ಕುಡ್ಲ: ಕುಡ್ಲದ ಪುಗರ್ತೆದ ಮೋತಿ ಮಹಲ್ ಹೊಟೇಲ್ ದ ಸ್ವಿಮ್ಮಿಂಗ್ ಪೂಲ್ ಡ್ ಮುರ್ಕುದು ಬ್ಯಾಂಕ್ ಅಧಿಕಾರಿ ತೀರ್ ಪೋಯಿನ ಘಟನೆ ನಡತ್ಂಡ್.
ತೀರ್ ಪೋಯಿನಾರ್ ಕೇರಳದ ತಿರುವನಂತಪುರಂ ನಿವಾಸಿ ಗೋಪು ಆರ್ ನಾಯರ್ ಪಂದ್ ತೆರಿದ್ ಬೈದ್ಂಡ್. ಮೇರ್ ಯೂನಿಯನ್ ಬ್ಯಾಂಕ್ ದ ಅಧಿಕಾರಿ ಆದಿತ್ತೆರ್.
ಈ ಘಟನೆದ ಜಾಗೆಗ್ ಪಾಂಡೇಶ್ವರ ಠಾಣೆದ ಪೊಲೀಸೆರ್ ಭೇಟಿ ಕೊರ್ದು, ಪರಿಶೀಲನೆ ನಡಪಾವೊಂದು ಉಲ್ಲೆರ್.
ಸುರತ್ಕಲ್: ಗೋವಿಂದ ದಾಸ ಕಾಲೇಜ್ ದ ರಾಜ್ಯಶಾಸ್ತ್ರ ಉಪನ್ಯಾಸಕಿ NCC ವಿಭಾಗದ ಕ್ಯಾಪ್ಟನ್ ಸುಧಾ ಶೆಟ್ಟಿ ಮೆರ್ ಕುಡ್ಲ ದ ವಿಶ್ವವಿದ್ಯಾನಿಲಯಗ್ ಸಲ್ಲಿಕೆ ಮಲ್ತಿನ ” ಭಾರತದ ಪ್ರಜಾತಂತ್ರದಲ್ಲಿ ಸಮಾಜವಾದಿಗಳ ಅನುಸಂಧಾನ, ಭಾರತದ ಪ್ರಜಾತಂತ್ರದಲ್ಲಿ ಸಮಾಜವಾದಿಗಳ ವಿಶೇಷ ನಡುಪ್ರವೇಶಗಳ ಮರುಪರಿಶೀಲನೆ’ ಪನ್ಪುನ ಮಹಾಪ್ರಬಂಧಗ್ ಕುಡ್ಲ ವಿಶ್ವವಿದ್ಯಾನಿಲಯ ಪಿಹೆಚ್ ಡಿ ಕೊರ್ದು ಗೌರವಿಸಾದೆರ್.
ಮೇರ್ ಕುಡ್ಲ ವಿಶ್ವವಿದ್ಯಾನಿಲಯದ ರಾಜ್ಯಶಾಸ್ತ್ರ ವಿಭಾಗದ ನಿವೃತ್ತ ಪ್ರಾಧ್ಯಾಪಕರಾಯಿನ ಪ್ರೊ. ರಾಜಾರಾಮ್ ತೋಳ್ಪಾಡಿ ಅರೆನ ಮಾರ್ಗದರ್ಶನ ಡ್ ಈ ಮಹಾ ಪ್ರಬಂಧನ್ ರಚನೆ ಮಲ್ತ್ ದೆರ್.
ಮುಲ್ಕಿ: ಬಿಲ್ಲವ ಸಮಾಜದ ಮುಂದಾಳು, ಮುಲ್ಕಿ ಲಲಿತ್ ಮಹಲ್ ದ ಧಣಿ ಹರಿಶ್ಚಂದ್ರ ವಿ.ಕೋಟ್ಯಾನ್ (68) ಮೇರ್ ಐತಾರ ಬಯ್ಯಡ್ ದೇವೆರೆ ಪಾದ ಸೇರಿಯೆರ್.
ಅರೆಗ್ ಹೃದಯಾಘಾತ ಆದ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಅರೆಗ್ ಬೊಡೆದಿ, ಮಗೆ ಬೊಕ್ಕ ಮಗಲ್ ಉಲ್ಲೆರ್.
ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಮಾಜಿ ಅಧ್ಯಕ್ಷೆರಾದ್ ಸೇವೆ ಮಲ್ದಿನ ಆರ್, ಮುಲ್ಕಿ ಶ್ರೀ ನಾರಾಯಣ ಗುರು ಸಮೂಹ ಶಿಕ್ಷಣ ಸಂಸ್ಥೆಲೆನ ಸಂಚಾಲಕೆರಾದಿತ್ತೆರ್.
ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಕಾರ್ಯಕಾರಿ ಸಮಿತಿ ಸದಸ್ಯೆರಾದ್, ನಡಿಕುದ್ರು ಶ್ರೀ ಜಾರಂದಾಯ ಸೇವಾ ಸಮಿತಿದ ಅಧ್ಯಕ್ಷೆರಾದಿತ್ತೆರ್.
ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರಾದ್ , ಮುಲ್ಕಿ ಲಯನ್ಸ್ ಕ್ಲಬ್ ಅಧ್ಯಕ್ಷೆರಾದ್ ಜನಸೇವೆ ಮಲ್ತ್ ದ್ ಪುಗರ್ತೆ ಪಡೆದೆರ್.
ಎಚ್. ವಿ.ಕೋಟ್ಯಾನ್ ಪಂದೇ ಪುಗರ್ತೆ ಪಡೆದಿನ ಮೆರೆನ ನಿಧನೊಗು ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಮಿಥುನ್ ರೈ, ವಸಂತ ಬೆರ್ನಾಡ್, ಸುನಿಲ್ ಆಳ್ವ, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ರಾಘು ಸುವರ್ಣ, ಹರಿಶ್ಚಂದ್ರ ಸಾಲ್ಯಾನ್, ಕಿಶೋರ್ ಜೆ.ಸಾಲ್ಯಾನ್, ವಾಮನ ಕೋಟ್ಯಾನ್ ನಡಿಕುದ್ರು, ಚಂದ್ರಹಾಸ್ ನಡಿಕುದ್ರು ಮೊಕುಲು ಮಾತ ಸಂತಾಪ ತೆರಿಪಾದೆರ್.
ಕುಡ್ಲ: ಪೊಸತ್ತಾದ್ ರಚನೆ ಆತಿನ ಮೂಲ್ಕಿ ತಾಲೂಕುದ ಅಭಿವೃದ್ಧಿಗಾದ್ ಅಂಚೆನೆ ಸಿವಿಲ್ ಎಂಜಿನಿಯರ್ ವೃತ್ತಿದಕಲ್ನ ಒಗ್ಗಟ್ಟ್ ಬೊಕ್ಕ ಹಿತದೃಷ್ಟಿದ ಉದ್ದೇಶೊಡು ರಚನೆ ಆಯಿನ ಅಸೋಸಿಯೇಶನ್ ಆಫ್ ಸಿವಿಲ್ ಎಂಜಿನಿಯರ್ಸ್ ಮುಲ್ಕಿ (ಎಸಿಇಎಂ) ಉದಿಪನದ ಲೇಸ್ ಸೆ.16ಕ್ಕ್ ಬಯ್ಯಗ್ 5 ಗಂಟೆಗ್ ಮುಲ್ಕಿ ಕಾರ್ನಾಡ್ ದ ಸುಂದರರಾಮ್ ಶೆಟ್ಟಿ ಕನ್ವೆನ್ಷನ್ ಸೆಂಟರ್ ಡ್ ಉದಿಪನ ಆವರೆ ಉಂಡು ಪಂದ್ ಸಂಘಟನೆದ ಅಧ್ಯಕ್ಷೆರ್ ಜೀವನ್ ಕೆ. ಶೆಟ್ಟಿ ಮೂಲ್ಕಿ ತೆರಿಪಾಯೆರ್.
ಆರ್ ಕುಡ್ಲದ ಪತ್ರಿಕಾಭವನಡ್ ಶನಿವಾರ ನಡತಿನ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರ್ದು, ಸಿವಿಲ್ ಎಂಜಿನಿಯರಿಂಗ್ ಕ್ಷೇತ್ರದ ಎಚ್ಚಿನಕುಲು ನೆಟ್ಟ್ ಸದಸ್ಯೆರಾದುಲ್ಲೆರ್. ಉಂದು ಒಂಜಿ ಸ್ವತಂತ್ರ ಸಂಸ್ಥೆ. ಅವ್ವತ್ತಾಂದೆ ಆ ದಿನ ಮೂಲ್ಕಿ ರೋಟರಿ ಕ್ಲಬ್ ದ ಒಟ್ಟುಸೇರಿಗೆಡ್ ಭಾರತ ರತ್ನ ಸರ್ ಎಂ. ವಿಶ್ವೇಶ್ವರಯ್ಯೆರೆನ ಜನ್ಮ ಶತಮಾನೋತ್ಸವದ ಹಿನ್ನೆಲೆಡ್ ಎಂಜಿನಿಯರ್ ದಿನದ ಆಚರಣೆನ್ ವಿಶೇಷ ರೀತಿಡ್ ಮಲ್ಪರೆ ನಿರ್ಧಾರ ಮಲ್ತ್ ದ ಪಂಡೆರ್.
ನಿಟ್ಟೆ ಎಜುಕೇಶನ್ ಟ್ರಸ್ಟ್ ದ ಅಧ್ಯಕ್ಷೆರ್ ವಿನಯ ಹೆಗ್ಡೆ ಎಸಿಇಎಂ ಉದಿಪನ ಮಲ್ಪುವೆರ್. ಸಚಿವೆರ್ ದಿನೇಶ್ ಗುಂಡೂರಾವ್ ತುಡರ್ ಅರ್ಲಾವೆರ್. ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರ್ ಐಕಳ ಹರೀಶ್ ಶೆಟ್ಟಿ , ಸಂಸದೆರ್ ನಳಿನ್ ಕುಮಾರ್, ಶಾಸಕೆರ್ ಉಮಾನಾಥ್ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನದ, ಮಿಥುನ್ ರೈ ಮೊಕುಲು ಬಿನ್ನೆರಾದ್ ಬರ್ಪೆರ್.ಎಸಿಸಿಇಐ ಪ್ರಧಾನ ಕಾರ್ಯದರ್ಶಿ ರಾಜೇಂದ್ರ ಕಲ್ಬಾವಿ ಪದಗ್ರಹಣ ಪ್ರಮಾಣ ಮಲ್ಪಾವೆರ್ ಪಂದ್ ಆರ್ ತೆರಿಪಾಯೆರ್.
ಆ ದಿನ ಎಂಜಿನಿಯರ್ ಕ್ಷೇತ್ರಗ್ ಸಂಬಂಧಪಟ್ಟಿನ ವಿಚಾರಗೋಷ್ಠಿ, ಪ್ರೊ.ಜಿ.ಆರ್. ರೈ ಸೇರ್ದ್ ಸಾಧಕ ಎಂಜಿನಿಯರ್ ನಕ್ಲೆಗ್ ತಮ್ಮನ ಬಲ್ಮನ, ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು. ಎಸಿಇಎಂ ಉದಿಪನದ ಲೇಸ್ ಡ್ ಪದಾಧಿಕಾರಿಲೆನ ಪದಗ್ರಹಣ ಕಾರ್ಯಕ್ರಮಲ ನಡಪರೆ ಉಂಡು. ಈ ಲೇಸ್ ಡ್ ಮುಲ್ಕಿ, ಕುಡ್ಲ, ಒಡಿಪು, ಕಾರ್ಲ, ಬೆದ್ರ, ಬೊಲ್ತೇರ್, ಸುಳ್ಯ, ಪುತ್ತೂರು ಬೊಕ್ಕ ಉಳ್ಳಾಲ ತಾಲೂಕುದ ಎಂಜಿನಿಯರ್ ನಕುಲು ವಾಸ್ತುಶಿಲ್ಪಿನಕುಲು, ಪ್ರಮುಖ ಬಿಲ್ಡರ್‌ ನಕುಲು ಗುತ್ತಿಗೆದಾರೆರ್, ಡೀಲರ್‌ಗಳು, ನಿರ್ಮಾಣ ಬೊಕ್ಕ ಇಂಟೀರಿಯರ್ ಡಿಸೈನ್ ಸಂಬಂಧಿ ಕಂಪೆನಿದ ಪ್ರತಿನಿಧಿನಕುಲು ಸೇರ್ದ್ ಸುಮಾರ್ 1,500ರ್ದ ಎಚ್ಚ ಜನ ಪಾಲ್ ಪಡೆವೆರ್ ಪಂದ್ ಆರ್ ಪಂಡೆರ್. ಸಾಂಸ್ಕೃತಿಕ ಕಾರ್ಯಕ್ರಮ ಸೇರ್ದ್ ಒಟ್ಟು ಐದು ಗಂಟೆದ ಕಾರ್ಯಕ್ರಮ ಉಂಡು.ಮೂಲ್ಕಿ ರಡ್ಡ್ ಜಿಲ್ಲೆದ ಮಧ್ಯಭಾಗಡ್ ಇತ್ತಿನೆರ್ದಾವರ ರಡ್ಡ್ ಜಿಲ್ಲೆದ ಜನಕುಲು ಪಾಲ್ ಪಡೆವರೆ ಉಲ್ಲೆರ್. ಅಂಚಾದ್ ಭಾರಿ ಗೌಜಿಡ್ ಲೇಸ್ ಅಟ್ಟಣೆ ಮಲ್ತ್ ದ ಪಂಡೆರ್.
ಸಸಿಹಿತ್ಲು ಬೀಚ್ ರ್ದ್ ಶ್ರೀ ಭಗವತಿ ದೇವಸ್ಥಾನ, ಪೊಯ್ಯೆದಗುಡ್ಡೆಉಮಾಮಹೇಶ್ವರ ದೇವಸ್ಥಾನ, ಮಂತ್ರ ಸರ್ಫಿಂಗ್, ಬಪ್ಪನಾಡು ದೇವಸ್ಥಾನ ಮುಟ್ಟದ ಪ್ರವಾಸೋದ್ಯಮ ಕಾರಿಡಾರ್ ನಿರ್ಮಾಣ ಈ ಸಂಘಟನೆದ ಮಲ್ಲ ಉದ್ದೇಶ ಆದುಂಡು.ಅಯಿಕ್ಕ್ ಕೆಲವು ವರ್ಷೊರ್ದಿಂಚಿ ರಾಜ್ಯ ಸರ್ಕಾರೊಗು ಬಿನ್ನಯ ಮಲ್ತ್ ದ. ಅವೆನ್ ಅನುಷ್ಠಾನ ಮಲ್ಪರೆ ಕಾಂಗ್ರೆಸ್ ಸರ್ಕಾರೊಗುಲ ಕುಡೊರ ಮನವಿ ಮಲ್ಪರೆ ಉಲ್ಲ ಪಂದ್ ಜೀವನ್ ಶೆಟ್ಟಿ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಎಸಿಇಎಂ ಕಾರ್ಯದರ್ಶಿ ಸುಜಿತ್ ಸಾಲಿಯಾನ್, ಕೋಶಾಧಿಕಾರಿ ವರುಣ್, ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಕೆ. ಹರೀಶ್ಚಂದ್ರ, ವಿಜಯ್ ಶೆಟ್ಟಿ ಇತ್ತೆರ್.
ಕುಡ್ಲ ವಿಶ್ವವಿದ್ಯಾಲಯ ಡ್ ಡಾ.ಶಂಸುಲ್ ಇಸ್ಲಾಂ ಮೆರೆನ ಉಪನ್ಯಾಸಗ್ ಎಬಿವಿಪಿ ಕಾರ್ಯಕರ್ತೆರ್ ಪ್ರತಿಭಟನೆ ಮಲ್ತೊಂದು ಉಲ್ಲೆರ್.
ಹೊಸದಿಲ್ಲಿ ವಿಶ್ವವಿದ್ಯಾನಿಲಯದ ರಾಜ್ಯಶಾಸ್ತ್ರದ ನಿವೃತ್ತ ಸಹ ಪ್ರಾಧ್ಯಾಪಕೆರ್, ಸಂಶೋಧಕೆರ್ ಬೊಕ್ಕ ಜನಕಲಾ ಸಂಘಟಕೆರ್ ಡಾ.ಶಂಸುಲ್ ಇಸ್ಲಾಂ ಮೆರ್ ‘ಸುರುತ ಸ್ವಾತಂತ್ರ್ಯ ಸಂಗ್ರಾಮ, 1857 – ಜಂಟಿ ಬಲಿದಾನಗಳು, ಜಂಟಿ ವಾರಿಸುದಾರಿಕೆ’ ಪನ್ಪುನ ವಿಷಯ ಸ್ ಉಪನ್ಯಾಸ ಕೊರಿಯೆರೆ ಬತ್ತ್ ದ್ ಇಪ್ಪುನಗ ಎಬಿವಿಪಿ ಕಾರ್ಯಕರ್ತೆರ್ ‘ಗೋಬ್ಯಾಕ್ ಶಂಸುಲ್’ ಪಂದ್ ವಿರೋಧ ವ್ಯಕ್ತಪಡಿಸಾದೆರ್.
ಶಂಸುಲ್ ಇಸ್ಲಾಂ ಉಪನ್ಯಾಸ ವಿರೋಧಿಸಾದ್ ಎಬಿವಿಪಿ ಕಾರ್ಯಕರ್ತೆರ್ ಕಾಲೇಜಿಗ್ ಮುತ್ತಿಗೆ ಪಾಡೆರೆ ಪ್ರಯತ್ನ ಮಲ್ತೊಂದು ಉಲ್ಲೆರ್. ಈ ಪೊರ್ತುಡು ಪೊಲೀಸೆರ್ ಬೊಕ್ಕ ಎಬಿವಿಪಿ ಕಾರ್ಯಕರ್ತೆನ ನಡುಟು ಪಾತೆರಕತೆ ಆತ್ಂಡ್.
ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 24ನೇ ಅವಧಿದ ಮೇಯರ್ ಆದ್ ಸುಧೀರ್ ಶೆಟ್ಟಿ ಕಣ್ಣೂರು ಬೊಕ್ಕ ಉಪಮೇಯರಾದ್ ಸುನೀತಾ ಸಾಲಿಯಾನ್ ಆಯ್ಕೆ ಆತೆರ್.
ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಇನಿ ನಡತಿನ ವೋಟುಡು ಆಡಳಿತರೂಢ ಬಿಜೆಪಿರ್ದ್ ಮೇಯರ್ ತಾನಗ್ ಸುಧೀರ್ ಶೆಟ್ಟಿ ಬೊಕ್ಕ ಉಪ ಮೇಯರ್ ತಾನಗ್ ಸುನೀತಾ ಸಾಲಿಯಾನ್ ನಾಮಪತ್ರ ಸಂದಾದಿತ್ತೆರ್. ಅಂಚೆನೆ ಪ್ರತಿಪಕ್ಷ ಕಾಂಗ್ರೆಸ್ ರ್ದ್ ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಅಭ್ಯರ್ಥಿಲೆನ್ ವೋಟುಗು ಉಂತಾದಿತ್ತೆರ್. ಅವೆರ್ದ್ ಬೊಕ್ಕ ನಡತಿನ ವೋಟುಡು ಸುಧೀರ್ ಶೆಟ್ಟಿ ಬೊಕ್ಕ ಸುನೀತಾ ಸಾಲಿಯಾನ್ ಆಯ್ಕೆ ಆಯೆರ್.
ಮೈಸೂರ್ ವಿಭಾಗದ ಪ್ರಾದೇಶಿಕ ಆಯುಕ್ತೆರ್ ವೋಟು ನಡಪಾದ್ ಕೊರಿಯೆರ್. ಪಾಲಿಕೆದ ಮಂಗಳಾ ಸಭಾಂಗಣಡ್ ಈ ವೋಟು ನಡತ್ಂಡ್.
ಬೋಲ್ತೆರ್; ಉಜಿರೆ ಎಸ್.ಡಿ.ಎಂ ಕಾಲೇಜ್ ದ ಕಲ್ಪಾರ್ಥಿ ಸೌಜನ್ಯನ ಕೇಸ್ ನ್ ಪಿರ ತನಿಖೆಗಾದ್ ಸರಕಾರಗ್ ನಿರ್ದೇಶನ ಕೊರ್ಪುನಂಚ ಸಾರ್ವಜನಿಕ ಹಿತಾಸಕ್ತಿ ಅರ್ಜಿನ್ ಹೈಕೋರ್ಟ್ ವಿಲೇವಾರಿ ಮಲ್ತ್ ದುಂಡು.
ಈ ಕೇಸ್ ಗ್ ಸಂಬoಧಪಟ್ಟಿನoಚ ಪೊಲೀಸ್ ಇಲಾಖೆ, ಸಿಐಡಿ ಬೊಕ್ಕ ಸಿಬಿಐ ತನಿಖೆ ಆದ್, ಪ್ರಕರಣಗ್ ಸಂಬoಧಿಸಾದ್ ಅರೆಸ್ಟ್ ಆದ್ ಇತ್ತಿನ ಸಂತೋಷ್ ರಾವ್ ನಿರಪರಾಧಿ ಪಂದ್ ಸಿಬಿಐ ವಿಶೇಷ ನ್ಯಾಯಲಯ ತೀರ್ಪು ಕೊರ್ದು ಇತ್ತ್ಂಡ್. ಈ ತನಿಖೆಡ್ ಲೋಪ ಆತ್ಂಡ್ ಪಂದ್ ತನಿಖಾಧಿಕಾರಿ ಬೊಕ್ಕ ವೈದ್ಯಾಧಿಕಾರಿಲೆನ ವಿರುದ್ದ ಕ್ರಮ ದೆತೊನೊಡು ಪಂದ್ ಇಚ್ಚಿಂಪಗ್ ನಡತ್ತಿನ ಕೆಲವು ಪ್ರತಿಭಟನೆಡ್ ಆಗ್ರಹ ಆದ್ ಇತ್ತ್ಂಡ್.
ಸೌಜನ್ಯನ ಕೇಸ್ ನ್ ಪಿರ ತನಿಖೆ ಮಲ್ಪೊಡು ಪಂದ್ ಗಿರೀಶ್ ಭಾರಧ್ವಾಜ್, ನವೀನ್ ಕುಮಾರ್ ನೆರಿಯ, ಬೋಲ್ತೆರ್ ಬೊಕ್ಕ ವಿನಾಯಕ ಪ್ರೆಂಡ್ಸ್ ಟ್ರಸ್ಟ್ ಬಲ್ನಾಡ್ ಪುತ್ತೂರು ಮೊಕುಲು ಒಟ್ಟಾದ್ ಸಲ್ಲಿಕೆ ಮಲ್ತಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸೆ.8 ದಾನಿ ಉಚ್ಚ ನ್ಯಾಯಾಲಯಡ್ ವಿಚಾರಣೆಗ್ ಬತ್ತ್ ದ್ ಇತ್ತ್ಂಡ್. ಅರ್ಜಿದಾರನ ಪರ ನ್ಯಾಯವಾದಿ ಶ್ಯಾಮ್ ವಾದ ಮಲ್ತ್ ಇತ್ತೆರ್. ಸರಕಾರ ಅತ್ತ್ಂಡ ಮೂಲ ದೂರುದಾರೆರ್, ಸಂತ್ರಸ್ತ ಕುಟುಂಬ ಮಾತ್ರ ಆರೋಪಿನ್ ದೋಷಮುಕ್ತ ಮಲ್ತಿನ ಆದೇಶದ ಮಿತ್ತ್ ಮೇಲ್ಮನವಿ ಸಲ್ಲಿಸಾಯೆರೆ ಕಾನೂನುಡು ಅವಕಾಶ ಉಂಡು ಪಂದ್ ಜರ್ಜ್ ಈ ಪೊರ್ತುಡು ಪಂತೆರ್.
ಅರ್ಜಿದಾರನ ಉದ್ದೇಶ ಎಡ್ಡೆ ಇತ್ತ್ಂಡಲ ಕಾನೂನುದ ಮಿತ್ತಿತ ಉಲಾಯಿ ವ್ಯವಹಾರ ಮಲ್ಪೊಡು ಪಂದ್ ಅಭಿಪ್ರಾಯ ತೆರಿಪಾಯಿನ ವಿಭಾಗೀಯ ನ್ಯಾಯಪೀಠ ಸಂತ್ರಸ್ತ ಕುಟುಂಬಗ್ ಮೇಲ್ಮನವಿ ಸಲ್ಲಿಸಾಯೆರೆ ಸಹಾಯ ಮಲ್ಪುಲೆ ಪಂದ್ ಸಲಹೆ ಕೊರ್ಪುನೆತ್ತ ಒಟ್ಟಿಗೆ ಸಾರ್ವಜನಿಕ ಹಿತಾಸಕ್ತಿದ ಅರ್ಜಿನ್ ವಿಲೇವಾರಿ ಮಲ್ತ್ ದುಂಡು.
ಕುಡ್ಲ: ಕರ್ನಾಟಕ ರಾಜ್ಯಪಾಲೆರ್ ತಾವರ್ ಚಂದ್ ಗೆಹ್ಲೋಟ್ ಮೇರ್ ಸೆ.8 ಸುಕ್ರಾರ (ಇನಿ) ಬಜಪೆದ ಅಂತರಾಷ್ಟ್ರೀಯ ಇಮಾನ ನಿಲ್ದಾಣಗ್ ಭೇಟಿ ಕೊರಿಯೆರ್.
ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್, ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಅನುಪಮ್ ಅಗರ್ವಾಲ್, ದ.ಕ ಜಿಲ್ಲಾ ಪಂಚಾಯತ್ ದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಆನಂದ್ ಕೆ. ಬೊಕ್ಕ ಅಧಿಕಾರಿಲು ಇತ್ತೆರ್.
ರಾಜ್ಯಪಾಲೆರ್ 12 ಗಂಟೆಗ್ ಕುಡ್ಲ ಪೇಂಟೆದ ಟಿ.ಎಂ.ಎ. ಪೈ ಕನ್‍ವೆನ್‍ಶನ್ ಸಭಾಂಗಣಡ್ ಮ್ಯಾಂಗಲೋರ್ ಫಿಸಿಯೋಕಾನ್ 2023 ಲೇಸ್ ನ್ ಉದಿಪನ ಮಲ್ತೆರ್. ಮಧ್ಯಾಹ್ನ 1 ಗಂಟೆಗ್ ಪೇಂಟೆದ ಹೋಟೆಲ್ ತಾಜ್ ವಿವಂತಾಡ್ ವಾಸ ಇತ್ತೆರ್.1.30 ಕ್ಕ್ ಖಾಸಗಿ ವಿಶ್ವವಿದ್ಯಾನಿಲಯ ಬೊಕ್ಕ ಕಾಲೇಜ್ ಆಡಳಿತದ ಅಧಿಕಾರಿಲೆನೊಟ್ಟಿಗೆ ಸಂವಾದ ನಡಪಾಯೆರ್. ನನ ಬಯ್ಯಗ್ 5.25 ಕ್ಕ್ ಕುಡ್ಲರ್ದ್ ಇಮಾನದ ಮುಖೇನ ಬೆಂಗ್ಲೂರ್ ಗ್ ಪೋಪೆರ್.
ಕುಡ್ಲ: ತುಳುನಾಡ್ ಭಾಗದ ಕೊಂಕಣಿ ಕೆಥೋಲಿಕ್ ಪೊರ್ಬುನಕ್ಲೆಗ್ (ಸೆ.8) ಇನಿ ಪರ್ಬದ ದಿನ.
ಆನಿ ಯೇಸು ಕ್ರಿಸ್ತನ ಅಪ್ಪೆ ಮೇರಿ ಮೆರೆನ ಪುಟ್ಟುನ ದಿನ. ಈ ದಿನೊನು ದ.ಕ ಬೊಕ್ಕ ಒಡಿಪು ಜಿಲ್ಲೆದ ಕೊಂಕಣಿ ಕೆಥೋಲಿಕೆರ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ರೀತಿಡ್ ಆಚರಣೆ ಮಲ್ಪುವೆರ್.
ಚರ್ಚ್ ಲೆಡ್ ಬಲಿ ಪೂಜೆ, ಪೊಸ ಕುರಲ್ ಪಟ್ಟುನ ಲೇಸ್, ಮೆರವಣಿಗೆ, ಬೊಕ್ಕ ಪುಷ್ಪಾರ್ಚನೆದ ಮುಖೇನ ಮೇರಿ ಅಪ್ಪೆಗ್ ನಮನ ಸಂದಾಯೆರೆ ಉಂಡು. ಬೊಕ್ಕ ಧರ್ಮ ಗುರುಕುಲು ಪರ್ಬದ ಪೊಲಬು ಕೊರ್ದು ಎಡ್ಡೆಪ್ಪು ಬಯಕುವೆರ್. ಬೊಕ್ಕ ಚೀಪೆ ತಿಂಡಿ, ಕರ್ಂಬು ಪಟ್ಟುವೆರ್. ಅವೆರ್ದ್ ಬೊಕ್ಕ ಇಲ್ಲಲ್ ಪರ್ಬದ ವನಸ್ ಮಲ್ಪುವೆರ್.
ಕುಡ್ಲ ಪೇಂಟೆದ ಮಿಲಾಗ್ರಿಸ್, ಬೆಂದೂರು, ಜಪ್ಪು, ವೆಲೆನ್ಸಿಯಾ, ಕಾಸ್ಸಿಯಾ, ಬಿಜೈ, ಆಂಜೆಲೋರ್, ಉರ್ವ, ಅಶೋಕನಗರ, ಬೋಂದೆಲ್, ಕುಲಶೇಖರ, ಕೂಳೂರು ಚರ್ಚ್ ಡ್ ಬೊಲ್ಪುಗು ಮೊಂತಿ ಪರ್ಬದ ಬಲಿಪೂಜೆಲು ನಡಪರೆ ಉಂಡು.
ಪರ್ಬದ ತಯಾರಿಗಾದ್ ಚರ್ಚ್ ಲೆಡ್ 9 ದಿನತ್ತ ನೊವೇನಾ ಪ್ರಾರ್ತನೆ ನಡತ್ ದ್ಂಡ್. ಜೋಕುಲು ಪೂವು ಕನತ್ ದ್ ಮೇರಿ ಅಪ್ಪೆಗ್ ಅರ್ಚನೆ ಮಲ್ತ್ ದ್ ಪ್ರಾರ್ತನೆ ಸಂದಾದೆರ್.
ಇನಿ ತರಕಾರಿದ ತೆನಸ್ ಈ ಪರ್ಬದ ಇಸೇಸ ಆತ್ಂಡ್. ಕಮ್ಮಿ ಆಂಡಲ 5 ಬಗೆತ್ತ ಕಜಿಪು ಇಪ್ಪೊಡು. ಆಯಿಟ್ಲಾ ಚೇವುದ ದಂಡ್, ದೆಂಟೊ (ಪದ್ ಪೆ ದಂಟು) ಪೀರೆ, ಬೆಂಡೆಕಾಯಿ ಇನಿತ್ತ ಕಜಿಪು ಆತ್ಂಡ್. ಆಯಿತ್ತೊಟ್ಟಿಗೆ ಪಾಯಿಸಲ ಮಲ್ಪುವೆರ್.
ಕುಡ್ಲ: ದತ್ತ ನಗರ ಡ್ ಪೊಸತಾದ್ ನಿರ್ಮಾಣ ಆಯಿನ ದತ್ತ ನಗರ ರಂಗ ಮಂದಿರನ್ ಶಾಸಕೆರ್ ವೇದವ್ಯಾಸ ಕಾಮತ್ ಬುಧಾರ ಉದಿಪನ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ದತ್ತ ನಗರ ಸ್ವಚ್ಛತೆ ಒಗ್ಗಟು ಬೊಕ್ಕ ಬೇತೆ ಬೇತೆ ಸಾಮಾಜಿಕ, ಧಾರ್ಮಿಕ ಲೇಸ್ ನ್ ನಡಪಾವೊಂದು ಬರೊಂದು ಉಂಡು.
ದತ್ತ ನಗರಡ್ ಕೈತಲ್ ನುಂಗೆಲ್ ಕಜವುನ್ ಬೊಕ್ಕ ಪಜ್ಜಿ ಕಜವುನ್ ಸಂಸ್ಕರಣೆ ಮಲ್ಪುನ ಸಲುವಾದ್ ಸಂಸ್ಕರಣ ಘಟಕನ್ ನಿರ್ಮಾಣ ಮಲ್ಪುನಲ್ಪ ಕುಡ್ಲ ಮಹಾನಗರ ಪಾಲಿಕೆರ್ದ್ ಸಂಪೂರ್ಣ ಸಹಕಾರ ಕೊರ್ಪ ಪಂದ್ ಭರವಸೆ ಕೊರಿಯೆರ್.
ಕರ್ನಾಟಕದ ಕಾಂಗ್ರೆಸ್ ಸರ್ಕಾರ ಪರ್ಬದ ಆಚರಣೆಗ್ ಸಮಯದ ಮಿತಿನ್ 10 ಗಂಟೆಗ್ ಸೀಮಿತ ಮಲ್ತ್ ದ್ ನಮ್ಮ ಧಾರ್ಮಿಕ ಆಚರಣೆಗ್ ತಡೆ ಪಾಡಿಯೆರೆ ದುಂಬಾತ್ಂಡ್. ಇಂಚಿನೆನ್ ಬಿಜೆಪಿ ವಿರೋಧ ಮಲ್ಪುಂಡು. ಅತ್ತಂದೆ ಪರ್ಬನ್ ಎಂಕುಲು ಪೊರ್ಲುಡೆ ಆಚರಣೆ ಮಲ್ಪುವ, ಒವ್ವೇ ಕಾರಣಗ್ಲಾ ಇಂಚಿನ ಪೊಳ್ಳು ಬೆದರಿಕೆನ್ ತರೆತಗ್ಗವುಜ. ಪೊಲೀಸೆರೆನ ಮುಖೇನ ಕಾಂಗ್ರೆಸ್ ಸರಕಾರ ಅಡ್ಡಿ ಮಲ್ಪರೆ ದುಂಬಾಂಡ ಸ್ವತಃ ಯಾನೇ ಪಾಲ್ ಪಡೆದ್ ರೋಡ್ ರೋಡ್ ಡ್ ಪರ್ಬ ಆಚರಣೆ ಮಲ್ಪುವೆ ಪಂದ್ ಪಂಡೆರ್. ಅಂಚೆನೆ
ವಿಶ್ವವಿದ್ಯಾನಿಲಯಡ್ ಆಚರಣೆ ಮಲ್ತೊಂದು ಬರೊಂದು ಇಪ್ಪುನ ಗಣೇಶ ಉತ್ಸವನ್ ಉಂತಾವಂದಿಲೆಕ್ಕ ಬಿನ್ನಾಪು ಮಲ್ದೆ. ನಮ್ಮ ಪರಂಪರೆ ಧಾರ್ಮಿಕ ಉತ್ಸವದಿಲು ಯಥಾಸ್ಥಿತಿಡ್ ನಡಪುಲೆಕ್ಕ ಆವೊಡು ಪಂದ್ ಪಂಡೆರ್.
ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ಶಕೀಲಾ ಕಾವಾ ಪಾತೆರ್ದ್, ರಂಗಮಂದಿರ ಮಾತೆರೆಗ್ಲಾ ಸದುಪಯೋಗ ಅವಡ್, ನೆರ್ದ್ ಎಡ್ಡೆ ಪ್ರತಿಭೆಲು ಪುಟ್ಟಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ರಂಗ ಮಂದಿರದ ನಿರ್ಮಾಣಗ್ ಸಹಕಾರ ಮಲ್ತಿನ ಶಾಸಕೆರೆನ್, ಸ್ಥಾಯಿ ಸಮಿತಿ ಅಧ್ಯಕ್ಷೆರೆನ್, ದತ್ತ ನಗರ ನಿವಾಸಿ ಸಂಘದ ಪ್ರಮುಖೆರ್, ಕುಡ್ಲ ಜಿಲ್ಲೆದ ವಿಶ್ವ ಹಿಂದೂ ಪರಿಷತ್ ಅಧ್ಯಕ್ಷೆರ್ ಎಚ್. ಕೆ ಪುರುಷೋತ್ತಮ್, ಮನಪಾ ಸದಸ್ಯೆರ್ ಸುಧೀರ್ ಶೆಟ್ಟಿ ಕಣ್ಣೂರು, ಸ್ಥಳೀಯ ಮನಪಾ ಸದಸ್ಯೆ ವನಿತಾ ಪ್ರಸಾದ್ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕೊಡು ದತ್ತ ನಗರ ನಿವಾಸಿಲೆರ್ದ್ ಆಟೋ ಪಂತೊ, ಶ್ರೀ ಕೃಷ್ಣ ಏಸ ಪಂತೊ ಬೊಕ್ಕ ಕಾಸ್ರೋಡುದ ಶ್ರೀ ಸುಧಾಕರ ಕೋಟೆ ಮೆರೆರ್ದ್ ಸೀತ ಕಲ್ಯಾಣ ಬೊಕ್ಕ ಭಕ್ತ ಸುಧಾಮ ಹರಿಕಥ ಸತ್ಸಂಗ ನಡತ್ಂಡ್.
ಈ ಪೊರ್ತುಡು ದತ್ತ ನಗರ ನಿವಾಸಿ ಸಂಘದ ಅಧ್ಯಕ್ಷೆರ್ ವಿಜಯಕುಮಾರ್ ಆಳ್ವ, ಸಂಚಾಲಕೆರ್ ಪ್ರವೀಣ್ ಶೆಟ್ಟಿ, ಕಾರ್ಯದರ್ಶಿ ರಾಜೇಶ್ ನಾಯ್ಕ್, ಕೋಶಾಧಿಕಾರಿ ಕರುಣಾಕರ ಶೆಟ್ಟಿ ಪಾಲ್ ಪಡೆದಿತ್ತೆರ್.
