Sun. Nov 22nd, 2026

ಪುತ್ತೂರ್ದ ಸುದ್ದಿ | Puttur News

ಕುಡ್ಲಡ್ ಪ್ರವಾಸಿ ಬಸ್ ಸುರು ಮಲ್ಪರೆ ಅಗ್ರಹ

ಕುಡ್ಲ, ಜುಲೈ 29: ಪೇಂಟೆದ ಬೇತೆ ಬೇತೆ ಪ್ರವಾಸಿ ತಾಣದ ವೀಕ್ಷಣೆಗ್ ಅನುಕೂಲ ಆಪಿನ ನೆಲೆಟ್ಟ್ ‘ಪ್ರವಾಸಿ ಬಸ್’ ಸೇವೆನ್ ಕುಡ ಶುರು ಮಲ್ಪೊಡು ಪನ್ಪಿನ ಅಗ್ರಹ ಪ್ರವಾಸಿಗೆರೆರ್ದ್ ಕೇಂದ್ ಬೈದುಂಡು .

2016 ನೆ ಎ.17ಕ್ಕ್ ಆನಿದ ಪ್ರವಾಸೋದ್ಯಮ ಸಚಿವ ಆರ್.ವಿ.ದೇಶಪಾಂಡೆ ಪಿಲಿಕುಳಡ್ ಪ್ರವಾಸಿ ಬಸ್‌ಗ್ ಚಾಲನೆ ಕೊರ್ದು ಇತ್ತೆರ್ . ಸುರು ಕೆಲವು ದಿನ ಬಸ್ ಕ್ ಪ್ರವಾಸಿಗೆರೆರ್ದ್ ಬಾರಿ ಎಡ್ಡೆ ಸ್ಪಂದನೆ ತಿಕ್ಕ್ ದುಂಡು . ಆಂಡ ವರ್ಷದುಲಯಿ ಬಸ್‌ದ ಬಿಡಿಭಾಗ ಹಾಳ್ ಆಯಿನೆರ್ದಾವರ ಈ ವ್ಯವಸ್ಥೆ ಕುಡ ಉಂತಾಯೆರ್ ಪಂದ್ ಪ್ರಕಟಣೆಡ್ ತೆರಿಪಾಯೆರ್.

ಆಟೋ ರಿಕ್ಷಾ ಪಲ್ಟಿ : ಏಳ್ ಜನಕ್ ಗಾಯ

ಬಂಟ್ವಾಳ: 7ರ್ದ್ ಜಾಸ್ತಿ ಜನ ಪ್ರಯಾಣಿಕೆರ್ ಇತ್ತಿನ ಆಟೋ ರಿಕ್ಷಾ ಪಲ್ಟಿ ಆದ್ ಒರಿ ತೀರ್ ಪೋಯಿನ ಘಟನೆ ಮಣಿಹಳ್ಳ ಸರಪಾಡಿ ಮಾರ್ಗದ ಪೆರಿಯಪಾದೆ ಪನ್ಪಿ ಜಾಗೆಡ್ ನಡತುಂಡು.

ವಲೆಂಗೂರು ನಿವಾಸಿ ಫ್ರಾನ್ಸಿಸ್ ಸುವಾರಿಸ್ (85) ತೀರ್ ಪೋಯಿನ ದುರ್ದೈವಿ. ಘಟನೆಡ್ ರಡ್ಡ್ ಜನಕ್ ಇಬ್ಬರು ಗಂಭೀರ ಗಾಯಲ್ ಆದ್ ಕುಡ್ಲದ ಖಾಸಗಿ ಆಸ್ಪತ್ರೆ ಗ್ ದಾಖಲಾತೆರ್.

ಹೃದಯಘಾತರ್ದ್ ತೀರ್ ಪೋಯಿನ ನಟಿ ವಿನ್ನಿ ಫೆರ್ನಾಂಡಿಸ್

ಕುಡ್ಲ , ಜುಲೈ, 29: ಕನ್ನಡ, ತುಳು, ಬೊಕ್ಕ ಕೊಂಕಣಿ ಕಲಾ ಕ್ಷೇತ್ರಡ್ ಇತ್ತಿನ ನಟಿ ವಿನ್ನಿ ಫೆರ್ನಾಂಡಿಸ್ ಜುಲೈ 29 ನೆ ಗುರುವಾರ ಹೃದಯಘಾತರ್ದ್ ತೀರ್ ಪೋಯೆರ್ . ಮೆರೆಗ್ 63 ವರ್ಷ ಪ್ರಾಯ ಆತುಂಡು .

ಕನ್ನಡ, ತುಳು ಬೊಕ್ಕ ಕೊಂಕಣಿ ಚಲನಚಿತ್ರಡ್ ನಟನೆ ಮಲ್ದಿನ ಮೇರ್ ಕನ್ನಡ ಬೊಕ್ಕ ಕೊಂಕಣಿ ಧಾರಾವಾಹಿಡ್ ಲಾ ನಟನೆ ಮಲ್ದೆರ್. ಕೊಂಕಣಿ ನಾಟಕದ ಪಾತ್ರದೊಟ್ಟುಗು ನಟನಾ ವೃತ್ತಿಜೀವನನ್ ಸುರು ಮಲ್ತಿನ ಮೇರ್ ತುಳು ಬೊಕ್ಕ ಕನ್ನಡ ನಾಟಕಡ್ ಅಭಿನಯ ಮಲ್ದೆರ್ .

ಒಲಿಂಪಿಕ್: ಕ್ವಾರ್ಟರ್ ಫೈನಲ್ ಮುಟ್ಟಿನ ಸಿಂಧು

ಟೋಕಿಯೊ: ಭಾರತೀಯ ಬ್ಯಾಡ್ಮಿಂಟನ್ ತಾರೆ ಪಿ.ವಿ.ಸಿಂಧು ಟೋಕಿಯೊ ಒಲಿಂಪಿಕ್ಸ್ ದ ಕ್ವಾರ್ಟರ್ ಫೈನಲ್ ಮುಟ್ಟುದೆರ್ . ಪ್ರೀ ಕ್ವಾರ್ಟರ್ ಫೈನಲ್ ಡ್ ಡೆನ್ಮಾರ್ಕ್ ನ ಮಿಯಾ ಬ್ಲಿಕ್ ಫೆಲ್ಟ್ ಮೆರೆನ್ ಸೋಪಾಯೆರ್.

‘ಐ’ ವಿಭಾಗದ ಅಗ್ರಸ್ಥಾನಿಯಾಯಿನ ಮಿಯಾ ಬ್ಲಿಕ್ ಫೆಲ್ಟ್ ಮೆರೆನ್ 21-15, 21-13 ಸೆಟ್ ದ ಅಂತರಡ್ ಸೋಪಾಯೆರ್. ನೆತ್ತೋಟ್ಟುಗು ಥಾಯ್ಲೆಂಡ್ ಓಪನ್ ಡ್ ಬ್ಲಿಕ್ ಫೆಲ್ಟ್ ವಿರುದ್ಧದ ಸೋಲುಗು ಸಿಂಧು ಒಲಿಂಪಿಕ್ಸ್ ಡ್ ತಿರುಗೇಟು ಕೊರಿಯೆರ್ .

ಪಾಲಿಕೆ ಸಭೆಟ್ ತುಲುಪರ ಮೋಕೆ ತೋಜಾಯಿನ ಶ್ರೀ ವರುಣ್ ಚೌಟ

ಕುಡ್ಲ, ಜುಲೈ 29: ಕುಡ್ಲ ಮಹಾನಗರ ಪಾಲಿಕೆಡ್ ನಡತಿನ ಸಭೆಟ್ ಪಾಲ್ ಪಡೆಯಿನ ಪಾಲಿಕೆದ ಪದುಕೆರಾಯಿನ ಶ್ರೀ ವರುಣ್ ಚೌಟ ಕೇಪುಲ ರಂಗ್ ದ ತುಲುನಾಡ ಸಾಲ್ ಪಾಡೊಂದು ತುಲು ಪರ ಮೋಕೆ ತೂಜಾಯಿನ ಶ್ಲಾಘನೀಯ.

ಶ್ರೀ ವರುಣ್ ಚೌಟ ಮೆರೆನ ಬಿನ್ನಾಪುದ ಮಿತ್ತ್ ತುಲು ಲಿಪಿತ ಪೊಲಬು ಮಲ್ಪುನೆತ್ತ ಒಟ್ಟುಗು ತುಳು ಭಾಷೆನ್ 8ನೇ ಪರಿಚ್ಛೇದಗ್ ಸೇರಾವುನ ಬಗ್ಗೆ ರಾಜ್ಯ ಸರಕಾರಗ್ ಪ್ರಸ್ತಾವನೆನ್ ಸಲ್ಲಿಸಾದೆರ್.

ಪಂಚ ದ್ರಾವಿಡ ಭಾಷೆಡ್ ಒಂಜಾಯಿನ ತುಳು ಭಾಷೆನ್ 8ನೆ ಪರಿಚ್ಛೇದಗ್ ಸೇರಾವುನ ಆಗ್ರಹ ಕೆಲವು ದಶಕರ್ದ್ ಕೇಂದ್ ಬರೊಂದು ಉಂಡು ಆಂಡ ಆ ಹೋರಾಟಗ್ ನನಲ ನ್ಯಾಯ ತಿಕ್ಕಿಜಿ . ಇಂಚೋಗು ಸೋಶಿಯಲ್ ಮೀಡಿಯಾ ಮುಖೇನ ತುಲು ನಾಡ್ ದ ಜನಕುಲು ಸೊರ ಲಕ್ಕಾದೆರ್. ನೆಕ್ಕ್ ಸಾಕ್ಷಿಯಾದ್ ಜೂನ್ 13, 2021ಕ್ಕ್ ಟ್ವಿಟರ್‌ಡ್#Tuluto8thsehedule#TuuOfficial inKA-KL ಪಂದ್ ಟ್ವಿಟರ್ ಅಭಿಯಾನಡ್ ಲಕ್ಷ ಲಕ್ಷ ತುಳು ಭಾಷೆ ಪ್ರೇಮಿಲು ದೇಶ ವಿದೇಶರ್ದ್ ಪ್ರತಿಕ್ರಿಯೆ ಕೊರ್ತೆರ್ .ಈ ಬಗ್ಗೆ ಮಂಗಳೂರು ಮಹಾನಗರ ಪಾಲಿಕೆ ಡ್ ತುಳು ಲಿಪಿತ ಪೊಲಬು ಮಲ್ತಿನ ಮೆರ್ನ ಕಾರ್ಯ ಶ್ಲಾಘನೀಯ.

 

ಜಮಾಅತೆ ಇಸ್ಲಾಮಿ ಹಿಂದ್ ವತಿರ್ದ್ ವೃದ್ಧಾಶ್ರಮಗ್ ವನಸ್ದ ವ್ಯವಸ್ಥೆ

ಉಳ್ಳಾಲ: ಜಮಾಅತೆ ಇಸ್ಲಾಮಿ ಹಿಂದ್ ಸ್ತಾನಿದ ಶಾಖೆ ನೆತ್ತ ಒಟ್ಟು ಸೇರಿಗೆಡ್ ಈದುಲ್ ಅಝ್‌ಅ ಪ್ರಯುಕ್ತ ಒಲವಿನ ಹಳ್ಳಿ ವೃದ್ಧಾಶ್ರಮಡ್ ಉಪ್ಪುನ ಪ್ರಯಾದಕ್ಲೆಗ್ ಮಧ್ಯಾಹ್ನದ ವನಸ್ ದ ವ್ಯವಸ್ಥೆ ಮಲ್ತೆರ್.

ಮಸ್ಜಿದುಲ್ ಹುದಾ ಗುರ್ಕಾರ್ಲಾಯಿನ ಇಸ್ಮಾಯಿಲ್ ಸಾಗರ್ ಕಾರ್ಯಕ್ರಮದ ಗುರ್ಕಾರ್  ವಹಿಸಿಯೆರ್. ಜಮಾಅತೆ ಇಸ್ಲಾಮಿ ಹಿಂದ್ ಉಳ್ಳಾಲದ ಗುರ್ಕಾರ್ಲಾಯಿನ ಅಬ್ದುಲ್ ಕರೀಂ, ಸಮಾಜ ಸೇವಾ ಉಳ್ಳಾಲ ಘಟಕದ ಗುರ್ಕಾರ್ಲಾಯಿನ ಇಸ್ಹಾಕ್ ಹಸನ್, ಬೊರ್ಡ್ ಆಫ್ ಇಸ್ಲಾಮಿಕ್ ಸೆಂಟರ್ ಗುರ್ಕಾರ್ಲಾಯಿನ ಅಬ್ದುಲ್ ರಹೀಂ ಪಾಲ್ ಪಡೆದಿತ್ತೆರ್.

ಯುಎಫ್‌ಸಿ ಪುಸ್ತಕ ಭಂಡಾರರ್ದ್ ಪಠ್ಯಪುಸ್ತಕ ಪಟ್ಟುನ ಲೇಸ್

ಉದ್ಯಾವರ, ಜುಲೈ 29: ಜೋಕುಲು ತಮ್ಮ ವಿದ್ಯಾರ್ಥಿ ಜೀವನಡ್ ತಿಕ್ಕುನ ಅವಕಾಶಲೆನ್ ತಾಳ್ಮೆಡ್ ಪಡೆದ್ ಐತ ಸದುಪಯೋಗ ಪಡೆಯೋಡು . ಈ ಮುಖೇನ ಜೀವನಡ್ ಯಶಸ್ ಸಾಧಿಸಾವೊಲಿ ಪಂದ್ ಉದ್ಯಾವರ ಸರಕಾರಿ ಪದಪೂರ್ವ ಕಾಲೇಜ್ ದ ಪ್ರಾಂಶುಪಾಲ ಕೃಷ್ಣಮೂರ್ತಿ ಪಂಡೆರ್.

ಉಡುಪಿ ಜಿಲ್ಲಾ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸೇವಾ ಬೊಕ್ಕ ಸಾಂಸ್ಕೃತಿಕ ವೇದಿಕೆ ಉದ್ಯಾವರ ಫ್ರೆಂಡ್ಸ್ ಸರ್ಕಲ್ ಆಶ್ರಯದ ಯುಎಫ್‌ಸಿ ಪುಸ್ತಕ ಭಂಡಾರರ್ದ್ ಪದವಿ ಪೂರ್ವ ಕಾಲೇಜ್ ದ ಜೋಕ್ಲೆಗ್ ಪಠ್ಯಪುಸ್ತಕ ಕೊರ್ದು ಆರ್ ಪಾತೆರಿಯೆರ್.

ಉಳ್ಳಾಲಡ್ ಹನಿಟ್ರ್ಯಾಪ್ : ರಡ್ಡ್ ಆರೋಪಿಲೆನ ಬಂಧನ

ಕುಡ್ಲ, ಜುಲೈ 29: ಉಳ್ಳಾಲ ಪೊಲೀಸ್ ಠಾಣಾ ವ್ಯಾಪ್ತಿಡ್ ವ್ಯಕ್ತಿಯೊರಿನ್ ಹನಿಟ್ರ್ಯಾಪ್ ಮಲ್ತಿನ ಪ್ರಕರಣಗ್ ಸಂಬಂಧಿ ಪೊಂಜೊವ್ ಸೇರಿನಂಚ ರಡ್ಡ್ ಆರೋಪಿಲೆನ್ ಬಂಧನ ಮಲ್ತಿನ ಬಗ್ಗೆ ಕುಡ್ಲ ನಗರ ಪೊಲೀಸ್ ಆಯುಕ್ತ ಎನ್. ಶಶಿಕುಮಾರ್ ಪಂಡೆರ್ .

ಕುಡ್ಲಡ್ ತ್ಯಾಜ್ಯ ಘಟಕ ಸ್ಥಾಪನೆಗ್ ಮೂಜಿ ತಿಂಗೊಲ್ದ ಗಡು

ಕುಡ್ಲ : ‘ಮಹಾನಗರ ಪಾಲಿಕೆ ವ್ಯಾಪ್ತಿದ ಬೃಹತ್‌ ಪ್ರಮಾಣಡ್ ತ್ಯಾಜ್ಯ ಉತ್ಪಾದನೆ ಮಲ್ಪುನಕುಲು , ಕಟ್ಟಡದ ಗುರ್ಕಾರ್ಲು ಪಜಿ ಕಜವುನು ಜಾಗೆಡೆ ಸಂಸ್ಕರಣೆ ಮಲ್ಪರೆ ಮೂಜಿ ತಿಂಗೊಲ್ ಡು (ಅಕ್ಟೋಬರ್‌ 31) ನಿವೇಶನಡೇ ಸ್ವಂತ ತ್ಯಾಜ್ಯ ಸಂಸ್ಕರಣ ಕಾಂಪೋಸ್ಟಿಂಗ್ ಘಟಕನ್ (ಆನ್‌ ಸೈಟ್‌ ಕಂಪೋಸ್ಟಿಂಗ್‌ ಯೂನಿಟ್‌) ಕಟ್ಟೋಡು ಪಂದ್ ‘ ಪಾಲಿಕೆ ಆಯುಕ್ತ ಅಕ್ಷಯ್‌ ಶ್ರೀದರ್‌ ಅಂತಿಮ ಗಡುವು ಕೊರಿಯೆರ್ .

ಪಾಲಿಕೆದ ಮಂಗಳಾ ಸಭಾಂಗಣಡ್ ಆಯುಕ್ತರ ಗುರ್ಕಾರ್ಮೆಡ್ ಕಟ್ಟಡ ಮಾಲೀಕೆರ್ , ಸಂಸ್ಥೆಲು , ಭಾಗೀದಾರ(ಸ್ಟೇಕ್‌ ಹೋಲ್ಡರ್‌)ದ ತ್ಯಾಜ್ಯ ವಿಲೇವಾರಿ ಘಟಕ ಸ್ಥಾಪನೆ ಪ್ರಗತಿದ ಬಗ್ಗೆ ಅಂಗಾರೆ ನಡತಿನ ವಿಚಾರಣಾ ಸಭೆಟ್ ಆರ್ ಪಾತೆರಿಯೆರ್.

ಕಾರ್ಯಂತೆರೆ ಬಿಜೆಪಿ ಪಕ್ಷದ ಜೀವಾಳ : ಸುರೇಶ್ ನಾಯಕ್ ಕುಯಿಲಾಡಿ

ಒಡಿಪು, ಜುಲೈ 29: ಬಿಜೆಪಿ ಕಾರ್ಯಕರ್ತ ಆಧಾರಿತ ಬಾರಿ ಮಲ್ಲ ರಾಜಕೀಯ ಪಕ್ಷ. ಕಾರ್ಯಂತೆರೆ ಪಕ್ಷದ ಜೀವಾಳ. ಪಕ್ಷದ ಕಾರ್ಯಂತೆರ್ನ ಅವಿರತ ಶ್ರಮದ ಫಲವಾದ್ ಒಡಿಪುಡು ಬಿಜೆಪಿದ ಬೇರು ಗಟ್ಟಿ ಆತುಂಡು . ಪಕ್ಷನ್ ನನಾತ್ ಮಿತ್ತ್ ಕೊನೊಪಿನ ನೆಲೆಟ್ಟ್ ಪಕ್ಷದ ಕಾರ್ಯಂತೆರೆ ನಿತ್ಯ ನಿರಂತರ ಪಕ್ಷದ ಚಟುವಟಿಕೆಡ್ ಪಾಲ್ ಪಡೆಯೋಡು ಪಂದ್ ಬಿಜೆಪಿ ಜಿಲ್ಲಾಧ್ಯಕ್ಷ ಕುಯಿಲಾಡಿ ಸುರೇಶ್ ನಾಯಕ್ ಪಂಡೆರ್ .

ಹಿರಿಯಡ್ಕದ ಓಂತಿಬೆಟ್ಟು ಆರ್.ಎಸ್.ಬಿ. ಸಭಾಂಗಣಡ್ ನಡತಿನ ಬಿಜೆಪಿ ಕಾಪು ಮಂಡಲದ ವಿಶೇಷ ಕಾರ್ಯಕಾರಿಣಿ ಸಭೆನ್ ಉದಿಪನ ಮಲ್ತ್ ಆರ್ ಪಾತೆರಿಯೆರ್.

You Missed