Sat. Nov 21st, 2026

ಕುಡ್ಲದ ಸುದ್ದಿ | Mangalore News

ಸಂಸ್ಕಾರ ದಿಂಜಿನ ಹಿಂದೂ ಸಮಾಜನ್ ಕಟ್ಟರೆ ಗಣೇಶೋತ್ಸವ ಪ್ರೇರಣೆ

ಬಂಟ್ಸ್ ಹಾಸ್ಟೆಲ್ ಗಣೇಶೋತ್ಸವದ 3 ನೇ ದಿನತ್ತ ಧಾರ್ಮಿಕ ಸಭೆ

ಕುಡ್ಲ : “ಸಂಸ್ಕಾರ ದಿಂಜಿನ ಹಿಂದೂ ಸಮಾಜನ್ ಒಟ್ಟು ಪಾಡರೆ ಗಣೇಶೋತ್ಸವ ಒಂಜಿ ಪ್ರೇರಣೆ. ಬಂಟ್ಸ್ ಹಾಸ್ಟೆಲ್‌ಡ್ ನಡಪುನ ಶ್ರೀ ಗಣೇಶೋತ್ಸವ ಶಿಸ್ತುಬದ್ದವಾದ್ ನಡತೊಂದು ಬತ್ತ್‌ದ್ ಮಾತೆರೆಗ್ಲ ಮಾದರಿ ಆದುಂಡು. ಶಾಸಕೆರಾದ್ ಯಾನ್ ಬಂಟ ಸಮಾಜದೊಟ್ಟಿಗೆ ಉಪ್ಪುವೆ. ಈ ಸಮಾಜದ ಋಣ ಎಂಕ್ ಉಂಡು” ಪಂದ್ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕೆರ್ ವೇದವ್ಯಾಸ ಕಾಮತ್ ತೆರಿಪಾಯೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ದಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌ಡ್ ನಡತಿನ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಾರಂಭಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಕುಡೊರಿ ಬಿನ್ನೆ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಪಾತೆರ್ದ್, ರೋಗ ರುಜಿನ ದೂರ ಮಲ್ಪರೆ, ಜೀವನಡ್ ಶಾಂತಿ ನೆಮ್ಮದಿ ಪಡೆವರೆ ಗಣಪತಿ ದೇವೆರ್ನ ಆರಾಧನೆ ಅಗತ್ಯ ಪಂದ್ ಪಂಡೆರ್.
ಲೇಸ್‌ಡ್ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲು, ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಕೆ ಅಜಿತ್ ಕುಮಾರ್ ರೈ ಮಾಲಾಡಿ, ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಜಯಶೀಲ ಅಡ್ಯಂತಾಯ ಅಡ್ಯಾರ್ ಗುತ್ತು, ಸಂಘದ ಉಪಾಧ್ಯಕ್ಷೆರ್ ಹೇಮನಾಥ ಶೆಟ್ಟಿ ಕಾವು, ಪ್ರಧಾನ ಕಾರ್ಯದರ್ಶಿ ಎಂ ಕರುಣಾಕರ ಶೆಟ್ಟಿ, ಕೋಶಾಧಿಕಾರಿ ಸಿಎ ರಾಮ್ ಮೋಹನ್ ರೈ, ಜೊತೆ ಕಾರ್ಯದರ್ಶಿ ಪದ್ಮನಾಭ ಶೆಟ್ಟಿ ಪುಂಚಮೆ, ಉದ್ಯಮಿ ಸುಯೋಗ್ ಶೆಟ್ಟಿ, ಮಾಜಿ ಸಚಿವ ಬಿ ನಾಗರಾಜ ಶೆಟ್ಟಿ, ಡಾ ಸತ್ಯ ಕೃಷ್ಣ ಭಟ್, ರಘುರಾಮ ಭಟ್, ಪ್ರದೀಪ್ ಕುಮಾರ್ ಕಲ್ಕೂರ, ವಿವಿಧ ಬಂಟರ ಸಂಘದ ಪದಾಧಿಕಾರಿಲಾಯಿನ ರತ್ನಾಕರ್ ಶೆಟ್ಟಿ ಎಕ್ಕಾರ್, ಅಶೋಕ್ ಶೆಟ್ಟಿ ಮುಲ್ಕಿ, ಜಯರಾಮ‌ ಬೆಳ್ತಂಗಡಿ, ಮಹಾಬಲ ಚೌಟ,
ವಿಜಯ ಶೆಟ್ಟಿ ಕಾರ್ಕಳ
ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಸದಾಶಿವ ಶೆಟ್ಟಿ ಬಿಜೈ ಮೊಕುಲು ಮಾತ ಇತ್ತೆರ್. ಈ ಪೊರ್ತುಡು ವೇದಮೂರ್ತಿ ಡಾ. ಸತ್ಯ ಕೃಷ್ಣ ಭಟ್ ಮೆರೆಗ್ ಸನ್ಮಾನ ಮಲ್ತೆರ್.
ಅಜಿತ್ ಕುಮಾರ್ ರೈ ಮಾಲಾಡಿ ಬಿನ್ನೆರೆನ್ ಎದ್ಕೊಂಡೆರ್. ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ ಸೊಲ್ಮೆ ಸಂದಾಯೆರ್. ಕಿರಣ್ ಪಕ್ಕಳ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

ವೈಭವದ ಶೋಭಾಯಾತ್ರೆ

ಶ್ರೀ ಸಿದ್ದಿವಿನಾಯಕ ದೇವೆರ್‌ನ ಮೂರ್ತಿದ ಶೋಭಾಯಾತ್ರೆಗ್ ಉದ್ಯಮಿ ಸುಯೋಗ್ ಶೆಟ್ಟಿ ಚಾಲನೆ ಕೊರಿಯೆರ್. ಬಯ್ಯಡ್ 5 ಗಂಟೆಗ್ ಮೂರ್ತಿ ವಿಸರ್ಜನೆ ಪೂಜೆ ನಡತ್ಂಡ್. ಶೋಭಾಯಾತ್ರೆ ಓಂಕಾರ ನಗರರ್ದ್ ಶ್ರದ್ಧಾಭಕ್ತಿಡ್ ಜಿಲ್ಲೆದ ವಿವಿಧ ಭಜನಾ ತಂಡದ ಸೇವೆದ ಒಟ್ಟುಗು ಬಂಟ್ಸ್ ಹಾಸ್ಟೆಲ್ ಸರ್ಕಲ್, ಪಿವಿಎಸ್ ಸರ್ಕಲ್, ನ್ಯೂಚಿತ್ರಾ ಟಾಕೀಸ್, ರಥಬೀದಿ, ವೆಂಕಟರಮಣ ದೇವಸ್ಥಾನದ ಮಾರ್ಗೊಡು ಪೋದು ಶ್ರೀ ಮಹಮ್ಮಾಯಿ ದೇವಸ್ಥಾನದ ಕೆರೆಟ್ಟ್ ಸಿದ್ಧಿವಿನಾಯಕ ದೇವೆರೆನ ಮೂರ್ತಿನ್ ವಿಸರ್ಜನೆ ಮಲ್ತೆರ್.

“ಕೊಣಾಜೆರ್ದ್ ಕುಡ್ಲಗ್ ಪಿರ ಕನಲೆ ತುಳು ಎಂಎ ಅಧ್ಯಯನ ಪೀಠ : ಪರಪು ಕೂಟದ ಬಿನ್ನಾಪು”

ಕುಡ್ಲ : ಮಂಗಳೂರು ವಿಶ್ವವಿದ್ಯಾನಿಲಯದ ತುಳು ಸ್ನಾತ್ತಕೋತ್ತರ ವಿಭಾಗನ್ ಹಂಪನ್‌ಕಟ್ಟೆ ಮಂಗಳೂರು ವಿವಿ ಕಾಲೇಜಿಡೇ ಒರಿಪಾವೊಡು ಪಂದ್ ತುಳು ಎಂಎ ಹಿರಿಯ ವಿದ್ಯಾರ್ಥಿಲೆನ ಸಂಘಟನೆ “ಪರಪು” ಒತ್ತಾಯ ಮಲ್ದ್ಂಡ್.
2018 ನೇ ಇಸ್ವಿಡ್ ಮಂಗಳೂರು ವಿವಿ ಹಂಪನಕಟ್ಟೆ ಕಾಲೇಜಿಡ್ ಸ್ಥಾಪನೆ ಮಲ್ದಿನ ತುಳು ಎಂಎ ಅಧ್ಯಯನ ಪೀಠರ್ದ್ ಪುತ್ತೂರು, ಬೆಲ್ತಂಗಡಿ, ಸುಳ್ಯ, ಉಡುಪಿ, ಕಾಸ್ರೋಡು ಸೇರ್ದ್ ಮೂಜಿ ಜಿಲ್ಲೆದ ಮಸ್ತ್ ವಿದ್ಯಾರ್ಥಿಲು ಎಂಎ ಅಧ್ಯಯನ ಮಲ್ದೆರ್. ಒಡಿಯೂರು ಮಠತ್ತ ಶ್ರೀ ಗುರುದೇವಾನಂದ ಸ್ವಾಮಿಲು ಈ ವಿಭಾಗೊಗು ಲಕ್ಷಾಂತರ ರೂಪಾಯಿದ ಗ್ರಂಥಾಲಯ ಬೊಕ್ಕ ಪೀಠೋಪಕರಣ ಕೊರ್ದಿತ್ತೆರ್. ಆಂಡ ಕರಿನ ಶೈಕ್ಷಣಿಕ ವರ್ಷಡ್ ತುಳು ಎಂಎ ವಿಭಾಗನ್ ಕುಡ್ಲ ಪೇಂಟೆರ್ದ್ 20 ಕಿ.ಮೀ. ದೂರದ ಕೊಣಾಜೆಗ್ ಸ್ಥಳಾಂತರ ಮಲ್ದಿನೆರ್ದಾವರ ತುಳು ಎಂಎ ಕಲ್ಪುನಕ್ಲೆನ ಸಂಖ್ಯೆ ಕಮ್ನಿ ಆತ್ಂಡ್. ಅಂಚಾದುಪ್ಪುನಗ ಸರಕಾರ ತುಳು ಎಂಎ ವಿಭಾಗನ್ ವಾಪಸ್ ಕುಡ್ಲದ ಕಾಲೇಜಿಗ್ ಕನವೊಡು ಪಂದ್ ಪರಪು ಸಂಘಟನೆದ ಉಪಾಧ್ಯಕ್ಷೆರ್ ಹರೀಶ್ ಪತ್ರಿಕಾಗೋಷ್ಠಿಡ್ ಒತ್ತಾಯ ಮಲ್ದೆರ್.
ಪತ್ರಿಕಾಗೋಷ್ಠಿಡ್ ಸಂಘದ ಅಧ್ಯಕ್ಷೆರ್ ಸುಭಾಷ್‌ಚಂದ್ರ ಕಣ್ವ ತೀರ್ಥ, ಸದಸ್ಯೆರಾಯಿನ ಗೀತಾ ಜೈನ್, ಭಾಗ್ಯಶ್ರೀ ಶೆಟ್ಟಿ, ಶಿವರಾಮ್ ಶೆಟ್ಟಿ, ಚಂದ್ರಹಾಸ ಕಣಂತೂರು, ಕಲಾವತಿ ಬೊಕ್ಕ ಜ್ಞಾನೇಶ್ವರಿ ಇತ್ತೆರ್.

ವಿದ್ಯಾರ್ಥಿಲು ಶೈಕ್ಷಣಿಕ ಸಾಧಕೆರಾವೊಡು: ಜಯಂತಿ ಬಂಗೇರ

ಮುಲ್ಕಿ: ಸಸಿಹಿತ್ಲು ಉತ್ಥಾನ ಬಳಗ ಸೇವಾ ಟ್ರಸ್ಟ್ ದ ಮುತಾಲಿಕೆಡ್ ಪ್ರತಿಭಾ ಪುರಸ್ಕಾರ ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್ ಐತಾರ ಸಂಸ್ಥೆದ ಸಭಾಭವನಡ್ ನಡತ್ಂಡ್.

ಲೇಸ್ ದ ಅಧ್ಯಕ್ಷತೆನ್ ಒಯಿಸೊನ್ನ ಜಯಂತಿ ಬಂಗೇರ ಪಾತೆರ್ದ್, ವಿದ್ಯಾರ್ಥಿಲು ಮೊಬೈಲ್ ಬೊಕ್ಕ ಸಾಮಾಜಿಕ ಜಾಲತಾಣರ್ದ್ ದೂರ ಇತ್ತ್ ದ್ ಉತ್ತಮ ಗುಣನ್ ಬುಲೆಪಾವೊಂದು ಶೈಕ್ಷಣಿಕ ಸಾಧಕೆರಾವೊಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಸಂಸ್ಥೆದ ಟ್ರಸ್ಟಿಲಾಯಿನ ಡಾ. ಶ್ರೀಕಾಂತ್ ರಾವ್, ಹೇಮಚಂದ್ರ ಶೆಟ್ಟಿಗಾರ್, ರಂಜಿತಾ ಪಾಲ್ ಪಡೆದಿತ್ತೆರ್.

ಸಂಸ್ಥೆದ ವಿದ್ಯಾ ಸಮೃದ್ಧಿ ಯೋಜನೆದಡಿಟ್ಟ್ ಇಂದುಶ್ರೀ ದತ್ತಿ ನಿಧಿ, ದಿ|| ನಾರಾಯಣ ರಾವ್, ದಿ|| ಭಾಸ್ಕರ್ ಸಾಲ್ಯಾನ್, ದಿ|| ಮೋಹನ್ ರಾವ್ ಬೆಂಗ್ಲೂರು, ದಿ|| ಕಮಲಾಕ್ಷಿ ಕೇಶವ ಶ್ರೀಯಾನ್ ನೆಂಪುಗಾದ್ ಬೊಕ್ಕ ಕೆಲವೆರೆನ ಸಹಕಾರರ್ದ್ ಸುಮಾರ್ 3 ಲಕ್ಷ ಕರ್ಚಿಡ್ 40 ವಿದ್ಯಾರ್ಥಿಲೆಗ್ ಬೊಕ್ಕ ಸಮಾಜದ ಬಡಪತ್ತ್ ದ ಬಂಧುಲೆಗ್ ಆರ್ಥಿಕ ಸಹಕಾರ ಕೊರಿಯೆರ್.

ಇಸೇಸ ಸಾಧಕೆರೆಗ್ ಸನ್ಮಾನ ಆಂಡ್. ಬೊಕ್ಕ ಸಂಸ್ಥೆದ ಮುತಾಲಿಕೆಡ್ ನಡೆತಿನ ಬೇತೆ ಬೇತೆ ಗೊಬ್ಬುದ ಪಂತೊಡು ಗೆಂದಿನಕ್ಲೆಗ್ ಇನಾಮುನ್ ಕೊರಿಯೆರ್.

ಉರ್ವಸ್ಟೋರ್ ಶ್ರೀ ಶಾರದಾ ಪೂಜಾ ಸಮಿತಿದ 54ನೇ ವರ್ಷೊದ ಶ್ರೀ ಶಾರದಾ ಪೂಜಾ ಮಹೋತ್ಸವ

ಕುಡ್ಲ: ಉರ್ವಸ್ಟೋರ್ ಶ್ರೀ ಶಾರದಾ ಪೂಜಾ ಸಮಿತಿ (ರಿ.) ದ ಮುತಾಲಿಕೆಡ್ 54ನೇ ವರ್ಷೊದ ಶ್ರೀ ಶಾರದಾ ಪೂಜಾ ಮಹೋತ್ಸವ ಅ.16-19 ಮುಟ್ಟ ಉರ್ವಸ್ಟೋರ್ ಜಂಕ್ಷನ್‌ದ ಮಾನಸ ಮಂಟಪದ ಕೈತಲ್ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ಗೌಜಿಡ್ ನಡಪರೆ ಉಂಡು.

ಅ.16 ಸುಕ್ರಾರ ಬೊಲ್ಪುಗು ಶ್ರೀ ಶಾರದಾ ದೇವಿನ ಪ್ರತಿಷ್ಠೆ ನಡಪುಂಡು. ಬೊಕ್ಕ ಚಂಡಿಕಾ ಹೋಮ, ಸಹಸ್ರ ಕುಂಕುಮಾರ್ಚನೆ ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ಕುಳಾಯಿ ಕಲಾಕುಂಭ ಮೊಕ್ಲೆನ ಮುತಾಲಿಕೆಡ್ ‘ಪರಮಾತ್ಮ ಪಂಜುರ್ಲಿ’ ಪನ್ಪಿನ ತುಳು ಪೌರಾಣಿಕ ನಾಟಕ ಪ್ರದರ್ಶನ ಆಯೆರೆ ಉಂಡು.

ಅ.17 ಸನಿಯಾರ ಧಾರ್ಮಿಕ ಸಭಾ ಲೇಸ್ ನಡಪುಂಡು. ಶಾರದಾ ವಿದ್ಯಾಪೀಠದ ವಿದ್ಯಾರ್ಥಿಲೆರ್ದ್ ವೈವಿಧ್ಯಮಯ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಅ.18 ಐತಾರ ಬಯ್ಯಗ್ ಉರ್ವಸ್ಟೋರ್ ಶಾರದಾ ಯಕ್ಷಕಲಾಕೇಂದ್ರದ ಮುತಾಲಿಕೆಡ್ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು.

ಮಹೋತ್ಸವದ ನಾಲ್ ದಿನಟ್ಟ್ ಇಸೇಸ ಪೂಜೆ, ಅಕ್ಷರಾಭ್ಯಾಸ ಬೊಕ್ಕ ಎಪೊಲ ಭಜನೆ ನಡಪರೆ ಉಂಡು.

ಅ.19 ಸೋಮಾರ ಬಯ್ಯಗ್ ಶ್ರೀ ಶಾರದಾ ಮಾತೆದ ವೈಭವದ ಶೋಭಾಯಾತ್ರೆ ಉರ್ವಸ್ಟೋರ್–ಕೊಟ್ಟಾರ– ಅಶೋಕನಗರ–ಶೇಡಿಗುರಿ ಮಾರ್ಗವಾದ್ ಬರ್ಪುಂಡು. ಉರ್ವಸ್ಟೋರ್ ಟ್ಯಾಕ್ಸಿ ಬೊಕ್ಕ ಮ್ಯಾಕ್ಸಿ ಕ್ಯಾಬ್, ಮಾನಸ ಫ್ರೆಂಡ್ಸ್, ಕುಡ್ಲ ಟೀಮ್ ಸನಾತನ ಮೊಕ್ಲೆನ ಮುತಾಲಿಕೆಡ್ ವೈವಿಧ್ಯಮಯ ದೃಶ್ಯರೂಪಕಲು, ಚೆಂಡೆ ಬೊಕ್ಕ ಬೇತೆ ಬೇತೆ ವಾದ್ಯಲೆನ ಘೋಷದೊಟ್ಟಿಗೆ ಗೌಜಿಡ್ ನಡಪರೆ ಉಂಡು.

ಬೊಕ್ಕ ದಂಬೆಲ್ ಸುದೆ ಬರಿಟ್ಟ್ ಜನಸೇವಾ ಸಮಿತಿದಕ್ಲೆನ ಒಟ್ಟುಸೇರಿಗೆಡ್ ಶ್ರೀ ಶಾರದಾ ದೇವಿನ ಜಲಸ್ತಂಭನ ಲೇಸ್ ನಡಪರೆ ಉಂಡು.

ಈ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಮಹೋತ್ಸವಗ್ ಭಕ್ತಾಭಿಮಾನಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ಶಾರದಾ ಮಾತೆನ ದರ್ಶನ ಪಡೆದ್, ಪ್ರಸಾದ ದೆತೊಂದು ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ತೆರಿಪಾದೆರ್.

ಬಜ್ಪೆ ಏರ್‌ಪೋರ್ಟ್‌ಗ್ “ಕೋಟಿ ಚೆನ್ನಯ” ಪುದರ್ ದೀವರೆ ಮಿಥುನ್ ರೈ ಬಿನ್ನಾಪು

ಕುಡ್ಲ : ಕುಡ್ಲಡ್ ಸೆ.18 ಸುಕ್ರಾರ ನಡಪುನ ಕಡೀರ್‌ದ ಸಚಿವ ಸಂಪುಟ ಸಭೆಟ್ಟ್ ಬಜ್ಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ತುಳುನಾಡ್‌ದ ಕಾರ್ಣಿಕ ಪುರುಷೆರಾಯಿನ “ಕೋಟಿ ಚೆನ್ನಯೆ”ರ್‌ನ ಪುದರ್ ದೀವರೆ ನಿರ್ಣಯ ದೆತೊಂದು ಕೇಂದ್ರ ಸರಕಾರೊಗು ಶಿಫಾರಸ್ ಮಲ್ಪೊಡು” ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಎಂ. ಮಿಥುನ್ ರೈ ಬಿನ್ನಾಪು ಮಲ್ದೆರ್.
ಈ ಬಗೆಟ್ಟ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಮುಕೇನ ಮುಖ್ಯಮಂತ್ರಿಲು ಡಿಕೆ ಶಿವಕುಮಾರ್‌ಗ್ ಓಲೆ ಕಡಪುಡ್ದೆರ್.
“ಕೋಟಿ ಚೆನ್ನಯೆರ್ ತುಳು ಮಣ್ಣ್‌ದ ಸ್ವಾಭಿಮಾನ,ಶೌರ್ಯ, ಸಾಮಾಜಿಕ ನ್ಯಾಯ ಬೊಕ್ಕ ಸಾಂಸ್ಕೃತಿಕ ಅಸ್ಮಿತೆದ ಸಂಕೇತವಾದುಲ್ಲೆರ್. ಅಂಚಾದ್ ಅಕ್ಲೆನ ಪುದರ್ ಶಾಶ್ವತ ಆಪಿಲೆಕ ಏರ್ಪೋರ್ಟ್ ‌ಗ್ ಪುದರ್ ದೀವೊಡು” ಪಂದ್ ಬಿನ್ನಾಪು ಮಲ್ದೆರ್.
ಕುಡ್ಲದ ವಿಮಾನ ನಿಲ್ದಾಣಗ್ ಕೋಟಿ ಚೆನ್ನಯೆರ್‌ನ ಪುದರ್ ದೀವೊಡು ಪನ್ಪಿನ ಪೊರ್ಂಬಾಟದ ಒಂಜಿ ಭಾಗವಾದ್ 2010 ನೇ ಇಸ್ವಿಡ್ ಡಿಸೆಂಬರ್ 10 ಕ್ಕ್ ಕೆಪಿಟಿ ಸರ್ಕಲ್ ರ್ದ್ ತನ್ನ ನೇತೃತ್ವಡ್ ದೊಂದಿ ಬೊಲ್ಪುದ ಮೆರವಣಿಗೆ ಮಲ್ದಿನ ಬಗ್ಗೆ ಓಲೆಡ್ ಮಿಥುನ್ ರೈ ನೆಂಪು ಮಲ್ದೆರ್.

ಬಂಟ್ಸ್ ಹಾಸ್ಟೆಲ್ : ಗಣೇಶೋತ್ಸವ ಉದಿಪನ

ಕುಡ್ಲ : “ಬಂಟ್ಸ್ ಹಾಸ್ಟೆಲ್‌ಡ್ ಸಿದ್ಧಿ ವಿನಾಯಕ ಪ್ರತಿಷ್ಠಾನದ ಗಣೇಶೋತ್ಸವ ಭಾರಿ ಶ್ರದ್ಧಾ ಭಕ್ತಿಡ್ ವ್ಯವಸ್ಥಿತವಾದ್ ನಡತೊಂದುಂಡು. ಈ ಗಣೇಶೋತ್ಸವ ಉದಿಪನ ಮಲ್ಪುನ ಯೋಗ ಸತತ 2ನೇ ಸರ್ತಿ ಎಂಕ್ ಒದಗಿ ಬೈದಿನಿ ಎನ್ನ ಸುದೈವ” ಪಂದ್ ದ.ಕ. ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಪಂಡೆರ್.
ಆರ್ ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌‌ಡ್ ನಡಪುನ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಉದಿಪನ ಮಲ್ತ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬೈದಿನ ಸಂಸದೆರ್ ಕ್ಯಾ.ಬ್ರಿಜೇಶ್ ಚೌಟ ಪಾತೆರ್ದ್, ಪ್ರಧಾನ ಮಂತ್ರಿಲೆನ ಸ್ವಚ್ಛ ಭಾರತದ ಆಶಯದಂಚ ಪರಿಸರಗ್ ಪೂರಕವಾದ್ ಮಾತಾ ಗಣೇಶೋತ್ಸವಲ ನಡಪಡ್ ಪಂದ್ ಪಂಡೆರ್.
ಧ್ವಜಾರೋಹಣ ಮಲ್ತ್ ಪಾತೆರ್ನ ಗ್ರೂಪ್ ಕ್ಯಾಪ್ಟನ್ ಎಸ್. ಎಂ. ಅಡ್ಯoತಾಯೆರ್ ಪಾತೆರ್ದ್, ಬಂಟ ಸಮುದಾಯಗ್ ಶ್ರೀಮಂತ ಪರಂಪರೆದ ಹಿನ್ನೆಲೆ ಇತ್ತ್‌ದ್, ಶಿಕ್ಷಣ, ಆಡಳಿತ, ವೈದ್ಯಕೀಯ,ಕಾನೂನು ಇಂಚಿನ ಕ್ಷೇತ್ರಡ್ ಸಮಾಜಗ್ ಮಲ್ಲ ಕೊಡುಗೆ ಕೊರ್ತೆರ್ ಪಂದ್ ಪಂಡೆರ್.
ಮಾತೃ ಸಂಘದ ಮಾಜಿ ಉಪಾಧ್ಯಕ್ಷೆರ್ ರವೀಂದ್ರನಾಥ ಜಿ ಹೆಗ್ಡೆ ಬೊಕ್ಕ ನಳಿನಿ ಆರ್ ಹೆಗ್ಡೆ ಕೊರಲ್ ಪಟ್ಟಿಯೆರ್.
ಬಿನ್ನೆರಾದ್ ಗೀತಾ ಅಡ್ಯoತಾಯ, ಮಾಳವಿಕಾ ಜಯಾನಂದ್, ದಂಬೆಕಾನ ಸದಾಶಿವ ರೈ, ಪದ್ಮನಾಭ ರೈ, ಬಜಪೆ ಬಂಟರ ಸಂಘದ ಅಧ್ಯಕ್ಷೆರ್ ವೇಣುಗೋಪಾಲ್ ಶೆಟ್ಟಿ, ಜಪ್ಪಿನಮೊಗರು ಬಂಟರ ಸಂಘದ ಅಧ್ಯಕ್ಷೆರ್ ಜೆ ಸತ್ಯಪ್ರಸಾದ್ ಶೆಟ್ಟಿ, ಶೇಖರ ಶೆಟ್ಟಿ ಗಣೇಶೋತ್ಸವ ಸಮಿತಿ ಕಾರ್ಯದರ್ಶಿ ಸದಾಶಿವ ಶೆಟ್ಟಿ ಬಿಜೈ ಪಾಲ್ ಪಡೆದಿತ್ತೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ ಸ್ವಾಗತ ಮಲ್ತೆರ್. ಗಣೇಶೋತ್ಸವ ಸಮಿತಿಯ ಅಧ್ಯಕ್ಷೆರ್ ಜಯಶೀಲ ಅಡ್ಯoತಾಯ ಅಡ್ಯಾರುಗುತ್ತು ಸೊಲ್ಮೆ ಸಂದಾಯೆರ್. ಭಾಗ್ಯರಾಜ್ ಶೆಟ್ಟಿ ಹರೇಕಳ ನಿರೂಪಣೆ ಮಲ್ತೆರ್. ಈ ಸಂದರ್ಭಡ್ ಜಿಲ್ಲಾಧಿಕಾರಿ ದರ್ಶನ್ ದಂಪತಿಲೆನ್ ಬೊಕ್ಕ ಬಾಲ ಸಂಗೀತ ಪ್ರತಿಭೆ ಅಚಿಂತ್ಯ ರೈ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.

ಚಿರಂತನ ಹೋಮ್ ಹೆಲ್ತ್ ಕೇರ್‌ಗ್ ದಿನಸಿ ಕೊಡುಗೆ

ತೋಕೂರು: ತೋಕೂರು ಡಾ. ಎಂ.ಆರ್.ಎಸ್.ಎಂ. ಇಂಗ್ಲಿಷ್ ಮೀಡಿಯಂ ಸ್ಕೂಲ್ ದ ಆರೋಗ್ಯ ಬೊಕ್ಕ ಕ್ಷೇಮತಾ ಕ್ಲಬ್ ದ ಮುತಾಲಿಕೆಡ್ ಹಿರಿಯ ನಾಗರಿಕೆರೆನ ಆರೈಕೆ ಬೊಕ್ಕ ಆರೋಗ್ಯ ಕಾಳಜಿಗಾದ್ ಬೇನೊಂದು ಇಪ್ಪುನ ಚಿರಂತನ ಹೋಮ್ ಫಾರ್ ಜೆರಿಯಾಟ್ರಿಕ್ ಹೆಲ್ತ್ ಕೇರ್ ಗ್ ಅಗತ್ಯ ಇಪ್ಪುನ ದಿನಸಿ ಸಾಮಾನ್ ನ್ ದೇಣಿಗೆಯಾದ್ ಕೊರಿಯೆರ್.

ಈ ಪೊರ್ತುಡು ಶಾಲೆದ ಪ್ರಾಂಶುಪಾಲೆರ್ ಶ್ರೀಲತಾ ರಾವ್ ಪಾಲ್ ಪಡೆದ್ ಲೇಸ್ ಗ್ ಮಾರ್ಗದರ್ಶನ ಕೊರಿಯೆರ್. ಶಾಲೆದ ಕ್ಯಾಬಿನೆಟ್ ವಿದ್ಯಾರ್ಥಿಲು ಲೇಸ್ ಡ್ ಸಕ್ರಿಯವಾದ್ ಪಾಲ್ ಪಡೆದ್ ಚಿರಂತನದ ಹಿರಿಯ ನಾಗರಿಕೆರೆನ್ ಭೇಟಿ ಮಲ್ತ್ ದ್ ಅಕ್ಲೆನೊಟ್ಟಿಗೆ ಸಮಯ ಕಲೆಪುನೊಟ್ಟಿಗೆ ಅಲ್ಪದ ವಾತಾವರಣ ಬೊಕ್ಕ ಹಿರಿಯೆರೆನ ಆರೈಕೆದ ಬಗ್ಗೆ ತೆರಿವೊಂಡೆರ್.

ವಿದ್ಯಾರ್ಥಿಲೆಡ ಮಾನವೀಯತೆ, ಸಹಾನುಭೂತಿ, ಸಾಮಾಜಿಕ ಜಬದಾರಿ ಬೊಕ್ಕ ಹಿರಿಯೆರೆನ ಮಿತ್ತ್ ಗೌರವ ಬುಲೆಪಾವುನ ಉದ್ದೇಶರ್ದ್ ಈ ಲೇಸ್ ನ್ ಆಯೋಜನೆ ಮಲ್ದೆರ್. ಅಗತ್ಯ ಇಪ್ಪುನ ದಿನಸಿ ಸಾಮಾನ್ ನ್ ಚಿರಂತನದ ಸಿಬ್ಬಂದಿಲೆಗ್ ಕೊರಿಯೆರ್.

ಹಿರಿಯೆರೆನೊಟ್ಟಿಗೆ ಸಂವಾದ ನಡಪಾಯಿನ ವಿದ್ಯಾರ್ಥಿಲು ಅಕ್ಲೆನ ಜೀವನಾನುಭವನ್ ತೆರಿದ್, ಹಿರಿಯ ನಾಗರಿಕೆರೆನ ಕಾಳಜಿ ಬೊಕ್ಕ ಆರೈಕೆದ ಮಹತ್ವನ್ ತೆರಿವೊಂಡೆರ್.

ಸೇವೆ ಪಂಡ ಕೇವಲ ಸಕಾಯ ಮಲ್ಪುನೇ ಅತ್ತ್ ನನೊರಿಯನ ಬದ್ಕ್ ಡ್ ಕಾಳಜಿದ ಬುಲ್ಪುನು ಬೆಳಗವುನು. ಆರೋಗ್ಯ ಬೊಕ್ಕ ಕ್ಷೇಮತಾ ಕ್ಲಬ್‌ದ ಈ ಸಮಾಜಮುಖಿ ಲೇಸ್ ವಿದ್ಯಾರ್ಥಿಲೆಗ್ ಸೇವಾ ಮನೋಭಾವ ಬೊಕ್ಕ ಸಾಮಾಜಿಕ ಜಬದಾರಿದ ಮಹತ್ವನ್ ತೆರಿಪಾಯೆರ್.

ಸೆ.14: ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಚೌತಿದ ಸಂಬ್ರಮ

ಕುದ್ರೋಳಿ : ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಸ್ಥಾನಡ್ ಸೆ.14 ಸೋಮವಾರ ಗಣೇಶ ಚತುರ್ಥಿ ಪ್ರಯುಕ್ತ ವಿಶೇಷ ಕಾರ್ಯಕ್ರಮ ನಡಪರೆ ಉಂಡು.
ಆನಿ ಕಾಂಡೆ 8 ಗಂಟೆಗ್ ಗುರು ಪ್ರಾರ್ಥನೆ, ಶ್ರೀ ಮಹಾಗಣಪತಿ ದೇವೆರ್‌ನ ಸನ್ನಿಧಿಡ್ ಸ್ವಸ್ತಿ ಪುಣ್ಯವಾಚನ, 108 ತಾರಾಯಿದ ಮಹಾ ಗಣಪತಿ ಹೋಮ, ಮಹಾ ಗಣಪತಿ ದೇವೆರೆಗ್ ಅಭಿಷೇಕ, ಮಧ್ಯಾಹ್ನ 12 ಗಂಟೆಗೆ ಮಹಾಪೂಜೆ ಬೊಕ್ಕ 1008 ತಾರಾಯಿದ ಪಲ್ಲಪೂಜೆ, ಅಯಿರ್ದ್ ಬೊಕ್ಕ ಭಕ್ತೆರೆಗ್ ಕೊರಲ್ ಪಟ್ಟುನ ಸಂಪ್ರದಾಯ ನಡಪರೆ ಉಂಡು.
ರಾತ್ರೆ 8 ಗಂಟೆಗ್ ಮಹಾಗಣಪತಿ ದೇವೆರೆಗ್ ರಂಗಪೂಜೆ ನಡಪರೆ ಉಂಡು.
ಅಂಚೆನೆ ಆನಿ ಕಾಂಡೆ 10.30 ಗಂಟೆಗ್ ನವರಾತ್ರಿ ಉತ್ಸವಗ್ ಶಾರದಾ ಮಾತೆನ ಮೂರ್ತಿ ರಚನೆಗ್ ಮುಹೂರ್ತ ನಡಪರೆ ಉಂಡು ಪಂದ್ ಶ್ರೀ ಕ್ಷೇತ್ರದ ಅಧ್ಯಕ್ಷೆರ್ ಜೈರಾಜ್ ಎಚ್. ಸೋಮಸುಂದರಂ ಪ್ರಕಟಣೆಡ್ ತೆರಿಪಾದೆರ್.

ದಕ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಪೂಜಾರಿ ನೇಮಕ

ಒಡಿಪು ಜಿಲ್ಲೆಗ್ ಕಿಶನ್ ಹೆಗ್ಡೆ ಅಧ್ಯಕ್ಷೆರ್

ಬೆಂಗಳೂರು : ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಆರ್ ಪೂಜಾರಿ ನೇಮಕ ಆತೆರ್. ಅಂಚೆನೆ ಒಡಿಪು ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಕಿಶನ್ ಹೆಗ್ಡೆ ಕೊಳ್ಕೆಬೈಲ್ ಮೆರೆನ್ ನೇಮಕ ಮಲ್ದೆರ್.
ಅಖಿಲ ಭಾರತ ಕಾಂಗ್ರೆಸ್ ಕಮಿಟಿ (ಎಐಸಿಸಿ) ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ ರಾಜ್ಯದ ಬೇತೆ ಬೇತೆ ಜಿಲ್ಲೆದ ಕಮಿಟಿ ಅಧ್ಯಕ್ಷೆರ್‌ನ ಪಟ್ಟಿ ಬುಡುಗಡೆ ಮಲ್ದೆರ್.
ತುಳುನಾಡ್‌ದ ರಡ್ಡ್ ಜಿಲ್ಲೆಡ್‌ಲ ಪಕ್ಷದ ಸಂಘಟನೆ ಬೊಕ್ಕ ನನ ದುಂಬುದ ಓಟುಗು ತಯಾರಿ ಮಲ್ಪುನ ನಿಲೆಟ್ಟ್ ಜಿಲ್ಲಾ ಅಧ್ಯಕ್ಷೆರ್‌ನಕಲೆನ್ ನೇಮಕ ಮಲ್ತ್‌ದ್ ಆದೇಶ ಕಡಪಾದೆರ್.
ಮೊಕ್ಲೆನ ನೇಮಕಗ್ ಮಾಜಿ ಸಚಿವೆರಾಯಿನ ಅಭಯ ಚಂದ್ರ ಜೈನ್, ವಿನಯಕುಮಾರ್ ಸೊರಕೆ, ರಮಾನಾಥ್ ರೈ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಮುಖಂಡೆರಾಯಿನ ವಸಂತ್ ಬೆರ್ನಾಡ್, ಮೋಹನ್ ಕೋಟ್ಯಾನ್, ರಕ್ಷಿತ್ ಕೊಳಚಿಕಂಬ್ಲ, ಧನಂಜಯ ಮಟ್ಟು , ಗೋಪಿನಾಥ್ ಪಡಂಗ, ಗುರುರಾಜ್ ಪೂಜಾರಿ ತೋಕೂರು, ಜಗನ್ನಾಥ ಕೋಟ್ಯಾನ್ ಸಸಿಹಿತ್ಲು, ಅನಿಲ್ ಪೂಜಾರಿ ಸಸಿಹಿತ್ಲು , ಯೋಗೀಶ್ ಕೋಟ್ಯಾನ್ ಚಿತ್ರಾಪು ಮೊಕುಲು ಮಾತ ಅಭಿನಂದನೆ ಮಲ್ದೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪುಸ್ತಕ ಇನಾಮು ಪ್ರಕಟ

ಯಶೋದ ಮೋಹನ್, ಅಕ್ಷತಾ ರಾಜ್ ಪೆರ್ಲ, ರೂಪಕಲಾ ಆಳ್ವ, ಅಶೋಕ್ ಕಡೇಶಿವಾಲ್ಯಗ್ ಪ್ರಶಸ್ತಿ

ಕುಡ್ಲ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ 2024 ಬೊಕ್ಕ 2025ನೇ ಸಾಲ್‌ದ ಪುಸ್ತಕ ಇನಾಮು ಪ್ರಕಟ ಆತ್ಂಡ್.
2024ನೇ ಸಾಲ್‌ದ ಕಬಿತೆ ವಿಭಾಗದ ಇನಾಮುಗು ಯಶೋದ ಮೋಹನ್ ಬರೆತಿನ “ತಡ್ಯ ಕಡಪುನಗ” ಬೂಕು ಅಜತ್ ಬೈದ್ಂಡ್. ನಾಟಕ ವಿಭಾಗದ ಇನಾಮುಗು ಅಕ್ಷತಾ ರಾಜ್ ಪೆರ್ಲ ಬರೆತಿನ ‘ಮಂದಾರ ಮಲಕ” ಬೂಕು ಅಜತ್ ಬೈದ್ಂಡ್.
2025ನೇ ಸಾಲ್‌ದ ಕಾದಂಬರಿ ವಿಭಾಗದ ಇನಾಮುಗು ರೂಪಕಲಾ ಆಳ್ವ ಬರೆತಿನ “ಪಮ್ಮಕ್ಕೆನ ಪೊರ್ಂಬಾಟ” ಮಸ್ತಿರೆ ಅಜತ್ ಬೈದ್ಂಡ್. ಅವೇ ಸಾಲ್‌ದ ಕಬಿತೆ ವಿಭಾಗದ ಇನಾಮುಗು ಅಶೋಕ ಎನ್. ಕಡೇಶಿವಾಲಯ ಬರೆತಿನ “ಬದ್ಕ್ ಬಾಗ್ಯೊದ ಬೊಲ್ಪು” ಬೂಕು ಅಜತ್ ಬೈದ್ಂಡ್. ಈ ಇನಾಮು ತಲಾ 25,000 ರೂ.ದ ಪನವು ಬೊಕ್ಕ ಪ್ರಶಸ್ತಿ ಪಲವೆ ಉಪ್ಪುಂಡು.
ಪ್ರಶಸ್ತಿ ಪಟ್ಟುನ ಲೇಸ್ ಅಕ್ಟೋಬರ್ 04 ಕ್ಕ್ ಬೆಂಗಳೂರುದ ರವೀಂದ್ರ ಕಲಾಕ್ಷೇತ್ರಡ್ ನಡಪರೆ ಉಂಡು ಪಂದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆರ್ ತಾರಾನಾಥ ಗಟ್ಟಿ ಕಾಪಿಕಾಡ್ ಪ್ರಕಟಣೆಡ್ ತೆರಿಪಾದೆರ್.

You Missed