ಕುಡ್ಲದ ಸುದ್ದಿ | Mangalore News

ಅರಸ ಪ್ರೊಡಕ್ಷನ್ ಪೊಸ ಪಿಚ್ಚರ್ ನಂಬರ್-2 ಸ್ಕ್ರಿಪ್ಟ್ ಪೂಜೆ

ಅರಸ ಪ್ರೊಡಕ್ಷನ್ ಹೌಸ್ ನಿರ್ಮಾಣದ ಪೊಸ ಪಿಚ್ಚರ್ ಪ್ರೊಡಕ್ಷನ್ ನಂಬರ್ 2 ಬೊಕ್ಕ ಸ್ಕ್ರಿಪ್ಟ್ ಪೂಜೆ ಸೆ.1 ಗುರುವಾರ ದಾನಿ ಕಟೀಲು ಶ್ರೀ ದುಗಾಪರಮೇಶ್ವರೀ ದೇವಲ್ಯಡ್ ನಡತ್ಂಡ್.

ನಿರ್ಮಾಪಕೆರಾದ್ ಉಷಾ ಶ್ರೀನಿವಾಸ, ಕಿಶೋರ್, ಪ್ರಮೋದ್ ಶೆಟ್ಟಿ ಬೊಕ್ಕ ಪ್ರಕಾಶ್ ತುಮಿನಾಡು ಮುಖ್ಯ ಭೂಮಿಕೆಡ್ ನಟನೆ ಮಲ್ಪೆರೆ ಉಲ್ಲೆರ್. ಸುಪ್ರೀತ್ ಬಿ ಕೆ ಮೇರ್ನ ಚೊಚ್ಚಲ ನಿರ್ದೇಶನದ ಪಿಚ್ಚರ್ ಉಂದು ಆತ್ಂಡ್.

ಪ್ರಕಾಶ್ ತುಮಿನಾಡು ಬೊಕ್ಕ ಪ್ರತೀಕ್ ಅತ್ತಾವರ ಅರೆನ ಸಂಭಾಷಣೆ ಇತ್ದ್ ಹರ್ಷ ಪದ್ಯಾಣ ಬೊಕ್ಕ ಯುಕ್ತಿರಾಜ್ ಮೇರ್ನ ಛಾಯಾಗ್ರಹಣ, ಅಂಚನೆ ಉತ್ತಮ್ ಸಾರಂಗ್ ಸಂಗೀತ ಸಂಯೋಜನೆ ಮಲ್ತ್ ದೆರ್. ಸಾಮಾಜಿಕ ಬೊಕ್ಕ ಹಾಸ್ಯ ಮಯ ಪಿಚ್ಚರ್ ಉಂದು ಆದ್ ಕಾರ್ಕಳ, ಕುಡ್ಲ ಪರಿಸರ ಡ್ ಚಿತ್ರೀಕರಣ ಅಕ್ಟೋಬರ್ ನವೆಂಬರ್ ಡ್ ನಡಪರೆ ಉಂಡು.

ಈ ಪೊರ್ತುಡು ಪ್ರಕಾಶ್ ತುಮಿನಾಡು ಸುಪ್ರೀತ್ ಬಿಕೆ, ಪ್ರತೀಕ್ ಅತ್ತಾವರ,ವೇಣು ಶೆಟ್ಟಿ ಮುಲ್ಕಿ, ಶ್ರೀನಿಧಿ ಆಚಾರ್ಯ,ಉತ್ತಮ ಸಾರಂಗ
ಹರ್ಷ ಪದ್ಯಾಣ ಇತ್ತೆರ್.

ಸಂಸದ ಸ್ಥಾನಡ್ ಪ್ರಜ್ವಲ್ ರೇವಣ್ಣ ಅನರ್ಹ; ಹೈಕೋರ್ಟ್ ಆದೇಶ

ಹಾಸನ ಲೋಕಸಭಾ ಕ್ಷೇತ್ರದ ಸಂಸದ ಸ್ಥಾನರ್ದ್ ಪ್ರಜ್ವಲ್ ರೇವಣ್ಣನ್ ಅನರ್ಹ ಮಲ್ತ್ ದ್ ಹೈಕೋರ್ಟ್ ಆದೇಶ ಕೊರ್ತುಂಡು.

ರಾಜ್ಯ ರಾಜಕೀಯದ ಭೀಷ್ಮೆ ಪಂದ್ ಖ್ಯಾತಿ ಪಡೆಯಿನ ಎಚ್ ಡಿ ದೇವೇಗೌಡ ಅರೆನ ಪುಲ್ಲಿ, ಜೆಡಿಎಸ್ ದ ದುಂಬುದ ನಾಯಕೆ, 2019ನೇ ಇಸವಿದ ವೋಟುಡು ಹಾಸನ ಕ್ಷೇತ್ರಡ್ ಜೆಡಿಎಸ್ ಅಭ್ಯರ್ಥಿಯಾದ್ ಗೆಂದ್ ದಿನ ಪ್ರಜ್ವಲ್ ರೇವಣ್ಣ ಸಂಸದ ಸ್ಥಾನರ್ದ್ ಅನರ್ಹ ಆತೆರ್ ಪಂದ್ ಹೈಕೋರ್ಟ್ ಆದೇಶ ಕೊರ್ತುಂಡು.

ಸುಳ್ಳು ಆದಾಯ ಪ್ರಮಾಣ ಪತ್ರ ಸಲ್ಲಿಸಾಯಿನ ಆರೋಪ ಪ್ರಜ್ವಲ್ ಮಿತ್ತ್ ಕೇಂಡ್ ದ್ ಬತ್ತ್ ದ್ ಇತ್ತ್ಂಡ್. ಮೇರ್ ನ ಆಯ್ಕೆನ್ ಅಸಿಂಧು ಮಲ್ಪೊಡು ಪಂದ್ ವೋಟ್ ಸ್ಪರ್ದೆ ಮಲ್ತಿನ ಅಪಗದ ಬಿಜೆಪಿ ಸದಸ್ಯೆ ಎ. ಮಂಜು ಸಲ್ಲಿಕೆ ಮಲ್ತ್ ಇತ್ತೆರ್.

ಶಿಕ್ಷಣರ್ದ್ ಪಗೆಮಾನಿ ಆವರೆ ಬಲ್ಲಿ, ವಿಶ್ವಮಾನವೆರಾವೊಡು: ಬಿ.ಕೆ.ಹರಿಪ್ರಸಾದ್

ಮುಲ್ಕಿ : ಶಿಕ್ಷಣಡ್ ಪಗೆಮಾನಿಲಾವರೆ ಬಲ್ಲಿ, ಕಿಚ್ಚಿ ಮಚ್ಚರ ಪುಟ್ಟರೆ ಬಲ್ಲಿ.ಶಿಕ್ಷಣೊರ್ದು ಮೆಗ್ಯೆ ಪಲಯೆ ಪನ್ಪಿನ ಭಾವನೆ ಪುಟ್ಟೊಡು. ಕುವೆಂಪು ಪನ್ತಿಲೆಕ ನಮ ಮಾತ ಸಹೋದರತ್ವದ ಮುಕೇನ ವಿಶ್ವಮಾನವೆರಾವೊಡು.ಮೂಢನಂಬಿಕೆನ್ ಮೀರ್ ದ್ ಬುಳೆಬೊಡು ಪಂದ್ ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್ ಪಂಡೆರ್.

ಆರ್ ದಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಮುಲ್ಕಿ ನೆತ್ತ ನಿರೆಲ್ಡ್ ಗುರುವಾರ ನಡತಿನ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ 169 ನೇ ಜಯಂತಿ ದ ಆಚರಣೆ ಅಂಚೆನೆ ಎನ್ ಆರ್ ಮೂಲ್ಕಿ ನೆಂಪುದ ಪ್ರಶಸ್ತಿ ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್ ಡ್ ಉನ್ನತ ಶಿಕ್ಷಣ ವಿದ್ಯಾರ್ಥಿ ವೇತನ ಪಟ್ ದ್ ಪಾತೆರಿಯೆರ್.

ಮುಲ್ಕಿ ಬೆದ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಾತೆರ್ದ್, ಇನಿ ದೇಶಡ್ ಮಾತ್ರ ಅತ್ತಾಂದೆ ಪರದೇಶೊಡ್ಲ ನಾರಾಯಣ ಗುರು ಜಯಂತಿ ಆಚರಣೆ ಮಲ್ಪುವೆರ್. ಮುಲ್ಕಿ ಬಿಲ್ಲವ ಸಂಘ ಇಡೀ ತುಳುನಾಡ್ ದ ಸಂಘೊಲೆಗ್ ಅಪ್ಪೆನ ತಾನೊಡು ಉಂಡು.ಯಾನ್ ಮಾತ ಜಾತಿದ ಸಮುದಾಯ ಭವನೊಗ್ ಲ ಸರ್ಕಾರೊರ್ದು ತಿಕ್ಕುನ ಮಾತ ಅನುದಾನೊನು ಪ್ರಾಮಾಣಿಕವಾದ್ ಪಟ್ ದ್ ಕೊರ್ಪೆ ಪಂಡೆರ್.

ಸರ್ಕಾರಿ ಪದವಿ ಪೂರ್ವ ಕಾಲೇಜಿದ ಪ್ರಿನ್ಸಿಪಾಲ್ ಡಾ.ವಾಸುದೇವ ಬೆಳ್ಳೆ ಪಾತೆರ್ದ್,ಇದ ಮುಟ್ಟ ನಾರಾಯಣ ಗುರುಕ್ಲೆನ ಕೆಲವೇ ತತ್ವ, ವಿಚಾರಲೆನ ಚಿಂತನೆ, ಅನುಷ್ಠಾನ ಆತ್ಂಡ್. ಗುರುಕ್ಲೆನ ಬಗೆಟ್ಟ್ ನನಾತ್ ಆಳವಾದ್ ಅಧ್ಯಯನ ಆವೊಡು. ಅಪಗ ಮಾತ್ರ ನಮ ನಾರಾಯಣ ಗುರುಕ್ಲೆನ್ ಸಂಪೂರ್ಣ ವಾದ್ ಅರ್ಥ ಮಲ್ತೊನರೆ ಸಾಧ್ಯ ಪಂಡೆರ್.

ಈ ಪೊರ್ತುಡು ಎಸ್ಸೆಸ್ಸೆಲ್ಸಿ ಟಾಪರ್ ಮಿಥುನ್ ಸಿ.ಅಂಚನ್, ಪಿಯುಸಿ ಟಾಪರ್ ಶಾಶ್ವತ್ ಬಿ.ಕರ್ಕೇರ ವಾಣಿಜ್ಯ ವಿಭಾಗದ ಟಾಪರ್
ಸುಚೇತಾ ಡಿ., ಸನಿತ್ ಪೂಜಾರಿ ಮೊಕ್ಲೆಗ್ ಎನ್.ಆರ್. ಮುಲ್ಕಿ ನೆಂಪುದ ಪ್ರಶಸ್ತಿ ಬೊಕ್ಕ ವಿದ್ಯಾನಿಧಿ ಕೊರ್ದು ಮಾನಾದಿಗೆ ಮಲ್ತೆರ್.
ಅವ್ವತ್ತಾಂದೆ ಸಂಘದ ಲೆಕ್ಕೊಡು ಎಸ್ಸೆಸ್ಸೆಲ್ಸಿಡ್ ಸಾಧಕ ವಿದ್ಯಾರ್ಥಿ ಲಾಯಿನ ವರುಣ್ ಎ ಕೋಟ್ಯಾನ್, ಭುವನ್ ಕೆ. ಶಾಂತಿ, ಪ್ರತೀಕ್ ಆರ್ ಸಾಲ್ಯಾನ್ ಕೊಳಚಿಕಂಬಳ,ಪಿಯುಸಿ ವಿಭಾಗಡ್ ವೈಷ್ಣವಿ ಕೆ ಸಾಲ್ಯಾನ್, ದಿಶಾ ಮಾನಂಪಾಡಿ, ಶ್ರಾವ್ಯ ಡಿ. ಬಂಗೇರ, ಸಾಹಿತ್ಯ ಕೊಲೆಕಾಡಿ, ಸೌರಕ್ಷಿಣಿ ಶಿಮಂತೂರು, ಅಭಿಕ್ಷಾ ಶಿಮಂತೂರು, ಅನೀಷ್ ಎ. ಸುವರ್ಣ ಕುಬೆವೂರು, ಶಾಶ್ವತ್ ಬಿ.ಕರ್ಕೇರ ಮೊಕ್ಲೆಗ್ ವಿದ್ಯಾರ್ಥಿ ವೇತನ ಪಟ್ ದ್ ಮಾನಾದಿಗೆ ಮಲ್ತೆರ್. ಸಂಘದ ಲೆಕ್ಕೊಡು ಈ ವರ್ಷ ಒಟ್ಟು 8 ಲಕ್ಷ ರೂ. ಬಿಲೆತ್ತ ಪುಸ್ತಕ ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟ್ ದೆರ್. ನಾರಾಯಣ ಗುರು ಜಯಂತಿದ ನಿಲೆಟ್ಟ್ ಶಾಲೆದ ಜೋಕುಲೆಗಾದ್ ಮಲ್ದಿನ ಬೇತೆ ಬೇತೆ ಪಂತೊಲೆಡ್ ಗೆಂದಿನಕ್ಲೆಗ್ ಇನಾಮು ಪಟ್ಟುನ ಲೇಸ್ ನಡತ್ಂಡ್.

ಮಿತ್ತರ್ಮೆಡ್ ಎನ್. ಆರ್ ಮುಲ್ಕಿ ನೆಂಪುದ ವಿದ್ಯಾರ್ಥಿವೇತನ ಕೊರ್ತಿನ ಉದ್ಯಮಿ ಶಶಿಧರ್ ಕೋಟ್ಯಾನ್, ನಾರಾಯಣ ಗುರು ಸೇವಾರ್ಥಿ ಸಹದೇವ ಕೋಟ್ಯಾನ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ್ ಶೆಟ್ಟಿ, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರ್ ಕಲ್, ಬಿಲ್ಲವ ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಶಶಿಕಲಾ ಯದೀಶ್ ಅಮೀನ್, ಸೇವಾದಳತ್ತ ಮುಖ್ಯಸ್ಥೆರ್ ಶಂಕರ್ ಪಡುಬೈಲ್ ಇತ್ತೆರ್.

ಮುಲ್ಕಿ ಬಿಲ್ಲವ ಸಮಾಜ ಸೇವಾಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ ಬಿನ್ನೆರೆನ್ ಸ್ವಾಗತ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಜಯ ಕುಮಾರ್ ದೇವೆರೆನ್ ಸುಗಿತೆರ್. ನರೇಂದ್ರ ಕೆರೆಕಾಡು ಲೇಸ್ ನಡಪಾದ್ ಕೊರಿಯೆರ್.

ಮಾಣಿ: ಶಾಲೆದ ಬಾಕಿಲ್ ದರ್ತ್ ದ್ ಕಂಪ್ಯೂಟರ್ ಮಾನಿಟರ್ ಕಂಡಿನ ಕಲ್ವೆರ್

ವಿಟ್ಲ: ಶಾಲೆದ ಬಾಕಿಲ್ ದರ್ತ್ ದ್ ಕಂಪ್ಯೂಟರ್ ಮಾನಿಟರ್ ಕಂಡಿನ ಬಗೆಟ್ ವಿಟ್ಲ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್.

ಬಂಟ್ವಾಳ ತಾಲೂಕು ಮಾಣಿಡ್ ಕರ್ನಾಟಕ ಪ್ರೌಢ ಶಾಲೆ ಬೊಕ್ಕ ಕರ್ನಾಟಕ ಆಂಗ್ಲ ಮಾಧ್ಯಮ ಶಾಲೆಡ್ ಕಲ್ವೆರ್ ಶಾಲೆದ ಕೊಠಡಿ ಬೊಕ್ಕ ಶಾಲೆದ ಆಫೀಸ್ ದ ಬಾಕಿಲ್ ದರ್ತ್ ದ್ ಉಲಾಯಿ ಪೋದು ಅಂದಾಜು 7000/- ಮೌಲ್ಯದ ಕಂಪ್ಯೂಟರ್ ಮಾನಿಟರ್ ಕಂಡ್ ದ್ ಪೋತೆರ್ ಪಂದ್ ಶಾಲೆದ ಸಂಚಾಲಕೆರ್ ಇಬ್ರಾಹಿಂ ಕೆ ದೂರು ಕೊರ್ತೆರ್.

ನೆತ್ತ ಬಗ್ಗೆ ವಿಟ್ಲ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್‌ಂಡ್.

ಹಾರ್ಟ್ ಅಟ್ಯಾಕ್ ಡ್ ತೀರ್ ಪೋಯಿನ ಮಿತ್ರಾ ಶೆಟ್ಟಿ

ಬಿ ಸಿ ರೋಡ್ ದ ಖಾಸಗಿ ಕಂಪನಿ ಡ್ ಬೇಲೆಡ್ ಇತ್ತಿನ ಪೊಣ್ಣು ಮಿತ್ರಾ ಶೆಟ್ಟಿ (19) ಹಾರ್ಟ್ ಅಟ್ಯಾಕ್ ಅದ್ ತೀರ್ ಪೋಯಿನ ಘಟನೆ ವರದಿ ಆತ್ಂಡ್.

ತೀರ್ ಪೋಯಿನಾರ್ ಕಾವಳಪಡೂರು ಗ್ರಾಮದ ಮಧ್ಯಗುತ್ತು ರಾಜೀವ ಶೆಟ್ಟಿ ಮೀನಾ ದಂಪತಿಲೆನ ಮಗಲ್.

ಮಿತ್ರಾ ಶೆಟ್ಟಿ ದೊಡ್ಡಮ್ಮನ ಇಲ್ಲಲ್ ಅಪ್ಪೆನ ಒಟ್ಟಿಗೆ ಇತ್ತೆರ್. ಏಪದಲೆಕ ರಾತ್ರೆ ವನಸ್ ಮಲ್ತ್ ಅಪ್ಪೆನ ಒಟ್ಟಿಗೆ ಜೆತ್ತಿನಾಲ್ ಬೊಲ್ಪುಗು ಲಕ್ಕಿನೆ ಇಜ್ಜಿ.

ಪೋಡಿಗೆ ಆಯಿನ ಅಪ್ಪೆ ಲಕ್ಕಾನಗ, ಪೊಣ್ಣು ತೀರ್ ಪೋಯಿನ ತೆರಿದ್ ಬೈದುಂಡು.

ಬಂಟ್ವಾಳ ಸರಕಾರಿ ಆಸ್ಪತ್ರೆ ಡ್ ಮರಣೋತ್ತರ ಪರೀಕ್ಷೆ ಮಲ್ತ್ ದ್, ಹಾರ್ಟ್ ಅಟ್ಯಾಕ್ ಪಂದ್ ಡಾಕ್ಟರ್ ಪಂತೆರ್. ಮಿತ್ರಾ ಶೆಟ್ಟಿ ಗ್ ಪೊಪ್ಪ ಅಪ್ಪೆ, ಬೊಕ್ಕ ಅಣ್ಣೆ ಉಲ್ಲೆರ್.