Sun. Nov 22nd, 2026

ಕಾಸ್ರೋಡ್ ಸುದ್ದಿ | Kasargod News

ಪ್ರವೀಣ್ ನೆಟ್ಟಾರ್ ನ್ ಕೆರಿನ ಕೇಸ್: 100 ಪೊಲೀಸೆರೆಗ್ ಪ್ರಶಂಸನಾ ಪತ್ರ

ಕುಡ್ಲ: ಸುಳ್ಯ ತಾಲೂಕ್ ಬೆಳ್ಳಾರೆದ ಬಿಜೆಪಿ ಕಾರ್ಯಕರ್ತೆ ಪ್ರವೀಣ್ ನೆಟ್ಟಾರ್ ನ್ ಕೆರಿನ ಕೇಸ್ ಗ್ ಬೆನ್ತಿನ ಸುಮಾರ್ 100 ಪೊಲೀಸೆರೆಗ್ ಪಶ್ಚಿಮ ವಲಯ ಐಜಿಪಿ ದೇವಜ್ಯೋತಿ ರೇ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಖುಷಿಕೇಶ್ ಭಗವಾನ್ ಸೋನಾವಣೆ ಕುಡ್ಲ ದಕ್ಷಿಣ ಕನ್ನಡ ಜಿಲ್ಲಾ ಪೊಲೀಸ್ ಸಮುದಾಯ ಭವನಡ್ ಇನಿ ಪ್ರಶಂಸನೀಯ ಪತ್ರ ಪಟ್ಟಿಯೆರ್.

ಕುಂದಾಪುರ: ಬೊಡೆದಿನ್ ಕೆರ್ದ್ ಜೂವ ದೆತೊಂದಿನ ಕಂಡನಿ

ಕುಂದಾಪುರ: ಕಂಡಿನಿ ಒರಿ ಬೊಡೆದಿನ್ ಕೆರ್ದ್ ಆಯಿಬೊಕ್ಕ ತಾನ್ ಲ ಜೂವ ದೆತ್ತೊನಿನ ಘಟನೆ ಒಡಿಪು ಜಿಲ್ಲೆದ ಹೆಮ್ಮಾಡಿದ ದೇವಲ್ಕುಂದಡ್ ನಡತ್ಂಡ್.

ಮೂಲತಃ ಶಿವಮೊಗ್ಗ ಜಿಲ್ಲೆದ ಸಾಗರ ತಾಲೂಕ್ ದ ಪೂರ್ಣಿಮಾ (೩೮) ತೀರ್ ಪೋಯಿನಾರ್. ಅರೆನ್ ಕೆರ್ದ್ ಜೂವ ದೆತೊಂದಿನ ಕಂಡನಿ ರವಿ ಆಚಾರ್ಯ (೪೨) ಪಂದ್ ಗುರ್ತಿಸಾದೆರ್.

ಕಂಡನಿ ಬೊಡೆದಿ ಲಡಾಯಿ ಮಲ್ತ್ ದಿತ್ತ್ ದ್, ಬೊಡೆದಿನ್ ಕರ್ಬದ ಪ್ಲೇಟ್ ಕೆರ್‍ತೆರ್. ಕುಂದಾಪುರ ಗ್ರಾಮಾಂತರ ಠಾಣೆಡ್ ಪ್ರಕರಣ ದಾಖಲಾತ್ಂಡ್.

ಒಂಜೇ ಪೆಟ್ಟ್ ಗ್ ಕರ ದರ್ತಿನ ಕುಡ್ಲದ ಕಮಿಷನರ್ ಎನ್.ಶಶಿಕುಮಾರ್

ಕುಡ್ಲ: ಪಾಂಡೇಶ್ವರ ವಠಾರಡ್ ರೊಸಾರಿಯೊ ಮೈದಾನಡ್ ಕೈತಲ್ ದಕುಲ್ ಆಯೋಜನೆ ಮಲ್ತಿನ ಫೆಸ್ಟ್ ಡ್ ಕುಡ್ಲ ಕಮಿಷನರ್ ಎನ್. ಶಶಿಕುಮಾರ್ ಮೇರ್ ಪಾಲ್ ಪಡೆದ್ ಒಂಜೇ ಪೆಟ್ಟ್ ಗ್ ಕರ ದರ್ತಿದೆರ್.

ಬಯ್ಯದ ಪೊರ್ತುಗು ಸಾದಿಡ್ ವಾಕಿಂಗ್ ಬತ್ತಿನ ಮೆರೆನ್ ಗೊಬ್ಬುನ್ ತುವೊಂದಿಪ್ಪುನಗ ಅಲ್ಪ ಇತ್ತಿನ ಜವನ್ಯೆರ್ ಕರ ದರ್ಪರೆ ಪಂಡೆರ್. ಉಂದೆನ್ ಸ್ವೀಕಾರ ಮಲ್ತಿನ ಕಮಿಷನರ್ ಕೈಕ್ ಕೋಲ್ ಪತ್ತೊಂದು ಕರ ದರ್ತ್‌ದೆರ್.

Mangalore police commissioner Sashi Kumar plays in Mosaru Kudekay:

Mangalore: At a fest organised at Pandeshwara Rosario Maidan in the city, police commissioner Sashi Kumar participated.

He was welcomed to participate in the Mosaru Kudekay celebrations and he readily agreed and hit the pot in the first attempt.

ಕುಡ್ಲ: ಅಮೃತಭಾರತಿಗ್ ತುಲು ಪುರ್ಪ ಬೂಕು ಅರ್ಪಣೆ..!!

ಪ್ರಧಾನಿ, ರಾಷ್ಟ್ರಪತಿ, ಕೇಂದ್ರ ಗೃಹಮಂತ್ರಿ ಭಾರತದ ಮಾತ ರಾಜ್ಯದ ಮುಖ್ಯಮಂತ್ರಿಲೆಗ್ ನಮ್ಮ ದೇಶದ ೭೫ನೇ ಸ್ವಾತಂತ್ರ್ಯ ಅಮೃತ ಮಹೋಚ್ಚಯದ ನೆಂಪುಗ್ ತುಲು ಪುರ್ಪ ಕಡಪಾದ್ ತುಲು ಕರ್ನಾಟಕ ಅಂಚನೆ ಕೇರಳ ರಾಜ್ಯಡ್ ರಾಜ್ಯದ ಅಧಿಕೃತ ಭಾಷೆ ಬೊಕ್ಕ ೮ನೇ ಪರಿಚ್ಛೇದಗ್ ಸೇರ್ಸಾಯರೆ ಮನವಿ.

ಜೈ ತುಲುನಾಡ್(ರಿ) ಸಂಘಟನೆ ಒಡಿಪು, ಕುಡ್ಲ, ಕಾಸ್ರೋಡ್ ಸೇರೊಂದು ತುಲು ಬಾಷೆಗ್ ರಡ್ಡನೇ ಪ್ರಾದೇಶಿಕ ಬಾಷೆದ ಮಾನ್ಯತೆ ತಿಕ್ಕೊಡು ಬೊಕ್ಕ ನಮ್ಮ ಸಂವಿಧಾನದ ೮ನೇ ಪರೀಚ್ಛೇದಗ್ ಸೇರ್ಸಾವೊಡ್ ಪನ್ಪಿನ ಬೇಡಿಕೆಗ್ ದೀದ್ ಮಸ್ತ್ ಕಾರ್ಯಕ್ರಮಲೆನ್ ಮಲ್ತೊಂದು ಬೈದ್ಂಡ್. ಉಂದೆತ್ತ ದುಂಬುದ ಪಜ್ಜೆಯಾದ್ ತಾ.೨೧-೦೮-೨೦೨೨ತ್ತ ಐತಾರದಾನಿ ಕುಡ್ಲದ ಕೆನರಾ ಕಾಲೇಜ್ ದ ಚಾವಡಿಡ್ ತುಲು ಪುರ್ಪ ಪನ್ಪಿನ ತುಲು ಕವನ ಸಂಕಲನನ್ ತುಲು ಲಿಪಿಡ್ ಮುದ್ರಿಸಾದ್ ಬುಡುಗಡೆ ಮಲ್ತೆರ್. ಉಂದೆಟ್ ತುಳುನಾಡಿದ ಪೆರಿಯ ಅಂಚನೆ ಎಲ್ಯಕ್ಲೆನ ನೂದೆರ್‍ದ್ ಎಚ್ಚ ಕವಿಕ್ಲೆನ ದೇಶ ಭಕ್ತಿಗೀತೆ, ತುಲುನಾಡ ಗೀತೆ, ಸೈನಿಕೆರ್‍ನ ಬಗೆಟ್ ಬರೆತಿನ ಗೀತೆ, ಕೃಷಿಗ್ ಸಂಬಂಧಪಟ್ಟಿನ ಅಂಚನೆ ಸಮಾಜಗ್ ಎಡ್ಡೆ ಸಂದೇಶನ್ ಸಾರುನ ಕಬಿತೆಲು ಉಂಡು. ಅಯಿತೊಟ್ಟುಗ್ ಈ ಬೂಕುಡ್ ಪರಮ ಪೂಜ್ಯ ಪೇಜಾವರ ಮಠಾಧೀಶೆರಾಯಿನ ಶ್ರೀ ಶ್ರೀ ಶ್ರೀ ವಿಶ್ವ ಪ್ರಸನ್ನ ಸ್ವಾಮೀಲೆನ ಅಂಚನೆ ಧರ್ಮಸ್ಥಳದ ಧರ್ಮಾಧಿಕಾರಿಲಾಯಿನ ಡಾ. ವೀರೇಂದ್ರ ಹೆಗ್ಗಡೆರ್‍ನ ಆಶೀರ್ವಚನ ಉಂಡು.

ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಸದಸ್ಯೆರ್ ಆಯಿನ ಡಾ. ಆಕಾಶ್ ರಾಜ್ ಜೈನ್ ಮುನ್ನುಡಿನ್ ಬರೆದಿತ್ತ್ ದ್, ಸಂಘಟನೆದ ದ್ಯೇಯೋದ್ಧೇಶನ್ ಸಂಘಟನೆದ ಅಧ್ಯಕ್ಷೆರ್ ಆಯಿನ ಅಶ್ವತ್ ತುಲುವೆ ಅಂಚನೆ ಕಾರ್ಯದರ್ಶಿ ಅವಿನಾಶ್ ಬರೆತ್ತೆರ್. ಬೂಕ್ ದ ಬೆರಿ ಬರವುನು ಕನ್ನಡ ಸಾಹಿತ್ಯ ಪರಿಷತ್ ಉಂದೆತ್ತ ಮಾಜಿ ರಾಜ್ಯಾಧ್ಯಕ್ಷೆರ್ ಹರಿಕೃಷ್ಣ ಪುನರೂರು ಬರೆತೆರ್.

ತುಲುನಾಡ್ ದ ಕಲೆ ಸಂಸ್ಕೃತಿನ್ ಸುರುತ್ತ ಪುಟಟ್ ಪಾಡ್ದ್, ನಮ್ಮ ದೇಶದ ಸ್ವಾತಂತ್ರ್ಯದ ಅಮೃತ ಮಹೋಚ್ಚಯದ ನೆಂಪುದೊಟ್ಟುಗ್ ಬುಡುಗಡೆ ಆವೊಂದಿಪ್ಪುನ ಈ ಕೃತಿನ್ ತುಲು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಆಯರೆ ಸಾಕಾರ ಕೊರೊಡು, ೮ನೇ ಪರಿಚ್ಛೇದಗ್ ಸೇರ್ಸಾವೊಡು ಪನ್ಪಿನ ಬೇಡಿಕೆದೊಟ್ಟುಗ್ ನಮ್ಮ ದೇಶದ ಮಾನ್ಯ ಪ್ರಧಾನಿಲೆಗ್ ರಾಷ್ಟ್ರಪತಿ, ಕೇಂದ್ರ ಗೃಹಮಂತ್ರಿ ಅಂಚನೆ ಭಾಷೆ ಬೊಕ್ಕ ಸಂಸ್ಕೃತಿನ್ ಇಲಾಖೆಗ್ ಬೊಕ್ಕ ಮಾತ ರಾಜ್ಯದ ಮುಖ್ಯಮಂತ್ರಿಲೆಗ್ ಕಡಪಾದ್ ತುಲು ಭಾಷೆಗ್ ಮಾನ್ಯತೆ ಕೊರೊಡು ಪನ್ಪಿನ ಬಿನ್ನಾಪುನ್ ಮಲ್ತ್ ದೆರ್. ಅವ್ವೇ ರೀತಿಡ್ ಒಡಿಪು, ಕುಡ್ಲ, ಕಾಸ್ರೋಡ್ ದ ಸಂಸದೆರ್ ಮಾತ ಶಾಸಕೆರ್ ಜಿಲ್ಲಾಧಿಕಾರಿಲೆಗ್ ಕಡಪಾದ್ ಕೊರ್ದು ನಮ್ಮ ಈ ಪೊರ್ಂಬಾಟಡ್ ಕೈ ಜೋಡಿಸಾವೊಡ್ ಪಂದ್ ಬಿನ್ನಾಪು ಮಲ್ತ್ ದೆರ್. ಅಂಚನೆ ಈ ಮುಖೇನ ತುಲು ಲಿಪಿನ್ ದೇಶಗ್ ಪಸೆರಾವೊಡು.

ಬೂಕು ಬುಡುಗಡೆದ ಲೇಸ್ ದ ಉದಿಪನನ್ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿ ಉಂದೆತ್ತ ಅಧ್ಯಕ್ಷೆರ್ ದಯಾನಂದ ಜಿ ಕತ್ತಲ್ಸಾರ್ ಮಲ್ತೆರ್. ಜೈ ತುಲುನಾಡ್ ಸಂಘಟನೆ ತುಲು ಭಾಷೆ,ಸಂಸ್ಕೃತಿ, ಆಚಾರ-ವಿಚಾರನ್ ಒರಿಪಾಯರೆ ಬೋಡಾದ್ ಮಲ್ತೊಂದು ಉಪ್ಪುನ ಬೇಲೆ ಮೆಚ್ಚೊಡಾಯಿನ. ತುಲು ಭಾಷೆಗ್ ಪ್ರಾದೇಶಿಕ ಭಾಷಾ ಮಾನ್ಯತೆ ಅಂಚನೆ ೮ನೇ ಪರಿಚ್ಛೇದಗ್ ಸೇರ್ಸಾವುನ ಮುಕ್ಲೆನ ಬೇಡಿಕೆ ಸರಿಯಾಯಿನವ್. ಈ ಪೊರ್ಂಬಾಟಗ್ ಯಾನ್ ಏಪಲ ಅಕುಲ್ನೊಟ್ಟುಗ್ ಉಲ್ಲೆ ಪಂದ್ ಪಂಡೆರ್. ಪೆರಿಯ ಪತ್ರಕರ್ತೆರ್ ಅಂಚನೆ ಸಾಹಿತಿಲಾಯಿನ ಚಿದಂಬರ ಬೈಕಂಪಾಡಿ ಕೃತಿ ಬುಡುಗಡೆ ಮಲ್ತ್ ದ್, ಈ ಬೂಕು ಒಂಜಿ ಪರಪೋಕು ಆಪಿನೆಟ್ಟ್ ಸಂದೇಹ ಇಜ್ಜಿ. ಅಕ್ಲೆನ ಪ್ರಯತ್ನಗ್ ಎಡ್ಡೆಯಾವಡ್ ಪಂಡೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಸದಸ್ಯೆರ್ ಆಯಿನ ಡಾ. ಆಕಾಶ್ ರಾಜ್ ಪಾತೆರ್ದ್, ಜೈ ತುಲುನಾಡ್ ಸಂಘಟನೆದ ಜವನೆರ್‍ನ ತುಳುನಾಡ್ದದ ಮಿತ್ತ್ ಮಸ್ತ್ ಮೋಕೆ ಉಂಡು. ಮಸ್ತ್
ಕೈಗಾರಿಕಾ ಸಂಸ್ಥೆಲು, ವಿಮಾನ ನಿಲ್ದಾಣ, ಬಂದರು, ರೈಲು ನಿಲ್ದಾಣಲು, ಮಹಾ ವಿದ್ಯಾಲಯ, ತಾಂತ್ರಿಕ ವಿದ್ಯಾಲಯ, ವೈದ್ಯಕೀಯ ಕಾಲೇಜ್ ಲು ತುಳುನಾಡ್ ದ ಮಣ್ಣ್ ಡ್ ಇತ್ತ್ ದ್ ಪುಗರ್ತೆನ್ ಪಡೆತ್ತ್ಂಡ್. ಆಂಡ ಬುಳೆಯಿನ ಈ ಮಣ್ಣ್ ಗಾದ್ ದಾದ ಮಲ್ತ್ ದ್ಂಡ್ ?. ಕನಿಷ್ಠ ಪಕ್ಷ ತುಲು ಲಿಪಿತ್ತ ನಾಮ ಫಲವೆನ್ ಆಂಡಲಾ ಪಾಡೊಲಿತ್ತ್ಂಡ್. ತುಲು ಭಾಷೆಡ್ ಸಾಹಿತ್ಯ ಕೃಷಿ ಆವೊಡ್, ದೇಶಡ್ ತುಲು ಸಂಸ್ಕೃತಿದ ಪರಿಚಯ ಅವೊಡ್, ಆ ಬಗೆಟ್ ತುಲು ಲಿಪಿತ್ತ ಕಬಿತೆಲೆನ ಕೋಂದೆನ್ ಕನತಿನವ್ ಬಾರೀ ಎಡ್ಡೆಂತ್ತಿನ ಬೇಲೆ ಪಂಡೆರ್.
ತುಲು ಲಿಪಿ ಇಜ್ಜಿ ಪನ್ಪಿನ ಒಂಜಿ ಪೊರ್ತು ಇತ್ತ್ಂಡ್. ತುಲು ಲಿಪಿ ಉಂಡು ಅವೆನ್ ಕಲ್ಪಾದ್ ಕೊರ್ಪಿನ ಬೇಲೆ ಜೈ ತುಲುನಾಡ್ ಸಂಘಟನೆರ್‍ದ್ ಆವೊಂದ್ಂಡು. ಮೊಕ್ಲೆನ ಬೇಲೆಡ್ ಜಯ ತಿಕ್ಕಡ್ ಪಂಡೆರ್.
ಕುಡ್ಲ ಕಾರ್ಪೊರೇಟರ್ ವರುಣ್ ಚೌಟ ಲೇಸ್ ಗ್ ಎಡ್ಡೆಪ್ಪು ಬಯಕ್ಯೆರ್. ತುಲು ಭಾಷೆ ಗಟ್ಟಿಯಾವೊಡಾಂಡ ತುಲು ಸಾಹಿತ್ಯ ಮುಖ್ಯ, ಇತೊಂಜಿ ತುಲು ಬರೆಪುನಕುಲ್ ಕಬಿತೆಲೆನ್ ಸಂಗ್ರಹಣೆ ಮಲ್ತ್ ದ್ ಅವೆನ್ ತುಲು ಲಿಪಿಟ್ ಮುದ್ರಿಸಾದ್ ತುಲು ಭಾಷೆಗೆ ತಿಕ್ಕೊಡಾಯಿನ ಸ್ಥಾನ ಮಾನನ್ ಕೊರೊಡ್ ಅಯಿಟ್ ಸಾಕಾರ ಮಲ್ಪೊಡು ಪನ್ಪಿನ ಬಿನ್ನಾಪುದೊಟ್ಟುಗು ಇನಿ ದೇಶದ ಪ್ರಧಾನಿ ರ್ದ್ ಪತ್ ದ್ ಮಾತ ರಾಜ್ಯದ ಮುಖ್ಯಮಂತ್ರಿಲೆಗ್ ಪೋಪಿಲೆಕ್ಕ ಮಲ್ಪುನ ಬೇಲೆ ಎಡ್ಡೆಂತಿನವು ಪಂದ್ ಕೆನರಾ ಕಾಲೇಜ್ ದ ಪ್ರಾಧ್ಯಾಪಕೆರ್ ಆಯಿನ ರಘು ಇಡ್ಕಿದು ಪಂಡೆರ್. ಕಾರ್ಯಕ್ರಮದ ಅಧ್ಯಕ್ಷತೆನ್ ಜೈ ತುಲುನಾಡ್(ರಿ) ಸಂಘಟನೆ ಉಪಾಧ್ಯಕ್ಷೆರ್ ಹರಿಕಾಂತ್ ಕಾಸ್ರೋಡ್ ಒಯಿಸ್ ದಿತ್ತೆರ್ .

ಪ್ರೇಮಾ.ಎಂ.ಕಣ್ವತೀರ್ಥ ಮೆರೆನ ದೇವೆರ್‍ನ ಸುಗಿಪುದೊಟ್ಟುಗು ಲೇಸ್ ಸುರು ಆದ್, ಮಾಹಿತಿ ಬೊಕ್ಕ ತಂತ್ರಜ್ಞಾನ ಮೇಲ್ವಿಚಾರಕೆರ್ ಸುಮಂತ್ ಹೆಬ್ರಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಸಂಘಟನೆದ ಪ್ರಧಾನ ಕಾರ್ಯದರ್ಶಿ ಅವಿನಾಶ್ ಮುಕ್ಕ ಪ್ರಸ್ತಾವನೆ ಮಲ್ತ್ ದ್ ಸಮಿತಿದ ಮೇಲ್ವಿಚಾರಕಿ ಕುಶಲಾಕ್ಷಿ.ವಿ.ಕುಲಾಲ್ ಕಣ್ವತೀರ್ಥ ಕೃತಿ ಪರಿಚಯನ್ ಮಲ್ತೆರ್. ಕಬಿತೆಲೆನ್ ಬರೆದ್ ಸಾಕಾರ ಮಲ್ತಿನ ಕವಿಲೆಗ್ ನೆಂಪುದ ಓಲೆನ್ ಪಟ್ಟುನ ಲೇಸ್ ನ್ ರಕ್ಷಿತ್ ರಾಜ್ ಕಲ್ಲಾಪು ಮಲ್ತೆರ್.

ಕಾರ್ಯಕ್ರಮಡ್ ಇಂಚಿಪ್ಪಗ್ ದೇವೆರೆ ಪಾದೊ ಸೇರಿನ ತುಲುಭಾಷೆ, ಸಾಹಿತ್ಯ ಅಂಚನೆ ಎಡ್ಡೆಗಾದ್ ಬೇಲೆ ಮಲ್ತಿನ ಉದಯ ಧರ್ಮಸ್ಥಳ ಮೆರೆನ ಭಾವಚಿತ್ರೊಗು ಪೂ ಪಾಡ್ದ್ ಮೌನ ಪ್ರಾರ್ಥನೆ ಮಲ್ತೆರ್. ಜೈ ತುಲುನಾಡ್ ದ ಕೋಶಾಧಿಕಾರಿ ರಕ್ಷಿತ್ ಕೋಟ್ಯಾನ್ ಸೊಲ್ಮೆ ಸಂದೈತ ಮಲ್ತೆರ್. ತುಳು ಸಾಹಿತ್ಯ ಸಮಿತಿ ಉಪ ಮೇಲ್ವಿಚಾರಕಿ ಗೀತಾ ಲಕ್ಷ್ಮೀಶ್ ಲೇಸ್ ಸುದಾರಿಕೆ ಮಲ್ತೆರ್.

ತುಲು ಸಂಸ್ಕೃತಿ ಸಮಿತಿದ ಡಾ. ರವೀಶ್ ಪಡುಮಲೆ, ಜೈ ತುಲುನಾಡ್ ಸಂಘಟನೆದ ಉಪಾಧ್ಯಕ್ಷೆರ್ ವಿಶು ಶ್ರೀಕೆರ, ಸಂಘಟನೆದ ಸಂಘಟನಾ ಕಾರ್ಯದರ್ಶಿ ಸದಾಶಿವ ಮುದ್ರಾಡಿ, ಉಪ ಸಂಘಟನಾ ಕಾರ್ಯದರ್ಶಿ ಪೃಥ್ವಿ ತುಲುವೆ, ಪ್ರಚಾರ ಸಮಿತಿಯ ವಿನಯ್ ರೈ ಕುಡ್ಲ, ಸ್ಥಾಪಕ ಸಮಿತಿದ ಕಿರಣ್ ತುಲುವೆ ಅಂಚನೆ ಜೈ ತುಲುನಾಡ್ ಸಂಘಟನೆದ ಸದಸ್ಯೆರ್ ಬೊಕ್ಕ ಪೆರಿಯ, ಎಲ್ಯ ಕವಿಮಿತ್ರೆರ್ ಲೇಸ್ ಡ್ ಇತ್ತೆರ್.

Mangalore: Tulu Purpa book released

Jai Tulunadu (R) association has always taken lead in promoting Tulu language.It has always advocated that Tulu should be given the statues of second language and be included in the 8th schedule of the constitution.It has organised many programs to this effect .

It had organised a program on 21-08-2022 at Canara College hall were a book containing short Tulu poems in Tulu script named “Tulu Purpa ” was released.The book also contains poems on patriotism, folk songs of Tulunadu and such others.The book has been compiled with the blessings of Sri Vishwaprassana Swamiji of Pejawar mutt and Dharmasthala Veerendra Heggade.

The book has been written with support from Dr Akash Raj member of Karnataka Tulu Sahitya Academy, Ashwath Tuluva and Avinash. The book will be forwarded to the PM Narendra Modi,the President, to the CM’s of all states and such other dignitaries with an appeal to include Tulu in the eighth schedule. The book was released by the president of Tulu Sahitya Academy Dayanand Kattalsar.

ತುಳು ಬಾಸೆದ ಬುಲೆಚ್ಚಿಲ್ ಗ್ ಸರ್ಕಾರ ಎಚ್ಚಿನ ಅನುದಾನ ಕೊರೊಡು: ಬಿ.ಕೆ.ಹರಿಪ್ರಸಾದ್

ಡಾ.ಹರಿಶ್ಚಂದ್ರ ಸಾಲ್ಯಾನ್ ಬರೆತಿನ ” ದೈವದ ಮದಿಪು” ತುಳು ಬೂಕು ಬುಡುಗಡೆ

ಮುಲ್ಕಿ: ಒಂಜಿ ಜಾಗೆದ ಬಾಸೆ ಪಂಡ ಅವು ಕಾಲಿ ಬಾಸೆ ಅತ್ತ್, ಅವು ಅಲ್ತ ಸಾಹಿತ್ಯ ಬೊಕ್ಕ ಸಂಸ್ಕೃತಿ. ಆ ಸಾಹಿತ್ಯ, ಸಂಸ್ಕೃತಿದ ಬುಲೆಚ್ಚಿಲ್ ಆವೊಡ್ಡ ರಾಜ್ಯ ಸರಕಾರದ ಅನುದಾನ ಅಗತ್ಯ ಬೋಡು. ನಮಕ್ಕ್ ಸ್ವಾತಂತ್ರ್ಯ ತಿಕ್ ದ್ 75 ವರ್ಸ ಆಂಡಲ ತುಳು ಬಾಸೆದ ಬುಲೆಚ್ಚಿಲ್ ಆತಿಜಿ, ಸಂವಿಧಾನ 8ನೇ ಪರಿಚ್ಚೇದೊಗು ಸೇರ್ದಿಜಿ. ವೀರಪ್ಪ ಮೊಯ್ಲಿಯೆರ್ನ ಆಡಳಿತದ ಪೊರ್ತುಡು ತುಳು ಸಾಹಿತ್ಯ ಅಕಾಡೆಮಿ ಆದಿತ್ತ್ಂಡ್. ಅವೆತ್ತ ಬುಲೆಚ್ಚಿಲ್ ಗ್ ಬೋಡಾಯಿನಾತ್ ಅನುದಾನಲ ಸರ್ಕಾರ ಕೊರ್ದಿತ್ತ್ಂಡ್. ಆಂಡ ಇತ್ತೆ ತುಳು ಅಕಾಡೆಮಿಗ್ ಸರಕಾರೊರ್ದು ತಿಕ್ಕುನ ಅನುದಾನ ಭಾರಿ ಕಮ್ಮಿಆತ್ಂಡ್. ಬೇತೆ ಬಾಸೆದ ಬುಲೆಚ್ಚಿಲ್ ಗ್ ಆಯಾ ರಾಜ್ಯ ಸರ್ಕಾರ ಬೋಡಾಯಿನಾತ್ ಅನುದಾನ ಕೊರೊಂದುಂಡು.ಕರ್ನಾಟಕ ಸರ್ಕಾರಲ ತುಳು ಬಾಸೆದ ಬುಲೆಚ್ಚಿಲ್ ಗಾದ್ ತುಳು ಅಕಾಡೆಮಿಗ್ ಎಚ್ಚಿನ ಅನುದಾನದ ಸಕಾಯ ಕೊರೊಡು ಪಂದ್ ವಿಧಾನ ಪರಿಷತ್ ದ ಪ್ರತಿಪಕ್ಷ ನಾಯಕೆರ್ ಬಿ.ಕೆ.ಹರಿಪ್ರಸಾದ್ ಒತ್ತಾಯ ಮಲ್ತೆರ್.

ಆರ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಚಾವಡಿಡ್ ಸನಿಯಾರ ಕಾಂಡೆ ಹೊಸ ಅಂಗಣ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್ ಬರೆತಿನ “ಮದಿಪು” ಬೂಕು ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ತುಳು ನಮ್ಮ ರಾಜ್ಯದ ರಡ್ಡನೇ ಮಾಮಲ್ಲ ಬಾಷೆ. ಕೊಡಗು ಮೂಜನೇ ಮಲ್ಲ ಬಾಸೆ. ದೈವೊಲೆನ್ ಆರಾಧನೆ ಮಲ್ಪುನೆನ್ ತುಳುವೆರ್ ಎಲ್ಯಿರ್ದಿಂಚನೇ ಕಲ್ತೊಂದು ಬೈದೆರ್. “ದೈವದ ಮದಿಪು’ ದಂಚಿನ ಬೂಕುಲೆನ ಸಾಹಿತ್ಯ ಓದುಂಡ ತಿಳಿವಳಿಕೆ ಬರ್ಪುಂಡು. ಜ್ಞಾನ ಎಚ್ಚಾಪುಂಡು. ನೆರ್ದ್ ದುಂಬು ಕಲ್ಪುನೆಟ್ಟ್ ದ.ಕ ಬೊಕ್ಕ ಒಡಿಪು ಜಿಲ್ಲೆಗ್ ಸುರೂತ್ತ ತಾನ ತಿಕ್ಕೊಂದಿತ್ತ್ಂಡ್. ಆಂಡ ಇತ್ತೆ ಬೇತೆ ಕಾರಣೊಗು ತುಳುನಾಡ್ ದ ಪುದರ್ ಸುರೂಟ್ಟು ಬರ್ಪುಂಡು. ಧರ್ಮದ ಪುದರ್ ಡ್ ದ್ವೇಷ ಸಾಧನೆ ಮಲ್ಪಂದೆ ಮಾತೆರ್ಲ ಒಗ್ಗಟ್ಟಾದ್ ಎಡ್ಡೆಡ್ ಜೀವನ ಮಲ್ಪೊಡು ಪಂದ್ ಆರ್ ಕೆಬಿ ಪಾತೆರ ಪಂಡೆರ್.
ಲೇಸ್ ಡ್ ಮಲ್ಲ ಬಿನ್ನೆರಾದ್ ಧರ್ಮದರ್ಶಿ ಡಾ.ಹರಿಕೃಷ್ಣ ಪುನರೂರು, ಮಾಜಿ ಶಾಸಕೆರ್ ಅಭಯಚಂದ್ರ ಜೈನ್, ಜಿಲ್ಲಾ ಬಿಜೆಪಿ ಅಧ್ಯಕ್ಷೆರ್ ಸುದರ್ಶನ್ ಎಂ., ಮುಲ್ಕಿ ನಗರಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಯಕ್ಷಗಾನ ವಿದ್ವಾಂಸೆರ್, ಭಾಗವತೆರ್ ಸುರೇಂದ್ರ ಪಣಿಯೂರು, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ಬಿಲ್ಲವ ಸಂಘದ ಮಹಿಳಾ ವಿಭಾಗದ ಅಧ್ಯಕ್ಷೆರ್ ಸರೋಜಿನಿ ಸುವರ್ಣ ಮೊಕುಲು ಮಿತ್ತರ್ಮೆ ಇತ್ತೆರ್.


ಕಾಪು ಶಾಸಕೆರ್ ಲಾಲಾಜಿ ಮೆಂಡನ್ ಲೇಸ್ ದ ಗುರ್ಕಾರ್ಮೆ ಒಯಿಸೊಂದೆರ್.
ಮದಿಪು ಬೂಕುದ ಬರವುಗಾರೆ ಡಾ.ಹರಿಶ್ಚಂದ್ರ ಸಾಲ್ಯಾನ್ ಪ್ರಸ್ತಾವಿಕವಾದ್ ಪಾತೆರ್ದ್ , ಮದಿಪು ಎನ್ನ 16 ನೇ ಬೂಕು. ಅವೆನ್ ಮಾತೆರ್ಲ ದೆತೊಂದು ಓದುಲೆ ಪಂಡೆರ್.
ವಾಸು ಪೂಜಾರಿ ಚಿತ್ರಾಪು ದೇವೆರೆನ್ ಸುಗಿತೆರ್. ವಿಜಯ ಕುಮಾರ್ ಕುಬೆವೂರು ಬಿನ್ನೆರೆನ್ ಎದ್ಕೊಂಡೆರ್. ರವಿಚಂದ್ರ ಸೊಲ್ಮೆ ಸಂದಾಯೆರ್. ವೈ.ಎನ್.ಸಾಲ್ಯಾನ್ ಸಭೆ ಸುಧಾರಿಕೆ ಮಲ್ತೆರ್.

ಕುಂಪಲ 25 ನೇ ವರ್ಷದ ಶ್ರೀ ಕೃಷ್ಣ ಜನ್ಮಾಷ್ಟಮಿ ಉಚ್ಚಯದ ಉದಿಪನ ಲೇಸ್

ಕುಂಪಲ ಶ್ರೀ ಬಾಲಕೃಷ್ಣ ಮಂದಿರದ ಮುತಾಲಿಕೆಡ್ ನಡತಿನ ೨೫ ನೇ ವರ್ಷದ ಶ್ರೀ ಕೃಷ್ಣ ಜನ್ಮಾಷ್ಟಮಿ ಉಚ್ಚಯನ್ ಕರ್ನಾಟಕ ಸರಕಾರದ ಹಿಂದುಳಿದ ವರ್ಗದ ಸದಸ್ಯೆರ್ ಕೆ.ಟಿ. ಸುವರ್ಣ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ದೇರಳಕಟ್ಟೆ ಅಯ್ಯಪ್ಪ ಸ್ವಾಮಿ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಚಂದ್ರಹಾಸ್ ಅಡ್ಯಂತಾಯ, ಶ್ರೀ ಸೋಮನಾಥ ದೇವಲ್ಯದ ಮೊಕ್ತೇಸರೆರ್ ರಾಮ್ ದಾಸ್ ಸೋಮೇಶ್ವರ, ಮೆಸ್ಕಾಂ ಜಾಗೃತ ದಳದ ಅಧೀಕ್ಷಕೆರ್ ಪ್ರವೀಣ್ ಉಳ್ಳಾಲ್ ಬೈಲ್, ಗೋವನಿತಾಶ್ರಯದ ಟ್ರಸ್ಟಿ ರವಿ ರೈ ಪಜೀರ್, ಪ್ರಗತಿಪರ ಕೃಷಿಕೆರ್ ರಂಜಿತ್ ಸುಲಾಯ ಮಂಜನಾಡಿ, ಉದ್ಯಮಿ ಶ್ರೀನಿವಾಸ್ ಬೆಂಗ್ಲೂರು, ಬಾಲಕೃಷ್ಣ ಮಂದಿರದ ಅಧ್ಯಕ್ಷೆರ್ ಸತೀಶ್ ಕುಂಪಲ, ಗೌರವಾಧ್ಯಕ್ಷೆರ್ ಕೇಶವದಾಸ್ ಬಗಂಬಿಲ, ಉತ್ಸವ ಸಮಿತಿ ಅಧ್ಯಕ್ಷೆರ್ ಪ್ರಹ್ಲಾದ್ ಕುಮಾರ್ ಇಂದಾಜೆ ಪೊಂಜೊವ್ ಲೆನ ಸಮಿತಿದ ಅಧ್ಯಕ್ಷೆರ್ ಸುಶೀಲ.ಕೆ, ರಜತ ಮಹೋತ್ಸವ ಸಮಿತಿ ಗೌರವಾಧ್ಯಕ್ಷೆರ್ ಮೋಹನ್ ಶೆಟ್ಟಿ ಲೇಸ್ ಡ್ ಇತ್ತೆರ್. ಪ್ರವೀಣ್ ಎಸ್ ಕುಂಪಲ ಲೇಸ್ ಸುದಾರಿಕೆ ಮಲ್ತೆರ್.

ತುಳುನಾಡ ಟಾಕೀಸ್ ಡ್ ಸುರುವಾಂಡ್ “ಅಬತರ”

ಕುಡ್ಲ : ಬೊಳ್ಳಿ ಮೂವೀಸ್ ಬೊಕ್ಕ ಅವಿಕ ಪ್ರೊಡಕ್ಷನ್ ಡ್ ಅರ್ಜುನ್ ಕಾಪಿಕಾಡ್ ನಿರ್ದೇಶನಡ್ ತಯಾರ್ ಆಯಿನ ತುಳು ಪಿಚ್ಚರ್ “ಅಬತರ” ಇನಿ ತುಳುನಾಡ್ ಡ್ ಬುಡುಗಡೆ ಆಂಡ್.

ಅಬತರ ಪಿಚ್ಚರ್ ದ ನಿರ್ದೇಶಕೆ, ಹೀರೊ ಅರ್ಜುನ್ ಕಾಪಿಕಾಡ್ ಪಾತೆರ್ದ್, ಜನಕ್ಲೆಗ್ ಇಷ್ಟ ಆಪಿಲೆಕ್ಕ ಉಂದು ಸಂಪೂರ್ಣವಾದ್ ಕಾಮಿಡಿ ಇಪ್ಪುನ ಅಂಚನೆ ಸಮಾಜಗ್ ಎಡ್ಡೆ ಸಂದೇಶ ಕೊರ್ಪಿನ ಪಿಚ್ಚರ್ ಆದುಂಡು. ಪೆರಿಯ ಕಲಾವಿದೆರ್ ಆಯಿನ ನವೀನ್ ಡಿ ಪಡೀಲ್, ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರು, ಸಾಯಿಕೃಷ್ಣ ಈ ಪಿಚ್ಚರ್ ಡ್ ನಟನೆ ಮಲ್ತ್ ದೆರ್. ಅಂಚನೆ ಹೀರೊಯಿನ್ ಆದ್ ಗಾನ ಭಟ್, ಕ್ರಿಸ್ಟಿನಾ ಅಭಿನಯ ಮಲ್ತ್ ದೆರ್ ಪಂದ್ ಪಂಡೆರ್.

ಪುಗರ್ತೆದ ನಟೆ ಅರವಿಂದ ಬೋಳಾರ್ ಪಾತೆರ್ದ್ ಅಬತರ ತುಳು ಪಿಚ್ಚರ್ ದ ಕಥೆನ್ ಡಾ. ದೇವದಾಸ್ ಕಾಪಿಕಾಡ್ ಬರೆತೆರ್. ಅಂಚನೆ ತುಳುನಾಡ ಆ್ಯಕ್ಷನ್ ಕಿಂಗ್ ಅರ್ಜುನ್ ಕಾಪಿಕಾಡ್ ಅಭಿನಯದೊಟ್ಟುಗ್ ಸುರುತ್ತ ಸರ್ತಿ ನಿರ್ದೇಶನ ಮಲ್ತ್ ದೆರ್ ಪಂದ್ ಪಂಡೆರ್.

ಅಬತರ ಪಿಚ್ಚರ್ ದ “ಬಿನ್ನೆರ್ ಬೈದಿನ ಗೌಜಿಡ್…” ಪದ್ಯ ಪಿಚ್ಚರ್ ಬುಡುಗಡೆ ಆಪಿನ ದುಂಬೆ ಯೂಟ್ಯೂಬ್ ಡ್ 5 ಲಕ್ಷರ್ದ್ ಲ ಎಚ್ಚದ ವೀಕ್ಷಣೆ ಆತ್oಡ್.

ಈ ಪೊರ್ತುಡು ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್, ಐವನ್ ಡಿಸೋಜ, ಛಾಯಾಗ್ರಾಹಕೆರ್ ವಿಷ್ಣು ಪ್ರಸಾದ್, ಜೇಕೋಬ್, ಕಾರ್ಯಕಾರಿ ನಿರ್ಮಾಪಕೆರ್ ಸಂದೀಪ್ ಶೆಟ್ಟಿ, ನಿಖಿಲ್ ಸಾಲ್ಯಾನ್ ನಿರ್ಮಾಪಕೆರ್, ವೀರಾಜ್ ಅತ್ತಾವರ ಸಹನಿರ್ಮಾಪಕೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.

“Abatara” movie in the theatres from today in Tulunadu

Mangalore: “Abatara” Tulu movie under the Bolli movies banner and under the Avika productions directed by Arjun Kapikad has been released in Tulunadu today.

Arjun Kapikad who has directed is in the lead role too. Speaking at to the press he said that the movie was a fun filled comedy with a message to the society.Senior Tulu stars Arvind Bolar, Bojaraj Vamanjoor ,Sai Krishna and Naveen D Padil also figure in the movie.The female lead is Gana Bhat and Christina .

Arvind Bolar added that the story line is written by Dr Devdas Kapikad and action king Arjun Kapikad is directing for the first time. A song of the movie released on YouTube some time back has gained five lakh views.

ವರಕೋಡಿ ಯಕ್ಷಕಲಾ ಸಂಘದ ಲೆಕ್ಕೊಡು ಸ್ವಾತಂತ್ರ್ಯ ದಿನಾಚರಣೆ ಬೊಕ್ಕ ಕೆಸರುಗದ್ದೆ ಕ್ರೀಡಾಕೂಟ

ಯಕ್ಷಕಲಾ ಸಂಘ ವರಕೋಡಿ ಬಡಗಬೆಳ್ಳೂರು ಉಂದೆತ್ತ ಮುತಾಲಿಕೆಡ್ ಯಕ್ಷಧಾಮದ ಜಾಗೆಡ್ ದೇಶದ ಸ್ವಾತಂತ್ರ್ಯ ದಿನಾಚರಣೆದ 75 ವರ್ಷದ ಅಮೃತ ಮಹೋತ್ಸವದ ಪೊರ್ತುಡು ಧ್ವಜಾರೋಹಣ ನಡತ್ಂಡ್.

ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ ಬಡಗಬೆಳ್ಳೂರು ಮುಲ್ಪದ ನಿವೃತ್ತ ಅಧ್ಯಾಪಕೆರ್ ಗಂಗಾಧರ ರೈ ಕಮ್ಮಾಜೆ ಮೇರ್ ಧ್ವಜಾರೋಹಣ ಮಲ್ತ್ ರ್. ಅಯಿಬೊಕ್ಕ ವರಕೋಡಿ ಬಾಕಿಮಾರ್ ಕಂಡೊಡು ಕೃಷಿಕೆರ್ ಅಯಿನ ಸಂಜೀವ ಶೆಟ್ಟಿ ಮೇರ್ ಕೆಸರುಗದ್ದೆ ಕ್ರೀಡಾಕೂಟ ಉದಿಪನ ಮಲ್ತೆ ರ್.

ಕೆಸರ್ ದ ಕಂಡೊಡ್ ಬೇತೆ ಬೇತೆ ಕ್ರೀಡಾ ಪಂಥೊಲು ನಡತ್ಂಡ್. ಬಯ್ಯಗ್ ನಡತಿನ ಮುಗಿತಲದ ಲೇಸ್ ಡ್ ಗೆಂದಿನಕ್ಲೆಗ್ ಇನಾಮು ಕೊರ್ಪಿನ ಲೇಸ್ ನಡತ್ಂಡ್. ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯಕ್ ಬತ್ತ್ ದ್ ಎಡ್ಡೆಪ್ಪುನ್ ಬಯಕ್ಯೆರ್.

ಮುಗಿತಲದ ಲೇಸ್ ಡ್ ಬಡಗ ಬೆಳ್ಳೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪ್ರಕಾಶ್ ಆಳ್ವ, ಬಡಗ ಬೆಳ್ಳೂರು ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಮಮತಾ ಪೂಜಾರಿ ಸೇರಿನಂಚನೆ ಮಸ್ತ್ ಜನ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕುಸಲ್ ಫ್ರೆಂಡ್ಸ್ ಕೂಪೆದ ಮುತಾಲಿಕೆಡ್ ತನ್ನಾಲ್ಮೆ ದಿನಾಚರಣೆ

ಕುಸಲ್ ಫ್ರೆಂಡ್ಸ್ ಕೂಪೆದ ಮುತಾಲಿಕೆಡ್ ಕುಸಲ್ ನಗರ ಕೊಂಡಾಣ ಮುಲ್ಪ ೭೫ನೇ ವರ್ಸದ ತನ್ನಾಲ್ಮೆ ದಿನಾಚರಣೆದ ಅಮೃತ ಉಚ್ಚಯದ ಲೆಕ್ಕೊಡು ಧ್ವಜಾರೋಹಣ ನಡತ್ಂಡ್.

ಊರುದ ಪೆರಿಯೆರ್ ಅಂಚನೆ ಲೇಸ್ದ ಗುರ್ಕಾರ್ಮೆದ ಸ್ಥಾನ ವಹಿಸೊನಿನ ಶಿವ ಪೂಜಾರ ಧ್ವಜರೋಹಣ ಮಲ್ತೆರ್. ಈ ಪೊರ್ತುಡು ಪಾತೆರಿನ ಆರ್, ನಮ್ಮ ದೇಶಗ್ ೭೫ನೇ ವರ್ಸದ ತನ್ನಾಲ್ಮೆ ದಿನಾಚರಣೆದ ಅಮೃತ ಉಚ್ಚಯದ ಸಂಭ್ರಮ. ದೇಶೊಗು ದೇಶನೆ ಐಸಿರಡ್ ಮಿನ್ಕೊಂದು ಉಂಡು. ಮುಲ್ಪ ಸೇದಿಂಚಿನ ಜನಕ್ಲೆನ್ ತೂನಗ ಮಸ್ತ್ ಖುಷಿಯಾಪುಂಡು ಅಂಚನೆ ಅವೆತೋ ಬೀರೆರ್ ದೇಶದ ಸ್ವಾತಂತ್ರ್ಯಗ್ ಬೋಡಾದ್ ಪೂರ್ಂಬಾಟ ಮಲ್ತ್ ದ್ ತನ್ನ ಪ್ರಾಣ ಕಳೆಯೊಂದೆರ್ ಅಕ್ಲೆನ ತ್ಯಾಗ ಪೊರ್ಂಬಾಟದ ಫಲವಾದ್ ದೇಶ ಸ್ವಾತಂತ್ರ್ಯ ಪಡೆಯೊಂದುಂಡು.

ಈ ಪೊರ್ತುಡು ಅಕ್ಲೆನ್ ಮಾತಾ ನೆನಪು ಮನ್ಪುನ ನಮ್ಮ ಕರ್ತವ್ಯ ಪಂಡೆರ್. ಲೇಸ್ ಡ್ ವಾರ್ಡ್ ಕೌನ್ಸಿಲರ್ ದೀರಜ್ ಕುಸಲ್ ನಗರ, ಪೆರಿಯಕುಲು ಆಯಿನ ನಾರಾಯಣ, ಮಾಧವ ಇತ್ತೆರ್. ನಿತಿನ್ ಬತ್ತಿಂಚಿ ಬಿನ್ನೆರೆನ್ ಎಂದ್ಕೊಂದು ಸಭೆ ಸುಧಾರಿಕೆ ಮಲ್ತೆರ್.

ಆದರ್ಶ ಮಿತ್ರ ಮಂಡಳಿ ಕೊಲ್ಯ ಸೋಮೇಶ್ವರ ಮುತಾಲಿಕೆಡ್ ಸ್ವಾತಂತ್ರ್ಯ ಅಮೃತ ಮಹೋಚ್ಚಯ

ಆದರ್ಶ ಮಿತ್ರ ಮಂಡಳಿ ಕೊಲ್ಯ ಸೋಮೇಶ್ವರ ಮುಕ್ಲೆನ ಲೆಕ್ಕೊಡು ಭಾರತ ಸ್ವಾತಂತ್ರ್ಯದ ಅಮೃತ ಮಹೋಚ್ಚಯದ ಧ್ವಜಾರೋಹಣ ಕಜ್ಜ ಕಾಂಡೆ ೮.೩೦ಗ್ ಕೊಲ್ಯ ಶ್ರೀ ಶಾರದಾ ಸಭಾ ಸದನದ ಕೈತಲ್ ನಡತ್ಂಡ್.

ನಿವೃತ್ತ ಯೋಧೆರ್ ಕೆ. ಗೋಪಿನಾಥ್ ಕುಂಪಲ ಮೇರ್ ಧ್ವಜಾರೋಹಣ ಮಲ್ತೆರ್. ಕಾರ್ಯಕ್ರಮದ ಗುರ್ಕಾರ್ಮೆನ್ ಆದರ್ಶ ಮಿತ್ರ ಮಂಡಳಿ ಕೊಲ್ಯ ಉಂದೆತ್ತ ಅಧ್ಯಕ್ಷೆರ್ ರಾಯಿನ ಹೇಮಂತ್ ಕುಮಾರ್ ಕೊಲ್ಯ ವಹಿಸೊನ್ಯೆರ್. ಮಲ್ಲ ಬಿನ್ನೆರಾದ್ ಸಾರ್ವಜನಿಕ ಶ್ರೀ ಶಾರದಾ ಮಹೋತ್ಸವ ಸಮಿತಿ ಕೊಲ್ಯ ಉಂದೆತ್ತ ಅಧ್ಯಕ್ಷೆರ್ ಹರೀಶ್ ಪೂಜಾರಿ ಕೊಲ್ಯ, ಗೌರವಾಧ್ಯಕ್ಷೆರ್ ಸೀತಾರಾಮ ಬಂಗೇರ ಕೊಲ್ಯ ಅಂಚನೆ ಶ್ರೀ ಶಾರದಾ ಮಹಿಳಾ ಮಂಡಳಿ ಕೊಲ್ಯ ಉಂದೆತ್ತ ಅಧ್ಯಕ್ಷೆರ್ ಮಂಜುಳಾ ಬಾಲಕೃಷ್ಣ ಕೊಲ್ಯ ಲೇಸ್ ಡ್ ಇತ್ತೆರ್. ಪ್ರಕಾಶ್ ಎಚ್ ಕೊಲ್ಯ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಹೃತ್ವಿಕ್ ಕೊಲ್ಯ ಸೊಲ್ಮೆ ಸಂದೈತ ಮಲ್ತೆರ್. ಹರೀಶ್ ಕೊಲ್ಯ ನಿರೂಪಣೆ ಮಲ್ತೆರ್.

(ವರದಿ : ಸಂತೋಷ್ ಅಂಬ್ಲಮೊಗರು)

You Missed