ಕುಡ್ಲದ ಸುದ್ದಿ | Mangalore News

ಸೆ.30: ಕುಡ್ಲದ ಪುರಭವನೊಡು ಸುರುತ್ತ ಸರ್ತಿ ಸಿರಿ ದೇವಿ ಮೈಮೆ ತುಳು ಆಟ

ತುಳುವೆರೆ ಆಯನೊ ಕೂಟ ಕುಡ್ಲ (ರಿ.) ದುಂಬಾತ್ತಿಗೆಡ್ ಕುಡ್ಲದ ಪುರಭವನೊಡು ಸುರುತ್ತ ಸರ್ತಿ ತುಳುಟ್ ಭಾಗವತಿಕೆದೊಟ್ಟಿಗೆ ಯಕ್ಷಲೋಕೊದ ಪೆರ್ಮೆದ ಕಲಾವಿದೆರ್ನ ಸೇರಿಗೆಡ್ ರಾಜೋತ್ಸವ ಪ್ರಶಸ್ತಿ ಪಡೆಯಿನ ಸರಪಾಡಿ ಅಶೋಕ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಸಿರಿ ದೇವಿ ಮೈಮೆ ತುಳು ಆಟ ಸೆ.30 ಸನಿಯಾರ ಮಧ್ಯಾಹ್ನರ್ದ್ ಬೊಕ್ಕ ನಡಪರೆ ಉಂಡು.

ಅಂಚೆನೆ ಸದಾಶಿವ ಶೆಟ್ಟಿ ಕನ್ಯಾನ ಇಂಬೆರೆಗ್ ತುಳುವೆರೆ ಕರ್ಣೆ ಬಿರ್ದ್ ಮಾನಾದಿಗೆ ನಡಪರೆ ಉಂಡು. ಬೊಕ್ಕ ದೇವದಾಸ್ ಈಶ್ವರಮಂಗಲ ಅನುವಾದ ಮಲ್ತಿನ ಸಿರಿದೇವಿ ಮಾತ್ಮೆ ಬೂಕು ಬುಡುಗಡೆ ಲೇಸ್ ನಡಪುಂಡು. ಕುಡ್ಲ ಶಾಸಕೆರ್ ವೇದವ್ಯಾಸ್ ಕಾಮತ್ ಬೂಕು ಬುಡುಗಡೆ ಮಲ್ಪರೆ ಉಲ್ಲೆರ್. ಬೊಕ್ಕ ವಾಯ್ಸ್ ಓಫ್ ಆರಾಧನಾ ಕೂಟ ಮುಕುಲೆರ್ದ್ ಜೋಕ್ಲೆನ ಮಿನದನ, ಫ್ಲೆವಿ ಡಿಮೆಲ್ಲೊ, ಸರೋಜ, ಹರೀಶ್ ಬೊಕ್ಕ ಕೂಟದಕುಲೆರ್ದ್ ತುಳು ಜಾನಪದ ನೃತ್ಯ ಬೊಕ್ಕ ಪದೊ, ಬೊಕ್ಕ ತುಳುವೆರೆ ಆಯನೊ ಕೂಟ (ರಿ.) ಕುಡ್ಲ ಮೊಕ್ಲೆನ 2023-24 ನೇ ಅವಧಿದ ಅಧಿಕಾರ ವಹಿಸೊನುನ ಕಜ್ಜೊ ನಡಪರೆ ಉಂಡು. ಅಂಚೆನೆ ಬಯ್ಯಗ್ ತೆನಸ್, ರಾತ್ರೆ ವನಸ್ ದ ವ್ಯವಸ್ಥೆ ಉಂಡು.

“ತುಳು ಪಿಕ್ಚರ್ ನ್ ತುಳುವೆರ್ ಗೆಲ್ಪಾವೊಡು”: ಕರುಣಾಕರ ಎಂ.ಶೆಟ್ಟಿ

“ಯಾನ್ ಸೂಪರ್ ಸ್ಟಾರ್” ತುಳು ಪಿಕ್ಚರ್ ತುಳುನಾಡ್ ಡ್ ಬುಡುಗಡೆ

ಕುಡ್ಲ: ಆನಂದ ಫಿಲಂಸ್ ಬೊಕ್ಕ ದಿ ಮಂಗಳೂರಿಯನ್ಸ್ ಲಾಂಛನಡ್ ರಾಮ್ ಶೆಟ್ಟಿ ಅರ್ಪಣೆ ಮಲ್ಪುನ, ದಯಾನಂದ ಶೆಟ್ಟಿ ನಿರ್ಮಾಣದ, ಸಂತೋಷ್ ಶೆಟ್ಟಿ ನಿರ್ದೇಶನಡ್ ತಯಾರಾಯಿನ “ಯಾನ್ ಸೂಪರ್ ಸ್ಟಾರ್” ಪಿಕ್ಚರ್ ಪೇಂಟೆದ ಬಿಗ್ ಸಿನೆಮಾಸ್ ಡ್ ಬುಡುಗಡೆ ಆತ್ಂಡ್.

ಈ ಲೇಸ್ ಡ್ ಪಾಲ್ ಪಡೆಯಿನ ಬಿನ್ನೆರ್ ನಕುಲು ಸೇರ್ದ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಬೊಂಬೈ ವಿ.ಕೆ.ಸಮೂಹ ಸಂಸ್ಥೆದ ಗುರ್ಕಾರೆ, ಆಡಳಿತ ನಿರ್ದೇಶಕೆರ್ ಕರುಣಾಕರ ಎಂ. ಶೆಟ್ಟಿ ಮಧ್ಯಗುತ್ತು ಮೇರ್ ಪಾತೆರ್ದ್, “ಯಾನ್ ಸೂಪರ್ ಸ್ಟಾರ್” ಪಿಕ್ಚರ್ ಇನಿ ಎಡ್ಡೆ ಮೂರ್ತಡ್ ಬುಡುಗಡೆ ಆತ್ಂಡ್. ತುಳುವೆರ್ ಈ ಪಿಕ್ಚರ್ ನ್ ಇಷ್ಟಪಟ್ಟ್ ದ್ ಗೆಂದಾವೊಡು. ಈ ಪಿಕ್ಚರ್ ಮಾತ ಕಡೆಟ್ಲಾ ಯಶಸ್ವಿ ಪ್ರದರ್ಶನ ಆತ್ಂಡ್. ನನಲ ಈ ಕೂಟ ನನಾತ್ ಎಡ್ಡೆ ಗುಣಮಟ್ಟದ ಪಿಕ್ಚರ್ ಮಲ್ತ್ ದ್ ಜನ ಪುಗರ್ತೆನ್ ಪಡೆಯಡ್” ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, “ಈ ಪಿಕ್ಚರ್ ಬೊಂಬೈ ತುಳುವೆರೆರ್ದ್ ಪ್ರಶಂಸೆ ಪಡೆಯಿನ ಪಿಕ್ಚರ್. ನೆಟ್ಟ್ ತುಳುನಾಡ್ ದ ಸುಮಾರ್ ದಿಗ್ಗಜ ಕಲಾವಿದೆರ್ ನಟನೆ ಮಲ್ದೆರ್. ಮಾತೆರ್ಲಾ ಪೊರ್ಲುಡು ನಟನೆ ಮಲ್ದೆರ್. ಒವ್ವೇ ತುಳು ಪಿಕ್ಚರ್ ಬತ್ತ್ಂಡಲ ತುಳುವೆರ್ ಸೋಪೆರೆ ಬುಡ್ಪುಜೆರ್ ಪನ್ಪುನ ನಂಬಿಕೆ ನಮ್ಮಡ ಉಂಡು. ತುಳುನಾಡ್ ದ ದೈವ ದೇವೆರೆನ ಆಶೀರ್ವಾದರ್ದ್ ಪಿಕ್ಚರ್ ಯಶಸ್ಸ್ ಅವಡ್” ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ ಪಾತೆರ್ದ್, “ಬೊಂಬೈ ತುಳುವೆರ್ ಒಟ್ಟಾದ್ ಒಂಜಿ ಎಡ್ಡೆ ಪಿಕ್ಚರ್ ನಮ್ಮ ಎದುರು ಕನತೆರ್. ಮಾತೆರ್ಲಾ ಪಿಕ್ಚರ್ ತೂದು ಪ್ರೋತ್ಸಾಹ ಮಲ್ಪಿ” ಪಂದ್ ಪಂಡೆರ್.

ಡಾ. ದೇವದಾಸ್ ಕಾಪಿಕಾಡ್ ಪಾತೆರ್ದ್, “ಬೊಂಬೈಡ್ ಇತ್ತಿನ ತುಳುವೆರ್ ನಮ್ಮ ತುಳುನಾಡ್ ದ ಮಿತ್ತ್ ಪ್ರೀತಿ ದೀದ್ ಪಿಕ್ಚರ್ ಮಲ್ದೆರ್. ಅಕ್ಲೆನ್ ತುಳುವೆರ್ ಸೋಪರೆ ಬುಡಿಯೆರೆ ಬಲ್ಲಿ.‌ ಮಾತೆರ್ಲಾ ಪಿಕ್ಚರ್ ತೂದು ಗೆಂದಾಲೆ” ಪಂದ್ ಪಂಡೆರ್.

ಲೇಸ್ ಡ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ಶಿವಧ್ವಜ್ ಶೆಟ್ಟಿ, ಜಯರಾಮ ಶೇಖ, ಅಡ್ಯಾರ್ ಮಾಧವ ನಾಯ್ಕ್, ಗಿರೀಶ್ಎಂ ಶೆಟ್ಟಿ ಕಟೀಲ್, ಹರೀಶ್ ವಾಸು ಶೆಟ್ಟಿ, ಮಾನಸಿ ಸುಧೀರ್, ಸಂಗೀತ ನಿರ್ದೇಶಕೆರ್ ವಿ. ಮನೋಹರ್, ನವೀನ್ ಡಿ. ಪಡೀಲ್, ದಯಾನಂದ ಶೆಟ್ಟಿ, ತಮ್ಮ ಲಕ್ಷ್ಮಣ, ರಾಮ್ ಶೆಟ್ಟಿ ಬೊಂಬೈ, ಬಾಳ ಜಗನ್ನಾಥ ಶೆಟ್ಟಿ, ಭೋಜರಾಜ್ ವಾಮಂಜೂರ್, ಮೋಹನ್ ಕೊಪ್ಪಲ ಪಾಲ್ ಪಡೆದಿತ್ತೆರ್.

ಭಾಗ್ಯರಾಜ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ಕುಡ್ಲಡ್ ರೂಪವಾಣಿ, ಭಾರತ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲಡ್ ಐನಾಕ್ಸ್, ಭಾರತ್ ಸಿನಿಮಾಸ್, ಪಡ್ಡೆದ್ರಡ್ ಭಾರತ್ ಸಿನಿಮಾಸ್, ಕಾರ್ಲಡ್ ರಾಧಿಕಾ, ಪ್ಲಾನೆಟ್, ಬೊಲ್ತೇರ್ ಡ್ ಭಾರತ್, ಸುರತ್ಕಲ್ ಡ್ ನಟರಾಜ್, ಸಿನಿಗ್ಯಾಲಕ್ಸಿ, ಪುತ್ತೂರುಡು ಭಾರತ್ ಸಿನಿಮಾಸ್, ಸುಳ್ಯಡ್ ಸಂತೋಷ್ ಚಿತ್ರಮಂದಿರಡ್ ಪಿಕ್ಚರ್ ಬುಡುಗಡೆ ಆಪುಂಡು.

ಯಾನ್ ಸೂಪರ್ ಸ್ಟಾರ್ ಪುದರ್ ಡ್ ಇಪ್ಪುನಂಚೆನೆ ಉಂದು ತುಳುಟ್ಟ್ ಪೊಸ ಬಗೆತ್ತ ಪಿಕ್ಚರ್. ಪ್ರೇಕ್ಷಕೆರೆನ ನಾಡಿ ಮಿಡಿತನ್ ತೆರಿದ್ ಪಿಕ್ಚರ್ ದ ಕತೆನ್ ಬರೆತೆರ್. ಪಿಕ್ಚರ್ ಡ್ ಹಾಸ್ಯದೊಟ್ಟಿಗೆ ಎಡ್ಡೆ ಸಂದೇಶಲ ಉಂಡು ಪಂದ್ ನಿರ್ದೇಶಕೆರ್ ಸಂತೋಷ್ ಶೆಟ್ಟಿ ತೆರಿಪಾದೆರ್.

ಕುಡ್ಲ ವಿಶ್ವವಿದ್ಯಾನಿಲಯಡ್ ನಿರ್ವಿಘ್ನವಾದ್ ನಡತ್ಂಡ್ ಚೌತಿ ಪರ್ಬ, ಈ ದುಂಬುದ ಪರಂಪರೆ ಇಂಚೆನೆ ದುಂಬಾರಿಯಾಡ್: ಶಾಸಕೆರ್ ಕಾಮತ್

ಕುಡ್ಲ: ವಿಶ್ವವಿದ್ಯಾನಿಲಯದ ಚೌತಿ ಪರ್ಬ ದುಂಬುದಂಚೆನೆ ಅವ್ವೆ ಜಾಗೆಡ್ ಆಚರಣೆ ಮಲ್ಪುನ ಮುಖೇನ ಮಾತ ಗೊಂದಲ ಸರಿ ಆತ್ಂಡ್. ಈ ಮುಖೇನ ಉಂದು ಹಿಂದೂ ಸಮಾಜದ ಪೊರ್ಂಬಾಟಗ್ ಸಂದಿನ ಜಯ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.

ಸುಮಾರ್ ದಿನೊರ್ದಿಂಚ ನಡತಿನ ಮಾತ ಬುಲೆವಣಿಗೆದ ನಡುಟ್ಟ್ ವಿಶ್ವವಿದ್ಯಾನಿಲಯದ ಕುಲಪತಿಲು ಸರ್ಕಾರಗ್ ಪತ್ರ ಬರೆದ್ ಚೌತಿ ಪರ್ಬದ ಬಗೆಟ್ಟ್ ಸರಿಯಾಯಿನ ಮಾರ್ಗದರ್ಶನ ಕೊರ್ತೆರ್. ಇತ್ತೆ ಅಕೇರಿಗ್ಲಾ ಮಂಗಳಾ ಸಭಾಂಗಣಡ್ ವಿಘ್ನ ವಿನಾಯಕನ ಪ್ರತಿಷ್ಠಾಪನೆ ಆಯಿನವು ವಿಶ್ವವಿದ್ಯಾನಿಲಯಗ್ ಬೊಕ್ಕ ನೆಕ್ಕ್ ಸಹಕಾರ ಮಲ್ತಿನ ಮಾತ ಹಿಂದೂ ಸಮಾಜಗ್ ಸೊಲ್ಮೆ ಸಂದಾವೆ.

ನೆತ್ತ ನಡುಟ್ಟ್ ಇಂಚಿನ ಎಡ್ಡೆ ಬೇಲೆಗ್ ಒರಿ ಕಮ್ಯುನಿಸ್ಟ್ ನಾಯಕೆ ವಿಘ್ನ ಮಲ್ಪುನ ಬೆದರಿಕೆ ಪಾಡಿನ ಬಗೆಟ್ಟ್ ಇಡೀ ಚೌತಿದ ಪರ್ಬಗ್ ಭಾರೀ ಪೊಲೀಸ್ ಬಂದೋಬಸ್ತ್ ಪಾಡ್ದ್ ಸಾಮಾನ್ಯ ಜನಕ್ಲೆಗ್ ಪೋಡಿಗೆ ಪುಟ್ಟಾದ್ ಪರ್ಬದ ಗೌಜಿನೆ ಆಲ್ ಮಲ್ತಿನ ಸರ್ಕಾರದ ನಡೆನ್ ಖಂಡಿಸಾವೆ ಪಂದ್ ಪಂಡೆರ್.

ಈ ಸರ್ತಿದ ಗಣಪತಿನ ಮೂರ್ತಿ ಎಲ್ಯಾದ್ ಕಿರೀಟ ಮಲ್ಲ ಇತ್ತ್ ದ್ ಕೆಲವೊಂಜಿ ವ್ಯವಸ್ಥೆಲು ನೇರ್ದ್ ದುಂಬುದಲೆಕ್ಕ ಇಪ್ಪಂದಿನ ಬಗೆಟ್ಟ್ ಸುಮಾರ್ ಎನ್ನ ಗಮನಗ್ ಕನತೆರ್. ನನದ ಸರ್ತಿ ಆಂಡಲ ನೇರ್ದ್ ದುಂಬುದ ಗಾತ್ರದನೇ ಗಣಪತಿನ ಮೂರ್ತಿ ಬೊಕ್ಕ ಆಯಿಕ್ಕ್ ಸರಿ ಪೋಪುನ ಮಾತ ಅಚ್ಚುಕಟ್ಟಾಯಿನ ವ್ಯವಸ್ಥೆಲೆನ ಬಗೆಟ್ಟ್ ನನಾತ್ ಎಚ್ಚ ಗಮನ ಕೊರ್ದು ಒವ್ವೇ ಗೊಂದಲಗ್ ಆಸ್ಪದ ಆವಂದಿಲೆಕ್ಕ ಇಡೀ ವಿಶ್ವವಿದ್ಯಾನಿಲಯದ ಕಲ್ಪಾರ್ಥಿಲು- ಸಿಬ್ಬಂದಿಲು- ಕೈತಲ್ ದಕುಲು ಸೇರೊಂದು ಸೌಹಾರ್ದಯುತವಾದ್ ಗೌಜಿಡ್ ಚೌತಿ ಪರ್ಬನ್ ಆಚರಣೆ ಮಲ್ಪುನಂಚಿನ ವಾತಾವರಣ ಸೃಷ್ಟಿ ಅವಡ್ ಪಂದ್ ಸರ್ವ ಶಕ್ತಿ ಗಣಪತಿ ದೇವೆರೆಡ ಪ್ರಾರ್ತನೆ ಮಲ್ಪುವೆ ಪಂದ್ ಶಾಸಕೆರ್ ಪಂಡೆರ್.

ಮೋಜು ಮಸ್ತಿದ ತಾಣವಾಯಿನ ಗುಜ್ಜರಕೆರೆ: ಪ್ರಧಾನಿ ಕಚೇರಿರ್ದ್ ಸರಿಯಾಯಿನ ಕ್ರಮ ದೆತೊನಿಯೆರೆ ಸಂಬಂಧಪಟ್ಟಿನ ಇಲಾಖೆಗ್ ಸೂಚನೆ

ಕುಡ್ಲ: ಜಿಲ್ಲೆದ ಸುಮಾರಾತ್ ಕೆರೆಕ್ಲ್ ನೆಟ್ಟ್ ಒಂಜಾಯಿನ ಕುಡ್ಲ ಪೇಂಟೆದ ಗುಜ್ಜರಕೆರೆತ್ತ ರಕ್ಷಣೆಗ್ ಪ್ರಧಾನಿ ಕಚೇರಿಗ್ ಬಿನ್ನಾಪು ಮಲ್ತಿನ ಬಗೆಟ್ಟ್ ಸರಿಯಾಯಿನ ಕ್ರಮ ದೆತೊನಿಯೆರೆ ಸಂಬಂಧಪಟ್ಟಿನ ಇಲಾಖೆಗ್ ಪ್ರಧಾನಿ ಕಚೇರಿ ಸೂಚನೆ ಕೊರ್ತುಂಡು.

ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆ ಸಂದಾಯಿನ ಬಿನ್ನಾಪುನ್ ಸ್ವೀಕಾರಿಸಾಯಿನ ಪ್ರಧಾನಿ ಕಚೇರಿ ಸರಿಯಾಯಿನ ಕ್ರಮಕ್ಕ್ ಕುಡ್ಲ ತಹಶಿಲ್ದಾರ್ ಗ್ ಪತ್ರ ಬರೆತ್ಂಡ್.‌ ಆಯಿನಂಚೆನೆ ತಹಶಿಲ್ದಾರೆರ್ ಕುಡ್ಲ ಸ್ಮಾರ್ಟ್ ಸಿಟಿ ವ್ಯವಸ್ಥಾಪಕ ನಿರ್ದೇಶಕೆರೆಗ್ ಪತ್ರ ಬರೆದ್ ದೂರುದಾರೆರೆಗ್ ಪ್ರತಿಕ್ರಿಯೆ ಕೊರೊಡು ಪಂದ್ ಕೇನೊಂದೆರ್.‌

ಈ ಕೆರೆಕ್ಕ್ ಐತಿಹಾಸಿಕ ಬೊಕ್ಕ ಧಾರ್ಮಿಕ ಮಹತ್ವ ಉಂಡು. ಕೈತಲ್ ದ ಅಂತರ್ಜಲ ಸಂಕ್ಷರಣೆದ ಅಗರ ಆತ್ಂಡ್. ಕೆಲವು ವರ್ಷೊಲೆನ ದುಂಬು ಈ ಕೆರೆತ್ತ ಅಭಿವೃದ್ಧಿ ಕಾರ್ಯಲು ಸ್ಮಾರ್ಟ್ ಸಿಟಿ ಯೋಜನೆದಡಿಟ್ಟ್ ನಡತ್ ದ್ಂಡ್. ಆಂಡ ಕೈತಲ್ ದಕ್ಲೆನ ಬೊಕ್ಕ ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆದ ಆಶಯಗ್ ಪೂರಕವಾದ್ ಅಭಿವೃದ್ಧಿ ಕಾರ್ಯಲು ನಡತಿಜಿ. ಕೆರೆತ್ತ ಪರಿಸರ ಇತ್ತೆ ಮೋಜು ಮಸ್ತಿದ ತಾಣವಾದ್ ಬದಲಾತ್ಂಡ್ ಪಂದ್ ವೇದಿಕೆದ ಕಾರ್ಯದರ್ಶಿ ನೇಮು ಕೊಟ್ಟಾರಿ ಪ್ರಧಾನಿ ಕಚೇರಿಗ್ ಬರೆಯಿನ ಪತ್ರಡ್ ಆರೋಪ ಮಲ್ದೆರ್.

ಸ್ಮಾರ್ಟ್ ಸಿಟಿ ಯೋಜನೆದಡಿಟ್ಟ್ ಕೆರೆ ಅಭಿವೃದ್ಧಿ ಇಂಚ ತೂನಗ ಪ್ರವಾಸಿ ತಾಣದಲೆಕ್ಕ ತೂಜಿಂಡಲ ಕೆರೆತ್ತ ಧಾರ್ಮಿಕ, ಐತಿಹಾಸಿಕ ಮಹತ್ವಗ್ ಪೂರಕವಾದ್ ಅಭಿವೃದ್ಧಿ ಕಾರ್ಯಲು ನಡತಿಜಿ. ನೀರ್ ನ್ ಶುದ್ದ ಮಲ್ಪುನ ಬಗೆಟ್ಟ್ ಕ್ರಮ ದೆತೊಂದಿಜೆರ್. ನೀರ್ ಡ್ ವಿಷಕಾರಿ ಅಂಶಲು  ಇಪ್ಪುನವು ಬೊಕ್ಕ ಈ ನೀರ್ ಪರಿಯೆರೆ ಸರಿ ಆಯಿನವು ಅತ್ತ್ ಪಂದ್ ಪ್ರಯೋಗಾಲಯ ವರದಿ ಬೈದ್ಂಡ್ ಪಂದ್ ಪತ್ರಡ್ ತೆರಿಪಾದೆರ್.

ಎಂಕುಲು ಪ್ರಧಾನಿ ಕಚೇರಿಗ್ ಸಂದಾಯಿನ ದೂರು ಸ್ವೀಕಾರಿಸಾದೆರ್. ಅತ್ತಂದೆ ಸ್ಮಾರ್ಟ್ ಸಿಟಿ ವ್ಯವಸ್ಥಾಪಕ ನಿರ್ದೇಶಕೆರ್ ಸರಿಯಾಯಿನ ಕ್ರಮ ದೆತೊನಿಯೆರೆ ಉಲ್ಲೇಖ ಇಪ್ಪುನ ಅರ್ಜಿನ್ ವರ್ಗಾಯಿಸಾದೆರ್. ಅಂಚಾದ್ ಈ ಸರ್ತಿ ಆಂಡಲ ಸಂಬಂಧಪಟ್ಟಿನ ಇಲಾಖೆರ್ದ್ ಪೂರಕ ಸ್ವಂದನ ತಿಕ್ಕುನ ಭರವಸೆ ಉಂಡು ಪಂದ್ ನೇಮು ಕೊಟ್ಟಾರಿ ಪ್ರತಿಕ್ರಿಯೆ ಕೊರ್ತೆರ್.

ಇತ್ತೆದ ಮೋಜು ಮಸ್ತಿದ ತಾಣವಾಯಿನ ನಾಥ ಪಂಥದ ಯೋಗಿ ಗೋರಕ್ಷನಾಥೆರ್ದ್ ನಿರ್ಮಾಣ ಆಯಿನ ಈ ಕೆರೆತ್ತ ಪೊರ್ಲುನ್ ಪಿರ ಕನಯೆರೆ ಬೊಕ್ಕ ತೀರ್ಥದ ಪಾವಿತ್ರ್ಯತೆನ್ ಕಾಪಾಡಿಯೆರೆ ಸಂಬಂಧಪಟ್ಟಿನ ಇಲಾಖೆದ ಅಧಿಕಾರಿಲು ದುಂಬು ಬರೊಡು ಪಂದ್ ಪಂಡೆರ್.

ಸೆ.22: “ಯಾನ್ ಸೂಪರ್ ಸ್ಟಾರ್” ತುಳು ಪಿಕ್ಚರ್ ತುಳುನಾಡ್ ಡ್ ಬುಡುಗಡೆ

ಕುಡ್ಲ: “ಆನಂದ ಫಿಲಂಸ್ ಬೊಕ್ಕ ದಿ ಮಂಗಳೂರಿಯನ್ಸ್ ಲಾಂಛನಡ್ ರಾಮ್ ಶೆಟ್ಟಿ ಅರ್ಪಣೆ ಮಲ್ಪುನ, ದಯಾನಂದ ಶೆಟ್ಟಿ ನಿರ್ಮಾಣದ, ಸಂತೋಷ್ ಶೆಟ್ಟಿ ನಿರ್ದೇಶನಡ್ ತಯಾರಾಯಿನ “ಯಾನ್ ಸೂಪರ್ ಸ್ಟಾರ್” ತುಳು ಪಿಕ್ಚರ್ ಸೆ.22 ಕ್ಕ್ ತುಳುನಾಡ್ ಡ್ ಬುಡುಗಡೆ ಆಯೆರೆ ಉಂಡು” ಪಂದ್ ರಾಮ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ಪೊಲಬು ಕೊರ್ತೆರ್.

ಸಿಐಡಿ ದಯಾ ಖ್ಯಾತಿದ ದಯಾನಂದ ಶೆಟ್ರ್ ಪಾತೆರ್ದ್, “ಹಿಂದಿ ಪಿಕ್ಚರ್ ಬೊಕ್ಕ ಧಾರಾವಾಹಿ ಕ್ಷೇತ್ರಡ್ ಯಾನ್ ಕರಿನ 25 ವರ್ಷೊದಿಂಚ ಬೆನೊಂದು ಉಲ್ಲೆ. ಯಾನ್ ಒಡೇ ಪೊಂಡಲ ತುಳು ಪಿಕ್ಚರ್ ಯಾಪ ಮಲ್ಪುವರ್ ಪಂದ್ ಕೇನೊಂದು ಇತ್ತೆರ್. ಇತ್ತೆ ಯಾನ್ ನಟನೆ ಮಲ್ತಿನ ಯಾನ್ ಸೂಪರ್ ಸ್ಟಾರ್ ತುಳು ಪಿಕ್ಚರ್ ರಿಲೀಸ್ ಗ್ ತಯಾರಾತ್ಂಡ್. ಸುಕ್ರಾರ ಬುಡುಗಡೆ ಆಪುಂಡು. ಮೇಕಿಂಗ್, ನಿರ್ದೇಶನ ಮಾತೆಟ್ಲಾ ಗ್ರ್ಯಾಂಡ್ ಆಯಿನ ಪಿಕ್ಚರ್ ನ್ ಖಂಡಿತಾ ತುಳುವೆರ್ ಇಷ್ಟಪಡೆಪ್ಪೆರ್ ಪನ್ಪುನ ವಿಶ್ವಾಸ ಉಂಡು” ಪಂದ್ ಪಂಡೆರ್.

ನಟೆ ಹರೀಶ್ ವಾಸು ಶೆಟ್ಟಿ ಪಾತೆರ್ದ್, “ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ಕುಡ್ಲದ ರೂಪವಾಣಿ, ಭಾರತ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲಡ್ ಐನಾಕ್ಸ್, ಭಾರತ್ ಸಿನಿಮಾಸ್, ಪಡ್ಡೆದ್ರಡ್ ಭಾರತ್ ಸಿನಿಮಾಸ್, ಕಾರ್ಲಡ್ ರಾಧಿಕಾ, ಪ್ಲಾನೆಟ್, ಬೊಲ್ತೇರ್ ಡ್ ಭಾರತ್, ಸುರತ್ಕಲ್ ಡ್ ನಟರಾಜ್, ಸಿನಿಗ್ಯಾಲಕ್ಸಿ, ಪುತ್ತೂರುಡ್ ಭಾರತ್ ಸಿನಿಮಾಸ್, ಸುಳ್ಯಡ್ ಸಂತೋಷ್ ಚಿತ್ರಮಂದಿರಡ್ ಪಿಕ್ಚರ್ ಬುಡುಗಡೆ ಆಪುಂಡು. ಸೆನ್ಸಾರ್ ಡ್ ಯು ಎ ಸರ್ಟಿಫಿಕೇಟ್ ಪಡೆಯಿನ ಪಿಕ್ಚರ್ ಸೆನ್ಸಾರ್ ಮಂಡಳಿರ್ದ್ ಮೆಚ್ಚುಗೆ ಪಡೆತ್ಂಡ್. ತುಳು ಸಿನಿಮಾರಂಗಗ್ ಯಾನ್ ಸೂಪರ್ ಸ್ಟಾರ್ ಮುಖೇನ ಒಂಜಿ ಸದಭಿರುಚಿತ್ತ ಪಿಕ್ಚರ್ ತಿಕ್ಕುಂಡು. ಕುಟುಂಬ ಸಮೇತೆರಾದ್ ಈ ಪಿಕ್ಚರ್ ನ್ ತೂವೊಲಿ” ಪಂದ್ ಪಂಡೆರ್.

ಕುಸಲ್ದರಸೆ ನವೀನ್ ಡಿ. ಪಡೀಲ್ ಪಾತೆರ್ದ್, “ಒಂಜಿ ಎಡ್ಡೆ ಕಥೆ, ನಿರ್ದೇಶನ ಇಪ್ಪುನ ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ಸೆ.22 ಕ್ಕ್ ತುಳುನಾಡ್ ದ ಇಡೀ ಜಿಲ್ಲೆಡ್ ಬುಡುಗಡೆ ಆಯೆರೆ ಉಂಡು. ಇತ್ತೆನೇ ಬೊಂಬೈ, ಪೂಣೆ ಬೊಕ್ಕ ಸುಮಾರ್ ಕಡೆಟ್ಟ್ ಪಿಕ್ಚರ್ ದ ಪ್ರೀಮಿಯರ್ ಶೋ ನಡತ್ ದ್ಂಡ್. ಪ್ರೇಕ್ಷಕೆರ್ದ್ ಮೆಚ್ಚುಗೆ ಪಡೆತ್ಂಡ್. ಬೆಂಗ್ಲೂರು ಬೊಕ್ಕ ಗಲ್ಫ್ ದೇಶಡ್ ಪಿಕ್ಚರ್ ಬುಡುಗಡೆಗ್ ತಯಾರಿ ನಡತೊಂದು ಉಂಡು” ಪಂದ್ ಪಂಡೆರ್.

ಒಡಿಪು ಸುತ್ತಮುತ್ತ ಒಂಜೇ ಹಂತಡ್ 25 ದಿನತ್ತ ಕಾಲ ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ದ ಶೂಟಿಂಗ್ ನಡತ್ ದ್ಂಡ್. ಮುಖ್ಯವಾದ್ ಮುಲ್ಪ ಜನಮನ್ನಣೆ ಪಡೆದಿಪ್ಪು‌ನ ಸಿಐಡಿ ಧಾರಾವಾಹಿದ ಬೊಂಬೈ ಕಲಾವಿದೆರ್ ಈ ಸಿನಿಮಾಡ್ ಮುಖ್ಯ ಪಾತ್ರಡ್ ಅಭಿನಯ ಮಲ್ದೆರ್. ದಯಾನಂದ ಶೆಟ್ಟಿ, ಹರೀಶ್ ವಾಸು ಶೆಟ್ಟಿ, ಸಾಯಿ ಬಲ್ಲಾಲ್ ನೊಟ್ಟಿಗೆ, ತುಳುನಾಡ್ ದ ಪುಗರ್ತೆದ ಕಲಾವಿದೆರ್ ಕುಸೇಲ್ದರಸೆ ನವೀನ್ ಡಿ ಪಡೀಲ್, ನವರಸ ರಾಜೆ ಭೋಜರಾಜ ವಾಮಂಜೂರು, ಮಾನಸಿ ಸುಧೀರ್, ಅನು ಷಾ, ಅಶೋಕ್ ಪಕ್ಕಳ, ಮಾಸ್ಟರ್ ಅತಿಶ್ ಶೆಟ್ಟಿ, ಮಾಸ್ಟರ್ ಅರುಷ್ ಯು ಪೂಜಾರಿ, ಕು. ಶ್ರೀಯಾ ಹೆಗ್ಡೆ ಈ ಪಿಕ್ಚರ್ ಡ್ ಉಲ್ಲೆರ್. ಸಂತೋಷ್ ಶೆಟ್ಟಿ ಮೆರೆನ ಕಥೆಕ್ಕ್ ಸಚಿನ್ ಶೆಟ್ಟಿ ಕುಂಬಳೆ ಸಂಭಾಷಣೆ ಬರೆತೆರ್. ಚಿತ್ರಕತೆ: ಅಂಕಣ ಜೋಷಿ, ಸಂತೋಷ್ ಶೆಟ್ಟಿ, ಸಾಹಿತ್ಯ ಪದ್ಯ, ಸಂಗೀತ: ವಿ ಮನೋಹರ್, ಗುರುಕಿರಣ್ ಈ ಪಿಕ್ಚರ್ ಗ್ ಪದ್ಯ ಪಂತೆರ್. ಹಿನ್ನಲೆ ಸಂಗೀತ: ಸಂಜಯ್ ವಾಂದ್ರೇಕರ್, ಕ್ಯಾಮರಾ: ಕೃಷ್ಣರಾಜ್ ಕೋಟ್ಯಾನ್, ಸಾಹಸ: ಆನಂದ ಶೆಟ್ಟಿ, ಸಹ ನಿರ್ದೇಶನ ರಾಮ್ ದಾಸ್ ಸಸಿಹಿತ್ಲು, ಪ್ರೈಡ್ ಸುಬ್ರಹ್ಮಣ್ಯ, ಎಕ್ಸಿಕ್ಯೂಟಿವ್ ಪ್ರೊಡ್ಯುಸರ್ ಸತೀಶ್ ದುಬೆ, ಕ್ರಿಯೇಟಿವ್ ಡೈರಕ್ಟರ್: ಕ್ರಿಸ್ತಬೆಲ್ಲೆ ಡಿ ಸೋಜ, ಪ್ರೊಡಕ್ಷನ್ ಹೆಡ್ಡ್: ಚಂದ್ರಕಾಂತ್ ಭಂಡಾರಿ, ನಿರ್ದೇಶನ: ಸಂತೋಷ್ ಶೆಟ್ಟಿ ಮಲ್ದೆರ್.

ಯಾನ್ ಸೂಪರ್ ಸ್ಟಾರ್ ಪುದರ್ ದಲೆಕ್ಕನೇ ಉಂದು ತುಳುಟ್ಟ್ ಪೊಸ ಬಗೆತ್ತ ಪಿಕ್ಚರ್. ಪ್ರೇಕ್ಷಕೆರೆನ ನಾಡಿ ಮಿಡಿತನ್ ತೆರಿದ್ ನಿರ್ದೇಶಕೆರ್ ಮುಲ್ಪ ಪಿಕ್ಚರ್ ದ ಕತೆನ್ ಕೊನೊಪೆರ್. ಪಿಕ್ಚರ್ ಡ್ ಹಾಸ್ಯಲ ಉಂಡು, ಸಂದೇಶಲ ಉಂಡು.ಪ್ರೇಕ್ಷಕೆರೆಗ್ ಪಿಕ್ಚರ್ ದ ಬಗೆಟ್ಟ್ ಮಸ್ತ್ ಕುತೂಹಲ ಉಂಡು. ಆನಂದ್ ಫಿಲಂಸ್ ಡ್ ಇಪ್ಪುನ ಪಿಕ್ಚರ್ ಲು ಯಶಸ್ವಿ ಪ್ರದರ್ಶನನ್ ಆಯಿರ್ನೆದಾವೆರ ಪ್ರೇಕ್ಷಕೆರ್ ಯಾನ್ ಸೂಪರ್ ಸ್ಟಾರ್ ಸಿನಿಮಾದ ಬಗೆಟ್ಟ್ ಮಸ್ತ್ ನಿರೀಕ್ಷೆ ದೀವೊಂದೆರ್. ಪತ್ರಿಕಾಗೋಷ್ಠಿಡ್ ದಯಾನಂದ ಶೆಟ್ಟಿ, ಹರೀಶ್ ವಾಸು ಶೆಟ್ಟಿ, ನವೀನ್ ಡಿ. ಪಡೀಲ್, ನಿರ್ದೇಶಕೆರ್ ಸಂತೋಷ್ ಶೆಟ್ಟಿ, ರಾಮ್ ಶೆಟ್ಟಿ, ಕಲಾ ನಿರ್ದೇಶಕೆರ್ ತಮ್ಮ ಲಕ್ಷ್ಮಣ ಇತ್ತೆರ್.