ಕಾರ್ಲದ ಸುದ್ದಿ Karkala News

ಮಳಲಿ ಬಿಲ್ಲವ ಸಂಘ ಉದಿಪನದ ಲೆಪ್ಪೋಲೆ ಬುಡುಗಡೆ ಲೇಸ್

ಕುಡ್ಲ: ಬ್ರಹ್ಮಶ್ರೀ ನಾರಾಯಣ ಗುರು ಬಿಲ್ಲವ ಸಮಾಜ ಸೇವಾ ಸಂಘ ಮಳಲಿ ವಲಯದ ಉದಿಪನ ಬೊಕ್ಕ ಪದ ಪ್ರಧಾನ ಲೇಸ್‌ದ ಲೆಪ್ಪೋಲೆನ್ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್ ಐತಾರ ಬುಡುಗಡೆ ಮಲ್ತೆರ್.

ಸಂಘದ ನಿಯೋಜಿತ ಗೌರವಾಧ್ಯಕ್ಷೆರ್ ವಿಶ್ವನಾಥ ಪೂಜಾರಿ, ಯೋಗೀಶ್ ಪೂಜಾರಿ, ಹರಿಶ್ಚಂದ್ರ ಬಿರಾವು, ನಿಯೋಜಿತ ಅಧ್ಯಕ್ಷೆರ್ ಕೇಶವ ಪೂಜಾರಿ, ಕಾರ್ಯದರ್ಶಿ ಸಚಿನ್ ಸಾಲ್ಯಾನ್ ಮಟ್ಟಿ, ಕೋಶಾಧಿಕಾರಿ ಮೋಹನದಾಸ್, ಒತ್ತು ಕೋಶಾಧಿಕಾರಿ ದಯಾನಂದ ಪೂಜಾರಿ ಮಳಲಿ ಸೈಟ್, ಸಂಘಟನಾ ಕಾರ್ಯದರ್ಶಿ ನೀಲಯ್ಯ ಪೂಜಾರಿ, ಪೊಂಜೋವುಲೆನ ಘಟಕದ ನಿಯೋಜಿತ ಕಾರ್ಯದರ್ಶಿ ವಾಣಿ ಕೈಕಂಬ ಸೇರಿನಂಚನೆ ಮಸ್ತ್ ಜನ ಲೇಸ್‌ಡ್ ಇತ್ತೆರ್.

ಮಳಲಿ ಬಿಲ್ಲವ ಸಂಘ ಪನ್ಪಿನ ಪೊಸ ಸಂಘ ಡಿ.25 ಕ್ಕ್ ಕಾಂಡೆ 10.30 ಗ್ ಕೇಂದ್ರದ ಮಾಜಿ ಸಚಿವೆರ್ ಬಿ. ಜನಾರ್ದನ ಪೂಜಾರಿ ಉದಿಪನ ಮಲ್ಪರೆ ಉಲ್ಲೆರ್. ಸಭಾ ಕಾರ್ಯಕ್ರಮದ ಲೇಸ್‌ಡ್ ಆರ್ಯ ಈಡಿಗ ಮಹಾಸಂಸ್ಥಾನ ಮಠ ಸೋಲೂರು ಮಠತ್ತ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಆಶೀವರ್ಚನ ಮಲ್ಪರೆ ಉಲ್ಲೆರ್. ಸಂಘದ ನಿಯೋಜಿತ ಅಧ್ಯಕ್ಷೆರ್ ಕೇಶವ ಪೂಜಾರಿ ಅಧ್ಯಕ್ಷತೆ ವಹಿಸೊನರೆ ಉಲ್ಲೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಪದ್ಮರಾಜ್ ಆರ್, ಪದಪ್ರದಾನ ಮಲ್ಪರೆ ಉಲ್ಲೆರ್.

ಹಿಂದುಳಿದ ವರ್ಗ ಬೊಕ್ಕ ಸಮಾಜ ಕಲ್ಯಾಣ ಇಲಾಖೆದ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ, ವಿಧಾನ ಪರಿಷತ್ ಸದಸ್ಯೆರ್ ಕೆ. ಹರೀಶ್ ಕುಮಾರ್, ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಸಮಿತಿ ಅಧ್ಯಕ್ಷೆರ್ ಚಿತ್ತರಂಜನ್ ಗರೋಡಿ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಬಯ್ಯ 6.30 ಗಂಟೆಗ್ ನಡಪುನ ಸಭಾ ಕಾರ್ಯಕ್ರಮಡ್ ಶಾಸಕೆರ್ ಡಾ. ವೈ. ಭರತ್ ಶೆಟ್ಟಿ, ಉಮಾನಾಥ ಕೋಟ್ಯಾನ್, ರಾಜೇಶ್ ನಾಯಕ್, ಬಿಜೆಪಿ ದ.ಕ. ಜಿಲ್ಲಾಧ್ಯಕ್ಷ ಸುದರ್ಶನ್ ಬೆದ್ರ, ಶ್ರೀ ನಾರಾಯಣಗುರು ವಿಚಾರ ವೇದಿಕೆ ರಾಜ್ಯಾಧ್ಯಕ್ಷ ಸತ್ಯಜಿತ್ ಸುರತ್ಕಲ್, ಬಿಲ್ಲವ ಮಹಾಮಂಡಲ ಅಧ್ಯಕ್ಷೆರ್ ರಾಜಶೇಖರ್ ಕೋಟ್ಯಾನ್, ಗೆಜ್ಜೆಗಿರಿ ಕ್ಷೇತ್ರದ ನಿಕಟಪೂರ್ವ ಅಧ್ಯಕ್ಷೆರ್ ಜಯಂತ್ ನಡುಬೈಲು ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ರಾಜಶ್ರೀ ಟಿ. ರೈ ಪೆರ್ಲ ಬರೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ; ತುಳು ಸಾಹಿತ್ಯೊಗು ತುಳು ಪತ್ರಿಕೆನೇ ಬೆರಿಬಲ : ಡಾ|ಧನಂಜಯ ಕುಂಬ್ಳೆ

ತುಳು- ಕನ್ನಡ ಬರವುಗಾರ್ತಿ, ಸಂಶೋಧಕಿ ರಾಜಶ್ರೀ ಟಿ. ರೈ ಪೆರ್ಲ ಮೇರ್ ಮೊಡೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ ಲೇಸ್ ನ. 25 ತಾರೀಕ್ ಸುಕ್ರಾರ ಮಧ್ಯಾಹ್ನ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕಾ ಚಾವಡಿಡ್ ನಡತ್ಂಡ್.

ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಮಾನಾದಿಗೆದ ಸಂಪೊಲಿಗೆದಾರ್ ಮುಲ್ಕಿ ಕರುಣಾಕರ ಶೆಟ್ಟಿ ಬೂಕು ಬುಡುಗಡೆ ಮಲ್ತೆರ್. ಆಯಿರ್ದ್ ಬೊಕ್ಕ ಪಾತೆರಿನ ಆರ್, ತುಳು ಸಂಸ್ಕೃತಿಡ್ ಬಚ್ಚಿರೆದ ರಡ್ಡ್ ಕವುಲೆಗ್ ಭಾರೀ ವಿಶೇಷ ಉಂಡು. ಅಂಚಾದ್ ಇನಿ ಬುಡುಗಡೆ ಆಯಿನ ರಡ್ಡ್ ಕವುಲೆ ಬೂಕುಲ ತುಳುನಾಡ ಇಲ್ಲ್ ಲು ಬೊಕ್ಕ ಪುಲಮರ್ದ್ ದ ಪೊರ್ಲುನು ತೋಜಾದ್ ಕೊರೊಂದುಂಡು. ಅಂಚೆನೆ ಅಂಕಣ ಬರವು ಬರೆಪಾದ್ ಈ ಬೂಕು ಬೊಲ್ಪುಗು ಬರ್ರೆ ಕಾರಣ ಆಯಿನ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆ ತುಳು ಸಾಹಿತ್ಯನ್, ಸಾಹಿತಿಲೆನ್ ಬುಲೆಪಾವುನ ಬೇಲೆ ಮಲ್ತೊಂದುಂಡು ಪಂದ್ ಪಂಡೆರ್.

ಕುಡ್ಲ ವಿಶ್ವವಿದ್ಯಾನಿಲಯದ ಒತ್ತು ಪ್ರಾಧ್ಯಾಪಕೆರ್ ಡಾ| ಧನಂಜಯ ಕುಂಬ್ಳೆ ಪಾತೆರ್ದ್, ತುಳು ಸಾಹಿತ್ಯ ಬೊಕ್ಕ ತುಳು ಪತ್ರಿಕೆಗ್ ಕೈತಲ್ದ ಸಂಬಂಧ ಇಪ್ಪುಂಡು. ತುಳು ಸಾಹಿತ್ಯನ್ ಬರೆಯರೆ ತುಳು ಪತ್ರಿಕೆದಕುಲು ಏಪಲ ಬೆರಿಸಕಾಯ ಕೊರೊಡು. ಈ ಬೇಲೆನ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ ನಿರಂತರವಾದ್ ಮಲ್ತೊಂದು ಬರೊಂದುಂಡು. ಅವು ಪೆರ್ಮೆದ ಸಂಗತಿ ಪಂದ್ ಪಂಡೆರ್.

ರಡ್ಡ್ ಕವುಲೆ ಬೂಕು ಬರೆಯಿನ ರಾಜಶ್ರೀ ಟಿ. ರೈ ಪೆರ್ಲ ಪಾತೆರ್ದ್, ಇಡೇ ಮುಟ್ಟ ಎನ್ನ 11 ಬೂಕು ಬುಡುಗಡೆ ಆತ್ಂಡ್. ತುಳು ಭಾಷೆದ ಬಗೆಟ್ಟ್ ಪನೊಡಾಂಡ ಮಸ್ತ್ ಉಂಡು. ಕಾಸ್ರೋಡುದ ತುಳುನ್ ಒರಿಪಾವೊಡು ಪಂದ್ ಅಲ್ಪದ ರೀತಿಡ್ ಈ ಬೂಕುನ್ ಬರೆತೆ. ಟೈಮ್ಸ್ ಆಫ್ ಕುಡ್ಲ ಅವೆನ್ ಪ್ರಕಟ ಮಲ್ದ್ಂಡ್. ಇರ್ವತೈನ್ ಕಂತುಲು ಅಂಕಣ ಬರವು ಆದ್ ಪ್ರಕಟ ಆಂಡ್. ಪೊಡಿ ಪೊಡಿ ಬರವುಲು ಬಿರ್ಕ್‌ದ್ ಪೋಪುನ ಬೊಡ್ಚಿ ಪನ್ಪಿನ ಉದ್ದೇಶಡ್ ಆಯಿನ್ ಒಂಜಿ ಬೂಕು ಮಲ್ತ್‌ದ. ಈ ಬೂಕುಗು ಪೊರ್ಲ ಮುನ್ನುಡಿ ದೀಯ ಪಂದ್ ಪಂಡೆರ್.
ಈ ಪೊರ್ತುಡು ರಾಜಶ್ರೀ ರೈ ಮೆರೆನ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ವತಿರ್ದ್ ಮಾನಾದಿಗೆ ಮಲ್ತೆರ್.

ಮಲ್ಲ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲದ ಪ್ರಬಂಧಕೆರ್ ಭುವನ ದಿನೇಶ್ ಕುಂಪಲ, ಮುಖ್ಯ ಪ್ರಬಂಧಕೆರ್ ಪವನ್ ರಾಜ್, ಸಹ ಸಂಪಾದಕೆರ್ ಯಶೋಧರ ಕೋಟ್ಯಾನ್ ಲೇಸ್‌ಡ್ ಇತ್ತೆರ್.

ಯುವ ಸಾಹಿತಿ ಸನ್ನಿಧಿ ಟಿ. ರೈ ಪೆರ್ಲ ದೇವೆರೆನ್ ಸುಗಿತ್ ದ್ ಬೊಕ್ಕ ಬೂಕುದ ಪೊಲಬುನು ಮಲ್ತೆರ್. ಈ ಪೊರ್ತುಡು ರಾಜಶ್ರೀ ರೈ ಮೆರೆನ ಯಜಮಾನೆರ್ ತಾರನಾಥ ರೈ, ಮಗೆ ಧ್ರುವ ಕಾರ್ತಿಕೇಯ, ಪ್ರಜಾವಾಣಿ ವರದಿಗಾರೆರ್ ವಿಕ್ರಂ ಕಾಂತಿಕೆರೆ ಬೊಕ್ಕ ಟೈಮ್ಸ್ ಆಫ್ ಕುಡ್ಲ ಪತ್ರಿಕಾ ಸಿಬ್ಬಂದಿ ವರ್ಗದಕುಲು ಇತ್ತೆರ್.

ದೀಕ್ಷಿತಾ ಮಧ್ಯ ಮಾನಾದಿಗೆ ಪತ್ರ ಓದಿಯೆರ್. ನಿರೀಕ್ಷಾ ಸಸಿಹಿತ್ಲು ಸೊಲ್ಮೆ ಸಂದೈತ ಮಲ್ತೆರ್. ದೀಕ್ಷಿತಾ ಕುರ್ನಾಡ್ ಲೇಸ್ ಸುಧಾರಿಕೆ ಮಲ್ತೆರ್.

ಡಿ. 2 ಕ್ಕ್ ತುಳುಟ್ಟ್ ಬುಡುಗಡೆ ಆಯರೆ ಉಂಡು ಕಾಂತಾರ

ಕುಡ್ಲ: ಪುಗರ್ತೆದ ಕಾಂತಾರ ಪಿಚ್ಚರ್ ಡಿ.2 ಕ್ಕ್ ತುಳುಟ್ಟ್ ಬುಡುಗಡೆ ಆಯರೆ ಉಂಡು. ಕಾಂತಾರ ಇತ್ತೆ ಬುಡುಗಡೆ ಆಯಿನ ಮಾತ ಭಾಷೆಲೆಡ್ ಎಡ್ಡೆ ರೀತಿದ ಪ್ರದರ್ಶನ ತೋಜಿದ್ ಬತ್ತಿತ್ತ್‌ದ್ ಓಟಿಟಿಡ್‌ಲ ಬುಡುಗಡೆ ಆಯರೆ ಉಂಡು. ತುಳು ಕಾಂತಾರದ ಟ್ರೈಲರ್ ಬುಡುಗಡೆ ಆತ್ಂಡ್.

ಹಾವಂಜೆ: ಮಹತೋಬಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ದೀಪೋಚ್ಚಯದ ಗೌಜಿ

ಒಡಿಪು ಜಿಲ್ಲೆ ಹಾವಂಜೆದ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಕಾರ್ತಿಕ ಮಾಸದ ಲೆಕ್ಕೊಡು ನ.23 ತಾರೀಕ್‌ಗ್ ದೀಪೋಚ್ಚಯದ ಗೌಜಿ ನಡತ್ಂಡ್.

ಹಾವಂಜೆ ಗ್ರಾಮ ವಿಕಾಸ ಸಮಿತಿ ಅಂಚನೆ ಹಿಂದು ಜಾಗರಣ ವೇದಿಕೆ ಹಾವಂಜೆ ಮುತಾಲಿಕೆಡ್ ಕೊಳಲಗಿರಿ ಬೊಕ್ಕ ಗೋಳಿಕಟ್ಟೆರ್ದ್ ಪಿದಾಡ್ದ್ ಹಾವಂಜೆ, ಕೀಳಿಂಜೆದ ಭಕ್ತಾದಿಲು ಪಾದಯಾತ್ರೆ ಮುಕೇನ ದೇವಲ್ಯಗ್ ಬತ್ತೆರ್. ದೀಪೋಚ್ಚಯದ ಲೆಕ್ಕೊಡು ಶ್ರೀ ಉಮಾಮಹೇಶ್ವರ ಮಹಿಳಾ ಭಜನಾ ಮಂಡಳಿದ ಸದಸ್ಯೆರೆರ್ದ್ ಭಜನಾಮೃತ ಕಾರ್ಯಕ್ರಮ ನಡತ್ಂಡ್ ಅಂಚನೆ ದೇವಲ್ಯಡ್ ಭಕ್ತೆರ್ ಸೇರೊಂದು ತುಡರ್ ಅರ್ಲಾದ್ ವಿಶೇಷ ಪೂಜೆ ನಡತ್ಂಡ್.

ಈ ಪೊರ್ತುಡು ಪಾತೆರಿನ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಸುರೇಶ್ ಬಿ ಶೆಟ್ಟಿ, ಹಾವಂಜೆದ ಪರಪೋಕುಡು ಉಂದುವೇ ಸುರೂತ್ತ ಸರ್ತಿ ಪಾದಯಾತ್ರೆ ಸೇವೆ ನಡತ್ತ್‌ದಿತ್ತ್‌ದ್ ಕುಷಿತ್ತ ವಿಚಾರ ಪಂದ್ ಪಂಡೆರ್. ಪಾದಯಾತ್ರೆದ ಜಬದಾರಿನ್ ಸತ್ಯನಾರಾಯಣ ಆಚಾರ್ಯ ಗೋಳಿಕಟ್ಟೆ, ಅಶೋಕ್ ಶೇಡಿಗುಳಿ, ಚೇತನ್ ಆಚಾರ್ಯ ಕೊಳಲಗಿರಿ ವಹಿಸ್ ದಿತ್ತೆರ್.

ಮುಂಡ್ಕೂರು: ಅಧಿಕಾರಿಲೆನ ನಿರ್ಲಕ್ಷ್ಯರ್ದಾವರ ಪೊಂಜೊವುಗ್ ಕನ ಆದ್ ಒರಿದಿನ ಪೊಸ ಇಲ್ಲ್‌ದ ಬೇಲೆ

ಮುಲ್ಕಿ: ಕಿನ್ನಿಗೋಳಿದ ಮುಂಡ್ಕೂರು ಗ್ರಾ.ಪಂ. ವ್ಯಾಪ್ತಿದ ದೇವಲ್ಯದ ಕೈತಲ್ ಇಪ್ಪುನ ಮಸ್ತ್ ಬಡವೆರ್ ಆಯಿನ ಪೊಂಜೊವು ವಸಂತಿ ಪನ್ಪಿನರೆನ ಇಲ್ಲ್ ಬೂರುನ ಸ್ಥಿತಿಟ್ಟ್ ಉಂಡು. ಪಂಚಾಯತ್ ಅಧಿಕಾರಿಲೆನ ಭರವಸೆರ್ದ್ ಪೊಸ ಇಲ್ಲ್ ನಿರ್ಮಾಣದ ಬೇಲೆ ಆವೊಂದಿತ್ತ್ಂಡಲ ಒವ್ವೇ ರೀತಿದ ಯೋಜನೆದ ಕಾಸ್ ಮಂಜೂರು ಆವಂದಿನ ಕಾರಣ ಇಲ್ಲದ ಬೇಲೆ ಅಂಚನೆ ಒರಿದ್ಂಡ್.

ಮುಲ್ಕಿದ ಜೀವನ್ ಶೆಟ್ಟಿ ಸುಮಾರ್ 1,40,000 ರೂ ಕಾಸ್‌ನ್ ಸಾಮಾಜಿಕ ಜಾಲತಾಣದ ಮುಕೇನ ದಾನಿಲೆರ್ದ್ ಒಟ್ಟು ಮಲ್ತ್‌ದ್ ಪಣವುದ ಸಕಾಯ ಮಲ್ತಿತ್ತೆರ್. ಜೀವನ್ ಶೆಟ್ಟಿ ಪಂಚಾಯತ್ ಅಧಿಕಾರಿಲೆನ್ ಸಂಪರ್ಕಿಸಾದ್ ಸರಕಾರದ ಯೋಜನೆದ ಮುಕೇನ ಪೊಸ ಇಲ್ಲ್‌ದ ನಿರ್ಮಾಣಗ್ ಅನುಮತಿ ಕೊರ್ಪಿಲೆಕ್ಕ ಮಲ್ತ್‌ದಿತ್ತೆರ್. ಆಂಡ ಸರ್ಕಾರದ ಒವ್ವೇ ಸವಲತ್ತು ಇದ ಮುಟ್ಟ ತಿಕ್ಕ್‌ದಿಜಿ. ಅಧಿಕಾರಿಲೆನ ಬೇಜವಾಬ್ದಾರಿರ್ದ್ ಪೊಂಜೊವುಗ್ ಇಲ್ಲ್ ಕಟ್ಟರೆ ಆವಂದೇ ಕನ ಆದ್ ಒರಿದ್ಂಡ್.

ನ.28-29: ತೋಕೂರು ಸುಬ್ರಹ್ಮಣ್ಯ ದೇವಲ್ಯಡ್ ಷಷ್ಠಿ ಬಲಿ ಉಚ್ಚಯ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಮಣ್ಯ ದೇವಲ್ಯಡ್ ನ.28 ಬೊಕ್ಕ 29 ಗ್ ಪಂಚೆಮಿ ಬೊಕ್ಕ ಷಷ್ಠಿ ಮಹೋಚ್ಚಯದ ಬಲಿ ಉಚ್ಚಯ ನಡಪರೆ ಉಂಡು.

ದೇವಲ್ಯ ಸಂಪೂರ್ಣವಾದ್ ಜೀರ್ಣೋದ್ಧಾರ ಆವೊಂದಿಪ್ಪುನೆಡ್ದಾವರ ಕಾಮಗಾರಿದ ಬೇಲೆ ಆವೊಂದುಂಡು. ಈ ಸರ್ತಿ ದಾಲ ಗೌಜಿ ಇಜ್ಜಂದೆ ಷಷ್ಠಿ ಮಹೋಚ್ಚಯ ನಡಪರೆ ಉಂಡು. ಧ್ವಜಾರೋಹಣ, ಪೇಟೆ ಸವಾರಿ ಆದ್ ರಥೋಚ್ಚಯ ನಡಪುಜಿ. ನ. 28 ಗ್ ಮಧ್ಯಾಹ್ನ ನುಪ್ಪು ಸೇವೆ ಅಂಚನೆ ರಾತ್ರೆ ಬಾಲಾಲಯಡ್ ಬಲಿ ಉಚ್ಚಯ, ಮಹಾಪೂಜೆ ನಡಪರೆ ಉಂಡು. ನ.29 ಗ್ ಕಾಂಡೆ 10 ಗಂಟೆಗ್ ಮಹಾಪೂಜೆ ಅಂಚನೆ ನುಪ್ಪು ಸೇವೆ ನಡಪರೆ ಉಂಡು. ಪರಕೆದ ಸೇವೆಲು ಏಪದೆಲಕನೆ ನಡಪರೆ ಉಂಡು ಪಂದ್ ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪ್ರಕಟನೆಡ್ ತೆರಿಪಾದೆರ್.

ಗೇರುಕಟ್ಟೆ ಮಾರ್ಗದ ರಡ್ಡ್ ಗುಂಡಿ ಮುಚ್ಚಿನ ಸುಪ್ರೀತಾ ಪುನರೂರ್ ಕೂಟದಕುಲು

ಮುಲ್ಕಿ: ಕಾರ್ನಾಡ್ ಕೈತಲ್ದ ಗೇರುಕಟ್ಟೆದ ರಾಜ್ಯ ಹೆದ್ದಾರಿಡ್ ಇತ್ತಿನ ರಡ್ಡ್ ಮಲ್ಲ ಗುಂಡಿಲೆನ್ ಯುವ ಸಮಾಜಸೇವಕಿ ಸುಪ್ರೀತಾ ಪುನರೂರು ಬೊಕ್ಕ ಕೂಟದಕುಲು ಐತಾರ ರಾತ್ರೆ ಶ್ರಮದಾನದ ಮುಕೇನ ಮುಚ್ಚಿದೆರ್.

ಸುರಭಿ ಎಲೆಕ್ಟ್ರಾನಿಕ್ಸ್ ಸಿಬ್ಬಂದಿ ಕುಮಾರಿ ಸುಪ್ರೀತಾ ಪುನರೂರ್ ಬೊಕ್ಕ ಅರೆನ ಕೂಟದ ಸದಸ್ಯೆರಾಯಿನ ಸಚಿನ್, ನರೇಶ್, ರಮೇಶ್, ಸಂಪತ್, ಐಸನ್ ಡಿ’ಸೋಜಾ ಬೊಕ್ಕ ಮೂಲ್ಕಿ ಪೊಲೀಸ್ ಸಿಬ್ಬಂದಿ ವೀರೇಶ್ ಮೊಕುಲು ಕಾಂಕ್ರೀಟ್ ಪಾಡ್ದ್ ಮುಚ್ಚಿದೆರ್. ಮೊಕಲೆಗ್ ಸುರಭಿ ಎಲೆಕ್ಟ್ರಾನಿಕ್ಸ್ ಸಂಸ್ಥೆದ ಮಾಲಕೆರ್ ಜಾನ್ ಕ್ವಾಡ್ರಸ್ ಬೊಕ್ಕ ಕುಬೆವೂರ್‌ದ ಅಶ್ವಿನ್ ಮೊಕುಲು ಸಿಮೆಂಟ್ ಕೊರ್ದು ಸಾಕಾರ ಮಲ್ತೆರ್.

ಕಲ್ಲಮುಂಡ್ಕೂರು: ಇಲ್ಲ್ ಕಟ್ಟರೆ ಪನವುದ ಸಕಾಯ ಮಲ್ತಿನ ಸರ್ವೋದಯ ಫ್ರೆಂಡ್ಸ್

ಕಿನ್ನಿಗೋಳಿ: ಸರ್ವೋದಯ ಫ್ರೆಂಡ್ಸ್ ಕಲ್ಲಮುಂಡ್ಕೂರು ನೆತ್ತ ಸದಸ್ಯೆರ್ ರಕ್ಷಿತ್ ಪೂಜಾರಿ ಮೆರೆನ ಪೊಸ ಇಲ್ಲದ ನಿರ್ಮಾಣಗ್ ಸಂಘದ ಸರ್ವ ಸದಸ್ಯೆರೆರ್ದ್ ಒಟ್ಟು ಆಯಿನ 60,000 ರೂಪಾಯಿ ಪನವುನು ರಕ್ಷಿತ್ ಮೆರೆನ ಅಮ್ಮೆರ್ ಸಂಜೀವ ಪೂಜಾರಿ ಮೆರೆಗ್ ಕೊರಿಯೆರ್.