರ್ ದ ಬೇತೆ ಬೇತೆ ಒಕ್ಕೂಟೊಲೆನ ಸಾಲ್ ಡ್ ಸುರುತ್ತ ಪಂತೆಡುಪ್ಪುನ ತುಳುಕೂಟ ಕತಾರ್, ಕೆಲವು ವರ್ಸೊರ್ದಿಂಚಿ ಮಸ್ತ್ ಸಮಾಜಮುಖಿ ಯೋಜನೆಲೆನ್ ಯಶಸ್ವಿಯಾದ್ ಮಲ್ತೊಂದು ಬತ್ತ್ ದ್ ಪರಿಸರ ಸಂರಕ್ಷಣೆಗೆ ಮಲ್ಲ ಕೊಡುಗೆ ಕೊರೊಂದುಂಡು. ಸದಸ್ಯೆರೆಗ್ ಕೊರ್ತಿನ ಭಗೀರ ದೈಕ್ಲೆನ್ ಮೂಜಿ ತಿಂಗೊಲು ಪೊರ್ಲುಡೆ ಸಾಂಕ್ಂಡ ಅವೆಕ್ಕ್ ಪ್ರತಿಯಾದ್ ಕುಡೊಂಜಿ ಭಗೀರ ದೈ ಕೊರ್ಪ ಪಂಡ್ ದ್ ತುಳು ಕೂಟದ ಗುರ್ಕಾರ್ದಿ ಪಂಡೆರ್.

ತುಲುನಾಡ್ ಗಾಯಿನ ಅಪಚಾರದ ಬಗ್ಗೆ ಸೊರೊ ದೆತ್ತಿನ ಕೇರಳ ತುಲು ಅಕಾಡೆಮಿದ ಗುರ್ಕಾರ್ಲು

ಕೇರಳ : ತುಲು ಭಾಸೆಗ್, ತುಲು ಸಂಸ್ಕೃತಿಗ್ ಅಪಚಾರ ಮಲ್ಪುನವು ಮಾಮಲ್ಲ ತಪ್ಪು. ಈ ರೀತಿಡ್ ತುಲು ಸಂಸ್ಕೃಗ್ ಅಪಚಾರ ಮಲ್ತುಂಡ ಏರ್ ಆಂಡಲಾ ಅಕ್ಲೆಗ್ ತಕ್ಕ ಕಾನೂನು ಕ್ರಮ ದೆತೊನೊಡು ಪಂದ್, ಒವ್ವೆ ಸಂಸ್ಕೃತಿ ಆವಡ್ ಒವು ಭಾಷೆನೆ ಆವಡ್ ಸಂಸ್ಕೃತಿಗ್ ವಿರುದ್ಧವಾಯಿನ ಬೇಲೆ ಮಲ್ಪರೆ ಬಲ್ಲಿ ಇಂದು ಕಾನೂನು ಪ್ರಕಾರ ಅಪರಾಧ ಪಂದ್ ನೆಕ್ಕ್ ತಕ್ಕ ಕ್ರಮ ದೆತೊನೊಡು ಪಂದ್ ಕೇರಳ ತುಲು ಅಕಾಡೆಮಿದ ಗುರ್ಕಾರ್ಲಾಯಿನ ಉಮೇಶ್ ಶಾಲಿಯಾನ್ಆಗ್ರಹ ಮಲ್ತೆರ್ .