ಕುಡ್ಲದ ಸುದ್ದಿ | Mangalore News

ಕುಡ್ಲ: ಡ್ರೈವರ್‌ನ ಕೈ ತತ್ತ್‌ದ್ ಅಂಗಡಿಗ್ ಪೊಗ್ಗಿನ ವ್ಯಾನ್

ಕುಡ್ಲ: ಡ್ರೈವರ್‌ನ ಅಕಲ್ ತತ್ತ್‌ದ್ ಗಾಡಿಯೊಂಜಿ ಅಂಗಡಿ ಅಂಚನೆ ಗ್ಯಾರೇಜ್‌ಗ್ ಪೊಗ್ಗಿನ ಘಟನೆ ಬಿಕರ್ನಕಟ್ಟೆಡ್ ನಡತ್ಂಡ್.

ಮರೋಳಿಡ್ ಇಪ್ಪುನ ವೃಧ್ದಾಶ್ರಮಗ್ ಸೇರಿನ ವ್ಯಾನ್ ಉಂದಾದಿತ್ತ್‌ದ್ ಸವಾರಿಜ ಮಲ್ತೊಂದಿಪ್ಪುನಗ ಡ್ರೈವರ್‌ನ ಕೈ ತತ್ತ್‌ದ್ಂಡ್. ಕಾಂಡೆದ ಪೊರ್ತು ಆತಿನೆಡ್ದಾವರ ಜಾಗೆಡ್ ಎಚ್ಚದ ಜನ ಇಜ್ಜಾಂಡ್. ಘಟನೆಡ್ ಡ್ರೈವರ್ ಬಚಾವ್ ಆತೆರ್.

ಬಪ್ಪನಾಡ್ ಜಾತ್ರೆಗ್ ಪಗೆಲ್ ತೇರ್, ಮಲ್ಲಿಗೆದ ರಾಶಿಡ್ ಶಯನೋತ್ಸವ, ಭಕ್ತೆರೆರ್ದ್ ಲಕ್ಷಾಂತರ ಅಟ್ಟಿ ಮಲ್ಲಿಗೆ ಸಂದೈತ

ಮೂಲ್ಕಿ: ಕೋಮು ಸೌಹಾರ್ದತೆದ ಪರಪೋಕು(ಇತಿಹಾಸ) ಇತ್ತಿನ ಮೂಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನಡ್ ಜಾತ್ರೆದ ನಿಲೆಟ್ಟ್ ಅಂಗಾರೆ ಪಗೆಲ್ ತೇರ್ ರಾತ್ರೆ ಬಲಿ ಉಚ್ಚಯ ನಡತ್ ದ್ ಶುನೋತ್ಸವ ನಡತ್‌ಂಡ್.

ಕಾಂಡೆ ಪಗೆಲ್ ತೇರ್ ದ ಉಚ್ಚಯ ಆಯಿ ಬೊಕ್ಕ ಭಕ್ತೆರೆಗ್ ಅಲೆ ನೀರ್ ದ ಸೇವೆ, ಮಧ್ಯಾಹ್ನ ಅನ್ನ ಸಂತರ್ಪಣೆ ನಡತ್ಂಡ್. ಬಯ್ಯಡ್ ಶ್ರೀ ಪಂಚದುರ್ಗೆನ ಶಯನೋತ್ಸವಗ್ ಭಕ್ತೆರ್ ಲಕ್ಷಾಂತರ ಮಲ್ಲಿಗೆದ ಅಟ್ಟಿಲೆನ್ ಕನತ್ ದ್ ದೇವೆರೆಗ್ ಅರ್ಪಿಸಾದ್ ಪ್ರಾರ್ತನೆ ಮಲ್ತೆರ್. ಜಾತ್ರಾ ಮಹೋತ್ಸವದ ಅಂಗವಾದ್ ಬಾಕಿಮಾರ್ ದೀಪೋತ್ಸವ, ಬೊಂಬೆ ರಥೋತ್ಸವ, ಬಂಗಾರ್ದ ಪಲ್ಲಕ್ಕಿ ಉತ್ಸವ ನಡತ್‌ಂಡ್. ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ ಬೊಕ್ಕ ನರಸಿಂಹ ಭಟ್ ನೇತೃತ್ವದಲ್ಲಿ ಧಾರ್ಮಿಕ ವಿಧಿ ವಿಧಾನ ನಡತ್ಂಡ್.

ಮುಲ್ಕಿ ಸೀಮೆದ ಅರಸು ವಂಶಸ್ಥರಾಯಿನ ದುಗ್ಗಣ್ಣ ಸಾವಂತೆರ್, ದೇವಲ್ಯದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಜಯಮ್ಮ, ಅಧಿಕಾರಿ ಶಿವಶಂಕರ್ ಮೊಕುಲು ಮಾತ ಇತ್ತೆರ್.

ಈ ಪೊರ್ತುಡು ದೇವಿನ ಶಯನೋತ್ಸವಗ್ ಬೋಡಿತ್ತಿನ ಮಲ್ಲಿಗೆನ್ ಶಿಮಂತೂರು ಯುವಕ ಮಂಡಲದ ಮುಕೇನ ಮಾರಾಟ ಮಲ್ತ್ ದ್ ಅಯಿಟ್ಟ್ ಒರಿವುನ ಲಾಭದ ದುಡ್ಡುನು ಅಂಗರಗುಡ್ಡೆದ ಬಡ ಕುಟುಂಬದ ಇಲ್ಲ್ ಕಟ್ಟರೆ ಕೊರ್ಪಿನ ಉದ್ದೇಶ ದೀವೊಂದೆರ್.

ಭಕ್ತರೆರ್ದ್ ಸಾಲ್ ಸಾಲಾದ್ ಮಲ್ಲಿಗೆ ಸಂದೈತ ಆಯಿಬೊಕ್ಕ ಮಲ್ಲಿಗೆನ್ ಸ್ಥಳೀಯ ಸಂಘ ಸಂಸ್ಥೆದ ಪ್ರಮುಖೆರ್ ಬೊಕ್ಕ ಸ್ವಯಂ ಸೇವಕೆರ್ ದೇವಸ್ಥಾನದ ಜಗಲಿಡ್ ಭಾರಿ ಪೊರ್ಲುಡೆ ಸಿಂಗಾರ ಮಲ್ದೆರ್.

ಸಾಂಸ್ಕ್ರತಿಕ ಕಾರ್ಯಕ್ರಮದ ಅಂಗವಾದ್ ಬಪ್ಪನಾಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ ಡ್ಯಾಜೆಲ್ ಸ್ಟುಡಿಯೊ ಮುಲ್ಕಿ ಮುಲ್ತ ಯಕ್ಷಗಾನ ತರಬೇತಿ ಕೇಂದ್ರದ ವಿದ್ಯಾರ್ತಿಲೆರ್ದ್ ಶ್ರೀ ಕೃಷ್ಣ ಲೀಲೆ ಬೊಕ್ಕ ಗಜೇಂದ್ರ ಮೋಕ್ಷ ಯಕ್ಷಗಾನ ನಡತ್ಂಡ್.

ರಾಜ್ಯದ ಸಮಗ್ರ ಅಭಿವೃದ್ಧಿಗ್ ಬಿಜೆಪಿ ಬೆಂಬಲ ಕೊರ್ಲೆ: ಗೌರವ್ ಭಾಟಿಯ ಕುಡ್ಲಡ್ ಬಿಜೆಪಿ ವಿಭಾಗೀಯ ಮಾಧ್ಯಮ ಕೇಂದ್ರ ಉದಿಪನ

ಕುಡ್ಲ: ಕರ್ನಾಟಕದ ಸಂಪೂರ್ಣ ಅಭಿವೃದ್ಧಿದ ಕನ ಕಟ್ ದ್ ಅವೆನ್ ನಿಜ ಮಲ್ಪುನ ಸಾಮರ್ಥ್ಯ ಡಬಲ್ ಎಂಜಿನ್ ಸರಕಾರೊಗು ಉಂಡು. ಅಂಚಾದ್ ಕರ್ನಾಟಕಡ್ ಕುಡೊರ ಬಿಜೆಪಿ ಸರಕಾರನ್ ಜನತೆ ಆಯ್ಕೆ ಮಲ್ಪೊಡು ಪಂದ್ ಬಿಜೆಪಿ ರಾಷ್ಟ್ರೀಯ ವಕ್ತಾರೆರ್ ಗೌರವ್ ಭಾಟಿಯ ಪಂಡೆರ್.

ಆರ್ ಕುಡ್ಲಡ್ ಬಿಜೆಪಿದ ವಿಭಾಗ ಮಟ್ಟದ ಮಾಧ್ಯಮ ಕೇಂದ್ರದ ಉದಿಪನ ಮಲ್ತ್‌ದ್ ಸುದ್ದಿಗೋಷ್ಠಿಡ್ ಪಾತೆರಿಯೆರ್.

ಕರ್ನಾಟಕ ಬೊಕ್ಕ ಕನ್ನಡಿಗೆರೆಗ್ ಸಂಬಂಧಿಸಾದ್ ದೂರದೃಷ್ಟಿದ ಚಿಂತನೆ ಬೊಕ್ಕ ಅಭಿವೃದ್ಧಿಗೆ ವಿಶೇಷ ಕಾರ್ಯಕ್ರಮ ಲೆನ್ ನರೇಂದ್ರ ಮೋದಿಜಿ ಪಾಡ್ದೆರ್ ಪಂದ್ ತೆರಿಪಾಯೆರ್.

ದೇಶದ ಅಭಿವೃದ್ಧಿಗ್ ರಾಜ್ಯದ ಕೊಡುಗೆ ಭಾರಿ ಮಲ್ಲೆ ಪಂದ್ ಪಂಡಿನ ಆರ್, ನಮ್ಮ ಡಬಲ್ ಎಂಜಿನ್ ಸರಕಾರ ಆಂಡ ಕಾಂಗ್ರೆಸ್ ದ ಟ್ರಬಲ್ ಎಂಜಿನ್ ಸರಕಾರ ಪಂದ್ ಟೀಕೆ ಮಲ್ತೆರ್.

ನರೇಂದ್ರ ಮೋದಿಜಿ ದೂರದೃಷ್ಟಿದ ನಾಯಕರಾದಿತ್ತ್ ದ್ ವಿಶ್ವನಾಯಕೆರಾದ್ ಬೈದೆರ್. ಮೋದಿಜಿನ ಅಭಿವೃದ್ಧಿದ ಪರಿಕಲ್ಪನೆ ಬೊಕ್ಕ ದೂರದೃಷ್ಟಿದ ಯೋಜನೆಲೆನ್ ರಾಜ್ಯದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸಮರ್ಥವಾದ್ ಅನುಷ್ಠಾನಗ್ ಕನದೆರ್ ಪಂದ್ ಮೆಚ್ಚಿಯೆರ್.

ಸಿ ಫಾರ್ ಕಾಂಗ್ರೆಸ್ ಮಾತ್ರ ಅತ್ತ್, ಸಿ ಫಾರ್ ಕನ್‍ಫ್ಯೂಶನ್ , ಸಿ ಫಾರ್ ಕರಪ್ಶನ್ ಪಂದ್ ಲಾ ಆಪುಂಡು. ಕಾಂಗ್ರೆಸ್ ಪಕ್ಷನ್ ಭ್ರಷ್ಟಾಚಾರದ ಅಪ್ಪೆ ಪಂದ್ ಟೀಕೆ ಮಲ್ತೆರ್.

ರಾಷ್ಟ್ರಹಿತ ಬೊಕ್ಕ ಪ್ರಾದೇಶಿಕ ಹಿತಕ್ಕ್ ನಮ ಆದ್ಯತೆ ಕೊರ್ಪ. ಡಬಲ್ ಎಂಜಿನ್ ಸರಕಾರ ರೈತೆರೆಗ್ 6 ಸಾವಿರ ರೂ.ನ್ ಕೇಂದ್ರ ಸರಕಾರರ್ದ್ ಬೊಕ್ಕ 4 ಸಾವಿರನ್ ರಾಜ್ಯದ ಬಿಜೆಪಿ ಸರಕಾರ ಕೊರೊಂದುಂಡು. ತುಷ್ಟೀಕರಣ ನೀತಿ ಎಂಕಲ್ನ ಅತ್ತ್ ಪಂಡೆರ್.

ಸ್ವಚ್ಛ ಭಾರತ ಯೋಜನೆಡ್ ರಾಜ್ಯಡ್ 48 ಲಕ್ಷ ಶೌಚಾಲಯ ನಿರ್ಮಾಣ ಮಲ್ತ್‌ದ್ ಪೊಂಜೊವುಲೆನ ಘನತೆ ಎಚ್ಚ ಮಲ್ತ್ ದ್ಂಡ್. ಜಲಜೀವನ್ ಮಿಷನ್ ಯೋಜನೆಡ್ ಶುದ್ಧ ನೀರ್ ನ್ 1 ಕೋಟಿರ್ದ್ ಲ ಎಚ್ಚ ಇಲ್ಲ್ ಲೆಗ್ ಕೊರ್ತುಂಡು ಪಂದ್ ತೆರಿಪಾಯೆರ್.

7 ಲಕ್ಷ ಇಲ್ಲ್ ಕಟ್ಟರೆ ಕ್ರಮ, 32 ಲಕ್ಷ ಸಿಲಿಂಡರ್ ಸಂಪರ್ಕ, ಆಯುಷ್ಮಾನ್ ಭಾರತ್ ಯೋಜನೆಯಡಿ 15 ಲಕ್ಷ ಜನಕ್ಲೆಗ್ ಲ ಚಿಕಿತ್ಸೆ ಉಂದು ಮಾತ ನಮ್ಮ ಸಾಧನೆ ಪಂದ್ ಪಂಡೆರ್.

ರಾಷ್ಟ್ರೀಯ ಭದ್ರತೆ, ಜನರ ಹಿತಾಸಕ್ತಿಗ್ ಎಂಕುಲು ಆದ್ಯತೆ ಕೊರ್ತ ತುಷ್ಟೀಕರಣಕ್ಕಾದ್ ಕಾಂಗ್ರೆಸ್ ಪಕ್ಷ ಪಿಎಫ್‍ಐ, ಎಸ್‍ಡಿಪಿಐ ಒಟ್ಟುಗು ಸಂಪರ್ಕ ದೀವೊಂದಿತ್ತ್ಂಡ್. ಅವು ಉದಲ್ (ಗೆದ್ದಲು) ಪುರಿತ್ತಲೆಕ ಪಂದ್ ಪಂಡಿನ ಆರ್ ರಾಷ್ಟ್ರೀಯ ಭದ್ರತೆ ವಿಚಾರೊಡು ಹೊಂದಾಣಿಕೆ ಮಲ್ದಿನ ಸಿದ್ದರಾಮಯ್ಯ ಪಿಎಫ್‍ಐ, ಎಸ್‍ಡಿಪಿಐ ನಾಯಕೆರ್ ಬೊಕ್ಕ ಕಾರ್ಯಕರ್ತೆರ್ನ ಮಿತ್ತ್ ದ 1700 ಕೇಸ್ ನ್ ರದ್ದ್ ಮಲ್ದೆರ್ ಪಂದ್ ಪಂಡೆರ್.

ರಾಜ್ಯ ವಕ್ತಾರೆರ್ ಅಂಚೆನೆ ವಿಧಾನಪರಿಷತ್ ಮಾಜಿ ಸದಸ್ಯೆರ್ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ಪಾತೆರ್ದ್, 6 ಬೇರೆ ಬೇರೆ ಭಾಗಡ್ ವಿಭಾಗ ಮಾಧ್ಯಮ ಕೇಂದ್ರ ಸುರು ಮಲ್ತ್‌ದ. ದಕ್ಷಿಣ ಕನ್ನಡ, ಒಡಿಪು, ಕೊಡಗು, ಚಿಕ್ಕಮಗಳೂರು ಬೊಕ್ಕ ಶಿವಮೊಗ್ಗ ಜಿಲ್ಲೆ ಸೇರ್ದ್ ಈ ವಿಭಾಗ ಮಾಧ್ಯಮ ಕೇಂದ್ರ ಸ್ಥಾಪನೆ ಮಲ್ತ್ ದ ಪಂಡೆರ್.

ಪತ್ರಿಕಾಗೋಷ್ಠಿಡ್ ವಿಧಾನಪರಿಷತ್ ಸದಸ್ಯೆರ್ ಪ್ರತಾಪ್ ಸಿಂಹ ನಾಯಕ್, ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷ ಸುದರ್ಶನ್ ಎಂ, ಒಡಿಪು ಜಿಲ್ಲಾಧ್ಯಕ್ಷೆರ್ ಕುಯಿಲಾಡಿ ಸುರೇಶ್ ನಾಯಕ್, ರಾಜ್ಯ ಮಾಧ್ಯಮ ಸಂಚಾಲಕೆರ್ ಕರುಣಾಕರ ಖಾಸಲೆ, ರಾಜ್ಯ ಮಾಧ್ಯಮ ಸಮಿತಿ ಸದಸ್ಯ ರತನ್ ರಮೇಶ್ ಪೂಜಾರಿ, ಜಿಲ್ಲಾ ಮುಖ್ಯ ವಕ್ತಾರೆರ್ ರವಿಶಂಕರ್ ಮಿಜಾರ್ ಇತ್ತೆರ್.

ಎ.13: ಲೇಖಕಿ ಶಾರದಾ ಅಂಚನ್ ಮೆರೆನ “ನಂಬಿ ಸತ್ಯೊಲು” ಬೊಕ್ಕ “ರಕ್ತ ಶುದ್ಧಿ-ಆರೋಗ್ಯ ವೃದ್ಧಿ” ಬೊಕ್ಕ ಡಾ.ಪ್ರಭಾಕರ ನೀರ್‌ಮಾರ್ಗ ಇಂಬೆರೆನ ಕಾದಂಬರಿ “ಓಲಗ” ಬೂಕ್ ಬುಡುಗಡೆ ಲೇಸ್

ತುಳು ಪರಿಷತ್, ಮ್ಯಾಪ್ಸ್ ಕಾಲೇಜ್ ಕುಡ್ಲ ಉಂದೆತ್ತ ಒಟ್ಟು ಸೇರಿಗೆಡ್ ಲೇಖಕಿ ಶಾರದಾ ಅಂಚನ್ ಮೆರೆನ “ನಂಬಿ ಸತ್ಯೊಲು” ಬೊಕ್ಕ “ರಕ್ತ ಶುದ್ಧಿ-ಆರೋಗ್ಯ ವೃದ್ಧಿ” ಬೊಕ್ಕ ಡಾ.ಪ್ರಭಾಕರ ನೀರ್‌ಮಾರ್ಗ ಇಂಬೆರೆನ ಕಾದಂಬರಿ “ಓಲಗ” ಬೂಕ್ ಬುಡುಗಡೆ ಲೇಸ್ ಅಂಚನೆ ಬಿಸುತ್ತ ಬಗೆಟ್ ವಿಚಾರ ವಿನಿಮಯ ಲೇಸ್ ಎ.13 ತಾರೀಕ್‌ಗ್ ಕುಡ್ಲದ ಮ್ಯಾಪ್ಸ್ ಕಾಲೇಜಿಡ್ ಮಧ್ಯಾಹ್ನ 3 ಗಂಟೆಗ್ ನಡಪರೆ ಉಂಡು.

ಮಲ್ಲ ಬರವುಗಾರ್ತಿ ಬಿ.ಎಂ.ರೋಹಿಣಿ ಬೂಕು ಬುಡುಗಡೆ ಮಲ್ಪರೆ ಉಲ್ಲೆರ್. ತುಳು ಸಾಹಿತಿ ಕುಶಲಾಕ್ಷಿ ವಿ.ಕುಲಾಲ್ ಕಣ್ವತೀರ್ಥ ಬಿಸು ಪರ್ಬದ ಬಗೆಟ್ ಪಾತೆರಿಯರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮ್ಯಾಪ್ಸ್ ಕಾಲೇಜಿದ ಅಧ್ಯಕ್ಷೆರ್ ದಿನೇಶ್ ಆಳ್ವ, ತುಳು ಪರಿಷತ್‌ದ ಗೌರವ ಅಧ್ಯಕ್ಷೆರ್ ಸ್ವರ್ಣ ಸುಂದರ್, ಗಡಿನಾಡ ಶ್ರೇಯೋಭಿವೃದ್ಧಿ ಟ್ರಸ್ಟ್‌ದ ಅಧ್ಯಕ್ಷೆರ್ ಡಾ.ಹಾಜಿ.ಯಸ್.ಅಬೂಬಕ್ಕರ್ ಆರ್ಲಪದವು ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್. ಈ ಲೇಸ್‌ದ ಗುರ್ಕಾಮೆನ್ ಎಂ.ಆರ್.ಪಿ.ಎಲ್‌ದ ನಿವೃತ್ತ ಮಹಾಪ್ರಬಂಧಕೆರ್ ವೀಣಾ ಶೆಟ್ಟಿ ವಹಿಸೊನರೆ ಉಲ್ಲೆರ್.

ಬಸ್ ಟಿಕೆಟ್‌ದ ರೇಟ್ ಭಾರೀ ಎಚ್ಚ ಮಲ್ತಿನ ಕೆಎಸ್‌ಆರ್‌ಟಿಸಿ

ಕರ್ನಾಟಕ ರಸ್ತೆ ಸಾರಿಗೆ ನಿಗಮ ಬಸ್ ಟಿಕೆಟ್ ದ ರೇಟ್ ನ್ ಭಾರೀ ಪ್ರಮಾಣಡ್ ಎಚ್ಚ ಮಲ್ತ್ ದ್ಂಡ್.

ರಜೆತ್ತ ದಿನಟ್ಟ್ ಬೊಕ್ಕ ವಾರದ ಕಡೆತ್ತ ದಿನಟ್ಟ್ ಪೇಂಟೆದ ನಡುಟ್ಟು ಸವಾರಿ ಮಲ್ಪುನ ಕೆಎಸ್‌ಆರ್‌ಟಿಸಿ ನಾನ್ ಎಸಿ ಸ್ಲೀಪರ್ ಬೊಕ್ಕ ರಾಜಹಂಸ ಬಸ್‌ಲೆಡ್ ಟಿಕೆಟ್ ದ ರೇಟ್ ಎಚ್ಚ ಆತ್ಂಡ್.

ಬೆಂಗ್ಲೂರ್‌ರ್ದು ಕಾರ್ಲಗ್ ಸವಾರಿ ಮಲ್ಪುನ ನಾನ್ ಎಸಿ ಸ್ಲೀಪರ್ ಬಸ್‌ದ ಬಿಲೆ 835 ರೂಪಾಯಿ ಆತ್ಂಡ್. ಕರಿನ ವರ್ಷ ಎಪ್ರಿಲ್‌ಡ್ ಉಂದೆತ್ತ ಬಿಲೆ 778 ರೂಪಾಯಿ ಇತ್ತ್ಂಡ್. ಎ.13 ಕ್ಕ್ ಗುರುವಾರ ಕೆಎಸ್‌ಆರ್‌ಟಿಸಿ ನಾನ್ ಎಸಿ ಸ್ಲೀಪರ್ ಬಸ್ ತ್ತ ರೇಟ್ 992 ರೂಪಾಯಿ ಆತ್ಂಡ್. ಬಾಕಿ ದಿನರ್ದ್ ರಜೆತ್ತ ದಿನಟ್ಟ್ ಬಸ್‌ಡ್ ಪೋವೊಡಾಂಡ 157 ರೂಪಾಯಿ ಎಚ್ಚ ಕಾಸ್ ಕೊರ್ದು ಬಸ್‌ಡ್ ಪೋವೊಡು.

ಬಿರುವೆರ್ ಕುಡ್ಲ ಮುಲ್ಕಿ ಘಟಕರ್ದ್ 70 ನೇ ಸ್ಪಂದನ ಸೇವಾ ಯೋಜನೆ

ಬಿರುವೆರ್ ಕುಡ್ಲ (ರಿ) ಬಳ್ಳಾಲ್ ಬಾಗ್ ಸ್ಥಾಪಕ ಅಧ್ಯಕ್ಷೆರ್ ಉದಯ ಪೂಜಾರಿ ಮೆರೆನ ಮುತಾಲಿಕೆಡ್ ಮುಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್ ಮೆರೆನ ಮಾರ್ಗದರ್ಶನಡ್ ಸದಸ್ಯೆರ್ನ ಎಡ್ಡೆ ಮನಸ್ ಡ್ ನಡತೊಂದು ಬೈದಿನ ಸ್ಪಂದನ ಸೇವಾ ಯೋಜನೆದ 70 ನೇ ಪನವುದ ಸಕಾಯೊನು ಮುಲ್ಕಿ ಚಿತ್ರಾಪು ಗ್ರಾಮದ ಭಾಸ್ಕರ್ ಕೋಟ್ಯಾನ್ ಮೆರೆನ ಮಗಲೆನ ಮದಿಮೆಗಾದ್ ಪಟ್ಟುನ ಲೇಸ್ ಏ.9 ಐತಾರ ನಡತ್ಂಡ್.

ಈ ಪೊರ್ತುಡು ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್, ಉಪಾಧ್ಯಕ್ಷೆರ್ ಉಮೇಶ್ ಮಾನಂಪಾಡಿ, ಕಾರ್ಯದರ್ಶಿ ಗಿರಿಧರ ಅಮೀನ್, ಕೋಶಾಧಿಕಾರಿ ಅಶೋಕ್ ಸುವರ್ಣ, ಸದಸ್ಯೆರ್ ಕಿರಣ್ ಬರ್ಕೆ, ತಾರನಾಥ್ ಎನ್ ಮುಲ್ಕಿ, ಸುರೇಶ್ ಜನನಿ, ಮಾಧವ ಕಿಲ್ಪಾಡಿ ಬೊಕ್ಕ ಸತೀಶ್ ಕಿಲ್ಪಾಡಿ ಇತ್ತೆರ್.

ತುಳುನಾಡ ಬಿಸು ಪರ್ಬಗ್ ಸರಕಾರಿ ರಜೆ ಕೊರೊಡು

ತುಳುನಾಡ್‌ದ ಸುರುತ್ತ ಪರ್ಬ ಪಂಡ ಅವು ಬಿಸು ಪರ್ಬ. ಈ ದಿನತ್ತಾನಿ ವಿಶೇಷವಾದ್ ಕಣಿ ದೀಪೆರ್. ಬಿಸು ಪರ್ಬ ಪ್ರಕೃತಿದ ಪೂಜೆಗ್ ಮೀಸಲು. ಭೂಮಿದ ಅಪ್ಪೆನ ಜಕ್ಕೆಲ್‌ಡ್ ಬುಳೆಯಿನ ತರಕಾರಿ, ಪರ್ಂದ್ ಲೆನ್ ಪೂಜೆ ಮಲ್ಪುನ ಮುಕೇನ ಪೊಸ ವರ್ಷಡ್ ಎಡ್ಡೆ ರೀತಿದ ಕೃಷಿ, ಸುಖತ್ತ ಜೀವನ ಸಮೃದ್ದಿಗಾದ್ ದೇವೆರೆಡ ಪ್ರಾರ್ಥನೆ ಮಲ್ಪುನವು ಈ ದಿನತ್ತ ವಿಶೇಷ.

ಇಂಚಿತ್ತಿನ ಪರ್ಬಗ್ ತುಳುನಾಡ್‌ದ ಬಿಸು ಆವಡ್, ಅಷ್ಟಮಿ ಆವಡ್ ನಾಗರಪಂಚಮಿ ಆವಡ್ ಇಂಚಿನ ಪ್ರಧಾನವಾಯಿನ ಸಾಂಪ್ರದಾಯಿಕ ಪರ್ಬಲೆಗ್ ಸರಕಾರ ನಿರ್ಲಕ್ಷ್ಯ ಮಲ್ತಿನವು ಭಾರೀ ಬೇಜಾರ್‌ದ ಸಂಗತಿ.

ಇಂಚ ಇತ್ತ್‌ದ್‌ಲ ತುಳು ಸಂಘಟನೆಲು ಅಂಚನೆ ತುಳುವೆರ್ ಪನಿಪಂದೆ ಕುಲ್ದೆರ್ ಪಂಡ ತುಳುನಾಡ್‌ದ ಆಚಾರ-ವಿಚಾರ ಸಂಸ್ಕೃತಿದ ಬಗ್ಗೆ ನಮ್ಮ ತುಳು ಸಂಘಟನೆಲು, ತುಳುವೆರ್ ಮಾತೆರ್‍ಲಾ ಲಕ್ಕ್‌ದ್ ಉಂತುದು ನಮ್ಮ ಊರುದ ಶಾಸಕೆರ್, ಎಂಪಿ, ಮಿನಿಸ್ಟರ್ ಅಂಚನೆ ಡಿಸಿ ಮೊಕುಲು ಪೂರ ಅರ್ಜಿ ಪಾಡುನ ಮುಖಾಂತರ ದುಂಬುದ ದಿನಟ್ಟಾಂಡಲ ತುಳುನಾಡ್‌ದ ಪರ್ಬಗ್ ರಜೆ ತಿಕ್ಕುಲೆಕ್ಕ ಮಲ್ಪಾವುನ ಜಬದಾರಿ ಅಕ್ಲೆನ ಕೈಟ್ಟ್ ಉಂಡು.