ಕುಡ್ಲದ ಸುದ್ದಿ | Mangalore News

ಕೆಪಿಟಿ ಸರ್ಕಲ್ ದ ತುಳುನಾಡ ರಿಕ್ಷಾ ಪಾರ್ಕ್ ಡ್ ಪೊಸ ಧ್ವಜಸ್ತಂಭ ಉದಿಪನ

ಕುಡ್ಲ : ತುಳುನಾಡ್ ರಿಕ್ಷಾ ಪಾರ್ಕ್, ಕೆಪಿಟಿ ನೆತ್ತ ಪೊಸ ಧ್ವಜಸ್ತಂಭದ ಉದಿಪನ ಬೊಕ್ಕ ಸ್ವಾತಂತ್ರ್ಯ ದಿನಾಚರಣೆ ಆ.15 ದಾನಿ ನಡತ್‌ಂಡ್.

ಈ ಪೊರ್ತುಡು ಲಯನ್ಸ್ ಬೊಕ್ಕ ಲಿಯೋ ಕ್ಲಬ್‌ದ ಶಾಶ್ವತ ಯೋಜನೆದ ಅಂಗವಾದ್ ಪೊಸತ್ ಧ್ವಜಸ್ತಂಭ ಲೋಕಾರ್ಪಣೆ ಮಲ್ತೆರ್.

ಲಿಯೋ ಲಯನ್ಸ್ ಕದ್ರಿ ಹಿಲ್ಸ್ ನೆತ್ತ ಗುರ್ಕಾರೆ ವಿನೋದ್ ಪ್ರಭು, ಕಾರ್ಪೊರೇಟರ್ ಶಕೀಲ ಕಾವ, ತುಳುನಾಡ ರಿಕ್ಷಾ ಪಾರ್ಕ್, ಕೆಪಿಟಿ ಅಧ್ಯಕ್ಷೆರ್ ಹೇಮಂತ್ ಜೋಗಿ, ಜಿಲ್ಲಾ ಕೋ-ಆರ್ಡಿನೇಟರ್ ಪ್ರಶಾಂತ್ ಪೈ, ಪೂಜಾ ಪೈ, ಸಾಮಾಜಿಕ ಕಾರ್ಯಕರ್ತೆರ್ ಸೌರಜ್ ಕುಡ್ಲ, ಸಪ್ತಗಿರಿ ಪೆಟ್ರೋಲ್ ಪಂಪ್‌ದ ಮಾಲಿಕೆರ್ ನಾರಾಯಣ ರೈ, ಕಿಶೋರ್, ಸುಜಿತ್ ಕುಮಾರ್, ಶರತ್ ಕುಮಾರ್ ಪದವಿನಂಗಡಿ, ರೋಶನ್ ಮೊಕುಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕಟೀಲ್ ದುರ್ಗೆ, ಬಪ್ಪನಾಡಮ್ಮಗ್ ಸ್ವಾತಂತ್ರ್ಯದ ರಂಗ್ ದ ಸಿಂಗಾರ

ದೇಶೊಡು ಮಾತೆರ್ಲ ಸ್ವಾತಂತ್ರ್ಯ ದಿನಾಚರಣೆ ಸಂಭ್ರಮಡ್ ಪಾಲ್ ಪಡೆವುನ ಈ ಪೊರ್ತುಡು ತುಳುನಾಡ್ ದ ದೇವೆರೆಗ್ಲ ನಮ್ಮ ದೇಶದ ಪೆರ್ಮೆದ ಬಾವುಟದ ಬಣ್ಣದ ಸೊತ್ತುಲೆಡ್ ಸಿಂಗಾರ ಮಲ್ತ್ ದ್ ದೇಶಪ್ರೇಮ ತೊಜಪಾದೆರ್.

ಕಟೀಲ್ ಡ್ ಶ್ರೀ ಭ್ರಮರಾಂಬಿಕೆಗ್ ಕೇಸರಿ, ಬೊಲ್ದು ಬೊಕ್ಕ ಪಚ್ಚೆ ಬಣ್ಣದ ಸೀರೆ ತುತ್ತಾದ್ ಅವ್ವೇ ಬಣ್ಣದ ಪೂತ್ತ ಮಾಲೆಲೆನ್ ಪಾಡ್ದ್ ಭಕ್ತೆರೆಗ್ ಕುಷಿ ತಿಕ್ಕುಲೆಕ ಮಲ್ದೆರ್. ಇಂಚಿಡ್ ಮುಲ್ಕಿದ ಬಪ್ಪನಾಡ್ ದ ಪಂಚದುರ್ಗಾ ಪರಮೇಶ್ವರಿಗ್ ಭಾರತದ ಬಾವುಟದ ಪ್ರಭಾವಳಿ ಮಲ್ತ್ ದ್ ಬಗೆ ಬಗೆತ್ತ ಪೂತ್ತ ಅಲಂಕಾರ ಮಲ್ದೆರ್.

ದೇಶೊನೇ ಕಾಪುನ ದೈವ ದೇವೆರೆನ ಭಕ್ತಿದ ಮುಕೇನ ದೇಶ ಭಕ್ತಿನ್ ಲ ತೊಜಪಾವೊಲಿ ಪನ್ಪಿನ ಸಂದೇಶನ್ ದೇವಲ್ಯದ ಆಡಳಿತ ಬೊಕ್ಕ ಅರ್ಚಕ ವೃಂದದಕುಲು ತೊಜಪಾದ್ ಕೊರ್ತೆರ್.

ಕಟೀಲ್ : ಸ್ವಾತಂತ್ರ್ಯ ಉಚ್ಚಯೊಡು ಧ್ವಜವಂದನೆ ಮಲ್ತಿನ ಆನೆ ಮಹಾಲಕ್ಷೀ

ಕುಡ್ಲ: ಪ್ರಸಿದ್ದ ಧಾರ್ಮಿಕ ಕ್ಷೇತ್ರ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಸ್ವಾತಂತ್ರ‍್ಯ ದಿನಾಚರಣೆ ಆಚರಣೆ ಮಲ್ತೆರ್. ಈ ಪೊರ್ತುಡು ವಿಶೇಷ ಪಂಡ ದೇವಳದ ಆನೆ ಮಹಾಲಕ್ಷೀ ರಾಷ್ಟ್ರ ಧ್ವಜನ್ ಪತ್‌ದ್, ಧ್ವಜ ವಂದನೆ ಮಲ್ತಿನ ವಿಶೇಷ ಆದ್ ಇತ್‌ಂಡ್.

ಈ ಪಿರಾಕ್ ಪುಟ್ ಬಾಲ್, ಕ್ರಿಕೆಟ್ ಗೊಬ್ಬುದು ಸಾಮಾಜಿಕ ಜಾಲತಾಣಡ್ ವೈರಲ್ ಆದ್ ಇತ್ತಿನ ಮಹಾಲಕ್ಷೀ ಇನಿ ರಾಷ್ಟ್ರಧ್ವಜ ಪತ್‌ದ್ ಧ್ವಜ ವಂದನೆ ಮಲ್ಪುನ ಮಾತೆರ್ನ ಗೇನ ಒಯಿತ್ ದ್ಂಡ್. ನಿವೃತ್ತ ಸೈನಿಕೆರ್ ಲಕ್ಷ್ಮೀನಾರಾಯಣ ರಾವ್ ಧ್ವಜಾರೋಹಣ ಮಲ್ತೆರ್. ನಿವೃತ್ತ ಸೈನಿಕೆರ್ ನವಾನಂದ ಎಕ್ಕಾರು ದಿಕ್ಸೂಚಿ ಭಾಷಣ ಮಲ್ತೆರ್. ಈ ಪೊರ್ತುಡು ಕ್ಷೇತ್ರದ ಸಮೂಹ ಶಿಕ್ಷಣ ಸಂಸ್ಥೆದ ಸುಮಾರ್ ರಡ್ಡರೆ ಸಾವಿರ ಕಲ್ಪಾರ್ಥಿಲು ಪಾಲ್ ಪಡೆದ್ ಇತ್ತೆರ್.

ದೇವೆರೆ ಪಾದ ಸೇರಿಯೆರ್ ಉದ್ಯಮಿ ಪ್ರಕಾಶ್ ಎನ್ ಶೆಟ್ಟಿ

ಹಳೆಯಂಗಡಿ : ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್, ಉದ್ಯಮಿ ಪ್ರಕಾಶ್ ಎನ್ ಶೆಟ್ಟಿ(82ವ) “ಸುಮಾ ನಿಲಯ”, ಮೇರ್ ದೇವೆರೆ ಪಾದ ಸೇರಿಯೆರ್.

ಮೇರ್ ಧಾರ್ಮಿಕ, ಸಾಮಾಜಿಕ ಕ್ಷೇತ್ರಡ್ ಸಕ್ರಿಯವಾದ್ ಸೇವೆ ಮಲ್ತೊಂದು ಇತ್ತೆರ್. ಅರೆಗ್ ಬುಡೆದಿ ಬೊಕ್ಕ ಮಗಲ್ ಉಲ್ಲೆರ್.

ತುಲು ಲಿಪಿ ಮಾತೆರ್ಲ ಕಲ್ಪೊಡು : ಬಿ.ಮಹಾವೀರ ಹೆಗ್ಡೆ

ಸಂಸ್ಕೃತಿ ಸಿಂಚನ ರೆಂಜಾಳ, ಶ್ರೀ ಮಹಾಮಾಯಿ ಕುಣಿತ ಭಜನಾ ಮಂಡಳಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ನೆಟ್ಟ ನಿರೆಲ್ಡ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ,ಜೈ ತುಲುನಾಡ್ (ರಿ) ಸಂಸ್ಥೆದ ಮುತಾಲಿಕೆಡ್ ಬಲೆ ತುಲು ಲಿಪಿ ಕಲ್ಪುಗ ತರಬೇತಿ ದ ಉದಿಪನದ ಲೇಸ್ ಆ.13 ದಾನಿ ನಡತ್ಂಡ್.

ಲೇಸ್ ಉದಿಪನ ಮಲ್ತ್ ಪಾತೆರ್ನ ಮಹಾವೀರ ಹೆಗ್ಡೆ, ತುಳು ಲಿಪಿ ಮಾತೆರ್ಲ ಕಲ್ಪೊಡು. 1928ರಲ್ಲಿ ಭಾಷಾವಾರು ಸಮಿತಿ ಪರಿಷದ್ ಮೀಟಿಂಗ್ ಡ್ ತುಳು ಭಾಷೆನ್ ಒರಿಪಾವುನ ಅಂಚನೆ ಸಂಸ್ಕೃತಿದ ಬೆಳವಣಿಗೆಗ್ ಒತ್ತು ಕೊರ್ದ್ ಇತ್ತೆರ್, ತುಳುನಾಡ್ ಬ್ಯಾಂಕ್ ಸ್ಥಾಪನೆ ಮಲ್ತ್ ಇತ್ತೆರ್ ಪಂದ್ ತೆರಿಪಾಯೆರ್.

ಈ ಪೊರ್ತುಡು ಮಹಮ್ಮಾಯಿ ಕುಣಿತ ಭಜನ ಮಂಡಳಿ ರೆಂಜಾಳದ ಸಂಚಾಲಕೆರಾಯಿನ ಸುಪ್ರಿಯಾ ಮೇರ್ ಗುರ್ಕಾಮೆನ್ ವಹಿಸಾದ್ ಇತ್ತೆರ್. ಜೈ ತುಲುನಾಡ್ ಸಂಘದ ಅಧ್ಯಕ್ಷೆರ್ ವಿಶು ಶ್ರೀಕೇರ, ಮುಖ್ಯ ಶಿಕ್ಷಕಿ ಸ್ವರ್ಣಲತಾ, ವಿಶಾಲಾಕ್ಷಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ರೆಂಜಾಳದ ಅಧ್ಯಕ್ಷೆರ್ ರಮೇಶ್ ಶೆಟ್ಟಿ, ತುಳು ಲಿಪಿತ್ತ ತರಬೇತುದಾರೆರ್ ಪ್ರಶಾಂತ್ ಪೂಜಾರಿ, ಪವಿತ್ರ ಕೋಟ್ಯಾನ್ ಲೇಸ್ ಡ್ ಪಾಲ್ ಪಡೆಯೆರ್.

ಮಲ್ಲಿಕಾ ಮುನಿರಾಜ್‌ ಜೈನ್ ಸ್ವಾಗತ ಮಲ್ತ್ ದ್ ಶ್ರರ್ಮಿಳಾ ಶೆಟ್ಟಿ ವಂದನೆ ಮಲ್ತೆರ್.

ಮುಲ್ಕಿಡ್ ಜೈ ತುಲುನಾಡ್(ರಿ) ತೆರಪು ಉದಿಪನ

ಜೈ ತುಲುನಾಡು(ರಿ) ಸಂಘಟನೆದ 9 ನೇ ವರ್ಷದ ವಾರ್ಷಿಕೋತ್ಸವ ಪುನರೂರು ಟೂರಿಸ್ಟ್ ಹೋಮ್ ಸಭಾ ಭವನಡ್ ನಡ ತ್ಂಡ್. ಅಂಚನೆ ಜೈ ತುಲುನಾಡ್ ಸಂಘಟನೆದ ತೆರಪು(ಕಚೇರಿ) ಒಕ್ಕೆಲ್ ಲೇಸ್ ಐತಾರ ಬೊಲ್ಪುಗು ಮುಲ್ಕಿ ಕೆನರಾ ಬ್ಯಾಂಕ್ ಕೈತಲ್ ನಡತ್ಂಡ್.

ಸಭಾ ಕಾರ್ಯಕ್ರಮದ ಉದಿಪನ ಮಲ್ತ್ ಪಾತೆರ್ನ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನ ರೂರು, ತುಳು ಭಾಷೆ ಒರಿಪಾದ್ ಬುಲೆಪಾವುನ ನಮ್ಮ ಕರ್ತವ್ಯ. ಜೋಕ್ಲೆಗ್ ತುಳು ಲಿಪಿ ಕಲ್ಪಾವೊಡು, ತುಳುಕ್ಕು ರಾಜ್ಯಡ್ ವಿಶೇಷ ಸ್ಥಾನಮಾನ ಕೊರೊಡು ಅಂಚನೆ ಸಂವಿಧಾನದ 8 ನೇ ಪರಿಚ್ಚೇದಗ್ ಸೇರ್ಪಾವೆರೆ ಹಕ್ಕೊತ್ತಾಯ ಮಲ್ಪೊಡು ಪಂಡೆರ್.

ಲೇಸ್ ದ ಗುರ್ಕಾಮೆನ್ ಜೈ ತುಲುನಾಡ್ ಸಂಘಟನೆದ ಗುರ್ಕಾರೆ ವಿಶು ಶ್ರೀಕೇರ ವಹಿಸಾದ್ ಇತ್ತೆರ್. ಮಲ್ಲ ಬಿನ್ನೆರಾದ್ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಡಾ. ಆಕಾಶ್ ರಾಜ್ ಜೈನ್, ಟೈಮ್ಸ್ ಆಫ್ ಕುಡ್ಲ ತುಳುಪತ್ರಿಕೆದ ಸಂಪಾದಕೆರ್ ಎಸ್. ಆರ್ ಬಂಡಿಮಾರ್, ವಕೀಲೆರಾಯಿನ ಗಿರೀಶ್ ಶೆಟ್ಟಿ ಶಿಬರೂರು, ಮುಲ್ಕಿ ವಲಯ ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ನಿಶಾಂತ್ ಶೆಟ್ಟಿ ಕಿಲೆಂಜೂರು, ಜೈ ತುಲುನಾಡ್ ಸಂಘಟನೆದ ಉಪಾಧ್ಯಕ್ಷೆರ್ ಉದಯ ಪೂಂಜ, ಕಿರಣ್ ತುಲುವೆ, ಪೂರ್ಣಿಮಾ ಕಿರಣ್ ಇತ್ತೆರ್.

ಪೂರ್ಣಿಮಾ ಬಂಟ್ವಾಳ್ ಲೇಸ್ ನಿರೂಪಣೆ ಮಲ್ತೆರ್.

ಆ.13: ಜೈ ತುಲುನಾಡ್ (ರಿ.) ದ ಮುತಾಲಿಕೆಡ್ ತೆರಪು (ಕಚೇರಿ ) ಒಕ್ಕೆಲ್

ತುಲು ಬಾಸೆ, ಬರವು, ಸಂಸ್ಕೃತಿದ ಒರಿಪು ಬುಲೆಚ್ಚಿಲ್ ಗಾದ್ ಉಂಡಾಯಿನ ಕೂಟೊ ಜೈ ತುಲುನಾಡ್ (ರಿ.) ದ ಮುತಾಲಿಕೆಡ್ ತೆರಪು ಒಕ್ಕೆಲ್ (ಪ್ರಧಾನ ಕಚೇರಿ ಉದಿಪನ) ಲೇಸ್ ಆ.13 ಐತಾರ ಬೊಲ್ಪುಗು ಮುಲ್ಕಿ ಕೆನರಾ ಬ್ಯಾಂಕ್ ದ ಕೈತಲ್ ನಡಪರೆ ಉಂಡು.

ಅಂಚೆನೆ 9 ನೇ ವರ್ಸೋಚ್ಚಯೊ ಲೇಸ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ಚಾವಡಿಡ್ ನಡಪರೆ ಉಂಡು. ಈ ಲೇಸ್ ದ ಉದಿಪನನ್ ಬೆಂಗ್ಲೂರ್ ಕ.ಸಾ.ಪ ಮಾಜಿ ರಾಜ್ಯಾಧ್ಯಕ್ಷೆರ್ ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಮಲ್ಪರೆ ಉಲ್ಲೆರ್. ನೆತ್ತ ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ.) ದ ಗುರ್ಕಾರ್ಲು ವಿಶು ಶ್ರೀಕೇರ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್, ಆಳುವ ವಂಶಸ್ಥೆರ್ ಡಾ.ಆಕಾಶ್ ರಾಜ್ ಜೈನ್, ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಪ್ರಧಾನ ಸಂಪಾದಕೆರ್ ಎಸ್ ಆರ್ ಬಂಡಿಮಾರ್, ಕುಡ್ಲದ ಜಿಲ್ಲಾ ಯುವಜನ ಒಕ್ಕೂಟದ ಪ್ರಧಾನ ಕಾರ್ಯಂತೆರ್, ವಕೀಲೆರ್ ಗಿರೀಶ್ ಶೆಟ್ಟಿ ತಿಬಾರ್, ಮುಲ್ಕಿ ವಲಯ ಪತ್ರಕರ್ತರ ಸಂಘದ ಗುರ್ಕಾರ್ಲು ನಿಶಾಂತ್ ಶೆಟ್ಟಿ ಕಿಲೆಂಜೂರು ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ನ್ ಪೂರ್ಣಿಮಾ ಬಂಟ್ವಾಳ ಸುಧಾರಿಕೆ ಮಲ್ಪುವೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಎಲ್.ಎಸ್.ಎಸ್. ಪರೀಕ್ಷೆಡ್ ಕು. ಸನ್ನಿಧಿ ಜೆ ಉತ್ತೀರ್ಣ

ಇಂಚೊಗು ಪ್ರಕಟ ಆಯಿನ ಎಲ್.ಎಸ್.ಎಸ್. ಪರೀಕ್ಷೆದ (LSS Examination) ಫಲಿತಾಂಶಡ್ ಬದಿಯಡ್ಕ ವಿದ್ಯಾಗಿರಿ ಶ್ರೀ ಅನಂತ ಭಟ್ ಸ್ಮಾರಕ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆದ ನಾಲನೇ ತರಗತಿದ ಕಲ್ಪಾರ್ಥಿ ಕು| ಸನ್ನಿಧಿ ಜೆ ಎನ್ ಎಡ್ಡೆ ಮಾರ್ಕ್ಸ್ ದೆತ್ತ್ ದ್ ಪಾಸ್ ಆದ್ ವಿದ್ಯಾರ್ಥಿ ವೇತನ ಪಡೆಯೊನರೆ ಆಯ್ಕೆ ಆತೆರ್.

ಜೈ ತುಲುನಾಡ್(ರಿ.) ಕಾಸ್ರೋಡ್ ಘಟಕದ ಉಪ ಕಾರ್ಯದರ್ಶಿ, ಕಾಸ್ರೋಡ್ ಘಟಕದ ಶೌರ್ಯ ವಿಪತ್ತು ಕಾರ್ಯಪಡೆತ ಮಾಸ್ಟರ್ ಜಗನ್ನಾಥ ಕುಲಾಲ್ ಬೊಕ್ಕ ನಯನ ಮೊಕ್ಲೆನ ಮಗಲ್.

ಕಲಿಕಾ ಚಟುವಟಿಕೆಡ್ ಆಸಕ್ತಿ ಇಪ್ಪುನ ಕು| ಸನ್ನಿಧಿ ಜೈ ತುಲುನಾಡ್(ರಿ.) ಸಂಘಟನೆ ನಡಪಾವೊಂದು ಇಪ್ಪುನ “ಬಲೆ ತುಲು ಲಿಪಿ ಕಲ್ಪುಗ” ಕಾರ್ಯಾಗಾರಡ್ ತುಲು ಲಿಪಿ ಕಲ್ತ್ ದ್ ಮಾತೃಬಾಷೆದ ಮೋಕೆನ್ ತೆರಿಪಾದೆರ್.

ಸ್ಟಾರ್ ಸುವರ್ಣ ಚಾನೆಲ್‌ಗ್ ಸರ್ಕಸ್..!

ಸರ್ಕಸ್ ಪಿಚ್ಚರ್‌ದ ಟಿವಿದ ಹಕ್ಕ್ ನ್ ಕನ್ನಡದ ಪ್ರಖ್ಯಾತ ಚಾನೆಲ್ ಸ್ಟಾರ್ ಸುವರ್ಣ ದಾಖಲೆದ ಬಿಲೆಟ್ ದೆತೊದುಂಡ್. ಆಯಿನಾತ್ ಬೇಗ ಸರ್ಕಸ್ ಪಿಚ್ಚರ್ ಸುವರ್ಣ ಚಾನೆಲ್‌ಡ್ ತೊಜಿದ್ ಬರಿಯೆರೆ ಉಂಡು.

ಸ್ಟಾರ್ ಸುವರ್ಣ ಚಾನೆಲ್ ಸ್ಟಾರ್ ಲೈಟ್ ಹಕ್ಕ್ ನ್ ದೆತೊನ್ನ ಸುರುತ ತುಳು ಚಿತ್ರ ಸರ್ಕಸ್ ಆತ್‌ಂಡ್.