ಕುಡ್ಲದ ಸುದ್ದಿ | Mangalore News

ಜಿಲ್ಲಾ ಮಟ್ಟದ ಚದುರಂಗ ಪಂಥೋ

ಒಡಿಪು : ನಗರದ ವಿದ್ಯೋದಯ ಟ್ರಸ್ಟ್‌ದ ಅಂಗಸಂಸ್ಥೆಯಾಯಿನ ವಿದ್ಯೋದಯ ಪ.ಪೂ ಕಾಲೇಜ್ ಡ್ ಪದವಿ ಪೂರ್ವ ಶಿಕ್ಷಣ ಇಲಾಖೆದ ವತಿರ್ದ್ ಜಿಲ್ಲಾ ಮಟ್ಟದ ಚದುರಂಗ ಸ್ಪರ್ಧೆ ಅಂಗಾರೆ ನಡತ್oಡ್.

ಈ ಪಂಥೋನು ಕಾಲೇಜು ಆಡಳಿತ ಮಂಡಳಿದ ಗುರ್ಕಾರ್ಲಾಯಿನ ಎನ್. ನಾಗರಾಜ ಬಲ್ಲಾಳ ಉದಿಪನ ಮಲ್ತೆರ್ . ಜಿಲ್ಲಾ ಕ್ರೀಡಾ ಸಂಯೋಜನಾಧಿಕಾರಿ ದಿನೇಶ್ ಕುಮಾರ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.

ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಎ.ಲಕ್ಷ್ಮೀನಾರಾಯಣ ಛಾತ್ರಾ ಎದುಕೊಂಡೆರ್ . ನಿಯೋಜಿತ ಪ್ರಾಂಶುಪಾಲ ಸಂದೀಪ್ ಕುಮಾರ್ ಪಾಲ್ ಪಡೆದ್ ಇತ್ತೆರ್ . ಉಪನ್ಯಾಸಕ ಶಿವಪ್ರಸಾದ್ ಭಟ್ ನಿರೂಪಣೆ ಮಲ್ತೆರ್ , ದೈಹಿಕ ಶಿಕ್ಷಣ ಉಪನ್ಯಾಸಕ ವಿನಯ್ ಸೊಲ್ಮೆ ಸಂದೈತ ಮಲ್ತೆರ್ .

ರಂಜಾನ್: ಮಸೀದಿಗ್ ಪೋಪಿನಕ್ಲೆಗ್ ಭದ್ರತೆ ಕೊರಿಯರೆ ಮುಸ್ಲಿಂ ಲೀಗ್ ಮನವಿ

ಕುಡ್ಲ , ಮಾ.18: ಮುಸ್ಲಿಮೆರ್ನ ಪವಿತ್ರ ರಮಝಾನ್ ಉಪವಾಸ ಎಪ್ರಿಲ್ 13ರ್ದ್ ಸುರು ಆವೊಂದು ಉಂಡು , ಮೇ 12ಕ್ಕ್ ಮುಗಿಯರೇ ಉಂಡು.. ಈ ತಿಂಗೊಲ್ ಡು ರಾತ್ರಿ ಪೊರ್ತು ಮಸೀದಿಗ್ ಪೋಪಿನಕ್ಲೆಗ್ ಸೂಕ್ತ ಪೊಲೀಸ್ ರಕ್ಷಣೆ ಕೊರೊಡು ಪಂದ್ ಆಗ್ರಹ ಮಲ್ತ್ ದ್ ಇಂಡಿಯನ್ ಯುನಿಯನ್ ಮುಸ್ಲಿಂ ಲೀಗ್ ನಿಯೋಗ ದ.ಕ. ಜಿಲ್ಲಾಧಿಕಾರಿ, ಮಂಗಳೂರು ಪೊಲೀಸ್ ಆಯುಕ್ತೆರೆಗ್ ಮನವಿ ಮಲ್ತೆರ್.

ರಮಝಾನ್ ತಿಂಗೊಲ್ದ 20ರ್ದ್ 30 ಮುಟ ಕಾಂಡೆ 3 ಗಂಟೆಗ್ ವಿಶೇಷ ನಮಾಝ್ ‌ಗಾದ್ ಮಸೀದಿಗ್ ಪೋಪಿನಕ್ಲೆಗ್ ಸೂಕ್ತ ಅವಕಾಶ ಕೊರೊಡು ಈ ಪೊರ್ತುಡು ತಡೆರಹಿತ ವಿದ್ಯುತ್, ಪರ್ಪಿನ ನೀರು, ಅಡುಗೆ ಅನಿಲ ಪೂರೈಸುವುದು, ದಾರಿದೀಪ ದುರಸ್ತಿ ಮಲ್ಪೊಡು ಪಂದ್ ಮನವಿಡ್ ಪಂಡೆರ್.

ಪಡಿತೆರ್ನ ಆಹಾರ ಸಾಮಗ್ರಿಲೆನ್ ಹೆಚ್ಚುವರಿಯಾದ್ ಪೂರೈಕೆ ಮಲ್ಪರೆ ಆಗ್ರಹ ಮಲ್ತೆರ್.

ಅಜ್ಜರಕಾಡು ಮಹಾತ್ಮ ಗಾಂಧಿ ಕ್ರೀಡಾಂಗಣಡ್ ಬುಧವಾರ ಸೇನಾ ನೇಮಕಾತಿ ರ್ಯಾಲಿಗ್ ಚಾಲನೆ

ಒಡಿಪು , ಮಾ.18: ಅಜ್ಜರಕಾಡು ಮಹಾತ್ಮ ಗಾಂಧಿ ಕ್ರೀಡಾಂಗಣಡ್ ಬುಧವಾರ ಸೇನಾ ನೇಮಕಾತಿ ರ್ಯಾಲಿಗ್ ಉಡುಪಿ ಜಿಲ್ಲಾಧಿಕಾರಿ ಜಿ.ಜಗದೀಶ್ ಧ್ವಜಾರೋಹಣ ಮಲ್ಪುನ ಮುಖೇನ ಚಾಲನೆ ಕೊರಿಯೆರ್.

ಕೋವಿಡ್‌ದಾವರ ಒಂಜಿ ವರ್ಷದ ಕಾಲ ದುಂಬು ಪೋಯಿನ ಈ ನೇಮಕಾತಿ ರ್ಯಾಲಿದ ಸುರುತ್ತ ದಿನ ಆಯಿನ ಬುಧವಾರ ಸೋಲ್ಜರ್ ಜನರಲ್ ಡ್ಯೂಟಿ ಹುದ್ದೆಗ್ ದಕ್ಷಿಣ ಕನ್ನಡ, ಉಡುಪಿ, ಚಿಕ್ಕಮಗಳೂರು, ಶಿವಮೊಗ್ಗ ಜಿಲ್ಲೆದ 3 ಸಾರ ಅಭ್ಯರ್ಥಿಲು ಪಾಲ್ ಪಡೆದ್ ಇತ್ತೆರ್.

ದೈಹಿಕ ಪರೀಕ್ಷೆಗ್ ದುಂಬು ಮಾತಾ ಅಭ್ಯರ್ಥಿಲೆನ ಕೋವಿಡ್ ವರದಿನ್ ಪರಿಶೀಲನೆ ಮಲ್ತ್ ದ್ , ವರದಿದ ಅವಧಿ ಮುಗಿನ ಸುಮಾರ್ 150 ಜನಕ್ ರ್ಯಾಪಿಡ್ ಕೋವಿಡ್ ಟೆಸ್ಟ್ ಮಲ್ತೆರ್ . 1600 ಮೀಟರ್ ಓಟ, ಜಿಗ್‌ಜಾಗ್, ಪುಲ್‌ಅಪ್ಸ್, ಉದ್ದ ಜಿಗಿತ ಬೊಕ್ಕ ದೈಹಿಕ ಆಳತೆ ಪರೀಕ್ಷೆಲೆನ್ ನಡಪಾದ್, ಶಿಕ್ಷಣ ಇಲಾಖೆದ ದೈಹಿಕ ಶಿಕ್ಷಕೆರ್ನ ಮುಖೇನ ಶಿಕ್ಷಣ ದಾಖಲಾತಿಲೆನ್ ಪರಿಶೀಲನೆ ಮಲ್ತೆರ್ .

ಸುರಕ್ಷತಾ ಸಂಚಾರಗ್ ಮುಂಜಾಗ್ರತ ಕ್ರಮ ದೆತೊನ್ಲೆ : ಎಸ್ಪಿ

ಕುಡ್ಲ , ಮಾ.18: ಸಾರ್ವಜನಿಕರ ಸುಗಮ ಬೊಕ್ಕ ಸುರಕ್ಷತಾ ಸಂಚಾರಗ್ ಅಗತ್ಯ ಉಪ್ಪುನ ಮಾತಾ ರೀತಿದ ಅಗತ್ಯ ಮುಂಜಾಗ್ರತಾ ಕ್ರಮಕ್ಲೆನ್ ದೆತೊಂದು ನಿರ್ಭೀತರಾದ್ ಸಂಚಾರ ಮಲ್ಪರೆ ಅನುವು ಮಲ್ತ್ ಕೊರೊಡು ಪಂದ್ ದ.ಕ. ಜಿಲ್ಲಾ ಪೊಲೀಸ್ ಅಧೀಕ್ಷಕ ಬಿ.ಎಂ. ಲಕ್ಷ್ಮೀ ಪ್ರಸಾದ್ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್ .

ಪೇಂಟೆದ ಎಸ್ಪಿ ಕಚೇರಿ ಸಭಾಂಗಣಡ್ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರದ ಜಿಲ್ಲಾ ಮಟ್ಟದ ರಸ್ತೆ ಸುರಕ್ಷತಾ ಸಮಿತಿ ಸಭೆತ ಗುರ್ಕಾರ್ಮೆ ವಹಿಸೊಂದು ಆರ್ ಪಾತೆರಿಯೆರ್.

ಒಡಿಪುಡು ಪೌರಕಾರ್ಮಿಕೆರ್ನ ಸ್ವಚ್ಛತಾ ಜಾಥ

ಒಡಿಪು , ಮಾ.18: ಒಡಿಪು ನಗರಸಭೆ ವತಿರ್ದ್ ಪೌರಕಾರ್ಮಿಕರ ಸ್ವಚ್ಛತಾ ಜಾಥನ್ ಬುಧವಾರ ಪೇಂಟೆಡ್ ಅಟ್ಟನೆ ಮಲ್ತಿತ್ತೆರ್.

ಜಾಥಗ್ ನಗರಸಭೆ ಗುರ್ಕಾರ್ಲಾಯಿನ ಸುಮಿತ್ರಾ ಆರ್.ನಾಯಕ್ ಚಾಲನೆ ಕೊರಿಯೆರ್ . ನಗರಾಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ರಾಘವೇಂದ್ರ ಕಿಣಿ, ಆರೋಗ್ಯಾಧಿಕಾರಿ ಕರುಣಾಕರ್ ಬೊಕ್ಕ ನಗರಸಭೆ ಸದಸ್ಯೆರ್ ಪಾಲ್ ಪಡೆದ್ ಇತ್ತೆರ್.

ಸ್ವಚ್ಛ ಭಾರತ್ ಅಭಿಯಾನದ ಯೋಜನೆದಡಿ ಸಾರ್ವಜನಿಕ ಪ್ಲಾಸ್ಟಿಕ್ ನಿಷೇಧ, ಹೋಮ್ ಕಾಂಪೋಸ್ಟ್ ಮಾನ್ಯುಯಲ್ ಸ್ಕಾವೆಂಜಿಗ್, ಪರಿಸರ ಮಾಲಿನ್ಯ ಜನಜಾಗೃತಿ ಕಾರ್ಯಕ್ರಮದ ಪರವಾದ್ ಈ ಜಾಥನ್ ಪೇಂಟೆಡ್ ನಡಪಾಯೆರ್.

ಒಡಿಪುಡು ಎಂಜಿಎಂ ಕೃಷಿ ಸಮ್ಮಿಲನ-2021

ಒಡಿಪು , ಮಾ.18: ಜೋಕುಲು ಬೊಕ್ಕ ಜವನೆರೆಗ್ ಕೈತಲ್ ದ ಕೃಷಿ ಬೊಕ್ಕ ಕೃಷಿ ಬದ್ಕ್ ದ ಬಗ್ಗೆ ಅರಿವು ಮೂಡಾಯರೇ ಅಂಚನೇ ಅಕ್ಲೆಗ್ ಕೃಷಿ ಆಸಕ್ತಿ ಎಚ್ಚ ಮಲ್ಪುನ ಪರವಾದ್ ರಡ್ಡ್ ದಿನತ ಎಂಜಿಎಂ ಕೃಷಿ ಸಮ್ಮಿಲನ ಲೇಸ್ ನ್ ಮಾ.20 ಬೊಕ್ಕ 21 ತಾರೀಖ್ ಗ್ ಎಂಜಿಎಂ ಕಾಲೇಜ್ ದ ಆವರಡ್ ಅಟ್ಟನೆ ಮಲ್ದೆರ್ ಪಂದ್ ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಡಾ.ದೇವಿದಾಸ ನಾಯ್ಕಾ ತೆರಿಪಾದೆರ್.

ಕಾಲೇಜ್ ಡ್ ಬುಧವಾರ ನಡತಿನ ಸುದ್ದಿಗೋಷ್ಠಿಡ್ ಮೇರ್ ಈ ಇಚಾರ ತೆರಿಪಾಯೆರ್.ಈ ಲೇಸ್ ಡ್ ಒಡಿಪು ಜಿಲ್ಲೆದ ಕೃಷಿಕೆರೆರ್ದ್ ಕೃಷಿ ಉತ್ಪನ್ನದ ಪ್ರದರ್ಶನ, ಮಾರಾಟ ಬೊಕ್ಕ ಬೇತೆ ಬೇತೆ ವಿಷಯದ ಬಗ್ಗೆ ತಜ್ಞರೆರ್ದ್ , ಸಾಧಕ ಕೃಷಿಕೆರೆರ್ದ್ ಮಾಹಿತಿ ಮಾಲಿಕೆ ಅಟ್ಟನೆ ಮಲ್ದೆರ್ .

ಒಡಿಯೂರು ಶ್ರೀ ಕ್ಲೆನ 60ನೇ ಪುಟ್ಟು ಪರ್ಬೊದ ವತಿಡ್ದ್ ಒಡಿಪುಡ್ ಸತ್ಸಂಗ, ಹನುಮಾನ್ ಚಾಲೀಸ್ ಪಠಣ

ಒಡಿಯೂರು ಶ್ರೀ ಕ್ಲೆನ ಷಷ್ಠಬ್ದ ಸಂಭ್ರಮೊದ ಅಂಗವಾದ್ ನಡಪುನ ಒಡಿಪು ಷಷ್ಠ್ಯಬ್ದ ಸಮಿತಿದ 600 ಸರಣಿ ಕಾರ್ಯಕ್ರಮೊಲೆಡ್ ಸುರುತ ಕಜ್ಜೊ ಇಲ್ಲ ಇಲ್ಲಡ್ ನಡಪುನ ಸತ್ಸಂಗದ ಸುರುತ ದಿನ ಒಡಿಪು ವಜ್ರಮಾತಾ ಸೇವಾ ವಿಕಾಸ ಕೇಂದ್ರದ ಗೌರವ ಸಲಹೆಗಾರೆರಾಯಿನ ಶ್ರೀಮತಿ ಚಂದ್ರಪ್ರಭಾ ಆರ್.ಹೆಗ್ಡೆ ಮೆರೆನ ಇಲ್ಲಡ್ ನಡತುಂಡ್. ಈ ಪೊರ್ತುಡ್ ಕಜ್ಜೊನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ಒಡಿಪು ಷಷ್ಯಬ್ದ ಸಮಿತಿದ ಪ್ರಧಾನ ಕಾರ್ಯಂತೆರಾಯಿನ ಶ್ರೀ ಪ್ರಭಾಕರ ಶೆಟ್ಟಿ ಕಬ್ಯಾಡಿ ಕಜ್ಜೊಗ್ ಎಡ್ಡೆಪ್ಪುನ್ ಬಯಕಿಯೆರ್.

ಸಮಿತಿದಕುಲ್ ಒಟ್ಟಾದ್ ಹನುಮಾನ್ ಚಾಲೀಸ್ ಪಠಣ,ರಾಮರಕ್ಷಾ ಸ್ತೋತ್ರ, ವಿಷ್ಣುಸಹಸ್ರನಾಮ,ಬೊಕ್ಕ ಭಜನೆದೊಟ್ಟುಗ್ ಸತ್ಸಂಗ ನಡತುಂಡ್..ಈ ಪೊರ್ತುಡ್ ಶ್ರೀ ರಮಾನಂದ ಹೆಗ್ಡೆ, ತಾರಾನಾಥ ಶೆಟ್ಟಿ, ಶೋಭಾ ಶೆಟ್ಟಿ,ಅಮಿತಾ ಗಿರೀಶ್, ಚಂದ್ರಿಕಾ ಜಯಪ್ರಕಾಶ್,ರೇವತಿ ಶೆಟ್ಟಿ, ರಾಜೇಶ್ ಶೆಟ್ಟಿ, ಲಕ್ಷ್ಮೀನಾರಾಯಣ ಕಲ್ಲೊಟ್ಟೆ, ಸುಮಂಗಲ ಸದಾನಂದ್, ಯಶೋದಾ ಕೇಶವ್ ಬೊಕ್ಕ ಕೈತಲ್ ದ ಭಗಿನಿಯೆರ್ ಪಾಲ್ ಪಡೆಯೆರ್.