ಬೆದ್ರದ ಸುದ್ದಿ | Moodbidri News

ಮೂಡುಬಿದಿರೆ ಶ್ರೀ ಮಹಾವೀರ ಪ್ರಥಮ ದರ್ಜೆ ಕಾಲೇಜ್ ದ ರಾಷ್ಟ್ರೀಯ ಸೇವಾ ಘಟಕರ್ದ್ ರಡ್ಡ್ ದಿನತ ಪ್ರವಾಸ ಬೊಕ್ಕ ಸ್ವಚ್ಛತಾ ಕಾರ್ಯಕ್ರಮ

ಮೂಡಬಿದ್ರೆ ದ ಶ್ರೀ ಮಹಾವೀರ ಪ್ರಥಮ ದರ್ಜೆ ಕಾಲೇಜ್ ದ ರಾಷ್ಟ್ರೀಯ ಸೇವಾ ಯೋಜನೆದ ಜೋಕುಲು ಮಾರ್ಚ್ 6 ಬೊಕ್ಕ 7 ತಾರೀಖ್ ಗ್ ರಡ್ಡ್ ದಿನತ ಶೈಕ್ಷಣಿಕ ಪ್ರವಾಸ ಬೊಕ್ಕ ಸ್ವಚ್ಛತಾ ಕಾರ್ಯಕ್ರಮಟ್ ಪಾಲ್ ಪಡೆಯೆರ್.

ಚಿಕ್ಕಮಗಳೂರುದ ಕಳಸ ಗ್ರಾಮಪಂಚಾಯತ್ ವ್ಯಾಪ್ತಿದ ಅರಮನೆ ಮಕ್ಕಿ ಮೈದಾನ , ಪ್ರವಾಸಿ ತಾಣವಾಯಿನ ಅಂಬಾ ತೀರ್ಥಡ್ ಸ್ವಚ್ಛತಾ ಕಾರ್ಯಕ್ರಮ ನಡಪಾಯೆರ್ ಈ ಪೊರ್ತುಡು ಗ್ರಾಮ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಗ್ರಾಮ ಪಂಚಾಯತ್ ಗುರ್ಕಾರ್ಲು ಪಾಲ್ ಪಡೆಯೆರ್ ಈ ಲೇಸ್ ಸಾರ್ವಜನಿಕೆರ್ನ ಪ್ರಶಂಸೆ ಗ್ ಪಾತ್ರ ಆಂಡ್. ಮೂಡಬಿದ್ರೆ ರ್ದ್ ಪಿದಾಡಿನ ಈ ಕೂಟಗ್ ಪರ ವಿದ್ಯಾರ್ಥಿ ಸಂಘದ ಗುರ್ಕಾರ್ಲಾಯಿನ ಶ್ರೀ ನಾಗರಾಜ್ ಧ್ವಜ ಪಾರಾವುನ ಮುಖೇನ ಎಡ್ಡೆಪ್ಪುನು ಬಯಕಿಯೆರ್.

ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಡಾ ರಾಧಾಕೃಷ್ಣ ಶೆಟ್ಟಿ,ಪರ ವಿದ್ಯಾರ್ಥಿ ಸಂಘದ ಸಂಘದ ಕೋಶಾಧಿಕಾರಿ ಪ್ರಸನ್ನ ಶೆಣೈ ಪಾಲ್ ಪಡೆದ್ ಇತ್ತೆರ್.ಜೋಕ್ಲೆನ ಒಟ್ಟುಗು ಯೋಜನಾಧಿಕಾರಿ ಶ್ರೀ ಬಸನಗೌಡ ಪಾಟೀಲ್, ಪ್ರಾಧ್ಯಾಪಕರಾಯಿನ ಶ್ರೀ ಶಿವಪ್ರಸಾದ್, ಶ್ರೀಮತಿ ವಿನುತಾ ಶ್ರೀಮತಿ ವರ್ಷಿತಾ ಪಾಲ್ ಪಡೆದಿತ್ತೆರ್.ರಾಷ್ಟ್ರೀಯ ಸೇವಾಯೋಜನೆದ ಕಾರ್ಯದರ್ಶಿಲಾಯಿನ ಪ್ರಜ್ವಲ್ ಶೆಣೈ ಬೊಕ್ಕ ನಿಕ್ಷಿತ ಲೇಸ್ ಅಟ್ಟನೆ ಮಲ್ತೆರ್.

ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಶಿವರಾತ್ರಿಗ್ ಪಾದಯಾತ್ರಿಲೆನ ಆಗಮನ

ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ರಾಜ್ಯದ ಬೇತೆ ಬೇತೆ ಜಾಗೆರ್ದ್ ಪಾದಯಾತ್ರಿಲಾದ್ ಬರೊಂದು ಉಪ್ಪುನ ಭಕ್ತೆರ್ ಶ್ರೀಪರಶುರಾಮ ದೇವಳಗ್ ಬತ್ದ್ ಸಾಮೂಹಿಕ ಭೋಜನ ಮಲ್ತ್ ದ್ ಸ್ವೀಕಾರ ಮಲ್ತ್ ದ್ ವಿಶ್ರಾಂತಿ ಪಡೆದ್ ಬೊಕ್ಕ ಧರ್ಮಸ್ತಳಗ್ ಪೋಪೆರ್. ಈ ವರ್ಷ ಅತೀ ಕಡಿಮೆ ಸಂಖ್ಯೆಡ್ ಭಕ್ತೆರ್ ಬೈದೆರ್. ಸುಮಾರ್ 25 ವರ್ಷರ್ದ್ ಸಾಮಾನ್ಯವಾದ್ 10000 ಜನ ಬರೊಂದು ಇತ್ತೆರ್ ಈ ವರ್ಷ 1500-2000 ಜನ ಉಲ್ಲೆರ್.

ಪೊಲಬು : ವೆಂಕಟೇಶ್

ಗೌಜಿಡ್ ನಡತ್ಂಡ್ ನಂದಾರದ ತೇರ್

ಬಂಟ್ವಾಳ: ಬಂಟ್ವಾಳ ತಾಲೂಕುದ ಪ್ರಸಿದ್ಧ ಪುಣ್ಯಕ್ಷೇತ್ರವಾಯಿನ ನಂದಾವರ ಶ್ರೀ ವಿನಾಯಕ ಶಂಕರನಾರಾಯಣ ದುರ್ಗಾಂಬ ದೇವಸ್ಥಾನದ ವಾರ್ಷಿಕ ಜಾತ್ರಾ ಮಹೋತ್ಸವದ ಪರವಾದ್ ಮಹಾರಥೋತ್ಸವ ಅಂಗಾರೆ ರಾತ್ರೆ ನಡತುಂಡು.

ಫೆ.27 ತಾರೀಖ್ ಗ್ ಧ್ವಜಾರೋಹಣ ಮುಖೇನ ಸುರು ಆಯಿನ ಉತ್ಸವ, 28 ತಾರೀಖ್ ಗ್ ಬಯನ ಬಲಿ ಉತ್ಸವ, ಸೋಮವಾರ ನಡುಬಲಿ ಬೊಕ್ಕ ಪಾಲಕಿ ಉತ್ಸವ ನಡತುಂಡು . ಅಂಗಾರೆ ಮಹಾ ರಥೋತ್ಸವ ನಡತುಂಡು . ಈ ಪ್ರಯುಕ್ತ ಬೈಯ್ಯ 5 ಗಂಟೆಗ್ ಭಜನೆ ಸಂಕೀರ್ತನೆ ಬೊಕ್ಕ ಭಾಗವತ ಪ್ರವಚನ ನಡತುಂಡು . ರಾತ್ರಿ ಶ್ರೀ ದೇವೆರೆ ಮಹಾರಥೋತ್ಸವ ಬಾರಿ ಗೌಜಿಡ್ ನಡತುಂಡು. ಬುಧವಾರ ಶ್ರೀ ನಾಲ್ಕೆತ್ತಾಯ ದೈವದ ನೇಮ ನಡತುಂಡು . ಕ್ಷೇತ್ರದ ಸೇವಾ ಸಮಿತಿ ಗುರ್ಕಾರ್ಲಾಯಿನ ಅರವಿಂದ ಪದ್ಯಾಣ, ಮಾಜಿ ಗುರ್ಕಾರ್ಲಾಯಿನ ಎ.ಸಿ.ಭಂಡಾರಿ, ಸೇವಾ ಸಮಿತಿ ಸದಸ್ಯೆರ್ ಊರ, ಪರವೂರ ಭಕ್ತಾಭಿಮಾನಿಲು ಪಾಲ್ ಪಡೆದಿತ್ತೆರ್ . ಪ್ರಧಾನ ಅರ್ಚಕೆರಾಯಿನ ವೇ.ಮೂ.ಮಹೇಶ ಭಟ್ ಮುತಾಲಿಕೆಡ್ ಪೂಜಾ ವಿಧಿ ವಿಧಾನಲು ನಡತುಂಡು. ಕೋವಿಡ್ ಹಿನ್ನೆಲೆಡ್ ಈ ಸಲ ಬಾರಿ ಸರಳವಾದ್ ಜಾತ್ರೆ ನಡತುಂಡು.