Sat. Nov 21st, 2026

ಕುಡ್ಲದ ಸುದ್ದಿ | Mangalore News

ಅಕ್ರಮ ಸಂಬಂಧದ ಸಂಸಯಡ್ ಬೊಡೆದಿಗ್ ಬಿಸತ್ತಿ ಪಾಡ್ದ್ ಕೆರ್ನ ಕಂಡನಿ!?

ಕುಡ್ಲ : ಕಂಡನಿ ಒರಿ ಅಕ್ರಮ ಸಂಬಂಧದ ಸಂಸಯದ ಮಿತ್ತ್ ಬೊಡೆದಿಗ್ ಬಿಸತ್ತಿ ಪಾಡ್ದ್ ಕೊಲೆ ಮಲ್ದಿನ ಘಟನೆ ಕಾವೂರು ಪೊಲೀಸ್ ಠಾಣೆ ವ್ಯಾಪ್ತಿಡ್ ನಡದ್ಂಡ್.

ಕೊಲೆ ಆಯಿನಾರ್ ಸೋನಾಲಿ (30) ಪಂದ್ ತೆರಿದ್ ಬೈದ್ಂಡ್. ಅರೆನ ಕಂಡನಿ ಶಿವಲಿಂಗಪ್ಪ ಬಿಸತ್ತಿ ಪಾಡ್ದ್ ಕೊಲೆ ಮಲ್ತ್‌ದೆ ಪಂದ್ ಗೊತ್ತಾತ್ಂಡ್.

ದಕ್ಷಿಣ ಕನ್ನಡ ಬಸ್ ಮಾಲಕರ ಸಂಘದ ಅಧ್ಯಕ್ಷೆರಾದ್ ಅಝೀಝ್ ಪರ್ತಿಪಾಡಿ ಆಯ್ಕೆ

ಕುಡ್ಲ : ದಕ್ಷಿಣ ಕನ್ನಡ ಬಸ್ ಮಾಲಕರ ಸಂಘದ ಅಧ್ಯಕ್ಷೆರಾದ್ ಅಝೀಝ್ ಪರ್ತಿಪಾಡಿ ಮೇರ್ ಅವಿರೋಧವಾದ್ ಆಯ್ಕೆ ಆಯೆರ್.
ಹೋಟೆಲ್ “ಎ ಜೆ ಗ್ರಾಂಡ್ ಎಲೈಟ್” ಸಭಾಂಗಣಡ್ ನಡತಿನ
ವಾರ್ಷಿಕ ಮಹಾ ಸಭೆಟ್ಟ್ ಮೆರೆನ್ ಆಯ್ಕೆ ಮಲ್ತೆರ್. ಮೇರ್ ಸತತ ನಾಲ್ನೇ ಸರ್ತಿಗ್ ಅಧ್ಯಕ್ಷೆರಾದ್ ಆಯ್ಕೆ ಆವೊಂದುಲ್ಲೆರ್.
ಮೇರ್ ದಕ್ಷಿಣ ಕನ್ನಡ ಬಸ್ ಮಾಲಕರ ಸಂಘದ ಪ್ರಧಾನ ಕಾರ್ಯದರ್ಶಿಯಾದ್, ಅಧ್ಯಕ್ಷೆರಾದ್ ಬೊಕ್ಕ ಪೂರ್ವ ವಲಯ ಬಸ್ ಮಾಲಕರ ಒಕ್ಕೂಟದ ಅಧ್ಯಕ್ಷೆರಾದ್‌ಲ ಸೇವೆ ಮಲ್ದೆರ್.

ದೇಶದ ಪುಗರ್ತೆದ ಎನ್ಐಟಿಕೆ ಶಿಕ್ಷಣ ಸಂಸ್ಥೆದ ಎದುರಡೇ ಡಂಪಿಂಗ್ ಯಾರ್ಡ್ ದಂಚಿನ ಬಸ್ ಸ್ಯಾಂಡ್!

ಸ್ವಚ್ಛತಾ ಕಾರ್ಯ ನಡಪಾದ್ ಸಮಾಜಗ್ ಮಾದರಿ ಆಯಿನ “ಮೀಡಿಯಾ ಮನಸುಲು”

ಸುರತ್ಕಲ್: ಅವು ದೇಶದ ಬೇತೆ ಬೇತೆ ಭಾಗಲೆನ ವಿದ್ಯಾರ್ಥಿಲು ಕಲ್ಪುನ ದೇಶದ ಪುಗರ್ತೆದ ಎನ್ ಐಟಿಕೆ ತಾಂತ್ರಿಕ ಮಹಾವಿದ್ಯಾಲಯ. ಅವೆತ್ತ ಎದುರುಡೇ ಪ್ರತಿ ದಿನೊಲ ನೂದೆರ್ದ್ ಎಚ್ಚ ಬಸ್ ಲು ಬತ್ತ್ ದ್ ಪೋಪುನ, ಸಾರರ್ದ್ ಎಚ್ಚ ಪ್ರಯಾಣಿಕೆರ್ ಬಸ್ ಕಾಪುನ ಸ್ಯಾಂಡ್. ಈ ಬಸ್ ಸ್ಯಾಂಡ್ ದ ಪರಿಸ್ಥಿತಿ ಮಾತ್ರ ವಾಮಂಜೂರುದ ಡಂಪಿಂಗ್ ಯಾರ್ಡ್ ನೆಂಪು ಮಲ್ಪುಂಡು.

ಪ್ಲಾಸ್ಟಿಕ್ ತ್ಯಾಜ್ಯ, ಬಿಯರ್ ಬಾಟಲಿಲು, ಪಂತಿ ದಿಂಜಿದ್ ಅಕ್ಷರಶ: ಬಸ್ ಸ್ಯಾಂಡ್ ಕಜವುದ ರಾಶಿ ದಿಂಜಿದ್ ಪೊತ್ಂಡ್. ಸ್ಯಾಂಡ್ ದ ಅವ್ಯವಸ್ಥೆ ತೂಯಿನ ವಿದ್ಯಾರ್ಥಿನಿಯೊರಿ ಪಂಡಿನೆಕ್ಕ್ ಸ್ವಂದಿಸಾಯಿನ “ಮೀಡಿಯಾ ಮನಸುಲು” ಕೂಟದ ಸದಸ್ಯೆರ್ ಗುರುವಾರ ನನಲ ಸರಿಯಾದ್ ಬೊಲ್ಪು ಆಯಿನೆರ್ದ್ ದುಂಬೇ ಕತ್ತಿ, ಪಿಕ್ಕಸ್, ಮೈಪುಸೂಡಿ ಪತ್ತೊಂದು ಜಾಗೆಗ್ ಬತ್ತ್ ದ್ ಎಪೊಲ ಮೂಜಿ ಗಂಟೆ ಸ್ವಚ್ಛತಾ ಕಾರ್ಯ ನಡಪಾದ್ ಸಮಾಜಗ್ ಮಾದರಿ ಆಯೆರ್.

ಅಂತರರಾಷ್ಟ್ರೀಯ ಮಟ್ಟದ ಶೈಕ್ಷಣಿಕ ಸಂಸ್ಥೆದ ಬಾಕಿಲ್ ಡೇ ಇಂಚಿನ ದುಸ್ಥಿತಿ ಇತ್ತ್ಂಡಲ ಕುಡ್ಲ ಮಹಾನಗರ ಪಾಲಿಕೆ ಮಾತ್ರ ಸಂಪೂರ್ಣ ನಿರ್ಲಕ್ಷ್ಯ ಒಯಿಸೊಂದುಂಡು. ಪ್ರತಿ ದಿನೊಲ ಸಾರರ್ದ್ ಎಚ್ಚ ಪ್ರಯಾಣಿಕೆರ್ ಅಸಹ್ಯರ್ದ್ ಮೂಂಕು ಮುಚ್ಚೊಂದು ಉಂತುನ ವಾತಾವರಣ ಇತ್ತ್ಂಡಲ, ಪಾಲಿಕೆದ ಅಧಿಕಾರಿಲೆನ ಕಣ್ಣ್ ಗ್ ಉಂದು ತೋಜಂದೆ ಪೋಯಿನವು ದುರಂತ. ಆಡಳಿತ ವ್ಯವಸ್ಥೆದ ಈ ಬೇಜವಾಬ್ದಾರಿರ್ದ್ ಸುಂದರ ಆದಿಪ್ಪೊಡಾಯಿನ ಬಸ್ ಸ್ಯಾಂಡ್ ಕಜವುದ ರಾಶಿ ಆದ್ ಪೋತ್ಂಡ್.

ಆಡಳಿತದ ನಿರ್ಲಕ್ಷ್ಯಗ್ ಕಾತೊಂದು ಕುಲ್ಲಂದೆ, ಬದಲಾವಣೆದ ದಾರಿದೀಪ ಆಯಿನೆನೇ “ಮೀಡಿಯಾ ಮನಸುಲು”. ಲೇಖನಿದ ಮುಕೇನ ಸಮಾಜದ ಲೋಪನ್ ತಿದ್ದೊಂದು ಇತ್ತಿನ ಪತ್ರಕರ್ತೆರೆನ ಕೈ ಕುಲು ಕತ್ತಿ-ಪಿಕ್ಕಸ್ ಪತ್ತೊಂದು ರೋಡುಗು ಜತ್ತಿನ ಬಸ್ ಸ್ಯಾಂಡ್ ದ ಕಳೆನೇ ಬದಲಾತ್ಂಡ್. ವೃತ್ತಿಪರ ಧಾವಂತದ ನಡುಟ್ಟು ಸಾಮಾಜಿಕ ಹೊಣೆಗಾರಿಕೆ ಮೆರೆಯಿನ ಈ ಪಡೆತ್ತ ಬೆಗರ್ದ ಪನಿಕುಲು, ಕಜವುದ ರಾಶಿ ಆಯಿನ ಜಾಗಗ್ ಪೊಸ ಜೀವ ಕೊರ್ತೆರ್.

ಈ ಮಾದರಿ ಕಾರ್ಯಗ್ ಮನಪಾ ನಿಕಟಪೂರ್ವ ಕಾರ್ಪೊರೇಟರ್ ಶ್ವೇತಾ ಪೂಜಾರಿ ಬೊಕ್ಕ ಮನಪಾ ಸ್ವಚ್ಛತಾ ಮೇಲ್ವಿಚಾರಕೆರಾಯಿನ ಯೋಗೀಶ್ ಮೊಕುಲು ಸಾಥ್ ಕೊರ್ಂಡ ಹಳೆಯಂಗಡಿದ ಪೂಜಾ ಕೇಟರರ್ಸ್ ಮಾಲಕೆರ್ ಜೈಕೃಷ್ಣ ಕೋಟ್ಯಾನ್ ಮೇರ್ ಅಗತ್ಯ ನೀರನ್ ಕೊರ್ಪಿನ ಮುಕೇನ ಸಾರ್ವಜನಿಕ ಸಹಭಾಗಿತ್ವಗ್ ಎಡ್ಡೆ ನಿದರ್ಶನ ಆಯೆರ್.

ಈ ಅಭಿಯಾನಡ್ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಸದಸ್ಯೆರ್ ಬೊಕ್ಕ ಮೀಡಿಯಾ ಮನಸುಲು ಕೂಟದ ಪ್ರಮುಖೆರಾಯಿನ ಶಶಿ ಬೆಳ್ಳಾಯರ್, ಗಿರೀಶ್ ಮಣೇಲ್, ರಜನ್ ಕುಮಾರ್ ಕಾವೂರು ಬೊಕ್ಕ ಸಂದೇಶ್ ಶೆಟ್ಟಿ, ಅನೂಪ್ ಸೂರಿಂಜೆ, ಸಂತೋಷ್ ಹೊಸಬೆಟ್ಟು ನಿರಂತರವಾದ್ ಪಾಲ್ ಪಡೆದ್ ದುಂಬು ಉಂತುದು ಬೇನಿಯೆರ್.

ವರದಿ ಮಲ್ಪುನೆಕ್ಕ್ ಮಾತ್ರ ತನ್ನ ಕಾರ್ಯ ಸೀಮಿತ ಮಲ್ಪಂದೆ, ಸೀದಾ ಬೇಲೆಗ್ ಬತ್ತ್ ದ್ ಸ್ವಚ್ಛತೆದ ಕ್ರಾಂತಿ ಮಲ್ತಿನ “ಮೀಡಿಯಾ ಮನಸುಲು” ಕೂಟದ ಶ್ರಮದಾನಗ್ ಸ್ಥಳೀಯೆರ್ ಮೆಚ್ಚಿದೆರ್. ವ್ಯವಸ್ಥೆಗ್ ಚಾಟಿ ಬೀಸೊಂದೇ, ದುಂಬು ಉಂತುದು ಸಮಾಜನ್ ತಿದ್ದೊಲಿ ಪನ್ಪಿನೆಕ್ಕ್ ಈ ಪತ್ರಕರ್ತೆರೆನ ಕೂಟ ಅರ್ಥಪೂರ್ಣವಾದ್ ಸಾಬೀತು ಆತ್ಂಡ್.‌

“ನಮ್ಮ ಕುಡ್ಲ”ದ ಲೀಲಾಕ್ಷ ಬಿ. ಕರ್ಕೇರ ಮೆರೆಗ್ ಕಂಬುಲ ಅಕಾಡೆಮಿ ಪ್ರಶಸ್ತಿ

ಬೆದ್ರ : ಕಂಬುಲ ಸಂರಕ್ಷಣೆ, ನಿರ್ವಹಣೆ ಬೊಕ್ಕ ತರಬೇತಿ ಅಕಾಡೆಮಿದ ನಿಲೆಟ್ ಕೊರ್ಪಿನ ಕಂಬುಲ ಅಕಾಡೆಮಿ ಪ್ರಶಸ್ತಿಗ್ ನಮ್ಮ ಕುಡ್ಲ ಚಾನಲ್ ದ ನಿರ್ದೇಶಕೆರ್ ಲೀಲಾಕ್ಷ ಬಿ. ಕರ್ಕೇರ ಅಜತ್ ಬೈದೆರ್.
ಅ. 8 ಗುರುವಾರ ಬೆದ್ರದ ಒಂಟಿಕಟ್ಟೆಡ್ ನಡಪುನ ಕಾರ್ಯಕ್ರಮೊಟು ಈ ಪ್ರಶಸ್ತಿ ಕೊರ್ದು ಮರ್ಯಾದಿ ಸಂದೈತ ಮಲ್ಪುವೆರ್.
ಲೀಲಾಕ್ಷ ಬಿ. ಕರ್ಕೇರ ಮೇರ್ ಕಂಬುಲ ಕ್ಷೇತ್ರೊಗು ಕೊರ್ನ ಕೊಡುಗೆಲೆನ್ ಲೆಕ್ಕೊಗು ದೆತೊಂದು ಈ ಪ್ರಶಸ್ತಿ ಸಂದ್ ದ್oಡ್. ನಮ್ಮ ಕುಡ್ಲ ಚಾನಲ್ ಕರಿನ ಪಾಕ ವರ್ಸೊಲೆಡ್ ಒಡಿಪು ಸೇರ್ದ್ ದಕ್ಷಿಣ ಕನ್ನಡ ಜಿಲ್ಲೆಡ್ ನಡಪುನ ಕಂಬುಲದ ಸೀದಾ ಪ್ರಸಾರ ಮಲ್ತೊಂದು, ಅಯಿತ ಒಟ್ಟುಗು ಕಂಬುಲ ಕ್ಷೇತ್ರೊಗು ಇಸೇಸ ಕೊಡಿಗೆ ಕೊರ್ನ ಎರುಕ್ಲೆನ ಯಜಮಾನೆರ್, ಎರುಕ್ಲೆನ ಇಸೇಸತೆ, ಎರು ಗಿಡಪುನಕ್ಲು ಇಂಚ ಇಡೀ ವರದಿ ಕೊರೊಂದು ಬೈದ್oಡ್. ವರ್ಸಲ ಕಂಬುಲ ಕ್ಷೇತ್ರದ ಸಾಧಕೆರೆನ್ ಗುರ್ತು ಮಲ್ತ್ ದ್ ಮರ್ಯಾದಿ ಮಲ್ತೊಂದುoಡು.

ಕಟೀಲ್ ದೇಲಂತಡೆಡ್ ಭಕ್ತೆರೆಗ್ ಆ್ಯಪಲ್ ಪಟ್ಟಿಯೆರ್

ಕಟೀಲ್ : ಶ್ರೀ ದುರ್ಗಾಪರಮೇಶ್ವರೀ ದೇಲಂತಡೆಡ್ ಬತ್ತಿನ ಐನ್ ಸಾರ ಜಾಸ್ತಿ ಭಕ್ತೆರೆಗ್ ಆ್ಯಪಲ್ ನ್ ಪ್ರಸಾದ ರೂಪೊಡು ಪಟ್ಟಿಯೆರ್ . ಮಾಜಿ ವಿಧಾನ ಪರಿಷತ್ ಸದಸ್ಯ ಡಿ.ಯು.ಮಲ್ಲಿಕಾರ್ಜುನ ಬೆಂಗಳೂರು ಮೇರ್ ದೇವೆರೆಗ್ ಸಮರ್ಪಣೆ ಮಲ್ತಿನ ಆ್ಯಪಲ್ ನ್ ಅರ್ಚಕೆರ್ ಅನಂತ ಆಸ್ರಣ್ಣ, ಪ್ರಸಾದ ಆಸ್ರಣ್ಣ, ಶ್ರೀಹರಿ ಆಸ್ರಣ್ಣ ಭಕ್ತೆರೆಗ್ ಪಟ್ಟಿಯೆರ್. ಕರಿನ ವಾರಲ ಐನ್ ಸಾರ ಆ್ಯಪಲ್, ಚಿತ್ತುಪುಲಿ ಮಲ್ಲಿಕಾರ್ಜುನ ಮೇರ್ ಕಟೀಲ್ ದೇವೆರೆಗ್ ಸಮರ್ಪಣೆ ಮಲ್ತ್ ಇತ್ತೆರ್ . ಮಾರ್ನೆಮಿದ ಲಲಿತಾಪಂಚಮಿ ದಿನತಾನಿ ಭಕ್ತೆರೆಗ್ ಶೇಷವಸ್ತ್ರ ಪಟ್ಟುನೆಕ್ ಐನ್ ಲಕ್ಷ ರೂಪಾಯಿ ಕಾಣಿಕೆಯಾದ್ ಕೊರ್ತೆರ್ .

ಕುಡ್ಲಡ್ 5ನೇ ವರ್ಷದ “ಪಿಲಿ ಅಜನೆ”: ಲೆಪ್ಪೋಲೆ ಬಿಡುಗಡೆ

ಕುಡ್ಲ : 5ನೇ ವರ್ಷದ “ಪಿಲಿ ಅಜನೆ” ಹುಲಿ ಕುಣಿತ ಕಾರ್ಯಕ್ರಮದ ಲೆಪ್ಪೋಲೆನ್ ಕುದ್ರೋಳಿ ಶ್ರೀ ಭಗವತಿ ದೇವಸ್ಥಾನ ಡ್ ಬಿಡುಗಡೆ ಮಲ್ತೆರ್.
ಮಂಗಳೂರು ನಗರದ ದೀಪಾ ಕಂಫರ್ಟ್ಸ್ ಸಮೀಪ ಶ್ರೀ ಪ್ರಮೋದ್ ಕರ್ಕೇರ ಬೊಕ್ಕ ಪಿಲಿ ಅಜನೆ ತಂಡದ ನೇತೃತ್ವಡ್ ಯಶಸ್ವಿಯಾದ್ ಆಯೋಜನೆ ಮಲ್ತೊಂದು ಬರ್ಪಿನ “ಪಿಲಿ ಅಜನೆ” ವಿನೂತನ ಕಾರ್ಯಕ್ರಮ ಇತ್ತೆ 5ನೇ ವರ್ಷಗ್ ಪಜ್ಜೆ ಪಾಡ್ದ್ಂಡ್.
ಕರಿನ ನಾಲ್ ವರ್ಷರ್ದ್ ಕುಡ್ಲಡ್ ಕೆಲವು ಪುಗರ್ತೆದ ಪಿಲಿ ಕುಣಿತ ತಂಡದ ಭರ್ಜರಿ ಪ್ರದರ್ಶನದ ಮೂಲಕ ಜನಮನ ಗೆಂದ್‌ದಿನ “ಪಿಲಿ ಅಜನೆ” ಕಾರ್ಯಕ್ರಮವ ಈ ಸರ್ತಿಲ ಅದ್ಧೂರಿಯಾದ್ ನಡಪರೆ ಉಂಡು.
ಪುಗರ್ತೆದ ಪಿಲಿ ಕುಣಿತ ಕೂಟದಕ್ಲೆರ್ದ್ ಆಕರ್ಷಕ ಬೊಕ್ಕ ರೋಮಾಂಚನಕಾರಿ ಪ್ರದರ್ಶನ ನಡಪರೆ ಉಂಡು.
ಅಕ್ಟೋಬರ್ 21ಕ್ಕ್ ಬುಧವಾರ “ಪಿಲಿ ಅಜನೆ” ಕಾರ್ಯಕ್ರಮ ನಡಪರೆ ಇತ್ತ್‌ದ್, ಪಿಲಿ ಕುಣಿತ ಪ್ರದರ್ಶನರ್ದ್ ದುಂಬು ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ಆಯೋಜನೆ ಮಲ್ತ್ದ ಪಂದ್ ಆಯೋಜಕೆರ್ ತೆರಿಪಾಯೆರ್. ಆಮಂತ್ರಣ ಪತ್ರಿಕೆ ಬಿಡುಗಡೆರ್ದ್ ದುಂಬು ಕುದ್ರೋಳಿ ಶ್ರೀ ಭಗವತಿ ದೇವಾಲಯಡ್ ವಿಶೇಷ ಪೂಜೆ ಸಂದಾಯೆರ್.
ಈ ಪೊರ್ತುಡು ಕಾರ್ಯಕ್ರಮದ ನೇತೃತ್ವ ವಹಿಸ್‌ದಿತ್ತಿನ ಪ್ರಮೋದ್ ಕರ್ಕೇರ, ಪ್ರೇಮ್ ಸಾಲ್ಯಾನ್, ಹಿತೇಶ್ ಬೇಕಲ್, ಕಾರ್ತಿಕ್, ರಕ್ಷಿತ್ ಆರ್. ಪೂಜಾರಿ, ಯಶ್ಪಾಲ್ ಸಾಲ್ಯಾನ್, ರಂಜಿತ್, ಹರ್ಷಿತ್, ಆಶೀಶ್, ಅನುಷ್, ಶಾರುಲ್, ಪ್ರದೀಪ್ ಸೇರ್ದ್ ಬೊಕ್ಕ ಪಿಲಿ ಅಜನೆ ತಂಡದ ಸದಸ್ಯೆರ್ ಮಾತ ಇತ್ತೆರ್.

ಪಂಡಿ ಪಾತೆರೆದಂಚ ನಡತಿನ “ಕಲಿಯುಗದ ಕರ್ಣೆ” ರವಿ ಕಟಪಾಡಿ

ಅಶಕ್ತ ಬಾಲೆದ ಚಿಕಿತ್ಸೆಗ್ 2.5 ಲಕ್ಷ ರೂ.ಸಕಾಯ

ಕುಡ್ಲ : ಈ ವರ್ಷದ ಜುಲೈ 26ಕ್ಕ್ ಶ್ರೀಮಂತ ರಾಜಗುಳಿಗ ಕ್ಷೇತ್ರಡ್ ನಡತಿನ ಆಟಿಡೊಂಜಿ ದಿನ ಲೇಸ್‌ಡ್ ಬಿನ್ನೆರಾದ್ ಪಾಲ್ ಪಡೆದಿತ್ತಿನ ಸಮಾಜಸೇವಕೆ ರವಿ ಕಟಪಾಡಿ ಮೇರ್ ಅಶಕ್ತ ಬಾಲೆದ ಚಿಕಿತ್ಸೆಗ್ ಪನವುದ ಸಕಾಯ ಮಲ್ಪುನ ಮುಕೇನ ಪಂಡಿನ ಪಾತೆರೊನು ನಡಪಾದ್ ಕೊರಿಯೆರ್.
ಆ ದಿನ ಒಂಜಿ ಬಾಲೆದ ಪೋಷಕೆರ್ ಆ ಬಾಲೆದ ಚಿಕಿತ್ಸೆಗ್ ಸಹಾಯ ಮಲ್ಪುಲೆ ಪಂದ್ ಕೇಂಡಿನ ಪೊರ್ತುಡು, “ಈ ಸರ್ತಿದ ಅಸ್ಟೆಮಿ ವೇಷ ಪಾಡ್ದ್ ತನರ್ದ್ ಆಪಿನಾತ್ ಸಹಾಯ ಮಲ್ಪುವೆ” ಪಂದ್ ಭರವಸೆ ಕೊರ್ದಿತ್ತೆರ್. ಅವೇ ಪ್ರಕಾರ ಆರ್, ಶ್ರೀಮಂತ ರಾಜಗುಳಿಗ ಕ್ಷೇತ್ರಡ್ ಇಂಚೊಗು ನಡತಿನ ಬೊಂಡಾಭಿಷೇಕದ ಪೊರ್ತುಡು ತನ್ನ ತಂಡದ ಒಟ್ಟುಗು ಬತ್ತ್‌ದ್ ಬಾಲೆಗ್ 250000 ರೂ.ದ ಪನವುದ ಸಕಾಯೊನು ಕ್ಷೇತ್ರದ ಧರ್ಮದರ್ಶಿಲಾಯಿನ ಸತೀಶ್ ಬಂದಲೆ ಮೆರೆನ ಮುಕೇನ ಕೊರಿಯೆರ್.

ಕಿಲ್ಪಾಡಿ ತಿರುಮಲ ಗುತ್ತು ಕೈತಲ್ದ ಇಲ್ಲಲ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್ ಬಂಗಾರ್ ಕಂಡಿನ ಕಲ್ವೆರ್

ಮುಲ್ಕಿ: ಶಿಮಂತೂರು ದೇವಸ್ಥಾನಗ್ ಮಾರ್ಗ ಸಂಪರ್ಕ ಮಲ್ತಿನ ಕಿಲ್ಪಾಡಿ ಗ್ರಾಮದ ತಿರುಮಲ ಗುತ್ತು ಕೈತಲ್ದ ಶಕೀಲಾ ಪೂಜಾರಿ ಪನ್ಪಿನಾರೆನ ಇಲ್ಲಲ್ ರ್ದ್ ಸನಿಯಾರ ಪಗೆಲ್ ಡ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್-ಬಂಗಾರ್ ಕಂಡ್ ದ್ ಪೋಯಿನ ಬಗ್ಗೆ ಮುಲ್ಕಿ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್.

ಶಕೀಲಾ ಪೂಜಾರಿ ತನ್ನ ಕಂಡನಿ ಹರೀಶ್ ಪನ್ಪಿನಾರೆನೊಟ್ಟಿಗೆ ಇಲ್ಲಲ್ ವಾಸ ಇತ್ತೆರ್. ಇಲ್ಲಲ್ ಎರ್ಲಾ ಇಜ್ಜಂದಿನ ಪೊರ್ತುಡು ಈ ಘಟನೆ ನಡತ್ ದ್ಂಡ್.

ಕಲ್ವೆರ್ ಶಕೀಲಾ ಮೆರೆನ ಇಲ್ಲದ ಎದುರು ಭಾಗದ ಕರ್ಬದ ಬಾಕಿಲ್ ದ ಉಲಯಿದ ಚಿಲಕನ್ ಗಟ್ಟಿದ ಸೊತ್ತುರ್ದು ತುಂಡು ಮಲ್ತ್ ದ್ ಉಲಯಿ ಪೋತೆರ್. ಬೊಕ್ಕ ಓಪನ್ ಇತ್ತಿನ ಕಪಾಟ್ ನ್ ನಡ್ ದ್, ಕುಂಟುದೊಲಯಿ ದೆಂಗದ್ ದೀದಿತ್ತಿನ ಕಪಾಟ್ ದ ಬೀಗದ ಕೀ ಮುಕೇನ ಕಪಾಟ್ ದ ಉಲಯಿದ ಡ್ರಾವರ್ ನಡ್ ದ್ 6 ಕಾಜಿ (60 ಗ್ರಾಂ), 1 ನೆಕ್ಲೆಸ್ (20 ಗ್ರಾಂ), 1 ಮಾಲೆ (35 ಗ್ರಾಂ), 1 ಹವಳದ ಮಾಲೆ (16 ಗ್ರಾಂ), 1 ಮುತ್ತುದ ಮಾಲೆ (24 ಗ್ರಾಂ), 4 ಜತೆ ಕೆಬಿತ್ತ (32 ಗ್ರಾಂ), 15 ಉಂಗುರ (45 ಗ್ರಾಂ), 1 ಕರಿಮಣಿ (56 ಗ್ರಾಂ), 6 ಬಂಗಾರ್ ದ ತುಂಡು (8 ಗ್ರಾಂ), 1 ಪೆಂಡೆಂಟ್ (5 ಗ್ರಾಂ), 1 ಬ್ರಾಸ್ ಲೆಟ್ (10 ಗ್ರಾಂ), 1 ಚೈನ್ (10 ಗ್ರಾಂ) ಸೇರ್ದ್ ಸುಮಾರ್ 40,56,000 ರೂ.‌ ಬಿಲೆತ್ತ 321 ಗ್ರಾಂ (39 ಪವನ್ ಬಂಗಾರ್), ಸುಮಾರ್ 10,000ರೂ, 2000 ರೂ. ಕ್ವಾಯಿನ್ ಸೇರ್ದ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಬಂಗಾರ್ ಬೊಕ್ಕ ಕಪಾಟ್ ಡ್ ಇತ್ತಿನ ಶಕಿಲಾ ಮೆರೆನ ಮಗಲೆನ ಚೂಡಿದಾರ, ಡ್ರೆಸ್ ನ್ ಕಂಡ್ ದೆರ್. ಕಲ್ವೆರ್ ಕಂಡ್ ದ್ ವಾಪಸ್ ಪೋನಗ ಒಂಜಿ ಕರಿಮಣಿ ಮಾಲೆನ್ ಅಲ್ಪನೇ ಬುರ್ದು ಪೋತೆರ್. ಬೊಕ್ಕ ಇಲ್ಲದ ಎದುರುದ ಬಾಕಿಲ್ ನ್ ಉಲಯಿರ್ದ್ ಲಾಕ್ ‌ಮಲ್ದೆರ್.

ಶಕೀಲ ಮೆರೆನ ಕಂಡನಿ ಹರೀಶ್ ಮೇರ್ ಬೊಲ್ಪುಗು 8 ಗಂಟೆಗ್ ಎಪೊಲದಲೆಕ್ಕನೇ ಕಿನ್ನಿಗೋಳಿದ ಹಾರ್ಡ್ವೇರ್ ಅಂಗಡಿಗ್ ಪ್ರತಿ‌ ದಿನೊಲ ಕೆಲಸಗ್ ಪೋವೊಂದು ಇತ್ತೆರ್. ಇಲ್ಲಲ್ ಶಕೀಲಾ ಪೂಜಾರಿ ಮೇರ್ ತನ್ನ ಇಲ್ಲದ‌‌ ಮಿತ್ತ್ ಬಾಡಿಗೆ ಇಲ್ಲಲ್ ವಾಸ ಇಪ್ಪುನ ದಿಲ್ ಶಾದ್ ಪನ್ಪಿನರೆನೊಟ್ಟಿಗೆ ಸ್ಕೂಟರ್ ಡ್ ಮುಲ್ಕಿ ಮುಟ್ಟ ಪೋದು ಬೊಕ್ಕ ಬಸ್ಸ್ ಟ್ಟ್ ಪಡುಪಣಂಬೂರು ಶನಿಮಂದಿರ, ಪಾವಂಜೆ ದೇವಸ್ಥಾನ ಬೊಕ್ಕ ಕಾರ್ನಾಡ್ ಸಂತೆಗ್ ಪೋದು ವಾಪಸ್ ಬಯ್ಯಗ್ ನಾಲ್ ಗಂಟೆಗ್ ಇಲ್ಲಲ್ ದಂಚಿ‌ ಬನ್ನಗ ಕಂಡಿನವು ಗೊತ್ತಾತ್ಂಡ್.

ಗ್ರಾಮೀಣ ಪ್ರದೇಶಡ್ ಪಗಲೆಡೇ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್ ಬಂಗಾರ್ ಕಂಡಿನವು ಕೈತಲ್ ದಕ್ಲೆಗ್ ಪೋಡಿಗೆ ಸುರು ಆತ್ಂಡ್. ಜಾಗೆಗ್ ಶ್ವಾನದಳ, ಬೆರಳಚ್ಚುತಜ್ಞೆರ್, ಮುಲ್ಕಿ ಪೊಲೀಸ್ ಇನ್ಸ್ ಪೆಕ್ಟರ್ ಶ್ರೀಕಾಂತ್, ಸಾಮಾಜಿಕ ಕಾರ್ಯಕರ್ತೆರ್ ಭೀಮಾಶಂಕರ್, ಕಾರ್ನಾಡ್ ಆಟೋ ಚಾಲಕೆರೆನ ಸಂಘದ ಅಧ್ಯಕ್ಷೆರ್ ಕಿರಣ್ ಶಿಮಂತೂರು ಭೇಟಿ ಕೊರ್ತೆರ್. ಇಲ್ಲಲ್ ಕಂಡುನ ದುಂಬುದ ದಿನ ಕೆಲವು ಅನುಮಾನ ವ್ಯಕ್ತಿಲು ರಾತ್ರೆದ ಪೊರ್ತು ಇಲ್ಲದ ಸುತ್ತಮುತ್ತ ಪೋವೊಂದು ಇತ್ತೆರ್ ಪಂದ್ ಶಕೀಲಾ ಪಂಡೆರ್.
ಶಕೀಲಾ ಮೆರೆನ ಇಲ್ಲದ ಕೈತಲ್ ಒವ್ವೇ ಇಲ್ಲ್ ಇಜ್ಜಂದಿರ್ನೆದಾವೆರ ಬೊಕ್ಕ ಮಾರ್ಗಗ್ ಸರಿಯಾಯಿನ ಲೈಟ್ ಇಜ್ಜಂದಿರ್ನೆದಾವೆರ ಕಲ್ವೆರೆಗ್ ಎಡ್ಡೆ ಆತ್ಂಡ್ ಪಂದ್
ಮುಲ್ಕಿ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ನಡಪಾವೊಂದು ಉಲ್ಲೆರ್.

ಮುಲ್ಕಿ ಪರಿಸರಡ್ ಕಂಡಿನ ಬೊಕ್ಕ ಸುರು ಆತ್ಂಡ್. ಕರಿನ ತಿಂಗೊಲ್ ಠಾಣೆ ವ್ಯಾಪ್ತಿದ ಕವಾತ್ತಾರು ಕೈತಲ್ದ ಇಲ್ಲ್ ಒಂಜೇಟ್ ಲಕ್ಷರ್ದ್ ಎಚ್ಚ ಬಿಲೆತ್ತ ಬಂಗಾರ್ ಉಂದುವೇ ರೀತಿ ಕಂಡ್ ದೆರ್. ಇಡೇ ಮುಟ್ಟ ಕಲ್ವೆರ್ ತಿಕಿಜೆರ್. ಅಂಚೆನೆ ಮುಲ್ಕಿ ಪೊಲೀಸ್ ಠಾಣೆ ವ್ಯಾಪ್ತಿದ ಕಿಲ್ಪಾಡಿ ಕೋರ್ದಬ್ಬು ದೈವಸ್ಥಾನಡ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ದೈವೊದ ಸೊತ್ತುಲೆನ್ ಕಂಡ್ ದೆರ್. ಇತ್ತೆ ತಿರುಮಲ ಗುತ್ತು ಕೈತಲ್ದ ಶಕೀಲಾ ಮೆರೆನ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಸೊತ್ತುಲೆನ್ ಕಂಡ್ ದೆರ್. ಕಿಲ್ಪಾಡಿ, ಶಿಮಂತೂರು ಪರಿಸರದ ನಾಗರಿಕೆರೆನ್ ಪೋಡಿಗೆ ಸುರು ಆತ್ಂಡ್. ಕೂಡ್ಲೇ ಮುಲ್ಕಿ ಪೊಲೀಸೆರ್ ಕಲ್ವೆರೆನ್ ಬಂಧನ ಮಲ್ಪುನೊಟ್ಟಿಗೆ ಬೀಟ್ ವ್ಯವಸ್ಥೆ ಮಲ್ಪೊಡು ಪಂದ್ ನಾಗರಿಕೆರ್ ಒತ್ತಾಯ ಮಲ್ದೆರ್.

ಎಂಆರ್‌ಪಿಎಲ್‌ಡ್ ಭಾರಿ ಸ್ಫೋಟ; 9 ಜನಕ್ಕ್ ಗಾಯ

ಕುಡ್ಲ : MRPL ಪ್ರದೇಶಡ್ ಬುಧವಾರ ಮಧ್ಯಾಹ್ನ 12.15 ಕ್ಕ್ ಭಾರಿ ಪ್ರಮಾಣ ಸ್ಫೋಟ ಆದ್ 9 ರ್ದ್‌ಲ ಎಚ್ಚ ಜನಕ್ಕ್ ಗಾಯ ಆತ್ಂಡ್ ಪಂದ್ ಪ್ರಾಥಮಿಕ ಹಂತಡ್ ತೆರಿದ್ ಬೈದ್ಂಡ್.
ಸ್ಫೋಟದ ರಭಸ್‌ಗ್ ಜೋಕಟ್ಟೆ ಗ್ರಾಮ ಪಂಚಾಯತ್ ಕಟ್ಟಡ ಬೊಕ್ಕ ಸುತ್ತಮುತ್ತಲ್‌ದ ಇಲ್ಲ್ ಬೊಕ್ಕ ಕಟ್ವಾಣಲು ಅದ್‌ರ್‌ದ್ಂಡ್.
ಈ ಜಾಗೆಗ್ ಜಿಲ್ಲಾಧಿಕಾರಿ ದರ್ಶನ್ ಬೊಕ್ಕ ಅಧಿಕಾರಿಲು ಕೂಡ್ಲೆ ಭೇಟಿ ಕೊರ್ದು ರಕ್ಷಣಾ ಕಾರ್ಯಗ್ ಮಾರ್ಗದರ್ಶನ ಕೊರೊಂದುಲ್ಲೆರ್. ಸಂಸದೆರ್ ಬ್ರಿಜೇಶ್ ಚೌಟ ಬೆಲ್ತಂಗಡಿದ ಕಾರ್ಯಕ್ರಮ ರದ್ದ್ ಮಲ್ತ್‌ದ್ ವಾಪಸ್ ಬರೊಂದುಲ್ಲೆರ್.
ಸ್ಫೋಟದ ರಭಸ್‌ಡ್ ಜೋಕಟ್ಟೆ ಕೈತಲ್ದ ಇಲ್ಲದಕ್ಲೆನ ​ಕಂಡಿ ಬಾಕಿಲ್ ಅದ್‌ರ್ದ್ಂಡ್.ತೂತ್ತ ಪುಗೆ ಬಾನದಾತ್ ಎತ್ತರೊಗು ಪೋವೋಂದಿತ್ತ್‌ದ್ ಬೊಕ್ಕ ನಿಯಂತ್ರಣಗ್ ಬೈದ್ಂಡ್. ಅಗ್ನಿಶಾಮಕದಕುಲು,
ಅಧಿಕಾರಿಗಳು ಬೊಕ್ಕ ತುರ್ತು ಸೇವಾ ಸಿಬ್ಬಂದಿಲು ರಕ್ಷಣಾ ಕಾರ್ಯ ಮಲ್ತೊಂದುಲ್ಲೆರ್ ಪಂದ್ ಪ್ರಾಥಮಿಕ ವರದಿಡ್ ಗೊತ್ತಾತ್ಂಡ್.

ಅ. 2ರ್ದ್ ಸುರತ್ಕಲ್ ಬಂಟರ ಭವನಡ್ ಸೀರೆ, ಆಭರಣ ಮಾರಾಟ ಮೇಳ

ಸುರತ್ಕಲ್: ಸುರತ್ಕಲ್ ಬಂಟರ ಸಂಘದ ಮಹಿಳಾ ವೇದಿಕೆ ವತಿರ್ದ್ ದಸರಾ ಬೊಕ್ಕ ದೀಪಾವಳಿ ಪರ್ಬದ ಪ್ರಯುಕ್ತ “ಸಿಂಧೂರ 2026” ಸೀರೆ, ಆಭರಣ ಬೊಕ್ಕ ವೈವಿಧ್ಯಮಯ ಉತ್ಪನ್ನದ ಮಾರಾಟ ಮೇಳ ಅ. 2 ರ್ದ್ 4 ತಾ. ಮುಟ್ಟ ಸುರತ್ಕಲ್ ನ ಬಂಟರ ಭವನಡ್ ನಡಪರೆ ಉಂಡು.
ಅ. 2 ಕಾಂಡೆ 10 ಗಂಟೆಗ್ ಮಾರಾಟ ಮೇಳನ್ ತುಳು ವರ್ಲ್ಡ್ ಫೌಂಡೇಶನ್, ಕಟೀಲು ನೆತ್ತ ಅಧ್ಯಕ್ಷೆರ್ ಭಾನುಮತಿ ಶೆಟ್ಟಿ ಕಕ್ವಗುತ್ತು ಉದಿಪನ ಮಲ್ಪುವೆರ್. ಅಧ್ಯಕ್ಷತೆನ್ ಸುರತ್ಕಲ್ ಬಂಟರ ಸಂಘದ ಮಹಿಳಾ ವೇದಿಕೆದ ಅಧ್ಯಕ್ಷೆ ಸರೋಜ ತಾರಾನಾಥ್‌ ಶೆಟ್ಟಿ ವಹಿಸರೆ ಉಲ್ಲೆರ್. ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ, ಮಹಿಳಾ ವೇದಿಕೆ ಸ್ಥಾಪಕಾಧ್ಯಕ್ಷೆ ಅಂಜನಾ ಮಂಜಯ್ಯ ಶೆಟ್ಟಿ ಉಪ್ಪುವೆರ್ ಪಂದ್ ಮಹಿಳಾ ವೇದಿಕೆದ ಕಾರ್ಯದರ್ಶಿ ರಾಜೇಶ್ವರಿ ಡಿ ಶೆಟ್ಟಿ ತೆರಿಪಾದೆರ್.

You Missed