ಕುಡ್ಲದ ಸುದ್ದಿ | Mangalore News

Sashihitlu Munda Beach Breakwater structure- minister Mankala Vidya passes order for construction ಸಸಿಹಿತ್ಲು ಮುಂಡ ಬೀಚ್ ರಕ್ಷಣೆಗ್ ತಡೆಗೋಡೆ: ಸಚಿವೆರ್ ಮಾಂಕಾಳ ವೈದ್ಯ

ಮೂಲ್ಕಿ : ಪೆಜಮಾಡಿ ಬಂದರ್ ಅಭಿವೃದ್ಧಿ ಆಪಿನ ಪೊರ್ತುಡು ಸಸಿಹಿತ್ಲು ಬೀಚ್ ಗ್ ಭಾರಿ ಹಾನಿ ಆಪಿನ ಅಪಾಯ ಇತ್ತಿನೆರ್ದ್ ಅವೆನ್ ಒರಿಪುನ ಸಲುವಾದ್ ತುರ್ತಾದ್ 1 ಕಿ.ಮೀ. ಮುಟ್ಟ ತಡೆಗೋಡೆ ಕಟ್ಟರೆ ರಾಜ್ಯ ಬಂದರು ಬೊಕ್ಕ ಮೀನುಗಾರಿಕಾ ಸಚಿವೆರ್ ಮಾಂಕಾಳ ವೈದ್ಯ ಅಧಿಕಾರಿಲೆಗ್ ಆದೇಶ ಕೊರಿಯೆರ್.

ಆರ್ ಸಸಿಹಿತ್ಲು ಮುಂಡ ಬೀಚ್ ಗ್ ಬೇತೆ ಬೇತೆ ಇಲಾಖೆದ ಅಧಿಕಾರಿಲ್ನ ಒಟ್ಟುಗು ಅಂಚೆನೆ ಜನಪ್ರತಿನಿಧಿನಕಲ್ನ ಒಟ್ಟುಗು ಸುಕ್ರಾರ ಭೇಟಿ ಕೊರ್ದು ಮಾಧ್ಯಮದಕಲ್ನೊಟುಗು ಪಾತೆರಿಯೆರ್.

ಸಸಿಹಿತ್ಲು ಸೇರ್ದ್ ಕರಾವಳಿದ ಮಾತ ಬೀಚ್ ಸಂರಕ್ಷಣೆ ಗ್ ಆದ್ಯತೆ ಕೊರ್ದು ಮಲ್ಪುವ. ಮುಲ್ತ ಬೀಚ್ ಪ್ರವಾಸಿಗೆರ್ನ ಅಂಚೆನೆ ಕೈತಲ್ದದಕ್ಲೆನ ಹಿತಾಸಕ್ತಿನ್ ತೂದು ಯೋಜನೆ ಮಲ್ಪುನ ಜಬದಾರಿ ಸರ್ಕಾರದ ಆದುಂಡು. ಉಂದೆಕ್ಕ್ ಇಲಾಖೆದ ಅಧಿಕಾರಿಲು ಬೊಕ್ಕ ಕೈತಲ್ದ ಮೀನುಗಾರೆರೆನ್ ವಿಶ್ವಾಸಗ್ ದೆತೊಂದು ಯೋಜನೆ ಮಲ್ಪರೆ ಸೂಚನೆ ಕೊರ್ತೆ ಪಂದ್ ಪಂಡೆರ್.

ಅವ್ವತ್ತಾಂದೆ ಸಸಿಹಿತ್ಲು ಬೀಚ್ ದ ಜಾಗೆ ಸೇರ್ದ್ ಸುತ್ತಮುತ್ತ ಒವ್ವೇ ರೀತಿಡ್ ಲ ಖಾಸಗಿದಕಲೆಗ್ ಅವಕಾಶ ಇಜ್ಜಿ. ಅರಣ್ಯ, ಮೀನುಗಾರಿಕೆ, ಪ್ರವಾಸೋದ್ಯಮ ಇಲಾಖೆದ ಮುಕೇನ ಕಂದಾಯ ಭೂಮಿಡ್ ಬೀಚ್ ಅಭಿವೃದ್ಧಿ ಮಲ್ಪರೆ ಉಂಡು.ನೆರ್ದ್ ಪಿರವುದ ಯೋಜನೆಲೆನ ಬಗೆಟ್ಟ್ ಸೂಕ್ತ ಪರಿಶೀಲನೆ ಮಲ್ಪುವ. ಒವ್ವೇ ಯೋಜನೆ ಕೈತಲ್ದಕಲೆಗ್ ಪರಿಣಾಮಕಾರಿ ಆಂಡ ಮಾತ್ರ ಅಯಿಕ್ಕ್ ಸಹಕಾರ ಕೊರ್ಪ.ಕೈತಲ್ದಕ್ಲೆನ ವಿರೋಧ ಬತ್ತ್ಂಡ ಅವೆನ್ ಜಾರಿ ಮಲ್ಪುಜ ಪಂಡೆರ್.

ಕೆಪಿಸಿಸಿ ರಾಜ್ಯ ಕಾರ್ಯದರ್ಶಿ ಮಿಥುನ್ ರೈ ಮೇರ್ ಪಾತೆರ್ದ್, ಮರಿಯಲೊಡು ಕೈತಲ್ದ ನಿವಾಸಿಲೆಗ್ ಸೂಕ್ತ ರಕ್ಷಣೆದ ವ್ಯವಸ್ಥೆ ಆವೊಡು. ಅಂಚೆನೆ ಬೀಚ್ ಅಭಿವೃದ್ಧಿದ ಬಗೆಟ್ಟ್ ಯೋಜನೆಲೆನ ಸಾಧಕ ಬಾಧಕ, ಮೀನುಗಾರೆರೆಗ್ ಬೇಲೆ ಅಂಚೆನೆ ಪ್ರವಾಸೋದ್ಯಮದ ಪೂರಕ ಯೋಜನೆಲೆನ ಬಗೆಟ್ಟ್ ಸಚಿವೆರೆಗ್ ಮಾಹಿತಿ ಕೊರಿಯೆರ್.

ಕೆಪಿಸಿಸಿ ಸದಸ್ಯೆರ್ ಎಚ್.ವಸಂತ ಬೆರ್ನಾಡ್ ಮೇರ್ ಪಾತೆರ್ದ್, ನೆರ್ದ್ ದುಂಬು ಬೀಚ್ ಅಭಿವೃದ್ಧಿ ಸಮಿತಿದ ಮುಕೇನ ನಡತಿನ ಸರ್ಫಿಂಗ್ ಬೊಕ್ಕ ಪ್ರದೇಶಾಭಿವೃದ್ಧಿದ ಬಗೆಟ್ಟ್ ಪೊಲಬು ಮಲ್ತೆರ್.

ಹಳೆಯಂಗಡಿ ಪಂಚಾಯಿತಿ ಸದಸ್ಯೆರಾಯಿನ ಚಂದ್ರಕುಮಾರ್,ಅನಿಲ್ ಕುಮಾರ್,ಅಬ್ದುಲ್ ಅಜೀಜ್, ಪದ್ಮಾವತಿ ಶೆಟ್ಟಿ, ಜಲಜಾ, ಪಿಡಿಒ ಮುತ್ತಪ್ಪ, ಕಾರ್ಯದರ್ಶಿ ಕೇಶವ ದೇವಾಡಿಗ, ಮೂಲ್ಕಿ ಪಟ್ಟಣ ಪಂಚಾಯಿತಿ ಸದಸ್ಯೆರ್ ಪುತ್ತುಬಾವ, ಮೋಹನ್ ಕೋಟ್ಯಾನ್, ಸಮೀರ್ , ಧರ್ಮಾನಂದ ಶೆಟ್ಟಿಗಾರ್, ಮಾಜಿ ಸದಸ್ಯೆರ್ ಜಗನ್ನಾಥ ಕೋಟ್ಯಾನ್, ರಿತೇಶ್, ಪ್ರವೀಣ್ ಕರ್ಕೇರ, ಪ್ರವಾಸೋದ್ಯಮ ಇಲಾಖೆದ ಸಹಾಯಕ ನಿರ್ದೇಶಕೆರ್ ಮಾಣಿಕ್ಯ, ಮೂಲ್ಕಿ ತಹಶೀಲ್ದಾರ್ ಪ್ರದೀಪ್, ಉಪತಹಶೀಲ್ದಾರ್ ದಿಲೀಪ್ ರೋಡ್ಕರ್, ಕಂದಾಯ ನಿರೀಕ್ಷಕೆರ್ ದಿನೇಶ್, ಗ್ರಾಮಕರಣಿಕ ಮೋಹನ್, ಸಹಾಯಕೆರ್ ನವೀನ್, ಬೇತೆ ಬೇತೆ ಇಲಾಖೆದ ಅಧಿಕಾರಿಲಾಯಿನ ಕ್ಯಾಪ್ಟನ್ ಸಿ. ಸ್ವಾಮೀ, ಟಿ.ಎಸ್.ರಾಥೋಡ್, ಶ್ರೀನಿವಾಸ ಮೂರ್ತಿ, ಪ್ರವೀಣ್ ಕುಮಾರ್, ಮನೋಹರ ಆಚಾರ್ಯ, ಮಾಧವ ಕಾರಂತ್ ಮೊಕುಲು ಮಾತ ಇತ್ತೆರ್.

Suratkal: A lorry carrying Jowar catches fire ಸುರತ್ಕಲ್: ಜೋಳದ ಲಾರಿಡ್ ಆಕಸ್ಮತ್ ಆದ್ ಪೊತ್ತಿನ ತೂ

ಸುರತ್ಕಲ್: ಜೋಳದ ಕೊನೊವೊಂದಿತ್ತಿನ ಲಾರಿಡ್ ಆಕಸ್ಮತ್ ಆದ್ ತೂ ಪೊತ್ತಿನ ಘಟನೆ ಸುರತ್ಕಲ್ ಕೈತಲ್‌ದ ಗೋವಿಂದಾಸ್ ಕಾಲೇಜ್‌ದ ಎದುರುಡು ಇಪ್ಪುನ ಮಾರ್ಗಡ್ ನಡತ್ಂಡ್.

ಘಟನೆಡ್ ಕೆಲಪೊರ್ತು ಗಾಡಿದ ಸವಾರಿ ಉಂತುದ್ಂಡ್. ಒವ್ವೇ ರೀತಿದ ಅಪಾಯ ಆತಿಜಿ ಪಂದ್ ತೆರಿದ್ ಬೈದ್ಂಡ್.

Mangalore: Mullia Muhilan M P takes charge as the new DC of Dakshina Kannada district ಕುಡ್ಲ: ದ.ಕ. ಜಿಲ್ಲೆದ ಪೊಸ ಜಿಲ್ಲಾಧಿಕಾರಿ ಆದ್ ಮುಲೈ ಮುಹಿಲನ್ ಅಧಿಕಾರ ಸ್ವೀಕಾರ

ಕುಡ್ಲ: ದ.ಕ. ಜಿಲ್ಲೆದ ಪೊಸ ಜಿಲ್ಲಾಧಿಕಾರಿಯಾದ್ ಮುಲೈ ಮುಹಿಲನ್ ಎಂ.ಪಿ. ಜೂನ್ 17 ಕ್ಕ್ ಸನಿವಾರ ಅಧಿಕಾರ ಸ್ವೀಕಾರ ಮಲ್ತ್‌ದೆರ್.

ಈ ಪಿರವು ಜಿಲ್ಲಾಧಿಕಾರಿ ಆದಿತ್ತಿನ ಎಂ.ಆರ್.ರವಿ ಕುಮಾರ್ ಮೇರ್ ಪೊಸ ಜಿಲ್ಲಾಧಿಕಾರಿಲೆಗ್ ಅಧಿಕಾರ ಹಸ್ತಾಂತರ ಮಲ್ತೆರ್. ಮುಲೈ ಮುಹಿಲನ್ ಮೇರ್ ಉಂದೆರ್ದ್ ದುಂಬು ಸೆಂಟರ್ ಫಾರ್ ಸ್ಮಾರ್ಟ್ ಗವರ್ನೆನ್ಸ್ ಬೆಂಗ್ಲೂರ್ ಉಂದೆತ್ತ ಕಾರ್ಯಕಾರಿ ನಿರ್ದೇಶಕೆರಾದಿತ್ತೆರ್.

Mangalore : A person duped of 2.59 lakh rupees after clicking a link on telegram app ಕುಡ್ಲ: ಟೆಲೆಗ್ರಾಂಡ್ ಲಿಂಕ್ ಕಡಪಾದ್ 2.59 ಲಕ್ಷ ರೂ. ವಂಚನೆ

ಕುಡ್ಲ: ಟೆಲಿಗ್ರಾಂ ಮುಕೇನ ಲಿಂಕ್ ಕಡಪಾದ್, ಕಮಿಷನ್ ಕೊರ್ಪೆ ಪಂದ್ ನಂಬಾದ್ ವಂಚನೆ ಮಲ್ತಿನ ಘಟನೆ ನಡತ್ಂಡ್.

ಜೂ.7 ಕ್ಕ್ ಗುರ್ತದಾಂತಿನ ಜನ ವಾಟ್ಸಪ್‌ಡ್ ಮೆಸೇಜ್ ಬೊಕ್ಕ ಟೆಲೆಗ್ರಾಂಡ್ ಲಿಂಕ್ ಕಡಪಾದಿತ್ತ್‌ದ್, ಈ ಮುಕೇನ ಟಾಸ್ಕ್ ಮಲ್ತ್ಂಡ ಕಮಿಷನ್ ಕೊರ್ಪ ಪಂದ್ ಪಂದಿತ್ತೆರ್. ಉಂದೆನ್ ನಂಬಿನ ಜನ ಹಂತಹಂತವಾದ್ ಒಟ್ಟು 2.59 ಲಕ್ಷ ರೂ. ವರ್ಗಾವಣೆ ಮಲ್ತ್‌ದೆರ್. ಆಂಡ ಅರೆಗ್ ಕಾಸ್ ಕೊರಂದೆ ವಂಚನೆ ಮಲ್ತ್‌ದೆರ್. ಪೇಂಟೆದ ಸೆನ್ ಠಾಣೆಡ್ ಈ ಕೇಸ್ ದಾಖಲ್ ಆತ್ಂಡ್.

Mangaluru: State govt announces Rs 25 lac each compensation for victims of communal violence ಫಾಝೀಲ್, ಜಲೀಲ್, ಮಸೂದ್, ದೀಪಕ್ ಕುಟುಮಗ್ 25 ಲಕ್ಷ ರೂ. ಪರಿಹಾರ ಘೋಷಣೆ ಮಲ್ತಿನ ಸಿಎಂ

ಕುಡ್ಲ: ದುಷ್ಕರ್ಮಿಲೆರ್ದ್ ದ.ಕ ಜಿಲ್ಲೆಡ್ ಕೆರಿನ ನಾಲ್ ಜನತ್ತ ಕುಟುಮಗ್ ಮುಖ್ಯಮಂತ್ರಿ ಪರಿಹಾರ ಸಿಧಿರ್ದ್ ತಲಾ 25 ಲಕ್ಷ ರೂ. ಪರಿಹಾರ ಘೋಷಣೆ ಆತ್ಂಡ್ ಪಂದ್ ರಾಜ್ಯ ಸರ್ಕಾರ ಆದೇಶ ಮಲ್ತ್‌ದ್ಂಡ್.

2018 ತ್ತ ಜನವರಿ ೩ ಕ್ಕ್ ಕಾಟಿಪಳ್ಳದ ದೀಪಕ್ ರಾವ್, ಕರಿನ ವರ್ಷ ಜುಲೈ 19 ಗ್ ಬೆಳ್ಳಾರೆದ ಮಸೂದ್, ಜುಲೈ 28 ಗ್ ಮಂಗಳಪೇಟೆದ ಮುಹಮ್ಮದ್ ಫಾಝಿಲ್, ಡಿಸೆಂಬರ್ 24 ಕ್ಕ್ ಕಾಟಿಪಳ್ಳದ ಅಬ್ದುಲ್ ಜಲೀಲ್ ಮೊಕುಲೆನ್ ದುಷ್ಕರ್ಮಿಲು ಕೆರ್ದಿತ್ತೆರ್.

ರಾಜ್ಯ ಪೊಲೀಸ್ ಇಲಾಖೆದ ಮಹಾನಿರ್ದೇಶಕೆರ್ ಸರಕಾರದ ಮುತಾಲಿಕೆಡ್ ಪರಿಹಾರ ಧನ ಮಂಜೂರು ಮಲ್ಪಿಲೆಕ್ಕ ಒಳಾಡಳಿತ ಇಲಾಖೆಗ್ ಪಂದಿತ್ತೆರ್. ಅಂಚಾದ್ ಈ ಪರಿಹಾರನ್ ಘೋಷಣೆ ಮಲ್ತ್‌ದೆರ್. ಜೂ.19 ಗ್ ಪರಿಹಾರ ಧನದ ಚೆಕ್ ಪಡೆಯುಲೆಕ್ಕ ಪಂತೆರ್.

Much-awaited Kannada movie ‘Bera’ releases at Big Cinemas in Mangaluru ವಿನು ಬಳಂಜ ನಿರ್ದೇಶನದ “ಬೇರ” ಪಿಚ್ಚರ್ ಬುಡುಗಡೆ

ಎಸ್‌ಎಲ್‌ವಿ ಪ್ರೊಡಕ್ಷನ್ ಹೌಸ್‌ಡ್ ದಿವಾಕರ್ ದಾಸ್ ನಿರ್ಮಾಣದ ವಿನು ಬಳಂಜ ನಿರ್ದೇಶನಡ್ ತಯಾರ್ ಆಯಿನ ಪಿಚ್ಚರ್ “ಬೇರ” ಭಾರತ್ ಮಾಲ್‌ದ ಬಿಗ್ ಸಿನಿಮಾಸ್‌ಡ್ ಸುಕ್ರಾರ ಕಾಂಡೆ ಬುಡುಗಡೆ ಆಂಡ್. ಪಿಚ್ಚರ್‌ದ ನಿರ್ಮಾಪಕೆರ್, ನಿರ್ದೇಶಕೆರ್ ಆಯಿನ ಪ್ರಕಾಶ್ ಪಾಂಡೇಶ್ವರ್ ಲೇಸ್‌ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಅಯಿರ್ದ್ ಬೊಕ್ಕ ಪಾತೆರಿನ ಆರ್, ಇನಿ ಕರ್ನಾಟಕ ರಾಜ್ಯಡ್ ಬೇರ ಪಿಚ್ಚರ್ ಬುಡುಗಡೆ ಆತ್ಂಡ್. ಈ ಪಿಚ್ಚರ್‌ಡ್ ಹಿಂದೂ ಮುಸ್ಲಿಂನಕ್ಲೆನ ಬಾಂಧವ್ಯದ ಕತೆ ಉಂಡು ಪಂದ್ ನಿರ್ದೇಶಕೆರ್ ಪಂತೆರ್. ಪಿಚ್ಚರ್‌ದ ಅಭಿಮಾನಿಲು ಸಾಮಾಜಿಕ ಸಾಮರಸ್ಯ ಸಾರುನ ಇಂಚಿನಿ ಪಿಚ್ಚರ್‌ನ್ ತೂವೊಡು ಪಂದ್ ಪಂಡೆರ್.

ಪಿಚ್ಚರ್‌ದ ನಟೆ ಸ್ವರಾಜ್ ಶೆಟ್ಟಿ ಪಾತೆರ್ದ್, ಉಂದೊಂಜಿ ಬೇತೆ ರೀತಿಡ್ ಕಥೆ ಇಪ್ಪುನ ಪಿಚ್ಚರ್. ಉಂದೆಟ್ ಮಸ್ತ್ ಕಿರಿಯ ಬೊಕ್ಕ ಹಿರಿಯ ಕಲಾವಿದೆರ್ ರಂಗ್ ಪಾಡ್ದೆರ್. ಅಕ್ಲೆಗ್ ಮಾತ ನಿಕ್ಲೆನ ಪ್ರೋತ್ಸಾಹದ ಅಗತ್ಯ ಉಂಡು. ಪಿಚ್ಚರ್‌ನ್ ತೂದು ಕಲಾವಿದೆರೆಗ್ ಪ್ರೋತ್ಸಾಹ ಕೊರ್ಲೆ ಪಂದ್ ಪಂಡೆರ್.

ಹಿರಿಯ ರಂಗಕರ್ಮಿ ವಿ. ಜಿ. ಪಾಲ್, ಹಿರಿಯ ಕಲಾ ನಿರ್ದೇಶಕೆರ್ ತಮ್ಮ ಲಕ್ಷ್ಮಣ, ಎಂ.ಕೆ.ಮಠ, ಪ್ರಕಾಶ್ ಪಾಂಡೇಶ್ವರ್, ಕಿಶೋರ್ ಶೆಟ್ಟಿ, ಉದ್ಯಮಿ ಪ್ರೇಮ್ ಶೆಟ್ಟಿ, ಜಾನ್ಸನ್ ಮಾರ್ಟೀಸ್, ಎಕೆ ವಿಜಯ ಕೋಕಿಲ, ನಟೆರ್ ಆಯಿನ ದೀಪಕ್ ರೈ ಪಾಣಾಜೆ, ತಮ್ಮಣ್ಣ ಶೆಟ್ಟಿ, ಸ್ವರಾಜ್ ಶೆಟ್ಟಿ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

Mullai Muhilan MP appointed Deputy Commissioner of DK District ದ.ಕ ಜಿಲ್ಲೆದ ಪೊಸ ಜಿಲ್ಲಾಧಿಕಾರಿಯಾದ್ ಮುಲ್ಲೈ ಮುಹಿಲನ್ ನೇಮಕ

ಕುಡ್ಲ: ದ.ಕ.ಜಿಲ್ಲಾಧಿಕಾರಿ ರವಿ ಕುಮಾರ್ ಅರೆನ್ ವರ್ಗಾವಣೆ ಮಲ್ತ್‌ದ್ ರಾಜ್ಯ ಸರ್ಕಾರ ಸುಕ್ರಾರ ಆದೇಶ ಕೊರ್ತ್ಂಡ್. ಪೊಸ ಜಿಲ್ಲಾಧಿಕಾರಿಯಾದ್ ಸ್ಮಾರ್ಟ್ ಗವರ್ನೆನ್ಸ್ ಬೆಂಗ್ಲೂರ್ ಉಂದೆತ್ತ ಕಾರ್ಯನಿರ್ವಾಹಕೆರ್ ನಿರ್ದೇಶಕೆರ್ ಆಯಿನ ಮುಲೈ ಮುಹಿಲನ್ ಎಂ.ಪಿ. ನೇಮಕ ಆತೆರ್.

ಜಿಲ್ಲಾ ಪಂಚಾಯತ್ ಕಾರ್ಯನಿರ್ವಾಹಣಾಧಿಕಾರಿ ಆದಿತ್ತಿನ ಡಾ. ಕುಮಾರ್ ಮೇರ್ ಮಂಡ್ಯ ಜಿಲ್ಲಾಧಿಕಾರಿಯಾದ್ ನೇಮಕ ಆತೆರ್.

ಮುಲ್ಲೈ ಮುಹಿಲನ್ ತಮಿಳುನಾಡ್‌ದಾರ್ ಆದಿತ್ತ್‌ದ್, ದಿಂಡಿಗಲ್ ಅಣ್ಣಾ ವಿಶ್ವವಿದ್ಯಾಲಯದ ಪಿಎಸ್‌ಎನ್‌ಎ ಕಾಲೇಜ್ ಆಫ್ ಇಂಜಿನಿಯರಿಂಗ್ ಬೊಕ್ಕ ಟೆಕ್ನಾಲಜಿಡ್ ಕಲ್ತ್‌ದ್ ಕಂಪ್ಯೂಟರ್ ವಿಷಯಡ್ ಪದವಿ ಪಡೆತ್ತೆರ್. 1986 ಡ್ ಪುಟ್ಟಿನ ಆರ್, 2013 ಬ್ಯಾಚ್‌ದ ಐಎಎಸ್ ಅಧಿಕಾರಿ ಆತೆರ್.

City police led anti-communal wing starts functioning in Mangaluru ಕುಡ್ಲಡ್ ಆಂಟಿ ಕಮ್ಯುನಲ್ ವಿಂಗ್ ಸ್ಥಾಪನೆ-ಪೊಲೀಸ್ ಕಮಿಷನರ್ ಮಾಹಿತಿ

ಕುಡ್ಲ: ಆಂಟಿ ಕಮ್ಯುನಲ್ ವಿಂಗ್ ಸ್ಥಾಪನೆಗ್ ಗೃಹ ಸಚಿವೆರ್ ಪರಮೇಶ್ವರ್ ಸೂಚನೆ ಕೊರ್ತಿನ ನಿಲೆಟ್ ಕುಡ್ಲ ಕಮಿಷನರ್ ವ್ಯಾಪ್ತಿಡ್ ಎಸಿಬಿ ಮುತಾಲಿಕೆಡ್ ವಿಂಗ್ ಸ್ಥಾಪನೆ ಮಲ್ತ್‌ದ ಪಂದ್ ಪೊಲೀಸ್ ಆಯುಕ್ತೆರ್ ಕುಲದೀಪ್ ಜೈನ್ ತೆರಿಪಾದೆರ್.

ಈ ಬಗೆಟ್ ಮಾಹಿತಿ ಕೊರಿನ ಆರ್, ಸಿಎಸ್ಬಿ ಇನ್ಸ್‌ಪೆಕ್ಟರ್ ಮುತಾಲಿಕೆಡ್ ಕಾರ್ಯಾಚರಣೆ ನಡಪರೆ ಇತ್ತ್‌ದ್, ಈ ತಂಡರ್ದ್ ಪೇಂಟೆಡ್ ಆಪಿನ ಕೋಮು ಪ್ರೇರಣೆ ಮಿತ್ತ್ ನಿಗ ದಿಯರೆ ಇತ್ತ್‌ದ್, ಒವ್ವೇ ರೀತಿದ ದ್ವೇಷ ಭಾಷಣ ಅಂಚನೆ ಕೋಮು ಸೂಕ್ಷ್ಮ ವಿಚಾರದ ಬಗೆಟ್ ಗಮನಗ್ ದೆತೊನರೆ ಉಂಡು ಪಂಡೆರ್. ಕರಿನ ರಡ್ಡ್ ದಿನರ್ದ್ ಈ ವಿಂಗ್ ಕಾರ್ಯಾಚರಣೆ ಮಲ್ತ್‌ದಿತ್ತ್‌ದ್, ತಂಡಡ್ 5-6 ಪೊಲೀಸ್ ಸಿಬ್ಬಂದಿಲೆನ್ ನೇಮಕ ಮಲ್ತ್‌ದೆರ್.

ಬುಡುಗಡೆ ಆಂಡ್ “ಭ್ರಮರಾಂಬಿಕೆಗ್ ಪೂತ್ತ ಪೂಜೆ” ಭಕ್ತಿ ಸುಗಿಪು

ಬೆಂಗ್ಲೂರು: ಶ್ರೀ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಅಪ್ಪೆಗ್ ಭಕ್ತಿ ಸುಗಿಪು ಅರ್ಪಣೆ ಮಲ್ಪುನ ಮುಕೇನ ತುಳುನಾಡ್ದ ಪೆರ್ಮೆದ ಯುವ ಗಾಯಕೆ ನಿರಂಜನ್ ಕುಮಾರ್ ಕಟೀಲ್ ಮೆರೆನ ಸಿರಿ ಕಂಠೊಡು ಜೂನ್ 14 ಬುಧವಾರ ಶ್ರೀ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಅಪ್ಪೆನ “ಭ್ರಮರಾಂಬಿಕೆಗ್ ಪೂತ್ತ ಪೂಜೆ” ಭಕ್ತಿ ಸುಗಿಪು ಬುಡುಗಡೆ ಆಂಡ್.

“ಭ್ರಮರಾಂಬಿಕೆಗ್ ಪೂತ್ತ ಪೂಜೆ” ಸುಗಿಪುದ ಸಾಹಿತ್ಯೊನು ಜಿ.ಎಸ್.ಗುರುಪುರ ಮೇರ್ ಬರೆತೆರ್. ನಿರ್ಮಾಣನೊ ‘ಮಾತೃಚಿತ್ತ’ ವಹಿಸೊಂದುಂಡು.

ಲಾಸ್ಯ ನಿರಂಜನ್ ಬೊಕ ಚೈತ್ರ ಕಲ್ಲಡ್ಕ ಮೊಕೆಲನ ಸಹಕಾರದೊಟ್ಟುಗು ಮಾತೃಚಿತ್ತ ಕ್ರಿಯೇಷನ್‌ದ ಯೂಟ್ಯೂಬ್ ಚಾನಲ್ ಡ್ ಬುಡುಗಡೆ ಆತ್ಂಡ್.

Mangaluru: Two involved in house break-ins arrested, items worth over Rs 56 lac seized ಇಲ್ಲದ ಬಾಕಿಲ್ ಹಾಕ್‌ದ್ ಬಂಗಾರ್, ಬೊಲ್ಲಿ ಬೊಕ್ಕ ಕಾಸ್‌ನ್ ಕಂಡಿನ ಆರೋಪಿಲು ಅರೆಸ್ಟ್

ಇಲ್ಲದ ಬಾಕಿಲ್ ಹಾಕ್‌ದ್ ಬಂಗಾರ್, ಬೊಲ್ಲಿ ಬೊಕ್ಕ ಕಾಸ್‌ನ್ ಕಂಡ್‌ದಿನ ಕಲ್ವೆರೆನ್ ಕುಡ್ಲ ಸಿಸಿಬಿ ಪೊಲೀಸೆರ್ ನಾಡ್ ಪತ್ತ್‌ದ್ 1 ಕೆ.ಜಿ ಬಂಗಾರ್‌ನ್ ವಶಕ್ಕ್ ಪಡೆಯೊನಿನ ಘಟನೆ ಮುಲ್ಕಿ ಪೊಲೀಸ್ ಠಾಣಾ ವ್ಯಾಪ್ತಿಡ್ ನಡತ್ಂಡ್.

ಗಣೇಶ್ ನಾಯ್ಕ್ (26) ಬೊಕ್ಕ ರಂಜಿತ್ ಕೆ.ಆರ್ (26) ಅರೆಸ್ಟ್ ಆಯಿನ ಆರೋಪಿಲು. ಜನವರಿ ೧೫ ಕ್ಕ್ ಕಾಂಡೆ ಕುಡ್ಲ ತಾಲೂಕ್‌ದ ತಾಳಿಪ್ಪಾಡಿ ಗ್ರಾಮದ ಗುತ್ತಕಾಡು ಪನ್ಪಿನಲ್ಪ ಐಕಳ ಹರೀಶ್ ಮೆರೆನ ಚಂದ್ರಿಕಾ ಪನ್ಪಿನ ಇಲ್ಲದ ಎದುರುದ ಬಾಕಿಲ್‌ದ ಲಾಕ್‌ನ್ ಏರಾ ಕಲ್ವೆರ್ ಪೊಲ್ಲಿದ್ ಬಂಗಾರ್ ಬೊಕ್ಕ ಬೊಲ್ಲಿ, ಕಾಸ್‌ನ್ ಕಂಡ್‌ದಿತ್ತೆರ್. ಒಟ್ಟು 55 ಲಕ್ಷ ಬಿಲೆತ್ತ ಸ್ವತ್ತೊಲೆನ್ ಕಲ್ವೆರ್ ಕಂಡ್‌ದಿತ್ತೆರ್.

ಈ ಬಗೆಟ್ ಮುಲ್ಕಿ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆದಿತ್ತ್ಂಡ್. ಈ ಕಲ್ವೆರ್ ಇತ್ತೆ ಕುಡ್ಲ ಸಿಸಿಬಿ ಪೊಲೀಸೆರ್ ಕೈಕ್ ತಿಕ್ಕ್‌ದ್ ಬೂರ್ದೆರ್.