ಕಾಸ್ರೋಡ್ ಸುದ್ದಿ | Kasargod News

ಚಾರ್ಟೆಡ್ ಅಕೌಂಟೆಂಟ್ ಪರೀಕ್ಷೆಡ್ ಸುರುತ್ತ ಪ್ರಯತ್ನಡ್ ಉತ್ತೀರ್ಣೆರಾಯಿನ ಶಮಿತ ರಾಜೇಂದ್ರ ಸುವರ್ಣ

ಮುಂಬೈ : ಮುಂಬೈದ ಥಾಣ ನಿವಾಸಿ ರಾಜೇಂದ್ರ ಬೊಕ್ಕ ಗೀತ ಮೆರ್ನ ಮಗಲ್ , ಸಸಿಹಿತ್ಲು ಮಂಜುನಾಥ್ ಕೋಟ್ಯಾನ್ರೆನ ಪುಳ್ಳಿ ” ಶಮಿತ ರಾಜೇಂದ್ರ ಸುವರ್ಣ ” ಮೇರ್ ಚಾರ್ಟೆಡ್ ಅಕೌಂಟೆಂಟ್ ಪರೀಕ್ಷೆಡ್ ಸುರುತ್ತ ಪ್ರಯತ್ನಡೆ ಪಾಸ್ ಆತೆರ್.

ಮೆರ್ನ ಅಪ್ಪೆ ಭಾರತ್ ಕೋ ಆಪರೇಟಿವ್ ಬ್ಯಾಂಕ್, ದಾದರ್ ಬ್ರಾಂಚ್ ಡ್ ಬೇಲೆ ಮಲ್ತೊಂದು ಉಲ್ಲೆರ್, ಅಮ್ಮೆರ್ ಪ್ರೈವೇಟ್ ಕಂಪನಿಡ್ ಬೇಲೆ ಮಲ್ತೊಂದು ಉಲ್ಲೆರ್ . ಮೆಕುಲು ಮುಂಬಯಿದ ಥಾಣ ನಿವಾಸಿಲು. ಸ್ವಂತ ಊರು ಮೂಲ್ಕಿ ಸಮೀಪದ ಮಟ್ಟು ಪೊಸ ಕೊಪ್ಲ ಪಂಡ್ ದ್ ತೆರಿಪಾಯಿನ ಅರೆನ ಸಂಬಂಧಿ ರಘು ಮಟ್ಟು ಶಮಿತಾಗ್ ಶುಭ ಹಾರೈಕೆ ಮಲ್ದೆರ್.

ಕುಂದಾಪುರ ಪುರಸಭೆ ವ್ಯಾಪ್ತಿದ ಸರಕಾರಿ ಶಾಲೆದ ಎಸ್‌ಡಿಎಂಸಿ ಸದಸ್ಯೆರೆಗ್ ಸಾಮರ್ಥ್ಯ ವರ್ಧನ ತರಬೇತಿ ಕಾರ್ಯಾಗಾರ

ಕುಂದಾಪುರ, ಮಾ.20: ಕರ್ನಾಟಕ ರಾಜ್ಯ ಶಾಲಾಭಿವೃದ್ಧಿ ಬೊಕ್ಕ ಮೇಲುಸ್ತುವಾರಿ ಸಮಿತಿದ ಸಮನ್ವಯ ವೇದಿಕೆ ಉಡುಪಿ ಜಿಲ್ಲೆ, ತಾಲೂಕ ಘಟಕ ಕುಂದಾಪುರ, ಬೈಂದೂರು, ಪುರಸಭೆ ಕುಂದಾಪುರ, ಸಾರ್ವಜನಿಕ ಶಿಕ್ಷಣ ಇಲಾಖೆ ಕುಂದಾಪುರ ತಾಲೂಕು, ಸಮಾಜ ಕಲ್ಯಾಣ ಇಲಾಖೆ ಕುಂದಾಪುರ ಮೆಕ್ಲೆನ ಒಟ್ಟು ಸೇರಿಗೆಡ್ ಕುಂದಾಪುರ ಪುರಸಭೆ ವ್ಯಾಪ್ತಿದ ಸರಕಾರಿ ಶಾಲೆದ ಎಸ್‌ಡಿಎಂಸಿ ಸದಸ್ಯೆರೆಗ್ ಸಾಮರ್ಥ್ಯ ವರ್ಧನ ತರಬೇತಿ ಕಾರ್ಯಾಗಾರನ್ ಕುಂದಾಪುರ ಅಂಬೇಡ್ಕರ್ ಭವನಡ್ ಅಟ್ಟನೆ ಮಲ್ತಿತ್ತೆರ್.

ಲೇಸ್ ದ ಗುರ್ಕಾರ್ಮೆನ್ ಎಸ್‌ಡಿಎಂಸಿ ಸಮನ್ವಯ ವೇದಿಕೆದ ತಾಲೂಕು ಘಟಕದ ಗುರ್ಕಾರ್ಲಾಯಿನ ಎಸ್.ವಿ.ನಾಗರಾಜ್ ಪಾಲ್ ಪಡೆದ್ ಇತ್ತೆರ್ . ಲೇಸ್ ನ್ ಕುಂದಾಪುರ ಪುರಸಭಾ ಗುರ್ಕಾರ್ದಿ ವೀಣಾ ಭಾಸ್ಕರ್ ಉದಿಪನ ಮಲ್ತೆರ್ .

ಪುರಸಭೆ ಉಪಾಧ್ಯಕ್ಷ ಸಂದೀಪ್ ಖಾರ್ವಿ, ವೇದಿಕೆ ಶಿವಮೊಗ್ಗ ಜಿಲ್ಲಾಧ್ಯಕ್ಷ ಅಶ್ವಿನಿ ಕುಮಾರ್, ಕಾರವಾರ ಜಿಲ್ಲಾಧ್ಯಕ್ಷೆ ಶಾಂತಿಬಾಯಿ, ಸಿಆರ್ಪಿಲಾಯಿನ ಸುನಿತಾ, ಶಂಕರ್ ಶೆಟ್ಟಿ, ಉಡುಪಿ ತಾಲೂಕು ಶಿಕ್ಷಣ ಸಂಪನ್ಮೂಲ ಕೇಂದ್ರದ ಕಾರ್ಯದರ್ಶಿ ಬಾಲಕೃಷ್ಣ ಪೂಜಾರಿ, ವೇದಿಕೆದ ಜಿಲ್ಲಾ ಸಮಿತಿ ಪದಾಧಿಕಾರಿ ಶೋಭಾ ಭಾಸ್ಕರ್ ಕಾರ್ಕಳ, ತಾಲೂಕು ಕಾರ್ಯದರ್ಶಿ ಜ್ಯೋತಿ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಉಡುಪಿ ಜಿಲ್ಲಾ ಪದವಿ ಪೂರ್ವ ಕಾಲೇಜ್ ದ ಗಣಕ ಶಾಸ್ತ್ರ ಬೊಕ್ಕ ಹಿಂದಿ ಉಪನ್ಯಾಸಕೆರ್ನ ವೇದಿಕೆದ ವತಿರ್ದ್ ಒಂಜಿ ದಿನತ ಕಾರ್ಯಾಗಾರ

ಒಡಿಪು , ಮಾ.18: ಒಡಿಪು ಜಿಲ್ಲಾ ಪದವಿ ಪೂರ್ವ ಕಾಲೇಜ್ ದ ಗಣಕ ಶಾಸ್ತ್ರ ಬೊಕ್ಕ ಹಿಂದಿ ಉಪನ್ಯಾಸಕೆರ್ನ ವೇದಿಕೆದ ವತಿರ್ದ್ ಆಯಾ ವಿಷಯಲೆಗ್ ಸಂಭಂದ ಪಟ್ಟಿಲಕ ಒಂಜಿ ದಿನತ ಕಾರ್ಯಗಾರ ಮಾ.18 ತಾರೀಖ್ ಗ್ ಗುರುವಾರ ಒಡಿಪು ಪುತ್ತೂರು ಹನುಮಂತ ನಗರ ರಾಷ್ತ್ರೀಯ ಹೆದ್ದಾರಿ 66 ತ್ತ ಕೈತಲ್ ಉಪ್ಪುನ ಸೈಲಸ್ ಮಹೇಶ್ ಪದವಿಪೂರ್ವ ಕಾಲೇಜ್ ಡ್ ನಡಪರೆ ಉಂಡು.

ಕಾರ್ಯಾಗಾರನ್ ಜಿಲ್ಲಾ ಪದವಿ ಪೂರ್ವ ಶಿಕ್ಷಣ ಇಲಾಖೆದ ಉಪನಿರ್ದೇಶಕೆರಾಯಿನ ಭಗವಂತ ಕಟ್ಟೀಮನಿ ಕಾಂಡೆ 9:30ಕ್ ಉದಿಪನ ಮಲ್ಪರೆ ಉಲ್ಲೆರ್. ಬೈಂದೂರು ಸರಕಾರಿ ಪದವಿ ಪೂರ್ವ ಕಾಲೇಜ್ ದ ಪ್ರಭಾರ ಪ್ರಾಂಶುಪಾಲರಾಯಿನ ರವೀಂದ್ರ ಕೆ.ವಿ. ಬೊಕ್ಕ ಮಂಗಳೂರು ಕಪಿತಾನಿಯೋ ಪದವಿ ಪೂರ್ವ ಕಾಲೇಜ್ ದ ಅನಿತಾ ಎಂ.ಎಸ್.ಡೇಸಾ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಪ್ರಕಟಣೆ ಡ್ ತೆರಿಪಾದೆರ್.

ಮಾ.20 ತಾರೀಖ್ ಗ್ ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿರ್ದ್ ಡಾ.ಸುಶೀಲಾ ಉಪಾಧ್ಯಾಯ ಸಂಸ್ಮರಣೆ

ಒಡಿಪು , ಮಾ.18: ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿ ವತಿರ್ದ್ ಕೋಟ ಡಾ.ಕಾರಂತ ಪ್ರತಿಷ್ಠಾನದ ಸಹಕಾರಡ್ ವಿಶ್ವ ಮಹಿಳಾ ದಿನಾಚರಣೆ ಪರವಾದ್ ಬ್ಯಾರಿ ಭಾಷಿಕರ ವರ್ಣನಾತ್ಮಕ ವ್ಯಾಕರಣ ಬೊಕ್ಕ ತೌಲನಕ ಅಧ್ಯಯನ ಗ್ರಂಥ ರಚಿಸಾದ್ ಪಿಎಚ್‌ಡಿ ಪಡೆಯಿನ ಅಂಚನೇ ಅಕಾಡೆಮಿದ ಸುರುತ್ತ ಅವಧಿದ ಸದಸ್ಯೆರ್ ಆಯಿನ ಡಾ.ಪಿ.ಸುಶೀಲ ಉಪಾಧ್ಯಾಯೆರ್ನ ಸಂಸ್ಮರಣಾ ಲೇಸ್ ಮಾ.20 ತಾರೀಖ್ ಗ್ ಮಧ್ಯಾಹ್ನ 2ಗಂಟೆಗ್ ಕೋಟ ಕಾರಂತ ಥೀಮ್ ಪಾರ್ಕ್‌ಡ್ ನಡಪರೆ ಉಂಡು.

ಒಡಿಪುಡು ಕೋಡೆ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಅಕಾಡೆಮಿ ರಿಜಿಸ್ಟ್ರಾರ್ ಪೂರ್ಣಿಮಾ, ಲೇಸ್ ನ್ ಒಡಿಪು ಜಿಲ್ಲಾ ಸಹಾಯಕ ಅಭಿಯೋಗ ನಿರ್ದೇಶಕಿ ಮಮ್ತಾಝ್ ಉದಿಪನ ಮಲ್ಪರೆ ಉಲ್ಲೆರ್ . ಗುರ್ಕಾರ್ಮೆ ನ್ ಅಕಾಡೆಮಿದ
ಗುರ್ಕಾರ್ಲಾಯಿನ ರಹೀಂ ಉಚ್ಚಿಲ್ ವಹಿಸೊನೆರೆ ಉಲ್ಲೆರ್ . ಹಿರಿಯಡ್ಕ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಂಶುಪಾಲೆ ಡಾ.ನಿಕೇತನ, ಸುಶೀಲ ಉಪಾಧ್ಯಾಯೆರ್ನ ಸಂಸ್ಮರಣ ಬಗ್ಗೆ ವಿಶೇಷ ಉಪನ್ಯಾಸ ಕೊರ್ರೆ ಉಲ್ಲೆರ್ ಪಂದ್ ತೆರಿಪಾಯೆರ್.

ಮಲ್ಲ ಬಿನ್ನೆರ್ ಆದ್ ಕೋಟತಟ್ಟು ಗ್ರಾಪಂ ಗುರ್ಕಾರ್ದಿ ಅಶ್ವಿನಿ ದಿನೇಶ್, ಡಾ. ಕಾರಂತ ಪ್ರತಿಷ್ಠಾನದ ಟ್ರಸ್ಟಿ ಇಬ್ರಾಹಿಂ ಕೋಟ, ಕಾರ್ಯದರ್ಶಿ ನರೇಂದ್ರ ಕೋಟ, ಕರ್ನಾಟಕ ಹಜ್ ಸಮಿತಿದ ಮಾಜಿ ಸದಸ್ಯ ಸಲೀಂ ಅಂಬಾಗಿಲು ಪಾಲ್ ಪಡೆಯರೆ ಉಲ್ಲೆರ್ .

ಬೈಯ್ಯಕ್ 4 ಗಂಟೆಗ್ ಮಹಿಳಾ ಸಾಧಕಿಯೆರಾಯಿನ ಮಮ್ತಾಜ್(ಸಾಮಾಜಿಕ ಸ್ಪಂದನೆ), ಡಾ.ವಾರಿಜ ಎನ್.(ಶೈಕ್ಷಣಿಕ ಕ್ಷೇತ್ರ), ಸುಶೀಲ ಸೋಮಶೇಖರ್ (ಸಂಘಟನೆ), ಡಾ.ಫಿರ್ದೋಸ್(ಶೈಕ್ಷಣಿಕ ಕ್ಷೇತ್ರ), ಡಾ.ಅಪ್ಸರಿ ಬಾನು ಎಂ. (ವೈದ್ಯಕೀಯ ಕ್ಷೇತ್ರ), ಮೀನಾ ಪಿಂಟೊ ಕಲ್ಯಾಣಪುರ(ಸಮಾಜ ಸೇವೆ), ಫರ್ಝಾನ ಎಂ.(ಸಾಮಾಜಿಕ ಸ್ಪಂದನೆ), ಲಲಿತಾ ಪೂಜಾರಿ ಕೊರವಡಿ (ಕರಕುಶಲ ಕಲೆ), ಸುಜಾತಾ ಅಂದ್ರಾದೆ(ಸಿನಿಮಾ, ರಂಗಭೂಮಿ ನಟಿ), ಶೈಲಾ ಎಸ್.ಪೂಜಾರಿ(ಸಾಮಾಜಿಕ ಸ್ಪಂದನೆ), ಮಂಜುಶ್ರೀ ರಾಕೇಶ್ ಕಟಪಾಡಿ (ಪತ್ರಿಕೆ ಮತ್ತು ದೃಶ್ಯ ಮಾಧ್ಯಮ ಸೇವೆ) ಮೆಕ್ಲೆಗ್ ಮಾನಾದಿಗೆ ಮಲ್ಪುನ ಲೇಸ್ ಲಾ ಅಟ್ಟನೆ ಮಲ್ದೆರ್.

ಕುಂದಾಪುರ ಶಾಸಕೆರಾಯಿನ ಹಾಲಾಡಿ ಶ್ರೀನಿವಾಸ ಶೆಟ್ಟಿ ಸಾಧಕಿಯೆರೆಗ್ ಮಾನದಿಗೆ ಮಲ್ಪರೆ ಉಲ್ಲೆರ್. ಪ್ರತಿಷ್ಠಾನದ ಕಾರ್ಯಾಧ್ಯಕ್ಷ ಆನಂದ ಸಿ.ಕುಂದರ್ ಇನಾಮು ಪಟ್ಟುನ ಲೇಸ್ ನಡಪಾದ್ ಕೊರ್ರೆ ಉಲ್ಲೆರ್. ಇಂದುವೇ ಪೊರ್ತುಡುಪೊಂಜೊವ್ಲೆಗಾದ್ ಜಿಲ್ಲಾ ಮಟ್ಟದ ಮೆಹಂದಿ ಸ್ಪರ್ಧೆ ಬೊಕ್ಕ ಸಂಗೀತ ಕುರ್ಚಿ ಪಂಥೋ ಅಟ್ಟನೆ ಮಲ್ದೆರ್.ಐರ್ದ್ ಬೊಕ್ಕ ಸಾಂಸ್ಕೃತಿಕ ಸಿಂಚನ ಕಾರ್ಯಕ್ರಮ ನಡಪರೆ ಉಂಡು .

ಮೆಹಂದಿ ಪಂಥೋ ಅರಬಿಕ್ ಬೊಕ್ಕ ಭಾರತೀಯ ಶೈಲಿ ರಡ್ಡ್ ವಿಭಾಗಡ್ ನಡಪರೆ ಉಂಡು. ಈ ಪಂತೋಡು ಗೆಂದಿನಕ್ಲೆಗ್ ಪ್ರತ್ಯೇಕವಾದ್ ಸುರುತ್ತ ಇನಾಮು 3,000 ರೂ., ರಡ್ಡನೇ ಇನಾಮು 2,000ರೂ., ಮೂಜಾನೆ ಇನಾಮು 1,000ರೂ. ಬೊಕ್ಕ ನಾಲ್ ಜನಕ್ ಸಮಾಧಾನಕರ ಬಹುಮಾನ ಕೊರ್ರೆ ಉಂಡು.ಸಂಗೀತ ಕುರ್ಚಿ ಪಂತೋಡು ಸುರುತ್ತ ಇನಾಮು 1,000ರೂ., ರಡ್ಡನೇಇನಾಮು 500ರೂ. ಪನವು ಕೊರ್ದು ಮಾನದಿಗೆ ಮಲ್ಪರೆ ಉಲ್ಲೆರ್.

ಪಂತೋಡು ಪಾಲ್ ಪಡೆಯರೆ ಇಚ್ಛೆ ಮಲ್ಪುನಕುಲು ಮಾ.19 ತಾರೀಖ್ ದ ಉಲಯಿ ದೂರವಾಣಿ ಸಂಖ್ಯೆ 7829729340, 7483946578 ನೊಂದಾವಣೆ ಮಲ್ಪೊಡು .ಈ ಲೇಸ್ ನ್ ಅಕಾಡೆಮಿ ಬೊಕ್ಕ ಥೀಂ ಪಾಕ್‌ನ ಯೂಟುಬ್ ಚಾನಲ್ ಬೊಕ್ಕ ಫೇಸ್ಬುಕ್ಕ್ ಡ್ ನೇರ ಪ್ರಸಾರ ಮಲ್ಪುವ ಪಂದ್ ಪೂರ್ಣಿಮ ತೆರಿಪಾಯೆರ್ .

ಸುದ್ದಿಗೋಷ್ಠಿಡ್ ಅಕಾಡೆಮಿ ಸದಸ್ಯ ನಝೀರ್ ಪೊಲ್ಯ ಪಾಲ್ ಪಡೆದ್ ಇತ್ತೆರ್ .